كون المفارك حبيبة يرد علية
ونبص گلبة يسولف شصار بجفاه
وكلمن يحب من طرف ولفة يجية
بوجه يترس حيرته وتمطر سماه
حضنه العشاك ما بيها حرام
اليحب من محبوبته يفصل غطاه
.
.
#شعراء_وذواقين_الشعر_الشعبي
#علي_رشم
#ابو_تراب

يمكن مو وكتها بَس بَعَـــدْ حبيت
لا والمشكلة ماتدري بيه انــتَ
وحق عيونك الماحاسبلها حساب
اليحب من طرف واحد يحترگ سكته
انا متعود اخذ دور اليبجون
بس دور المدلل ... ماتعودته
اول مره احس بروحي مو صياد
شفت شفايفك وسلاحي تيهته

#شعراء_وذواقين_الشعر_الشعبي
#احمدعاشور
#zuse

ربن وستفحلن دگاتك اوياي
واذا نفرش وسولف راسك يشيب
تحط بيه جرح وتريد ماصيح
وتگلي شدعوه اصبر باجر يطيب
احط رجلي بسلفكم ونطرد ليش
هلك وانته وسلفكم مو معازيب
عفت امي مريضه وسيرت ليك
ولگيت امك تچيم بالمكاتيب

#شعراء_وذواقين_الشعر_الشعبي
#بشارالاسمر
#zuse

مليت والله من السهر ما صافي بالي
مليت حتى من الكمر مليت من حالي
صغيرون بس شايل قهر والضحك مو مالي
يوجعني گلبي بلا سبب والدمعة بعيوني
رايد يجوني السافروا حت لو يبجوني
شايل گلب شو كمت احب حتى اليكرهوني
.
.
#شعراء_وذواقين_الشعر_الشعبي
#منقول
#ابو_تراب

حتى لو يكثر خرابك
حتى لو تقسي ضروفك
اني اشوف الدنيا بيك
شعندي غيرك حتى اعوفك
.
.
#شعراء_وذواقين_الشعر_الشعبي
#منقول
#ابو_تراب

سميتك محنة وعاطفة واشواگ
لهو تگضي وكت شتريد سميني
واخذ شتلة غرامك يا عشگ ياشوگ
بس عاگول صدگ ينبت بطيني
وخليني اعلة بختك اني ما مجبور
بيدي انحت الهي واكفر بديني
بلبل وبقفص لتحطني بالبستان
يا غصن اليميل بنار يچويني
كبرت اعلة السهر يل مرودك سجين
شلي بكحلة غرامك كون تعميني
العشگ عندي عشگ ما عندي هيج وهيج.
اتانيك واجيك وما اتانيني
ودرت وجهي اعلة نيتي وشفت ضلك فات
وعلة طينة خيالك غمست عيني

#شعراء_وذواقين_الشعر_الشعبي
#سميرصبيح
#zuse

رضا العبادي :
مو مِن لواك الشَتة ومحد فزعلك غطة
ضميتك بنَاري..؟
چَا توصل لمرحلة تعيرني بأسرَاري..؟

يرد علي ابو نؤاس :
خَاب انا زرع الجَبل متعلم اعله البرد
بَس انت َعايز دفو وحطيتني بنَارك
تگلهم اعيرك ولك ؟ وانا وحك عشرتَك
من اگعد لوحدي ماسُولف اسرارك ..

#شعراء_وذواقين_الشعر_الشعبي
#zuse

وكَع منك وجه بس انته عندك خير
ألي يدور بوجهك جم وجه يلكَه
ردتك تكَعد تصفي الضنون وياي
يا ضن النعوفه وياهو ألنشكَه
وأشطب يا حلم . . خل نفرض وجزيت
من راحات اديه شيمسح الشبكَه
رجعت اضحك عله اسنين الكَضن وياك
وعيون الشماته بفرحتي مصدكَه
شافوا ماي بيدي توقعوني أزكَيك
ما يدرون أطفي بشجره محتركَه
.
.
#شعراء_وذواقين_الشعر_الشعبي
#ايهاب_المالكي
#ابو_تراب

يمكن علية بشوفتك مستكثر
من تدير وجهك لو مدنك تعبر
نفسك هذاك وما تغير شي بيك
لو ما عيونك جا كلت كلك مر
.
.
#شعراء_وذواقين_الشعر_الشعبي
#عصام_كريم
#ابو_تراب

كالوا وصفه كتلهم عيونه كبار
شكد شام بركبته واكثر من الزار
مغرور وحلاته اليعشگ المغرور
كليب يدير وجهه وهو ما يندار
كلي تريدني تقدملي ذاك الباب
كتله وداعتك ما عندي لعب زغار
انا المو شمس وادخل من الشباچ
ابن عربي واعرف منين اطب الدار
.
.
#شعراء_وذواقين_الشعر_الشعبي
#سعد_شميل
#ابو_تراب

ما ناسيك بس والله الضروف هواي
واحس ب اثنينهن مشتاق ومقصر
انا لو عايفك ما جان افز بالليل
واشبك صورتك واثنينه نجمر
.
.
#شعراء_وذواقين_الشعر_الشعبي
#زيد_السومري
#ابو_تراب

انا من دنكت ما جنت ادور كاع
ولكن ثكلت الحسبات البالي
واجيت انت وكلتلك لا تدك الباب
ترى هو اليموت يموت للتالي
انا ردتك قبل من جان گلبي بخير
قبل لا اصيح ياهو يصير جتالي
قبل من جنت اغمض خاطر اتلكاك
بعدين افتهمت الظلمة تحلالي
بعدين افتهمت النجم ليش بعيد
اثاري الناس تكره كلمن يلالي
.
.
#شعراء_وذواقين_الشعر_الشعبي
#احمد_عاشور
#ابو_تراب

انه شوگي اليتعب وما يستراح
شمعه ضلت للصبح معلوگه
وشوگي لو يمطر على البر والسفاح
ينبت ابين النخل وعروگه
الزهدي والبرحي خذن نفس اللگاح
لكدن اشوف الفرق بعثوگه
لا تنوج للغزاله بلا سلاح
ولا تغير بگاع ما مسحوگه
ولا تنود ويه الغنه وغناك راح
والربابه الهزتك مخنوگه
النار هزت بالجدر والفوگ فاح
وروحي گامت لك واهي محروگه
طيني احمر وانت طينك بيه ملاح
وخل نشوف بياحديقه البوگه

#شعراء_وذواقين_الشعر_الشعبي
#محسن_الخياط
#zuse

خلصت سنه چانت مو سعيده..
بلكي انعوض بهاي الجديده..
وبعيده وياكم انطفيها الشموع..
وبس عند الله كلش مو بعيده...
وحگ عيونكم كل ما يجي الليل..
ما يخلص واقرى نفس القصيده.

#شعراء_وذواقين_الشعر_الشعبي
#منقول
#zuse

.
وصدفة نتلاكة و غريبين و نروح
چنه ما نعرف بعض و الله حرام
فركتك يحملها چا گلبي الرجيچ ؟
و علي يريدلها صبر مالت امام

( مستعد لو رديت من الجاهلية
ذنوب العرب لليوم كلهن علية )
.
.
#شعراء_وذواقين_الشعر_الشعبي
#زيد_السومري
#ابو_تراب

سيرنا يمهم نشكي الهموم
وتثاوبوا يردونا نكوم
.
.
#شعراء_وذواقين_الشعر_الشعبي
#موروث
#ابو_تراب

انا وياك واحد يم الاخر ضاع
لا موعد يلمنه ولا يطشنه وداع
تشح واتيمم بذكراك من اشتاك
واغرب وانحدر صوبك صلاة شراع
علية بعيد بس الشوك بية بعيد
والومك ليش ؟
الحجي مشامر بين اهل الغيم واهل الكاع

.
.
#شعراء_وذواقين_الشعر_الشعبي
#عقيل_العرد
#ابو_تراب

وأنه بلياك مثل الصوج
گلها تصيح مو بيه
وينگروني !
مثل القسمة
گل ما فرقو ولفَين تهموني
شيبة بـ گذلة العشاك
بالموعد يصبغوني •••

#شعراء_وذواقين_الشعر_الشعبي
#منقول
#zuse

اخاف يفوت عمري عليك
ويعفسة الهوى ويعتگ
ترة الديوان لو هجروه
بس البوم بي ينغگ
وترة من يكبر الرمان
طبعة يهيج يتفشگ
وترة من يبرد التنور
تلتم خبزنة وتلزگ
وبعد من يلتوي البسمار
مابي حييل من يندگ
ترد عمري ترد اردود.؟
تحوي اشراع المزگ...

#شعراء_وذواقين_الشعر_الشعبي
#محسن_الخياط
#zuse

يعوضك الله بغيرهم لو فارگوك
يجوز لو راحو حياتك تستقيم
گوم لم روحك وبلش من جديد
وگول( بسم الله الرحمن الرحيم)
شوفلك حب يستحق واتعب عليه
ولاتضل قافل تريد الا القديم
ودير بالك تقتنع لو رخصوك
دوم خليك انت عد روحك عظيم
ولاتفك بابك بعد لمن يجون
الوادم اختلفت والمسامح غشيم

#شعراء_وذواقين_الشعر_الشعبي
#علي_نافع
#zuse