.
شيبة ب لبن وبليل جنت التكطها
هسة ايدي بالماعون ما اشوف احطها
.
.
.
.
#شعراء_وذاوقين_الشعر_الشعبي
#محمد_موحان_السالمي
#ابو_تراب

.
ما اكدر اطلعك مني وارتاح
شيطلعه الوطن من رأس الاسرى
من اذكرنك ضفاير تخنك الروح
من اريد انساك لازم شعرة شعرة
بهواك اعصرني مني تطيح سعفات
حقي اشتاقلك لان روحي خضرة
سهم يركص بضلعي بيدي جف مي
جهنم بية تلحك وانت صحرة
اعرفك زين عفت الماي بالايد
وجه ما منطي الية انوب كطرة
تجي بشمره كبر شمره سما تروح
واضل ب اثنينهن مخنوك عبرة
تدري بجفني ليش مركص الليل
واذا نعس اكض ظهره واكسرة
حالف بالنجم ما مرة انساك
اذا اكرهك احس كاتلي كمرة
.
.
.
.
#شعراء_وذاوقين_الشعر_الشعبي
#علي_الشمري
#ابو_تراب

.
دوار دور الرحى افتر وانا المطحون
من عنده يابس خبز من عنده الي فافون
دوار كلشي اشتري كلشي الذي تبيعون
اشتري هم وحزن واشتري دمع عيون
واشتري حت لو جرح لجروحي تضيفون
دوار صار الظهر وانكطعوا اليمشون
والكاع صارت جمر تزامط باليدوسون
يا نايمين الظهر بح صوتي متكعدون ؟!
ولن صوت بية صرخ خليني انام الظهر شنهو انتوا متنامون
شلون نومي وانا اطفال عندي بعد ليهسة يتضورون
من الجوع بس القهر ضل تارس الماعون
.
.
.
.
#شعراء_وذاوقين_الشعر_الشعبي
#عباس_اللامي
#ابو_تراب

.
بعد ما نموت لازم من يجينا الموت
وعلية ممنوع يوصل يعبر لحدنه
اذا كوة يجينا بعازة الارواح
نضم البقن ونكلة ما عدنه
كضيت الناس كلها وما كضيت بيوم
بس كادر علينا شچلبت هدنه
مو بس الحرب خلصت حتى الناس
متنا هواي محد ميت بكدنه
.
.
.
.
#شعراء_وذاوقين_الشعر_الشعبي
#جبار_رشيد
#ابو_تراب

.
اليوم أول صباح الخير من دوني
اليوم عيونك الحلوات ما صبحن بعيوني
اليوم أول عرس على الكاع طش دمعي وخطف لوني
وانت وگلبك شكد ارد اعاتبكم
هذا شجم صبح مر اعلى فركتكم ؟
وانا ادري الشمع خلصان بس يومية ادوركم
وابرد واشتهي اشعلكم
وهذن نيرانكم بية وترس روحي كواغدكم
ولا اعقل والم الشيب واحركها رسايلكم
المهم ياهوه كعدكم ؟
.
.
.
.
#شعراء_وذاوقين_الشعر_الشعبي
#مثنى_كامل
#ابو_تراب

.
موالم والميتك ... وانت لافيت
وخربنا ولا انا اوافي ... وانت لا فيت
تلاكينا وجزينا ... وانتلافت
و واحد كل للاخر هاي هية
.
.
.
.
#شعراء_وذاوقين_الشعر_الشعبي
#اياد_عبدالله
#ابو_تراب

.
استاحشيته الدرب وعيوني غفلة بچن
وتلفتت وحدي ويا خوفي من اليجن
شرد انا اسولف بعد والبية ما ينحجن
ناسيني وانا الجنت بگلوبهم كاعد
لو ميت ولا شفت ملكاهم البارد
وكتلهم انا بشر ملجوم مو من جرح من الحجي الزايد
كالولي اسكت بعد والروح بيها طبع ما تسكت تعاند
.
.
.
.
#شعراء_وذاوقين_الشعر_الشعبي
#حسين_الحبتري
#ابو_تراب

.
تذكرني ... ؟ بس كلبك كون الذاكرة تسعفه
انا أول نبض دكيت بي وأول هوا ورجفه
لوحة وبيها نار وليل بلابل شاردة وزفه
انا المن خذت جفك كلشي ما بقى بجفه
وانا الضل اثر جدمك لهسة طابع بجتفه
جمع صورتي من الريح كض محارة العفه
الكالي بخيالك خيط فك سنين ملتفه
دور وين ماشي الموت واندل جرحي من نزفه
دور عن ملامح روح ملامح وجهي مختلفه
دور مثلي من ضليت ادور للدمع صرفه
من خليت بية احبابي والشمات تتشفه
صرت بموقف الينباك لحنه و واحد يعزفه
.
.
.
.
#شعراء_وذاوقين_الشعر_الشعبي
#ايهاب_المالكي
#ابو_تراب

.
اول مرة احس بروحي مو مالي
ابتساماتي ودمعتي بكيف البالي
يكتلني ب أدية وانعد وي الميتين
وترد روحي من اشمن عطر كتالي
الما يترس فراشه دموع قبل النوم
ما ينحسب عاشك حاله من حالي
العاشك من صدك ينعرف تالي الليل
من اكله احجيلها عنها يكوم ينعالي
ادري الما يحب ينعد ابن ادم ليش
يموت وما مشيب مو مثل حالي
والله الما يحب اي وقت سهلة ينام
ويسألونه ويكول الليل مو مالي
.
.
.
.
#شعراء_وذاوقين_الشعر_الشعبي
#حسين_المرياني
#ابو_تراب

.
الدنيا مو دنيا عشگ يا ابن الحلال
لا تخلينا بمحبتك ننجبر
انت ابن العافية وابن الدلال
واحنا ولد الموت ربانه الفقر
بينه وبينك فرق كلش جبير
وما نكول اسباب كل هذا الفرق
ما نكمل السالفة لحد الاخير
من الاساس وياك مسدودة الطرق
ويانا ما ترهم وما نرهم محال
وياك ما نكدر ندوم ونستمر
وياهو كلك بالسهل درب الوصال
وانت تدري دروبنا مورثة جمر
الدنيا مو دنيا عشك يا ابن الحلال
ولا تخلينا بمحبتك ننجبر
احنا عدنا الحب يعني الحب عذاب
ولازم من نحب نذب بالحب فلك
ولازم نحب باب بيتك والتراب
ونحب كلشي العايد وراجع الك
.
.
.
.
#شعراء_وذاوقين_الشعر_الشعبي
#جبار_رشيد
#ابو_تراب

.
لا على البال ولا على الخاطر
بغير وداع تريد تسافر ؟
ياما وياما عشنا سنين
سنين بحبك مرتاحين
تالي تخلي جفون الحبك يبقى مساهر
لا على البال ولا على الخاطر
كلشي محسبين احنا حسابه
بس ما حسبناك تروح
واليترك وردة ل احبابه
بليل الذكرى تضل تفوح
من كلت مسافر صدكني
گلبي وياك يريد يروح
وياما وياما عشنا سنين
سنين بحبك مرتاحين
تالي تخلي جفن الحبك يبقى مساهر
لا على البال ولا على الخاطر
.
.
.
.
#شعراء_وذاوقين_الشعر_الشعبي
#عباس_چيچان
#ابو_تراب
_

.
وراك تصير وحشة موت بالروح
بس الما يخاف بروحي يكعد
حلو وجة الفرح بس شفتي تكول
تبت وبطلت قمصان ما اقد
تسألني منو وياي بجفاك ؟
على دمعتي لو على الموت تقصد
اطمئن ما اشوف وجهي عيون مابي
على دربك عيوني متانية ترد
حسبت اطول مسافة زعلة وياك
خطوة وچنه بيها شوية نبعد
كلما نمشي بيها انفاسنه تضيك
ما تكمل الخطوة للهوا نرد
حجر صدك بماي الواهس يطيح
ثواني ويصفى خلكي وزعلي يركد
تعال الشوگ هم بي فزعة مرات
لهذا اعلى اليموت عيونه تهد
تعبنا الاصابع خلها ترتاح
كضينا الفرگة كلها بيهن نعد
على سنبل اسراري وباجر يجوز
بيها جفوف اليشمتون تحصد
انا بلياك اوقت ساعة الموت
بس يا لحظة اموتن ما محدد
.
.
.
.
#شعراء_وذاوقين_الشعر_الشعبي
#ايهاب_المالكي
#ابو_تراب

.
اتحاشى ما اصد يوم يم صورة الراح
خاف اكع ويصيحون ذاك النچر طاح

مثل البخت ما اموت اضعف وارد صل
ما بعت بس مبيوع من صاحب وخل

اليضن بينا نبيع اي والله بعنا
وسدينه بالمبيوع عازة ربعنا

انت التعرف العيب چنگ بعتها
وانا علمودك ناس تسوى وعفتها
.
.
.
.
#شعراء_وذاوقين_الشعر_الشعبي
#نصير_الفتلاوي
#ابو_تراب

.
يا سمعة تشوف عودي ذبل ... وسفه
بسبب تأمر علينا انذال ... و سفه
الدنيا ما عليها بعد ... وسفه
بدت ب اهل الكرامة تخون هية
.
.
.
.
#شعراء_وذاوقين_الشعر_الشعبي
#ناظم_الحاشي
#ابو_تراب

.
وفيت انا وفى الهزن ... ولالن
وقسى گلبك علية ما حن ... ولا لان
نجوم الليل لو طلعن ... ولالن
يذكرني ويزيد الشوك بية
.
بحر وسفة عشرتك ... والهضمني
وجثير ايام هجرك ... والهضمني
تعرف شنهي الكتلني ... والهضمني ؟
من اصيح عليك ما تلتفت لية
.
.
.
.
#شعراء_وذاوقين_الشعر_الشعبي
#كاظم_الشعبي
#ابو_تراب

.
من يمتى العشك ينمل ...؟
دكلولي العشك ينمل ؟؟
يا ريتك مثل حلمي و وحدي اشوفنك
لكن للجرح تندل
لكيتك ويا كلمن شين تضحك واكف مشچل
متعبني بثواني تغير ألوانك
اكلك طول بخلكك تجيني مطول لسانك
صفنت عليك حد ما خضرت بية
وصفنت علية بس تنيشن علية
اموت بكل مسية وما كلتلي شبيك
وانا افزع مهدل من تغص بالزاد ابد ما اكول شعلية
خليتك بعيني وجنت خايف حيل
اخافن لا دمع يأذيك ترف وتزلغك امية
انا من جنت اخافن جنت اموت عليك
شسوي عليك هسة وميت البية
.
.
.
.
#شعراء_وذواقين_الشعر_الشعبي
#علي_خلف_الدريساوي
#ابو_تراب

.
مشتاق الها وادري بروحي ما اصير الها
بس اتقرب على الموت اكثر كلما واحد يتقدملها
تالي انزفت والليلة الاولى بأولها
من زفوها كبالي اغني
شايف خير وما اكملها
صح هو الي شايف خير بس انا الجنت استاهلها
.
.
.
.
#شعراء_وذواقين_الشعر_الشعبي
#محمد_سعيد_الطائي
#ابو_تراب

.
مثل هرش الشجر واشربلك الماي
وكل هذا الخضار البيك مني
وانا بنص الملح ومشابك الطين
وبلابلنه على اغصانك تغني
تمر الريح بيك واحضن الكاع
وتريد تروح وي الريح عني ؟!
.
.
.
.
#شعراء_وذواقين_الشعر_الشعبي
#سمير_صبيح
#ابو_تراب

.
انا ب اصعب ضرف مريت
وانت تگلي متغير ؟
انا بجبهه غيابك ضايعتلي سنين
حرب من طرف واحد بيها متبعثر
ومثل الجندي يومية التحق بالليل
ما تنطيني اجازة همومك تحير
واتصوب واطيح وينزف الالبوم
وارد من صورتك لفراشي متأسر
تعال الليل ما يعبر
حياتي بدونك تبعثر
شلون انساك ؟ ليش انساك ؟
احبك من الابهر واعبد السواك
لو شمرة فراش البي مرض يعدي يشمروني ولا فركاك
لو ماي الترشة امي وراي الصبح من اطلع
يلمونه ويغسلوني ولا فركاك
تريد تعرف بية شلون جان جفاك
جني مدد بسدية وهلي من حالتي ملوا
عدل وتعاملوا عد راسي وي دفان
وعلى الفاتحة اتفقوا

.
.
.
.
#شعراء_وذاوقين_الشعر_الشعبي
#زيد_السومري
#ابو_تراب
_

• .
من اين جاءت هذة الساحرة
واثقة ، هادئة ، مكابرة
عيونها كالمدن المحاصرة
اجفانها نوارس مهاجرة
فزجت الجيوش ... الجيوش
وهزت التيجان والعروش
ولاعبتني لعبة خاسرة
كيف استطاعت هذة الناهدة ؟!!
تنسل بين اضلعي كنمرة مراودة
فافزعت قطعاننا كلها
واربكت اسرابنا كلها
واقتنصتها دفعة واحدة
.
.
.
.
#شعراء_وذاوقين_الشعر_الشعبي
#عريان_السيد_خلف
#ابو_تراب