.
دلموها الغراض وشيلوا يمنا
واذا ما بيكم نحملهن احنا
شريد من الله اذا حايطكم اندك
اعلى حايطنا وغرفكم يم غرفنا
شريد من الله اذا كل ما يجي الليل
تأشرلي وشبخ نشبخ سطحنا
وشريد من الله اذا ردتوا التصاوير
بعد مندز شمر نشمر صورنا
أمنيتي من الحياة نصير جيران
بخت ينراد وتصيرون اهلنا
واتعارك عليكم حجتي وياي
عالوا بيهم وهم بفرعنا
تعبنا من اللقاء البي مسافات
بعد ما ننتظر نشتم هدمنا
اعلى ريحتنا بعد كلما تنامون
نفك شباجنا ويوصل عطرنا
تكعدونا الصبح طابوكة بالجام
وافز والكاكم مسيرين عدنا
ردنا وجهكم جنازة للموت
كبال عيونكم ردنا عمرنا

بس كولوا راح نشيل نحكل ب أدينا
اليثكل على الحمال يسهل علينا

.
.
.
.
#شعراء_وذواقين_الشعر_الشعبي
#مصطفى_العقابي
#ابو_تراب
_

.
ايامنا الخلصت سوى
لجروحي تتفصل دوه
بس انت حيل استعجلت كبل العرس زفيتهن
وذيج الاسرار البس الي بس لا تكول انطيتهن
متانيك بس وين اتجه ؟
بيبان گلبك والوجه
سدة الخايف من وكت سديتهن
وجهك مثل وجه السكف ينرفع راسي بشوفتك
ومن كثر ما اصد على الصور بية شبة من صورتك
اشتاكلك ب اصعب ضرف
ما زال وياك بحرف
جعوب رجلية من اكف ما عابرة مصلايتي
انت وجودك بالارض تجايتي
لا انت غاية غايتي
هزة فناجين كهوة سنين البقت هزيتها
وضليت اراقب عن بعد ما شام حايط بيتها
الجانت تموت من الشعر تكتب شعر خليتها
.
.
.
.
#شعراء_وذاوقين_الشعر_الشعبي
#حسين_العميدي
#ابو_تراب

.
الكتب ذكرى بسجن غير افتهم شيريد
السجن مو بايك احلى سنين من عمرة
محكوميته تكضي ويطلع المسجون
جيب من السجن شيطلع الذكرى
.
.
.
.
#شعراء_وذاوقين_الشعر_الشعبي
#مهيمن_الامين
#ابو_تراب

.
لا تطش الكاع يالمايك شحيح
اسأل مجرب اذا ما جربت
مدري ياهو الحاطها اباله يجيك
يريد حنطة وهو باذرها شعير
بليل طلعلي الشمس وانا اعتنيك
الماي روبه وعود البالك يصير
ليش تحرك دمك وتفرك ب أديك
شهالتكبر ؟ على كيفك يا الحرير
الماي يصعد للسما وتالي يطيح
الصوج بية واعترف اي قصرت
حلفوني بعيني ما كلت الصحيح
وحلفوني بعينك وما جذبت
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
أول خطوة بالرجعة اريد امشيها ما اكدر
اركض بية ما بية كحل مهزوم من دمعة
سراب وشركض ...... اتأخر !
وانا المثلي يتكتر
يتمشى الخضار وتلتفت كاعة
انا محبس قديم لهسة يتذكر
شكو واحد قبل باعة
وانا الليلته تطول يصفن ساعة على الساعة
انا و بختصار هواي ما يبچون بوداعة
وكل اليمي ما بيهم عين بفركتي تدمع
ويم ذول اليحسبون اليحبوهم متلكاني اعلى اي اصبع
وكت ضليت وحداني
ناس كلوبهم سودة وحنين اني
رماد بخور اوكع فوك صحباني
واشوف عيوني متغيرات يا حسرة
بعد كل هيبة ما بيهن جناسي اسرى
.
.
.
.
#شعراء_وذاوقين_الشعر_الشعبي
#باهر_الجنديل
#ابو_تراب

.
شجم دوب احطلك دوب يالما جست دوب
بس من تمد وياي تلكش بالگلوب

حنن الموش ولام من مض الصواب
وكعدن كبال الجان مد وي الاجناب

بالراك اجن وثكال ومشتت الرأي
يدردغن والحيل ما ناصح وياي

حالي ضل بجفاك يالغالي مخطور
مثل المفرخة بكاع وتشوفه الصكور

وشلة نفس غركان ضل بية يا صاح
الحك ترى النسوان كعدن للصياح
.
.
.
.
#شعراء_وذاوقين_الشعر_الشعبي
#سيد_مهدي_العوادي
#ابو_تراب

.
حطيت ادية اعلى الجرح حسبالي دم تمطر لان
من عكسي ينكط دمي
رايد يفاركني الجنت من كثر ما راكض وراه
مفروكه اصابع جدمي
تكبرون احسكم بس علية انتوا وجروحي وهدمي
الواحد تعرفة من الحجي لاكيله يم غيرك وطن
لمن يسولف رسمي
شتريد ؟ مو عوزك بعد صبعين اوصلك ل امي
بس والله مت من الضحك من كتلي ضل لوحدك
هو انا ياهو اليمي ؟!!
.
.
.
.
#شعراء_وذاوقين_الشعر_الشعبي
#احمد_الصالحي
#ابو_تراب

.
حنيت وصورك شفتها
والضحكة ذيج تذكرتها
ومن شافتك عيني العفتها
طاحت على الصورة وشلتها
ما اكلك شكد طاحت دموع
كل اخ تطلع طولها اسبوع
مالت ابن ادم ظهرة مكطوع
ومدري شرفس من تحت الظلوع ؟!
واذكرت صوت الليل مسموع
منها وحجينا بغير موضوع
ضلت بگلبي الما كلتها
ديرة وجهكم مو وكتها
.
.
.
.
#شعراء_وذاوقين_الشعر_الشعبي
#نهاد_الخيكاني
#ابو_تراب

.
اخاف من المخدة بساعة الليل
احط راسي عليها وتبدي الهموم
انا حسباتي ثكيلة وتهدم الحيل
وبعد يا عين عندي تطاوع النوم
بجفوني دمع ما يقبل يسيل
والحسبات تكعد بية وتكوم
انا اتطشرت بس محد يشيل
ياهو الي يلمني يحطني بهدوم ؟
انا ابختك يا گلبي و عندك دخيل
اهي مزنت مطر ما ضنتي تدوم
حبلة غيوم عيني متانية اتسيل
واذا تطلك مطر شتذب الغيوم
.
.
.
.
#شعراء_وذاوقين_الشعر_الشعبي
#حمزة_الحلفي
#ابو_تراب

.
انا شكد جذبت على الناس اكلهم زين
اذا سألوا شلونك تزرك الشفه
قصة منتحر تعرفني كلها تريد
من يمي اليشبهك لو عبر صدفه
ام جندي بحرب موعد نزوله اليوم
واتأخر واجاها .... تخيل اللهفه
والله لو ترد هيج اطلع اتلكاك
انا المشتاكلك يا عيب يا عفه
صيف جفاك اجى ونشفن البيهن ماي
بس جفني المبلل جيتك تنشفه
.
.
.
.
#شعراء_وذاوقين_الشعر_الشعبي
#حسين_المرياني
#ابو_تراب

.
اذا لوليتلك لا تغفى يمي
ملش بالشعر والطم على الزنود
انا الذبيت شبجي بوسط دمي
طلعت بس المرارة وبقى العامود
وانا الي حفرولي ونسوا طمي
وعشت وسط الحفيرة بثوب مسرود
عكارب عاشرت مصتلي دمي
مو ربعج علية ملتمة بس دود
اكطع بالجسم وانخاج لمي
وسيوفج خشب تاخذ علية زود
يا دنيا ما نفع وياج غمي
تحسبين الصعد ع النخلة صاعود
يا دنيا للمناجل حيل شمي
مو ياهو اليكص الكصبة حاصود
.
.
.
.
#شعراء_وذواقين_الشعر_الشعبي
#خضير_هادي
#ابو_تراب

.
دليني عليك سنين تايه بيك
وامشي وياي ادورك خاطر اندلك
عرفني علشخصك رايد احجي وياك
بس كلمه وبعد ماغيرها نكلك
وحده من الثنين وحده راح اختار
لو كلك احبك لو احب كلك
اسأل ليش احبك حتى اكلك ليش
وليش شما تسوي وياي اقبلك
لحظه موت عمري سنيني كلهن خوف
بس وياك ائمن لمن اوصلك
وانته اخر نفس وشكد عزيز تصير
وبلحظه الموت تريدنا نملك
خيط علجرح بلحم صرت وياي
لو كل الجروح تطيب مافلك
تعرف كلشي بيه وماعرفت شبيك
لغز حلك لغز من يكدر يحلك
وشرد حتى اجيك ومدري ليش الخوف
خاف تخاف مني بسدك اختلك
مثل ظلك اظل والليل يكضي الليل
من تطلع شمس من طولك انزلك
.
.
.
.
#شعراء_وذواقين_الشعر_الشعبي
#جبار_رشيد
#ابو_تراب

.
سلس ما اصير وابقى بكيفك انكاد
وحطب ما اصير وانت بعازة النار
جنت زهرة شمس هسة انا صبير
ما ادير وي شمسك وين تندار
كاتلني العطش بس بالي مرتاح
اشرب بالرمل ما اذل للنهار
وي الكاع طولي ومن تجي الريح
اضل ثابت انا وتهتز الاشجار
.
.
.
.
#شعراء_وذواقين_الشعر_الشعبي
#سمير_صبيح
#ابو_تراب

.
من يموت شاعر تحزن النجمات
والاشجار تبجي تكول شاعر مات
والانهار والازهار تمشي ارواحهن وي روحه مشيعات
حبات الرمل من اجله تچوي الكاع
وصكور الجزيرة لموته حزنانات
وطيور المراقد ذني علويات
يدعن كل حمام الكون يلتم وي روحه يبات
اذا كل هذا يحدث كول شاعر مات
عليك بكل سعادة تودع الحلوات
.
.
.
.
#شعراء_وذاوقين_الشعر_الشعبي
#جبار_الفرطوسي
#ابو_تراب

.
اي وحق من كعدك ب احساسي
انا من هاللحظة واحد ناسي
گلب ميت بس الك راح استعير
قاسي ...؟ لا بي رحمة خاف القاسي
وحتى لا تخطر ابالي الذكريات
راح احط صخرة بلال براسي

وخاف كالولك حجي عوفه ويجيك ؟!
البية سولف ما حچالك بالصحيح
العنده نية سوء اشم ديرة كفاه
يطيح من عيني قبل لا منه اطيح
انا مو ذاك اليچلب بالذيال
اليصير تراب اصير بوجهة ريح
.
.
.
.
#شعراء_وذاوقين_الشعر_الشعبي
#نهاد_الخيكاني
#ابو_تراب

.
قبل جان الولف يخبز وولفه يفوت
ويسمعها حجي بس تستحي وتدور
تخجل والحمار يلون الخدين
من حرورتك وحروره التنور
ويكللها الصبح باجر نروح نزور
واجيبلج علگ وانذر لحبنه انذور
وامر على المكبرة واحجز اثنين كبور
بالمكبرة تصيرين جيراني اريدج
بلكي الرمل ينزاح واتكمكش ايدج
.
.
.
.
#شعراء_وذاوقين_الشعر_الشعبي
#حسين_العميدي
#ابو_تراب

.
كل الليالي انكضت بس ليلگ شكبرة ؟
يا گلبي صار الدمع مرساة للعبرة
دورلي يمك صبر گلبي خلص صبرة
لو ماي اعبره ب بلم ... بس ليل شيعبرة ؟؟
.
.
.
.
#شعراء_وذاوقين_الشعر_الشعبي
#غني_محسن
#ابو_تراب

.
كالولي عنك كملت قصة حياتك بعدي
وكالولي حيل اتشابهن حلمك وخدك وردي
بجوني وانا الي جنت
ما اقبل اتمشى بمطر ويصير مي بخدي
كد ما شفت بعدك حزن
منا لحد يوم الدفن
راح ابقى عايش وحدي
لو عندي حظ جا ما رحت بس انا حظ ما عندي
.
.
.
.
#شعراء_وذاوقين_الشعر_الشعبي
#مهند_العزاوي
#ابو_تراب

.
توازت والله يستر من الموازة
كرهت الروح چن روحي طريق تگتلت بي ناس
وجنازة ورا جنازة
ولا عدنا غرض يسوى كضن سلعة ورا سلعة
بيعة ناس معتازة
تعال وشوف بالوكفة شتبيع الناس
مو بس الغراض اجساد معروضة اعلى الميازة
رادوا يا جسر من تنگلب على الماي
حايط والجروح بجسمك درازة
رادوا يا جسر من تعبر العشاك
ولا كرصة شمس بخدود خبازة
امس معزوم يم شاعر وجانت كهرباء ماكو
لا مي لا نفط لا غاز
وكع بطل الصبر وتكسر اكزازة
امس معزوم يم شاعر بتت وياه
ريكني جرح بايت وغداني جرح تازة
.
.
.
.
#شعراء_وذاوقين_الشعر_الشعبي
#الكاطع
#ابو_تراب

.
شكالولك علية وصار وجهك سيف ؟
وتعرفني التكتلك والحجي مصدكة
شجرة ومو ب أدية وتدري وكتك ريح
تحملني ذنب من طيحت ورگة
خلگ ساتر ولك سويت خلگي وياك
شكد موت وجثث ما ضيجت خلكة
مو من صالحك على الجرف تزرع عود
ما تدري اعلى ساعة يفيض ويغركة
ومن شفت الخناجر خذت دور السيف
كلت يا روحي صيري بهالوكت دركة
تسألني وتگلي شسوه وكتك بيك ؟
شسولفلك شكلك تكتل الحركة
ذبني ابير ب أيدة وكال اكلني الذيب
ورسم للذيب صورة وجثتي بحلكة
.
.
.
.
#شعراء_وذواقين_الشعر_الشعبي
#سمير_صبيح
#ابو_تراب