لو خبر منك يجيني
الناس تعدل من جديد
ضوه يبين من بعيد
مطر ينزل شمس تضحك
المشانق تنصب مرجوحه ل طفال الشهيد
ورد يطلع ب الجماجم لو تجيني
وقدملك اعتذاري وانكساري وكل حنيني
.
.
#شعراء_وذواقين_الشعر_الشعبي
#زيد_السومري
#ابو_تراب

يا الغايب واشعر وجودك
وبيقيني انتظر
واتوسل الساعة اعلى مودك
لا يخلص العمر
اتأملك زخة مطر
نظرة ورد يحترك
ارجعلي محتاجك نفس
الحك بديت اختنك
اشكيلك بهذا الزمن
حتى الصدك مو صدك
.
.
#شعراء_وذواقين_الشعر_الشعبي
#منقول
#ابو_تراب

.
عمر وياك ادور حل
جبيرة السما وين اسأل
اخاف اشرد وما اندل
الا ان قررت حسيت عمري الضاع
شفته الطير اثاري من يطير اسهل
اثاري العش عذر للما يعرف يطير
اكول شبي الشامت ما يريد ارحل
حركني الضن مثل لعبة الغميضان
ورى حايط الشوك بلوعتي اتختل
جنت لخاطرك تحلف بخلكي الناس
انازع واليمر يشوفني مدلل
حكت ل اغلاطك بنصين گلبي اعذار
ترفه تغار منها حياكة المغزل
.
.
#شعراء_وذواقين_الشعر_الشعبي
#ايهاب_المالكي
#ابو_تراب

يا حزن ياريت اعرفك
جنت اسويلك حديقة ياسمين
وممشى من كاشي الفرح جدام بيتك
يا حزن ياريت اعرفك وين تسكن
جنت اكلك لا تجيني وتمشي كل هاي المسافة
انا وحدي جان اجيتك
يا حزن وحياة حزنك ما عرفتك
جنك مغير مشيتك
حاط ريحة رخيصة كلش
يا رخيص شكد بجيتك
.
.
#شعراء_وذواقين_الشعر_الشعبي
#مظفر_النواب
#ابو_تراب

انا المالة داعي شلون صارت هاي
دحجيها اعلى روحك شوف تقنعها ؟
انا الما اهمك هيج صرت اليوم
وانا بكل امورك جنت مرجعها
لسانك كطعاني وتدري بية شلون
الدنيا مو لسن لو اريد اكطعها
ما اجرع انفاسي لون تخطئ وياي
وانت بكل هدوء اخطائك اجرعها
.
.
#شعراء_وذواقين_الشعر_الشعبي
#جبار_رشيد
#ابو_تراب

جنت صغير العبك ... مو ليالي
بمواسم جنت احبك ... مو ليالي
خنت وتكول ما خاين ... مو الي يالي
جاب شفايفك ذبهن علية
.
.
#شعراء_وذواقين_الشعر_الشعبي
#علي_البديري
#ابو_تراب

شكد بعيني بعدج مرت وجوه
عدن وانتي ضليتي اعلى بالي
الما بي ريحتج ميمر ع البال
ما اخونج جنت حتى بخيالي
وانتي گبالي بس عينج ع الوياي
وبعدني گبالج وصار ابدالي
استعجلتي ترى الخنتيني وياه
تعنالج لان فارگله غالي
الفرق مابين نيته ونيتي وياج
رادج للهو وردتج حلالي
راد براسج انتي يخلص الليل
وانا ردتج تصيرين ام جهالي
.
.
#شعراء_وذواقين_الشعر_الشعبي
#رائد_ابو_فتيان
#ابو_تراب

كون كايلي من الاول ما ادوم
جان ما جبت العمر كله انتظار
انت حليان بغيابي وانا وين ؟!
وجهي صاير هيمه من كد الصفار
ليش تحضن غيري مو تدري اموت
امي من تحضن اخوي كبالي اغار
.
.
#شعراء_وذواقين_الشعر_الشعبي
#منقول
#ابو_تراب

ما طايب بعدني يصلن اعضامي
وبعدني من الدمع ما يابس لثامي
ولا اكدر اعوفك لا اضل وياك
لغم دايستك جدامي
.
.
#شعراء_وذواقين_الشعر_الشعبي
#سعد_شميل
#ابو_تراب

بعدك ولا جاي اعرف اهوى
اني وفي مو انت تسوى
.
.
#شعراء_وذواقين_الشعر_الشعبي
#علي_مهدي
#ابو_تراب

الروحه بعيد عنه شلون يرتاح ؟
بلايا وداع غرب والدمع طاح
من سافر بلا وداع
كاع تذبني يم كاع
نسمة بنص عواصف عافني وراح
ما همني بحياتي الراحت تضيع
انا الكاتلني راح بغير توديع
انتهت ما بعد اشوفه
عود تمر طيوفه !
صعد نجمة بسمانه شلون ينلاح ؟
الروحه بعيد عنه شلون يرتاح
.
.
#شعراء_وذواقين_الشعر_الشعبي
#سمير_صبيح
#ابو_تراب

اخذلتني الجنت متحمل ... يدلها
من اموتن على الكبر لحد ... يدلها
هلي الحبيتها بموتي ... يد الها
وسبب كل الخراب الصار بيه
.
.
#شعراء_وذواقين_الشعر_الشعبي
#احمد_هاشم
#ابو_تراب

اثنين جانو الك
وماكو بحياتك فقط
اني ونظر عينك
وعينك درتها ورحت
وﻻجني منك جنت
وبكل سهوله خسرت
واحد من اثنينك
.
.
#شعراء_وذواقين_الشعر_الشعبي
#جبار_رشيد
#ابو_تراب

انا ناسيك وبچيت
شلون ما اسكت بروحي
تلتفت للماضي تبچي
حط على الحايط حزنها
هي تحجي وحايط الايام يحجي
وانا صافن
مثل المحجر على الريح ارتجيت
لا متت انت ولا اني احتيت .
.
.
#شعراء_وذواقين_الشعر_الشعبي
#مظفر_النواب
#ابو_تراب

يا الفاركتني شلون تنجاب
كالولي اجيت وشطت ع الباب
واركض ثكيل محمل عتاب
وعيوني كتن ماي وتراب
.
.
#شعراء_وذواقين_الشعر_الشعبي
#منقول
#ابو_تراب

واكف جنت بالباب من صيحوا مات
خبلني ملك الموت من يا كتر فات
.
.
#شعراء_وذواقين_الشعر_الشعبي
#رحيم_المالكي
#ابو_تراب

ساكت وناسيك كوه
وامي تحجي وذكرتني
كالت الحبيته وينه ؟
كلت عفته وصدكتني
عفته يتلفت وراي وگلبي بارد
وهو اني من كثر ما ملتفتله
منشف دموعي اعلى متني
وخفت لا من عينها اوكع واني ابنها
لو درت انت العفتني
عمر اركض وانت تمشي
وبالمشي جدامك جزتني
وماكو شي يستوجب ازعل
بس خنتني
الله يفشلك فشلتني
.
.
#شعراء_وذواقين_الشعر_الشعبي
#منقول
#ابو_تراب

كلي ساعتي يمتى ... و يومي
وجفي للهوا يأشر ... ويومي
ردت نسوان تبجيلي ... وي امي
على هذا المصاب الصار بيه
.
.
#شعراء_وذواقين_الشعر_الشعبي
#منقول
#ابو_تراب

دمع عيني على الوجنه ... ترى سأل
واخبرك يا ولف جسمي ... ترى سل
لون مرسال من عندك ... تراسل
اطيب وما يضل اي ألم بيه
.
.
#شعراء_وذواقين_الشعر_الشعبي
#منقول
#ابو_تراب

منو من الزيج لذياله ... شك الكم
هدومه وبالگلب يكبر ... شك لكم
يا ماشين وعلي مدري ... شكلكم
شني الموخوش وشنهو الذنب بيه
.
.
#شعراء_وذواقين_الشعر_الشعبي
#منقول
#ابو_تراب