.
الگلب سلمته بأيدة ... وارده منه
وحال الثكلى حالي ... وارده منه
اجتني بيوم صوغة ... وردة منه
طبت ما ضل بعد كل مرض بية
.
#شاكر_التميمي

انا الواضح والمبين ... ولا خاف
وانا الما رجفن اجتافي ... ولا خاف
وانا الما نقص وزني ... ولا خف
اختفيت وخفت خف وزن العلية

#رحيم_المالكي
.
.
.
#شعراء_وذواقين_الشعر_الشعبي
#رحيم_المالكي
#شاكر_التميمي
#ابو_تراب

.
ليش لوحدك من غير جناز
وياهو الغسلك ويغمض العيون
غريب بنص محطة و وادم اجناب
وهلك عنك بعيد شلون يدرون
اليموت بنص هله تتهدل اهدال
علية امة وخواته تطيح المتون
واشوفك وحدك وانت الكبل جان
الجبل والساتر بسدك يلوذون
.
.
.
.
#شعراء_وذواقين_الشعر_الشعبي
ل #رحيم_المالكي
#ابو_تراب

.
انا ميت شعرك واتوسل الشيطان
يا شيطان شعري انكطعت اخبارك
قبل چنه بجحا وكلساع تدك الباب
ماريدن شعر مر واخذ بسمارك
يا شيطان شعري الشاعر من يموت
يتعطل فرض والكون يتدارك
انا واثق عفتني روح لا رديت
يوم فراك وجهك يوم المبارك
شجنيت من الشعر لو سجن لو طعنات
ساعة اصفى وي ربعي وعمر نتعارك
بس لحظات محتاجك قبل لا تروح
اريد ارثي ( غني ) وروح اكطع ابحارك
يا صاحب ( غني ) ماعفته حد الموت
وكتب اخر قصيدة من وهج نارك
جان القلم شضه والحبر نيران
الشهادة اكبر قصيدة تدوخ افكارك
.
.
.
.
#شعراء_وذاوقين_الشعر_الشعبي
اخر قصيدة وجدت في جيب الشاعر الشهيد #رحيم_المالكي
#ابو_تراب

.
يا هم احنا ؟ منين اجينا ؟ ليا نهاية احنا ابتدينا
تضيع بين شفافنه حروف السؤال
وتهنا وسط بيوت اهلنا ولا تصح كلمة تعال
وصاحت الوادم علينا مسودنيين وشككينا ثيابنه

#محمد_الغريب

منو اليندل يتيم يداين عيون
خلص دمعي واريد ابچي ابداله
واعلمه اعلى اليتامة شلون يبچون
واشوفه البچي الما مر اعلى باله

#رحيم_المالكي

تسألني الشوارع وين الاحباب
و وين اليوكفون بعتبة الباب
ابشرك سلموني بحلگ الذياب
نسوا انا جنت في يوم خلهم
ما ضلي اهل حتى ارجع الهم

#خضير_هادي
.
.
.
.
#شعراء_وذواقين_الشعر_الشعبي
#ابو_تراب

.
جمالك بالگلب والروح ... طرفاي
شعرك في جبينك نور ... طرفاي
احذرك لا تدوس بيوم ... طرفاي
اوچ گلي وطرف ما يضل بية

دحوك بثوب حسنك ... وانسجه النا
بجهنم حبك ارضى ... وانسى جنه
انحبسنا بقفص عينك ... وانسجنه
وتحط رمشك گلبچات ب أدية

ها دك الگلب بجفاك ؟ ... ها رف ؟
هاك اخذ الجروح وياك ... ها روف
مثل خزلة غنم وتشوف ... هارف
شتن مشن كل وحدة بنوية

الوكت من عش حزنه ... ما نقلنه
وحجي الوادم ل وادم ... ما نقلنه
الوكت من امتحنه ... ما نقلنه
واخذنا بكل درس اخلاق مية
.
.
.
.
#شعراء_وذاوقين_الشعر_الشعبي
#سعد_محمد_الحسن
#رحيم_المالكي
#ابو_تراب

.
مكابر كوة اجيب الراس على الراس
واعاند دنيتي اعناد المجانين
وانا شما اطيح اكل للروح لا بأس
على جروحج توجي ولا تصيحين
شربني الزمان هموم من كأس
اقسى وامر من سم الثعابين
تجرعته بصبر ما سمعت ناس
لجن يا حيف فضحني النياشين
انا الروحي جبل يهدمني يا فاس ؟
وانا المرمر التنحد بي سجاجين
ل اخلي جفوني على الدمعات حراس
واكل للعين فنج بعد تبجين
ولو ناري جبيرة وعيب تنقاس
لجنها كواي بيج شكد تحملين
اذا وصلت منيتي لكطع الانفاس
واجب من يمر شامت تضحكين
مرمر سكف روحي واصلب الساس
ولا من جام بيتي وساسي من طين
وطبع بالروح يشبه وركه اليأس
يتكاثر عطرها بفرك الايدين
.
.
.
.
#شعراء_وذاوقين_الشعر_الشعبي
#رحيم_المالكي
#ابو_تراب

.
انا ديناصور وكتي وانا الفك المفترس
انا اريد حلوك عدكم بس اريدنها خرس
بكيفي اسوي الي اريدة
انصب لهذا فواتح وانصب لذاك عرس
انا اريد حلوك عدكم بس اريدنها خرس
.
.
.
.
#شعراء_وذاوقين_الشعر_الشعبي
#رحيم_المالكي
#ابو_تراب

.
معذور شتريد تكول معذور
ما الومك ابد والكالك اعذار
علية ثكال مرن وانت مرتاح
لياليك هنى ولا ساعة تحتار
ال على وساده تمدد خالي البال
مو مثل اليكضي الليل على النار
انت تنام تسهر تكعد تكوم
وانا حتى بهذن ما اكدر اختار
التهدم سافه منه يفيده ترميم
مو مثل التفلش كله وانهار
وتسولف على المواقف وانت خواف
شنو بصفحة حياتك شلك تذكار
حديد انت ورجفت بساعة الضيج
وانا خشبه و وكفت بوجه منشار
.
.
.
.
#شعراء_وذواقين_الشعر_الشعبي
#رحيم_المالكي
#ابو_تراب

.
لان طكات شماتي ... ب هامي
وشلت لا تضن عيني ... بها ماي
اذا على الذل رضى يبصم ... بهامي
اكطعة ان جان يرضالي بردية
العلية غير اهلها ... من علاها
وروحي يخسى الكلك ... من علاها
بعزم الله نخلتي ... من علاها
يراموها بحجر وتضل صفية
.
.
.
.
.
#شعراء_وذاوقين_الشعر_الشعبي
#عريان_السيد_خلف
#رحيم_المالكي
#ابو_تراب

.
وين تريد اغرد كل خضارك مات
يبس كلشي بحياتي وذبل بستاني
صحرة بعيني صارت يا غنى البطران
البجي واجب علية من ماتن اغصاني
تحط روحي بقفص وتكلي غن يا ليل
ولك يا ليل اغني الليل بچاني
انا ما نمت ليلي وخلصيته دموع
وانت وسادتك من ريش جنحاني
وتصور تحبني واني راضي وياك
دفك باب القفص تعتقد تلكاني ؟
اطير وابني عشي ويا الشجر والريح
واغرد من صدك ما يجذب لساني
.
.
.
.
#شعراء_وذاوقين_الشعر_الشعبي
#رحيم_المالكي
#ابو_تراب

تعال من السفر كافي من الفراك
كلت يومين لكن صارن سنين
ما هزك حنين ويوم تشتاك ؟
ولا گلبك يسألك صاحبك وين ؟
صرت كلي حزن من راسي للساك
تعال احسبها منه وجيتك دين
اريد اشبك الروح بروحك اشباك
واريد انگلب كلي ل شوفتك عين
.
.
#شعراء_وذواقين_الشعر_الشعبي
#رحيم_المالكي
#ابو_تراب

واكف جنت بالباب من صيحوا مات
خبلني ملك الموت من يا كتر فات
.
.
#شعراء_وذواقين_الشعر_الشعبي
#رحيم_المالكي
#ابو_تراب