.
وين تريد اغرد كل خضارك مات
يبس كلشي بحياتي وذبل بستاني
صحرة بعيني صارت يا غنى البطران
البجي واجب علية من ماتن اغصاني
تحط روحي بقفص وتكلي غن يا ليل
ولك يا ليل اغني الليل بچاني
انا ما نمت ليلي وخلصيته دموع
وانت وسادتك من ريش جنحاني
وتصور تحبني واني راضي وياك
دفك باب القفص تعتقد تلكاني ؟
اطير وابني عشي ويا الشجر والريح
واغرد من صدك ما يجذب لساني
.
.
.
.
#شعراء_وذاوقين_الشعر_الشعبي
#رحيم_المالكي
#ابو_تراب

.
زعلانه كالوا لا تمرها بحلم
وگلولي دمعج ع الجفن ما عثر
اشتموا فراكج بية من سولفت
مريتي سيف وصار خلگي نحر
يضفرون وجهي وثنثر عزتي
وبعيوني تطفى وجوه كل البشر
شخليتي بية وصدري فارغ طلع
شعاف الندى من اثار فوك الصخر
دبريلي ملگة بروحي وحشة حضن
شكد ناس صغرت من فراغج كبر
.
.
.
.
#شعراء_وذاوقين_الشعر_الشعبي
#علي_رشم
#ابو_تراب

.
امس روحي اشتهت واحد مزعلها
وحنت والمحنة ما تطيح الها
امس جثه هنود الروح تالي الليل
كبال عيون اهلها تحترك كلها
امس حطيتهن مرسال يم مرسال
وعاينت لردودك ما استاهلها
مثل حطة صواع بحمل بنيامين
تتهمني بعمايل ماني عاملها
انا روحي التواضع وين وصلها ؟!
طير امشي اعلى جدمي وناسي عندي جناح
بكثر ما عاشرت وادم نزلتلها
لشدك بين مهرة ومهرة گلبي اليوم
ومهرة اجلدها يمنى ومهرة اشملها
انبعت بيعة عرف طيحت مني هواي
مو سعري وقبلت الما اتقبلها
وشتلونه نخل بينك وبيني كبور
شلون عروكنه تتلاكى ؟ شيحلها
بقيت ادفع بعركي وما احجيلك خوف
الجماجم كمت من عيونها ادخلها
.
.
.
.
#شعراء_وذاوقين_الشعر_الشعبي
#سعد_شميل
#ابو_تراب

جيت اسألج يا دار عن قرة العين
يا دار كوليلي وين ارحلوا وين ؟
يا دار اسأل عن الاحباب
ملهوف عايد من الغياب
يا دار شو چنهم مرحلين
يا دار كوليلي وين ارحلو وين
يا دار احجي وارحمي حالي
ردي علية وريحي بالي
خلاني وين وسافر الغالي
يا دار احجي ولا تسكتين
يا دار كوليلي وين ارحلوا وين ؟
.
.
.
.
#شعراء_وذاوقين_الشعر_الشعبي
كلمات #كاظم_مدلل
#ابو_تراب

.
كالولي مريض وكلت شعلية
درت وجهي وحبست انفاسها الرية
اكومن ردت من عدهم وما شالني رجلية
احس بروحي كمت ارجف
دمع من كل مكان انزف
يا ربي شبية ما اعرف
اضن المرض منه انشال واندار المرض بية
كالولي نساك وكلت خل ينسى
احساسه لو بعد شيصير ما احسه
ما اذكره بعد للموت بس هسة
لنعل حتى ابو صوته
كلوله يجي مروته
مجمعلة بچي يفوته
من ذاك البجي الميجوز الا لعين معمية
.
.
.
.
#شعراء_وذاوقين_الشعر_الشعبي
#ميثم_فالح
#ابو_تراب

.
تدري شيسوي القهر ؟
ما بجيتك
مدري من هو بصدري يبچي
مدري من هو يشكك بگلبي الكواغد
مدري من هو يريد اسافر
مدري من هو يجرني بيدر للمطر
ما بجيتك
درت عيني للبحر
ابجي المسافات الهمتها وياك
انت تجذب انت تجذب
ما بجيتك
جزت من بلوة سفينة وتيهتها وعاتبتها
يا ولك فزاعة ولا فزاعة عندك
ولا مطر لا ليل
تفتر تفتل بالمطر
ما بجيتك
انا جايبلك من دموعي بحر
.
.
.
.
#شعراء_وذاوقين_الشعر_الشعبي
#مظفر_النواب
#ابو_تراب

.
بعيوني اريدك تجي لو بس حلم عابر
انطيني نسمة هوا و براحتك سافر
من دونك انا ترى متلعثم و حاير
لو گلبي ... لو خاطري ما اعرف شكاسر ؟!
يا البية الك لوعتي والشوك والشاعر
وليل وحلم بالجفن والماضي والحاضر
كلي اذا ما تجي وسولف من الاخر
انا ودمعتي ترى ما نصبر لباجر
عكبك أمن منو ؟ ومنين ما احاذر
حرب الضنون ابتدت وبعازتك ساتر
وديلي اثر خطوتك
ودي عطر لمستك
سويلي واهس اضل وكت البعد صابر
.
.
.
.
#شعراء_وذواقين_الشعر_الشعبي
#ايهاب_المالكي
#ابو_تراب

.
شلك علية يا زمن وشرايد ؟
انطيتك الي ردته مني وزايد
ضحيت ب اغلى احبابي
وخسرت كل اصحابي
وشتريد تاخذ بينت ومعاود
نيشان اكثر من جرح مو كافي
كضيت عمري وياك ما متصافي
الماي يمي والعطش بشفافي
شتريد تاخذ بينت ومعاود ؟
شلك علية يا زمن وشرايد !؟
.
.
.
.
#شعراء_وذواقين_الشعر_الشعبي
#الكاطع
#ابو_تراب

.
الما حطيتهن حطن على البال
مدري منين اجن وصلن بلا ريش
وسفينة تكول طيرة بغير جنحان
تركض على الجرف جن رايدة تعيش
وانا بنص هذا كله تمرني ذكراك
واحس العاصفة يسكن زعلها
وانسى حبال ب أيدي وانسى الشراع
وربك جنت افز والا انا احلها
اضن من صورتك ضل چلبت بي
بس جانت ضلام شلون ضلها
وارد انوب اشوفك مو مثل ذيج
الشوفه الگبل لحظة لا مثلها
لا ثلث القصايد تنكتب بيك
لا نص القصايد والله كلها
.
.
.
.
#شعراء_وذاوقين_الشعر_الشعبي
#ميثم_فالح
#ابو_تراب

.
المناصب والرتب والامتيازات
ضعيف النفس بس البيهن يحير
الي بكل گلب متعوب تذكار
وكلماتي اصبحت مثل المناشير
اذا امر بدرب تزاحم الناس
علية ويتعب الياخذ تصاوير
.
.
.
.
#شعراء_وذاوقين_الشعر_الشعبي
#عريان_السيد_خلف
#ابو_تراب

.
كارثة تحبلك بشر مايدري بيك
انت تبچي وهوة كاضيهه لعب
والتكتلك ذوله اليلومون بيك
ذوله لمخلصينة چاي وچذب
شايف حبيب الگلب لمن يفوت
و يلعب بطلابنه طرهه وكتب
وهو مو بس احنه لا حتى العميد
تصير عندة خربطة بدگه الگلب
لكيته يلم حطب للشوك ... فدواه
بروحي ولا مروره ضكت ... فدواه
يكلي ها يامن رحت ... فدوه
لهاي الها اللعبت لعب بية
.
.
.
.
#شعراء_وذاوقين_الشعر_الشعبي
#احمد_عاشور
#ابو_تراب

• .
تدري البارحة شكد افتقدناك ؟
من كلنا انجمعنا وما لكيناك
مكانك خالي بس حاضر خيالك
وكمنا بلا وعي نحضنه ابدالك
و رد بارد حضنه وما حضناك
تدري البارحة شكد افتقدناك؟؟
تدري بيك نعرف يمتى موجود
من بالبيت نشتم ريحة ورود
عطر انفاسك نميزة بالانفاس
وفرق بس عطرك نشمه بلا احساس
وكل جرة نفس بيها ذكرناك
تدري البارحة شكد افتقدناك ؟؟
نحس روحك ترفرف يمنا بالبيت
ومن يمي فتت بيك انا حسيت
طبع بينا الحزن يبدي من الغروب
ومن نبجي عليك ندمع گلوب
وما ضل گلب عدنا من بچيناك
تدري البارحة شكد افتقدناك
.
.
.
.
#شعراء_وذواقين_الشعر_الشعبي
#جبار_المياحي
#ابو_تراب

.
يا روحي جذاب الهوا مو ذوله الاحباب
يمكن تراولج حبيب الروح بالباب
ويا عيني عليمن دومج ربيه
ويا روحي بعد منهن ولا جيه
انا الي جربت ودليلي من الهوا تاب
يا روحي جذاب الهوا شمالج جفلتي
يا روحي بسج من ونينج ما تعبتي
خافنج من حجايتي هذه انهضمتي
للدوم عينج على الدرب
تعبتي وياج الگلب
انا الي جربت ودليلي من الهوا تاب
.
.
.
.
#شعراء_وذواقين_الشعر_الشعبي
#زامل_سعيد_فتاح
#ابو_تراب

.
اشتاكلي جروحي غلاتي
وعيبي صبري ودفلتي السكته و وحشتي بلايا هم
وحجتي الفشلة التطشني تراب ما يسواش لم
وهمي دنيا نبعت بيها بغيرك انت وشنهو معناه الجرح من غير دم
اشتاكلي تخضر ضنوني بكاع صبخة
ويشمت رموشة اعلى طرواك الجفن
وتشرك شموسي بحضن ليلك نهار
ويحضن الغايب هوى الحاضر حضن
وتطفح البسمة اعلى بال المبتلين
الماي يضحك من تشك صدرة السفن
.
.
.
.
#شعراء_وذاوقين_الشعر_الشعبي
#عريان_السيد_خلف
#ابو_تراب

.
من كلشي اخذ درس ما اخاف من شده
ما دام احس بالالم واصرخ اذن ما متت
يعني الالم بعده
گلي الجرح ما تبت ؟ لا تسكت اعلى الغلط
حط طينته بخده
جا قدسينة الورد
كون بكفاه ينجلد كلمن كطع ورده
من جرحي بية شبه ومن طبعي بي جم طبع
يعيش اعلى لچمة عمر ويموت اذا اشده
.
.
.
.
#شعراء_وذاوقين_الشعر_الشعبي
#صباح_الهلالي
#ابو_تراب

.
تستاهل تضل وحدك يا الكرهتني بطيبتي
يا الجنت مو من ألتفت كدامي تاخذ غيبتي
مو انا اليرد منكسر منك رجعت بهيبتي
واخر قصيدة اكتبها الك
منا واسد موضوعك
يالشوفتني دمعتي لازم اشوف دموعك
.
.
.
.
#شعراء_وذواقين_الشعر_الشعبي
#احمد_عاشور
#ابو_تراب

.
ميز جرح عن جرح
بيهن يطيب بزعل
وبيهن يطيب بصلح
وبيهن يطيب ب دوه
وبيهن يطيب ب جرح
وجرحي عرفت علته
جرحي دواه الملح
جرحي القبل يستحي
شو هسة صاير وكح ؟
بية حالة من الغجر
الليل يكضي سهر
وينام وجه الصبح
.
.
.
.
#شعراء_وذاوقين_الشعر_الشعبي
#الكاطع
#ابو_تراب

.
اني وصفنتي وهمي
واتمنيت لو هسه تجي يمي
وتكعد تمتحني بكل شبر عنك
أذكر كلشي كلته وكلشي ما مكيول
وأذكر لو حرف سهوا وكع منك
.
.
.
.
#شعراء_وذاوقين_الشعر_الشعبي
#علي_الفريداوي
#ابو_تراب

.
عرفتك بية راح تخون جي حالفلي ما اخونك
ومن أول سلام وياك قريت وداع بعيونك
الهضيمة تغيرت وحدك
ولا تعبوا عليك هواي من رادوا يغيرونك
ولك عذبت واحد گلبة تشريني
ما اسيطر على دموعي من الاكي انسان ناسيني
ولك يا بعيد وخر عن شراييني
احسك جاي تتسابق وي الشمات ياهو اكثر يبچيني
من انسأل عن فركاك محد يحجي غير العين
مثل جندي بحرب مفقود ومسوين فاتحته وهلة مأيسين
بوية الفاتحة شصعبة من تنقرأ اعلى العدلين
ورجع خاطر يبشرهم بس يلكى اهله متوفين
هنانه الفاتحة اصعب حيل من تنقرأ اعلى الميتين
والاصعب من هذيج وهاي انا وياك مختلفين
.
.
.
.
#شعراء_وذواقين_الشعر_الشعبي
#زيد_السومري
#ابو_تراب

.
اذا سألت علية كولولها بخير
شفت كل الجروح المنها اعاني
صدك باقي اثر بس باجر يروح
واذا اضطر ابدل جلد ثاني
المهم ما يبقى شي من يمها تذكار
الخلت هاكثر ناس بمكاني
.
.
.
.
#شعراء_وذواقين_الشعر_الشعبي
#ميثم_فالح
#ابو_تراب