#Adliya_xabari

⚖️ Yoshlar taklifi amalda: Qoraqalpog‘istonlik 44 nafar talaba Adliya vazirligi faoliyati bilan tanishdi

Joriy yilning 16-sentyabr kuni adliya vazirining birinchi o‘rinbosari Mahmud Istamov ishtirokida Berdaq nomidagi Qoraqalpoq davlat universiteti talabalari bilan o‘tkazilgan “Rahbar va yoshlar” uchrashuvida yoshlar tomonidan Adliya vazirligi faoliyati bilan yaqindan tanishish taklifi bildirilgan edi.

Mazkur taklif qo‘llab-quvvatlanib, universitetning 44 nafar talabasi uchun Adliya vazirligida tanishtiruv dasturi tashkil etildi.

🏛 Dastur davomida talabalar vazirlikning asosiy vazifa va funksiyalari, adliya organlari faoliyati, sohada amalga oshirilayotgan islohotlar hamda aholiga ko‘rsatilayotgan davlat xizmatlari haqida batafsil ma’lumot oldi.

🎓 Shuningdek, yoshlarga adliya organlari va muassasalariga ishga qabul qilish tartibi, nomzodlarga qo‘yiladigan talablar, tanlov jarayonlari va tizimdagi kasbiy rivojlanish imkoniyatlari tushuntirildi.

Ushbu tanishuv talabalarga oliy ta’lim muassasasida olayotgan nazariy bilimlarini amaliy faoliyat bilan bog‘lash, adliya tizimidagi ish jarayonlari haqida tasavvur hosil qilish hamda kelgusidagi kasbiy yo‘nalishini belgilashda foydali ma’lumotlarga ega bo‘lish imkonini berdi.

🤝 Muhimi, “Rahbar va yoshlar” uchrashuvida bildirilgan taklif amaliy ijrosini topdi. Bu esa yoshlarning fikr va tashabbuslariga e’tibor qaratish, ularni qo‘llab-quvvatlash hamda kasbiy rivojlanishi uchun imkoniyatlar yaratish borasidagi ishlarning amaliy ifodasidir.

Adliya vazirligi yosh huquqshunoslarning kasbiy qiziqishlarini qo‘llab-quvvatlash va ularni tizim faoliyati bilan yaqindan tanishtirishga qaratilgan hamkorlikni davom ettiradi.

🌐 website 📱 facebook 📱 instagram 📱 linkedIn 📱 youtube 📱 twitter

#Xalqaro_hamkorlik

Adliya vaziri Koreya Eksimbanki va KOICA vakolatxonalari rahbarlari bilan uchrashdi

Adliya vaziri Akbar Tashkulov Koreya Eksimbanki va Koreya xalqaro hamkorlik agentligi (KOICA)ning Toshkentdagi vakolatxonalari rahbarlari bilan uchrashuv o‘tkazdi.

Uchrashuv davomida KOICA bilan hamkorlikda amalga oshirilayotgan “O‘zbekistonda sun’iy intellektga asoslangan yuridik xizmatlar uchun muhit yaratish va salohiyatni rivojlantirish” loyihasining ahamiyati alohida qayd etildi. Shuningdek, Adliya vazirligi tomonidan sun’iy intellektni joriy etish bo‘yicha olib borilayotgan ishlar, jumladan, qonunchilik hujjatlarini mashina o‘qiy oladigan formatga o‘tkazishga qaratilgan “Law as Code” tashabbusi haqida ma’lumot berildi.

Uchrashuvda O‘zbekiston va Koreya Respublikasi o‘rtasidagi adliya sohasidagi hamkorlikning bugungi holati va istiqbollari, xususan, adliya tizimini raqamlashtirish, sun’iy intellekt texnologiyalarini keng joriy etish hamda aholiga ko‘rsatilayotgan huquqiy xizmatlar sifatini oshirish masalalari muhokama qilindi.

Shu bilan birga, Koreya Eksimbanki bilan “Huquqiy boshqaruvni sun’iy intellekt asosida transformatsiya qilish” loyihasini amalga oshirish istiqbollari, jumladan, huquqiy ma’lumotlar bazalarini takomillashtirish, Lex.uz tizimini rivojlantirish hamda idoralararo axborot almashinuvini yanada samarali tashkil etish masalalari yuzasidan fikr almashildi.

Tomonlar mazkur loyihalarning o‘zaro uyg‘unligini ta’minlash, ilg‘or Koreya tajribasidan foydalanish, milliy mutaxassislar salohiyatini oshirish hamda qo‘shma tashabbuslarni amalga oshirishda hamkorlikni kuchaytirish muhimligini ta’kidladilar.

🌐 website 📱 facebook 📱 instagram 📱 linkedIn 📱 youtube 📱 twitter

#Xalqaro_hamkorlik

Yevropa investitsiya bankining davlat-xususiy sheriklik sohasidagi faoliyati o‘rganildi

Adliya vazirligi mas’ulligidagi O‘zbekiston delegatsiyasi Yevropa investitsiya banki vakillari bilan uchrashuv o‘tkazdi.

Uchrashuvda bankning tegishli yo‘nalishlar uchun mas’ul xodimlari, shuningdek, bankning O‘zbekistondagi vakolatxonasi rahbari hamda O‘zbekiston delegatsiyasi a’zolari ishtirok etdi.

Muloqot davomida Yevropa tajribasi asosida davlat funksiyalarini xususiy sektorga o‘tkazishning ustuvor yo‘nalishlarini belgilash mezonlari, davlat organlari va xususiy sektor o‘rtasida tuziladigan shartnomalarda xizmatlar sifati, tariflar, nazorat mexanizmlari, tomonlarning javobgarligi hamda shartnomani bekor qilish shartlari muhokama qilindi.

Shuningdek, xususiy sektor daromadlarining shakllanish manbalari, ijtimoiy ahamiyatga ega, biroq tijorat nuqtayi nazaridan kam daromadli davlat xizmatlarini xususiy sektorga o‘tkazishda moliyaviy barqarorlikni ta’minlash, davlat budjeti uchun yuzaga kelishi mumkin bo‘lgan uzoq muddatli moliyaviy va shartli majburiyatlar hamda ehtimoliy xavf-xatarlarni baholash masalalari yuzasidan fikr almashildi.

Yevropa tajribasidan kelib chiqib, muvaffaqiyatli amalga oshirilgan loyihalarni O‘zbekiston sharoitida qo‘llash imkoniyatlari va istiqbollari ham ko‘rib chiqildi.

Uchrashuv Yevropa Ittifoqi tomonidan moliyalashtirilayotgan hamda Adliya vazirligi va Birlashgan Millatlar Tashkilotining Taraqqiyot dasturi (BMTTD) hamkorligida amalga oshirilayotgan "O‘zbekistonda davlat xizmatlari ko‘rsatishni yanada takomillashtirish" loyihasi doirasida tashkil etildi.

🌐 website 📱 facebook 📱 instagram 📱 linkedIn 📱 youtube 📱 twitter