#Adliya_xabari

🔴 “Eng yaxshi huquq o‘qituvchisi” tanlovining respublika bosqichi bo‘lib o‘tdi

🔹Joriy yilning 15–16-may kunlari Bo‘stonliq tumanidagi “Olmos” konvension markazida umumiy o‘rta ta’lim maktablari o‘qituvchilari o‘rtasida “Eng yaxshi huquq o‘qituvchisi” ko‘rik-tanlovining respublika bosqichi bo‘lib o‘tdi.

🔹Mazkur tanlov O‘zbekiston Respublikasi Prezidentining PF–80-son Farmoni hamda Vazirlar Mahkamasining 532-son qarori ijrosi doirasida Adliya vazirligi va Maktabgacha hamda maktab ta’limi vazirligi hamkorligida tashkil etildi.

🔹Tanlovning respublika bosqichida hududiy bosqichlarda g‘oliblikni qo‘lga kiritgan 42 nafar huquq fani o‘qituvchilari ishtirok etdi.

🔹Ishtirokchilar test sinovlari, huquqiy bilimlar bo‘yicha blits-savollar hamda taqdimot shartlari asosida o‘zaro bellashdilar.

🏆 “Eng yaxshi huquq o‘qituvchisi” tanlovining respublika bosqichi g‘oliblari:

🥇 1-o‘rin — Qo‘chqorov Asliddin Imomovich
Navoiy viloyati Navoiy shahri 23-maktab

🥈 2-o‘rin — Sa’dullaeva Dilrabo Xayrullaevna
Surxondaryo viloyati Qiziriq tumani 32-maktab

🥉 3-o‘rin — Xoliqov Hayotjon Rajabali o‘g‘li
Farg‘ona viloyati Qo‘qon shahridagi xususiy maktab

🏅 “Eng yaxshi notiq” nominatsiyasi g‘oliblari:

Tilovov Suhrob To‘lqin o‘g‘li Qashqadaryo viloyati Qamashi tumani 65-maktab

Xoshimova Muxfira G‘afurjon qizi
Farg‘ona viloyati Uchko‘prik tumani 1-maktab

🏅 “Eng yaxshi taqdimot” nominatsiyasi g‘oliblari:

Ochilov Tolib Ixtiyor o‘g‘li
Samarqand viloyati Ishtixon tumani 96-maktab

Yaxshimuratova Iroda Olimbayevna
Qoraqalpog‘iston Respublikasi Amudaryo tumani 40-maktab

🔹Tanlov yakunlariga ko‘ra eng yuqori natija qayd etgan ishtirokchilar g‘olib deb topilib, 1-o‘rin uchun 30 million, 2-o‘rin uchun 20 million hamda 3-o‘rin uchun 10 million so‘m pul mukofotlari bilan rag‘batlantirildi.

📌 Mazkur ko‘rik-tanlov huquq fani o‘qituvchilarining kasbiy salohiyatini oshirish, yoshlar o‘rtasida huquqiy madaniyat va huquqiy savodxonlikni yuksaltirishga xizmat qilmoqda.

Kanalga ulaning va yangiliklardan xabardor bo‘ling
🚀Telegram | 📷Instagram | 🔵Facebook | 📱YouTube | Bot

#Adliya_xabari

🔴 Yer va unda qurilgan mulkka oid huquqlarni e’tirof etish jarayonlari yanada soddalashtiriladi

🔹Adliya vazirligi tomonidan ishlab chiqilgan “O‘zbekiston Respublikasining ayrim qonun hujjatlariga qo‘shimcha va o‘zgartirishlar kiritish to‘g‘risida”gi Qonun Oliy Majlis Senati tomonidan ma’qullandi.

🔹Mazkur qonun o‘zboshimchalik bilan egallangan yer uchastkalari hamda ularda qurilgan bino va inshootlarga nisbatan huquqlarni e’tirof etish jarayonlarini jadallashtirish, amaliyotda yagona va izchil tartibni ta’minlashga qaratilgan.

🔹Qonunga ko‘ra, yakka tartibdagi uy-joylar qurish orqali ortiqcha egallangan yer uchastkasiga bo‘lgan ijara huquqini e’tirof etishda bir martalik to‘lov miqdori aniq belgilanadi.

🔹Shuningdek, jarayonlarni tezlashtirish maqsadida belgilangan muddatlarni 3 barobargacha qisqartirish nazarda tutilmoqda.

🔹Bir martalik to‘lov 20 ish kuni ichida amalga oshirilsa, avtomatik ravishda 50 foiz chegirma qo‘llanadi. Agar ushbu muddatda to‘lov amalga oshirilmasa, fuqarolarga to‘lovlarni 1 yildan 3 yilgacha bo‘lib-bo‘lib to‘lash imkoniyati beriladi.

🔹Qonun bilan ko‘chmas mulkka oid huquqlarni e’tirof etishga doir murojaatlarni ko‘rib chiqish mexanizmlari ham takomillashtiriladi. Jumladan, asosli e’tirozlar mavjud bo‘lsa, vakolatli organlar xulosalarini yuqori turuvchi tashkilotlar tomonidan qayta ko‘rib chiqish imkoniyati yaratiladi.

🔹Bundan tashqari, soliq qarzdorligi bazaviy hisoblash miqdorining 30 baravarigacha bo‘lgan holatlarda ham ko‘chmas mulk obyektlariga nisbatan huquqlarni e’tirof etish jarayonlarini davom ettirish imkoniyati belgilanmoqda.

🔹Ko‘chmas mulk obyektining qurilgan yilini kosmik suratlar asosida aniqlash mexanizmi ham takomillashtiriladi.

📌 Mazkur qonun fuqarolar va tadbirkorlarning ko‘chmas mulkka oid huquqlarini qisqa muddatlarda rasmiylashtirish, mulkiy va meros bilan bog‘liq nizolarni kamaytirish hamda aholining kundalik hayotida uchrayotgan bir qator ijtimoiy masalalarni hal etishga xizmat qiladi.

Kanalga ulaning va yangiliklardan xabardor bo‘ling
🚀Telegram | 📷Instagram | 🔵Facebook | 📱YouTube | Bot

🚨 Yashnobod tumanida jinoyatchilikka qarshi kurashish bo‘yicha tizimli ishlar olib borilmoqda

Adliya vazirligi ishchi guruhi Yashnobod tumanidagi “Fidoyilar” va “Cho‘lpon” mahallasi yettiligi bilan uchrashib, hududdagi jinoyatchilik holatini manzilli o‘rgandi.

O‘rganish jarayonida jinoyatchilikka qarshi olib borilayotgan ishlar va profilaktika choralarining samaradorligini oshirish yo‘nalishlari muhokama qilindi.

Hududda xavfsiz muhitni shakllantirish uchun mas’ul shaxslarga tegishli ko‘rsatmalar berildi va huquqbuzarliklarning oldini olish bo‘yicha chora-tadbirlar belgilandi.

Ayni kunlarda Oʻzbekiston Respublikasi Adliya vazirligi delegatsiyasi tarkibidagi “Adolat”milliy-huquiy axborot markazi a’zolari Janubiy Koreya Respublikasining 2025/2026-yillarga moʻljallangan KSP (Knowledge Sharing Program) bilimlar almashinuvi dasturi doirasida huquqiy axborotni tarqatishda zamonaviy tizimlar hamda sunʼiy intellekt texnologiyalarini keng joriy etish boʻyicha Koreya tajribasini oʻrganish maqsadida Seul shahrida boʻlib turibdi.

Xizmat safari doirasida delegatsiya a’zolari Koreya Respublikasi Milliy Assambleyasi, Konstitutsiyaviy sudi, Davlat qonunchiligi vazirligi, Koreya huquqiy axborot markazi hamda shu yo‘nalishlarda dasturiy mahsulot ishlab chiquvchi IT kompaniyalar vakillari bilan uchrashuvlar oʻtkazilishi rejalashtirilgan.

Dasturning ilk kunida Koreyaning qonunchilik tizimi, normativ-huquqiy hujjatlarni ishlab chiqish va ularga oʻzgartirish kiritishda raqamli texnologiyalardan foydalanish amaliyoti, huquqiy axborotni aholiga yetkazishning zamonaviy mexanizmlari hamda ushbu yoʻnalishdagi ilgʻor tajribalar boʻyicha taqdimotlar oʻtkazildi.

Shuningdek, Koreya qonunchilik tadqiqotlari instituti ekspertlari bilan norma ijodkorligi jarayonida ilmiy-tahliliy institutlarning roli, huquq ijodkorligida raqamli texnologiyalar va sunʼiy intellektdan foydalanish masalalari yuzasidan fikr almashilmoqda.

Mazkur xizmat safaridan koʻzlangan asosiy maqsad — tomonlar oʻrtasidagi hamkorlik aloqalarini yanada mustahkamlash, huquqiy axborotni raqamli boshqarish, huquq sohasida sunʼiy intellekt texnologiyalarini qoʻllash hamda norma ijodkorligi jarayonlarini modernizatsiya qilish boʻyicha oʻzaro tajriba almashishdan iborat.

Kanalga ulaning va yangiliklardan xabardor bo‘ling
🚀Telegram | 📷Instagram | 🔵Facebook | 📱YouTube | Bot