Арна кейіпі, хикаядағы жазбы және т.б.

Telegram-ның Рождестволық жаңартуында арналар тұсқағаз, эмоджи статус және бейін таңбасын орната алады, қолданушылар арна хаттарын хикаяға қайта жариялай алады, Telegram Premium-ді бірден бірнеше адамға сыйлауға болады, ал ұтыстарға қосымша жүлделерді қосуға мүмкіндік бар және т.б.

Арна кейіпін баптау

Енді арналар жазылушылардан немесе ұтыс арқылы келген дауыс есебінен деңгей жинаған сайын өздерінің сыртқы кейіпін баптай алады.

Арна иелері енді хаттарының түсінен бөлек, бейін мұқабасына түс пен таңба таңдай алады, эмоджи статус қоя алады және арнаны ашқан барлық адамға көрінетін тұсқағаз орната алады.

Эмоджи статус үшін арналар Telegram суретшілері жасаған мыңдаған эмоджидің ішінен таңдай алады, арна атауының жанына анимациялы аққаладан бастап жұмбақ хот-догқа дейін қоюға болады.

Арнаңызды баптау үшін оның бейінін ашып, Арна баптауы → Кейіп тармағын таңдаңыз.

Қандай кейіп баптауы қолжетімді болатыны арнаның деңгейіне байланысты. Деңгейлер арналарға хикая жарилауға және жеке реакция қосуға да мүмкіндік береді.

Хикаяда жазбаны бөлісу

Енді арналардағы хаттарды хикаяңызға қайта жариялауға болады. Бұл кезде хаттың көшірмесі қосылады, оны жылжытуға, өлшемін өзгертуге және безендіруге болады. Хикаяңызды көрген кез келген адам оны басып, арнадағы хатты тікелей аша алады.

Қайта жариялау хаттардың барлық түрін қолдайды: сурет, файл, тіпті дауысхат және бейнехат. Алдағы жаңартуларда хикаяға қайта жариялау мүмкіндігіне интерактивті сауалнамалар сияқты қосымша мүмкіндіктер қосылады.

Хатты қайта жариялау үшін оның жанындағы бөлісу батырмасын басып, «Хикаяға жариялау» басыңыз.

Ауқымды Premium сыйлықтар

Достарыңызды құттықтау үшін енді Premium-ді бірден бірнеше адамға сыйлай аласыз, осылайша биылғы мерекелік сыйлықтарды рекордтық жылдамдықпен реттеп тастайсыз.

Баптау бөлімінде жаңа «Premium сыйлау» бөлімі бар, сол жерден 10 қолданушыға дейін таңдап, бір басумен Premium сыйлауға болады. Сол қолданушылардың бірінде Premium бұрыннан бар болса, ол сыйлықты кейін қосу үшін сақтай алады немесе досына жібере алады.

Premium-ді жеке қолданушыға оның Бейіні → ⋮ / ⋯ → Premium сыйлау мәзірі арқылы да сыйлауға болады.

Ұтыстағы жеке жүлде және жеңімпаз тізімі

Ұтыс өткізетін арналар енді ұзағырақ мерзім қоя алады және қосымша жүлделерді көрсете алады.

Ашықтықты арттыру үшін ұтыс ұйымдастырушылары «Жеңімпазды көрсету» теңшеуін қосып, жеңген тіркелгілерді жариялай алады. Бұл қосулы болса, жолы болған жеңімпаздар жаңа конфеттиі бар хатта жарияланады.

Telegram жеңімпаздарды кездейсоқ таңдайды және Telegram Premium сыйлық кодтарын өздігінен таратады. Ал қосымша жүлделерді жеткізуге арна әкімшілері өздері жауапты.

Қайта жариялауды көру және т.б.

Қолданушылар хикаяны кім көргенін және қалай реакция қалдырғанын бұрыннан көре алады, ал арналар хикая нәтижесін бақылау үшін толық статистика алады.

Бұл жаңартумен арна әкімшілері енді хикаяға келген реакцияларды көре алады, ал қолданушылар да, арналар да хикаясын кім қайта жариялағанын көре алады.

Хикаяға арналған сурет қиындылары

Галереядағы суреттерді хикая үстіне қоюға болады, ал енді үй жануарыңыздың, досыңыздың және аңызға айналған артефактінің суреттерінен фонды алып тастауға да болады.

Хикаяға сурет қосу үшін хикаядағы стикер тақтасын ашып, сурет таңбасын басыңыз. Сосын суретті таңдап, мәзірдегі > батырмасын басып, Қиып алу таңдаңыз, сонда фоны тазаланады. Бұл мүмкіндік үшін iOS 17+ немесе Google Play Services орнатылған Android 7+ қажет.

Бүгінгі жаңарту осы болды, жыл аяқталғанша мұржаға тағы бірнеше жаңа мүмкіндікті сыйғызуға тырысамыз.

Қысқы мереке құтты болсын!

2023 жылы 23 желтоқсан
Telegram командасы