.
افا تبدل حجيكم ليش ؟
معقولة العمر اثر ؟
هلي خلوا الحجي مدثر
انا شبيدي ؟! العمر ركضة
هلي لو بيدي ما اكبر
مثل حال العراق وياي
عشت وياكم بغربة
الماي الما تحضنه جروف ما يندل بعد دربة
.
.
.
.
#شعراء_وذاوقين_الشعر_الشعبي
قصيدة ل #احمد_العبيدي
#ابو_تراب

.
منهو الكالك ناسيك ؟ هم ينسى الكمر وكته ؟
لو نبض الگلب يتنكر ل دكته
بس عشكك عشك مفضوح
وعشك الناس كلها مساتر وسكته
صرت انت سبت وبركبة يهودي
هم شايف يهودي يجوز من سبته ؟!
.
.
.
.
#شعراء_وذواقين_الشعر_الشعبي
#عباس_چيچان
#ابو_تراب

.
امه تشوفه جا وانا ... لشامه
تعبت هم كربت رية ... لشامه
الشلع گلبي ارد اوصفنه
عسى من الله و انصفنه
من اديته تستحي الحنه
سنه يغار من سنه
الشامه مكابله الشامه
يمشي وهن جدامه
يتلثم فضحن الثامه
زعل وتكربن شامه ... لشامه
ابتسم واتفاركن من صد علية
.
.
.
.
#شعراء_وذاوقين_الشعر_الشعبي
#اياد_عبدالله
#ابو_تراب

.
جمالك بالگلب والروح ... طرفاي
شعرك في جبينك نور ... طرفاي
احذرك لا تدوس بيوم ... طرفاي
اوچ گلي وطرف ما يضل بية

دحوك بثوب حسنك ... وانسجه النا
بجهنم حبك ارضى ... وانسى جنه
انحبسنا بقفص عينك ... وانسجنه
وتحط رمشك گلبچات ب أدية

ها دك الگلب بجفاك ؟ ... ها رف ؟
هاك اخذ الجروح وياك ... ها روف
مثل خزلة غنم وتشوف ... هارف
شتن مشن كل وحدة بنوية

الوكت من عش حزنه ... ما نقلنه
وحجي الوادم ل وادم ... ما نقلنه
الوكت من امتحنه ... ما نقلنه
واخذنا بكل درس اخلاق مية
.
.
.
.
#شعراء_وذاوقين_الشعر_الشعبي
#سعد_محمد_الحسن
#رحيم_المالكي
#ابو_تراب

.
شوف اكلك بالله حاجيني تعال
تكدر تفهمني بالسويته
تضحك كبالي الضحك يعني يصير
كبال واحد انت هاجم بيته
على الاقل اخجل اذا تلاكيني
وهاي عينك لا تحطها بعيني
جرحك فتحت الگلب خليته بي
وجرحي شلته وبالملح خليته
.
.
.
.

#شعراء_وذاوقين_الشعر_الشعبي
#علي_الفريداوي
#ابو_تراب

.
اجيت الله اكبر مو جنت ناسيك
بية شذكرك ؟ يمعود شجابك
اذا تعتب علية جي ما ادك الباب
خل گلبك يدك بعدين ادك بابك
جنت اشتاك ل امي وانت ما موجود
اشمن ريحة امي بريحة ثيابك
اشمن شيلة امي بطولك من اشتاك
وعلى هذا الحساب شحاسب حسابك
.
.
.
.
#شعراء_وذاوقين_الشعر_الشعبي
#احمد_الصالحي
#ابو_تراب

من مذكرات شاعر... الحلقة ( الاولى )
(( نافذة شعرية تسلط الضوء على حكاية قصيدة ))

بعد فراق الاحبة الي اختاروا طريق الموت . اختارت صحته ان تتخلى عنه
لذلك قرر ان يكون صديق لدموعه !
البكاء افضل وسيلة حتى تخفف بي من وجع الذكريات وكما يحلو للبعض ان يسميه ( غسيل القلوب )
ولكن يبدو حتى الدمع هو الاخر قرر ان يتخلى عنه ايضا !
نعم تخلت عنه دموعه !!
يوميا يحاول ان يكابر ويرفض ان يذهب لطبيب للعيون الا ان الالم خلاه بنهاية المطاف ان يرضخ ويروح للدكتور
وكانت النتيجة ان يكتبله ( قطرة ) عبارة عن دموع صناعية لان دموعه الحقيقية خلصت تماما ...
من مذكرات الكبير سعدون قاسم اخترت لكم هذه الحكاية والنص الغنائي الجميل ايضا




مابيهن دمع حدهن للجفون
واذا مابجن ماسميهن عيون
بعد ماشوف بيهن لاتجوني
خلص مايهن راحن عيوني
هذا الصار بيه
قسه دهري عليه
خوفي من الشماته لا يعرفون
................
جنت طير واطيرن وين ماريد
هسه الشوف حده لمدت الايد
صرت ياحيرتي بس اسمع الصوت
وبعد ماخاف منه لو يجي الموت
بعد ماشوف بيهن لاتجوني
خلص مايهن راحن عيوني
هذا الصار بيه
قسه دهري عليه
خوفي من الشماته لايعرفون


.
#شعراء_وذاوقين_الشعر_الشعبي
#ابو_تراب

.
ضحكة جذب بالوجه البس والاكي جرح
لان روحي طبع الارض تعيش من تنطعن
وتموت اذا تنترك يخنكها جف الملح
ولا تكلي صابر علية صبر الجبل على الثلج
مو مثل صبر السفح
ولو طار عالي النسر لا ينسى فضل السما
ويكول عندي جنح
توها المحبة ابتدت وتوه الاساس انبنه
يحجيلي عن السطح
وكاتبلي فرحة الزمن كلمة اعلى جاري النهر
ويكلي ما تنمسح
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
ايامنا الخلصت سوى
لجروحي تتفصل دوه
بس انت حيل استعجلت كبل العرس زفيتهن
وذيج الاسرار البس الي بس لا تكول انطيتهن
متانيك بس وين اتجه ؟
بيبان گلبك والوجه
سدة الخايف من وكت سديتهن
وجهك مثل وجه السكف ينرفع راسي بشوفتك
ومن كثر ما اصد على الصور بية شبة من صورتك
اشتاكلك ب اصعب ضرف
ما زال وياك بحرف
جعوب رجلية من اكف ما عابرة مصلايتي
انت وجودك بالارض تجايتي
لا انت غاية غايتي
هزة فناجين كهوة سنين البقت هزيتها
وضليت اراقب عن بعد ما شام حايط بيتها
الجانت تموت من الشعر تكتب شعر خليتها
.
.
.
.
#شعراء_وذاوقين_الشعر_الشعبي
#حسين_العميدي
#ابو_تراب

.
مكابر كوة اجيب الراس على الراس
واعاند دنيتي اعناد المجانين
وانا شما اطيح اكل للروح لا بأس
على جروحج توجي ولا تصيحين
شربني الزمان هموم من كأس
اقسى وامر من سم الثعابين
تجرعته بصبر ما سمعت ناس
لجن يا حيف فضحني النياشين
انا الروحي جبل يهدمني يا فاس ؟
وانا المرمر التنحد بي سجاجين
ل اخلي جفوني على الدمعات حراس
واكل للعين فنج بعد تبجين
ولو ناري جبيرة وعيب تنقاس
لجنها كواي بيج شكد تحملين
اذا وصلت منيتي لكطع الانفاس
واجب من يمر شامت تضحكين
مرمر سكف روحي واصلب الساس
ولا من جام بيتي وساسي من طين
وطبع بالروح يشبه وركه اليأس
يتكاثر عطرها بفرك الايدين
.
.
.
.
#شعراء_وذاوقين_الشعر_الشعبي
#رحيم_المالكي
#ابو_تراب

.
كالوا رجعلك كلت شي عنده
ما مشتاك بس المصلحة ترده
مبين من سلامة العنده شغلة وياك
ابو العشرة الكصيرة التنتهي بمده
انا بسبب ربعي شكد نمت زعلان
وشكد ما نمت وعيوني تتبده
ضموني وكلت هو الذهب مضموم
كطعوني وكلت خل انكطع ورده
شيل الطيبة مني الشيب كله يروح
رد الطيبة الية الشيب هم رده
مدري شضيعت واسأل بوجه الناس
شخبار الوفى هواي انا مفتقده
كمت انصدم من الكالي خوش انسان
وادم حتى الله بمصلحة تعبده
انا كلش صلب مرات بس مرات
محنة والدة وطيبة بزر كعده
انا من انعزل وابتعد مو مغرور
ابو نفس العزيزة بكل وكت وحده
.
.
.
.
#شعراء_وذواقين_الشعر_الشعبي
#زيد_السومري
#ابو_تراب

• .
وحق كل يوم مر وگلبي ما عاشة
وشكو بروحي غصن يبچي اعلى فراشة
مثل ما بردت النار العلى ابراهيم
برد گلبي وجمرهم بالهوا تلاشة
گبل جانت تجيني اخبار بيها جروح
واتوخى الحذر من عدها واتحاشة
بس ما دام كضيت الجسر ما اخاف
ولا يعنيلي عمق الماي وكياشة
صفر على اليسرى رادوني انهمل بس لا
انا ابن امي من هذا الوصف حاشة
انا عكال اعيش ومن اموت عكال
ما انحط صفح مو جيب دشداشة
.
.
.
.
#شعراء_وذاوقين_الشعر_الشعبي
#سيف_الحلفي
#ابو_تراب

.
يردوني اكتب ! شكتب وشتغزل ؟
ما تستفزني الدنيا مثل الاول
رد فعلي بارد صار حتى من النار
ميهزني كل شي وكلشي كمت اتحمل
مر كلشي بية وكلشي اصبح مألوف
مألوف حتى الجاي بالمستقبل
بعدين وينه اليسمع وخلكة طويل
ترجيت خلكي وعافني وما طول
المحنة اكبر من كتابة الاشعار
بس اليأس مر والتفائل اجمل
لا بأس اذا حب على الگلب يطرق باب
بلكي الخلايا النايمة ترد تعدل
.
.
.
.
#شعراء_وذاوقين_الشعر_الشعبي
#مرتضى_الميالي
#ابو_تراب

.
علامة الصبر ليش اصبر علامة
بحبل الموت حبل الروح مشدود
جسر ويعود لا تكلي بسلامة
اذا كال القدر ميعود ميعود
حر الصيد ينصاد بحمامة
وبركع للممات الشوف مسدود
انا الطب ولكى بروحة غرامة
مكتول وعلى السجين مسنود
واداة القتل مطعون بملامة
وراسم من نزيفة عيون وخدود
كلت بلكي الصدى حافظ كلامة
ما ادور نفي واثبات وشهود
خرسة الكاع وتحذر النعامة
ولسان الصدك بالخوف معكود
من المعدم الى اصحاب الفخامة
ومرورآ بالبطر والعاش مكرود
اسم مخطوط تالينه برخامة
فوك الكاع اسم والطين للدود
.
.
.
.
#شعراء_وذواقين_الشعر_الشعبي
#سمير_صبيح
#ابو_تراب

.
تلعب للصبح واندله حد الليل
وانا ابدي الصدك وياك من غبشه
كدام الشمس وكبال عين الناس
لان حتى اليغش ما نعرف نغشه
اندل الدرب للحيل اشد حيلين
عود الحك علية يا الكوة تتمشى
بنياني صعب واتحدى بي زلزال
فاس بلايا ادين شجابك تفلشه
منجل من شمع لا تكول احش النار
سنابل نار زرعي اتورط و حشه
صير انت جبل باجر تغط بالكاع
يا كاع التكضك كاعكم هشه
.
.
.
.
#شعراء_وذواقين_الشعر_الشعبي
#جبار_رشيد
#ابو_تراب

.
بينت من كمت تتزعل هواي
افتهمت عيونك وما عاتبتهن
وغسلت ايدي برسايلنا القديمات
من حسيتك لغيري اكتبتهن
من شفت الصور ما غزرن بيك
من عدها وبعد ما كلبتهن
من احتاجيتك وما شفتك وياي
هنا كل الملامح خربتهن
هنا والليل ضل يتفلسف وياي
هنا والما يشيبن شيبتهن
.
.
.
.
#شعراء_وذواقين_الشعر_الشعبي
#مالك_السلطاني
#ابو_تراب

• .
ثگلت علية شبيها الوجوة
سويت زين وصرت مكروة
جنت من اجي يكولون اجى العيد
هسة من اجي يكولولي شتريد
ليش العزيز ب لحظة ينسوا ؟
ثكلت علية شبيها الوجوة
.
.
.
.
#شعراء_وذاوقين_الشعر_الشعبي
#جبار_صدام
#ابو_تراب

.
عرفتك بية راح تخون جي حالفلي ما اخونك
ومن أول سلام وياك قريت وداع بعيونك
الهضيمة تغيرت وحدك
ولا تعبوا عليك هواي من رادوا يغيرونك
ولك عذبت واحد گلبة تشريني
ما اسيطر على دموعي من الاكي انسان ناسيني
ولك يا بعيد وخر عن شراييني
احسك جاي تتسابق وي الشمات ياهو اكثر يبچيني
من انسأل عن فركاك محد يحجي غير العين
مثل جندي بحرب مفقود ومسوين فاتحته وهلة مأيسين
بوية الفاتحة شصعبة من تنقرأ اعلى العدلين
ورجع خاطر يبشرهم بس يلكى اهله متوفين
هنانه الفاتحة اصعب حيل من تنقرأ اعلى الميتين
والاصعب من هذيج وهاي انا وياك مختلفين
.
.
.
.
#شعراء_وذواقين_الشعر_الشعبي
#زيد_السومري
#ابو_تراب

من مذكرات شاعر ... الحلقة ( الثانية )

شاب لفظ انفاسه الاخيرة وطاح على احد ارصفة شوارع العاصمة الأردنية عمان.
بعد ان تجمهرت مجموعة من الناس حول الجثة . عرفو من جوازه انه ( عراقي ) ..وجاي يدور على شغل ايام الحصار ..
الله اعلم كم مرة خلص من قبضة الموت خلال المعارك الشارك بيهه ايام ما جان جندي بالجيش .
ولكن يبدو ان معركته الاخيرة معركة شلون يدبر خبزته وخبزة عائلته اشد من كل الحروب الخاضهه...
هذه الحادثة صادفت الشاعر الكبير الشهيد رحيم المالكي اثناء رجوعه من الاردن الى العراق... الشارك بمبلغ من المال بعد ان شاف العراقيين يتبروعون لارجاع جثة الشاب لأرض الوطن وتأثر حيل الى درجة انه
كدر يترجم الحادثة الى قصيدة اطلق عليهه ( موت في الغربة ) سنة ١٩٩٨

(( موت في الغربة ))

ليش الوحدك من غير جناز
وياهو لغسلك ويغمض لعيون
غريب بنص محطة أوادم اجناب
وهلك عنك بعيد شلون يدرون
ليموت بنص هلة تتهدل اهدال
وعليه امه وخواته تطيح لمتون
وشوفك وحدك وانته الگبل چان
الجبل والساتر بسدك يلوذون

ملك موتك استعجل لو توانيت
ترد لديرتك چا هسه مدفون
ددليني بجوازك رايد اقراه
واشوف شصارلك بالغربة مسجون
من وحشة الغربة لوحشة الموت
وشربت الوحشتين بفرد ماعون

عليك أمك تعاين بلچن تعود
وضعنك ما رجع من دون الاضعون

عدمن ودعتهة او جيت ليجاي
وعليك تناشد ال يرحون ويجون

تريدك عون الها لتالي الشيب
وهسه انته ضعت وتريدلك عون
وحدك تنعي روحك چنك تگول
هلي يا من ضيعوني شلون ينسون
المثلك ما يموت وناسه تنساه
العراق انتة العزيز وتنسي اشلون

يالحنة اجرورحك حنة الفاو
يالمدفي بقميصك حقل مجنون
يال بالهور دمك لسة موجود
ولهسه بنهر جاسم بيك يحچون
المثلك ما يضل من غير جناز
النخل يطلع وراك وي اليشيعون
المن جابتك للغربه رجليك
ومتت لا ناعية ولا ناس يبچون

تكلي الجوع اكلك انتة غلطان
العراق بخير بعده ولسة مامون
صحيح الجوع كافر من يمر بيك
وانا مجربة واعرفه شلون ملعون
حافي وساوموني وكلت ما بيع
وشلت غيرة هلي العشرين مليون
اثبت لا تهزك رعشة العوز
الشدايد صم صبر واتعدي وتهون

العراقي شما تلم بيه الملمات
جلد على النايبة وبالصبر مدهون
اذا ذيب الوكت ما ننگلب شاة
ونتانيهة شوكت تگطعنة السنون
غدر طبع الذيابة وهذا معروف
ومثل هاي النهاية المرة يردون
انا يا صاحبي راجع للعراق
اسولف قصتك للي ياشرون

واگلهم نهر ذلة ورا طريبيل
وانا خايف عليكم لا تغرگون
الوطن هذا الوطن كل شبر محراب
كعبة ودنگوا يمة ال يصلون
عراق ومنهو غيرك يرهم وياي
وانا مطلگ الدنية وعايف الكون
.
.
.
#شعراء_وذواقين_الشعر_الشعبي
#ابو_تراب

.
من تشوفني تعرفني ؟ لا و الله
مو ذاك الغشيم المن كبل شفته
كبالك غير واحد بي شبه من ذاك
ما يشبه هذاك البي جرح عفته
مره التجربة المريت بيها وياك
مره وعلمتني وحنضلك ضكته
ولان ما ردت منك شي يضل تذكار
ما ردته بحياتي وعلى الخلگ سمته
منو الياخذ حلم ؟ منو ينطي زايد بي ؟
حلم كلش جديد وما استعملته
عفتني ويا الجكارة اثنينه مورثين
محد طفى الاخر وانطفيت انت
.
.
.
.
#شعراء_وذواقين_الشعر_الشعبي
#ايهاب_المالكي
#ابو_تراب