.
من كتلك جرح ينرس حلكة قماش
ما شايف الدم شيسوي بالمطكوك
اجي محترمك وبؤبؤي بنص العين
وانت تهيني ب مباوع الطارف
فطن وتخمخم الكشه بنضر مصيوب
دورت بزعلنه دوارة العارف
بس تطيح تبرد فاتحة عريس !
جادر ما تضل طول العمر واكف
خسرنا المعركة والما نكض يعيش
غشيم الصاحي لمن يسند النازف
القفل يطرد الوادم لو وكف على الباب
وانت ولا هلا من حلكك تكاطف
.
.
.
.
#شعراء_وذواقين_الشعر_الشعبي
#رضا_العبادي
#ابو_تراب

.
شعجب عبرنك وما ركزت بيهن ؟
الظاهر ما يعجبن نفس راعيهن
بالعادة البشر يندم لشئ سواه
والله اتندمت على الما مسويهن

طعنتوني وكلت ممنون من هاي
الصور لو ما جرح بظهورها تطيح
واروحن واجي بدربي ومالي بالناس
بدرب واحد عشت مثل المراجيح
العنده اخوان من يوكع يصيح اخ
زين الماله اخو لو طاح شيصيح ؟!
.
.
.
.
#شعراء_وذواقين_الشعر_الشعبي
#مهيمن_الامين
#ابو_تراب

.
كالوا رجعلك كلت شي عنده
ما مشتاك بس المصلحة ترده
مبين من سلامة العنده شغلة وياك
ابو العشرة الكصيرة التنتهي بمده
انا بسبب ربعي شكد نمت زعلان
وشكد ما نمت وعيوني تتبده
ضموني وكلت هو الذهب مضموم
كطعوني وكلت خل انكطع ورده
شيل الطيبة مني الشيب كله يروح
رد الطيبة الية الشيب هم رده
مدري شضيعت واسأل بوجه الناس
شخبار الوفى هواي انا مفتقده
كمت انصدم من الكالي خوش انسان
وادم حتى الله بمصلحة تعبده
انا كلش صلب مرات بس مرات
محنة والدة وطيبة بزر كعده
انا من انعزل وابتعد مو مغرور
ابو نفس العزيزة بكل وكت وحده
.
.
.
.
#شعراء_وذواقين_الشعر_الشعبي
#زيد_السومري
#ابو_تراب
_

.
شلك علية يا زمن وشرايد ؟
انطيتك الي ردته مني وزايد
ضحيت ب اغلى احبابي
وخسرت كل اصحابي
وشتريد تاخذ بينت ومعاود
نيشان اكثر من جرح مو كافي
كضيت عمري وياك ما متصافي
الماي يمي والعطش بشفافي
شتريد تاخذ بينت ومعاود ؟
شلك علية يا زمن وشرايد !؟
.
.
.
.
#شعراء_وذواقين_الشعر_الشعبي
#الكاطع
#ابو_تراب

.
شط الديوانية يفرفح لو مرت من يمه صبيحه
ويكوم يصيح كل صوته خليلي من زلوفج ريحه
من ضحكتها الناس تبدل تنزع ثوب وتلبس ثوب
وكلوب الشارع من يطفى تطلع صبحه بمية كلوب
وفطور الصايم يتعطل تطلع صبحه يثور الطوب
وكل الديوانية تعيد هذا الصوب وذاك الصوب
ما اكللكم كلش حلوة بس يا الوادم مدري شبيها
لا كلش سمرة ولا بيضة مدري شلون الله مسويها
ومدري شلون البيت يلمها ومدري شلون امها تغطيها
ومدري شلون الشارع صابر لسا ما ماكل رجليها
لو حلت صبحه ضفايرها تحبل حتى العاكر منهن
اي والله والحبلة تجيب
تتناوب هي وشمس الله تطلع وحدة ووحدة تغيب
وساحات التدريب من تمر يبرد حت عرك التدريب
.
.
.
.
#شعراء_وذواقين_الشعر_الشعبي
ل #كاظم_خبط
#ابو_تراب

.
صار هواي ما باچي عليكم
وانا الما بطلت تفكير بيكم
ما اعرف شنو البعيوني مسدود
اشو كل الالوان تشوفهن سود
الجرعة الزايدة من الفركة تأذيك
وتبچي الطبيب الي يداويك
تأكدت الاغصان تشيل تابوت
من شفت الورود تموت بسكوت
معقولة الكلام يصير بي ماي ؟
اذبل ليش من يشح حجيكم ؟
وانا الما بطلت تفكير بيكم
الشعر من ينكتب من دم الاقلام
تسمع بي نبض لو مر الف عام
التحبه بلحظة الي تتصل بي
تفاجئ ب اتصال ومنه تلكي
خل نفرضها صدفه شلون تنعاد
المثل هاي الصدف تفسير ينراد
سبحانة الخلق منظومة احساس
ما تنشاف بس تثكل على الناس
انا من ابچي سمار اترسها الدموع
لذالك بچيي ما يشبه بچيكم
وانا الما بطلت تفكير بيكم
.
.
.
.
#شعراء_وذاوقين_الشعر_الشعبي
#ميثم_فالح
#ابو_تراب

.
ليش لوحدك من غير جناز
وياهو الغسلك ويغمض العيون
غريب بنص محطة و وادم اجناب
وهلك عنك بعيد شلون يدرون
اليموت بنص هله تتهدل اهدال
علية امة وخواته تطيح المتون
واشوفك وحدك وانت الكبل جان
الجبل والساتر بسدك يلوذون
.
.
.
.
#شعراء_وذواقين_الشعر_الشعبي
ل #رحيم_المالكي
#ابو_تراب

.
عرفت الها وكمت ما ازاعل اليرحون
ولا على الباب اضل متاني ليلية
من شفت الحلم ينوخذ مو على اللون
بعد بطلت اضم احلامي وردية
الناس اختلفت وظهرك اتچي وين ؟!
اذا ما تلكى حايط تكعد بفية
لهسة وما اعرف عايش وياهم ليش ؟!
ويذوب الثلج بس ينچوي شوية
.
.
.
.
#شعراء_وذواقين_الشعر_الشعبي
#ايهاب_المالكي
#ابو_تراب

.

من تراب مثلي نعم
بس للجمال اسباب
رب الجمال اعتقد
سواك في محراب
اباب جنة عدن
تين ونخل واعناب
وبقالبك خلة عسل
وشوية ذب تراب

ابسواد العين يسمر ... منته رابي
شعجب گلبك تغير ... من ترى بي؟
انا ما اضن ترابك ... من ترابي
حضنتك والعسل چلب ب ادية
.
.
.
.
#شعراء_وذواقين_الشعر_الشعبي
#صباح_الهلالي
#ابو_تراب

.
تدري اهل القنص الاسهام
صنعوها يصاحب بيش
صنعوها بحبل معجود
ومفتولة بحبل من ريش
الصكر من طاح فوك الكاع
هم تدري بهضمته عليش ؟!
( لان سهم جناحه من جناحه )
.
.
.
.
#شعراء_وذواقين_الشعر_الشعبي
#سمير_صبيح يقرأ قصيدة اهوازية
#ابو_تراب

.
بعيوني اريدك تجي لو بس حلم عابر
انطيني نسمة هوا و براحتك سافر
من دونك انا ترى متلعثم و حاير
لو گلبي ... لو خاطري ما اعرف شكاسر ؟!
يا البية الك لوعتي والشوك والشاعر
وليل وحلم بالجفن والماضي والحاضر
كلي اذا ما تجي وسولف من الاخر
انا ودمعتي ترى ما نصبر لباجر
عكبك أمن منو ؟ ومنين ما احاذر
حرب الضنون ابتدت وبعازتك ساتر
وديلي اثر خطوتك
ودي عطر لمستك
سويلي واهس اضل وكت البعد صابر
.
.
.
.
#شعراء_وذواقين_الشعر_الشعبي
#ايهاب_المالكي
#ابو_تراب

.
المال ما يشفي الجرح المال ما يصبح دوة
التشفي جروحك اخوتك يوم لو صفوا سوة
لا يغشك ثكل جيبك جيبك يطيره الهوا
( وعضيدك لازم تحتاجة )

كل عازة اعلى اهلها تهون بس عوز الزلم عازة
الا بكومك شرف وبعز وبيهم كل فخر حازة
عربهم من يصير صياح يوصل يوم تعتازة
( خوانك لا تكطع بيها )

بالكطع لا تخبر ابنك علمه فنون العلم
وكله بوية بلا عمامك ما يهابوك الزلم
السيف ما تكطع طبرته لون ما شلته بعزم
( والترجف ايدة يطك روحه )

عن اخوك اسأل ضميرك الضمير احكم عضو
يكلك بقيمة عضيدك ماكو اغلى من الاخو
الما يمر بازرك الجله ما عرف عزة الدفو
( خوانك لمها وباريها )
.
.
.
.
#شعراء_وذواقين_الشعر_الشعبي
#عدنان_المطوري
#ابو_تراب

.
روح كد ما بيك وارجع تلكى حبك مستمر
الشمس متغير تفاصيل السمر
أمنت عطري بقميصك وانتظر
الملگة بالظلمة نميزة من العطر
كلها الزفة عن حب مرة وحدة انا كافر بالجمع
ما يصير نحط حلقتين بصبع
عمري ما بادي بوداع
الراد يدور مكفى بية
يروح يسأل اي سفينة بيا وجه مكفى الشراع
الله لو خالقني ماي
الغيمة تعتز بكطرتي وما تبديني اعلى كاع
هيبتي بنكران ذاتي
وماين شكد اعلى روحي وب اختصار لكل شرح
ما مفتن يم طبيب اعلى الجرح
.
.
.
.
#شعراء_وذواقين_الشعر_الشعبي
#حسين_علي_المطوري
#ابو_تراب

.
ابچيك من اسولف ... مدري اسليك
حرت بحروفي اسمنك ... مدري اسلك
الزرف گلبي كلامك ؟! ... مدري سلك

وحرت بزنودي اشدك ... مدري احلك
اهو حالي التغير ... مدري حالك
جرحي بطول هجرك ... مدري حلك

وحرت منا تعدى ... مدري مناك
الذنب ميلت جدامك ... مدري منك
يدارميني اعلى واشي ... مدري منك

على اذني وصوج گلبك ... مدري شافك
ومدري العتب يوجع ... مدري شافك
وحرت لو اجيت اغمض ... مدري اشوفك

واحط ايدي اعلى گلبي ... مدري اخلها
اعلى عيني وانت ابنها ... مدري خلها
الخلك عمدآ تذكر ... مدري خلها

صدك ما ادري اضلن ... مدري اهين
بچولة ومادري اصحى ... مدري هاين
بغيضك گلبي اصبرة ... مدري هين

كله وفدوة ضلن ... مدري راحن
يمن نعناع عطرك ... مدري ريحان
وشضل واكف بهجرك ؟ ... مدري راح

انتجي وعيوني راحن ... مدري ماتن
عليك وزيجي اعتن ... مدري امتن
عشكتك من هالله ... مدري ما

تنحمل ما ودي ازعلنك ... واعلبيك
يا وسفى ما تعل بية ... واعيل بيك
يكون اغدي بمرض معدي ... واعلبيك
نفسة ولا يمر غيرك علية
.
.
.
.
#شعراء_وذواقين_الشعر_الشعبي
#اياد_عبدالله
#ابو_تراب

.
خوفونا من المصيبة و احنا بيها
وخوفونا وخوفونا .....
و احنا متعودين على الخوف وعليها
والشمس لبست عباية تغطت من الشايفيها
والارامل كومة كعدن على الرصيف
يا رصيف الموت بلكي يمر وليها
غطي وجهك ذيج سجين المنايا
متانية الركبة تجيها
غطي وجهك ما بقت للعتبة حرمة
الباب غيرة وشالعيها
والخضار بكل مدينة و احنا ناسين الخضار
ذيج دار وبيها قطعة
بصفها دار وبيها قطعة
وذاك شارع بيه قطعة وذيج دار وذيج دار
بيا محطة تريدني انزل وانا عايفني القطار
بين طلقة وبين سيف وبين صوت الانفجار
.
.
.
.
#شعراء_وذواقين_الشعر_الشعبي
#خضير_هادي
#ابو_تراب

.
اثنين جانوا الك
وماكو بحياتك فقط
انا ونظر عينك
وعينك درتها ورحت
ولا چني منك جنت
وبكل سهولة خسرت واحد من اثنينك
.
.
.
.
#شعراء_وذواقين_الشعر_الشعبي
#جبار_رشيد
#ابو_تراب

.
ما مرتاح
من العدل من المات من الجاي
من الراح
عركة ويا الزمن وارجعنا مكسورين
وبعيدة المسافة وينسي الي طاح
ما مرتاح ..... ؟
لان شفت الشمس نزلت تبوس الكاع
وبجف الطفل تنلاح
.
.
.
.
#شعراء_وذواقين_الشعر_الشعبي
#الكاطع
#ابو_تراب

.
حسبالي العدد بي ثمرة من يزود
وعن قلة الواحد تفرق المية
بس تالي ادركت طين الگلوب اصناف
والعشرة الطويلة تريد نوعية
على كلآ عشت ما خذت بس انطيت
وي ليل المجازة الما شفت ضية
وينه وينه الكاه بية جاي يبيع
وين ال اني منطي من هوا الرية
والزم جفني خاف من ارمش يزعلون
واتناسى الحجاية ال بأذني محجية
ومن الكالي حك عد محب ما اداعي
اكو حك برجعته يعيب راعية
عرفتلها وكمت ما ازاعل اليرحون
ولا على الباب اضل متاني ليلية
من شفت الحلم ينوخذ مو على اللون
بعد بطلت اضم احلام وردية
الناس اختلفت وظهرك اتچي وين
اذا ما تلكى حايط تكعد بفية
.
.
.
.
#شعراء_وذواقين_الشعر_الشعبي
#ايهاب_المالكي
#ابو_تراب

.
وما اگلب بعد جبت العمر محماس
الدلة التنمدح والكمكم يخدر
وبعد فوك الرمل ما ادك وتد وانساه
والخيمة وحبلها وي الهوا تجرجر
واشبه طيحته من يوكع الفخار
اليسند ينكسر والمسند اليكسر
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
يمتى اشوفك ؟
تتعب عيوني من اركز ب انتظارك
واعدتني وكتلي اعود !
وكلشي رد ....
خوفي حسرتي الحيرة الضنون العذاب
كلها ردت الا انت ؟!
شما اصد لدربك الكى الصورة تتحول ضباب
شما ركضت لنهرك ارجع مكتشف نهرك سراب
منو اليندلك طريق الليل ؟؟
الليل لا ما يدري بيك
هواي جم مرة سألته ورفض ينطيني جواب
.
.
.
.
#شعراء_وذاوقين_الشعر_الشعبي
#ايهاب_المالكي
#ابو_تراب