.
بعيدآ عن ضروفي وعن ضروفك
انتهى البيناتنه بس ارد اشوفك
شعليها المشاعر بالقرارات
انا العايفك وانطر حروفك
واتعس شي بالفراك
من ماريد اعوفك بس اعوفك
.
.
#شعراء_وذواقين_الشعر_الشعبي
#رائد_ابو_فتيان
#ابو_تراب

.
مثل هرش الشجر واشربلك الماي
وكل هذا الخضار البيك مني
وانا بنص الملح ومشابك الطين
وبلابلنه على اغصانك تغني
تمر الريح بيك واحضن الكاع
وتريد تروح وي الريح عني ؟!
.
.
#شعراء_وذواقين_الشعر_الشعبي
#سمير_صبيح
#ابو_تراب

.
شلي بغيرك انت والكى مثلك وين ؟
وتتعب تلكى غيري بهالتعب شلك ؟
ياهو العلمك وتريد تمشي بعيد ؟
سل الشوك خايب باجر يسلك
مثل ضلك جنت بالخطوة نمشي اثنين
ومشيت انت بظلام وضيعت ضلك
.
.
#شعراء_وذواقين_الشعر_الشعبي
#جبار_رشيد
#ابو_تراب

ادور وجهي بعيون السألني
ويضل يأكل بوجهي الضال مني
صالحته ؟ اجاك ؟ شلونك ويا؟
مو فركاك ذني اليوجعني
.
.
#شعراء_وذواقين_الشعر_الشعبي
#عصام_كريم
#ابو_تراب

انا وخيوط النعاس الضبرت جفنين عيني
وكطعتها انياب شوكك
انت اذا سلعة ويعرضونك عليه
والله اذا ما عندي ابوكك
.
.
#شعراء_وذواقين_الشعر_الشعبي
#علي_الزركاني
#ابو_تراب

.
روحي بضيم هجرك ... ضاله تهم
بهذا وذاك بعدك ... ضال اتهم
لكوا بية الشماته ... ضالتهم
فتت وتنفسوا فركاك بية
.
.
#شعراء_وذواقين_الشعر_الشعبي
#احمد_الذهبي
#ابو_تراب

.
رحتي وخيالج لا غفى ولا مشى
ولا عاف عيني ولا بروحي استقر
اربع مواسم ضل خريفج يجي
وطاحت ملامح وجهي مثل الشجر
.
.
#شعراء_وذواقين_الشعر_الشعبي
#علي_رشم
#ابو_تراب

عليك ارغمت روحي ... من رغمني
بلحمي الناس تاكل ... من رغم ني
شفت مرة خيالي ... مرة غمني
العجيبة بجيبي جنت مخلي أدية
.
.
#شعراء_وذواقين_الشعر_الشعبي
#ناجي_غدير
#ابو_تراب

.
انجتفتي يوم هجره ... وانسبيتي
وتلوعتي يا روحي ... وانسبيتي
اتيهن من اذكره ... وانسى بيتي
قرن ومچلب النسيان بية
.
.
#شعراء_وذواقين_الشعر_الشعبي
#زكي_الغرابي
#ابو_تراب

حط خشمك بصدري استورح العطاب
جا شفت الحرارة وشتسوي النار
بس يا حيف ماكو بالضلع سحاب
.
.
#شعراء_وذواقين_الشعر_الشعبي
#الكاطع
#ابو_تراب

.
عيونك ابالي عيوني شيسدها ؟
الليل يريد وادم كلشي ما عدها
وبكل الطرق حاولت اتناساك
لكن روحتك حضن امي ميسدها
.
.
#شعراء_وذواقين_الشعر_الشعبي
#عباس_الذهبي
#ابو_تراب

الروحه بعيد عنه شلون يرتاح ؟
بلايا وداع غرب والدمع طاح
من سافر بلا وداع
كاع تذبني يم كاع
نسمة بنص عواصف عافني وراح
ما همني بحياتي الراحت تضيع
انا الكاتلني راح بغير توديع
انتهت ما بعد اشوفه
عود تمر طيوفه !
صعد نجمة بسمانه شلون ينلاح ؟
الروحه بعيد عنه شلون يرتاح
.
.
#شعراء_وذواقين_الشعر_الشعبي
#سمير_صبيح
#ابو_تراب

.
يوميه وكت المغرب النار توج
ومابيك تتحمل لحد ما تفرج
كاعد ابيتك واهلك تحبهم حيل
ومتاني فرصة تعوف اهلك وتهج
وبكلمة وحدة يطيح من عينك ماي
بكد الذنوب الطاحن بموسم حج
.
.
#شعراء_وذواقين_الشعر_الشعبي
#مهند_العزاوي
#ابو_تراب

.
يا خسارة
ياما كتلك لا تبيع المشتريك
ياما كتلك
لا تضيع انسان صارت روحه بيك
هواي تزعل مني حقك
تدري اجيك
.
.
#شعراء_وذواقين_الشعر_الشعبي
#عصام_كريم
#ابو_تراب

.
يا هل ذكرك براسي ... ما طلع دام
اعلى مودك ياهو مثلي ... ماطل اعدام
بحلم سيفك ذبحني ... ما طلع دم
كلت ما فسد و الا يصير بية
.
.
#شعراء_وذواقين_الشعر_الشعبي
#حسين_عباس
#ابو_تراب

.
تحت ضل يا سكف عطرك اتلاكه وياه ؟
ارد اشتم لقائك حتى لو وحدي
اريد اكعد كبالك واحجي كلشي ... لا
لو بعض الكلام اليوصلك ودي
.
.
#شعراء_وذواقين_الشعر_الشعبي
#ايهاب_المالكي
#ابو_تراب

حظ ما عندي حتى وي اقرب الناس
وهاي المسألة ال ما الها چارة
اشمرنا من السما يطيحون ع الماي
الوحيد التنبت بصدرة المنارة
.
.
#شعراء_وذواقين_الشعر_الشعبي
#سعد_شميل
#ابو_تراب

.
غيرك كشخوا كبالي ... ولا شي
عجبني لكن گليبي ... ولاه شي
وعلي اتسامر جذب واضحك ... والاشي
الخلك ماريدهم يدرون بية
.
.
#شعراء_وذواقين_الشعر_الشعبي
#اياد_عبدالله
#ابو_تراب

.
شكد نده نكط على الضلع
ونسيت اكلك يمتى
شكد رازقي ونيمته
وشكثر هجرك عاشر ليالي الهوا وما لمته
انت السحنت الليل بگلبي
وكلت موش انت
.
.
#شعراء_وذواقين_الشعر_الشعبي
#قاسم_حسن
#ابو_تراب

وانت تدري
تدري كل ليلة بغيابك
ينهدم ثلثين عمري
وانت تدري
تدري كل لحظة بودادك
بيها يكمل باقي عمري
وانت عمري
وما شفت غيرك حبيبي
.
.
#شعراء_وذواقين_الشعر_الشعبي
#منقول
#ابو_تراب