.
هو الخلل بينه وناسنه يعرفون
ما يحتاج واحد يضحك علينه
عوفوا اطفالنا بلا مدرسة يكبرون
وخل نكره بعض خلينه خلينه
على ياهو الخليفة سنين صار نموت
احنا اول شعب يكتلنا ماضينه
هو احنا انتهينا بعمر ست سنين
من صار العشك كل واحد ودينه
من صارت مدارسنه غرف للموت
من تاريخنا يذبح أمانينه
من صار الطفل يحلم يشيل سلاح
مسدس يشتري وبالعيد يرمينه
طابوك المدارس من نبوكه نكول
هاي فلوس دولة و احنا شعلينه
.
.
.
.
#شعراء_وذاوقين_الشعر_الشعبي
#ادهم_عادل
#ابو_تراب

.
وليت وعف ضميري وما كسرت العود
ولسن شبه الزلم بالعلن سبني
كفاني امرح وارع والتذ بحب الناس
وعملات الكبح ما يوم خاوني
لا زحت الحيا ولا ضيعت معروف
ولا خنت الوفى وربعي اجفلوا مني
اضحك للبجو حد شرهت المنكود
وابجي بكل مزنتي بطور المغني
.
.
.
.
#شعراء_وذاوقين_الشعر_الشعبي
#عريان_السيد_خلف
#ابو_تراب

.
لون لوحتك وردي الحياة ألوان
خلص عمرك لوحتك ملت الداكن
ولا ترسم جبل ارسم نهر بي روح
وارسم ريح بلكي تحرك الساكن
بلكي من النهر يطفح ركاد الغيض
ويطك زود ويهدم سدة ال لكن
وعلك على الوجه ضحكة وأمل بالروح
بزواية العين كافي شجم حزن راكن
وفك باب القفص خلي الاحلام تطير
وانت من الطفولة شجم حلم ساجن
ووخرها الستارة الشمس خل تفوت
ولا تخلي الجروح تبين الباطن
كلها تموت صفرة الموت هم بي لون
عاجبني الكطن للموت ميهادن
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
ما شفتك اليوم استعجل تنام
انا گبلك نمت نتشاوف طيوف
ما نوى گلبك علية لو مرة گلبك نوى
بس چة لانك تمر
عود انا جسمي صفى وعزفت عليه شفتك
وبأذني صوتك غفى
واتقدم ليورى واوصل لحد السكر واتطوطح بشوفتك
حرموك مني شعجب شنهي انت قابل خمر
تهديد دزينا الك موتنا كافي الصبر
نص ساعة اذا ما تجي ما عدنا شي ننتظر
عدنا احنا غيرك فرح بسمه اعلى شفة طفل
يا كعدة واخر عشك
يا نوم وگت الارق
بوسة توزع جنت لاي طفل واكف عدل
وانا اسفط كمت وبحجة اركد ولك صرت انا ثالث طفل
.
.
.
.
#شعراء_وذواقين_الشعر_الشعبي
#يوسف_الدراجي
#ابو_تراب

.
اتمنى اشوفن بالحلم خطوتي
جنت اعرف بروحي وقبل لا انولد
وانا برحم امي وحضت دمعتي
أيست وبطن أمي ما رافست
وطلعت الميت من كبر طلعتي
فزيت للدنيا ولكيت الدمع
مثل التراجي معلكة بوجنتي
من سجلوني بصف الاول متت
كل ساع اكولن للكبر حلتي
جم شامت يفز اعلى دكة الجرس
يرسم اجدام مشلله برحلتي
مو شجرة و اكبر كعدة .... رايد جدم
خافن الطير يعشعش بهامتي
.
.
.
.
#شعراء_وذواقين_الشعر_الشعبي
#مصطفى_الحلفي
#ابو_تراب

.
فاتتني ما معتبر عشكك نزوه
ما ادري اليحب من صدك يتلوه
مرافكتني الضلمه من جنت انشال
حد ما كبال عيوني وجهك ضوه
من بين خنكات السجن شفتك بوب
وبين الصياح المر سمعتك غنوه
شميتك ومن صدري غاب الدخان
اي جني ذاك المنولد هستوه
من جنت اشوف عيونك بزرف الباب
حسيت بين اضلوعي دكة اليهوى
وتأكدت معنى الحلاة مو بالضوك
اي والله جانت لزمة ايدك حلوه
والما كدر بيناتنا يطب معذور
حتى الزعل ما جان يترك فجوه
شمحلى العتب لمن نحط عين بعين
ب مشتاقلك تنزل عيونك جوه
.
.
.
.
#شعراء_وذواقين_الشعر_الشعبي
#محمد_سعيد_الطائي
#ابو_تراب

.
زعلانه كالوا لا تمرها بحلم
وگلولي دمعج ع الجفن ما عثر
اشتموا فراكج بية من سولفت
مريتي سيف وصار خلگي نحر
يضفرون وجهي وثنثر عزتي
وبعيوني تطفى وجوه كل البشر
شخليتي بية وصدري فارغ طلع
شعاف الندى من اثار فوك الصخر
دبريلي ملگة بروحي وحشة حضن
شكد ناس صغرت من فراغج كبر
.
.
.
.
#شعراء_وذاوقين_الشعر_الشعبي
#علي_رشم
#ابو_تراب

.
علامة الصبر ليش اصبر علامة
بحبل الموت حبل الروح مشدود
جسر ويعود لا تكلي بسلامة
اذا كال القدر ميعود ميعود
حر الصيد ينصاد بحمامة

.
.
.
.
#شعراء_وذواقين_الشعر_الشعبي
ل #سمير_صبيح
#ابو_تراب

.
انا الصدكت ذاك السراب يصير
نهر ويفيض ماية ويرتوي العطشان
انا العاندت وكتي وقسمتي عليك
وانت الوردت وانا الكبر ذبلان
ملاچ الذنايب يحسد الفلاح
البصدر النهر مد وجزر شبعان
وانا لا حصلت مطرة بهذاك شتاك
ولا شديت حيلي بموسم النسيان
كلت عبرة وكت ويخضر المنثور
غشيم وصدكت بوشالة النهران
هي البورحت والمر عليها الكيض
ما تلبس خضار بجية الطوفان
المهم عوف الحجيته الحجي يخشن گلوب
بس وداعتك مو من گلب ولسان
.
.
.
.
#شعراء_وذواقين_الشعر_الشعبي
#صادق_الجهلاوي
#ابو_تراب

.
لكيتك راحتي وحلي وضوة العين
والباب البوجه الريح ينسد
صح حبيتك من بعيد ل بعيد
بس جانت صفنتي بوجهك ابعد
جنت حاير شلون الكمر سووا
ومن شفتك عرفت اصل الكمر خد
من شفتك تغير موعد النوم
بديت اسهر واحن واشتاك وابرد
واغار وترجف ايدي وابچي واحتار
واشوفك وارتبك وابنيك وانهد
مجرد حب كسر كل القوانين
وخرج عن سيطرة گلبي وتمرد
.
.
.
.
#شعراء_وذاوقين_الشعر_الشعبي
#احمد_عاشور
#ابو_تراب
_

.
مرات اختنك لمن يجيني الليل
افك شباج صدك و اوكف اتأمل
صياد احس روحي والنهر وشل
اشوفك جاي لية واركض اتخيل
اوصل للنهاية وابتدي من أول
اذا رفضت ضنوني جيتك ع البال
اغافلهن واكلك ما عليك اقبل
.
.
.
.
#شعراء_وذاوقين_الشعر_الشعبي
#ايهاب_المالكي
#ابو_تراب

.
الحجي بيناتنا تريد الصدك ..؟ تعبان
بطرك عيون تبجي وجة ينطي ألوان
على ساعة وفوك راسي يسولف الدفان
ما مشتاقلك ...... عطشان !
سير يا هوا الله صويحبك غركان
.
.
.
.
#شعراء_وذاوقين_الشعر_الشعبي
#نهاد_الخيكاني
#ابو_تراب

.
البلم خلص حياته يروك فوك الماي
نسى من جان شجرة الماي المكبرة
ابن ادم يدفن الميت ويبجي علية
بس المشكلة ما ياخذ العبرة
.
.
.
.
#شعراء_وذاوقين_الشعر_الشعبي
#عباس_الشمري
#ابو_تراب

.
بعد ما اريدكم تحجون بية
هواي تكبرت كلتوا علية
خلصت وانتهت بس بحرامات
الخمس سنين ضاعت من أدية
المغرب ناس تدعي وتلتقي بناس
وانا اتخبل من المغربية
حتى الطير من يهاجر يموت
انا تهاجرت جا مو خطية
حتى الماي من يمتد على الكاع
ينشف والجرف ينعكس فية
نزلت وياكم لحد ما تريدون
وياكم ما مدور منصبية
موش انطيتكم ماي ال بالعيون
طحت جا ليش ما صرتوا تچية ؟
الفقر مو عيب من يكضلك الباب
بس عيب اعلى صاحب ينطي بية
.
.
.
.
#شعراء_وذاوقين_الشعر_الشعبي
#علي_الجنوبي
#ابو_تراب

.
شيبة ب لبن وبليل جنت التكطها
هسة ايدي بالماعون ما اشوف احطها
.
.
.
.
#شعراء_وذاوقين_الشعر_الشعبي
#محمد_موحان_السالمي
#ابو_تراب

.
ما اكدر اطلعك مني وارتاح
شيطلعه الوطن من رأس الاسرى
من اذكرنك ضفاير تخنك الروح
من اريد انساك لازم شعرة شعرة
بهواك اعصرني مني تطيح سعفات
حقي اشتاقلك لان روحي خضرة
سهم يركص بضلعي بيدي جف مي
جهنم بية تلحك وانت صحرة
اعرفك زين عفت الماي بالايد
وجه ما منطي الية انوب كطرة
تجي بشمره كبر شمره سما تروح
واضل ب اثنينهن مخنوك عبرة
تدري بجفني ليش مركص الليل
واذا نعس اكض ظهره واكسرة
حالف بالنجم ما مرة انساك
اذا اكرهك احس كاتلي كمرة
.
.
.
.
#شعراء_وذاوقين_الشعر_الشعبي
#علي_الشمري
#ابو_تراب

.
دوار دور الرحى افتر وانا المطحون
من عنده يابس خبز من عنده الي فافون
دوار كلشي اشتري كلشي الذي تبيعون
اشتري هم وحزن واشتري دمع عيون
واشتري حت لو جرح لجروحي تضيفون
دوار صار الظهر وانكطعوا اليمشون
والكاع صارت جمر تزامط باليدوسون
يا نايمين الظهر بح صوتي متكعدون ؟!
ولن صوت بية صرخ خليني انام الظهر شنهو انتوا متنامون
شلون نومي وانا اطفال عندي بعد ليهسة يتضورون
من الجوع بس القهر ضل تارس الماعون
.
.
.
.
#شعراء_وذاوقين_الشعر_الشعبي
#عباس_اللامي
#ابو_تراب

.
بعد ما نموت لازم من يجينا الموت
وعلية ممنوع يوصل يعبر لحدنه
اذا كوة يجينا بعازة الارواح
نضم البقن ونكلة ما عدنه
كضيت الناس كلها وما كضيت بيوم
بس كادر علينا شچلبت هدنه
مو بس الحرب خلصت حتى الناس
متنا هواي محد ميت بكدنه
.
.
.
.
#شعراء_وذاوقين_الشعر_الشعبي
#جبار_رشيد
#ابو_تراب

.
اليوم أول صباح الخير من دوني
اليوم عيونك الحلوات ما صبحن بعيوني
اليوم أول عرس على الكاع طش دمعي وخطف لوني
وانت وگلبك شكد ارد اعاتبكم
هذا شجم صبح مر اعلى فركتكم ؟
وانا ادري الشمع خلصان بس يومية ادوركم
وابرد واشتهي اشعلكم
وهذن نيرانكم بية وترس روحي كواغدكم
ولا اعقل والم الشيب واحركها رسايلكم
المهم ياهوه كعدكم ؟
.
.
.
.
#شعراء_وذاوقين_الشعر_الشعبي
#مثنى_كامل
#ابو_تراب

.
موالم والميتك ... وانت لافيت
وخربنا ولا انا اوافي ... وانت لا فيت
تلاكينا وجزينا ... وانتلافت
و واحد كل للاخر هاي هية
.
.
.
.
#شعراء_وذاوقين_الشعر_الشعبي
#اياد_عبدالله
#ابو_تراب