.
الدنيا تحلفت بية ... وانا الها
ورادت كون اطخلها ... وانلها
وحق سادة بني هاشم ... وانا الها
ما اكولن اخ لو تنطبج بية
.
.
.
.
#شعراء_وذواقين_الشعر_الشعبي
#عريان_السيد_خلف
#ابو_تراب

.
وين جنتي ؟
و ليش متأخرة علية كل هالسنين
و ليش ما طيفج اجى وفزز صفنتي
قبل تسع سنين مريتي اعلى عيني وما وكفتي
ليش من كف العمر هسة ضهرتي
وين جنتي يا ملك شيطان وتلبس بجثتي
ويا دمع خسران يمثلم وجنتي
ويا ألم لف روحه سجينة بحسرتي
ليش من دك الجرس ما صارن عيونج فرصتي
ليش يا أول درس يفترض كنتي
وليش من عبرن محطاتي ركبتي
وليش فتحتي لمن ذبلت وردتي
والله لو عندي بخت جا لمج من سنين بختي
جان هسة دموع ماكو وخابصة العالم ضحكتي
وجان هسة همومي ميتة وعافية بوجنه فرحتي

.
.
.
.
#شعراء_وذاوقين_الشعر_الشعبي
#محمد_الغريب
#ابو_تراب

.
اذا حبك أذية تعذب الروح
صدك انا راضي ب هالأذية
انا اشتاكيت ما ضل صبر بية
و اجيك اليوم مو باجر الجية
اجيلك ركض و واصل كبل الاقدام
واذا تعبن اقدامي امشي اعلى ادية
واذا حنيتلي وضاك الخلك بيك
احس بدنيتي ضاكت علية
واذا وحشة عليك تصير بالليل
علية الوحشة تبدي من المسية
.
.
.
.
#شعراء_وذاوقين_الشعر_الشعبي
#عادل_محسن
#ابو_تراب

.
خاب انا واصل مرحلة اشبك صورك واغفى
وجانن تصاويرك ذنب عند اهلي
واليطب علية ما يدك باب الغرفة
وب اليمة كد ما فرعت الما يدري اريدك واندعي
عباله اريدن خلفة
.
.
.
.
#شعراء_وذاوقين_الشعر_الشعبي
#احمد_الصالحي
#ابو_تراب

.
اويلي اعلى اليحب والعاشكه بعيد
دخيل الله شيسوي بحاله الغروب
ينهش حصته ويذبه ل الليل
هو يذوب سكته وشمعته تذوب
ينحط بقفص وكبال بستان
يردم بالقفص ويطيح ويلوب
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
وتالي تعذبت يا ربي بيها
مزاعلها واريد ارجع عليها
مو بيدي جبان بهيج حالات
انطي بروحي بس ما انطي بيها
اهددها ب بسيطة وهسة اراويج
شراويها الدمع اليصب عليها !
مو حب هذا بالقرآن تعذيب
زلمة انا وصرت جاهل ب أديها
ويگلبي شلون ؟ لا من دونها تعيش
ولا وياها تتحمل حجيها
.
.
.
.
#شعراء_وذاوقين_الشعر_الشعبي
#علي_ناظم
#ابو_تراب

.
بعد ما ادير بال شما يروحون
بدت بفراك ومبينه النهاية
البنص الطريق وعافك وراح
هذا غلط جيته من البداية
اكو يموتون خاطر وادم تعيش
واكو يضحكون نحسبهم ضحايا
اجيت مصوب ومشتاك بس شوف
تلكوني وعرفت بهاي غاية
ركضوا طلعوا من جيبي الفلوس
وما طلعوا من ظهري الشضايا
انا الخاسر وطن عادي اخسر انسان
واعيش وحدي روحي وعلمتها
انا انغشيت بيك عيونك كبار
بس عيوبك اكبر ما شفتها
.
.
.
.
#شعراء_وذاوقين_الشعر_الشعبي
#زيد_السومري
#ابو_تراب

.
حطيت ادية اعلى الجرح حسبالي دم تمطر لان
من عكسي ينكط دمي
رايد يفاركني الجنت من كثر ما راكض وراه
مفروكه اصابع جدمي
تكبرون احسكم بس علية انتوا وجروحي وهدمي
الواحد تعرفة من الحجي لاكيله يم غيرك وطن
لمن يسولف رسمي
شتريد ؟ مو عوزك بعد صبعين اوصلك ل امي
بس والله مت من الضحك من كتلي ضل لوحدك
هو انا ياهو اليمي ؟!!
.
.
.
.
#شعراء_وذاوقين_الشعر_الشعبي
#احمد_الصالحي
#ابو_تراب

.
الدهر يا احبابي هم مثلي ... وصلكم
وصل وتلمني بس ريحة ... وصلكم
درتوا وجوهكم و ادري ... وصلكم
حجي وخلاكم تكطعون بية
.
.
.
.
#شعراء_وذاوقين_الشعر_الشعبي
#اياد_عبدالله
#ابو_تراب

.
هو الرايدك يعرف ضرف واسباب ؟
بس كلي اكو ثاني بحبك محشمة
الحب كلما صعب يغلى اعلى اليحبون
ترى يضحك علينا اليحجي بالقسمة
المصيبة انت حلو وتمطر علية بوسات
وانا كالتلي امي اعلى المطر رحمة
.
.
.
.
#شعراء_وذاوقين_الشعر_الشعبي
#رائد_ابو_فتيان
#ابو_تراب

.
خوفت الطالب من معلم كبل
هيج ارجف من اسمك لمن تنذكر
حيرة الجندي القبل ما يلتحق
هيج انا حاير بيك ما مستقر
على كبور اهلنا تدوس واتحملك
مرجوحة اشدلك بين كبر وكبر
.
.
.
.
#شعراء_وذاوقين_الشعر_الشعبي
#زيد_السومري
#ابو_تراب

.
مو مالت زعل بس انت ردت تروح
موچد غير ناس و عندك الضنه
ترى مبين الرايد حجى حتى يروح
يزعل من سوالف ما يزعلنه
.
.
.
.
#شعراء_وذاوقين_الشعر_الشعبي
#علي_نافع
#ابو_تراب

.
اشتاكلي جروحي غلاتي
وعيبي صبري ودفلتي السكته و وحشتي بلايا هم
وحجتي الفشلة التطشني تراب ما يسواش لم
وهمي دنيا نبعت بيها بغيرك انت وشنهو معناه الجرح من غير دم
اشتاكلي تخضر ضنوني بكاع صبخة
ويشمت رموشة اعلى طرواك الجفن
وتشرك شموسي بحضن ليلك نهار
ويحضن الغايب هوى الحاضر حضن
وتطفح البسمة اعلى بال المبتلين
الماي يضحك من تشك صدرة السفن
.
.
.
.
#شعراء_وذاوقين_الشعر_الشعبي
#عريان_السيد_خلف
#ابو_تراب

.
النزف يحلالهن ماريدك تشدهن
ناوي تغيضهن ماتبي تضمدهن
بعد مااصيرلك مثل الفلوس الدين
اعله گد الحاجه من تاخذهن تردهن
انا لخاطرك طينت جم غربيل
خاطر ما اطيح وطحت من عدهن
وما سديت باب بوجهك اهلي شيوخ
بيبان العتب ما نعرف نسدهن
تبعدني شعجب مو جنت عكازات
حتى بنومتك يم راسك تمدهن
.
.
.
.
#شعراء_وذاوقين_الشعر_الشعبي
#سعد_شميل
#ابو_تراب

.
يا صاحبتها يا الوصلتي لدارها
احجيلي عنها شلونها وشخبارها
شدار الكلام ال بينج وما بينهة
شجانت تكلج هية نظرة عينهة
وشكالت وما كالت من اسرارها
يا صاحبتها عيوني ما ينسنها
خليني اشوف عيونج الشافنها
انطيني اديج اللامسن جفينها
ولمساتها الضلت بجفج وينها
محتاجهن بلكن يطفن نارها
شكالت علية شلمحت وشذكرت
ما وصتج ما سلمت معتذرت
هواي ضل من السوالف عدها
روحي الخذتها وياها يمتى تردها
لو خيروني اختار هم اختارها
.
.
.
.
#شعراء_وذواقين_الشعر_الشعبي
#جبار_رشيد
#ابو_تراب

.
ليش احبك ؟ شماخذ وياك ولا يرهملي غيرك ؟
انا ما مكتفي بگلبك ردتك تحبني بضميرك
الله لا يراويك الايام العشتها
وكل الاشياء التحبها ... التشتريها
غاليه وما رخصتها
الله لا يراويك كل شيشة عطر بالكاع مشمورة وشلتها
وكل عباه بالسوك اروح اركض وراها
ومن كثر ما فاكدك ما فرزنتها
.
.
.
.
#شعراء_وذواقين_الشعر_الشعبي
#مثنى_كامل
#ابو_تراب

.
جا هيج الگلوب الحلوة تتغير ؟
جا هيج الگلوب البيض تتغير ؟
ولك حنيت للماضي
جم مرة جنت زعلان من عندك
وارجع محد مراضيني بس راضي
.
.
.
.
#شعراء_وذواقين_الشعر_الشعبي
#سعد_شميل
#ابو_تراب

.
شكد ايام مرت وانت ما موجود
باب البيت افتحه والكبر مسدود
يا دفان گلي هم يرد اردود ؟
( عميانه على الزينين عيني )
يا دفان اخوي اعلى الورد نده
غير اسم اليحبها كل شي ما عنده
خشن رمل المكابر على الترف خده
( عميانه على الزينين عيني )
من كثر العرف صار النجف داري
هذا صويحبي وذاك كبر جاري
مثل نار الخليل تسعرت ناري
( عميانه على الزينين عيني )
.
.
.
.
#شعراء_وذواقين_الشعر_الشعبي
#غزوان_الغالبي
#ابو_تراب

.
الليل رب العطش وانا ارتوي بصوته
والعاشك المنتظر بالساعة باله يضل والميل تابوته
ولو عاش ليل الهجر يسهل علية موته
لو هو مثلك اكو جا ما عشت وحدي بليل الشتا البارد
بس هو هيج العشك مثل الله بس واحد
.
.
.
.
#شعراء_وذواقين_الشعر_الشعبي
#حسين_المرياني
#ابو_تراب

.
لا تنسى طيفك بالسما يضل مرعوب
لم القصايد يمك وسد البوب
واكعد لوحدك وابجي حد ما ترتاح
بالضلمة ما يرتاح بس المتعوب
يغمض عيونة الكمر من يشوف
محبوب يهدي گلادة فضة ل محبوب
اي و احنا هسة اثنينة خسرانين
مغلوب واكف يعتذر من مغلوب
اسف بكد ما شفت وجهك بالكاس
واشرب واضوكك مر ولكن ما اتوب
مو مسألة هيبة العكل فوك الروس
بس شحلاته العاشك الما مهيوب
والمشكلة ب انفاسنا ما تنعاد
تسافر واسافر والهوى يضل مصلوب
كلما يهب يندفع باب الزعلان
صوت القطار يفزز هواي گلوب
اسف بكد ما عفتك بظهري تصيح
ودموعك الما لحك عليهن ثوب
من تمطر الدنيا اعلى باب الشباج
جم عاشكة تسافر لبيت المحبوب
.
.
.
.
#شعراء_وذواقين_الشعر_الشعبي
#احمد_عاشور
#ابو_تراب