.
اغار اعليها ما اراويك شعرة
بكثر ما حلوة انا الاسمر الطوخ
من اذكرها تصير خدودي حمرة
.
.
.
.
#شعراء_وذاوقين_الشعر_الشعبي
#حسام_الحمزاوي
#ابو_تراب

.
الله يرحمج يا ضحكتي
وين ما وين اندفنتي ؟!
والله قبل لا تموتين
جنتي اعلى شفتي تخبلين
جنتي ما تخليني وحدي
ودمعة لو شفتي اعلى خدي
ب ايدج تمسحيها جنتي
الله يرحمج يا ضحكتي
.
.
.
.
#شعراء_وذاوقين_الشعر_الشعبي
#علي_الشمري
#ابو_تراب

.
اغفى واسد عيوني عن كل حلم
كل طيف مابي صورتك ينطرد
كون بحطب نمرود واتذكرك
اكعد وافزن ميت من البرد
يعرض زلال عيونك بصفنتي
كل ما شفت كطرة ندى اعلى الورد
اشبكني حيل ارد اكبر بعصرتك
غيرك بريشة يجيسني وانمرد
غيرك عزفني ونشز وسولفت
الله اكولن غرد المنفرد
شايف خدودك من يمرهن خجل
تطاير نجوم السما من الجلد
.
.
.
.
#شعراء_وذاوقين_الشعر_الشعبي
#نهاد_الخيكاني
#ابو_تراب

.
زماني غفل عن غيري ... والي جاد
وعرفني شلون الي سجه ... وليجاد
ان جان انا صدك سيد ... والي جد
يشل نصه الذي نافق علية
.
.
.
.
#شعراء_وذاوقين_الشعر_الشعبي
#عريان_السيد_خلف
#ابو_تراب

.
اوصي الراح والرد ... من رسا له
عجب شبساع ينسى ... مرساله
مشى و ودا رساله ... من رساله
جهنم بالظرف وداها الية

جان بكل كتر منك ... ترسماي
مشيت ومن رحت ضاكت ... ترى سماي
راعي النوك من عيني ... ترس ماي
بجفاك وبشر الرعيان بية

وحق صوله زماني ... وال صلوها
بنعش ليكم دمعتي ... وصلوها
صلي انعدمت شفتها ... والصلوها
صدك غايتهم يشمتون بية

اون من يوم وجهك غاب ... چن ناي
بحلك راعي ولا من بشر ... چناي
امس مر اسمك ونطيت ... چني
حرامي وفزوا اهل الدار بية
.
.
.
.
#شعراء_وذاوقين_الشعر_الشعبي
#ايهاب_المالكي
#نهاد_الخيكاني
#ابو_تراب

.
اغار من النفس چي تصعد انت وياه
وصدكني اغار اعليك من اني
گلب عندي سلام اتعلك برايات
مجرد بس اشوفك صار عدواني
وعليك اني ويا اني تكاونت للموت
لان اني اعلى دربك شافني امتاني
لكيتك على الدرب بس ما حجيت وياك
نزل فچي اعلى فچي اعتقلوا لساني
وعيوني من اشوفك تطفي بية النار
ما يرضن اشوفك واطفي نيراني
واذكر من لمستك جفي مني اغتاض
ولزم جفي جكارة بجفي چواني
المسك مو چوي لو بتر بيها يصير
وامد ايدي وعلي من تبتر الثاني
بعيونك اشوف الما تشوفه عيون
لهذا كبال عينك دوم تلكاني
.
.
.
.
#شعراء_وذاوقين_الشعر_الشعبي
#احمد_الصالحي
#ابو_تراب

.
.
جرحوني وكلت ممنون
اذا مو بية بيمن ربعي يتؤنسون
غدروني وكلت يوسف نبي وعافوا

عام يطيح جلدي ... وعام لوني
وعلى بيعك يا گلبي ... عاملوني
مثل اخوان يوسف ... عاملوني
تعبوا لان جواي ضلوا يحفرون
واني ادعي يطلع ماي خاطر يشربون

.
.
.
.
#شعراء_وذاوقين_الشعر_الشعبي
#علي_البديري
#ابو_تراب

.
اول مرة احس بروحي خسران
قبل ما ماره علية الخساير
شنو ذنبي واكضي الليل سهران
ومكابل صورك والجكاير
واذا بيك حلمت تحسبني حلمان ؟
حلم كاروك ويمر عين عاجر
هي الغاثتني وحيل زعلان
تضحك وانا دمي عليك فاير
ومن اضحك تكول الناس بطران
ومن ابچي بزمانه تكول حاير
حيره وما يحلها الا دفان
وكبر كون اعلى عرفك بالمكابر
وتمر انت اعلى گبري وتقرأ فلان
مات وضلت بنفسة الضفاير
.
.
.
.
#شعراء_وذواقين_الشعر_الشعبي
#حسين_الحبتري
#ابو_تراب

.
ذهب تصعد نبيعك تنزل نخليك
مو باجر تجينه تعض اصابيعك
وكلنالك ذهب بلوة ابتلينا وياك
خاب انت حجل مو تاج ونطيعك
اشتريناك برخص مو مال نكشخ بيك
منتظرين يصعد سوكك نبيعك
.
.
.
.
#شعراء_وذواقين_الشعر_الشعبي
#مهيمن_الامين
#ابو_تراب

.
خلگ جرحي مثل خلگ النواعير
شما وشل ونين يحمل اردود
انشدك با خشب رد البسامير
بوجه غيرك حبيبي الباب مسدود
شرب مني وتعافى وهدم البير
كلت يلكى العطش فد يوم ويعود
الحرامي يبوك وتحرسه النواطير
جا حكها الدموع تجرح الخدود
مشت فشخاتنه تبوس المكاوير
بعد ياهو التحشمه وياك هادود
.
.
.
.
#شعراء_وذواقين_الشعر_الشعبي
#سمير_صبيح
#ابو_تراب

.
مرتاح شفتك كلت مو مشكلة
بعيونه يمكن غير واحد حلة
بالعافية وذاك التعب والسهر
جنت ادري راح يضيع من أولة
اني اعلى كد المصلحة وانترك
عود امهات وعايش بمكحلة

#رائد_ابو_فتيان

سوي اليعجبك جيب ودي
ومبارك على العاشرته بعدي
شكد يريد يعني يطول وياك
على ساعة ويكلك هذا حدي
بدولاب الجذب يكضيها فرات
يمك جذبة تخلص جذبة تبدي

#يحيى_العلاق
.
.
.
.
#شعراء_وذواقين_الشعر_الشعبي
#ابو_تراب

.
كف يا وكت مليت مني عندي يازاك
هم لو چتل مطلوب جا سدت وياك

حنين و روحي صحرة ... والبلاوي
بيها وكصر جدمي ... والبلاوي
انا جويعد بيتي ... والبلاوي
يدكن بابنه ينشدن علية

انا المن شيب شيابي ... شبع ضام
ويگلبي الما شبع منك ... شبع ضام
اشوف الولف من ولفة ... شبع ضم
وانا لضمت الكبر ما تصح لية
.
.
.
.
#شعراء_وذواقين_الشعر_الشعبي
#كريم_الحاتمي
#ابو_تراب

.
على روحي كمت اخذ وياي اعزاز
بلكي اتسامحك يومية امر بيها
وتطلعلي الجروح وانعل الشيطان
على جروحك اغلس لو اواسيها
شالتني الغرب يوم الطحت وياك
وشردتك وكفه كمت انوب اسميها
تعيرني اعلى ياهي وانا وكت الضيم
اضحك شفتك واطفالي ابجيها
اشتميت الهوا من عفتك ارتاحيت
ونبضات البصدري كمت احس بيها
.
.
.
.
#شعراء_وذواقين_الشعر_الشعبي
#حامد_الشمري
#ابو_تراب

.
أمس واني أكلب بالجروح النايمه امن العام
فزّ بيناتهن جرحك
وبلايه وعي اتبللت عيني دموع
وبلايه وعي امن الضيم كمت اضحك
لغز جامع ضحك ودموع
يصعب عالبشر شرحك
وشريط الذكريات براسي كام ايدور
ونوارس ذكرياتك فوكنه افترت
واشتاكيتلك جن امس متحاجين
مو جنهه سنه المرت
وأبسط ذكرياتك مرت اعله البال
واتذكرت كلشي الجان يجمعنه
من جنّه نسولف بالعيون اشكال
وتخاف اعيونه الحيطان تسمعنه
من جنه ابوزن ريشة ابمهب الريح
وايسلطن الواهس فوك يرفعنه
واني وصفنتي وهمي
واتمنيت لو هسه تجي يمي
وتكعد تمتحني بكل شبر عنك
أذكر كلشي كلته وكلشي ما مكيول
وأذكر لو حرف سهوا وكع منك
.
.
.
.
#شعراء_وذواقين_الشعر_الشعبي
#علي_الفريداوي
#ابو_تراب

.
هيج انا عندك شخص ما ينوخذ رأية ؟
وهيج انا عندك سهل ؟
كفيت عشرة عمر كفه مصلاية !
ما اشوف وجهي جنت
كد ما ملزك صور وجهك بالمراية
تنبته اعلى صدري الرمح وانا الغشيم شكلت ؟
بصدر السواتر فخر من تنبت الراية
تسمعني ذاك الحجي وما اسمعك حجاية
.
.
.
.
#شعراء_وذاوقين_الشعر_الشعبي
#سعد_شميل
#ابو_تراب

.
بجيت وي البجوا حد ما طفى الشوف
اثاري دموعهم دمع التماسيح
وعليهم عاركت حد ما تدميت
مثل عرك الذيابه بلا مجاريح
فزعت جدمي وجدم نمشي انا والموت
وعلية كالوا طحت بس انا ما اطيح
هم شايف رمح طب غرفة انعاش
لو سيف انتهى بدجه التشريح
لا تقفل قفل وتحسبه مأمون
اذا ترهم علية كومة مفاتيح
ولا تعاتب نخل ما حمل عثوك
خطية النخل بركاب الفلاليح
.
.
.
.
#شعراء_وذاوقين_الشعر_الشعبي
#سعد_محمد_الحسن
#ابو_تراب

.
كون المفارك حبيبة يرد علية
ونبض گلبة يسولف شصار بجفاه
وكلمن يحب من طرف ولفة يجية
بوجه يترس حيرته وتمطر سماه
حضنه العشاك ما بيها حرام
اليحب من محبوبته يفصل غطاه
كون المسافر نفس ميشم غريب
متاع للغربة لليحب ياخذ هواه
من تراب ولايته شيوصله خير
بروحه ينده كل صبح بالغربة تاه
ولا جفن سهران يبقى يتاني طيف
الليل مالح والجرح وجهه وكفاه
.
.
.
.
#شعراء_وذاوقين_الشعر_الشعبي
#علي_رشم
#ابو_تراب

.
وليش تكسر خاطري چي مشتريك ؟
واني ل اجلك روحي ما احاجيها
كتلك امسح عيني غركت بالدموع
ما كلتلك حط اصبعك بيها
مو بكد الجرح لا تسأل علية
ويا جروح تهزك من احجيها
فشلت عيوني عمت لو عمري ضاع
لو دموعي الكبل ما باجيها
.
.
.
.
#شعراء_وذاوقين_الشعر_الشعبي
#ميثاق_الهلالي
#ابو_تراب

.
انا المذبوح برموشك بعد شتفيد سجينك ؟!
انا رايح ترى الحكني
اخاف الموت يأخذني
مثل ما شلتك بعيني
اريد تشيلني بعينك
خذت رأيك غلط يا الما الك رأي
وصرتلك نهر وانا بعازة الماي
علية بهداي لمن تحجي وياي
دكات الگلب بينك وبيني
وصلت وياك حد اللا نهاية
وعساها بخت گلبي الخذت رأية
وراي الشمس وانت تگلي هاية
.
.
.
.
#شعراء_وذاوقين_الشعر_الشعبي
#حمزة_الحلفي
#ابو_تراب

بوسلي روحك يمين الله عليك
واعتذرلي خاف ما اكدر اجيك
بيني وبينك مسافات وحدود
وانت عندي احلى من كل الوجود
وحلم بالنسبة الي لمسة اديك
بوسلي عيونك وهن مغمضات
ولا تفزز اي دمع بيهن يبات
خاف مني يفز دمع بعيونك
يسيل على الخد ويغير لونك
وما اسامح نفسي لو شي صار بيك
بوسلي روحك يمين الله عليك
.
.
.
.
#شعراء_وذاوقين_الشعر_الشعبي
#جبار_المياحي
#ابو_تراب