Adliya vaziri o‘rinbosari N.Muxammadiyev delegatsiya vakillariga Oʻzbekistonda aholi va tadbirkorlik subyektlariga davlat xizmatlarini koʻrsatish tizimini modernizatsiya qilish, raqamlashtirish orqali byurokratik toʻsiqlar qisqarib borayotganligini ta'kidladi. Xususan, xalqaro ijobiy tajribalar asosida aholiga “yagona darcha” tamoyili asosida xizmatlar koʻrsatuvchi Davlat xizmatlari markazlari faoliyati yoʻlga qoʻyilganligi, davlat xizmatlarining qariyb 80 foizidan elektron shaklda foydalanish imkoniyati joriy etilganligi hamda davlat idoralari oʻrtasida elektron hamkorlikning rivojlanishi hamda maʼlumotlarning raqamlashtirilishi natijasida davlat xizmatlarini koʻrsatishda inson omili qisqarib borayotganligi haqida ma'lumot berdi.

Shu bilan birga, mamlakatimizda davlat organlari aholi bilan muloqotda byurokratiyani minimal darajada tushirish, raqamlashtirish ishlarini yakunlash, davlat xizmatlarini koʻrsatish jarayonida sunʼiy intellekt texnologiyalarini keng joriy etish orqali boshqaruv samaradorligini oshirish kabilar dolzarb boʻlib qolayotgani bildirildi.

Uchrashuv davomida forum byurokratiyani qisqartirish, boshqaruv tartib-taomillarini soddalashtirish va xizmat koʻrsatish sifatini oshirish kabi milliy maqsadlarga bevosita mos kelishi hamda forum sessiyalari doirasida fuqarolar, tadbirkorlar, investorlar va biznes egalarining hayotlarini soddalashtirish, hukumatning qonunchilik salohiyatini toʻliq faollashtirish usullarini oʻrganish ko‘zda tutilganligi qayd etildi.

Hesham Amiri, oʻz navbatida mazkur forumga Birlashgan Arab Amirliklarida Zero Government Bureaucracy tanlovida g‘olib deb topilgan vazirlik va idoralarni taklif qilib, ular o‘z faoliyati davomida erishilgan natijalari haqida batafsil taqdimotlar bilan ishtirok etishlari hamda o‘z tajribalari bilan yaqindan ulashishga tayyor ekanliklarini alohida ta’kidladi.