#Adliya_xabari

Boʻka tumanida adliya boʻlimining yangi binosi foydalanishga topshirildi

Boʻka tumanida zamonaviy koʻrinishda qurilgan va IT-kommunikatsiya texnologiyalari bilan jihozlangan adliya boʻlimining 2 qavatli yangi binosi oʻz faoliyatini boshladi.

Tuman markazida zamonaviy va milliy shaharsozlik normalariga muvofiq qad rostlagan ushbu inshootda fuqarolar va tadbirkorlar uchun har tomonlama qulay sharoitlar yaratilgan boʻlib, tezkor, shaffof, sifatli davlat xizmatlari va huquqiy yordam koʻrsatiladi.

Yangi binoda murojaatchilarga bir vaqtning oʻzida 360 dan ortiq turdagi xizmatlarni koʻrsatish imkoni mavjud. Elektron navbat tizimi, axborot kioskasi, elektron xizmatlardan mustaqil foydalanish hamda mini-kutubxona ham tashkil qilingan.

Boʻka tuman adliya boʻlimi davlat xizmatlari markazi bir kunda oʻrtacha 300—400 nafar fuqaroga davlat xizmatlari koʻrsatish quvvatiga ega.

@adliyangiliklari

#Adliya_xabari

Adliya vazirligi tomonidan ishlab chiqilgan “Tadbirkorlik subyektlari tomonidan davlat organlariga hisobotlarni taqdim etish jarayonlari soddalashtirilganligi munosabati bilan Oʻzbekiston Respublikasi Maʼmuriy javobgarlik toʻgʻrisidagi kodeksining 241-10-moddasiga oʻzgartirish kiritish haqida”gi Qonuni Oliy Majlis Senati tomonidan maʼqullandi.

Mazkur qonun tasdiqlanishi natijasida:
▫️birinchidan, Oʻzbekiston Respublikasi Prezidentining 2024-yil 9-yanvardagi qarori bilan tasdiqlangan Tadbirkorlik subyektlari tomonidan davlat organlariga taqdim etiladigan hisobot va statistik maʼlumotlarning yagona roʻyxatining amalda nuqsonsiz ishlashiga;
▫️ikkinchidan, tadbirkorlik subyektlari huquqlari himoyasini yanada kuchaytirishga;
▫️uchinchidan, davlat organlari tomonidan bunday turdagi huquqbuzarliklar sodir etilishi holatlarini kamaytirishga
xizmat qiladi.

Mazkur qonun bilan davlat organlari tomonidan Tadbirkorlik subyektlari tomonidan davlat organlariga taqdim etiladigan hisobot va statistik maʼlumotlarning yagona roʻyxatiga kiritilmagan hisobotlarni tadbirkorlik subyektlaridan talab qilinishi maʼmuriy javobgarlikka sabab boʻlishi belgilanmoqda.

@adliyangiliklari

Iroda insonga katta kuch beradi: “Maftunkor ranglar jilosi” Qoraqalpogʻistonda

Adliya vazirligi tashabbusi bilan nogironligi boʻlgan yoshlar oʻrtasida Qoraqalpogʻistonda tashkil etilgan navbatdagi xayrli tashabbus — “Maftunkor ranglar jilosi” koʻrgazmasida nogironligi boʻlgan bolalar va ularning ota-onalari, 17 ta tuman (shahar)lardagi Nogironlar jamiyati boʻlimlarining hunarmandlari, sportchilar va boshqa yoshlar ishtirok etishdi.

👉Batafsil

@adliyangiliklari

#Adliya_xabari

Davlat organlarida korrupsiyaning oldini olishda yuridik kadrlarning roli koʻrib chiqildi

Bugun Toshkentda Adliya vazirligi qoshidagi Yuristlar malakasini oshirish markazi hamda Konrad Adenauer nomidagi jamgʻarmaning Oʻzbekistondagi vakolatxonasi bilan hamkorlikda “Davlat muassasalarida korrupsiyaning oldini olish sohasidagi tizimli islohotlar asosida yuridik kadrlarning malakasini oshirish” mavzusida xalqaro ilmiy-amaliy konferensiya tashkil etildi.

Konferensiyada soha boʻyicha xalqaro ekspertlar, Korrupsiyaga qarshi kurashish agentligi, prokuratura, ichki ishlar hamda sud-huquq sohasidagi milliy muassasalar vakillari ishtirok etdi.

Tadbirda adliya vaziri oʻrinbosari X. Meliyev soʻzga chiqib, mamlakatda korrupsiyaga qarshi kurashish hamda ushbu turdagi jinoyatlarni sodir etilishini oldini olishga qaratilgan kompleks choralar, xususan, Adliya vazirligi tizimida bu borada qilinayotgan ishlarga toʻxtalib oʻtdi.

Taʼkidlangandek, vazirlik tomonidan 2019-yilni shartli ravishda “Kadrlar va korrupsiyaga qarshi kurash” yili deb eʼlon qilindi. Shu munosabat bilan ikkita muhim hujjat: kadrlar bilan ishlash va korrupsiyaga qarshi kurash dasturlari ishlab chiqildi.

Shuningdek, vazirlik huzurida korrupsiyaga qarshi kurash kengashi tashkil etilgan. Adliya vazirligining korrupsiyaga qarshi kurashish boʻyicha siyosati ishlab chiqildi, unda adliya organlari va muassasalarida korrupsiyaga qarshi kurashning asosiy yoʻnalishlari va yondashuvlari belgilandi.

Ochiq va shaffof ishlash — korrupsiyaga qarshi kurashning muhim omilidir. “Open justice” (“Ochiq adliya”) dasturining ishga tushirilishi sababi ham ana shu. U jamoatchilikni vazirlik faoliyati (xodimlarni ishga qabul qilishdan tortib, uning moliyaviy faoliyati bilan bogʻliq maʼlumotlargacha boʻlgan) axborotlar bilan tanishtirishning yangi yondashuvi va mexanizmlarini oʻz ichiga oladi.

BMT Taraqqiyot dasturi bilan hamkorlikda adliya organlari va muassasalarida “KPMG International” kompaniyasining xalqaro ekspertlarini jalb etgan holda, korrupsiyaga qarshi komplaens nazoratni joriy etish boʻyicha loyiha amalga oshirildi. Adliya vazirligi bu bilan cheklanib qolmaydi hamda xodimlarning korrupsiyaga qarshi kurashish borasidagi koʻnikmalarini rivojlantirish maqsadida yangi e-study.adliya.uz platformasi ishga tushirildi. Ushbu chora-tadbirlar natijasida Adliya vazirligi Oʻzbekistonda davlat boshqaruv organlari orasida birinchi boʻlib Korrupsiyaga qarshi kurashish menejment tizimi boʻyicha ISO 37001:2016 xalqaro standart sertifikatini qoʻlga kiritdi.

Konferensiya davomida ishtirokchilar davlat boshqaruvi faoliyatida ochiqlik va shaffoflikni taʼminlashning korrupsiyaga qarshi kurashishdagi ahamiyati, korrupsiyaviy jinoyatlar va ularni oldini olish, bu sohadagi strategik yondashuvlar, huquqiy taʼlim yordamida korrupsiyaning oldini olish, manfaatlar toʻqnashuvi vaziyatlarini tartibga solish, korrupsiya xatarlarining oldini olishda yuridik kadrlar malakasini oshirish borasida tajriba almashdi.

Faol muhokamalar jarayonida korrupsiya bilan bogʻliq jinoyatlar uchun javobgarlikni takomillashtirish, davlat xaridlari sohasida korrupsiyaning oldini olish va manfaatlar toʻqnashuvini bartaraf etish masalalarida yuridik xizmatning rolini oshirish boʻyicha takliflar ilgari surildi.

@adliyangiliklari