#Adliya_va_yoshlar

Аdliya vaziri yosh huquqshunoslar bilan uchrashdi

Adliya vaziri Akbar Toshqulovning Toshkent davlat yuridik universiteti talabalari, universitet qoshidagi akademik litsey hamda Adliya vazirligi yuridik texnikumlar oʻquvchilari bilan ochiq muloqoti boʻlib oʻtdi.

Mazkur muloqot “Raqamlashtirish davrida huquq sohadagi zamonaviy chaqiriqlar” mavzusidagi Yosh huquqshunoslar forumi doirasida oʻtkazildi.

Gibrid (onlayn va anʼanaviy) shaklda tashkil etilgan ochiq muloqotda 500 nafardan ortiq yosh huquqshunoslar ishtirok etdi.

Ochiq muloqotda A.Toshqulov oʻzining hayotiy tajribalari bilan oʻrtoqlashdi.

Vazir oʻz nutqida mamlakatimizda malakali kadrlar, xususan, professional huquqshunoslarni tayyorlash borasida qilinayotgan ishlar xususida soʻz yuritib, davlatni taraqqiyotga yetaklovchi avlodlar almashinuvi roʻy berishi uchun taʼlimga alohida eʼtibor qaratilishi lozimligini, bizning yoshlar ham dunyoning yetakchi kompaniyalarida faoliyat olib borib, yangi olamshumul korporatsiyalarga asos solishi kerakligini taʼkidladi. Shu bilan birga har bir iqtisodi rivojlangan davlatning orqasida koʻrinmas fundament – institutlar, qonunlar turishini, qonun hamma narsaga tarozi boʻlib xizmat qilishini, u adolat mezoni, davlatning vijdoni, standarti va oʻlchovi ekanini qayd etdi.

Shuningdek, A.Toshqulov barcha sohalar qatori huquq sohasida ham kun sayin yangidan yangi muammo va vazifalar paydo boʻlayotganini, huquq sohasi faqat qonunlar va qarorlar yigʻindisi emas, balki jamiyat tuzilishini shakllantiradigan tirik va nafas oluvchi kuch ekanini hamda yuridik kasbning muhim jihatlaridan biri uning adolatga sodiqligida ekanini aytib oʻtdi.

Forum doirasida ishtirokchilar raqamlashtirish va huquq, adliya tizimida ishlash tartibi, yosh huquqshunoslar uchun kerak boʻladigan koʻnikmalar haqida foydali maʼlumotlarga ega boʻldi.

Ochiq muloqot davomida Adliya vaziri talabalar va oʻquvchilarning savollariga batafsil javob berdi.

@adliyangiliklari

#Adliya_xabari

Adliya vazirligi tomonidan doimiy ravishda xodimlar mehnatini qo‘llab-quvvatlash, ijobiy ish muhitini yaratish maqsadida tizimli ishlar olib boriladi.

Ayni shu maqsadda, 20-dekabr kuni vazirlik xodimlari hamda ularning oila a’zolari madaniy hordiq chiqarish uchun O‘zbekiston Milliy akademik drama teatrida spektakl tomosha qilishga borishdi.

Ushbu tadbir vazirlik xodimlari va ularning oila a’zolarining madaniy hordiq chiqarishi barobarida o‘zaro norasmiy muloqoti uchun ham do‘stona muhit yaratgani bilan ahamiyatli bo‘ldi.

@adliyangiliklari

#Adliya_xabari

Tadbirkorlar soliqchilar ustidan to‘g‘ridan-to‘g‘ri sudga murojaat qilishlari mumkin

Adliya vazirligi tomonidan ishlab chiqilgan tadbirkorlik sohasidagi ayrim byurokratik tartib-taomillarni bekor qilishga qaratilgan O‘zbekiston Respublikasining Qonuni Oliy Majlis Senati tomonidan ma'qullandi.

Amaldagi qonunchilikda tadbirkorlar sayyor soliq tekshiruvi va soliq auditi natijalaridan norozi bo‘lgan taqdirda, ularning shikoyatlari dastlab yuqori turuvchi soliq organi tomonidan ko‘rib chiqilishi, shundan keyingina sudga shikoyat qilishlari belgilangan.

Qonun bilan Soliq kodeksiga kiritilayotgan o‘zgartirishlarga ko‘ra, tadbirkorlik subyekti bunday soliq tekshiruvlari natijalaridan norozi bo‘lgan taqdirda, soliq organining qarori ustidan to‘g‘ridan-to‘g‘ri sudga shikoyat qilish huquqi berilmoqda.

Bundan tashqari, “Aksiyadorlik jamiyatlari va aksiyadorlarning huquqlarini himoya qilish to‘g‘risida”gi, “Mas'uliyati cheklangan hamda qo‘shimcha mas'uliyatli jamiyatlar to‘g‘risida”gi hamda “Xo‘jalik shirkatlari to‘g‘risida”gi qonunlarga tadbirkorlik subyektlari tomonidan ustav fondini (ustav kapitalini) kamaytirish to‘g‘risida qaror qabul qilinganida ommaviy axborot vositalarida bu haqida e'lon berish hamda 30 kunlik muddatda kreditorlarni yozma ravishda xabardor qilishga oid majburiyatlari bekor qilinmoqda.

Ushbu qonun tadbirkorlar huquqlarini himoyasini yanada kuchaytirishga hamda ular faoliyatini amalga oshirishda ortiqcha majburiy talablarning bekor qilinishiga xizmat qiladi.

@adliyangiliklari