#Adliya_xabari
#Huquqiy_targibot

⚖️ Huquqiy madaniyat maktabdan boshlanadi: Toshkent shahridagi 231- va 206-maktablarda “Huquq sinfi” tashkil etildi

Toshkent davlat yuridik universiteti jamoasi tomonidan O‘zbekiston Respublikasi Prezidentining 2026-yil 5-yanvardagi PQ–1-son qarori ijrosi doirasida Yashnobod tumanida qator amaliy ishlar amalga oshirilmoqda.

Mazkur ishlarning uzviy davomi sifatida Toshkent shahridagi 231- hamda 206-umumta’lim maktablarida “Huquq sinfi” tashkil etildi.

“Huquq sinfi”ning ochilish marosimida TDYU rektori Baxshillo Xodjayev ishtirok etib, mazkur loyiha yoshlarning huquqiy bilimlarini oshirish, ularni qonunlarga hurmat ruhida tarbiyalash hamda huquqiy madaniyatni maktab bosqichidan boshlab shakllantirishda muhim ahamiyat kasb etishini ta’kidladi.

Qayd etilganidek, “Huquq sinfi” o‘quvchilar uchun nafaqat nazariy bilim olish, balki kundalik hayotda uchraydigan huquqiy vaziyatlarni tushunish, o‘z huquq va majburiyatlarini anglash hamda qonuniy fikrlash ko‘nikmalarini rivojlantirishga xizmat qiluvchi amaliy maydon bo‘ladi.

Shuningdek, bunday tashabbuslar yosh avlodning huquqiy savodxonligini oshirish, ularda qonunga hurmat, mas’uliyat va faol fuqarolik pozitsiyasini shakllantirish, yoshlar o‘rtasida huquqbuzarliklarning oldini olish hamda maktab, mahalla va oliy ta’lim muassasalari o‘rtasidagi hamkorlikni mustahkamlashga xizmat qilishi ta’kidlandi.

#Xalqaro_hamkorlik

🇺🇿🇰🇷 Koreyada huquq sohasini raqamlashtirish va sun’iy intellekt bo‘yicha ilg‘or tajribalar o‘rganildi

🔹Koreya Respublikasining 2025/2026-yillarga mo‘ljallangan KSP (Knowledge Sharing Program) dasturi doirasida joriy yilning 17–23-may kunlari O‘zbekiston delegatsiyasining Koreya Respublikasida xizmat safari amalga oshirildi.

🔹Dastur davomida Koreyaning qonunchilik tizimi, normativ-huquqiy hujjatlarni ishlab chiqish va ularga o‘zgartirish kiritishda raqamli texnologiyalardan foydalanish amaliyoti, huquqiy axborotni aholiga yetkazishning zamonaviy mexanizmlari hamda ushbu yo‘nalishdagi ilg‘or tajribalar yuzasidan taqdimotlar o‘tkazildi.

🔹Xizmat safari doirasida delegatsiya a’zolari Koreya Respublikasi Milliy Assambleyasi, Konstitutsiyaviy sudi, Hukumat qonunchiligi vazirligi, Koreya huquqiy axborot markazi hamda huquq sohasida dasturiy mahsulotlar ishlab chiquvchi IT kompaniyalar vakillari bilan uchrashuvlar o‘tkazdi.

🔹Dastur doirasida Adliya vazirligi qoshidagi “Adolat” milliy huquqiy axborot markazi hamda Koreya huquqiy axborot markazi o‘rtasida huquqiy axborotdan foydalanish va uni tarqatish sohasida hamkorlik to‘g‘risidagi Anglashuv memorandumi imzolandi.

🔹Shuningdek, huquq sohasini raqamlashtirish, sun’iy intellekt texnologiyalarini joriy etish hamda istiqbolli qo‘shma loyihalarni amalga oshirish masalalari muhokama qilindi.

📌 Koreyalik mutaxassislar mazkur uchrashuvlar o‘zaro manfaatli bo‘lganini, kelgusida huquq sohasida raqamli texnologiyalar va sun’iy intellekt imkoniyatlaridan samarali foydalanishga xizmat qilishini alohida ta’kidladi.

Bizni barcha ijtimoiy tarmoqlarda kuzatib boring
Telegram | Instagram | Facebook | YouTube | Bot