ورجعت وياكم حبايبي بقصة جديدة😍 وواقعية من حياتنا.
.
فتابعو وياي👇🏻😎

#ملوكه

#فصليه واني صغيره

#البارت_الاول


اني اسمي درر عمري حالياً 21 سنه بشرتي لونها حنطي عيوني عسلي وكبار شعري اسود وكلش طويل رشيقه ونزاكه

اني بنت شيوخ احد عشاير الجنوب نسكن احدى قرى الناصريه من اول ماوعيت ع الدنيا واني اعرف اكو مشاكل بين عشرتنا وعشيرة ثانيه ودوم عرك وثارات اني عندي اخوان 2 واحد ايهم وهو مهندس كهرباء ساكن ابغداد ....ايهم عقليته كلش متفتحه وانسان راقي بمعني الكلمه واخويه الثاني ادهم وهو حاد الطباع وعصبي بي طباع الريف وحب الكاع وصل صف سادس ومكمل دراسته فضل يهتم بكاع بابا ويرعاها احنا عدنا هوايه اراضي بابا شيخ العشيرة وكل عشيرته تحت طوعه وامرته ولو احد كال مر الشيخ ضاري كلها تكوم توكف احترام له وتقدير وهو انسان تصرفاته تقريبا مثل تصرفات ادهم بس اني اخر العنقود عنده بالدنيا كلها طلباتي اوامر وهذا الشي كان يعصب ادهم منه ويكوله البنيه متنطي عين واختي الي اكبر مني كذالك متقبل على دلال ابويه اليه هي اسمها نمارق مزوجه ابن عمي وعايشه قريبه على بيتنا وعدها 3 اطفال بقت امي محجيتلكم عليها لان هي اكبر غصه بكلبي امي متوفيه وهي ع الولاده .

اثناء ولادتها اليه حالتها صايرة خطرة كلش وماتت هي حتى اني اعيش دوم اتمنى اشوف امي ولو ليوم واحد طبعا بابا سماني درر على اسم امي ابويه كان كلش يحبها حسب متحجيلي نمارق هم ازوجو عن حب بابا كان كلش يدللها ومن حبه لاامي سماني على اسمها حتى تبقى عايشه وياه ومن اول مابديت افتهم واوعى ع الدنيا بابا كان كل خميس ياخذني لقبر امي ويبدي يحجي وياها يكوللها شوفي درتي شوفي درر الصغيره شسوي وشلون كبرت عمري صار تقريبا 11سنه مرة صارت مشكله كلش جبيرة بين العشيرتين وصارت شغلات سلاح بابا اني كان عمري صغير تهسترت وحالتي موطبيعيه من الخوف بابا دزني لبغداد يم ايهم بقيت فترة هناك وبعدها مقبلت ارجع بابا جا لبغداد حاول هوايه حتى يرجعني وياه بس اني عييت ارجع وياه وهو من معزته بيه كال ابقى بعد كم يوم هنا ايهم طلب من ابويه ابقى يمه وهو يهتم بيه كاله نفسيتها كلش تعبانه بسبب المشاكل والضروف الي تمرون بيها عوفها هنا يمي وراح انقل اوارقها حتى تكمل دراستها هنا .. بابا مقبل ورفض الموضوع وكالي شلون وامج متردين تروحين عليها احنا مو متفقين كل خميس اروحلها طول ماالله ناطينا عمر
درر : بابا اجي الخميس وارجع السبت فدوة بابا الله يخليك والاه الجو هنا احلى وايهم يطلعني ويفسحني مو مثل هناك فدوة بابا مااريد ارجع خليني
الشيخ ضاري : ها ايهم شوف دلالك لوين وصل هسه درر متقبل ترجع ويايه
ايهم : يابه عوفها هنا واني ادير بالي عليها خليها تطلع وتشوف الدنيا بعدها صغيرة
الشيخ ضاري : هاي بدل مترجع انته لااصلك وتجي تكعد بمضافه ابوك وانته شيخ الشيوخ تريد اختك تجي يمك يايابه اني كبرت ومحتاجك يمي وانته تعرف باخوك بعده صغير ومتسرع ممال ياخذ الشيخه هو ويصير الامر الناهي انته بعقلك ورزانتك راح اسيطر
ايهم : يابه انته تعرف بيه اني كلش مالي بهاي سوالف المشيخه اني رجال ابن مدينه وعندي وضيفتي هنا شلون اعوف الي صارلي عمر ابني وارجع للقريه
الشيخ ضاري : اني تعبت منك ومن ان اكدر اقنعك ترجع لثوبك بس هسه يجي يوم وتندم .. صار يابه صار درتي تدرين بيه اني مااكدر ارفضلج طلب انتي جمارة كلبي ابقي هل الفترة يم اخوج والخميس اجي اخذج
درر : صار ياعيون درر انته اروحلك فدوة اني ... تعرفون سوالف البنات وحيلهم رحت اركض ابوس بابويه لان قبل ابقى ابغداد
بعد ماراح بابا رحت على ايهم كتله اريد ابقى يمك ماارجع للقريه ..خاف بابا ياخذني الخميس وبعد ميرجعني
ايهم : والله ياعيوني هاي بقت انتي وشطارتج انتي عندج حصانه يم الشيخ مثلي اني الفقير

يتبع ...

فصليه واني صغيره

#البارت_الثاني


درر: بقيت فترة يم ايهم ابغداد ويايه امي نجمه طبعا هي الشخص الاهم بحياتي واني مذكرتها تعرف تفاصيل عني ابويه ميعرفها عني هي الي اعتنت بيه وربتني بعد وفاة ماما الله يرحمها كانت تهتم بيه اكثر من ابنها الي كان بعمري واسمه علي بعمري حيل حباب واني كلش احبه احنا اصدقاء حيل وهو كذالك يعاملني بنفس الطريقه دائما نلعب سويه ونروح للمدرسه سويه يعني اغلب وقتنا نكضي سويه
وجا يوم الخميس بابا من الصبح جا عليه متفاجئت لان كنت متوقعه
الشيخ ضاري : يله بابا حظري ملابسج وغراضج حتى تروحين ويايه
درر : حسيت بابا رح ياخذني بدون رجعه كان لازم اصرف قبل مااروح ... بابا وغلاة ماما عندك ترجعني لهنا
الشيخ : درر شلون اعوفج هنا واني هناك ولج البيت فارغ من دونج احسب دقيقه دقيقه حتى يجي واجي اخذج
درر : بابا عوف القريه وتعال هنا يمنا ... هم نخلص من المشاكل
الشيخ ضاري : شلون بابا اعوف كل شي واعوف امج واجي هنا اني ربيت هناك وصرت مثل السمجه من اطلع من القريه اموت
درر : سلامتك يابعد روحي لاتكول هيج اني اموت بدونك
كنلت غراضي ورجعنا اني وبابا وام علي الطريق كله اني ساكته كلش ماعندي رغبه ارجع للقريه والي مريت بي هناك .. بابا انتبه عليه اني ضايجه ومو هاويه الرجعه قبل منروح للبيت بابا اخذني على امي ورحنا زرنا القبر ..وهو بده يشكيلها مني ويكوللها درر تريد تعوفني وتسكن ابغداد حضنت بابا وكمت ابجي بابا اني بعد مااعوفك بس مااريد اشوف هيج مقهور وعد بعد مااروح لبغداد حضني بابا ومسح دموعي رحنا للبيت شفت اخويه ادهم واختي نمارق وطبعا كالعاده بدو يحجون عليه وميقبلون على تصرفاتي وان بابا هوايه مدللني وناطيني حريه .. بابا دائما ميقبل على كلامهم ويكول هاي درتي المدلله ومرت بينا الايام واني صرت صف اول متوسط طبعا كانت المدرسه مختلطه بالقريه بابا محب اداوم بمدرسه مختلطه كان يخاف عليه سمعته يخابر ادهم ويكوله راح ادزلك اوراق درر حتى تقملها بمدرسه للبنات ..طبعا فرحت حيل طرت من الفرحه لان رح اروح لبغداد بس شي واحد الي ضوجني طبعا بعد زيارة ماما الله يرحمها وهذا الروتين الي ضوجني علي والمشاريع الي كنا مخططين نسويها اني وياه بس منتبهت لهذا الشي رحت اركض عليه علي علي رح اروح لبغداد
علي : شوكت ترحين
درر : علي رح اروح بعد ماارجع رح ادرس ابغداد
علي : كمت من مكاني ليش احنا مو كلنا ندرس هنا واتفقنا على شي هسه شلون تعوفيني وتروحين
درر : مو اني ..سمعت بابا خابر ادهم وكاله قدملها يمك واني كلش فرحانه .. علي انته شبيك ليش ضايج يعني انته متفرحلي
علي : لا مضايج واكيد افرحلك بس رح اشتاقلج شلون رح اكمل بدونج
درر : علي رح اطلب من بابا تروح ويايه لبغداد
علي : درر صدك تحجين طرت من الفرحه اذا درر طلبت من الشيخ هو ميردها ويعني راح اروح وياها وماافاركها
درر : اي اكيد وشوف ....
رحت على بابا حجيت وياه حتى يروح ويايه علي لبغداد بس استغربت من رده فعله ...اول مرة يعصب عليه ويكولي معليج ب علي ... انتي كبرتي وعلي ولد غريب علينا لاتبقين انتي وياه على هل العلاقه انتي بنت الشيخ وهسه كبرتي ولازم تثمنين خطواتج قبل متخطيها راح ترحين لبغداد ومااريد اسمع شي اسمه علي بعد علي مكانه هنا وميتقارن بيج
..
عفت بابا وطلعت من يمه واني افكر بكلامه استغربته حيل شفت علي بالممر واحس بعيونه سؤال ها شصار
هزيت براسي يعني بابا مقبل وعفته ورحت
علي : كملت طريقي ورحت للحديقه بقيت كاعد وابجي درر رح تروح واذا راحت هي معناها امي هم رح تروح وياها واني رح انحرم من الاثنين

يتبع ...

#فصليه واني صغيره

#البارت_الثالث


درر : بعد فترة كلش قليله بديت اتحضر حتى اروح لبغداد واستقر هناك كان لازم تروح امي نجمه لان اني مااكدر ابقى وحدي ..بقيت افكر ب علي شلون رح يبقى وحده وبدون امه اني مو لازم اصير انانيه وافكر بروحي لازم افكر بي ... طلعت للحديقه لكيت علي كَاعد يم الشجرة الي متعودين نلعب يمها مكانا المفضل كعدت يمه واحس هموم الدنيا كلها على راسه( علي كان اسمر ولون عيونه عسلي عيونه بيها براءة تحسر واني بهذا العمر ورغم الايام الي مرت عليه مستحيل انسى عيونه) ..همست بصوت مخنوك
علي شبيك ليش احسك ضايج
علي : درة ترديني اعرف رح تعوفوني وترحون ومااضوج
درر : اني اعرف من كلت تعوفوني تقصد امك 😔😔
بكثر ماكنت اريد اروح لبغداد بكثر ماهسه اني ضايجه وصوت بداخلي يكولي لاتروحين كنت مفكرة اني لو رحت لبغداد انته وامي نجمه تروح ويايه بس هسه كل شي تغير انته راح تبقى هناك وامك لازم تبقى يمك
علي : درر .. شنو امي متروح وياج
درر : بابا كال تروح بس اني راح اكوله خل تبقى هنا واي وحده من البنات تروح ويايه ععلي يكفي هذا العمر كله واني مشاركتك بامك مستحيل هسه اجي اخذها منك ..
علي : لا درر مستحيل الي تكولي امي لازم تروح وياج اني ماامن عليج هناك بدونها اني مضايج لان انتي مشاركتني بأمي هذا شعور بالدنيا من اسمعج تكوليها امي نجمه احسج قريبه مني درر لاتفكرين بيه اني رجال وتعرفين الزلم مينخاف عليهم صح مووو
درر : اكيد انته رجال ومينخاف عليك بس اني هم مو انانيه
علي : اااش اااش لاتحجين بعد انتو رح ترحون واكيد رح تجون كل اسبوع مو واني رح ابقى انتضركم وكل يوم يمر بدونج راح اكتبه على شجرتنا وكل يوم راح اكتبلج شسويت وشلون مر عليه اليوم حتى من تجين تقريهن اتفقنا
درر : اتفقنا واني عيوني مليانه دموع شلون راح اروح ...
وبعد يومين وبقت ساعات قليله على سفرتي دخلت على امي نجمه للغرفه لكيتها تحضر بغراضها وتبجي كمت ابجي على بجيها هي عدها الدنيا كلها تبجي ولاابجي اني
ام علي : يايمه ياعيوني ليش تبجين ( مسحت دموعها واني كلبي متفطر عليها اول وتالي هاي يتيمه ودمعه اليتيم صعبه ) درة الف مرة كايلتلج دموعج غاليه
درر : امي نجمه وانتي دموعج اغلى وكلما دمعج رح تنزل دمعتي تنزل قبلها ..ليش تبجين لان رح تروحين لبغداد وتعوفين علي هنا موو
ام علي : نزلت راسي واني مااعرف شكوللها للطفله اكول اي مااكدر اخالف اوامر الشيخ ..خاف ينكسر كلبها وتنقهر اكوللها لا شلون لا واني عيوني فاضحتني بقيت ساكته
علي : وتالي وياج درة ولج هاي دموع الفرح امي واعرفها فرحانه لان ماشيه لبغداد معليج منها ...
ام علي : صدك يايمه هاي دموع الفرح لاتخافين عليه ..
درر : ضحكت على ضحكتهم وطلعت من الغرفه وكتلها امي انتضرج جوة حتى نطلع لان مبقى وقت
علي : ردت درر تطلع من الغرفه حتى احضن امي حيل واشبع من ريحتها قبل متروح حضنتها وكمت ابجي يمه ديربالج عليها اني مامن عليها وياج
ام علي : يمه ارفع راسك الزلم متبجي وانتي زلمتي اذا مو راضي على مشيتي لبغداد ماامشي واكول للشيخ زلمتي مارضى على روحتي
علي : لا يايمه شتكولين .... شلون تعوفين درر بوحدها بغداد انه سامع هاي ولايه وجبيرة وانتي لازم اديرين بالج عليها وانه زلمتج ومينخاف عليه وراح ابقى انتضر رجعتكم على احر من الجمر ..

يتيع ...