همس " انطيني فرصه وخليني امسح هاي المواجع بحبي الج "
رديت " ماانكر وكفتك وياي واهتمامك بس مستحيل اكون انانية وياك وانطيك وعد مااگدر اوفيه "

رد " انت بس گولي اي ومعليج اني راضي بقسمتي وياج ومتأكد راح تكون احلى قسمة "

اتنهدت " ماادري ماادري احس كلشي مخربط بحياتي احس نفسي ناقصة لاشعر لاملامح لا شكل شلون الگدر اعيش حياتي عادي"

رد " من حبيتج حبيت روحج مو شكلج .. كل هذا شي وقتي بس تطيبين يرجع احلى من قبل "

سألت " واذا ماطبت "
رد " لا تطيبين اني واثق .. وراح تحبيني وتموتين عليه بعد وتتحدين المرض علمودي "

ضحكت " طلعت علاج كيميائي وماادري "
ضحك " لا اني مرهم يسكن الالم بعد كل جرعة ووجع"
اتنهدت " خايفه !! "
رد " لاتخافين وانت بگلبي .. "

ابتسمت " لعد جيبلي شاورما حتى اصدگ "
ضحك " لزمتيني من ايدي التوجعني مو تتدللين "

وهاي المرة الثانية الي يدگ گلبي بيها .. بس ياترى راح يگدر هالحب ياخذني البر الامان .. او تروح كل احلامي هباءً منثورا …

يتبع…… .

///// #البارت الثالث والســـبعون /////
ج2


‏لا سلطة لنا على قلوبنا .. هي تنبض لمن أرادت ..

فالقلب عبارة عن عضلة في جسم الانسان نحاول جاهدين ان لا نجعل لها القدره على التحكم بناَ كثيراً ..

ولكن بعض الأشياء تدفن فى اعماق القلب ونردم عليها بتراب إدعاء النسيان لكنها تظل حية عالقة فى الوجدان تظهر فجأه لا نستطيع التحكم فيها ....

سمر :
بعد وفاة هاجر .. البيت ماعاد مثل الاول .. حياتنا تغيرت ماعاد حتى تجمعنا مثل قبل ..
مرت عمو عامر تمرضت وشحالها بغياب هاجر .. عمو عامر حتى مايجي بعد للبيت الا بالليل او مايجي اصلا

بيبي وجدو تعبانين حيل .. ومن رجعت من المستشفى سكنت غرفتها ماطلعت بعد ..

جنت اسويلهم الريوگ او الغدا واخذه للغرفه .. وين جانت قبل تجمعنا كلنا يمها بالصاله..

اما ارشد فمثل عادته يطلع الصبح يجي بالليل ياخذ قمورة يمة ينومها ومرات تنزلي بالليل تنام يمي ..

من اشوفه بهيج حالة اتأذى .. بس مابيدي شي اسويه حتى مااگدر احجي وياه لان هو ع گد السلام ويصعد

ملابسه امه تغسلهن .. بس مرات تگلي انظف غرفتهم لان البنات امتحانات ..

صعدت للغرفه فتحت الباب .
جانت مرتبة بس ملابس ع الكرسي اكو .. تذكرت هاجر من تگول ارشد ارتب مني .. اني من اريد حاجه اگلبها للغرفة گلاب ..
وهو يجي وراي يرتب . نظفتها وشلت الملابس اشوفهن نظيفات لو لا ..

فتحت القميص جذبتني ريحته .. قربته على خشمي اشتمه .. اشتميت ريحته وغمضت عيني ..
سرحت وياه الاحلامي .. تخيلت بيوم هالريحة راح اشتمها عن قرب .. بيوم راح يتغير كلشي ويصير هذا مكاني وقمورة بينا..

الريحة خلتني انسى نفسي لدرجة انفتحت الباب واني
ماادري ..
" وين صرتي لسا "

بسرعة انتبهت شمرته ..
ضحكت " طلعتي مو هينة.. بله من شوكت "

رديت " سحر مو لگيتيلج فرصه تحجين بيها "

طبگت الباب ودخلت صارت تگلب بالقميص " اوووع شتشتمين بي بله .. انتي مو صاحيه طبعا "

رديت بعصبية واني اجمع بالملابس " يلة كافي سدي الموضوع اني اطلع احسن الي "

اخذت الملابس وردت اطلع ..
" وج شعاجبج بهذا هم شايف نفسه وهم اكبر منج وعندة بنيه هو هذا ذوقج ..هسا لو من ذولاك الاثنين عاد اهون "

تركتها وطلعت مااتحملت استهزائها بيه كعادتها .. بس خفت لاتفضحني لان اعرف تصرفاتها بعد ماتنحزر تغيرت كلش ..

شغلت الغسالة وبديت اغسل ملابس شكو ملابس موجودة غسلتها بدون استثناء بس اريد انهزم من نضراتها .. صارت كلما تشوفني تبتسم وتلمح وكأنه لگتلها شغله تتونس بيها ..

حتى الغرفه لليل يله دخلتها وياي قمورة ..
شافتنا ابتسمت .. " شكد حياله واني اكول شألها خلگ متحملة طفله وتعبها تالي طلعتي راسمه على ابوها .. بس ياترى هاجر جانت تدري لو لا "

سكتت عنها ..
دا انوم بقمورة .. اندگت الباب توقعت وحدة من البنات .. سحر نايمة ومخليه رجل على رجل ..

انفتحت الباب فزت من مكانها وعاطت ..
" شبيك متستحي تدخل هيج ماتگول اكو بنات بالغرفة"

رد ارشد بعصبية " صوتج لج وربي اكصه للسانج مو دكيت الباب شبيج متسمعين مو هاي اختج وياج "

ردت " وانت اصلا شعندك جاي عندك شي دز البنات لو ماكو ذوق بهذا البيت "

رد " استغفر الله . لاتخليني ابتلي بيج بهالليل مخلي الذوق الج .. اخر من يحجي بالذوق انت لاعندج احترام لجبير ولا لصغير "

اشرلي " سمورة انطيني قمر خليني اروح "

شلتها بهدوء نطيتها اله .. اخذها وطلع ..
حجيت وياها " انت شلون هيج تحجين مو دگ الباب اشو ماتحترمين احد "

ردت " اي طبعا لا تدافعين مو هذا الحبيب الخفي شي طبيعي متنطين بي .. بعدين مخليه الاحترام الج .. طفي الضوة خلي ننام يله "

سديت الضوة ونمت .
فعلا ماتستحي صايرة .. ماكفاها المشاكل وي هنودة اجت هسا تكملها ..

ثاني يوم اني انظف المطبخ وهي تغسل بالطارمة من الصبح .. لان احنة بثمانية نگعد تصير هوسة الصبح بين البنات للدوام وهم كلهم شغل ودوامات..

رفعت دشداشتها وتغسل بالطارمة ..
شفتها طلعت " سحر نزلي دشداشتج الولد بعدهم بالبيت لايطلع احد يشوفج "

ردت " اليطلع يكح يسوي اي شي مالي دخل .. "

ضجت حيل منها ذيج المرة سوتها وهنودة تعاركت وياها لان احمد دخل وگلتلها متعمدة حتى تغريه

بس هالمرة لا .. بعدني ممكمله طلع ارشد للكراج علمود سيارته ..
مر من يمي وسلم " صباح الخير سمر "
رف گلبي رديت " صباح النور '

شافها دنگ بسرعه وراح للگراج .. وهي ولا عبالك ..

سحبت الصوندة منها " بعد متغسليها اني اغسلها ادخلي يلة وبعدين ماجنتي تگعدين من الصبح شگعدج ؟"

ابتسمت " ليش لازم غرتي لان حبيب الگلب شافني .. اعترفي غرتي لان اني احلى منج وعندي انوثة وجاذبية اكثر .. لدرجة انت وهنودة تغارن مني "

هزيت ايدي " انت مريضه مستحيل تكونين صاحية "

تركتها ودخلت .. وقررت اتجنبها لان اعرفها راح تستفزني بكل دقيقة ابتعدت عنها بلكي تنسى وتصرفاتها تغيرها…

عذراء :
اعلان حب حسام كان بمثابة هدف للعبة كرة قدم بالوقت بدل الضائع ..

اهتمامه وخوفه كانو واضحين وضوح الشمس .. رغم اني قررت اغلق ابواب هالگلب لاخر انفاسي .. بس كلامه وتوسلاته جدد شعور بداخلي ..

مااگدر اگول حب او عشق .. لان مو بالسهولة گلبي يرجع يدگ ويثق بهيج سرعة ..

رجعت للبيت بعد مااصريت اكل شاورما .. اول ماكملت انطاني علاج وكأنه حاسب حسابه ..

وصلنا وگف السيارة والتفتلي " تدرين مامصدگ ؟"
ابتسمت " ليش ؟"
رد " انت جددتي الامل بحياتي .. انطيتيني شي مستحيل جنت اتوقع يصير ؟"

اتنهدت " بس اني داخلي ممرتاح رغم راغبة هالشي "

رد بتعجب " يعني ماتثقين بيه ؟"
رديت " مو هيج حسام بس مااريد اكرر الصار "
سألني " بعد عندج مشاعر اتجاهة "
رديت بسرعة " لا ابد اذا حتى مشاعر كره ماباقية عندي صدگني .. خوفي مو من گلبي خوفي من الخذلان "

قرب حاله الي وهمس.. " اذا بيوم هالگلب خذلج ماانتظر انت تحكمين عليه اني الاحاسبه .. اطماني يادنيتي كلها هالگلب ربى على حبج وكبر وهو يردد اسمج .. صبر وماخله احد ياخذ مكانج الحد مافاز بيج واسترجعج ..
تحجين صدگ عذراء .. بعد ماانتظرت كل هالسنين وصبرت اضيع هالفرصة مني ..

ابتسمت " خلي انزل صار الرايح والجاي يباوعلنا "
رد " عادي اخابرج مووو؟"
هزيت راسي وابتسمت ..

نزلت مبتسمة لحد مادخلت.. كالعادة صارت بوجهي ام دنو ..
" خير اليوم اكو ابتسامة ماليه الوجه .. اكيد حسام اتشجع وفجر القنبلة "

ضحكت " شمدريج انت ؟"
ابتسمت " مبينه .. اصلا اتأخر هواي گلت من زمان راح ينطق ابو الهول ويحجي.. "

رديت " هو اصلا قبل يلمح .. ومن جنت اتخربط بالجرعة واتقيأ .. ينخطف لونه وينسى نفسي ويگلي هااا حبيبتي شلون صرتي .. بس اغلس عنه .. بس اذا نسير موجود مايحجي "

ردت " تستاهلون اثنينكم.. حسام فاق كل توقعاتنا .. فعلا مالازم نحكم على عائلة من نفر واحد "

رديت " اني انطيته الموافقة بس احس بداخلي شي مخوفني "

ردت " بطلي مخاوف وانسي عيشي حياتج.. وهسا روحي ارتاحي وبدلي حتى اسويلج غدا "

ابتسمت " مااريد غداني هو "
ردت " عيني عيني لعد روحي ارتاحي "

دخلت للغرفه تعبانه… ماما نايمة جانت..
بدلت ورحت لفراشي نمت . اجتني رسالة ..
" مساء الخير اشتاقيتلج "

ابتسمت " معقولة هذا الرقم مامل كل يوم يدز .. بس لا حسام .. المشكله الرقم غريب مااعتقد اثير او اسيا .. "

دزيت رساله الحسام " عندك خط ثاني ؟؟ "
رد " لا ليش ؟"
رديت " لا هيج "

لعد هذا منووو ؟؟

بعد كم يوم اجت شذر واني نايمة گعدتني ..
" گومي بسرعة "

فزيت " خير يا ساتر شكو ؟"

ردت " حسام وخالج هنا "

استغربت " حسام اشو ماگالي .. "

بدلت ورتبت نفسي .. لفيت شالي . خطيت حواجبي بالقلم .. وطلعت ..

سلمت على خالو . وحسام بسرعه گام من شافني وابتسم لابس بنطرون جينز وقميص وسترة ..

بس ماما گاعدة يمهم ..
اشرتلي " وين شذر خلي تخابر نسر يجي خالج يريد يحجي وياه بموضوع "

باوعت الحسام ابتسم ..
رحت الشذر جاي تحجي وي نسر .
سدته وهمست " الشغله بيها ريحة خطبة "

رديت " لا مااعتقد لو اكو هيج شي جان حجة وياي "

رحت للغرفة دزيتله رساله " صاير شي ؟"
رد " هلو حبيبي مفاجأة "

توترت معناها كلام شذر صحيح وراح يسويها .. زين ليش مااخذ رأي بوضعي هذا وحالتي شلون يخليني امام الامر الواقع ..

اجه نسر سلم عليهم وكعد ..
فتح الموضوع خالو :
" احنه اجينا على شغله وماادري اذا تردونا لو لا .. بس بالاول كلكم تعرفون حسام واخلاقه .. واسألوا عنه بالمستشفى وبكل مكان ..
اني لو ماواثق بي مااجي واعتب الباب واعرف انه الماضي البينا راح يكون حاجز ..

رد نسر " خير ان شاء الله "
كح خالو وكمل " ان شاء الله خير .. تدرون حسام وحيدي صح بس ماربيته اني هو ربى نفسه بنفسه واعتمد على حاله .. وهسا جاي اخطبله عذراء واتمنى ماتطلعوني فشلان منا "

هو حجة هيج الكل انصدم ابد ماجانو متوقعين ..
حجت ماما " لعد ام مريم وين .. اشو مااجت وياكم "

رد " ام مريم مريضه واني اجيت لان مااريد تصير رسميه ومثل الغربه احنه اهل مهما صار بينا والبنية بنيتي .. "

رد نسر " خالي جيتك على راسي .. وراح احجي هسا حجي ماله علاقه بمريم ولا احكم على حسام بمريم

بس عذراء حاله خاصه بالنسبة الي .. وخاصه بهذا وضعها .. اقدر اهتمام ووگفة حسام ويانا بهيج ظرف .. بس مامستعد اخسرها .. ماصارلها هواي من طلعت من تجربة معتز ودگته الناقصه بيها .. ومن ساعتها اني حلفت ماانطي اخواتي القريب .. لان اني انطعنت منهم مرتين . وهنا انطعنت .. وعذراء ..
حسام خوش ولد بس المحيطين بي مايريحون .. والدليل امه ماقابله ومااجت واكد راح تحاربها والا وين اكو ام ماتجي خطبة ابنها حتى لو كانت مريضة ..؟"

رد خالي " ماانكر هالحجي بس مصيرها توافق منو عندها غير حسام "

رد نسر " عوف امه .. ومريم !! راح تسكن ماتأذيها وتعرف هي شلون حاقدة شلون تريدني خالي اشمر اختي بنار "

رد حسام " اذا على امي ومريم لاتهتم .. اني أاجر مشتمل او شقه قريب ع المستشفى ونعيش وحدنا ومحد يگدر يمس شعرايه منها "

سأله نسر " وراح تضمن مريم ماتأذيها .. نسيت شلون حاربتني وحاربت اهلي بوكاحة عين رغم هي الغلطانه ولازم تطم عارها بس بصلافه تطلع بوجهي كل مرة "

رد حسام " والله اذا تجرأت ساعتها معناها جنت على نفسها.. هي اصلا تتجنبني ومالها علاقه بيه من زمان يعني مااعتقد تسوي شي "

نسر كان رافض الفكرة من الاساس رغم يناقش بهدوء لان مايريد يجرح حسام بعد كل السواه وياي ..

اخر شي گالهم مااوعدكم بس الله كريم . احجي وياها ونشوف ..

من طلعوا صار نسر يحجي وي امي ويكلها.
" ماردت اكسر بالولد لان احترمه والا خابري اخوج وگليله يحلم انطيهم عذراء.. شنو بايعها اني . حتى لو هي مقتنعه ولو مااضن بس هم ماانطيها "

رحت للغرفه دزيتله رساله " من توصل خابرني "

من وصل اتصل " هاا حبيبي "
رديت " ليش استعجلت ماصار كم يوم شلون تتوقع اوافق بسرعة "
رد " مااتحملت تعبت من الانتظار اريدج تصيرين حلالي .. تدرين من يصيرلج شي بودي احضنج واخفف عنج واذكر حرام واتراجع بس اتاذى حيل ومااتحمل ..
خلي حبنا يكبر بالحلال .. والله ماتتندمين بس طاوعيني "

سكتت عنه لان اصلا مامقتنعه بفكرة الزواج ..
باوعت النفسي بالمراية..
شلون تريدني اتزوج واني بهيج حاله شلون ؟؟
مستحيل طبعا..
من حقي اتزوج مثل البنات البس بدلة واسوي تسريحة كبيرة ..
جنت اتخيل بذاك شعري التسريحة التصير شلون ؟؟

ماقبلت اتزوج واني بهيج حاله ولا اصلا عرفته زين حتى اجازف ..

وهو هم ماضغط عليه .. بس بين فترة وفترة يگلي شوكت تصيرين حلالي واشبع منج ..

يلمح دايما واقابله بأبتسامة " مو وكتها هسا "
جان يضوج بس مايبين متفهم .. اذا اني حتى كلمة حبيبي اخاف انطقها لان نطقتها قبل وتندمت ..

اتصل عليه الرقم نفسه القبل يراسلني .. من شفته استغربت هالمرة مو رساله شعجب .
رديت اشوف منوو..
اجاني صوت هز كياني كله .. وترني وعصبني بنفس الوقت ..
" انت شتريد ومنين عرفت موبايلي والمن جنت تراسلني "

رد " سمعت مريضه .. تأذيت حيل. عذراء اني لسا احبج واريدج انطيني فرصه.. من سمعت مريضه تخبلت والله وقررت اجيج للعراق بس ماگدرت… "

ضحكت " والله واثق من حالك . تدخل عليه بهيج طريقه واصدگك .. معتز بعد لاتخابر وانساني مثل مانسيتك "

رد بعصبيه " لا انت مانسيتيني ادري بيج بعدج تحبيني حب معتز محفور بگلبج ماتگدرين تمحيه .. بس گولي هالكلب جاي يقرأ براسج ويريد ياخذج مني .. عرفت خطبج ورفضتيه .. عرفت ساعتها انت تحبيني ومستحيل تحبين واحد غيري "

ضحكت من صدگ وداخلي ينزف :
" منو الگالك رفضت .. الوصلك مانقلك الاخبار الصحيحة .. اني نسيتك لدرجة دخل حسام الگلبي ومو بأقواله بأفعاله .. بوقت الانت مشغول بونستك بالخارج هو جان واگف وياي خطوة بخطوة.. ماتركني ابد ..
رغم مريضه ويمكن اعيش او لا بس حبني وتمسك بيه وخلاني انسى كلشي يخصك حتى المك .. گدر يسترجعني بعد ماانت اخذتني منه بحجة الحب رغم تدري بي يحبني "

عاط " جذاب هذا والله جذاب يضحك عليج .. عندة غايه يريد ينتقم منج المريم هو وياها متفقين صدگيني "

انصدمت من كلامه بس مانطيته فرصه " كلٌ يرى الناس بعين طبعه .. عبالك الناس كلها مثلك "

غلقت الموبايل بوجهة وحضرته ..
اتهسترت ساعتها من سمعت صوته وكلامة وخاصه اخر كلام حجاه زرع الخوف بداخلي صرت مااثق بأحد ..

تخربطت وبس ابجي ..
حجيت الشذر كلشي.. تخبلت " هذا هواي سكتناله مو كافي السواه بيج . مالازم تسكتين .. احجي النسر "

رديت " ونسر شيسويله "
ردت " كلشي يسويله مو شايف نفسه هناك محد يوصله ويخابر يأذيج "

حجت هي النسر واجاني يستفسر ..
حجيتله كلشي تخبل حتى ع الذهب مالتي حسيته انجن من گلتله .. خابر الخالو علي بتركيا وحجة وياها ..
وگاله " شوف خالي اذا سكتنا على غدره الها فهسا مااسكت .. ولا يكول بألمانيا ومحد يوصلني عندي جماعه هناك يمه… والله اخليهم بأي طريقه يلفقون تهمة عليه ويخلوه ينطرد واخرب مستقبله كله ..
لايختبر صبري ابد .. وخلي يبتعد عن عذراء.. فوگ ماخذلها وباگ ذهبها وهسا جاي يحجي بوكاحة عين ..

خالو تعجب من سمع بشغله الذهب وگال ماادري هسا سمعت .. مريت بأتعس ظروف ماساعدني مامعقولة يضم عليه ..

رد نسر " لا معقولة ليش اليغدر بخطيبته صعب عليه يبوكها لو يضم عليك .. الظاهر ياخالي انت وخالي عباس ماعرفتوا تربون .. لا مريم ولا معتز اثنينهم نفس الصنف "

ضاج خالو من حجايتة وزعل .. وماما هم گالتله خالك مايجوز هيج تحجي وياه… بس نسر مااهتم وطلع كل قهره بيهم ..

بيومها سواها عناد بيهم وسألني " انت قانعه بحسام ؟"
ارتبكت من سؤاله وماعرفت شجاوب " هااا ماادري "

رد " يعني اذا خطبج توافقين ؟"
" بالنسبة الي حسام انسان عاقل ومثقف واكيد ماالكي احسن منه رغم المحيط العايش بي "

رد " المحيط اني اعرف شلون احميج منه "

رغم كل يوم حسام يخابر بنسر ويريد يعرف موافقته بس نسر مصر على رأيه ..
واستغرب من خابره نسر وكاله اريد احجي وياك ..

خابرني بسرعه " اگلج عذورة خابرني نسر يگلي اريدك بس لايرفض نهائي "

رديت " لتخاف مايرفض "
ضحك " ياالله يعني واخيرا بس شغيره "
رديت " بعدين احجيلك "

اجه حسام وجان متوتر ..
رغم مامقتنعه بشغله الخطوبة .. بس قررت اطلب منه نبقى بفترة خطوبة الى ان ينتهي علاجي احسن الي واله ..

سلم عليه نسر وبدأ يحجي .. جانو بيداء وماما گاعدين ومهيمن جان موجود ..
" شوف خوية .. اني من وافقت عليك لان واثق انت غير عن اي احد .. ولسا ماشفنا منك الا كل خير .. اهتمامك بعذراء جان واضح وفهمت هالشي بس گلت احتمال يريد يكفر عن الماضي ويفتح صفحة جديدة
بس يوم عن يوم تثبتلي حسن نيتك.. في حال انخطبتوا وتزوجتوا عندي شروط ..
اختك ماتحظر ولاتوصل لا هنا ولا بزواجك ولاحتى البيتك ..
تحط بيت بعيد عن اهلك لان اكيد تلگيلها حجة بيوم وتأذيها ..
اذا صار اي شي ولو تأذت شعره منها انت محاسب امامي مو غيرك ..

ابتسم " كل الكلت عليه يصير والبيت شفت مشتمل قريب على المستشفى راح اخذها تشوفه ونأجره .. اما مريم فأني اصلا معتبرها ميته شلون تحظر زواجي بعد اني ماعندي اخت ومتبري منها يعني اطمأن عذراء بحمايتي "

اتنهد نسر " وهذا الاتمناه .. حدد موعد المهر مشيه وهالسوالف مااريدها لان انت مو غريب عنا .. بقت الشغلات الباقية بين امي وامك الماعرفنا لسا رأيها ولو هو مبين "

حسيته خجل من كلام نسر… وتعذر نيابة عنها ..
اجة مهيمن يرگص بوسط البيت ويهلهل ع كيفه
ضحكنا عليه اني وشذر ..
ولايكبر ابد ..

من طلع خابرني فرحان :
" عذورتي مااصدگ واخيرا راح البسج الحلقة وتصيرين حلالي .. "

ابتسمت " بقت شغله اريد احجي وياك بيها يله ارتاح "
رد " شنو احجي "
رديت " مو وكتها باجر من اداوم احجي وياك "

ثاني يوم لگيته منتظرني من الصبح ..
سلمت عليه ابتسم " صباح الانوار .. طالعه حلوة "
ابتسمت " شنو هالمجامله متشوف ذبلانة ياحلاه "
رد " وربي عبالك مليكانه صايرة صح خدودج قبل حلوات والغمازة بيهن تبين اكثر من تضحكين بس هسا جسمج يخبل "

رديت " احم احم ترى احنة بالمستشفى وبعدنا ممخطوبين ترى "

ابتسم " مو بيدي اعذريني.. صدك شنو الحجي "
رديت " مو وكته هسا دوام ومراجعين خليها من نطلع"
ضحك " وترديني اصبر للظهر غير حتى مراجعين مااستقبل من التفكير "

اخذني الغرفه رحنا قبل ليبدي الدوام وتصير هوسة ..
گعدني يمه…
" تشربين قهوة ؟"
هزيت راسي " لا مااريد مااشتهي اي شي "

گعد گبالي وسألني " احجي شنو المخوفج ليش احسج مافرحانه مثلي "

رديت " مو هيج الحجي حسام .. ماتعرف شلون عانيت بسبب تجربتي ذيج .. ومااريد اكرر الغلط. . قبل يومين خابرني معتز ؟"

فتح عينه وتعصب " خابرج؟؟ منين وشلون ؟"
رديت " من رقم دولي من زمان يراسل وتوقعت انت الصراحة وحتى ماارد كنت اكتفي بالقراءة . بس الظاهر اكو من يوصله اخباري .. يعرف عن مرضي وطلب يرجعلي .. وبعدها طلع يعرف بيك تريدني اتعصب وكالي تريد تنتقم مني انت ومريم مو حبا بيه خطبتني "

حسيت دمارات وجهة بينن من كثر ماتعصب..
" وانت صدگتيه مووو ؟"
رديت " ماادري الصراحة ومااكذب عليك ماعدت اثق بأحد "

رد بعصبيه " لعد ليش وافقتي عليه ليش ؟ ليش مارفضتي اذا عندج هيج شكوك .. تصدگين بانسان باعج علمود مصلحته وتشكين بيه "

رديت " حسام منو گلك صدگت .. اخر واحد اصدگ بي هو .. بس ماانكر دخل الشك بكلبي "

باوعلي بعتب " ليش من صارت سالفه مريم لسا.. اذيتكم بشي .. صرت وياها ضدكم ؟ مو شهدت عليها بالحكمة وحكمت الصالحكم .. كل هذا وتشكين .. "

فتح دگم قميصه .. فتحت عيوني. .
" شتسوي انت " صرت اباوع للباب خاف واحد يدخل

" باعي هاج باعي شلون حافر اسمج بگلبي من زمان "

باوعت جان واشم اسمي على صدره ..
رجع كمل " من وشمت هالوشم جان هو وياي للعلم "
واذا هالشي مايخليج تصدگين هم .. اخذج الاي مكان احلفلج ..

رديت " خلص لاتتعصب ماكو داعي بس ترى حقي قدر موقفي "

فرگ وجه وگام.. فتح ثلاجة صغيرة بغرفته طلع منها بطلين مي .. انطاني واحد والثاني شربه كله "

ابتسمت " عاد كون انطفت النار "

باوعلي وصفن عليه لمدة دقايق بنظرات تفسيرها مبهم .. عتب .. حزن .. لو حب وعشق ..

نظرات اول مرة اشوفها بعيون شخص يباوعلي ..
رد " نار حبي مستحيل تنطفي .. بس القاهرني اريدج تثقين بيه .. تحسين بيه وتحبيني مثل مااحبج "

رديت " منو گال مااحبك .. والا شلون اوافق ارتبط بيك بس اعذر وضعي انت بالنسبة الي .. بصيص ضوء بوسط عتمة حياتي .. لهذا اگلك انطيني فرصه خلينا هسا بس خطوبة .. وبعدين كلشي يجي وحدة من غير مانخططله "

هز راسه " اذا يريحج هيج خلص حاليا بس خطوبة ولو مااريدج تبتعدين عني.. حتى مشتمل منتظر تشوفيه واجره . لان رتب وحلو وقريب ع المستشفى مايتفوت بصراحة "

رديت " شنسوي يمكن مامقسوم النا "
رد " لا ماافوته احتمال اجره من هسا وشويه شويه ااثثه الى ان الله يهديج عليه "

ابتسمت " گول ان شاء الله "
رد " ان شاء الله "

رحت الشغلي والتهيت بي رغم مايخلوني اتعب ابد ..
من كمل دوامنا اصر حسام نروح نشوف المشتمل "

كان قريب كلش ..

رغم صغره بس حديقته كلش حلوة .. ترتيبه حلو ومرتب .. المطبخ مفتوح ع الصاله
وبي غرفه وحمام ومخزن مساحته زينه . قررت اسويه مطبخ حار لان مااحب ريحة الاكل بالبيت ويبقى ذاك مجرد ديكور ..

وصار حسام يخطط يسويلي فتحه تهويه بالمخزن ويخليلي بي مفرغة هواء ..
وهنا هيج يجيب .. وهنا هيج .. اندمجت وياه بتخطيطاتنا لدرجة تخيلت نفسي متزوجين.. احساس كان كلش حلو ..
وخاصه من كلي بس نعقد نطلع نشتري ونجهز للبيت وكلما نشوف حاجه حلوة نجيبها ونرتبها ..

فرحت وتحمست…
وفعلا اجر البيت بسرعه ونطاه عربون .. قسم المفتاح وانطاني واحد الي وواحد اله من هسا ..

طبعا اجت امه بس مبينه مجبورة مااعرف ليش .. يمكن بعده الماضي بداخلها رغم احنة المفروض ماننسى

ماحجت شي ابد .. بس نطتنا الفلوس وحددت المهر وراحت .

اتنهدت هنا " يمعودة هاي من هسا گالبه وجهها همزين ماتگعدون وياهم "

مااهتميت الاي شخص بس للانسان الگدر يدخل البسمة الحياتي رغم وجعي والمي ..

للسوك ماگدرت انزل لان اعرف نفسي اتعب .. اكتفيت بذوق شذر ونسر وماما هم الراحوا اشتروا الذهب ..
شذر جايبتلي فستان وردي فاتح كلش .. بس يخبل موديله وخاصه اني ضعيفه راح يطلع عليه كلش حلو ..

اما شعري الي كان الم بالنسبة الي كلما اشوفه ..
خيطتلي اله توربان بنفس لون الفستان .. يخبل وبي شغل من جهة وحدة ..

وجهي رتبته هنا وبالمكياج خطتلي حاجبي ..
ورسمتلي عيني وظهرت ملامحي الي اخفاه المرض اللعين ..

طلعت كلش حلوة من اشوف الكل فرحان ويرتب ويبدل .. نزلن دموعي مااتحملت المنظر..

ماعزمنا احد .. احتراما الشذر خطية علمود بنت عمها
بس اجت ام حسام واخواتها ..

اخواتها الكبار من شافني صلن ع النبي ..
بس اختها الجانت عايشة عندها مريم .. صارت تحجي وكأنها متعمدة ..

" صدك جذب ام مريم مالگيتوا الا هاي هم عليله وع ساعه تموت وهم صلعه بله شنو شاف منها "

خاله تأيدها بحركة بيدها بمعنى " شعليه اني "

انقهرت حيل لدرجة حسيت گلبي راح يوگف ..
صاحوني ودخلت اعقد .. خلت شذر ع راسي مثل الشال كبير ابيض ..

عقد السيد بالاول اله .. للحظة ردت اغير رأي وابطل صدك مالي حق اظلمه ..
بس من اشوف ابتسامته وفرحته وهو يردد بعد السيد الكلام .. اتراجع ..
عقدولنا وكملنا.. طلع السيد ..
وبقينا الوحدنا .. رفع الغطوة عني وابتسم .. باس راسي
" طالعه تخبلين "
همست " مامتندم ؟"
اتقرب وباسني يم اذني وهمس " جان ندمت لو ماخطيت هالخطوة .. "

لبسني الذهب والحلقات .. اكلني كيك وعصير…
بقينا گاعدين بس نظراته امه وخالته اكلتني ..

احس روحي اختنگت وانگطع الهوى عني .. حسسني بعدم الثقه رغم من شفت روحي بالمراية طالعه حلوة فرحت .. بس كلامهن صحيح… لو تزوجنا هو هسا صار حلالي شلون راح انزع الحجاب يمه وشراح يكون شكلي بنظره .. نظراتهن. زعزعت الثقه البداخلي وخلن مني انسانه ضعيفه .. لدرجة نسيت الفرحة العايشتها وبقى بالي يمهن ..

دخت حيل ومااتحملت بعد ..
همس " بيج شي حبيبتي شو وجهج تغير "
رديت " اريد اگوم مدري شبيه "

بعدني ماگمت وگعت وتخربطت .. فتحت عيني كلها داير مدايري . بس احس الساني ثگل مااعرف شبيه

حسام مگابلني ويمسح بوجهي ..
بقى يتلمس خاف مسخنه .. وصل الراسي صارت بيه رهبه سحبت ايده بساع ..

نسر واخواتي وامي كلهم خايفين عليه .. گمت " مابيه شي دخت بس يمكن لان تعبت .. "

اشر نسر يطلعن وخلونا وحدنا اني وياه ..
حضني وباس راسي " خفت عليج والله "
باوعتله " شلون راح تگدر تتعايش وي شكلي "
رد " بكل حالاتج احبج والله ليش عبالج يهمني الشكل وهسا شناقصج انت .. ابد لاتخلين هالفكرة براسج .. لو اني بمكانج وانت تحبيني راح تگولين هيج بي ومااريدة
هزيت راسي " لا طبعا "
حضني حيل وخلاني ارتاح واحس بالامان .. هذا الحب الي جنت ادور عليه .. رغم شگد تأذيت من معتز بس فرحت هسا لان الله نقذني منه وخلاني بالمكان الصحيح… عسا ان تكرهوا شيئا وهو خيرا لكم ..

شذر :
الصار العذراء رعبنا .. صارت مثل الخشبة .. رغم جانت فرحانة وطالعه تخبل .. مابطلت اقرأ ايات عليها من عين خالته الحسام الي مانزلتها عنها ابد ..

من اطمأنينا عليها طلب نسر نخليهم وحدهم .. وطلع يجيب عشا ..
بدلنا ونظفنا البيت وعصافير الحب بعدهم بالغرفه ..
اخر شي طلع حسام ..
" عذراء تريد تبدل واني راح انتظرها بالاستقبال "
ردت خاله " نسر يگول خلي يبقى يمنا ع العشا .. الولد هنا كلهم وهذال هم راح يجي .. "

بقى حسام ورحت العذورة جانت تبدل.. لبست كلبيه وغسلت وجهها .. لفت شالها ..
صارت تحجيلي عن خالته وامه .. هديتها وكلتلها مادام الگمر وياج شلج بالنجوم ..

ضحكت " صايرة تنطين امثال .. "
ابتسمت " اي شعبالج ديله عيني لاتقهرين نفسج دشوفيه شلون خايف عليج وتخبل من وكعتي شالج ويفتر بيج .. حتى امه حجت عاط بيها وسكتها "

اتنهدت " همزين بيتنا وحدنا بس هم اخاف يتدخلن بحياتنا "

رديت " لاتخافين حسام شخصيته قويه مبينه ومايخلي احد يأذيج "

كملت وطلعت شافها ابتسم بسرعه نظراته الها وحدها تفسر الحب البداخله الها ..

سوينا عشا هنا البنات كلهن وازواجهن… وباتوا كلهم عندها ومن الصبح كلها راحت .

عذورة مامداومة نايمة..
بديت بحملة تنظيف .. نزلت اسراء مبدله وانيقه والغريب مخليه كحل ومكياج خفيف ..

صرت اباوع زين خاف اني مااشوف . انتبهتلي ضحكت " هااا حلوة ؟"
رديت " اي حلوة "
ردت " هيج تغير بسيط حبيت اغير "

رادت تخفي تغيرها بس هالشي واضح اكيد اكو حب بحياتها والا مستحيل هيج تتغير بيوم وليلة ..
فرحتلها لان هالشي خلاها تتغير للاحسن ..

خاله تطبخ واني بلشت بالبيت .. دنو طبعا وياي كملت امتحانات البكلوريا ..
ملوكة نايمة يم نسر ..

رن موبايل خاله ماتسمعه اخذته الها ..
لااراديا باوعت .. مكتوب ام هيام ..
بسرعة انقبض گلبي ..

نطيته الها شافته وباوعتلي " شتريد ؟؟ بس لاتسأل على ملوكة "

ردت عليها وصارت تحجي " لا والله دادة مااجت ولا شفناها . وابوها شلون خلاها… يستار شبيها هالبنية تخبلت .. شلون هيج تنزل راس ابوها ونسر اصلا مايريدها وين تروح يعني ؟"

سدته واني عيني على حلكها اريدها تنطق ..
سألتها ومااتحملت " هديل شبيها ووين راحت ؟"

ردت بتوتر " امها تگول كسرت كلام ابوها ولمت غراضها واجت لهنا .. وابوها متخربط وحالف ماترجع بعد ومتبري منها .. "

حسيت الخبر مثل الصاعقة اجاني ..
ركضت گعدت نسر وهو نايم ..
فز " شكو ؟"
رديت واني معصبه " وحق الله لو اجت واستقبلتها ماتشوف خيالي بعد هالمرة تخسرني نسر فهمت تخسرني "
رد " هي منو شبيج ؟"


يتبع……

///// #البارت الرابع والســـبعون /////
ج2


حسيت الخبر مثل الصاعقة اجاني ..
ركضت گعدت نسر وهو نايم ..
فز " شكو ؟"
رديت واني معصبه " وحق الله لو اجت واستقبلتها ماتشوف خيالي بعد هالمرة تخسرني نسر فهمت تخسرني "
رد " هي منو شبيج ؟"
رديت " هديل منو غيرها ؟"

گام من نومه مفزوع " شجابها لهنا "
رديت " مهزومة من اهلها امها خابرت الخاله "

گام بسرعة حجة وي خاله .. حجتله الحجته امه ..
دخل جاب موبايله واجه ..
" هاي مو صاحيه ابد ابتليت بيها خوما ابتليت "

خابر الابوها .. رد عليه يعيط ويتهم نسر عود هو الگايللها تعاي ..

نسر تعصب عليه " اني مو اجيتك وطلكتها بعد شلون اكلها تعاي .. اذا بنتك ماتگدرلها اني شنو ذنبي ابتليت اتزوجتها "

ابوها تعصب وگاله خليها يمك خدامة ذلها اكتلها شتسوي بيها سوي اني بعد ماعندي بنيه ماتت ..

طبگ التلفون بوجه نسر ..
صفنت بوجهة " وهسا شتسوي "

رد " خل توصل ونفتهم "
رديت " شنو توصل .. تحجي صدگ .. اذا خلت رجلها بالبيت ماابقى بي "

اتنهد " شذر شبيج وياي تشوفيني ميت على رجعتها بس انطيني صبر "

تركته ومشيت للمطبخ .. النار تغلي بيه اول مرة احس بهيج شعور ..
اندكت الباب توقعت هي اجت .. فتحت دنو الباب ..
دخلت وبيدها جنطتها وشكلها شحاله .

سلمت .. صارت عيني بعين نسر منتظرة شيحجي ..
گام من شافها " انت شلون تطلعين من دون علم اهلج "

ردت " انت مو كلتلي احجي وي ابوج وتعاي .. گلتلك مااريد اي شي منك بس بنتي "

عاط بيها " گلتلج احجي وي ابوج مو انهزمي منه .. وبعدين حجيت هيج ردت اعرف كرامتج لوين توصل لان ماكو وحدة تقبل تعيش خدامة وبدون عقد .."

بقت تبجي وتتوسل " حرام عليكم گلتلك انطيني بنتي ماقبلت .. وين اروح هسا .. كلشي مااريد منك حتى لو تأجرلي بيت صغير عسى ما غرفه ومطبخ واني وبنتي نبقى بي "

رد عليها " من شوكت هيج مهتمة البنتج "
ردت " وليش مااهتم مو بنتي هي .. حرام عليك تحرمني منها "

اتنهد " خلي ابدل واخذج الاهلج اكيد ابوج يقنع بي احجي وياه "

ركضت تتوسل بي " لا حباب والله يموتني والله .. خاله حبابه لاتسوون هيج بيه .. اعيش خدامة الج بس خليني هنا .. وانت وشذر مالي علاقه بيكم ولااوصللكم .. او خليلي بيت وحدي اني وبنتي "

سكت وبعدها رد " هسا ادخلي ويصير خير خلي اشوف حل "

انصدمت من حجة هيج… هي دخلت غرفتها واخذت بنتها الحضنها ..
مااتحملت درت وجهي بسرعة ..
وصحت " تعاي دنو ماما لمي ملابسج "

اجة .. وراي " شذر لاتكبريها خليني اتصرف اهدي "
ضحكت " شأهدأ .. هي جايه ومتأكدة ماتشمرها بالشارع .. وتعرف بغيرتك ماتسمحلك الهيج جايه ومرتبه وضعها. سبق وان گلتلك اذا داست رجلها البيت اني اطلع .."

رد " اهدي ادزها يم بيداء مااخليها هنا "
رديت " ماتفرق عندي المهم رجعت الحياتنا .. كلتلك تخسرني وهاي فعلا راح تخسرني .. اخذني البيت عمة اني ودنو .. وهاااا دنو وياي ولاتحلم اخليها هنا "

حجة شكد وحاول يقنعني ماقبلت ..
" شبيج هي محرمة عليه ومطلگها واذا تبقى فحالها حال اخواتي .. "

ضحكت " الى متى ؟؟ يوم يومين ثلاثة .. وتالي تبدي حيلها وتسحبك الها.. مو ردت تموت بسببها شلون تقبل ترجع شلون .. طعنت مرتك بشرفها شلون تقبلها ترجع "

اخذت غراضي وطلعت وخاله وراي تكلي ارجعي لاتخربين بيتج ..
درت وجهي " انخرب بيتي من يوم الجبتيها لهنا انت حتى ماساندتيني وگلتي مااريدها بالبيت بقيتي ساكته"

وصيت دنو تروح البيت مشتاق ..
حتى ماقبلت ياخذني هو ..

رحت البيت عمة ..
ااااه يهالبيت شوكت استقر بيك بدون مااجي زعلانه
خابرت خاله حجيت وياها ..
جانت حالتها فد مرة خطية ماتگدر تحجي .. سكتت ماشكيتلها همي ..
سالتها شبيج ..
" لج امي هاي الاشهر الاخيرة تعبتني حيل ودور شكل عندي ضغط حمل .. الدكتورة گالت لازم نسويلج عمليه لان الضغط يكتل الطفل ..
انطوني علاج وابر .. وحددتلي موعد العملية ..

فرحت " يعني اخيرا راح يجي ولي العهد .. "
ردت " الله كريم "
رديت " لعد اني خيطتله ملابس تخبل اجيبهم واجي يمج .. "

دزيت رساله اله حتى ميكول طلعت من وراي ..
" رايحة الخالتي مريضه وعلى وشك ولادة "

رحتلها جان السيد خطية مبتلي بالبيت .. من اجيت سلم وطلع ..
گال " اخذن راحتجن واي شي يصير خابرني "

طلع السيد نظفت البيت كله ..
هالمرة زينب گامت وياي زينه .. وحبت دنو لان كم مرة اجي واجيبها وياي ..
رتبت البيت سويت كبة وخليتها بالمجمدة تفيدها عشيات ووقت العازة ..
جهزتلها كلشي .. بس بالي يم نسر وسوايته وياي ..

خابرتني عذراء ..
" انت وينج شلون تطلعين من البيت لج هي المفروض ماتطلع "
رديت " اخوج اختار هيج معناها حبي مو كافي حتى يختارني "

ردت " هو وينه اخوي .. اخذ ملابسه كلها وراح يم بيداء وانت ماهي .. وهي ماخذه راحتها ..
اني هم ماابقى وگلتلج "

رديت " وين ترحين قابل هي خلتنا امام الامر الواقع "
ردت " لعد خلي البيت الها وبعد اذا اجت اسراء هم ماتقبل ..

اني هم راح اجي يمج "

سديته منها واتنهدت " اااه نسر اااه شسويت بينا "
شافتني خاله حست بيه ..
" شبيج مو على بعضج صاير شي ؟؟"
رديت " اوووف خاله مشكلتي مااگدر اضم عليج "

حجيتلها كلشي صارت تهدأ بيه ..
" لاتقهرين نفسج ليش انت ماتعرفين نسر .. مو معناها خلاها عندة يعني يحبها .. بس شلون تعتبر ام بنته يشمرها بالشارع ؟؟
اذا هو انت غريبه عليه وماخلاج بالشارع جابج وحافظ عليج .. مو دور هي هم گرايبه وهم ام بنته "

رديت " لاتدافعين خاله .. اني مو حاقدة لدرجة احرم ام من بنتها ولا انانية .. بس هديل دمرتنا .. ماگعدت وسكتت ورضت مثل مارضيت .. طمعت ورادته بي الها بالاول طعنتني ورادت تخلص مني وبعدين سوتله محبه حتى تبقيه بس الها .. يعني اخطائه مو مال واحد يشفق عليها .. شلون بعد امن الحالي والنسر وبنتي منها شلون ؟"

ردت " انتظري وشوفي وبعدين نتصرف اذا قبل سكتنا فهسا عندج اهل وجد ياخذلج حقج .. بس لاتتهورين وانتظري خلي نشوف شيسوي "

سمعت كلام خالة وانتظرت.. بس مستحيل اخليه يشوفني او يلمس شعرة مني اذا ماسوة حل الهاي المهزلة ..

خابرتني عورة العصر " انت وين راح اجيج للبيت جابني حسام "
رديت " اني ببيت خاله خلي انطيج العنوان وتعالوا اخذوني وياكم "

اجت طلعتلهم للشارع.. ورحنا البيت عمة ..
باوعلي حسام " نسر خطية على كيفج وياه .. والله هسا شفته مقهور وگاعد ببيت بيداء حتى مارايح لهناك"

رديت " من ايده خوية .. محد كاله خلي نفسك بهيج موقف "

رد " اذا هي فرضت نفسها عليه شيسوي يعني "
رديت " واذا انت بمكانه شتسوي ؟"

سكت مارد باوع العذراء وغمزلها ..
ماگدر يحجي ويكسر بخاطري ..

وصلنا للبيت دخلنا .. راد يروح ..
" ادخل اتعشا يمنا "
رد " لا مايصير ونسر مموجود .. اني رايح اي شي يصير خابريني "

هزت راسها وابتسمت ..
باوعتلي " شگد جنت عمية لعد .. ضيعت سنيني كلها وي واحد مايستاهلني "

رديت " وهاي الله عوضج "
ردت " بس كون الحگ اتنعم بهاي النعمة "
رديت " ان شاء الله بس انت لاتگطعين الامل فكري بمستقبلج وياه وبس "

سويت عشا وتعشينا .. عذورة راحت نامت ..
فرشنا كلنا بالاستقبال مااگدر اعوف عذورة وحدها كلشي يصير ..

سمعت الباب نفتحت طفرت ..
عرفته هو .. باب المطبخ مقفول ماگدر يفتحه ..

دگها . همست " روح نسر .. حلفت ماتشوف وجهي بعد وكلتلك تخسرني وماسمعت مني ..
عبالك اني شذر القديمة .. الكلما تأذيها تسامحك وترجع بس هسا لا انسى اسامح .."

رد " وروح ابويه من طلعتي بسرعه طلعت ورحت يم بيداء .. لاعبالج راضي على طلعتج بس گلت هنا الج احسن لان هناك تنقهرين لو بقيتي والا مستحيل اقبل تفارگيني "

رديت " بس افترقنا وانت رضيت بهذا الشي . اتحمل الطريق الاختاريته .. الك مهلة كم يوم ماسويت حل احجي وي جدي وانهي كلشي تعبت كافي لهنا وبس "

رد " من يمتى تهدديني بجدج شذر مو ذولة الصاروا ضدج ؟"

رديت " جنت اگول انت اهلي بس انت بعتني ماحسبت حساب الكرامتي وهسا هي الربحت مخليها بالبيت واني الطلعت"

رد " شنو هي الربحت قابل اشمرها بالشارع شلون تقبليها عليه"
رديت " وانت شنو متكفل بيها ماعندها عمام خوال شعليك بيها .. "
رد " يعني ماتفتحين الباب "
رديت " ولا راح تشوفني "
رد " براحتج "

تركني وراح گعدت بالمطبخ ابجي .. معقولة هيج نسر تسوي بيه ..
اجت عذراء شافتني " عفيه عليج لتتنازلين نسر الاعرفه مستحيل يستغنى عنج وراح يسوي حل لاتخافين "

رحت نمت .. ثاني يوم خابرتني خاله من الصبح ..
گالت تخربطت وراح يدخلوني عمليات ..

اتخبلت من سمعت بس لا راح تدخل ومااشوفها خفت يصير عليها اي شي ..

اجة حسام ياخذ عذراء الصبح طلبت منهم يوصلوني للمستشفى..
دنو اخذتها وياي ماامن اخليها عند احد ..

وصلت لهناك جانت مخليها بالردهة بمستشفى خاص ..
شافتني فرحت ..
" خفت ادخل ومااشوفج "
" شمنتظرين هسا "
" الدكتورة تجي "

اجة السيد دخل سلم .. صار يهدي بيها ويقرأ على راسها ايات وهي خايفه وتوصي بي ..
ضاج خطية ورد عليها " لاتگولين هيج . مااريد اموت مرتين .. مو انت الحييتيني بعد ماتت ليش تحجين هيج "

طلع السيد يشوف الدكتورة اذا اجت ..
لزمت ايدي خاله..
" باعي شذورة… اريد اوصيج "
رديت " خاله كافي مااريد اسمع ليش تحجين هيج والله مابيه حيل خسارة بعد .. كافي عذورة من اشوفها تتوجع ابجي واخاف اخسرها مو دور انتي تحجين هيج"

ردت " كلشي بيد الله بس اسمعيني .. ابني مو تتركيه وماتسألين عليه . واكو شغله تريدج تعرفيها ماردتج تعرفين خاف تضوجين… بس هسا لازم اكلج ..
امج… ..

استغربت " شبيها بس لاقتلها خالو "

ردت " لا بس انهزمت "

استغربت " انهزمت شنو خاله .. مو گلتي مسلسل الباب وقافله بقفل بعد شلون ومنو الساعدها؟"

ردت " ماادري ماادري حتى سعد تعاركت وياه وحجيت عليه وحلفلي بالقران .. مايعرف شي عنها.. ويكول فص ملح وذاب . عبالي قتلها گال صح اذتني بس مستحيل اقتلها ولو ردت من البدايه ماانتظر شهور لابل سنه ..

استغربت " وين راحت ومنو ساعدها ..

اكيد تواصلت وي البنات. بس حتى موبايل ماعندهن .. احس راسي يريد ينفجر من التفكير .. لو ميته فعلا كان عرفنا ماكو شي ينضم بس هي وين راحت ؟؟

اجت الدكتورة ودخلت خاله العمليات .. اجة خالو سعد ومرته .. بقينا منتظرين ..

قتلني الفضول واني صافنه عليه .." معقولة اخذها الغير مكان وما يريد يگول "

اتقربت منه " ماما وين ؟"
باوعلي " امج اختارت تنهزم وتختفي انسيها احسن الج لان مااعتقد بعد تظهر نفسها والكل مايريدها "

رديت " وليش احسك تعرف شي عنها وساكت "
اتنهد " روحي بابا روحي امج ماتت بالنسبة الي ومااهتم لو شنو يصيرلها "

سكتت بس بداخلي احس يعرف والا هو سنين طويله يدور عليها مستحيل يتركها تنهزم بسهولة ..

طلعوا صاحوا اسم خاله .. ركضنا للباب ..
انطونا الطفل .. ملبسيه الملابس الخيطتهن اني ومطرزة عليهن اسمه الحسن ..

اخذه السيد واذن بأذنه وكبر وسماه الحسن ..
اخذتة مرت خالو وراحت للغرفه ..
دنو هناك بقيتها بالردهة .. شوية وطلعوا خاله .. عدلت حجابها وغطيتها…
رحنا للغرفة وياها ..
جانت دنو تبوس بي تحب الاطفال كلش هي اختها ونشيل بيها من مكان المكان ماتخليها ابد بالگاع تموت عليها ..

للظهر خابرت عذورة تمر ناخذ دنو وياها للبيت .
اجه حسام اخذها ..
وصيته ياخذهن يم بيداء لان راح ابقى يم خاله بالمستشفى..
رد " هو هم هيج لان عذراء صايرة ماتتحمل دوام اخذتلها اجازة بدون راتب بعد مااخليها تداوم نهائي حالتها ماعاجبتني اخاف تنتكس ومناعتها تقل .. "

سألته " ليش احس نبرة صوتك بيها شي ؟ "
رد " لا بس احسها تعبانه كلش لازمها راحة "

اخذ دنو وراح وبقيت افكر بكلامه .. بس لا عذورة بيها شي ومايگول ..

رجعت للغرفه گالت مرت خالو ..
" شذر اخذي الطفله وروحي البيت السيد هناك العلوية تلگيها واني ابقى يم سماهر "

فاقت خاله وهي تحجي بأسمي " شذر امي وينج ابني زين مابي شي ."

اتقربت منها وبست راسها " يخبل خاله يشبهج حيل "
ردت " لاتعوفيني ابقي يمي "
ضحكت مرت خالو .. طلبتج بلسانها بعد مااگدر اكول لا راح اخذ الطفل وياي للبيت…
وانت سيد خلي البنات عند العلويات عود الصبح نروح كلنا سوة للبيت ..

اخذوا الطفل وطلعوا وبقيت وي خاله .. بعد ساعه گعدتها وغسلتلها وبدلتلها .. جانت عطشانه شربت مي والسيد راح جابلها شوربه دافية ..

لليل خطية بقى بحديقه المستشفى ماراح يكول مااكدر اعوفها خاف تحتاجون شي ..

باوعت للموبايل ماكو اي مكالمة .. حتى ماسأل على خالة .. بس لاهو الزعلان فوكاها ..

للصبح خرجتنا الدكتورة ..
طلعنا للبيت مرينا على مرت خالو والطفل اخذناهم ..

جان السيد طاير من الفرح .. دخلنا للبيت العلويات كلهن هناك وحايرات شمسويات ..
السيد جايب ذبيحة وگصاب ذبحوا فدوة جوة رجل خاله والطفل ..

دخلناها للغرفه ترتاح ..
وخلينا الطفل بمكانه .. اجن زينب ومروة تقربن يباوعله ويتلمسن بخده…
باوعت الزينب شلون تباوعله بحب ..
سألتها " حلو مووو؟"

باوعتلي وابتسمت " اي يخبل "
ومن هذا اليوم ذاب الجليد البينها وبين خاله .. وطبعا خاله بعقلها وكلبها الكبير عرفت شلون تكسبها كـ بنت الها ..

رجعت للبيت تعبانه…
سمعت بعذورة متخربطة كلش ..
خابرت بيداء ..
" هلو ام مهيمن شلونج "
ردت " هلو شذورة .. شلونها خالتج "
رديت " زينه بس بالي يم عذورة "
اتنهدت " عذورة احسن هسا "
سألتها " وين هي هسا ..
ردت " عندي هنا . وزوجج هم ابد والله ولا وصل لهناك صاير التجمع كله عندي ومرات هذال وهنا يجون .. "

رديت " من ايده ليش عاجبه هالوضع تشتتنا كل واحد بمكان .. شمنتظر مايسويلها حل "
ردت " شيسوي .. تريد بيت وحدها وتكله معليك بيه بعد .. وساعه يكلي اجيبها يمج اخليها . ومهيمن من سمع تخبل . وكالي اذا اجت ماتشوفين وجهي بعد قشمرتني وتهمتني وتجيبيها للبيت "

اتنهدت " خلينا نشوف شلون يحلها هم اني اذا بقى هيج احجي وي جدي وانهي كلشي الصراحة تعبت من نسر .. "
سألت " ويهون عليج "
رديت " مثل ماهنت عليه .. صح احبه ومااگدر اعيش بلاه بس تعبت بيداء .. اريد استقر مثل الناس شنو ذنبي عمري راح يصير 30 واني ماشفت يوم حلو .. عاد انهي كلشي وارتاح احسن مادام هيج بايعني "

انتظرت وماكو جواب ..
معناها اختار طريقه .. قررت اروح الجدي احجيله واخلص ..

طلعت شفت هوسة بالشارع .. استغربت ..
سألت مرة بالشارع..
گالتلي " خطية ماسمعتي يگولون رسميه الدلالة اندعمت وحالتها خطرة ماعرفت ماتت لا .. "

تخبلت من سمعت .. رحت البيتها ركض .. تذكرت كل ذكرياتي وياها .. كبرت وهي تشتغل ولدها كبروا وبعدهم معتمدين عليها حتى اولادهم هي تصرف عليهم جابتها تعب بتعب من يوم الزوجها توفى وتركلها اولاد ترعاهم .. من بيت البيت ومن شارع الشارع كلها ساعدتها وكلها الها فضل عليهم .. مااذت احد بيوم ولاجرحت احد ..

وصلت للبيت سمعت عياط اقشعر جسمي .. معناها
توفت .. دخلت ودموعي تنزل .. بنتها ملخت نفسها وتصيح منو الي .. الجبيرة تزوجت بس هاي بقت خطية
الناس كلها الواگفه تبجي عليها ..

گعدت وابجي وكانه راحت عمة خديجة مني اليوم..
اتذكر گعداتنا سوة ..

شلت راسي شفت زمن ومرت ابوها.. تبجي مثلي واكثر
تقربت مني وحضنتني " لج شذر اليوم احس امي التوفت مو رسميه .. "

باوعتلها " لج زمن بقيتي انت الي من ريحتها لاتكطعين بيه "
هزت راسها " شبيدي عليج بس صارت هواي اشياء بعدين احجيلج عنها .."

خابرت البيداء بلغتها بوفاة رسميه .. گالت احجي وي امي ونجي خطية جانت طيبه وحبابه ..
گعدت تحجيلي من يرحن البيت عمة شتسوي الهن ..

رجعت للبيت مكسورة .. مثل كسرتي بعمتي ..
اباوع للبيت وحياطينه .. كل شي بي يروح يوم بعد يوم حتى الذكريات ..

بعد كم يوم واني بحداد وماصحيت من الصدمة… عشر سنوات بين وفاة عمة ورسميه .. وعبالك البارحة ماتت عمة خديجة مو من زمان لسا وجعها ماطفى بگلبي ..

شبيه الموت كام ياخذ بينا واحد ورى الثاني ..
موت وليد وعمة خديجة كانوا صدمة بالنسبة النا لان ممتعودين ع الموت ..
بس هسا احس الموت صار مثل الولادات بحياتنا ..

خابرتني هنا گالت حنجيج اني وهذال ..
حضرت العشا .. اجو ووياهم دنو .. التمينا سوالف وضحك..
زوجها انسان كلش حباب واخلاق رغم اكبر منها بهواي بس يحبها كلش ..
والاهم يعتبر جود وفهد اولاده ..

هنا :
هذال بالنسبة الي مو بس زوجي لا بل كلشي بحياتي
يحترمني ويحترم اهلي والاهم يحب اولادي وكانه اولاده ..

بكل عطلة ياخذنا للشمال نتونس ونرجع .. مفكرين هالعطلة كلنا نروح ..
نسر وشذر وبيداء والجهال .. وحسام وعذورة حتى هم تغير جو وترفه عن نفسها ..

اجينا الشذر بالليل نقنعها تروح ويانا ..
نسر مثل طفل تايه من امه . هيج حاله بعدها.. اتخلى امام الامر الواقع . اجت هديل وفرضت نفسها عليه مرة ثانية ..
بكل مرة شذر تتنازل وتوافق .. بس هالمرة عجبني موقفها وقوتها.. صعب المرأة تتحمل وحدة تشاركها بزوجها .. واذا اني مااتقبلته النفسي شلون اتقبله الها حتى لو كان هو اخوية ..
بس مااحب اشوف مراة تنظلم من زوجها وتسكت ..

حجيت وياها دنو فرحت وصارت تتوسل " ماما عفيه خلينا نروح والله امنيتي اروح لهناك واشوف المصايف واتونس "

انقهرت شذر ع دنو وادري بيها ماتكسر بخاطرها ..
گالت بلغي نسر واذا وافق نمشي ..

حجيت وي نسر وافق بس گال ديروا بالكم عليها ولا تخلوها تحتاج شي .. شال فلوس ووصاني انطيهيا
رغم يعرف هي مامعتازة وعندها ..

بيداء ماتحب هيج طلعات .. بس مهيمن واخوانه راحوا ويانا وحسام وعذورة ..

طلعنا سيارتين بعد ماهذال رتب كلشي السفرتنا والاقامة ..

اجرنا شقة هناك كلنا بيها بس نبات بيها .. نطلع الصبح نرجع وكت النوم بس ..

شذر :
كل يوم يخابر نسر وانطيه دنو تحجي وياه يطمأن علينا.. وفوگاها يگلها بوسي ماما وهي تجي تبوسني

حسام وعذورة مثل عصافير الحب .. يخاف عليها من الهوى .. حتى مي بارد ماينطيها خاف تتمرض ..
فعلا كان انسان وفي ..
والمشكله شيشوفون تحفيات لو شغلات حلوة بالمول ياخذون البيتهم .. حتى هذال گام يحجي عليهم يگلهم مابقيتوا مكان بالسيارة شلون نرجع وعندنا غراض ..

من رجعنا خابر نسر بالطريق..
باوعت دنو نايمة وكلها نايمة اضطريت ارد ..
" الو "
" اااااافيييييش يااابة .. ليش حارمتني من هالصوت "
رديت " انت الاختاريت .. سبق وان خيرتك وماسمعتني عبالك مثل كل مرة انسى واسكت .. "

رد " واهون عليج "
رديت " مثل ماهنت عليك "

اتنهد " والله ماشايف خلقتها من اول يوم اجت .. حتى من اخذ ملوكة للعلاج لو اريد اشوفها امي تجيبها بعربانتها البيت بيداء .. صدگ ماكلتلج اجو خطابة الاسراء ..

انصدمت .. بس ماردت احجي وياه ويتوقع انه راضيه عنه .. سديته بسرعه منه وماانطيته مجال يحجي ..

جانت عذورة گاعدة بالصدر…
گعدتها وهمستلها .. " نسر يكول اجت خطابة الاسراء "

شهگت وفزت حتى حسام ارتبك عباله شو شبيها ..
" تحجين صدگ منو تعيس الحظ اقصد سعيد الحظ"

رديت " ماادري ماطولت وياه "
ضحك حسام " ليش ناصبات عليها عريف شلتاغ "

ضحكت " هاي سوالف عذورة هي گالتلك "

وصلنا البغداد بعد تعب ..
سأل حسام " عادي شذر بس نروح البيتنا ننزل الغراض واوصلكم بعدين "

رديت " عادي براحتك.. "

وصلنا للمشتمل .. نزل الغراض جان حيل حلو ومرتبه وكل الاثاث والصور والشغلات الجايبيها نازكة حيل ..

رجعوني البيت عمة وراح يوصل عذورة ..
اشتاقيت الاخواتي وجنت جايبتلهن .. هدايا اخذتهن واخذت دنو ورحت .
وهاي اول مرة اخذها وياي ..

رحبوا بيه كلهم .. حالتهم شوية احسن من البدايه ..
بس سمر ماعاجبني شكلها ..

سمر :
بقت سحر محاربتني وتستهزأ بيه كلما تشوفني ..
ومااعرف شنو غايتها ..
ودومها مفشلتني .. بيوم طلعت للطارمة تغسلها هي هاي شغلها بالبيت ..
الممرات والطارمة تغسلهن ..
اجه ارشد شافها بلا حجاب عاط بيها ..
هي شافته خلت حجابها بسرعة ..
عاط بيها " انت ملابسه شي وملابسج فاضحة وطالعه ماتكولين احد يشوفني ودتشوفين البيوت كلها مسلطة علينا .. "

ردت " وانت شكو .. "

هنا ارشد تخبل ..

لزمها وعصر وجهها حيل وشمرها ع الحايط .. " لاتختبرين صبري سحر .. بحياتي ماماد ايدي على مرة ولا رجولتي تسمحلي بس انت يحتاج اربيج من جديد على ايدي "

رادت تعيط .. صم حلگها حيل .. وهمس بأذنها " اياج ترفعين صوتج بعد اگصه للسانج والله "

مااتحملت وحسيتها انهظمت .. دخلت تبجي للغرفه ..
بيبي من شافتها ماقبلت وصارت تحجي عليه ..
ولك ليش وي الطفله شبيك متكابل وياها ..

رد " ياطفله بيبي رحمة الاهلج .. ماتشوفيها بطولي ولو السانها اطول منها .. بس لاتتدخلون واني اروضها الكم وحق الله اخليها تمشي مثل الساعه "

دخلت وراها للغرفه صارت تعيط عليه " كله من وراج انت السبب انت الخليتينا نجي لهنا وج امي مااعرف وين لسا ومايوم واحد سأل عليها لو طمنا . حتى اختج
وتالي يجي هذا الشايف نفسه يعلمني الادب ويضربني ويگلي اربيج هو منو حتى يربيني "

اشرتلها " كافي صوتج مسموع "
ردت " خلي يسمعون.. والله اني اني وهو هو شوفي شراح اسوي بي "
رديت " قابل هو شمسويلج انت تعانديه "
ردت " بله انت ماتنطين بي حبيب الگلب هذا "
رديت " كافي لزمتيها عليه شغله صارت وراحت وصارلها شكد وانت ماتنسين "
ردت " اي جا لاتدافعين عليه گدامي فاهمة "

سكتت عنها وصرت اتجنبها بس هي احسها بقت تعاند وهو مايسكت واسمها هي الخسرانة لان يعرف شلون يوكفها عند حدها ..
اجت شذر وحجيتلها كلشي عنها . طلبت من بيبي تاخذني يمها ارتاح كم يوم وارجع .. بيبي ماقبلت بالاول..
" يابيبي هو وين اگدر افاركها لااني ولا جدها "
ردت شذر " هي كم يوم وارجعها "

قبلت بيبي اخذت ملابس كم قطعه وياي ولو يعز عليه اترك قمورة واروح بس جنت محتاجة ابعد شوية وارتاح .
لان گلبي صار يأذيني كلما اشوفه.. جنت اتوقع فترة مراهقة وتعدي بس يوم عن يوم يزيد تعلقي بي والمشكله مااگدر ابين او احجي احس الشي صعب كلش بالنسبة الي ..
اعرف ارشد يحب هاجر كلش وحزين للان عليها لهذا كتمت هالصراع بداخلي وسكتت عسا وان يجي يوم بسنه معينه يجمعني القدر بي ..

طلعنا اني وياها وبنتها للبيت رجعنا ..
اجاها تلفون من ردت تخبلت .. " هو شكو نسر بي شي؟"

شذر :
رحت البيت جدو هم اشوف البنات وانطيهم هداياهم وهم احجي وي جدو بخصوص نسر ..
رغم هو يحلف والبنات انه ابد ما يدخل البيت بوجودها
بس لانه باقية بحياتنا هالشي وحده مدمرني .. اعرف بي يحبني وعندي ثقه مايرجعها وحلفلي بس يبقى وجودها قريبة منا خطر على علاقتنا ..

من مالگيت جدو بلغت بيبي يخابرني لو يجيني للبيت
اخذت سمر وياي لان ضايجة وطلعت ..
من طلعت منهم بالطريق ..
خابرتني بيداء ..
" الو شذر حسام راح يجيب عذورة يمج كلشي ماتدري ابد لاتبينين الها او تحجين شي.. "
رديت " هو شكو نسر بي شي "
ردت " لا هذال انخطف ومانعرف شي عنه من طلع الصبح لسا "

يتبع…

///// البارت الخامس والســـبعون ////
ج2

خابرتني بيداء ..
" الو شذر حسام راح يجيب عذورة يمج كلشي ماتدري ابد لاتبينين الها او تحجين شي.. "
رديت " هو شكو نسر بي شي "
ردت " لا هذال انخطف ومانعرف شي عنه من طلع الصبح لسا "
سألت " وهسا شسويتوا يعني وين راح ؟"
ردت " ماادري ماادري هاي هنا جبناها لهنا وفد مرة حالتها .. تگول قبل فترة جاييه تهديد وهو مامهتم وهسا نسر يفتر من مكان المكان وماخله احد ماوصاه يدور عليه ..

سألتها " قدمتوا بلاغ ؟"
ردت " اي قدم نسر وعمامه كلهم مخبوصين ماشاء الله عشيرته تسد عين الشمس "

رجعت للبيت مقهورة حيل على هذال انسان طيب مايستاهل .. والاهم يحب هنا كلش ..
استغربت من حال بلدنا ووين وصلنا .. لا امان ولا راحة .. والحجي الحق والنزيه اما ينخطف او ينقتل
يارب يرجع سالم ان شاء الله..

اندگت الباب اجت عذورة وحسام ..
دخلت سلمت عليها وحسام يأشرلي من وراها…
هزيت راسي بمعنى اعرف ..

باوعتله " شنو متدخل ؟"
رد " هااا لا تعبان وعندي شغل عود امر عليج غير وكت"
ردت " لعد ليش جبتني بسرعه بسرعه لهنا وتگلي شذر عزمتنا "

رديت " اي صح اني حجيت وي بيداء تخابره يجيبج لان انت صايرة لاتطلعين ولا تجين "

حسيتها مااقتنعت بس من دخلت وشافت سمر انشغلت بيها.
تعرفت عليها والفتت الي :
" شذر هاي انتو كلكم هيج حلوين .. شفت خالتج وهسا اختج ماشاء الله "

فرحت سمر من سمعت كلامها .. وحست بالراحة وي عذورة بحيث خلصن الوكت اثنينهن ضحك وسوالف
ودنو وياهن هم حسيتها كبرت وحتى بكلامها ونقاشها مختلفه رغم هي صارت بالمتوسطة ..

بالي كله يم هنا ..
رحت للمطبخ ثرمت اللحم والبصل وسويت كباب بالفرن
استغليت وجودهن بالاستقبال صرت كل شوية اخابر بيداء ..
وماكو شي جديد .. والمشكله مااگدر اتصل على نسر واطمأن ..

هنا :
هذال مثل عادته .. گعد الصبح لگاني قبله اسوي ريوگ
حضني وباسني " صباح الخير حبيبتي "

رديت " صباح النور " اشو مبدل من وكت ..
رد " اي عندي شغل اخلصه واروح للدوام "
سألت " لعد متتريگ ؟"
رد،" كوب جاي من ايدج الحلوة وبس مااشتهي "

صبيتله جاي شربه وطلعت اودعه مثل عادتي للباب
حضني واتنهد بحضني ..
باوعت بعيونة " شنو هالحسرة البعيونك "
رد " ماكو شي حبيبتي يله اني رايح ديري بالج على نفسج وع الجهال .. ومن تسوقين على كيفج لان ازدحامات "

طلع وهو يوصي .. بالفترة الاخيرة علمني ع السياقة لان دايما هو يطلع من وكت او يتأخر واني ارجع تكسي او انتظر .
فاشترالي سيارة صغيرة .. وبعد مابديت اتعلم اسوق صرت اخذ ولدي قبل الدوام اخذهم الاهلي ومناك اروح الدوامي .. لان عطلة وماعندهم دوام..

بعد ماطلع لبست شالي واخذت غراض ولدي .. حتى مرات يرحون بتراكاتهم خطية يكملون نومتهم هناك ..

طلعنا بسرعة قفلت الباب ورحت البيداء بالفترة الاخيرة ادزهم يمها .

داومت وطول النهار احس داخلي مامرتاح ..
كملت دوام ورجعت للبيت بعد مااخذت اولادي ..

بسرعة طبخت ..
اتصل على هذال ماكو .. عود ردت اكله يجيبلنا خبز .. هو بثلاثة ثلاثة ونص يبين بالبيت ..

باوعت ساعه ثلاثة ونص وماكو معقولة مخلص شحن ..
بقيت مخليه الاكل ومنتظرة الحد ساعه خمسه ..
عاد هنا مااتحملت ..
خابرت اخواته گالن ماشفناه ولا خابرنا ..
دور قلقتهن وياي ..
ساعه ولگيتهن يمي جايات ..
خابرت نسر وگال اني اتصرف هسا اخابر واشوف السالفه ..

كلها تدور وهو ماكو فص ملح وذاب.
صار المغرب وهذال ماكو .. احس الدنيا گامت تفتر بيه عاد هنا انفجرت مااتحملت صرت اعيط وابجي..

اجه نسر وعمامه الهذال وولد عمة ..
گالوا " طلع بنص الدوام بشغل وبعد مارجع للدوام هذا العرفوه من اليداومون وياه "

اني تخربطت وبس ابجي .. سألني نسر :
" زين ماكالج شي خاف اكو مشكله بدوامه "

رديت " اي اجاه تهديد بس مو هسا من زمان .. وهو مااهتم وهم نسينا السالفه "

حجة عمه " وشلون تسكتون عن هيج موضوع "
رديت " هو ماقبل نحجي گال مجرد تخويف "

سأل نسر " زين ليش تهديد هم اكو شي يخص شغله صاير شي "

رديت " اي گال لازم ملفات فساد وع اساس يقدمها وهددوه بس هاي قبل ماادري شصار بعد هذال مايحجي عن شغله "

عاط ابن عمه " خليه لا يحجي لايحجي وهاي النتيجة.. يعني مايكول احجي الاهلي الولد عمي .. مو احنة ببلد…….. ماكو بي لانزيه ولاشريف .. بلد حكمته المرتزقة مايعيش الشريف بينهم ..

كلامهم وخوفهم خوفني اكثر المطمني نسر يمي يهدي بيه ..
اشرلي " گومي لمي ملابسج وملابس ولدج وتعاي وياي للبيت "

رديت " لا مااروح مستحيل خاف يرجع هذال شلون اروح واتركه "
رد " يابه من يرجع كلنا ندري لاتعاندين .. ماتشوفين الوضع خافي على ولدج… احنة راح نستنفر المراكز كلها وندور عليه لاتخافين "

بالگوة قنعني اطلع من بيتي ومن ريحته الماليه البيت ..
صعدت للغرفه اخذت كم قطعه لان ادري راح ارجع وراح ارجع اشم ريحته واشوف وجهة المبتسم والمايوم حزن بوجهي لو كشر "

احس جسمي كله يرجف وبس ابجي .. ياالهي مصار سنتين على زواجنا حتى مااتهنيت ولاشبعت منه . لاتحرمني منه ياربي وتاخذ مني اخر امل بالدنيا ..

اخذني نسر البيت بيداء .. بس گالتلي الله يساعدج
انفجرت بوجهها مااتحملت…
بجيت وعيطت ومافادني شي مااحس بداخلي مرتاح
كل شوية اتصل عليه ومغلق ..
نسر ماشفناه النص الليل .. هو وعمام هذال ماخلو مكان ما راحوا..
حتى رتب جبيرة بالدوله تعنالها .. وبمعارفه گدر يطلع امر بالتحقيق مع كل المشكوك بيهم وكل الموجودين وياه بالشغل وخارجه..

ايام وليالي وماكو خبر ..
احس النوم طار من عيني .. نسر حبيبي ماشفناه ابد ..
حتى دوام مايداوم بنفسه يدور ..

المطمني حجايتة من يگلي ..
" لاتخافين مادام ماكو اثر يعني بعده عايش وان شاء الله يرجع "

بس ياخوفي مايرجع ويختفي حاله حال غيره بهذا البلد..

اخواتي وامي كلهن ماتركني ابد… شذر تروح وترجع ماتگدر تبقى علمود عذورة ماگلنالها ..

وفوگ مصايبي كلها ..
سمعوا عمي وليث واجو..
من شفتهم حسيت بجيتهم مو خير ..
احنة رجعنا كلنا البيت اهلي لان بيت بيداء صغير
مايوسعنا ..
وهديل اخذت بنتها وراحت البيت بيداء ماما دزتها لان تدري بينا مانطيق وجودها ..
رغم مهيمن حلف مايدخل بيتهم مادام هي بي .. بس شنسوي ابتلينا بيها وخلص ..
واصلا بوضعي هذا ماعاد يهمني لا هديل ولاغيرها ..

من شفت ليث حسيت وراه مصيبة المشكله هالانسان تحسه يتجدد ومايتعب ابد يصغر ومايكبر ..

حجة عمي وتوقعت جاي يواسيني :
" بوية بعد الصار ورجلج عنده ثارات ويمكن يكتلوه او يخطفون عياله .. ولدنا راح ناخذهم… لان خاف يوم عبالهم ولده ويكتلوهم لو يخطفوهم "

رديت بحرگة گلب " تحجي صدگ عمي يعني هم زوجي مااعرف وينه وگلبي محروگ عليه.. وتحرگ گلبي على ولدي تريد "

رد ليث " هذا الصحيح مادام وضعكم بخطر مااخلي اولادي عندج بعدين وضعه معروف ليش اليشتغل هيج شغل شيتوقع… "

قاطعته وعطت بي " انت شنو يااخي ماتحس ماعندك گلب . لك اشو احسك جاي متشمت .. لو لان احسن منك ورجال اكثر منك غرت منه "

ضحك " اني رجال غصب عنج .. وهذا الشايب خليه عود يرجع ويفيدج بس ولدي اخذهم واصلا انت انطيتهم الي على طبق من فضة .. بس اقدم دعوة بهيج ووضع اخذهم منج "

عطت بي " لك هالشايب التحجي عنه اشرف منك… عاد شوف نفسك لاشرف ولارجوله باقي كل يوم وي وحدة حتى الاخذتها عليه وحبيتها خنتها "

تهستر وراد يضربني لزمه عمي وطرده .. " اطلع انت لاتتدخل "

عاط " لا اتدخل ولدي اخذهم وبالقانون "
رديت " لمن حطمت شجن وحرمتها من الخلفه هسا جاي تريد ولدك .. مو ذوله الماردتهم وتكلي سقطيهم او ننطيهم القصي .. مااريد اتشمت بس هاي كلها عداله الله .. وهسا اطلع منا واخلي القانون مالتك يفيدك "

سحب ولدي واخذهم بالقوة واخواتي وامي يعيطن عليه ..
مهيمن دخل للبيت سمع العياط وشافه مااتحمل ..
هجم عليه وشبعه ضرب وصاروا يتمالخون ..

عمي طرد ليث ..
وطلب ياخذ الولد بين ماتهدا الاوضاع يرجعهم وعدني يرجعهم بيده .. بس تنتهي الاوضاع على خير ..

اخذهم وراح .. البيت انخبص .. صرت تايهة مااعرف افكر المصايب احسها كلها تراكمت عليه ..

ثاني يوم انصدمنا بتبليغ من المحكمة.. والقاء قبض على مهيمن ..
انصدمنا ..
خابرنا نسر . خطية حار بينا وبين يدور على هذال ..
اجه بالليل هو وماگلناله لان تعبان نام وطلع من الصبح خطية .

بيداء تخبلت من اخذوا ابنها .. وتبجي " يمه بس لايحكموه ويروح مني .. يمه ابني شلون بيه "

بيتنا خلال اسبوع المشاكل ماهدأت بي ..
ليث مسويها قضيه اعتداء على اعلامي اثناء عمله ..
لعبها صح ومااعرف منين جايب شهود يشهدون وياه ..

قبل فترة سمعت عنه اخبار من نسر .. گال كل يوم يشوفوه ناس وي وحده ..
ماصدگت الخبر احتمال زميلاته لااكثر .. لان الاعرفه يحب شجن واستقتل عليها ..
بس مااستبعد تصرفه لان اليخون مرة يخون الف مرة ..

نسر المسكين حار بين يدور على هذال وبين مهيمن والمراكز ..
راح العمو كم مرة وعمو ضغط على ليث… بس ليث معاند .. ومصر يخليه ينحكم ..

بيداء تبجي وتصيح " ضاع ابني .. الله لينطيك ياليث ضيعت ابني "

دور صار يساومني يطلع مهيمن مقابل اولادي..
تخبلت شلون اگدر استغنى عنهم ..
ومنا بيداء شحالها ..

ماما تگلي معليج مهيمن رجال يتحمل لاتتنازلين اله ..
رديت " يوم تحجين صدگ طبعا مااتنازل .. مو تزعلين بيداء بس ذولي صغار شلون اخليهم يتبهذلون يمه وهو من البدايه مارايدهم بس لان شجن مايصير عندها "

ردت بيداء " حقج دادة حقج ابني جبير وميته عليه شحال لو طفل "

حولوا مهيمن للمحكمة… نسر خلة محامي اله .. وطلب شهود .
المشكلة بس احنة شهود .. انه الحادثة صارت بالبيت وبمشكلة عائلية مو مثل ماگال بوقت عمله ..

نسر ماقبل اي وحدة بينا تدخل مراكز او محاكم وگال اني اتكفلها .. بس ماما اصرت تشهد ..
وگالتله..
" يمة اني مرة جبيرة منو يباوعلي قابل… واذا عمك ماشهد وياك اني اشهد ولا اخلي الولد بالسجن "

بس نسر ماقبل گالها خلي نشوف شيصير والله كريم ..
خابرت ماما المرت عمو وحجت على ليث وگالتلها اذا ماتنازل والله اروح بنفسي واشهد عليه واكلهم اجه البيتنا وهاد علينا واخلي هو ينسجن بدال مهيمن "

عاد مرت عمو موصلة العمو وهو متخبل من سامع ماما تروح تشهد ..
خابر نسر وگاله " مادام ليث مايتنازل اني اروح اشهد وياك واحلف لان جنت هناك "

من سمعنا كلام عمو فرحنا ..
وفعلا رايح وشاهد ضد ليث وشهادة عمو لانه ابو ليث ضعفت موقف ليث ..
واضطر يتنازل بعد مادفع نسر تعويض ..

يوم عن يوم احمد الله الخلصني من هيج انسان طمع وجشع واناني .. شلون حبيته وشنو شفت منه ماادري المهم خلصت منه ..

بقى يرجعلي الغالي وكلشي مااريد من الدنيا .. كرهت كلشي بحياتي ..
هاي مرن اسبوعين وهو ماكو خبر عنه… حسيت الكل فقد الامل برجعته ..

شذر :
بعد الصار الهذال .. صرت بين نارين .. بين عذورة وبين قلقي على هنا ..

عذورة جانت وي سمر متلائمات .. سمر طلع عندها موهبة الرسم وهاي اول مرة اعرفها يمكن هواي اشياء غايبه عني بيهن حتى من انجمعت بيهن ماشبعت بقت الدنيا تلطش بيه بكل يوم مصيبة وانشغلت عنهن ..
بس المطمني هم جدو وبيبي اعرفهم يحبوهن ورغم اخطاء سحر بس بيبي متنطي بيها ابد ..

بقت يمنا سمر اسبوع بعدها گالت ارجع لان بيبي كل شوية تخابر وين سميرة اريدها اشتاقيتلها ..
ميستغنون عنها لان مداريتهم هي وجدو ..

من راحت سمر اني ملتهية بالخياط .. رغم مامعتازة ونسر بطلني من زمان من شراكتي وي المحلات الجنت اخيطلهم يگلي تعبتي وظهرج ..
بس اني بقيت اخيط بس الي للبنات للاقارب حتى للشارع ماعدت اخيط بعد ..

عذورة مرات يجيها حسام ويطلعها ومرات تلزم الفراش وتنام .. الكيمياوي اذاها حيل .. غير ملامحها وذبلها ..

ساعات احلم بيها احلام موزينه واخاف .. اي فعلا اخاف لان احلامي احسها تتحقق ..

دوم اگعد ع السجادة وابجي وادعي .. ربي اختبرتني بهواي اشياء بحياتي وصبرت ..
الا عذراء .. اريدها منك الهي .. شابه بعدها وجاي تذبل گدامنا ..

واني ع المكينة .. اجت يمي ..
" شذر اشو اهلي فد مرة نسوني لا واحد اتصل لا حجة معقولة صاير شي .. حتى من اتصل كلمتين وتسده ماما"

رديت " لا ماكو شي بس تلگيهم مشغولين "
ردت " لا ممرتاحة .. راح اخابر ماما تدزلي مشتاق "
رديت " وين تخابريها مو ع اساس يجي حسام لو شنو مليتي مني "
ردت " شتدرين بيه امل منج بس ماادري احس داخلي مقبوض "
رديت " لعد انتظري حسام يجي لترحين "

اجه حسام من العيادة اصرت تروح .. حاول يقنعها يطلعون ماقبلت گالتله تعبانه اليوم ..

اشرلي اروح وياهم ..
شلون اروح الذاك البيت بعد السوااه شلون ؟؟

اصر حسام عليه من راحت تبدل ..
" شذر خوية اعرف الماتگدرين تدخلين الذاك البيت بس انت تفهميها هاي لو سمعت تتخربط او شو شيصير بيها"

اضطريت اروح هم يبقى بالي عليها..
خابرت بيداء گلتلها عذورة اصرت تجي .. لتفتحون الموضوع يمها .. وكأنه هنا جايه يمكم "

نسينا انه عذراء ذكيه ومتفوتها الهفوات النسيناها ..
بدلت واخذت دنو ورحنا ..
بيداء گالت نسر مايرجع .. اطمأنيت شوية ..

وصلنا للبيت ..
باوعت الحسام " ليش جبتنا لهناك غير البيداء نروح ؟"
توتر حسام ونسينا هالسالفه..
" هااا اي بس نسر وداها يم بيداء علمودجن لان ماتدخلن البيت .."

سكتت وماردت ..
دخلنا البيت .. تلگتنا خاله سلمنا عليها ..
فروحة فرحت من شافت دنو اخذتها ودخلت ..

شافت هنا استغربت " هاي هنا لعد وين ولدج وشبيج "

هنا جانت حالتها فعلا يرثى لها .. ذبلت بأسبوعين ..
ابتسمت بثگل " مابيه افلاونزا مأذيتني .. ولدي عند بيت جدهم وهذال مسافر فأجيت لهنا يمكم "

ابتسمت " ياظالمات كلجن مجموعات هنا وتاركاتني اني وهاي المسكينه وحدنا متگابلين هناك جان اجيتن يمنا "

اخواتها كلهن يبتسمن ويجاملنها ..
سما من شافتها مااتحملت دخلت للغرفه تبجي ..
رحت وراها ..

شافتني " مامصدگة هيج صايرة .. لج عيني هاي زهرة البيت نسميها من صغرها وهي ماتفارگ الضحكة وجهها ليش هيج صايرة .. ليش احس راح نخسرها نهائي "

رديت " اسم الله لتگولين هيج .. عذورة قوية وجاي تحارب بس العلاج قوي مأثر عليها ومتاكل .. ولو الولد حسام ممقصر خطية مگابلها وگاعد .. خليج قوية حتى تقوى بينا من تشوفنا هيج طبعا تضعف "

ردت " الله يلعن هيج مرض شوكت تطيب گليلي شوكت ترجع تفتح من جديد "

رديت " حسام يگول مو شرط حسب انتشار المرض وقوة مناعة الجسم .. احتمال سنة اكثر ماندري بس ان شاء الله تخلص منه بسرعه… "

جاي نحجي سمعت صوت نسر اجه ..
بقيت بالغرفة ..
من شاف عذورة فرح " مشتاقلج بالقران… اعذريني التهيت وحتى ماخابرتج "
ردت " كلكم ملتهين عني تالي مجمع اخواتك وتاركني"
رد " لا ابد اسأليهم اصلا مااجي للبيت عندي انذار.. "
نزل مهيمن جان نايم فوگ…

واسمعهم يحجون عن مشكلته ..
عذورة استغربت " ليش مگلتولي اگول ماتخابرون والله حسيت اكو شي همزين عاد لمن طلع يلة دريت "

رد نسر " مشكله بسيطة وماتسوة ..

بس الجماعة الخطبو اسراء خوش وگفه وگف النا .. "

سألت خاله " احنة التمن كلهن ونسيت اسألك هذا الخطب اسراء وياها استاذ لو شنو ؟"

رد نسر " اخوه دكتور وياها الولد الخطبها قاضي "
ردت بيداء " ياااا اگول اسراء شعجب اقتنعت ورضت تالي طلع الولد يناسب طموحها "
رد نسر " اي هم الواضح يتلائمون .. اسكتو لا تسمع وتسوولنا سالفة .."

سمعته شهگ " هاي دنو هنا .. منو جابج وي عمة اجيتي وشلون تتركين امج وحدها "

ردت " ماما اجت وياي "
غمضت عيني .. " معناها عرف عود وصيتها ماتنزل من فوگ لمن نروح "

شوية واندگت الباب " شذر اريد احجي وياج "..
حجيت من وراه " نسر عفية لاتحرجني مو حلفت متشوف وجهي بعد "
رد " والله عبالج ساكت خابرت عمامها وحجيت وياهم بس صارت هاي السالفه واخرتني تعرفين "

رديت " نسر انت تهاونت من البداية وكسرت گلبي .. وهاي انت صارلك شگد متحمل ماتفرق بعد "

رد" والله اريد اموت شنو متحمل .. شذر اني تعبان ومحتاجج لاتسوين هيج بيه "

رديت " بكل مرة تحتاجني تلگيني يمك بس هالمرة تختلف "
رد " افتحي الباب من اخواتي مو فشلتيني .. افتحي وخلي نتفاهم جوة "

مهيمن مناك اسمعه " الله يساعدك خالي لو اني منك اكسر الباب .. كرهتوني بالعرس والله انتو المتزوجين "

عاط بيه " دولي لااجي اكسرك مو اكسر الباب لو مخليك بالسجن احسنلي "
ضحك مهيمن " ترى اتشاقه هااا .. باجي على كيفج وي خالي خطية مايستاهل والله خوش رجال ويحبج وبلياج ضايع "

عاط نسر " بعد بعد جدي بيه ع الرصيف امشي ولك "

سمعت ركضت مهيمن ..
ضحكت عليهم ..
رد " عاجبج هيج يعني وج افتحي مو فتيتي گلبي فت"

ابتسمت " دور فتيتي شنو هاي ؟"
رد " شلعتي گلبي يعني هاي شرطي ويانا يگولها جان "

لو ما هنا ووضعها وعيب منها جان مافتحت ..

فتحتها ودرت وجهي " ترى فتحتها علمود هنا .. لان شتگول علينا زوجي ماهو وهم حايرين برواحتهم ومناك مهيمن يتمضحك فضحتونا "

رد " بس خليني اباوعلج مو اشتاقيت لعيونج الجنهن قطر الندى بوجه الصبح "

اتنهدت " نسر مو وكت سوالفك .. "
رد " انطيني فرصه "
رديت " انطيتك هواي .. الواگفه گبالك مو بنت ال 16 سنه كبرت والدنيا علمتني اشكال وشفت اشكال بيها "

بسرعة اجتني حضنه من وراي وحاوطني بديه وقرب وجهة الرگبتي . ابتعدت عنه بسرعه "

" نسر عوفني كافي كافي ماتمل "

دار وجهي غصب عني غمضت..
" تعبتيني كافي والله گلبي ملهوف بعز كل الاني بي .. كسرت اختي ودموعها لو مهيمن وهبطتي عليه لو اختي التذبل گدامي لو ولو ماتگليلي شلحگ "

دفعته حيل .. " كلها باول اولوياتك الا اني .. "
رد " هاي انت تگولين هيج .. وين شذر القبل تفضل الغير على نفسها وين شذر اذا قصرت بحق واحد من اهلي ترفض وين شذر الجانت تنقهر حتى على عدوها"

رديت " هو لان جنت ذيج شذر الضعيفه تعودت تخطاأ بحقها وتسامحك تدوس عليه وتگول تتحمل .. لدرجة ينكسر گلبك ع الكل الا اني تگول ميخالف تتحمل وتتحملني .. للان اني نفسي شذر وي الناس كلها . اخواتك اخواتي واهلك اهلي .. وكسرة هنا كسرتي ..

بس انت لا تختلف لان اگدر اسامح الناس كلها الا انت مااگدر اسامحك .. لان انت مختلف بالنسبة الي مثل مافضلتك على نفسي وع الكل المفروض تفضلني ..
وماتكسرني ..
تعبت نسر تعبت اريد اعيش اريد استقر اريد ابطل خوف من المستقبل اريد ارتااااح يااخي افهمني افهميني..

حضني وباس راسي ..
بعدته وطلعت ..
صحت دنو .. وطلعت .. البنات وخاله رادني ابقى مابقيت ..
بقيت واگفه بالشارع ودموعي بطرف عيني. اباوع البيت بيداء والقهر كاتلني ..
" وحدها هناك شنو اليضمن مايروحلها او تصيحله بحجة بنتها شنو اليضمن وفائك الي نسر شنو ؟؟"

طلع وراي " اوكفي اني اوصلج "

طلع وياي وصلني واثنينة ساكتين ..
نزلت ودخلت للبيت من غير مااحجي بقى هو يحجي وي دنو ..

دخلت وراي وقفلت الباب " ماما بابا يگول اصبري عليه"
مارديت عليها ..

سويت عشا وتعشينا ونمنا ..
ثاني يوم گعدت اشتغل حتى بلا ريوگ مااشتهي ..
اجت ببالي زمن ..
خابرتها ..
" وينج اشو مختفيه "
سألت " انت وين ببيتج ؟"
رديت " اي ببيتي تعاي "
ردت " اشوف اذا قبل .. لان اني بطلت ومن زمان تركت الشغل ومااطلع ماگالتلج خاله رسميه الله يرحمها "

رديت " لا ماادري اصلا من زمان ماملتقيه بيها الى ان ماتت الله يرحمها "
ردت " احاول اقنعه واجي واحجيلج "

احظرت الريوگ مثل قبل من تتريگ وياي ..
اجت شافت الطاولة ضحكت ..
" اشتاقيت الايامنا "
باوعتلها شكلها متغير انتبهت على اديها ..
" شنو هاي مخطوبة "
ردت " اي متشوفيني گلتلج تركت الشغل.. "
ابتسمت " الله يسعدج واخيرا اقتنعتي "
ردت " لا والله گولي انجبرت .. ابوي ومرت ابوي شكوا كلما يجي واحد ارفض .. سألوني شنو السبب وكلما انطيهم عذر مايقتنعون اخر شي وافقت مجبورة .. لعد شسوي ابقى عمري كله هيج .. خليني اتحدى مصيري اما اني مرتاحة وسعيدة او الله العالم وين اكون ..

رديت " ان شاء الله ماكو شي وتنسعدين انت بس لاتوهسين .. احجيلي منو هذا "

ردت " مو منا من محافظتنا .. من توفت عمتي ورحنا شافتني امه وخطبتني .. حتى مااعرفه كلش زين بس هو موظف وحالته زينه "

رديت " هاهي المهم زين وحباب ويسعدج .. "
ردت " الله كريم "
بيومها رتبت البيت وياي وغيرنا ديكور المطبخ والاستقبال .. غسلت البيت كله وفرشته .. مابقى شي للشتا ..

بقت للظهر يمي وراحت ..
خابرت البيداء .. اسأل على هنا ..
حجتلي عن عذراء درت من حمودي ابنها بهذال وشحالها هسا ..

رديت " لعد شلون ماوصيتوه "
ردت " وصيناه بس نسيت يگول بس الاكل ماينساه"
رديت " يلة هاهي هي اول وتالي تعرف .. الى متى نبقى نظم عنها "

اريد اصب غدا ..
اندگت الباب راحت دنو فتحته اتفاجأت بجدي
مااعرف شحسيت من شفته داخل عليه بهيبته ولابس عگال ..

فرحت سلمت عليه ودخلته للاستقبال ..
سألني " گالتلي بيبيتج محتاجتني وجان عندي شغل هواي اعذريني بوية لان تأخرت عليج "

رديت " اني هم نسيت صارت هواي شغلات عندنا .. اخواتي شلونهن بيبي؟"
رد " كلهم بخير .. گولي خيرج "

رديت " بالاول نتغدا يمي اليوم وترتاح ونسولف "
ابتسم " وبيبيتج شيقنعها مااكل وياها غير تزعل وتدور وجهها عني"

رديت " بيبي اذا عرفت انت يمي ماتزعل .. "
ضحك " هسا اخابرها وشوفي "

طلع موبايله خابر " وين بيبيتج انطيها الموبايل "
فتح سبيكر ..
" هااا حجي شلونك وين لسا ؟"
رد " والله عزمتني وحدة على غدا وبقيت يمها "
ردت " ياااا وروحة الابوية لمايجمعني بيك فراش واحد .. وانت تدري بيه لو زعلت شلون ؟"

ضحك " يا يابة كلشي ولافراشج شلون اشتم ريحتج بتوالي الليل "
ردت " خلي الرايحلها تشممك المسك والعنبر البگصايبي"

ضحكت على سوالفهم.. شگد حلو حبهم وشگد اتمنيت نعيش هيج اني ونسر طول العمر ..

رجع كمل " لاتخافين حجيه انت بالگلب ماكو وحدة تاخذني منج .. بس هسا اني يم شذرا مو گلتيلي تريدك وهي ماقبلت الا اتغدا يمها "

ردت " ياحجي صدگ هيج تهبط گلبي .. مادامها شذرا خليك يمها وسلملي عليها مسامحتك هالمرة "

ضحكت وحجيت " هااا بيبي شلونج "
ردت " بعد امي وابوية انت .. ديري بالج على جدج وغديه زين بس كون مو دهن ومالح توكليه "
رديت " لاتخافين عليه بيبي "

رحت سويت الغدا وگعدنا نتغدا .. وهو يضحك وي دنو ويسألها عن دراستها وهي تجاوبه بطلاقه ..
من تجي وتناقشه يبتسم..
باوعلي " زين ماربيتي .. طلعتي بعشر زلم .. قوتج وصبرج الج بيها عند الله .. هاي الله رزقج رجل نشمي وبنية مثل الورد .. انطوج الماگدرنا ننطيه الج وظلمناج"

للحظة مااتحملت ونزلن دموعي .. دموع جنت خانگتهن ومصبرة على روحي بالگوة ..
سألني " احجي شنو المضوجج ؟"
ححيتله كلشي صار .. بالاول گال اذا عادل بينجن وعندها بنيه حرام يابوية تحرميه لو تحرميها من بنتها .
انت ببيتج وهي ببيتها اذا مامقصر عنج ..

بس من عرف السوته بيه والصارلي وشهدت خالتي بالحجي وگلتله اسألها .. اتخبل ..
وگال " مايصير الا خاطرج طيب .. بس يجي ارشد صارلة كم يوم يركض بمعاملة راتب ابوج علمود يدوره بأسم اخواتج ضمان الهن والبيت هم ..
بس يكمل هاليومين اخذة ونروح الرجلج واتفاهم وياه..

يتبع……