///// البارت ســـبعون /////
ج2


كل شيء بداخلي يتألم ..
أريد أن أتقيأ تلك الأحاسيس البغيضة المؤلمة ..
أحاول أن أتخلص من كل الأفكار التي تأبى بأن تحاصرني من كل ناحية ..

شعور يخنقني لا يزول ولا أستطيع النجاة منه ..
كمن يحاول الطيران فيظن أنه حلق ف السماء ليجد نفسه قد ارتطم بصخرةٍ اعترضت طريقه ..
لتطرحه سقيطاً في صدمة وذهول موجع ..
____________

وبدأت رحلتي مع هذا المرض الخبيث .. اسما على مسمى ..
اهلي كلهم ساندوني ..
كانت اول جرعة الي بمثابة السير بالبرزخ .. لاانت تعرف نفسك راح تقاوم وتعيش او لا ..

حسام طول الطريق يشجعني .. " اهم شي اتركي عامل الخوف فكري بالاشياء الحلوة انه هالعلاج هو السبيل للنجاة "

رد نسر " اختي سباعية اكيد ماتخاف مو عذورتي "

ابتسمت بثگل ..
دخلت للدكتور .. بدأ يمهدني للطريق .. وانه ورانا طريق وتحدي اكلنا الصحي وقوتنا هي الي توصلنا البر الامان ..

وبعدها گال " اتمنى تكون معنوياتك دائما جيدة اثناء اخذ العلاج لان موضوع الحالة النفسية كلش مهم حتى نكدر نقاوم المرض ونتحمل رحلة العلاج الصعبة "

باوعت النسر " ابتسم "
اول يوم ماقبل نسر احد يروح لان ماما ماتتحمل وشذر يم ملوكة ..

نمت ع السدية وشكلوا الكانولة ...
صرت ارجف من البرد او من الخوف ..

اجه حسام جايب بطانية .." لا لا مو هيج اتفاقنا .. شگلنا ؟؟ اعتبريه مغذي لااكثر لويش خايفة "

همست " مااعرف مااعرف والله احاول مااخاف بس مااگدر "

اول مابدأ العلاج يمشي بجسمي حسيت بحرارة تسري مو علاج .. فزيت بسرعة وبجيت ..
" بطلت مااريد مااريد اسحبوه مني مااريد "

اجة نسر يمي حضني " الخاطري تحملي الخاطري "
رديت " نسر مااريد اتعذب حباب خلوني اموت براحة ولااتعذب "

رد حسام " شنو تموتين براحة يعني عبالج اذا مااخذتي العلاج راح ترتاحين ؟؟ ترى العلاج ارحم الج من الالم "

غمضت عيوني والخوف مسيطر عليه ..
حسيت بدوخة واستفراغ .. اشرت بسرعه ..
حس بيه حسام . جابلي سلة الزبل .. كمت استفرغ بيها عيوني صارت تغوش .. جاب الكلينس وصار يمسح بحلگي ..
ونسر لازم ايدي ويفرك بيها يحاول يهدأني ..
من استفرغت ارتاحيت ..
غمضت عيني ردت انسى كلشي .. اريد انام وارتاح ..
صرت اشتاق الذيج الايام الجنت انام بيها ليل ونهار

طلع حسام من الغرفه وبقى بسر نسر يمي ..
يهدأ بيه " كوني قويه .. انت اخت نسر .. باعي للغرفه شوفي المريضات وياج شوفيهن شلون گاعدات ويشربن عصير ومامهتمات .. انت هم بس بالبداية ودور تتعودين "

فتحت عيني بثگل " يعني صدگ دور تصير عادي ؟؟ وماتأذيني مثل هسا ؟؟"

هز راسه .. " بس شوفيهن واحكمي "

التفتت شفتهم . اكو نايمين وهم ياخذون العلاج .. واكو اصلا جايين وحدهم مااعرف شلون ميخافون ..واكو وحدة تشرب عصير .. بس هااا لابسة كليته ع راسها وحواجب ماعندها ..

تخبلت " بس لااصير هيج نسر بس لايوگع شعري "

رد " اششش مايصير مو شرط شوفي ذولي مابيهم شي لاتخافين "

دخل حسام وبيدة گلاص سفري عصير ..
" هذا عصير طبيعي كوكتيل جبته الج علمود ماتدوخين اشربيه كله "

ماقبلت اشرب .. بس نسر جبرني شربت .
منا لمن كملت الجرعة احس راسي يريد ينفجر .

گمت من مكاني .. دخت ردت اوگع ..
ركض حسام سندني " الله الله مو گلتلج ابقي شويه ارتاحي يلة تگومين "

اجة نسر سندني " ابقي مرتاحة لو اجيبلج كرسي "

رد حسام " لا خليها تمشي احسن لاتبقى گاعده وخاملة"

مشيت بصعوبه الحد السيارة ..
تقريبا صار الظهر . وصلنا حسام للبيت وراح للمستشفى

دخلت تلگتني ماما " هااا شلونج شتحسين احسن "

مااتحملت بجيت " اريد اموت .. اريد اموت بطلت مااريد "

ماما هي شافتني هيج تخبلت اكثر ..
همس نسر " هااا شگلنا "

دخلني للغرفه ارتاح .. اجت شذر گلتلها اريد مسكن جيبيلي ..
راسي اذاني .. جابتلي مسكن اخذته وردت انام ..

دخل نسر بيده صينية " ماتنامين الا تاكلين "
رديت " تلعب نفسي مااگدر "
رد " ماكو تلعب نفسي گومي يلة "

اجت شذر وياه . صارت تقطع بالدجاج وتأكلني . ونسر وراها يشربني شوربة خضار ..

ماانطوني فرصه اتنفس :
" انتو الثنائي المرح ناوين تموتوني شنو ؟"

ضحكت شذر " مادام صارت تحشش گول مابيها شي "

رد نسر " طبعا مابيها شي هاااي اخت نسر المرض يخاف منها مو هي تخاف منه "

سحبت البطانية اريد انام " اي انتو عبالكم طفلة وتضحكون عليه "

خلوني انام وطلعوا ..
بالگوة نمت ..
فتحت عيني على صوت اخواتي .. كلهن متجماعات يمي ..

هنا .. بيداء .. اسراء .. وغيداء هم جايه ..

شافتني اجت حضنتني وتبجي ..
" ولجن هيج اني غريبة عليجن ماتگللي شي .. نسر يتمرض وماادري .. وهسا عذراء . هيج گلبجن اسود ومانسى من سنين "

گعدن يمي كلهن بالاول سوالف وضحك عود يشغلني ..
جانت غيداء تشكي همها من ابنها احمد ..
تگول " تعبت وربيت وتحديت اهلي واخوي علموده تالي من تزوج عافني وطلع وحدة حتى بالجذب يجي يسأل علينا الا بالمناسبات "

ردت اسراء " من ايدج كله بسبب دلالج .. مو هذا نسر الوحيد ابد ماما مادللته صح تحبه بس خلته يعتمد على نفسه من الصغر وتحمل مسؤوليتنا كلنا "

كملت غيداء بدأت هنا تحجي عن وضعها وي هذال وشلون الله عوضها ومدللها هي وولدها ..

بعدها حجت بيداء عن مهيمن واذا تخرج لازم تشوفله تعيين لو تفتحله مشروع يعتمد بي على حاله ..

كل وحدة بيهم تحجي عن حياتها ومستقبلها .. الا اني اذا اريد احجي قصتي لو حياتي ياترى شنو بيها ؟؟

فتحت عيني على حب شخص وكبر بگلبي وحياتي وتالي خذلني وتركني ..

دخلت شذر بصينيه فواكه ..
" همزين كاعدة شلون فواكه تخبل جابهن نسر من التحبيها "

رديت " مااشتهي "

عاطت بيه " ماكو مااشتهي اجبري نفسج واكلي "

اكلت شوية مااتحملت حسيت نفسي لعبت واستفرغت
صاحت هنا " اتركنها ترتاح لاتبقن بالغرفه "

طلعن اخواتي . رغم جنت مااريد احد يتركني وحدي خاف ياخذني التفكير ..

گومتني شذر طلعنا للحديقه .. الجو بارد وحلو ..
گعدت ع المرجوحة… تذكرت ايام قبل من نگعد سوة ونسولف ..

ثاني يوم من الصبح كلش ..
اندگت الباب .. اجت ماما ..
" هذا حسام يريدج "

استغربت " شعنده جاي هسا "
لبست حجاب وگمت احس جسمي مكسر ..
باوعلي ابتسم " صباح الخير "

رديت " صباح النور .. خير شكو ؟"

رد " بدلي بسرعة وخلينا نطلع "

رديت " تحجي صدگ ؟؟ وين "

رد " لاتخافين مااخطفج مشوار صغير ونرجع "

ماما گلتلي " روحي وياه امي غيري جو وبعدين هو مخابر نسر قبل ليروح للدوام "

بدلت واجيت " حسام جسمي يوجعني والله مااگدر "
رد " هو لان يجوعج لازم تطلعين تتمشين وخاصة هوى الصبح مفيد للجسم .. خلي الدورة الدموية تتنشط "

رحت وياه خله السيارة ع جهة ونزلنا .. نتمشى
باوعتله " تدري انت عايش الدور "

ضحك " شلون ؟"

رديت " تاخذني من اهلي وتجيبني لهنا بحجة نتمشى عود اني دكتور وكذاااا "

ضحك " تصرفي وياج مو كـ دكتور وي مريضة "

سألته " لعد شنو؟"

سكت ..
اتنهد " تدرين لو اخذج الشارع ابو نؤاس وخاصه وقت الغروب لو الفجر المنظر ماكو هيج .. دائما اتعنى واوصل لهناك رغم الطريق والازدحام بس حتى اتمشى هناك "

سألته " الوحدك ؟"

صفن " اي الوحدي ليش ؟"

رديت " لا هيج مو اگول ماكو واحد وحدة يتمشى "

رد " احب اطلع وحدي استمتع مااحب احد يزعجني "

سألته " انت هيج طبعك منعزل ؟"

رد " وليش تسميه انعزال ؟؟ گولي راحة بال "

اتنهدت " اني عكسك الوحدة تقتلني مااحب ابقى وحدة اتصور البارحة اخواتي اجن يمي بالغرفه يحجن ويسولفن واني بس اسمع مرتاحة من راحن عني بقيت افكر واختنگت "

سألني " تعبتي شنو اشو بالگوة تجرين نفس "

رديت " لا بس ممتعودة امشي كل حياتي سيارة من الباب للباب "

رد " غلطانه لازم تمشين تمارسين رياضه كل هاي تزود المناعة وتنطيج طاقة "

وگفت " كافي تعبت حيل رجلي اذتني خلينا نرتاح "

رد " ابقي هنا اروح اجيب السيارة واجي "

راح جابها واجه .. خلينا نتريگ
رديت " لا عفية ترى طلعت مجبورة "
ضحك " تتعودين الطلعه وياي غير شكل "
رديت " ومنو گلك نسر راح يقبل بكل مرة "
رد " مادام الشغلة تخص صحتج اكيد مايعترض "
رديت " اممممممم لاتجرب حظك بكل مرة "

رجعنا للبيت " باعي كثري بروكلي خضروات فواكه لحوم بيضاء كلشي صحي اكليه بس اهم شي السكريات ابتعدي عنها "

ضحكت " بروكلي شنو ؟"
رد " اني اجيبلج منه صحي كلش "

رجعت للبيت وهو راح للدوام .. شذر هي وملوكة گاعدات ..
شافتني ابتسمت " دورت عليج ماكو ؟"

رديت " شسوي هالفترة زوجج منطي الصلاحية الحسام ماشاء الله . صاير فري "

ابتسمت " والله هالحسام مو خالي "
رديت " خالي عمي ما يهمني "
ضحكت " تخبلين بكل حالاتج "

رحت غسلت وبدلت .. احس جسمي كله يوجعني قبل العلاج ماجنت هيج ليش هسا احس مفاصلي تأذيني ..

للعصر كعدت من النوم ..
شفت علاگة ع الطاوله..
باوعتلها سألت " شنو هذا ؟"
ردت " ماادري حسام جابه گال خلي تخابرني اعلمها شلون ينطبخ "

باوعتله .. خابرت ..
رد بسرعه " خو گول قرنابيط اخضر "
ضحك " ضيعتي برستيج البروكلي "
رديت " اممممم عود هذا شلون ينأكل "

رد " باعي جبتلج بروكلي وجزر وشجر .. تردين تسوين شوربه بروكلي او تسلگيهن وتقليهن بزيت زيتون قليل وهواي وصفات .. "

مافتهمت شي ..
حجيت الشذر الگاله .. وتورطت ..
يوم مسويتلي شوربه منه
يوم سالكتلي وي الدجاج..
لو امي كل يوم مسويتلي عصير اخضر وتجبرني اشربه صرت حقل تجارب الهم ..

مرت الايام واجة موعد الجرعة الثانية ..
نسر كان بالدوام وراحت ماما وياي ..
كنت عبالك رايحة للموت ماادري ليش تجيني رهبة رغم هواي شفت هناك يتصرفون عادي او يمكن بمرور الوقت اتعود ..

دخلت للغرفه .. هالغرفة صرت اسميها نفق الموت ..
من جنت صغيرة ملعب بلعبة النفق المرعب وجنت اطلع منه هلكانه وتعبانه من العياط ..

هالحالة رجعتلي بحيث اطلع تعبانه من العلاج ..
هالمرة الممرض شكلي الكانولة بسرعه بحيث اوتت
من مشى العلاج بالوريد حرگني حيل وصار لون الوريد جوزي ..
صرت اعيط ومااتحملت من الالم .. حتى تخربطت ..
وماما صارت تعيط وتبجي ..
" يمة بنتي راح تموت هاي تعالجوها لو تموتوها انتو"

بسرعة اجه حسام وقفة وسحب الكانولة وصار يحجي ع الممرض..
شكلي هو العلاج بجهاز العطاء مباشرة ..
بحيث ماحسيت بالالم حتى العلاج مشى بسهولة ..

مثل كل مرة جان محضرلي بطل عصير فواكه جان يخلطه بالبيت ويجيبه وياه ..
خلة بي شلمونا ونطانياه .. قرفص يمي ولزملي البطل واني اشرب ..
شربت شوية اشرتله " مااگدر مو تدري بيه مااتحمل واستفرغ "

رد " لعد من تكملين تشربيه كله "
هزيت راسي " ان شاء الله "

بقى گاعد يمنا ماتركنا ابد ..
همست " مايصير هيج تارك شغلك وتجي وياي بكل مرة "

رد " معليج بيه اني ادبرها المهم انت تصيرين زينة "

كمل العلاج وهالمرة حسيت بدوخة اقوى مااعرف ليش ونفسي لعبت ..

جابلي كرسي طلعني بي مااتحملت ..
رحت للبيت بسرعة نمت ..

شوية وگعدتني شذر جابتلي غدا وسورية بروكلي وعصير اخضر ..
اتنهدت " هذا العصير ماعندكم غيره "

ابتسمت شذر " هذا عصير خاله تگول مفيد مال خضروات ويزيد الدم "

رديت " عيني رجعوني على عصير حسام مال فواكه احسن من هذا "

شذر :
البيت كله من يوم مرض عذراء بوضع يرثى له ..
جمعنا نسر كلنا قبل علاجها ووصانا ..

" الدكتور يگول نصف العلاج يعتمد ع الحالة النفسية مااريد تحسسون عذراء مريضه ابد .. اضحكن سولفن وياها لاتخلنها تضوج لو تشوفجن متأثرات بوضعها والاهم مشاكل مااريد .. اذا اسمع مصيبة وحدة بالبيت اخذها واروح البيت عمتي .. "

ردت خاله " يمة شعندنا مصايب اسم الله .. بس گلي بعد هذا الكيماوي ترجع زين مو اسمع يطيح الشعر "

رد " عود احجيها يمها يمه وخبليها .. لاتجيبن هيج سوالف يمها .. ابد .. "

بعد مابدأت تروح للعلاج وتجي .. حالتها تصعب ع العدو .. ذبلانه فد مرة .. بس حسام جان واگف وياها من اول يوم لاحظت اهتمامة بيها ابد ماتركها ..
حتى نسر مااعترض على وجوده يمها ..

يگول " الولد فاهم وشاطر والاهم مؤدب مو طايش مثل ولد هالوكت ومثقف .. كان رأيه بحسام عكس رأيه بمعتز سابقا .. "

كل يوم نگوم من مصيبة ونوگع بالثانية لدرجة حتى اخواتي نسيتهن ..
صرت اخابر خاله اخليها تروح تشوفهن وتطمني ..

خابرت خاله مثل عادتي ..
ماردت . مرة مرتين ماكو ..
استغربت ..

ساعة ورجعت اتصلت بيه جانت هستوها گاعدة من النوم…
" شنو نايمة مو عوايدج هيج وكت ؟"
ردت " لج امي ماادري شبيه نحول عندي وبس نايمة حتى السيد اخذ البنات العماتهن من شافني مريضة "

ابتسمت " بي لا حامل "
ردت " يا تضحكين عليه شذر .. وج امي عمري اني بنهاية الاربعين عمري راح ادخل الخمسين ويني ووين
الحمل .."

سألتها " يعني هي فايتة لو لا "
ردت " هاااا شمدريني اي ماكو بس گلت يمكن انگطعت مني اني سامعه من امي المراة بنهاية الاربعين تنگطع منها وتدخل بسن اليأس "

رديت " والله خاله مااعرف هالسالفه وبعدين تحجين صدك اليشوفج يگول بنت الثلاثين شنو سن اليأس ليش تكبرين بنفسج "

ردت " اگلج شذر لاتخبليني هو بلا كلشي راسي مأذيني دور تخلين هيج فكرة براسي "

رديت " زين العصر روحي للدكتورة واذا تردين اخلي نسر يجيبني الج واخذج ونروح "

ردت " لا مااروح كلشي مابيه "

سماهر :
كلام شذر دوخني .. افترت الدنيا بيه .. لفيت راسي ونمت .. لا ماكو شي .. بلة تأملت وطلع ماكو واتفشل شنو موقفي ؟

سمعت الباب انفتح گمت بالگوة ..
جان السيد جاي من اخته ام علي ..
شافني ابتسم " شلون صرتي ؟"
رديت " احسن ان شاء الله "

رد " هاي غدا دزته ام علي من سمعت بيج مريضه وسوتلج شوربه هسا احميها وتشربيها ترتاحين "

رديت " جيبهن سيد اني احمي مابيه شي "
رد " لا يابة شوفي حالج ووجهج اصفر حتى الله مايرضى شايلتني اني وبناتي والبيت ع راسج ومن تتمرضين مااشيلج "

رديت " ليش تكول هيج غير انت زوجي وهذا بيتي وبناتي بعد ليش تعتبرني غريبه "

اجه باس راسي .. " يابوية مسخنة .. لاتضوجين بس كلبي ماينطيني مريضه وتكومين روحي اسبحي حتى تفكج الحرارة وبعدين تتغدين وتنامين والعصر اخذج للدكتور "

رديت " المن دكتور مابيه شي "
رد " ماكو اعتراض يله "..

سبحت وتغديت .. اصر انام ساعه ..
نمت للعصر گعدني " يلة عيني گومي بدلي نروح "

حسيت نفسي احسن " صرت زينة ماكو داعي "
رد " گومي بوية گومي لاتشلعين گلبي عليج "

گمت بدلت ولبست حجابي وعباتي ورحنا ..
طلع حاجزلي عند دكتور باطنية ..
دخل وياي شرحتله حالتي .. سالني " انت حامل ؟"
ارتبكت " هااا ماادري "
رد " هاي اثنين تحاليل سووهن النا وتعالوا "

سوينا التحاليل ورجعنا للدكتور ..
شافهن ابتسم " يابة مبروك طلعتي حامل وللاسف مشكل تيفو وياج "

مختار سمع حامل استغرب عاف سالفه التيفو وركز ع كلمة حامل ..
" دكتور صدگ حامل "
رد " اي والله شبيك شنو ماعندكم قبل "

شفت عيونه غرغرت بالدموع .. " لا عندي اثنين بنات بس مااتوقعت الله يرزقني بعد "

من سمعت كلمه حامل دموعي نزلن .. من زمان واني امنيتي اصير ام واكو طفل يصيحلي ماما ..

كتبلي علاج للتيفو .. ونصحني راجع دكتورة نسائية ..
مختار ماانتظر بسرعه سأل على دكتورة زينة وراح يحجز بس الحجز يتأخر بعد كم يوم ..

رجعنا وهو الفرحة ماشايلته .. خابر العلويات بشرهن ودموعه ينزلن ..
باوعلي اجه حضني.. مايعرف شيسوي ..
" تعاي نامي ولاتتحركين منا لمن نروح للدكتورة وهذا العلاج تاخذيه مال تيفو الدكتور يگول مو زين عليج التيفو يأثر ع الحمل "

رديت " شبيك مختار گول ياالله ان شاء الله ماكو شي"

رد " ان شاء الله.. ان شاء الله "

خابرت شذر بشرتها فرحت حيل ..
" مو گلتلج حامل والله عندي احساس وانت تگولين سن اليأس .. عيني بعدج شباب شباب .. ياااي واخيرا راح يجيني ابن خاله "

رديت " وج لاتسوين هيج استحي . ياااا وج كلما افكر مااصدگ معقولة بعد هالعمر يصير عندي طفل .. هم الحگ عليه من يكبر واشوفه عريس لو متخرج "

ابتسمت " ان شاء الله خاله عمرج طويل ان شاء الله "

مختار راح جاب البنات وعشا واجه ..
اجتني مروة تركض " صدك راح يجينا طفل بابا گالي "

ابتسمت " اي حبيبتي راح يجيجن اخو "
ردت زينب " مابحاجة اخو احنة "
رديت " مووشرط اخو هيج حجيتها المهم يصيرون عندي ثلاث بنات عندي "

دارت وجهها ودخلت .. هي ثاني متوسط .. جماعتها بالثالث لان بسنه الامها توفت تمرضت وماداومت "

دخلت تدرس حتى ماتعشت گالت مااشتهي ..
حجيت وي مختار يروح يحجي وياها ..

دخل بالنص ساعه يحجون بعدها طلع هو وياها وتعيشنا ..
بعد مانامو البنات رحنا الغرفتنا ..
اخذني الحضنه ونام ..
" تدرين سماهر امنيتي يصير عندي ولد .. ابد ماافرق بين الولد والبنية لان حرام عليه والبنات رزق .. بس هيج اريد يصيحولي ابو الحسن "

ابتسمت " عود ليش الحسن .. ليش مو حسن وبس "

رد " حلمت من زمان اول مااتزوجت المرحومة .. ابو ناطيني طفل وگالي هذا الحسن ابنك ..
ومن يومها واني اتمنى الحسن يجي .. حتى بناتي من يجن ابد مااضوج لان بنات بس هي امنية تعرفين شقصد ؟"

رديت " اعرف اعرف حقك هذا ومو عيب "

عشت هالفترة ع الابر والمغذيات .. حملي طلع صعب كلش ..
الدكتورة انطتني علاج وطلبت اراجعها كل شهر…
لان عمري كبير وهم تيفو وخاف يأثر على وضع الطفل

سمر :
ع گد ماعانيت قلة الاهتمام عند اهلي .. شفتها هنا عند بيت جدي ..
بيبي تحبني حيل وماتصيحلي الا سمورة ..
وجدو بعد من يجي گبل اخذ ملابسه وعگاله وهو فرحان بيه ..

وبعدهم ارشد .. كان كثير يقدرني .. ومن يجي دايما يجيبلي حلويات لان احبها .. وكالي شنو تحتاجين اطلبيه مني ..

اما سحر فتگلي " لا عبالج هذا حب هذا كله شفقة لان تكسرين خاطرهم "

طبعا صح كلامها يضوجني بس احاول مااهتم .
السنة راح تخلص واحنة ماانقلنا ولا داومنا ..
حجيت وي ارشد ..
وعدني السنة الجاية ينقلني ويخليني اداوم ..

هنودة اخت هاجر رغم تضوج منا بس مااهتملها ..
بس سحر ماتسكت ..
وخاصة ماجست نقطة ضعفها وهو احمد .. رغم تگول مااحب هيج ولد خفيف وتافه بس جانت تحجي وياه وتضحك علمود تغيظ هند ..

گاعدين العصر كلنا بالحديقة الجو دفئ وحلو ..
وحديقتهم تخبل ..
صبيت الجاي والكعك مثل كل عصرية .. سمعنا عياط هنودة وسحر يتعاركن ..

ركضنا للبيت ..
جانت هند تعاير سحر وتگلها " عليمن تطلعين مثل امج خطافة الزلم "
وسحر لازمتها ساحلتها من شعرها وتضرب بيها ..
المشكلة .. هند ماتسكت ومستمرة تحجي . امج الاخذت رجل اختها وانهزمت انتي واختج نفسها هم تخطفن الكحل من العين "

سحبتها مرت عمو علاء بالگوة هي ومرت عمو عامر وعاطن بيهن ..
" شبيجن زعاطيط انتن .. وانت هنودة مو بالجامعه تتعاركن مثل الجهال ..

ردت سحر " تحجي على امي وتگول خطافه زلم والله الا اموتها اليوم "

ردت مرت عمو عامر " قابل كذب .. خاف محد گالج لان يخافون على مشاعرجن .. ماگلتلن ليش اهل امي وابويه هيج سوو بامي .. او ليش انهزموا منهم .. غير من ورى امج اخذت خطيب خالتج سماهر الي هو ابوج وانهزمت وفوكاها باگت ذهبها هم "

سحر من سمعت تخبلت " جذابه انتو كلكم حاقدين تكرهون امي .. الصوج بيه عايشة وياكم دزوني الامي مااريد اكعد هنا دزوني "

مرت خالو علاء ماقبلت " عاجبج هالحجي بلة يعني تخلين عقلج وياهن "

ردت مرت خالو عامر " لعبت نفسنا كافي من يوم الاجت وهي ماخذتنا حاصل فاصل وانتو ناطيها على مزاجها "

بيبي تدخلت وانسد الموضوع .
بس سحر حبست نفسها بالغرفه وتبجي وتصيح جذابات يشوهن سمعه ماما ..

رحت الهاجر " اريد موبايلج اخابر شذر "
نطتني موبايلها .. خابرت الشذر بس ماگدرت احجي شي ..
بس گلتلها " شذر تگدرين تجين محتاجيج"
ردت " صاير شي ؟؟ يله مااتأخر جايتجن "

شذر :
من خابرتني سمر صوتها جان ماعاجبني خفت صايرلهن شي ..
بسرعة خابرت نسر جان بالمحلات اجه اخذني ورحنا
هو ماقبل يدخل ..
گال رايح يم حسام للعيادة على ماتكملين خابريني ..

دخلت البيت جدو شفت الوجوه كلها ماتتفسر..
سلمت ع بيبي وسألت ع البنات ..
ردت بيبي " بالغرفه . هنودة بساعة عصبيه حجتلهن كلشي عن امج وابوج .. وسحر تخبلت ادخلي هديها اذ اجه جدج وسمع تصير مشكله "

دخلت جانت عيونها وارمة ..
تلكتني سمر سلمت وسألتني " هالحجي صدگ.. يعني ماما اخذت بابا من خاله سماهر"

عاطت سحر " اسكتي ولج من كل عقلج تصدكين وهاي اصلا وياهم صافه شي طبيعي تگلج اي صدك "

اتقربت منها ..
" حقج تسدين اذاناتج عن الحقيقه لان انت راسمة صورة حلوة عنهم براسج.. ولان بابا مااذاج مثل مااذانا"

ضحكت" وشسوالجن بله لو لان ماخلاج تتزوجين حبيبيج وانت شسوالج احجي "

رديت بصعوبة وبالگوة انطقها " راح اگلج ليش انهزمنا رغم ماردت اوسخ الصورة البالج . بس بابا من طفولتنا وهو يتحرش بينا وانت جبيرة وتعرفين شنو تحرش ..
انهزمت منه بعد ما حاول يعتدي عليه واجيت لهنا والوحدي اخذوني ناس غربه ومرة جبيرة صارتلي كل اهلي ..
لگيت وراي ثار من عمامي وخوالي والسبب ابوي كان خاطب خاله وعلى وشك زواج.. بس ماما اخذتة وانهزمت .. انت عقليها يعني بنت عم وابن عم حبو بعض ويردون يتزوجون ليش اهلهم يرفضون .. لازم اكو سبب قوي "

ضحكت بصوت عالي " وهاي اخر اختراعاتج .. گولي الثانية صدگتها الاولى منين جبتيها لو تردين تغطين عارج وانت الثانية تغطين شكلج ونقصج .. انتن اثنينجن مريضات .. الله يحاسبجن على كل كلمة گلتنها بحق بابا . عمرة كله ماباوعلي بنظرة موزينه ابد ليش ؟؟ ليش بس انتن ؟؟ هااا احجن "

ردت سمر " لان انت من صغرج وكحة وتاخذين حقج مو مثلي استغل وجهي وضعفي "

ردت " گومن منا لا وحق الله ماتشوفني بعد .. كافي متحملة وكاعدة غصب عني .. خلي خالج ياخذني الامي خليه يحبسني يمها مااريد ابقى هنا "

صارت تبجي .. ردت اخذها الحضني ضربتني ودفعتني
اشرت السمر نطلع..
عرفتها ماتصدك ولا راح تصدك وتشوه الصورة الحلوة الراسمتها بخيالها عن اهلي ..

سألتنا بيبي " هااا بشري شلونها "
رديت " تتعود شوية شوية وتنسى "

بقيت شوية بين مااجة نسر اخذني ..
طلبت نروح الخاله مناك اشوفها ونباركلها ..

رحنا البيتهم وهاي اول مرة اروحلهـم..
شافتني فرحت ..
وعمو مختار هم رحب بينا واصر نتعشا يمهم ..
كانت طايرة من الفرح بسبب حملها وعمو ميخليها تشيل اي شي بسرعة يروح ياخذة منها ..
حتى موصيلها يگول على غساله ماعين حتى ماتتعب
وخاله تضحك :
" تحجي صدگ مختار والله اذا جبتها مااغسل بيها .. اذا مو بيدي اغسلهن واشطفهن مااعرف "

من طلعنا بالسيارة گلتله " شفت شلون يحب خالة ويخاف عليها .. الله عوضها خطية "

سحب ايدي وباسها " دخل يجي ابني وادللج دلال اصلا اشيلج من مكان المكان "

رديت " يعني متدللني لا اذا اجاك ولي العهد لو فرضنا مااجه "

ضحك " طبعا لا انت متربعة هنا اجة او مااجة تبقين اعز وحدة عندي "
بعدها تحولت الضحكة الى تنهيدة ..
"انت ادعي تطيب عذراء وتصير زينة كلشي مااريد بعد من اشوفها تذبل اتدمر .. لو ملوكه كلما تكبر اتدمر واني اراقب حركتها ونطقها . هاي كبرت والسانها ثگيل ورجليها ماتمشي عليهن اريد اخذها للخارج بس تطيب عذراء بلكي عملية شو شنو يسوولها "

رديت " ان شاء الله انت بس خلي ايمانك قوي وربك اليحلها ان شاء الله "

وصلنا البيت ..
سمعنا خاله تحجي بالتلفون ..
" الصوج بيج انت .. زحتي النعمة من گدامج ولج ابني راد يموت بسببج لو ماالله ستر .. شلون ترديني ادخلج بيتي مرة ثانية "
من سمع الكلام نسر عاط " منو هااااي يمة ؟"

يتبع .…

///// #البارت احدى وســـبعون /////

ج2


من سمع الكلام نسر عاط " منو هااااي يمة ؟"

بسرعة طبگت الموبايل " هااا هاي هديل بس ابد ماانطيتها مجال والله "

رد " وليش اصلا تحجين وياها "

ردت " شمدريني بالاول امها حجت وياي ودور اخذتها من امها تبجي وتگول اعيش خدامة بس اربي بنتي وكلشي مااريد "

هز ايده " مافكرت ببنتها قبل .. اصلا وجودها من عدمه نفس الشي .. احذفي رقمهم وبعد ابد لاتردين عليهن اذا خابرن "

دخلت لجوة جانت عذورة گاعدة..
" شلون صرتي ؟"
ردت " شلوني ماادري اشو مااحس بتحسن "
رديت " قابل ترديها بسرعه ماصارلج هواي من بديتي العلاج .."

دخل نسر وراي بعصير الفواكه .. غمضت عينها
" لاحبابين مااريد "

رد " مو بكيفج "

تركتهم وطلعت اشوف البنات ..
جانت دنو تلعب وي ملوكة ..
شافتني ابتسمت " ماما شوفي ملوكة تضحك "

گعدت يمها احجي وياها والعب .. صايره تنتبه وتضحك
اجو بيت عمهم وقصي وياهم ومرت قصي ..
اجو يشوفون عذراء ..

كعدنا البنات وحدنا واجت بيداء هم دايما تجي بعد العشا ..
حتى نسر طلب منها ترجع يمنا وتاخذ الطابق الفوگ كله الها هي وولدها ..

سألت رغد على هديل.
" اگلجن مرت نسر الثانية صدگ طلگها ؟؟"
ردت بيداء " اي صدگ "
ردت " وهاي بنتها خطية شلون تحرموها من امها "
ردت بيداء " ليش شامريها بالشارع غير يمنا ومحد مقصر عنها "
ردت " مااعرف اشو احسها صعبه ام تنحرم من ابنها ..
ماگلتلجن اختي حامل وراح تنطيني الطفل .. گالت ولد بنية هو الج .. لان عندها سته وهذا صار بالغلط "

سألتها عذراء " لعد خطية شلون تاخذيه وتحرميه من امه "

ردت " هاا لا هذا الوضع يختلف . اصلا هي بس تجيبه تنطيه الي وهي گالت اريد اذبه واعقد .. گلتلها جيبي وانطيه الي وعقدي ليش حرام تذبه ع الاقل اني اربيه "

سألتها اسراء " مو ع اساس مرت عمي تريد تزوج قصي"
شهگت " بيش طالباته يمة .. اصلا گلتلهم احرگ روحي اذا فكر يتزوج .. كلتلهم اخذله بنت اخوي عمرها 30 سنة ماقبلوا گالوا خاف بيها حرام وحلال ماندخل بهيج امور .. تحلم ازوجه غريبه وتاخذه مني ماادري شذر شلون قبلت "

سألتها بيداء " يعني اذا زوجتيه بنت اخوج ماراح تاخذة منج وخاصه هي اصغر منج "

ردت " لا ع الاقل هاي بنت اخوي مو غريبه وولدها ولدي يعتبرون مو مثل الغريبه "

ضحكن البنات " والله رغد مانعرف شلون تفكرين هي بعد الضرة مرة سواء قريبه او غريبه "

بسرعة قلبت الحجي عليه اني ونسر وصارت تگلي انت شنو مربية البناته روحي عالجي نفسج وشوفيلج طفل

اشرتلي عذورة .. " شذر مشايفه علاجي وين اريد اخذه"

كمت بسرعة وراها .. واسراء تركتهن بقت بس بيداء يمها صرعت راسها بالسوالف .
ودور تگلها ماتفكرين تتزوجين المن باقيه هيج ..

ردتها بيداء " يااا شبيج دادة يعني من جنت شابه مفكرت اتزوج هسا لمن ابني بطولي وعلى وشك زواج افكر اني بالزواج "

لزمت راسها عذراء " يبوووو الله يساعد قصي عليها "
اجت رساله الموبايلها ..
فتحتها ابتسمت ..
سألتها " شنو سر هالابتسامة "
ردت " تعاي شوفي هذا الرقم كل يوم الصبح يدزلي صباح الخير وبالليل مساء الخير او تصبحين على خير وابد ميحجي غيرهن ورغم ماارد عليه بس مستمر شله خلگ "

رديت " احم احم معجب سري"
ردت " لو يدري بيه على حافه الموت مايتورط "

عطت بيها " اسم الله شنو هالحجي ليش هيج متشائمة"

اتنهدت " لان تعبت "
رديت " وين ذيج عذراء الكلها حيوية.. "
ردت " وج ماتحمل الالم .. يعني بس ما اخذ مسكن اتأذى ساعات احس حتى المسكن مايمشي بجسمي بعد"

رديت " والمسكن هم مو زين هواي "

طلعوا بيت عمهم ..
نومت ملوكة وفرشت الي والنسر بالاستقبال ..
سحبني الحضنه وغفة على صدري..
" اشتاقيتلج واشتاقيت الريحتج والبيتنا وگعداتنا .. من يوم مرض ملوكة واني ماشبعان منج .. "

باوعتله " انت قربك مني وانفاسك من تنام يمي كلش كافي "

ابتسم " بس اني طماع مااكتفي بالقليل كلما تنطيني اگلج هل من مزيد "

ضحكت " وشذر ماتگول لا النسرها "

ضحك " يعني معناها اجاني الضوء الاخضر "
هزيت راسي سحبني الحضنه ..

وصارت اجسادنا تتلوى .. فأبحرتُ مستسلمة للمسـات محبوبي .. فلم اكن قادرة على كبح ذلك البحر الهائج الذي جعلني اغوص بأعماقه ..
واتلذذ به كأنه قطعة سكر تذوب بطرف لسانـي..

عذراء :
بكل مرة اخذ العلاج اتأذى اكثر .. صرت ابجي واعيط
بس حسام ماتركني ابد…
رغم دوامه وعيادته .. لاحظت اهتمام بيه مو طبيعي
وفهمت ليش كان يحاول يبعدني عن معتز سابقا ..

كان دايما يحذرني بطريقة غير مباشرة بس مااسمع منه واصده ..
لان كان حبي اعمى او يمكن حكمت عليه بسبب مريم

قررت ارجع للدوام لان احس البيت يخنكني بس بأيام العلاج اخذ اجازة احسن ..

داومت الكل تحمد السلامتي ..
گاعدة بالمختبر رن موبايلي ..
باوعت هذا حسام ..
رديت " الو "
رد " شلونج اليوم ؟"
رديت " احسن "
رد " لاتبقين بالبيت اطلعي للحديقه الصبح اشتمي هواي تمشي لاتبقين نايمة "

رديت " اي هو هم هيج .. حتى داومت من الضوجة "
رد " داومتي شنو ؟؟ وين انت هنا "

ضحكت " شبيك مستغرب ؟"
رد " ليش داومتي مو اخذتلج اجازة بعدج ببدايه العلاج وتعبانه "
رديت " مو كلتلي جاي نتخطى العلاج بصورة ممتازة واشوفج متحسنه اشو غيرت كلامك بس لاتكذب عليه دكتور ؟؟"

ضحك " غلبتني "
سكت
صحت الو
اتنهد "وياج . يلة شوية واجيج لاتعبين نفسج "

التهيت بالشغل ساعه اكوم وساعه اتعب اكعد البنات ولولد ميخلوني اتعب ..

قبل مينتهي الدوام اجاني ..
" يله كافي انتهى دوامج "
رديت " ليش منو نهاه ؟"
رد " اني "
ضحكت " لازم انت المدير وماادري "
رد " خلينا نطلع "

طلعنا بالطريق لعبت نفسي ..
اشرتله يوگف ..
نزلت بسرعه بطرف الطريق استفرغت ..
اجة وراي بسرعه جاب بطل مي غسل وجهي وحلگي
بقيت صافنه عليه وهو وجهة اصفر ومتوتر .. يغسل بوجهي ويگلي شتحسين شبيج ؟"

قطعت صفنتي بسرعه وابتعدت عنه ..
" مابيه شي يمكن لان جعت "

رد " ليش ماگلتي من سألتج .. امشي اغديج "
رديت " ماكو داعي هسا نروح للبيت "
رد " مااقبل نقاش "
تعصبت " انت ليش تلح حسام .. ترى اهتمامك زاد عن حده "

باوعلي " ليش شسويت ؟؟ غير بنت عمتي قابل غريبه انت "

سكتت عنه ..
رجعني للبيت .. دخلت هو راح ..
شافتني شذر " خير شبيج وجهج تعبان "

رديت " اي شي اكله من الجوع يمكن "
ردت " اي هسا دقايق واصبلج "

دخلت لجوة سمعت ماما تحجي بالموبايل " اي لاتخاف هسا اخليها تتغدا وترتاح "

شافتني " هذا حسام يكول خلي تاكل.. صدك متخربطة اليوم "

رديت " لا مابيه شي "

غسلت وبدلت .. احت شذر شايله صينية بيدها
" يلة تعاي سويتلج دجاج وخضار مشوي وضوگيه يخبل طعمه .. "

باوعتلي " شبيج ضايجة "
رديت " عطت بوجه حسام "
ابتسمت " مو جديدة عليج من يومج تعيطين عليه للمسكين "

اتنهدت " شذر مااريد احد يدخل حياتي .. جربت مرة وتبت بعد مااريد "

سألت " ليش حسام دخل حياتج ؟"
رديت " لا بس تصرفاته واهتمامه واضحات وصرت اخاف من اهتمامه الزايد لايأثر عليه .. "

سألت " ومن شنو خايفه بلكي الله يعوضج "
رديت " ومن يكول راح اعيش .. واصلا مااريد احس بشفقة "

ردت " ليش صاير متناقضه بكلامج .. مو كلتي ببداية دوامي هو مهتم وكل شويه جاي ويسأل .. يعني معناها شاريج من زمان "

رديت " قبل جان هذا رأي بمعتز وشنو الصارر؟"
ردت " يووووه عذراء صايرة كلش .. دتعاي اكلي ولاتفكرين .. حاولي تنطين النفسج فرصه يمكن اذا حبتيه راح تقاومين وتتحدين الخاطر حبج "

سكتت رغم اعرف حتى لو انطيته فرصة راح تكون نهايتنا مجهولة .. اما الموت او الرفض ..
مستحيل نسر يوافق بعد السووه معتز ومريم واخيرا هديل ..

يوم عن يوم تزيد الجرعات وتعبها ..
وبدأ رحلة التحدي ..
بيومها جنت اسبح.. غسلت شعري .. وكملت فتحت عيني شفت الگاع مليانة شعر ..

تخبلت لا بل اتهسترت .. صرت اعيط وابجي ..
اجوا كلهم ..
اسمع صوت نسر يحجي " عذراء شبيج احجي افتحي الباب ليش ماتحجين "

شذر حجت وياه " روح انت منا خاف تستحي تفتح الباب .. "

شذر :
بقينا اني وخاله صحنا عليها " افتحي الباب عذراء "

فتحتها وهي لافه نفسها بالمنشفة وتبجي ..
" باعوا باعوا للگاع .. راح اصير مثلهم مووو . مو گالوا ماتصيرين صلعه اشو وكع شعري .. شعري الكنت اخاف اقص اطرافه ومحافظة عليه تالي وگع وگع "

سحبتها بسرعه وطلعتها للغرفه ..
لبستها ملابسها .. وصرت اهدأ بيها
" اهم شي تطيبين بعدها كلشي يتعوض .. شعرج يرجع بس الصحة شيرجعها .. حجيت وياها هواي وهي ساكته الى ان نامت .. غطيتها وطلعت..

شفت خاله بالصاله تبجي..
رحت للاستقبال جان نسر مدنگ ومخلي ايده ع راسه
تقربت منه گعدت بصفه وحضنته ..
" عادي تصير .. المهم هي تطيب "

رد " ماتتحمل ادري بيها . الاهم عندها شعرها من صغرها وهي تبجي اذا امي گصت شوية منه وليلها ماتنام .. مو دور هسا كبرت وشعرها الجوة خصرها راح يروح كله .. ماشفتيها بالمستشفى تتخبل من تشوف وحدة صلعة "

نزلت دموعي وياه لان اعرف عذورة شعرها عندها اهم من حياتها ..

بديت اخيطلها احجبه بس للراس مثل الكب .. واخلي بيهن شغل لو شذر ..
حتى تلبسهن هنا بالبيت كملتهن وضميتهن الوكتهن ..

بيومها خابر نسر الحسام وحجاله الصار ..
گالة عادي تصير خليها .. تضوج بالبدايه وبعدين تتعود

بس عذورة انتكست وحتى اكل ماقبلت تاكل .. صار عندها وهواس انه بيوم تگعد وتباوع الروحها بالمراية تشوف نفسها صلعة ..

عذراء :
گمت اتجنب حتى المرايا ومااشوفها .. اخاف بيوم اگعد وانصدم بشكلي ..
حواجبي رموشي كلها بدات تخف ..

اجة موعد الجرعة .. الدكتور كان يزود بالجرعات
او يكثف ..

وهم صادفت بداوم نسر . طلب حسام ياخذني وهو يجي ورانا ..
اجة حسام اخذني ..
صعدت سلمت ودرت وجهي ..
سأل " شنو متزاعلين ؟"
رديت " لا ليش ؟"
رد " اليوم ماكو ابتسامة بوجهي "

رديت " مالي خلگ شوية "
سحب وجهي بيده .. وهاي اول مرة يلمسني ..
بقى يباوع الوجهي ويبتسم ..
غمضت عيوني " يلة شفت ارتاحيت كافي "

رد " وجهج صاير يخبل وصافي شنو جنتي متحفين حتى شوارب عندج قبل "

رديت " لا تحاول تضحكني لان ماكو شي يغير الحقيقه "

رد " وربي تخبلين طالعه .. اصلا انت الله متفنن بخلقج وبكل حالاتج حلوة "

رديت " شنو هالمجاملة الغريبه شنو شفتني عيوني خضر مثلا ؟"

رد " ليش منو گلج العيون الخضر حلوة . الله مايخلق الانسان الا بأبهى صورة .. اكو حنطاويين وحلوين بعكس البيض والملامحهم جامدة "

باوعتله " شوكت تمل "
صفن بوجهي " ماامل الاخر عمري .. عذراء انت حاسه بيه مووو "

درت وجهي " خلينا ننروح "
رد " لا مااروح اذا مااحجي هالمرة .. كافي تعبت واني سنين طويلة منتظر.. عرفت بيج انخطبتي المعتز وسكتت وكلت الله ماقاسملي .. بس بعدها الله رجعج الي .. شلون الله قربج مني وترديني ابعدج عني .. حتى لو ماترديني اني راضي اصبر الى ان انول "

رديت " تتعب "
رد " على گلبي مثل العسل "
رديت " اذكرك عود "
ضحك ..

شذر :
التهينا بعذورة ونسينا ملوكة وعلاجها ..
صرنا ناخذها اني وياه .. يسوولها علاج طبيعي ..
الدكتور من شافها كال هواي متحسنه وتنتبه صايرة وتحرك اطرافها بس هي حجي ماتحجي والمشي ماكو..

من رجعنا گال نسر عندي شغل قريب من بيت خالتج ترحين تشوفيها ..

ماگلت لا اصلا فرحت ..
رحت الها .. فتحتلي الباب مروة ..
دخلت شفتها نايمة بالصاله ع التلفزيون .. زينب بالغرفه بس مروة يمها ..

سألتها عن وضعها ..
ردت " زينة الحمد لله بس ظهري ياذيني "
سأآتها " لا تتعبين "
ردت " لا وين خطيه مختار مياخليني حتى عندنا ملابس گال لاتغسليهن من اجي وحلفني .."

گمت خليت ملوكة يم مروة ..
ماقبلت خاله بس اصريت .. غسلت الملابس ورتبت المطبخ والبيت ..

دگيت الباب ودخلت الغرفه البنات ..
شفت زينب گاعدة ترسم ..
باوعت الرسمها يخبل ..
سألتها " هاي انت رسمتيه "
ردت " متشوفيني داارسمها يعني منو ؟"

رديت " عبالك حقيقه . هاي منو ؟"
ردت " ماما "

رديت " حلوة "
ردت " هي ماتشبهها بالضبط بس هيج احاول "

رديت " بالعكس كلش حلوات . بعد شتحبين تسوين "
ردت " احب الحياكة .. المعلمة تعلمنا بالمدرسه الحياكة والتطريز هاي ام الفنية بس مو مثل ماما بسرعه تحيك وحلو شغلها "

رديت " اذا تردين اعلمج اني اعرف "
شالت راسها " صدگ ؟؟ "
هزيت راسي " شنو رأيج نحيك شي للطفل الجاي وخاصه هو يجي بالشتا "

ردت " ياطفل ؟"
رديت " اخوج او اختج "
ردت " لا مااريد "
رديت " والطفل شعليه .. هذا اخوج المفروض تحبيه وتراعيه مثل مروة شنو ذنبه اذا انت ماتردين امه "

ردت " مو مااريدها .. اصلا هي ممسويتلي شي… بس مااحب اخلي احد بمكان ماما .. تروح تزعل عليه "

رديت " وهي ليش تزعل بالعكس هي تتمنى تشوفجن مرتاحات واكو احد يحبجن ويراعيجن .. "

سكتت ماردت ..
طلعت يم خاله ..
سالتها ع وضعها گالت زينة الاسبوع الجاي عندي مراجعة ..

بعدها سألتها ع اخواتي ردت " مااشوفهن هواي بس اخابر واسأل عليهن "

خليت خاله تخابر الهاجر وانطتني سمر ..
حجيت وياها .." هلو حبيبتي شلونج سحر شلونها "
ردت " زينين شوكت تجينا "
رديت " ان شاء الله احاول "

بقيت احجي وياها شوية وسدته بس ماعجبني صوتها
گلت احجي وي نسر واروح فد يوم ..

سمر :
قمر صارت تحبني كلش حتى مرات تنزل تنام يمي ..
هاجر حامل وماتگدر لان بطنها كبرت ومابقالها شي

الصبح اجت قمر گعدتني مثل عادتها ..
اخذتها عن سحر لان تبقى تعيط .. وطلعت بيها بالصاله. بعد محد گاعد ..
خدرت الجاي وسلكتلها بيض الها والبيبي وجدو ..

رجعت يمها فتحت التلفزيون ع طيور الجنه ووطيت صوته ..

اشتميت عطره قبله نزل ..
اتجهت عيوني بسرعه للدرج .. نزل بهدوء مثل عادته وبلبسه الرسمي ..
وبابتسامته المرافقة كلامه وهو يكلي "صباح الخير سمورة "

ابتسمت " صباح النور "

يجي يتقرب من قمر يلاعبها شوية ويكوم ..
" سمورة اكو جاي "

هزيت راسي "اي هسا اصبلك اسويلك ريوك ؟"
رد " لا بس جاي مستعجل "

يشرب الجاي ويروح وقبلها يلتفت :
" محتاجة شي اجيبه وياي "
اهز راسي " لا " ..

بأشهر قليلة وباهتمامة شغل تفكيري..
صرت احس بجيته وبخطواته قبل لااشوفه ..

احساس دخل كلبي شلون وشوكت ماادري ..
استحيت من حالي بس مو بيدي ..
ساعات اقارن نفسي بأمي .. شلون احب شخص متزوج وزوجته حبابه وياي ..

احاول اخفي هالمشاعر بأي طريقة .. بس اهتمامه الزايد يجذبني ..
حتى صرت من يتواجد بينا لو وقت عشا مااباوعله او اشغل نفسي ومااشوفة ..

لكن راح يگدر هالقلب يسيطر على مشاعره الخفيه ومايكشف عنها للعلن ..

شذر :
گاعدين اني وخاله بالحديقه ..
هنا كانت مواعدتنا تجي اليوم هي عوايدها اكثر شي تجي بيوم العطل يعني جمعة وسبت ..
لان هي وزوجها دوام ..

اجت بيومها ضايجة ومقهورة ..
طلعت عذورة يمنا ..
اشرتلها تكعد بالمرجوحة ماقبلت گالت ادوخ ..

سألت هنا " بيج شي اشو وجهج اصفر "

ردت " اسكتن غير اجينا نطلع ونجيكم .. شفنا ورقه ع السيارة مخليها وفوگاه طابوگة ..

كاتبين بيها " اعقل لا نسويلك گرصة اذن "

شهگت خاله " وهسا شسويتوا .. مااشتكى "

ردت " لا وين اصلا اني دمي فاير وهو يضحك "
يگلي" يمعودة تلگيهم زعاطيط قابل الهوى بيدهم "

ردت خاله " ماحجيتي وي اخوج "

ردت " اي اخابرة واحجيله لان هذال اذا ابقى وراه بس يستهزأ ويضحك عليه "

هنا :
بالفترة الاخيرة هذال هواي تجيه تهديدات .. بسبب اراضي توزعت ويردوها الهم وهو ماموافق ..
وع اساس صاير فساد وهو ماساكت عنه .. والمشكلة بكل برود يكلي ذولة الخربت عليهم يخصون ناس كبار بالدولة يعني مسنودين "

صدگ خفت .. خابرت نسر وحجيتله ..
" گال خلي يقدم شكوى ولو مادام ماكو اثبات همة ورى التهديد فماتاكل شكوته "

هنا زاد الخوف عندي .. لدرجة گلتله اترك الشغل خلي يولي .
ضحك " واتركه حتى يحصلون مبتغاهم لا حبيبتي مو هذال اليخاف "

باسني وغمض عيونه ونام ..
بقيت اباوع الملامحة وبشرته الحنطاويه .. بعد ماالله رزقني بيك وعوضني تروح مني .. لا يارب لاتختبرني بي ..
اذا تحملت خيانة ليث ..
فمستحيل اتحمل يصير شي لاانسان الحبني لدرجة صرت اشوفه كلشي بحياتي ..
صار اب الاولادي بوقت الابوهم تاركهم ومامهتم بيهم

شذر :
تعبت من شغلة العلاجات والدكاترة .. كلما اكول بطلت
بس مااگدر ..
احس نسر من حقه يكون عنده ولد ..
بدأ يكبر وطلع الشيب بشعره حبيبي راح يدخل بالاربعين ..
وكلما يكبر يزيد هيبة ووقار ..

بيوم راح نسر وي عذورة للعلاج ..
بقينا بس اني وخاله ..
اندگت الباب من الصبح فتحتها شفت هديل وامها
استغربت ..
سلمن ودخلن ..
رحت للغرفه صحت خاله جانت تنوم بملوكة ..
شافتهن سلمت عادي وگعدن ..

جبتلهن ماي ..
عين هديل عالغرف .. سألتني :
" وين ملوكة ؟"
همست " نايمة "

راد تكوم اشرتلها خاله تگعد :
" عيني ام هديل تدرين بنسر عصبي واذا اجه وشافها مايسكت ومعناها تخليني امام الامر الواقع "

ردت " عيني ام نسر احنة اهل قبل لانصير نسايب .. مهما يكون فهاي بنتها ومن حقها تشوفها وتاخذها يمها مو من حقكم تحرموها من بنتها "

ردت خاله " من افعالها .. اكثر وحدة جنت مساندتها اني وتالي تموت ابني .. ماعرفت تحافظ على بيتها وبنتها قبل ليش هسا اجت "

گامت هديل تبجي " خاله والله ماتسمعولي صوت .. اربي بنتي وبس بس لاتبعدوها عني "

ردت امها " خيه ابوها معذبها .. حتى هسا گلتله اخذها نزور وترجع مايدري جايين لهنا .. وبعدين هي غرفتها هنا وعندها حقوق مايصير هيج "

ردت هديل " مااريد اي شي بس بنتي .. "
باوعتلي " شذر حسي بيه اني ام . انت دنو بس ربتيها تگدرين تستغنين عنها "

رديت " اعرف بس لاتدخليني اني رغم اذيتج الي بس مالي علاقه انت ونسر "

گامت تبوس بية وتتوسل اخر شي دنگت ع رجلي وسحبتها :
" شتسوين ؟"
ردت " ابوس راسج وايديج احجي وياه يرجعني بس البنتي .. وحق الله مالي علاقه بيكم ولا اطالب بشي ولا اوصل يمكم بس خلي يرجعني "

بقيت ساكته ماعرفت شحجي وياها وحتى ماتنطي فرصه احجي ..
گمت للمطبخ بحجة اطبخ وتركتهن يم خاله .. وخاله لاتكدر تطردهن ولاتگدر تحجي .. وهن بقن گاعدات لحد مااجه نسر هو وعذورة من العلاج ..

جانت تعبانه مثل عادتها.. اخذتها ترتاح بالغرفة ..
شافهن گاعدات استغرب ..
" شعندج هنا وبأي عين اجيتي "

گامت ام هديل . اشرلها " لا خاله جيتج على راسي بس بنتج مامرحب بيها هنا . واني سبق وان گلت اذا اجت اكسر رجلها وابوها عاهدني ماتجي هو هذا عهده"

ردت امها " اي والله مايدري لو يدري يموتها هو اصلا مكرهها حياتها رادت تنتحر من وراه .. اكسب بيها اجر ورجعها "

ضحك " تحجين خاله اي ثواب يجيني من وحدة تشتغل بعمل الشيطان .."

گامت تبجي وتتوسل " والله اگعد بغرفتي وماتسمع حس الي بس اربي بنتي .. ادري غلطت بس هاهي توبة والله مااسوي شي .. واصلا مااطالبك بأي شي ومالي علاقه بينك وبين شذر…

عافها ودخل للاستقبال .. راحت وراه تركض ..
" لو ترجعني البنتي ومااطالبك بأي شي .. او تنطيني بنتي اخذها وياي "
اجيت يمهم ومااعرف ليش كسرت خاطري من تبجي .. اشرتله باوعلي ورد ..

زين !!
ترجعين بس محرمة عليه وماارجعج الذمتي يعني مااعقد عليج حتى ماتطالبيني بشي بيوم من الايام .
هااا شگلتي ؟؟

يتبع… ..

///// #البارت الثاني والســـبعون /////
ج2


عافها ودخل للاستقبال .. راحت وراه تركض ..
" لو ترجعني البنتي ومااطالبك بأي شي .. او تنطيني بنتي اخذها وياي "
اجيت يمهم ومااعرف ليش كسرت خاطري من تبجي .. اشرتله باوعلي ورد ..

زين !!
ترجعين بس محرمة عليه وماارجعج الذمتي يعني مااعقد عليج حتى ماتطالبيني بشي بيوم من الايام .
هااا شگلتي ؟؟

انصدمت مااتوقعت هيج يگلها .. صح كسرت خاطري ولان ام .. بس مستحيل انسى السوته بيه او بنسر ..
تهمتني بشرفي وفرقتنا ورادت تموته ..

ردت عليه بسرعة..
" اي موافقة "

سألها بأستغراب " يعني ابوج يقبل تجين تعيشين هنا بدون عقد "

ردت " اني اقنعه "
ردت امها " ابوج لو تموتين مايقبل .. يذبحج ومايخليج ترجعين هيج "

رد نسر " هذا العندي .. مال ترجعين مرة الي مستحيل ارجعج انلدغت مرة منج ومااعيدها بعد "

طلبت تشوف بنتها ..
ملوكة بس شافتها صارت تبجي عرفتها بسرعه رغم هواي مشايفتها .. بالكوة اخذتها خالة وسكتتها ..

اخذت امها وطلعت ..
باوعتله ودرت وجهي ودخلت ..

اجة وراي ..
" شبيج "
ضحكت " شبيه شنو .. اشرتلك حتى ترفض لو حتى ترجعها "

رد " منو گال رجعتها .. اني ذليتها واذا رجعت صدك تتحمل الذلة.. شفتي ملوكة شلون بجت عليها .. ملاك مريضه مو مثل دنو ربتيها انت وتعودت عليج "

رديت " لعد خليها عند امها ليش تاخذها منها "

رد " وعلاجها فهميني .. مستحيل انطيها ملاك .. وبعدين اعرف ابوها مايقبل يعني اني نطيتها شرط تعجيزي فلا تشغلين بالج "

رديت " باوع نسر .. من عمر 16 سنة واني اشوفك سند الي .. شما سويت سامحتك وقابلتك بطيبة گلب سواء انت او اي احد يأذيني ماحقدت يوم على احد .. وماانكر ملاك قاهرتني وحرام تنحرم من امها .. بس مو معناها ترجعها .. كلكم حتى خاله من تحجون تذكرون السحر السوته وبس .. ماتذكرون انه هي طعنتني بشرفي وردت اموت بسببها .. شلون تثقون بعد بوحدة مثلها .. وهي شنو فرقها عن مريم اثنينهن اتفقن عليك ودمرن بيتك شمنتظر لمن يهدمنه كله "

رد بعصبيه " شبيج شذر انت تفهميني لو لا .. ماترجع شبيج واذا صارت معجزة وابوها وافق .. اصلا راح تكون حالها حال اخواتي بالبيت او اخليها يم بيداء علمود ملاك وعلاجها بس والا مستحيل اباوع بوجهة انت عندي كلشي بدنيتي شلون تتوقعين افضل حثالة عليج .. "

رديت " لا تستغل طيبتي نسر .. ولاتختبر حظك مثل كل مرة . اذا دخلت مرة هديل برضاتي .. فهسا مستحيل تدخل الا على جثتي لو طلاگي .. وانت اختار بعد "

ردت خاله " يمة يكلج مايريدها علمود بنته "
ضحكت " انت وحدة من الناس خاله لو بجت الج بسرعة تجين تنگين ع راس نسر ياخذها "

ردت خالة " ادري بيج راح تبقين تلوميني "

رديت " لعد الوم منو گليلي . نگيتي ع الطفل واريد ازوجه وهاي النتيجة ..
استغليتوا سكوتي وطيبتي وياكم ومانصفتوني ..
فوگ تركني انزف وردت اموت ومحد اجه وشافني ..
لو ماخاله تجي جان اني ميته .. وفوكاها بدل ماتسألين عليه .. صرتي تسألين على خالتي ومنين .
اي عندي اهل بس تركتهم كلهم لان اذوني .. اختاريتكم انتو اهلي وحبيتكم . اعتبرتج امي والبنات اخواتي وتالي بكل مرة تصير شغله كلها تدير وجهها عني..
انطيني يوم اذيتكم بشي او حفرت من وراكم .
الوحيدة التعاملت وياي بطيبة گلب هي عمة خديجة رغم عرفت اهلي وكلشي عني بس اعتبرتني بنتها "

قاطعتنـي " يمة كافي موتي نفسج هذا كله ضامته بكلبج علينا شبيج انهديتي "

اتنهدت " لا ابد والله ماضامة بكلبي عليكم بس هاي الحقيقه .. والحقيقه مرة .. تعبت من اتصرف وي المقابل بحسن نية وهو يتصرف وياي بالعكس "

رد نسر " كافي لاتفرفحين الترديه يصير "
رديت " المفروض انت تعرف الاريده بدون مااحجيه "

تركته ودخلت للغرفة ..
باوعتلي عذورة جانت تعبانه ووجهها اصفر…
" زين تسوين اذا رجعت اني هم ماابقى هنا اروح وياج"

اتنهدت وسكتت ماردت ازيد همها ..

گمت سويت غدا ..
دااغسل الخضرة اجة حاوط خصري بذراعه وسحب شعري وشم رگبتي ..

ابتعدت عنه ..
ضحك " هاي شنو الحلو زعلان بعده "
باوعتله " هذا مو زعل الزعل الحقيقي بعدين تشوفة "

رد " وحق الخلقج احبج .. وانت بكفة والدنيا عندي بكفه .. شنو هديل او غيرها مايوصلن الاضفر رجلج "

سكتت عنه ..
ضحك " يابة تخبل الغيرة عليج تموت .. لو ادري مخلي هديل تجي من زمان شو ماجنتي تغارين قبل ؟"

رديت " منو گالك مااغار .. بس جنت بأمر واقع وماشفت شي عليها حتى اخرب حياتها . بس بعد الصار الوضع تغير .. نسر اكثر واحد تعرف اني شگد انظلمت اياك تظلمني بعد "

صار يشاقيني ويسوي حركات ويحضن… ابتسمت بثگل مااتحملت ..

اجت دنو من الدوام هسا هي بالسادس ابتدائي تحب الدراسة كلش حتى دراجتها عالية ..

طلعت ورقة من جنطتها " ماما باجر گلولنا اجتماع الامهات قبل الامتحانات يردون يجتمعون بيكم "

ثاني يوم اخذني نسر ورحنا ..

دخلت المدرستها حجت المديرة عن الطلاب ومستواهم ومابقى شي للامتحان وكذا…… .

سألت ع مرشدتها… دلوني بيها ..
گلتلها اني ام دنيا نسر ..
صفن بوجهي .. بعدها رحبت عادي ..
" اجيت اسأل علـى مستواها "

ردت " تحجين صدگ !! جاية تسألين ع دنيا .. عيني روحي وانت مطمأنه .. بنتج اخلاق وادب وشطارة وترتيب.. دفاترها شكلها كلها نزاكة ونظافة "

جنت اسمع وطايرة من الفرح .. اي هي هاي بنتي .. صح ماولدتها ولاطلگت بيها ..
بس من اجيت وشفتها لأول مرة من كان عمرها سبع اشهر دخلت گلبي .. شفت نفسي بيها واتمنيت الها قدر مختلف عن قدري ..

صارت جزء مني .. ربيتها وكأنه اربي نفسي .. علمتها على كلشي جنت افتقد لتعليمه .. انطيتها الحنان والامومة الانحرمت منها ..
كنت ادللها واعلمها ع الصح والخطأ بنفس الوقت
وهسا بنتي كبرت ..
صارت تفهمني قبل لااحجي .. حلمي اشوفها من المتفوقين .. باحسن الجامعات وافتخر بيها ..

طلعت نسر سأآني " هااا شكالوا "
رديت " بنت شذر يعني شيگولون عنها "

ابتسم " اي والله بنتج .. محد اله فضل بتربيتها غيرج اني جنت دوم مشغول عنها وانت صرتيلها ابو وام بنفس الوقت ربي ينطيج اكثر من نيتج"

خابرتني خالة رديت ..
" الو خاله شلونج "
" هلو امي شلونج "
" تمام انت شخبارج النونو شلونه "
ردت " زين متعبني كلش .. هم رحتي الاخواتج "
رديت " اي رحت قبل كم يوم "
ردت " مو هاجر مرت ارشد يگولون حالتها تعبانه فد مرة "

رديت " خطية ماتستاهل وارشد هم خوش ولد "
ردت " اي والله گالتلها الدكتورة ميصير طفل فوك طفل وهي اصرت الله يگومها بالسلامة "

باوعت النسر " تگدر تاخذني البيت جدو يكولون هاجر مرت ارشد حالتها تعبانه "

هز راسه " زين گومي بسرعه اوصلج بطريقي"

وصلني البيت جدو وراح ..
دخلت البيت جان مخبوص ..
سلمت عليهم وبيبي كاعده مثل عادتها ..
سألت " شلونها هاجر سمعت من خاله هسا "

ردت بيبي " اي امي اي .. لج امي عنيدة اصرت الا تحبل . هي عندها خثرة .. وهسا تكلها الخثرة صاعدة واذا وصلت الرئتها تموت .. "

شهگت " لا اسم الله ان شاء الله تطيب .. وترجع هي وابنها بخير .. مو هم ببنتها صارت عندها خثرة "

ردت مرت عمو علاء " اي صح بس قليلة .. مو مثل هسا هسا صاعدة وخانكتها حتى نفس بالگوة تتنفس وحتى عمليه مايگدر ابو التخدير يگول مااتحمل مسؤوليتها .. عود گلنه خلي يطلعون الطفل يعيش يموت ميخالف المهم صحتها هي "

جانوا البنات كلهم يبجون حتى سمر .. اعرفها حساسة حبيبتي كلش ..

سمر :
اكثر وحدة جانت تحجي وياي هي هاجر رغم بالبداية ماحبتني بس شوية شوية صارت تتقرب مني ..

دوم تصيحني الغرفتها اصعد اذا ارشد بالدوام لو طالع
ارتب وياها الغرفه لو ملابس قمورة ..
وبعدها تحجيلي عنها هي وارشد ..
جنت اتوقع متزوجين عن حب من نظراتها اله ونظراته الها ..

بس صدمتني من گالتلي :
" اني وارشد كنا مثل الاصدقاء او اخوة .. ابد ماتوقعت بيوم اتزوجه .. جان يدرسني هو وبيوم الامتحان يسهر وياي ..
الى ان وصلني للجامعه من كبرت حسيت بمشاعري اتجاهة مو بس مشاعر صداقه او ابن عم واخو .. لا المشاعر كبرت بحيث صرت اغار عليه من يحجي ع بنات الجامعه زميلاته او يتصلن بي ..
اتنرفز واعصب .. واحجي عليه ..
" انت متستحي كل شوية وحدة تتصل عليك ماتگول بنات صغار بالبيت وولد مراهقين " ..
ضحك ورد " وبنيه كاتلتها الغيرة وراح تموت "

تعصبت " اني مستحيل ع شنو اغار انت مثل اخوي "
جان يستفزني بضحكته ويطلع "

بعدها تخرج واني بعدني ادرس ..
من تخرجت قرر جدو يزوجه .. كنا متوقعين الوحدة
من الجامعه .. وبيومها انقهرت ..

تالي اجت ماما حجت وياي " جدج يريد يعقدلج على ابن عمج شتگولين موافقة لو لا ؟"

رديت " هااا ياابن عمي " ردت اتأكد واسمعها باذني
ردت " ارشد يعني منووو "

ابتسمت وحتى ماما شكت .." بكيف جدو اني "
ردت بضحك " اي ع اساس لو مموافقة جان گلتي بكيف جدو"

بيومها طرت من الفرح بس گمت استحي منه .. ابد ماطلعت ولاخليت عيني بعينه اليوم الخطوبة..

المشكلة لان احنة ببيت واحد اثنينا ..
بقيت بغرفه ماما فوگ بدلت ورتبت نفسي خالتي سوتلي شعري ومكياجي ..

نزلت جان گاعد يم بيبي .. التفت باوعلي ابتسم ودنگ ..
عشقتة اكثر واكثر ..
سوينا حفلة بينا وركصنا .. عماتي واحنة وجدو وبيبي
جان يوم مميز ..
تزوجنا بعد اسبوعين من خطوبتنا حتى مالحگنا نتمتع بيها ..
بس عوضني بعد الزواج .. طلعنا وسافرنا وتونسنا وبعدها حملت بقمورة گعدت وسكتت ..
بس هااا كنت اموت غيرة… بحيث اذا خابرته وحدة ع قضية او استفسار .. اضوج وانقهر ..
وهو دوم خطية ياخذني ع گد عقلي ويضحك .. اعرفه وفي وميباوع الغيري بس اغار مو بيدي..
هو احسه كلشي الي .. اخوية وصديقي وحبيبي وزوجي ..
تصوري اول مااجت شذر .. وجانت عيونها ملونه تخبلت صح احنة حلوات بس للامانة ترى شذر احلى منا حتى احلى منجن ..

ومو تزعلين بسبب امج وسوايتها تخوفت وتخبلت بيومها وبقيت الليل كله مااحجي وياه لان وصلها ..

ضحكت ع سوالفها " ومن اجينا هم حاربتينا بس لا هم غرتي"

ردت " اي والله ليش الكذب .. بس ماغرت منج لان مبينه حبابه بس سحر لا تخوف "

حسيت بتأنيب الضمير وهي تحجيلي عن ارشد وحبها وغيرتها واني للحظة رف گلبي عليه ..

مستحيل نگدر نسيطر على گلوبنا بس لازم نتحكم بعقلنا ومانكسر گلب احد ..

المشكلة كلما تحجيلي عليه .. ازيد بحبه .. الحب التحول الى صراع بداخلي واذاني..
من اشوفة صرت اتجنب احجي وياه ..

مرة اجه واني اغسل ماعين .. دخل سلم ..
رديت السلام ..
" جوعان شمسوين غدا "
رديت " تمن ومرگ بامية وتشريب "

رد" زين لعد صبيلي سمورة بين ماابدل واجي "

جان جاي من الدوام.. بدل ونزل ..
اني صبيت بسرعه وخليتله ع الطاوله وردت اطلع
صاح وراي " وين ؟"

رديت " كملت المطبخ اروح انام "

جان البيت كلها بغرفها هيج وكت حتى الماينام يرتاح لان بيت جدو مفتوح دايما للخطاطير هواي معارف تجيهم واصدقاء حتى من المحافظات..

سألني" اني مزعلج ؟ مسمعج حجايه ؟ "
رديت " لا ابد "
سأل " لعد ليش تتهربين مني .. بينما جنت تتلكيني بضحكتج ومن الصبح تريگيني وي بيبي حتى صرت اتفائل من اشوفج الصبح .. احجيلي شكو ؟"

رديت " لا ماكو شي انت تدري بمعزتك عندي انت مثل اخوي "
رد " طبعا اني اخوج الجبير واذا اكو شي مضوجج او احد ضوجج تجين تحجيلي فاهمة "

هزيت راسي ورحت للغرفه .. لزمت گلبي من التوتر .
گلتلة اخوي والساني بالگوة نطقها ..
بس لازم اطلعه من گلبي .. عيب عليه اصلا افكر هيج تفكير ..
مااريد اصير مثل ماما مااريد .. مااريد يكرهوني ويگلولي مثل امج..

مااتحملت صرت ابجي .. مااعرف ليش ابجي بس ردت افرغ همي وارتاح ..

گعدت سحر .. " شكو شبيج اكو واحد ضوجج "
رديت " لا هيج وحدي ضايجة "
ردت " وليش ضايجة مو مقتنعه بوضعج وصايرتلهم خدامة بعد شكو "

سكتت عنها اعرفها تستغل الفرصه وتعايرني دوم ..
ليش تتوقع حبي الجو العائلة العايشته بوسط جدو وبيبي والبنات تعتبره ذلة وخدمة .. من واني عند اهلي احب اشتغل واطبخ "

جنت محتاجة احجي وي شذر بس هي التفهمني ..
بقيت منتظرة هاجر تنزل مانزلت ..
سألت رونق گالت ماكو احد فوك اصعدي حتى ارشد بدل ونزل وي جدو ..

صعدت .. الطابق الفوگ عبارة عن اربع غرف وحمام ..
دكيت الباب على هاجر ردت ..
" منو ادخلي "

كانت نايمة وورمانه خطية من الحمل ..
شافتني گامت ..
" ها سمر تعاي "
" خاف نايمة وكعدتج ردت موبايلج اخابر شذر "
اشرتلي " ذاك ع الشحن اخذيه "

اخذتة خابرت على شذر :
" الو شذر اني سمر "
" هلو سمورة شلونج سحر شلونها "
رديت " اريد اشوفج ماتجينا"
ردت " اشوف نسر واجي ليش صاير شي ؟"
رديت " لا ماكو شي بس اشتاقيتلج"

سديته بسرعه ورجعته ..
شفت الغرفة مخربطة ..
سألتني " اذا ماعندج شي ابقي يمي ضايجة ومابيه انزل متوجعه حيل "
رديت " ليش مارحتي للدكتورة اذا هيج "
ردت " بقمورة هم هيج هو كلما اتقدم بالحمل اثكل واتعب .. شوفي حتى الغرفه مااكدر ارتبها وخطية ارشد حتى ملابسه صار يغسلهن بيده ويكويهن يستحي ينطيهن الاخواتي او عمتي "

رديت " انظفها الج ؟"
ردت " مااريد اتعبج هسا اخلي هنودة تنظفها "
كمت بسرعة ..
"لا اني انظفها ماعندي شي .."
گمت بسرعه هي غرفتهم اصلا صغيرة .. رتبتها ومسحتها ومسحت الاخشاب ..

بقت تتشكر بيه .. كعدت يمها شوية ..
سألتني على قمر ..
" اخذها عمو علاء يشتريلها "
ردت " مو اگول مالها حس "

اتنهدت " تدرين سمر اذا متت بيوم اموت مطمأنه لان متأكدة اولادي مايحسون بغيابي .. انت ماما جدو بابا بيبي وارشد كلكم تربوهم "

رديت " ليش هيج تحجين عمرج طويل ان شاء الله "
ابتسمت " لاتخافين مااموت هم هيج جنت احجي بقمورة تالي هسا تريدج متريدني وتحبج اكثر مني "
ابتسمت الها ..

بقيت شوية يمها الى ان اجت الق گالتلي اجت شذر ..
نزلت شفتها تحجي وي بيبي ..
شافتني ابتسمت سلمت وكعدت يمها ..

طلعت سحر بيدها ملابسها ..
شافتها بيبي " امي مايصير تدخلين هيج وكت للحمام راح يصير المغرب "
ردت " مايصير شي لتخافين "
سلمت عليها شذر " شلونج سحورة "
باوعتلها ودارت وجهها وراحت ..

همست بيبي " هاااي ابد مطالعه عليجن ولاتنرد "
اشرت الشذر ورحنا للغرفه..
سديت الباب سألتني " خوفتيني شكو "
رديت " ماادري شذر شلون احجيلج بس مامرتاحة جاي اسوي شي خطا واريد احجي وارتاح "

ردت " خوفتيني ولج شكو احجي "
رديت " باعي مو تحجين عليه والله الصار غصب عني مااعرف شلون بس اني حبيت ارشد "

شهگت " عزااا شنو ارشد وشلون حبتيه يعني اولا هو اكبر منج ومثل اخوج ومتزوج شنو هالحجي سمر "

رديت وابجي مستحيه " لا يروح بالج لبعيد .. هو اكثر واحد اهتم بيه من اجيت ماادري شلون اتعلقت بي صرت من اشوفه گلبي يدگ حيل .. ومن يحجي وياي اخجل واتوتر .. واذا يوم ماشفته لان هو مو دايما يتواجد بالبيت .. احس بفراغ بيومي مااعرف مااعرف شذر .. ادري غلط الاحس بي . ومستحيل اسوي شي يجيبلي حجايه مو زينه وخاصه هاجر حبابه وياي وتحبني حتى امنتني ع بنتها وواثقه بيه "

اتنهدت وحضنتني " هالشي طبيعي بعمرج هذا .. اهتمامه بيج خلاج تتعلقين بي .. بس تكبرين اكثر هالمشاعر تختفي .. مااكدر امنعج واجبرج تنسين بس حكمي عقلج قبل گلبج..
فكري بحياتنا هسا يلة استقرت .. فكري بكلمة مثل امهن النسمعها منهم .. دايما خلي اخطاء اهلنا گبالج وتعلمي منها ابد لاتنجرفين ورى مشاعرج وتضيعين نفسج مثل ماسوت امي .. فكري بهاجر مريضه وحامل خطية .. خلي هواي اعتبارات بين عيونج "

بقت تحجي وياي وتنصحني .. حسيت براحة شوية ..
دخلت سحر سكتنا ..
ضحكت " الله يكثر اسرارجن .. "

ردت شذر " شنو رايج اخذجن ونتعشا برة وازورجن ونفتر من اجيتن اليوم ماطالعات "

رديت " طلعنا مرة للامام بس سحر ماقبلت تجي ويانا"
باوعت سحر الشذر " شكرا اخذي اختج العزيزة وروحن"

مخلصه كل وقتها ع التلفزيون ابد ماتختلط ..
اخذت شذر اذن من بيبي ..
وطلعتنا وي زوجها كلش حباب وبنتهم هم تخبل ..
رحنا الخالة شفناها وزرنا وتعيشنا برة ورجعنا ..

وصلوني وراحوا ..
بعد كم يوم هاجر زاد وجعها وتخربطت علينا ..
اخذوها للدكتورة كالت التخثر صاعد عندها وواصل للرئة .. حتى اذا سوينالها عمليه مانتحمل ضمان تطلع عايشة ابو التخدير هم تخوف من هاي السالفه ..

بقت بالمستشفى وينطوها ابر تخثر .. البيت كله انخبص وندعيلها ..
اجت شذر هم سمعانه من خاله ..
حالتنا حالة لااكل ولا شرب .. بالليل قمورة بس تبجي مااعرف شبيها هي متعودة تنام يمي لو يم مرت عمو علاء متعودة علينا..
بليلتها ابد ماسكتت ..

خليتها بحضني انومها .. لان سحر گامت تعيط عليه تريد تنام..
سمعت صوت عياط بالبيت وبجي ..

گمت بسرعة ورجلي متشيلني من الخوف ..
طلعت شفت هنودة تبجي وتعيط… مرت عمو عامر ومرت عمو علاء وياها بالمستشفى بقوا بس احنة بالبيت وبيبي وجدو ..
اسمع بيبي تعيط من غرفتها " شكو شكو "
طلع جدو عاط بيها " احجي هاجر بيها شي "

گعدت هنودة بالگاع تلطم وتبجي .. ماتت جدو ماتت ماتت ..

جدو بسرعه وگع… نزلوا عمو علاء وعمو عامر .. شافوا جدو ركضوا عليه ..
بيبي تخربطت من الخوف من غير ماتعرف شكو ..

مو ليلة كانت .. وانما مصيبة كبيرة ..
عمامي يبجون .. وحايرين بجدو .. غسلوله انتبه ..
اشرلنا .. بيبيتكم لاتحجولها ابد ..

شغل احمد السيارة .. اخذو بيبي .. وبس جدو بقى بالكوة يحجي احنة مكابليه ونبجي ملخنا نفسنا ..
حتى سحر طلعت تبجي ع المنظر والموقف ..

لسا اتذكر من نزلها ارشد ساندها… جانت تضحك وتگول راح ارجعلكم وياي ولي العهد ..
من ودعتها وصتني بقمر .. ديري بالج عليها وبالليل تفزفز هواي الا تخليها بحضنج يلة تنام ..

وصتني وكانه تعرف راح تروح ما ترجع..
بقينا للصبح گاعدين ..
اجن مرت عمو علاء ومرت عمو عامر .. يعيطن ويبجن بيبي اخذوها البيت عمة نرجس ماجابوها لان فاتحة ..

امها الهاجر تخبلت ماخلت شعرايه براسها ووجهها احمر من الدم ..
تبجي وتگول " والله صغيرة بعدهي صغيرة ع التابوت يربي .. هاي بنتها صغيرونة بعدهي شبسرعة اخذتها مني مافرحت بيها وبأبنها بعدني "

كلامها جان يبجي الصخر .. بدلت وراحت وياهم للدفنة
هي وعمة بتول ..
بدت النسوان تجي .. خاله بس سمعت مخابرة شذر واجن .. شذر جابتلنا ملابس اسود مشترية ..

قمورة من الخوف العياط بس تبجي ..
خالة سماهر تعبت دخلناها للغرفة ترتاح ..

اخواتها بس يبجن شحالهن ..
مرت عمو علاء گالت " ماعندي احد غيرجن امي .. بس جايات وماي .. الطبخ ع الطباخ "

گمت اني وشذر للمطبخ .. اشتغل وابجي .. جنت احجي الشذر عنها .. شلون منتظرة ابنها حتى هو تركها قبل ماتترك الدنيا ..
شلون ماعرفوا الطفل مات قبل ماتموت.. شلون ماسوو شي ونقذوها .. شلون وشبسرعه ماتت ..

جانت شذر تهديني وتگلي " هذا حد يومها وحكم الله "

ماانصدمت ولابجيت على ابويه بكثر مااتأثرت وبجيت عليها ..

للظهر اجو بعد مادفنوها .. دخلت امها تبجي وبالكوة تمشي ..
تلكنها النسوان وصارت تعيط وصوتها بالگوة يطلع
" راحت راحت بنيتي راحت .. ولجن شحلات نومتها وطولها .. لو شعرها نشمر عليه الماي يسرسح وي الماي شحلاته .. اغسل بيها واشم بيها فتشت عيني راحت مني بساع بساع "

تحجي وتصفگ بديها . بجتنا كلش ..
بقينا بالمطبخ ..
دخل ارشد عيونه حمر وشحاله .. سلمنا عليه بس يهز براسة..
اشر " سوولي طريق اريد ادخل "

سويناله طريق وصعد لفوگ ..
نزل لابس اسود ولاف غترة ع راسه .. نفسهن الملابس اليلبسهن بعاشور بموكبهم ..

اجه للمطبخ اشرلي " سمر جيبيلي قمر "
رحت جبتها نايمة بالغرفة .. شفت خالة تحجي وياها وهي ساكته ومخليه قمر بحضنها تنومها ..

شافتني اشرتلي " تعاي اخذيها فزت من الصوت تبجي"

اخذتها وطلعت ..
شافها اخذها الحضنه وبوسها نزلت دمعته .. انطاها الي " ديري بالج عليها "

مرن ايام الفاتحة بصعوبة..
وحتى من انتهن عبالك البيت خالي مابي صوت مالنا شهية للاكل والشرب ..
بيبي عرفت بهاجر ومدخليها مستشفى.. ارشد اصلا مايجي للبيت بس وكت النوم ..
ضاعت لمة البيت الجانت ..

جدو مگابل بيبي بالمستشفى رغم هو يكره المستشفيات بس يفقد عليها كلش ويحبها…

حتى سحر تغيرت وصارت تگوم وياي تساعدني وتگعد يمنا لان البنات عندهم امتحانات وهم حزينات ..

شذر :
موت هاجر اثر بيه كلش .. بحيث من خابرت خاله وبلغتني .. بجيت .. عندها طفله وحامل بعدهي صغيرة. ماشافت شي من الدنيا ..

حجيت وي نسر .. گال " بدلي نروحلهم عيب لازم اوكف وياهم وانت هم "

بدلت شافتني خاله حجت ..
" ليش لابسه اسود ياساتر منو المات "
رديت " بنت عمي توفت . "
صفنت عليه " ياساتر بنت عمج شنووو .. منين طلعوا ذوله "

اجة نسر " من گرايبهم يمة "
سكتت ماردت بس حسيتها ما اقتنعت..
طلعنا سألته " ليش كذبتني "
رد " ماتعرفين امي تبقى تنگ .. اتركي الامور مثل ماهي احسن "
رديت " زين لعد خلي اشتري للبنات ملابس اسود من اي محل "

بسرعه اشتريتلهن ورحنا ..
شفنا خاله وصلت ويانا هي وعمو مختار ..
وصلنا وكال " راح نلحكهم للدفنه وياهم "

بقيت وياهم للعصر .
مرت ايام الفاتحة هيج .. وخاله كل يوم تسألني منين طلعوا هالكرايب مو ع اساس بس خالتج ..
جانت هنا وبيداء موجودات ..
سألني عنهم وعزني .. ماگدرت اكذب عليهن هم ..
حجيتلهن كلشي وعذورة يمنا جانت تسمع ..
تخبلن من سمعن ..
" وج شذر وهم تسميهم اهل لج حرام اكول ذولي اهلي
والله لج ابقي گولي يتيمة احسن مماتكولين عندي اهل .. واخواتج وين وبس لا هم مأذيهن .. سكتت مارديت .. "

ردت بيداء " والله لو غيرج حاجيلي هيج قصة مااصدگ واجذبها .. واني اگول على نفسي الدنيا ملطشتني ومتعبتني .. لعد انت شتگولين .. الله يعينج شلون متحملة وصابرة .. اصلا انت اقوى انسانة عرفتها .. ماكو وحدة يصير بيها هيج وتتحدى وتصبر وتوصل للوصلتيلة .. شذر وربي كبرت اكثر بعيني .. اتمنى تطلع فرح تشبهج مثل مادنو تشبهج "

اتنهدت " لا لاتكولين هيج .. ابد مااريد احد يشبهني ولا يشوف الشفته خليهن هيج وسعيدات طول عمرهن ولا يصير بيهن ذرة للصارلي "

وصيتهن يبقى الحجيناه بينا لاخالتي ولااسراء ولا غيرهم يعرفون ..
عذورة جانت بعالم ثاني ساعه تسمعنا وساعه تنام ..

عذراء :
مازلت مستمر بكورس العلاج .. المرض ماكان مؤلم بالنسبة الي لانه خبيث صامت .. لكن العلاج والجرعات هي الالم الحقيقي .. ورغم الالم الي كنت اتخلص من بالمسكنات والحبوب الي ينطوها الي ..

الا ان الاكثر ايلاما بالنسبة لي ..
هو شعري .. حتى صرت اكره اسبح واكره اوكف ع المرايا ..
جنت من اسبح اخلي الشامبو على راسي واستمتع بالوغف اليصير .. ومن امشطه اتعب لان طويل ..
كل يوم اباوع الطوله ..

تركت المرايا من اول يوم صار يتساقط شعري..
وما اطلع يم اهلي الا البس حجاب .. حتى راسي مااتلمسة اخاف ..

مرة وحدة نسيت وطلعت وابن هنا جود ضحك عليه وكلي " خاله تشبيهن سيد الخواتم "

انقهرت حيل .. هنا عاقبته وماقبلت بس هو حجاها بصورة عفوية ..
من يومها وبعد مااترك الحجاب .. شذر مخيطتلي كبات حلوة مثل التوربان حاليا ..
البسة بالبيت دايما حتى اخواتي عجبهم .. وطلبوا شذر تسويلهم.. كانو يلبسوه بالبيت وياي من البس مو لان حلو وبس ..

اعرفهم بتصرفهم يساندوني .. نسر يكلي صايرة احل من قبل ..
ومن اطلع الف شال ع راسي يله البس شال ثاني حتى مايبين راسي فارغ ويضيع جمال الحجاب براسي ..

حسام من كان يباوعلي ادنگ استحي اباوع بوجهة واني لا حواجب ولا رموش ..

بس هو اعرفه مايهمة شكلي .. صرت اميز كلش زين الشخص اليحبني من اليشفق عليه ..
بس لمصلحته جنت اسوي نفسي مااعرف مااريد اظلمه وياي اذا بيوم متت ..

كان بالايام الاداوم بيهن مايتركني ابد.. ياخذني ويرجعني وياه ..
بيوم طلعنا من وكت من الدوام ..
اصر نتغدا ..
وافقت وگلتله " بشرط "
رد " اشرطي كلشي مسموح "
رديت " مااريد مسلوق ومدري شنو اريد احس بطعم الاكل "
رد " شمشتهية "
رديت " شاورما "

رد " بس اللحوم الحمراء مو زينه شنو رأيج نستبدلها بشاورما سمك "
ضحكت " وين لگيتها شاورما سمك .. "

ابتسم " ابقي هيج اضحكي اكثر وحدة تلوكلها الضخكة انت .. شايفه من تضحكين وتبين ذني الغمازات .. گلبي… ..

قاطعته " ادري بيك طبيب بس هالمرة لبي طلب مريضه مشتهية شغله وبنفسها جايز اموت ومشتهيتها اخليك توزعها الي بثوابي وتخسر اخسر لفه وحدة احسن الك "

ضاج " شنو هالحجي .. ابد مااريد تحجين هيج .. عسا عمري على عمرج "

اختنگت مااتحملت " كافي حسام "

رد " لا مو كافي راح احجي وشيصير خلي يصير شوكت تحسين بيه ماادري "

رديت " حسام… .."
قاطعني " الله ياخذ حسام كافي لاتسوين بيه هيج .. ارحمي حالج وحالي "

رديت " ماافيدك اني انت تستاهل احسن مني "
رد " بس اني اريدج انت من صغرج واني اريدج وذاك الحيوان يعرف واستغل هالشي واخذج مني .. اخذج وردة مفتحة وذبلج .. سكتت وصبرت كلت الله يسعدج بس والله اعرفه اناني ويحب نفسه ومصلحته .. من صغرنا وهو يتمنى يطلع للخارج ويستقر .. شگد نبهتج وانت جنتي عاميه عينج ع الحقيقه.. "

اتنهدت " مايحتاج تهيجلي مواجعي اعرفهن كلش زين"