///// #البارت الثامن والاربعــــون /////


من عرفوا البيت بأسمي تخبلوا .. الي جان يضحك بوجهي صار هسا ينظر لي بحقد ..
صاح عمهم " نسر هاي لعبه لو شنو ؟ اعرف هالبيت شنو بالنسبة الخديجة مستحيل تنطيه الاحد . بعدين هي انجلطت وتمرضت وبعدها توفت شوكت لحگت تدوره ؟"
رد نسر " اي دارته بأسمي لمن اخذها للعلاج الطبيعي ووصيتها گالت اذا متت .. تدوره بأسم شذر وماصار هواي من داورته الها "
ردت خاله " وليش درته ليش ماخليته بأسمك .. يعني من هيج كل اليوم والثاني ماخذتك اله "
باوعلها " يمة كافي عمي شنو سالفتكم انتو اول وتالي البيت مايهمكم وصارلة سنين مركون ماسألتوا عليه هسا من سمعتوا بأسم شذر صار عزيز "
رد عمهم " البنية تتسمى غريبه عنا .. شلون خديجة تنطيها حلالها .. وحصتها بالمحلات والعمارة بس لا هم سجلتهن بأسمها "؟
رد نسر " سجلتهن بأسمي "
من سمع عمهم هالحجي تنرفز .. واتهم نسر ان هو ضاحك على عمة وهي مريضه ومخليها تسجل كلشي بأسمه .. بيومها تعاركوا وطلع عمهم زعلان ..
بعد ماطلعوا.. اشرلي " السمج جبته ع الكاونتر نظفيه وضميه "
اعرف غايته مو السمج بس حتى يطلعني من الاستقبال
بس صوت خاله العالي خلاني اسمع كلشي..
الي يسمعها يكول مسجل بيتها بأسمي ..
مااتحملت الي سمعته ونظراتهم الي .. وخاصه بعد كلام اسراء الي وكدام هديل :
" هسا عرفت سر بقائج عند عمتي طلعتي راسمه ع البيت تاخذيه قشمرتيها وخلتيها تسجله بأسمج . ابد نظرتي بالبشر ماتخطأ .. قبلج هواي شفت نماذج مثلج"
صعد للغرفه بسرعه .. فتحت الكنتور طلعت الجنطة مالتي .. نفسها الي نهزمت بيها من بيتنا. .
كل الي احصله من شغلي اضمه بيها .. صار سنين واني اشتغل وحتى اصرف على نفسي مني مايوم طلبت شي منهم وحافظة كرامتي.
اما اليوم طلعت اني بنظرهم حرامية واستغلالية ..
نزلت الفلوس خليتهن گدام نسر ..
رفع راسه " شنو هاي ؟؟
رديت " هاي فلوس البيت ادري مايكفن بس كلما اشتغل راح انطيك وهيج اسدد ثمنه .."
باوعلي بعصبية " شيلي فلوس البيت عمتي سجلته برضاتها الج مو من حق احد ياخذ فلس منج "
وحتى الحصة الي انطتها الي .. بفلوسهن انطي البيوت الكافلتهم .. يعني هم مو الي مثل مامتوقع عمي ..
منا وسدي السالفه كافي ..
سالتني اسراء " منيلج هاي الفلوس ؟"
رد نسر " شغلها نسيتن صارلها سنين تخيط وتبيع للمحلات "
كدر بكلامه يسكتهن بس نظراتهن شلون راح يسكتها
صعدت خليت الجنطة بالكنتور .. اصلا اني مااحتاجهم بس مخليتهم للزمن كلشي يصير حتى البيت ضجت منه بسببهم ..

اجت دنو " ماما بابا يريدج "
نزلت بسرعه .
صارت كبالي هديل .. درت وجهي عنها..
دخلت للاستقبال ..
رفع راسه " سويلنا غدا "
رحت للمطبخ دااسوي غدا .. اجت هديل ..
" طلعتي مو هينة.. هسا عرفت تمسك نسر بيج "
درت وجهي " شنو هالحجي .. قصدج علمود البيت ؟؟ ليش هو مو جان بأسمه لو يريد ماينطيه الي وياخذه "
ابتسمت " اكثر وحدة تعرف نسر اني .. عشت طفولتي كلها هنا واعرفه انسان حقاني من صغره وماياخذ شي مو اله .. مادام عمته وصته اكيد التزم بوصيتها . "
رديت " حجيج متناقض شنو تكولين علمود البيت وبعدين تكولين حقاني " قصص وروايات عراقية كرار صلاح
ردت " بمعنى مايخليج ترحين وانتي عندج بيت عمته لهذا رغم ماكو شي يربطكم وهو متمسك بيج "
استغربت من كلامها " شنو قصدج ماكو شي يربطكم "
ردت '" اقصد ماكو طفل يربطكم "
رديت " جيبيله انتي الطفل شمنتظره "
صبيت الاكل واخذت الصينية ورحت للاستقبال..
لگيته متمدد ع الجرباية…
شافني " شبيج بعدج ضايجة "
هزيت راسي " عليمن اضوج.. حقهم يحجون البيت مو من حقي لاتنسى اني مايربطني بيها شي "
خزرني " اششششش لاتعيديها بعد .. واشرلي ع البيت"
سكتت ..
رجع كمل " خلي اليحجي يحجي اسمعي وغلسي ماماخذه بيت احد والمفروض من البداية يعرفون حتى مايتفاجأون ..
مارديت بعد ماعندي شي احجيه ..
اجت دنو صحتها " تعاي تغدي ماما "
كعدت يمنا ..
باوعلي " وانتي ماتتغدين"
تنهدت " مااشتهي "
خلط تمن ومرگ وشال بالخاشوكة وقربها الحلگي ..
" هاي من ايدي لاترديني "
اكلت منه ..
رجع خلط ويأكلني ودنو تضحك..
اشرتله " كافي اني اكل " استحيت منها .. او يمكن لان اول مرة تشوفنا هيج مامتعودة..
كملت غدا ..
اتنهد " مايصير اصعد الغرفتنا .. اوووف الله ياخذ الي باگ البيت وضيع مخططي كله "
ابتسمت " يمكن الله رحمني الله يعلم شناوي "
رد " هو انتي تخليني خلصتيها عليه رمضان ومصومتني "
كملت الماعين وصعدت .. بعد ماشفته مغمض ..
رحت نمت تعبانه .. وهم مااريد احتك بأحد وخاصه خاله حسيتها شايله عليه ..
نمت وهالمرة مانزلت لليل ..
حسيت نفسي محتاجة ارتاح تعبت من التفكير بكلشي وبالكل ..
درست دنو وكملنا.. گعدنا ع التلفزيون نتفرج ..
الى ان صعدت عذورة ..
فتحت الباب " هاي گاعدات .. نسر كل شوية يسأل عليج وموبايلج مغلق يكول "
باوعتله مابي شحن خليته ع الشحن ..

رجعت سألت " مو عوايدج ماتنزلين شبيج ضايجة "
اتنهدت " لا اصلا مو من حقي اضوج .. ليش اني منو واضوج .. كثر خيركم متحمليني وطلعت داخله على طمع "
ردت " ليش تاخذين على كلامهم .. كلنا نعرف انتي شنو ؟"
رديت " الي يقهرني لسا محد يعرفني سنين واني يمكم وماعرفتوني لج عندي فلوس واشتغل مامحتاجة ولليوم ماطلبت من احد غير الاكل مامكلفتكم شي يخصني كله اني اشتري حتى دنو اني متكفله بيها .. وكل هذا وطلعت طماعه .. اسألوا نسر اصلا رفضت وهو اصر يداور البيت "

ردت " كافي لتحرگين روحج .. الي يحجي خليه يحجي اگعدي بغرفتج وطنشي ..خليهم يعرفون قيمتج"
سكتت..
ضحكت " لج لو شايفتهن يتلاطمن شنسوي عشا وشنسوي . بيداء تخبز .. وماما من شافتج مانزلتي گالت الهديل تسوي عشا .. وهاي بقت تلطش اخر شي طلعت بتيتة وطماطمة سوتهن ..
خليهم يشوفون شذر واكلاتها تترس السفرة "
ضحكت " خوش تحرضين "
ردت " لا والله صيري هيج احسن .. محد يستاهل غير هم اهلي مايستاهلون سمعتيها لو اعلي صوتي "
اتنهدت " والله احبهم مثل اهلي . وفضلهم ماانساه لو ماهمة اني بالشارع .. بس تعبت واني ارد الجميل الى متى ؟؟"
حضنتني " اااااه شذر تعبانه وربي .. اصلا لو ماانتي بالبيت كان متت "
رديت " اسم الله شنو هالحجي "
ردت " راح اكمل واتخرج .. ولسا مااعرف مصيري معتز مصر نطلع ومااعرف ردة فعل نسر . احس روحي هالفترة ضايعه .. مابقى شي على تخرجي "
رديت " فكري واخذي قرارج وين تحسين نفسج مرتاحة روحي .. صعب تلكين احد يحبج بهاي الدنيا ..
منو تحسين بالراحة يمه كوني يمه "
ردت " راحتي يمه .. معتز فتحت عيني عليه مستحيل راح احب شخص مثله ولا احس نفسي وي غيره .. احس الدنيا بلياه تخنگ واريد اموت ومن اسمع صوته احيا "
ابتسمت وذكرت نفسي من غاب نسر وتصوب اختنگت وحسيت روحي تطلع .. معناها هو هذا الحب ..
سرحت بخيالي يم كلامه وحركاته .. وخليت عذراء توصف حبها وشوقها المعتز ..
لليل مااتحمل نسر .. رجع دز عذراء
اجت " يمعودة گومي اريد انام خبصني انزلي شوفيه "
رديت " ليش شيريد ؟"
ردت " ماادري .. وهديل مگابلته تريده يروح وياها للغرفه يمكن يريد انقاذ "
رديت " عليمن انقاذ غير هي مرته لعد المن اتزوجها اذا يتهرب منها "
نزلت .. " رايد شي "
بوعلي بأستغراب " ادري ضايجة عليهم اني شنو تحرميني منج ؟"
رديت " ماضايجة من احد بس نعسانه .. "
سأل " وماتتعشين "
رديت " سوتلنا عذورة لفات اني ودنو "
رد " اليوم مسوين طماطة وبتيتة ومااكلت ماتشويلي تكة "
باوعت للساعه بالوحدة .. تكة وبالوحدة؟؟
رد " شبيها ؟"
رديت " مابيها بس لحم تاكل وتنام صعب ينهظم وانت نايم صارلك شهر وزنك زايد لازم تخفف !
رد " وين زايد بس لاتخلين عينج عليه ودور ملونة الله يستر "
فتحت عيوني " شتقصد يعني اني احسد ؟"
ضحك " بالقران يخوفن لاتفتحيهن "
رديت " هسا صرت احسد .. شعليه راح اسويلك وانام "
رد " اذا ماتاكلين مااكل "
رديت " بس مااكل لحم بالليل "
رد " زين عمي سويلنا جاي وجيبي جبن ناكل .. لو ماكل طماطمة وبتيتة احسن .. "
ابتسمت ورحت سويت جاي وجبن وخليت زيتون .. تذكرت وليد الله يرحمة ماياكل جبن الا زيتون وياه

اخذت الصينية ورحت .
اتنهدت " نسر انت وعدتنا تاخذنا نزور عمة ووليد ومارحنا بسبب اصابتك .. صايرين هواي يجون على بالي "
رد " اي ان شاء الله بس اتحسن شوية اخذكم حتى لو وي مشتاق بس اني وانتي وامي لان البنات دوام "
فرحت من سمعت . اكلنا وشلت الصينية..
اجت هديل شافتنا..
" ها نسر تجي لو بطلت "
باوعلي رديت " يلة انت نام اروح اصعد دنو وحدها لاتگعد "
عفتهم وصعدت .. مااتحملت طلعت باوعت رجعت للغرفه وحدها .. ابتسمت .. بس ليش ضجت معقولة غرت ؟؟
مرت الايام ونسر بدأ العلاج الطبيعي ..
اني صرت حد شغلي بالبيت واصعد مااگعد يمهن ..
بس بالليل ننجمع بغرفه بيداء ويانا عذورة ومرات هنا ..يشترلينا مهيمن حب وكرزات وجبس ونسهر ..
وخاصه بأيام العطل .. صارت گعداتنا كلها فوگ حتى خاله صارت تشكي وحدتها .
لان هديل بغرفتها واسراء ماتختلط اسمها كاعدة الابتوب مالتها او بالدوام.
بدأ يتحسن ويمشي بس يعرج .. الدكتور منعه يصعد درج او يمشي مسافه بعيد او يسوي شي بي جهد وتعب ..
من الدكتور منعه عن الدرج ضاج .. وطلب ننزل يمة جوة ..
صار يوم ينام يمها . ويوم احنة ننزل يمة بالاستقبال
اول يوم فرشنا بالكاع ..
طلب من دنو تنام يم امه .. حسيت وراه شي
باوعتله ضحك " ماكو شي شبيج .. ماسمعتي الدكتور كال ماكو جهد "
رديت " اي سمعت يعني شنو ؟؟ "
ضحك بصوت عالي فضحنا…
اشرتله " اششش فضحتنا "
رد " لا يربي شنو انتي معقوله عمرج 24 سنه وماتعرفين شي "
رديت " لاصدگ شنو يعني.. "
سحبني وحاوطني بذراعة.. توترت بسرعه .
ردت اسحب نفسي منه " نسر مو هيج شگلنا "
ابتعد " خلص ابتعدت بس ع الاقل نامي على ايدي خليني احس بوجودج يمي . "
جبرت نفسي ونمت على اديه .
" ديري وجهج الي "
درت وجهي .. صار وجهة قريب عليه حيل وعيونة تباوع العيني .

همس " بس اطيب مااضمنلج وعدي .. اريد اسويلج ليلة زواج وماتمنعيني "
سكتت .
ها شكلتي
مااعرف
تتعودين هسا انتي بحضني خفتي ؟
شوية
يوم عن يوم يروح الخوف
ان شاء الله
يعني انتي تتمنين قربي
ابتسمت ودنكت
رفع راسي بيدة مرر اصابعة على شفافي والشامة الي بخدي ..
قرب وجهة حيل بس لاحت انفاسه وجهي ابتعدت ..
اتنهد .. بس ماحجة عرفته ضاج ..
حجيت " خلينا ننام نعست "
رد " بس ابقي بحضني لاترحين .. "
بالاول حاولت انام ماگدرت الى ان غفيت وحدي "
گعدت الصبح شفت نفسي حاضنته ودافنه وجهي بصدرة وهو لاف ايده على ظهري وحاضني ..
رفعت راسي باوعتله شلون نايم .. ابتسمت ..حسيت نفسي مثل طفل بحضن امها . اكو راحة وحنان مو طبيعي بحضنة اول مرة انام هيج بعمق ومااحس بالاذان واول مرة تفوتني صلاة الفجر ..

ردت اكوم سحبني الصدرة " خليني اشبع الليل كله مامصدك نايمة بحضني .. كل شوية افز عبالي حلم "
ابتسمت .. " اني هم ممصدكة حالي "
بالكوة كمت منه .. طلعت بسرعه الدنو صعدت كعدتها عندها امتحان .. راجعتلها وبدلتلها…
واجه السايق اخذهم ..
مر اليوم بين البيت وغزل نسر وسوالفه .. صرت اتمنى قربه واخاف .. خاصه من اشوف هديل تلبس ثوب نوم
وترتب نفسها .
خابرت خاله وحجيتلها عن نسر وطلبه مني ..
سألت " يعني مادام كالج اريد اسويلج ليلة عرس معناها يريد حقه ولازم ماتمنعيه "
اتنهدت " شلون خاله واني اذا راد بوسة ارجف واخاف"
ضحكت " والله ماعرفتج صايرة تحجين.. وهذا يعتبر تطور بحالتج .. باعي شتكولين اخذج الطبيب نفسي
رديت " مال مخابيل "
ضحكت " وج يامخابيل .. والله انتي الراح تخبليني وتوديني للشماعيه "
رديت " جا شنو غير هو للمخابيل "
ردت " لا يفهيمة . دكتور يعالج الحالات النفسية يعني الي مثلج .. "
سالتها " وشلون يعالجني ينطيني علاج "
ردت " يحجي وياج تحجيله حياتج واذا تحتاجين علاج واصلا انتي بديتي تتحسنين يعني زينة "
اتنهدت " شلون احجيله استحي ماكو دكتورة "
ردت " اووووف ياشذر راح تجلطيني اي اكو .. خلي نسر يسألج ويحجزلج "
رديت " مااا استحي اكله شيكول عليه خبله وتريد تتعالج "
اتنهدت " عمي اني اكله وافهمة بس من يحجي وياج مو ماتقبلين وتستحين روحي واخلصي من هذا الكابوس "
اتنهدت " امنيتي خاله هيج وماعاد اتذكر ولااحلم ولاضوج "
ردت " ان شاء الله " يلة روحي خلي اخابره ..
سديته منها ونزلت .. سمعت موبايله دك ..
شافه رفضه ورجع خابر هو متعود من تخابره خاله يرفضه ويرجع يخابرها ..
بقى يحجي ويهز راسه .. اخر شي گالها امنيتي ولو طالبه من زمان اخذها بس هي الي جانت قافله ..
اتنهدت " شكد عيب "
حسيتها صعبه .. كمل المكالمة وماصاحني ولااخذ رأي استغربت ..
لليل بدت تجهيزات هديل ..
يمكن لان متزوجة قبل يعني عندها خبرة وتعرف شلون تتصرف ..
حسيت بداخلي غيرة .. معقولة يحجي وياها مثل مايحجي وياي او من يلمسها هم يكلها مثلي..
اول مرة هيج احس احساس ..
بعد يومين من اجه من العلاج الطبيعي ..
صاحني .. " سدي الباب وتعاي "
سديته واجيت يمه .. " خابرتج خالتج مووو ؟"
سويت نفسي مافاهمة شيقصد "
رديت " عن شنو ؟"
رد " علمود الدكتور شنو نسيتي "
رديت " هاااا اي "
سأل " اذا ماتردين ترحين كولي "
رديت " لا اروح "
رد " زين يابه اني دورت وشفت دكتورة زينة اخذت رقم الحجز اذا تردين احجزلج ونروح "
هزيت راسي . طلع موبايله وحجز بس الحجز البعد يومين لان عندها جلسات ..
ارتاحيت شويه احس روحي مترددة وخايفه..

صار يوم الحجز ولازم اروح مايفيد الخوف والتأجيل
بيومها هديل وخاله بدلن ويردن يطلعن عندها مراجعه
شافتنا انصدمت ..
" وين تردون يمة "
رد نسر " شذر عندها مراجعة "
ردت هديل " اني كل شهر عندي مراجعه ماشفتك يوم گلتلي اخذج.. اذا ماتريدني المن تزوجتني "
اتنهد " مو هيج بس انتي من البداية اخذتج امي وتكفلت بيج وشذر هاي اول مراجعه الها .."
ردت خاله " يمة لو انت تاخذهن اثنينهن لو اني مايصير تفرق "
استغفر ربه " هاهي يمة .. روحن ويانا .. حتى انتي تبقين وي هديل بالعيادة واني اخذ شذر الدكتورها "
ردت " وليش مااثنينهن النفس الدكتورة "
رد " هي مو دكتورة نسائيه .. معدتها توجعها لأبو الباطنية نروح "
ابتسمت هديل " هااا مو اگول هديل ماتراجع نسائية "
باوعتلها ومااعرف شنو قصدها ؟"
اخذنا مشتاق وصلنا خاله وهديل للعيادة ورحنا مناك
للدكتورة النفسيه .
نزلت وبالكوة امشي..
رجلي ماتشيلني ..
لزم ايدي وعصرها " الخاطري صيري قوية "
ابتسمت وهزيت راسي ..
بقينا شوية كاعدين وصاحو اسمي..
دخلت جانت دكتورة متوسطة بالعمر وحلوة .. مبينه مرحة تدخل للگلب بسرعه ..
جنت خايفه بس اول ماگعدت عرفتني عن نفسها وتعرفت عليه ..
جابتلي مي . وبعدها صارت تفتحلي مواضيع خارج اطار العلاج ..
سألتني اذا متزوجة او لا . كم طفل عندي كم اخت يعني اسئلة عادية ..
بعدها كالت عگب باجر تعاي الجلسة الثانية ..
خلتني ارتاح ماحسيت بخوف ابد ..

لدرجة بالجلسة الثانية من اجيت جنت ماخايفه ودخلت مبتسمة وسلمت عليها عادي وگعدنا.
بس بهذا اليوم تأذيت حيل .. نومتني وطلبت احجيلها عن طفولتي ..
اول مابديت احجي نزلت دموعي ..
طفولتي عادية .. كنت الوحيدة الاهلي .. ماما ماصار عندها وراي الا بعد عشر سنوات ..
خلال هالفترة كنت المدللة .. ابوي كلما يجي من الدوام اتلكاه لازم بيده حاجة الي ..
كنت انام بوسطهم بالليل . اذا اخاف يحضنوني اثنينهم
ضحكت " جيد يعني طفولتج حلوة "
اتنهدت " بس .. بس بعد العشر سنوات وبعد مابرز جسمي صار الحضن الي احتمي بي نقمة الي ..
هنا كحت الدكتورة " اذا تردين ارتاحي "
بس مااعرف شنو الي خلاني اكمل .. اول مرة كنت نايمة بوسطهم.. حسيت بابا حضني فرحت .. اتجهت اله وحضنته . بس بدا يتلمس بيه وصارت لمساته تخوف وتضوج..
بجيت مااتحملت ..
ماما ثاني يوم بعدتني عنهم وخلتني بغرفه صغيرة جانت مخزن الوحدي .. گمت اخاف وحدي مامتعودة وبالليل بابا يجي يمي لمن ابجي لان ماما حامل وتعبانه
وبابا صار…… .
بعد مااتحملت شهكت وتخربطت .. صحتني ونطتني ماي وهداتني ..
كالت " نكتفي اليوم بهيج قدر .. اخذي هذا العلاج بس بالليل منه . وعلى موعدنا بعد يومين ارجعي "

صح كنت اتأذه واطلع ابجي النسر . بس ارتاح احس جاي احجي وي نفسي وهي تستمعلي بس .. صرت اني انتظر شوكت يجي الموعد حتى اروح ..
بس بامتحانات دنو اخر السنة تخلفت ومارحت ..
من كملت رجعت كملت .
من شافتني ضاجت لان قطعت ..
وسألتني " شتحسين هسا اذا تقرب منج زوجج ؟"
رديت " هو لسا ممتقربلي .. بس لمساته وباقي الاشياء عادي استقبلها .."
ابتسمت " جيد . "
بس لازم تحاولين وتخليه يتقربلج حتى نشوف العلاج دا يمشي او انتي تتحسنين او لا ..
سألتها " دكتورة استحي شأگله مااگدر واخاف "
ردت " ابد لاتكولين اخاف انسي .. انتي تحبيه ؟"
هزيت راسي " اي "
ردت ' " لعد خلي تفكيرج وياه . انه انتي تحبيه مانكدرين تعيشين بلاه .. باوعيله بشغف بحب مو بخوف "
كنت استمع الها وساكته ..
من كملت اشرتلي " صيحي زوجج اريد احجي وياه اذا موجود هنا "
طلعت صحتله " الدكتورة تريدك "
استغرب ودخل وحدة بقيت منتضرته برة ..
بعد ماطلع كان مبتسم .. ابتسمتله " شكالتلك "
ضحك " كالت صار لازم ترحون شهر عسل "
خجلت " وانت ماصدگت "
رد " امنيتي هاي "
صح كنت متجاوبة وياها واحجي بس بعد اكو توتر بداخلي ..
خابرت خاله وحجيتلها صارت تشجعنـي وتقويني ..
بعد ماخلصت الدوامات ..
نجحوا الاولاد كلهم .. وعذورة طلعت معدل عالي ..
سوينالها حفله بالبيت عزمنا المقربين وصديقاتها وبس
واخيرا تخرجت وصارت دكتورة تحليل ..
نسر فرحان بيها حيل .. جابلها كلادة ذهب حافر اسمها بي ..
بعد ماتعالج واتحسن صار لازم يلتحق . ضجت حيل لان تعودت على وجوده يمنا ..
اول اسبوع يلتحق بي وهيج اشتاقله ..
كنا نتراسل بالنهار مثل العشاق.. وبالليل يخابرني بعد ساعة 12 عندة مجاني ..
بس جان يتغازل ودايما يذكر شيسوي بليلة زواجنا ويتعمد يحجي بيها حتى يشوف ردة فعلي..
قبل مايجي اجازة .. خابرني وگال عندي مفاجأة الج
اريدج تحضرين جنطة ملابس صغيرة ..
سألت " شسوي بيها ؟"
رد " نروح بسفرة اني وياج وبس "
رديت " ودنو ؟"
رد " هالمرة ماكو دنو… اعتبريه شهر عسل "
خبرت عذورة فرحت وكالت ان شاء الله تكون هالسفرة بيها نونو صغير نحرگ گلب هديل بي ..
بيوم اجازته اتأخر يلة اجانه للعصر ..
استغربت .. تأخره وخاله خافت ..اتصلت بي گالها عندي شغل اكمله واجيكم ..
للعصر دخل .. ارتاحينا شوية ..
صعد للغرفه .. صعدت وراها .. حضني وبوسني
مستاقلج .. ابتسمت حسيت بأحساس حلو يجذبني اله
سألني " حضرتي الجنطة "
هزيت راسي ..
رد " زين يابة بدلي وجهزي نفسج بس اسبح ونروح "
استغربت " وين هسا وكت عصر خليها للصبح "
رد " لا هسا حلاتها سفرة الليل تخبل ماشايفتها "
جهزت نفسي ووصيت عذورة على دنو .. ونزلنا
شافتنا هديل صفنت. .
خاله سألت " وين رايحين .. وشنو هالجنطة "
رد نسر " معزوم وراح اخذ شذر وياي بغير محافظة "
ردت عليه " وليش مو هديل وحد مو مرتك "
رد " يمة الجماعه نفسهم الي عزمونا قبل عزمونا هسا بعدين لاتسوين حزازيات بينهن .. ان شاء الله اعوضها بزيارة الاسبوع الجاي "
بالگوة قنع خاله وطلعنا رغم اعرفها ضاجت بس سكتت علمود هديل خاف تضوج..
صعدنا بالسيارة وهاي اول مرة يسوق نسر بعد الحادث
توقعت نطلع خارج بغداد .. بس تفاجأت اخذنا البيت عمة ..
باوعتله " هنا السفرة ؟؟
ضحك .. " عليج الصافي انتي بس سلميلي نفسج وامشي وياي مغمضه "
ابتسمت " ماشي امشي مغمضه ونشوف شيصير ؟"
دخلت تفاجأت .. البيت مصبوغ كله ومرتب .. الاستقبال بي قنفات جدد ملكي بدل الي راحن..
ومخلي تلفزيون وستلايت ..
كنت مامتوقعة هيج يطلع البيت حلو .. باوعتله واضحك " هاي شوكت سويته "
سحبني من ايدي .. الغرفه عمة ..
فتحها جانت غرفه جديده تخبل لونها صاجي بس صخمة ..
مرتبه والجرباية عليها فرشة منفوشة مال عرايس ..
باوعتله ابتسم ..

اريدج اليوم احلى عروسه الي .
استعانيت بصديق واشترالي غراض الج بالكنتور مااعرف اذا يعجبوج ..
فتحت الكنتور.. كله ملابس نوم وملابس داخليه وتراكات اشياء بحياتي ملابستهن عرفت سوالف خالة ..
غمضت عيني " نسر ترى اخجل "
رد " لاتخجلين يماي عيني اني حلالج وانتي حلالي .. جهزي نفسج واروح اجيب عشا وحبشكلات واجي..

يتبع .…

///// #البارت التاسع والاربعــــون /////


أيتها الفاتنة الممتنعة .. استسلمي لي
وإنتظري إفتراسي
فأنا في العشق لا أرحم
إنني في الهوى
لا أعرف إلا الإحتراق
أنقض عليكِ
كما ينقض النحل على الزهور ليرتشق الشهد
وأغوص في أعماق جسدكِ كـ قرشٍ جائع
يا لؤلؤة البحر
ومرجان المحيط
ها هو موجي قادمُ إليكِ
فأستسلمي لي ..
واتركي يداي تنساب في جدول شعركِ
استسلمي ..
وأسمحي لي برسم خارطة حبي على جسدك اليافع ..

بقيت اباوع للكنتور شنو هاي الملابس فضيحة شلون البسها .
خابرت خاله ردت بسرعه " هااا شذورة "
رديت " خاله هاي انتي مشترية الملابس ومرتبتهن وي نسر ؟"
ضحكت " عجبوج ؟"
رديت " شعجبوني خاله ذولي فضيحة شلون البسهم "
عاطت " عاد كافي شذر موتيني .. وج زين من الولد وصابر عليج .. لازم تقاومين نفسج اعتبري نفسج بتحدي لاتخلين خوفج يسيطر عليج .. البسي ورتبي نفسج واهدي اهم شي تكونين هادية .. مااوصيج امي لازم تستمر الحياة ومن حقج تعيشين ويصير عندج اولاد وتكونين عائلة.. "
اتنهدت " اوووف خاله والله اتمنى .. بس مو بيدي "
ردت " بطلي هالحجايه ويالله روحي اسبحي وبدلي وتحظري الزوجج"
طلعت واحد طويل لونه اسود صح بي فتحات بس احسن من ذولاك قصيرات ولونهم فاتح يبين كلشي..
دخلت سبحت ومشطت شعري على طولة .. نازل جوة خصري ..
لبست الثوب حلو بس والله فضيحة شلون البسه ..
اخذت روب خليته عليه .
اي هيج ماتبين ايدي ..
فتحت عطر زيتي على ايدي ومسحته بيدي اثنينهن ومررته على شعري ورگبتي ..
خاله ونسر مجهزين الغرفه من كلشي وعبالك غرفه عروس فعلا .
حتى مكياج جايبه صح مو هواي كم قطعه واصلا اني مااخلي مكياج يمكن بس من عقدنا وبالمناسبات ..
خليت كحل بعيني بس وحمرة خفيفه ..
اندگت الباب توترت .. بقيت اضم بجسمي ..
دگ الباب بقيت حايرة اروح وارجع اباوع الروحي بالمراية…
عزااا شلون اطلع .. طلعت بالگوة ..
صحت منو بباب المطبخ اشوفه واكف بجسمه الضخم وطوله . واني استغبيت من التوتر .
صاح " اني حبيبتي شبيج ؟"
فتحته وايدي ترجف وركضت للغرفه ..
دخل وضحك ضحكة عاليه ..
سمعته يخلي بالغراض بالمطبخ ويحجي بصوت عالي
" وين ترحين اول وتالي اشوفج "
رديت " لا عفيه نسر شنو هاي الملابس والله استحي "
اتقدم سديت الباب .
صار يحجي من ورى الباب ..
لاتستحين يعمري حلالج اني .. انطيني ملابسي والمنشفة بين مااسبح رتبيلنا الاكل بالاستقبال على الطاولة ..

طلعتله ملابس اخذهن وراح ..
من دخل للحمام طلعت ..
باوعت حاير شجايب ..
خليت الاكل ملفوف بالسليفون حتى مايبرد .. طلعت الفواكه غسلتهن وخليتهن بالماعين..
سمعته يريد يطلع رجعت للغرفه ركض ..
بقيت كاعدة واهز برجلي من التوتر ..
اتنصت ماله حس . وين راح .. بس لازعل ورجع لأهله
يااا شبية اني شنو يزعل شنو يرجع .. اشو حتى بالحجي گمت اخربط ..
دگ الموبايل .. عذراء ..
رديت .. سألتني " شبي صوتج يرجف "
رديت " وج اخوج مااعرف شناوي "
ضحكت " يامسكينه بس لااخذج المكان مقطوع وراح يستفرد بيج ويستغل برائتج ويعتدي عليه . فاهية شبيج غير مرته . وج مو خضرمتي على گلبي المثلج عندها عشر جهال هسا وانتي ليلة الدخلة صارلج اربع مدري خمس سنوات مامكمليها لعد لو قررتوا تسوون طفل كم سنه تبقون .. "
رديت " اضحكي عليه اضحكي اشوفج من تتزوجين شلون "
ردت " ياليت الله يسمع منج هو دخلي تفض واتزوح افتحلج كاميرا بليلة العرس وربي "
عطت بيها " ولي صايرة ماتستحين معتز مسقط يعلمج سوالف "
ضحكت " صيري حبابه وكيدي الاعداء .. اصلا هسا تريد تموت وج تخبلت وكل شوية تختل وتشكي لو الامي لو الاسراء .. "
اندگت الباب همست " يلة روحي اجه "
سديته ..
" هااا حبيبتي ادخل لو تطلعين "
كمت " اي اجيت "
فتحت الباب على كيف ومدنگة ولافه نفسي بالروب
صوفر من شافني .. هاي بالروب هيج لو بلاه شلون .
حجيت بخجل " نسر حباب لاتحجي هيج مو من اولها"
رد بضحك " يابة اعتذر بس مااتحمل والله .. كل هذا الحسن الله ناطينياه واتحسر "
مد ايده الي .. خليت ايدي بيده .. عصرها حيل ورفعها باسها ..
سحبني للاستقبال . تفاجأت شلون مرتب الاكل ..
ومخلي شموع ع الطاولة ..
ابتسم " هااا شلوني يابة طلعت رومانسي وماادري .. شفت بفلم هيج يسوون وجربتها "
ابتسمت " حلوات .. بس شنو حناكل هسا ؟"
رد " اليوم كله النا ناكل وكلشي نسوي "
اگعدي هنا هسا اجي ..
راح ورجع جايب كيكه وعليها شمعه ..
ضحكت " عيد ميلاد منو ؟"
رد " عيد ميلادنا.. اليوم ليلتنا الاولى "
من يحجي هيج ويذكرني تمغصني بطني مااعرف ليش ..
شعل الشمعه وگال " اتمني "
غمضت عيني وتمنيت .. اتمنيت اعيش بسعادة واتغلب على خوفي ..
طفيتها اخذ السجينه وگال خلي ايدج .. مااعرف ليش هيج يسوي بس سايرته ..
قطع قطعه الي وقطعه اله ..
اكلنا واحنة ساكتين لا هو يعرف شنو يحجي ولا اني ..
اتقرب مني .. وهمس " شذر احبج ..

جنت اتوقع حبيت قبل بس جنت غلطان .. احس اول حب بحياتي انت "

بعده ماكمل كلامه .. اذن الاذان ..
استغفر ربه. " كومي حبيبي خلينا نصلي بلكي الله يفتحها بوجهنا . "
كمنا للغرفه .. خلينا السجادة .. ماعندي ملف صلاة لبست عباتي الاسلامية وشالي وصليت ..
كملت وهو بعده ..
نزعت العبايه ورتبت نفسي وبقيت گاعدة ع الجرباية .
كمل .. لف السجادة باوعلي ضحك ..
دنكت .. طفا الضوة وشغل ضوة خافت ..
گعد يمي وهمس. . جنت جوعان بس من شفتج جعت اكثر ..
طفيت الضوة علمودج انزعي الروب نزعته .. ومستحيه
احاول اقاوم واتحدى .. اباوع الملامحة الي مبينة قليل
واگول بداخلي .
" شذر هذا الي فتحتي عينج عليه هذا الي نقذج وحبج هذا سندج مستحيل يأذيج . "
كنت احاول بكل الطرق اتجاوب وياه .. كلشي صار بلحظة .. مشاعر ممزوجة بخوف وتجربة جديدة ..
هو كان ساكت بس صوت انفاسه بأذني .
صرت اتنفس بسرعه بين الحلم والواقع اتخبط مااعرف اني وين وشسوي ..
لحد ماحجة بثگل ..
" شذر انتي تحبيني مووو؟"
هزيت راسي بتنهيدات مسموعه ..
رد " مادام تحبيني لاترجفين مستحيل اجبرج واذيج خلي هالشي ببالج "
احاول اقنع نفسي انه اي اگدر وماكو خوف يمنعني ..
بس تذكرت كلام عذورة .. عن الزواج ..
بس لا اطلع مو بنية شلون راح يكون موقفي .. مااتذكر شصار بطفولتي .. اخاف صدگ مو بنية وشراح يكون موقف نسر .. اكيد يكرهني وعباله جذبت عليه ويظلمني ..
بين هالخوف حاولت اتذكر اذا بيوم ابوي لمسني او سوالي شي اكبر من الي يسويه ..
رجعت بأفكاري للماضي ومنها رجعت النقطه الصفر
بدل مااتشجع واقاوم زادت مخاوفي اكثر ..
مااتحملت گمت ابجي واريد ابعدة ..
" نسر… "
من سمع شهگاتي ودموعي .. صار يتلمس وجهي
" اششش لاتبجين حبيبي اعرف هالشي مو سهل ويمكن اني استعجلت ماانطيتج مجال .. اهدي اهدي ولتخافين .. "
اخذني الحضنه ويهدي بيه ويمسح دموعي.. صار يمسد على راسي الى ان غفيت بحضنة..
گعدت مااعرف بيش الساعه الغرفه نورها خافت وباردة
انتبهت النفسي استحيت .
گمت بدلت .. وشعلت الضوة .. باوعتله نايم وشعرة مبعثر ..
استحيت من منظره .. شفته تحرك طلعت بسرعه
حميت الاكل وحضرته ..
رتبته ع الطاوله وردت اروح اگعده .. التفتت شفته وراي مبتسم ..
ابتسمت اله " جوعان ؟"
هز راسه " ميت جوع "
غسل واجه ياكل .. خليتله بالماعون گدامه وبدأ ياكل
كان يتهرب من نظراتي ..
ردت اشوفه زعلان او ماخذ على خاطرة ..
اتنهدت " ضايج مني مووو؟"
باوعلي " ابد والله .. هالشي مو مهم عندي .. اصلا حضن منج يكفيني عن هاي الاشياء .. الي صار شي طبيعي والدكتورة هم گالت .. احتمال مرة مرتين ثلاثة بس بالاخير راح تتجاوبين .. المهم عندي من تنامين بحضني لا تفكرين زايد وكوني دائمة هادية لان حضني امانج لاتنسين هالشي "

ابتسمت اله ولزمت ايده.. سحبها باسها ..
اصلا كل هالتطورات بعلاقتنا مفرحتني احنة عبرنا مرحلة طويلة بأشهر والباقي سهل ان شاء الله
كملنا اكل ..
كمت اغسل الماعين..
اجه حضني حسيت بدفو.
همس " يلة حبيبي بعدني نعسان خلي ننام "
رديت " عود سويتلك جاي ادري بيك ماتعرف الا جاي بعد الاكل "
راح للطباخ طفاه " اليوم استثناء "
سحبني من ايدي ورحنا للغرفه .. طلب يشوفني بلا روب بس ..
رديت " طفي الضوة "
رد " لا هيج خليه مفتوح "
بالكوة اتجرأت .. شهگ " اشتعلوا اهلج .. لج هالحسن كله مضموم عني سنين مو حرام عليج ياظالمة "
ابتسمت وتخبيت بحضنه حتى ميشوفني اكثر ..
حضني حيل وشمني ..
افيييييش اي اريد من تخجلين وتخافين تحتمين بحضني مو تنهزمين مني ..
نمنا بعد ماشغل الضوة الخافت .. رغم مااحب الظلمة بس خجلي غلب خوفي ..
جانت ليلة حلوة وجديدة بالنسبة لدرجة اني مستغربة حالي وومصدگة وصلت الهاي النقطه ..
للصبح خابرت خاله ..
رديت عاطت بيه " لج متت صار ساعه اني بالباب وين انتو "
.. الجرس طبعا محترگ
والغرفه لجوة حيل مانسمع الباب ..
رديت " اجيت خاله دقيقه "
بسرعه لبست گلبيه ولفيت شعري وطلعت الها ..
فتحت الباب خطية صايرة حمرة من الشمس ..
دخلت بوستها ..
كالت " اكول مبروك ؟"
اتنهدت " لا "
اتنهدت " يله عادي ان شاء الله المرة الثانية .. واني جبتلكم گيمر عرب وكاهي .. كلت لازم اهل العروس يجيبون ريوگ للعرسان "
دمعت عيني من كلامها وحضنتها " صدگ انتي اهلي ماعندي احد غيرج .. عندي اهل وعمام بس اني يتيمة "
مسحت عيوني " لاتبجين مايلوگلج البجي افرحي الدنيا ماتسوه.. اصلا اني احسج متغيرة الضحكة متفاركج ومرتاحة "
هزيت راسي" اي والله اني مااعرف نفسي ساعات اگول مستحيل هاي اني .. يمكن السبب بنسر .. هو الي خلاني احبه واتغلب على كلشي صار وياي وان شاء الله اتغلب نهائيا وارتاح "
ابتسمت " ان شاء الله.. وين هو بعده نايم يمعودين ساعه عشرة "
شهگت " صدگ والله ولا ندري "
سمعت صوته يكح .. عدلت عباتها خاله ..
اجه سلم عليها وباوعلي " صباح الخير "
ابتسمت ورديتله الصباح ..
كامت خاله " يلة اني اروح "

رد نسر " وين ترحين ابقي تريكي ويانا "
رديت اني " جايبتلنا كاهي وكيمر للعرسان "
ابتسم وغمزلي ..
همزين مشافته خاله ..
لحيت عليها تبقى ماقبلت " بيبيتج وحدها واجيت علموكم ولازم اتسوگ وارجع.. "
وصلتها للباب همست " لاتبقين هيج حاولي لان اذا بقيتي هيج ماتحصلين شي وذيج تحمل وتالي تخسرين كلشي .. بعد اذا حملت شيسوي بيج عود جمالج شيفيد اذا ماتدلليه وتحبيه وتنطيه حقه .. لاطفل ولاحقه معناها تخسريه ويروح گلبه الها لان حسب ماسمعت منج حياله وتعرف شلون تكسبه "

اتنهدت " ان شاء الله خاله " بوستها وراحت
دخلت سويت جاي وحميت الشيرة وخليتها فوك الكاهي ..
تريگنا وكان يكلي مو هيج الياكل الكاهي ياخذ قطعه كبيرة ويغمسها بالكيمر ويخليها بحلكي ..
شحط بلعومي من الحلى . يخليلها شيرة هواي اني احبها قليل بيها شيرة ومو حلوة ..
كملنا كال " بدلي واتأنقي اليوم كلنا النا "
رديت " وين نروح "
رد " معليج "
بدلت ورتبت نفسي وخليت مكياج خفيف .. وشال الوان لبست كل مرة البس شال العبايه نفسه ..
باوعلي " تخبلين "
طلعنا ايد بأيد . ماخلينا مكان مارحناله .. مولات وللزوراء حتى لعب لعبت بالالعاب ماخلينا شي بنفسنا
اشترالي ملابس على ذوقه…
حتى بناطير اخذلي واني بحياتي ملابستهم..
تغدينا بالمول .. عجبني اكسسوارات .. اخذت واخذلي نظارة حلوة لبسها الي " هاي العيون الحلوة حرام تأذيها الشمس "
بس بيومها كل شوية يريد يتعارك .. اي واحد يباوع يتخبل ..
اخر شي كال " البسي النظارات لاارتكب جريمة "
ابتسمت " تحجي صدگ هي غير بالشمس تنلبس "
رد بعصبيه " اذا عيونج تجيب التايه وتفتح الاعمى ضميهن احسن مما ارتكب جريمة "
لبستهن ومستحية .. ردنا نطلع صاروا بوجهنا ليث وشجن ..
اتفاجأت من شفتهم ايد بيد متلازمين .. نسر سوة نفسه مشافهم اصلا بس ليث بقى يباوع علينا…
شجن اصلا ماانتبهت دايرة وجهة..
همس "لاتباوعيلهم العارات ذولي "..
خطية هنا .. همزين متشوفهم بهيج حاله جان تأذت ..
حسيت بغيرة عليه من شفتهم ..
سألته " انت تحب هديل ؟"
باوعلي واستغرب " ليش هالسؤال "
رديت " هيج اجه ببالي "
ضحك " شنو اشتغل هرمون الغيرة عندج "
رديت " شنو تستهزأ بيه "
رد " لا ابد بس مستغرب صارلها سبع اشهر متزوجها ماغرتي ابد ليش هسا "
اتنهدت " قبل غير وهسا غير "
ابتسم " شنو الي تغير "
ضحكت " انت تريد تجرجرني بالحجي ماااا "
رد " اروح فدوة للماااا"
اتنهدت " خوش تتهرب من السؤال "
رد " مااتهرب بس مااريد اضوجج . باعي حبيبتي حتى لو مااحبها بس مادامها مرتي لازم احترمها . وجودها صار فرض عليه بس مو معناها اظلمها .. حرام عليه
حلفت ماادخل مرة الگلبي بس انت خليتيني اكسر حلفي ودفعت كفارة بسبب هالحلف .. بس اريدج تعرفين گلبي مايوسع الاكثر من وحدة خليها ببالج هاي"
ابتسمت وفرحت من اشوف كمية الحب الي بعيونة الي صح صايرة انانية واريد يصير ملكي . بس مااگدر اظلمه واخليه بين نارين واني السبب بوجود هالنار بحياتنا "
خلص يومنا وكان احلى ايامي ..
رجعنا للبيت اكلنا خفايف مانشتهي ومن التعب دخلت سبحت ولبست ثوب على ذوقه ونمنا .. ابد ماجبرني او حاول.. اكتفى بلي اكدر عليه وبعدها حضني ونام ..

للصبح كال خلينا نرجع .. والمرة الثانية مانجي لهنا اخذج الاربيل هناك بالمصايف والشلالات ازفج الي مرة ثانية ..
ضحكت " كم زفه حنسوي "
رد " عسا ما عشرة المهم انتي مرتاحة "
حبيت اهتمامه وعذره الوضعي ابد مازعل ولاضاج ولاحسسني بهالشي ..
كان مثل النسمة مو ذاك نسر الي تعرفت عليه اول مرة
رجعت بذكرياتي من صعد بالكراج وصعد يمي .. وشنو كانت نظراته الي ..
ومن جابني البيت عمة .. تهديداته وغلطه والراشدي الي ضربني بي ..
التفتت هسا هم گاعد يمي .. بس نظراته الي كلها حب
باوعت الايدة " هاي نفس الايد الضربتني بس هسا حاضنه اديه بحنان ..
كلشي تغير .. الله بعثك الي ملاك .. نقذني من متاهة ممكن تخسرني حياتي ..
تصرف طيش وهرب الى المجهول كان ممكن ينهي مستقبلي ..
عينه ع الطريق وجان مشغل قرص الهيثم يوسف وبي اغنية اضعف گدامك .. ماسمعتها قبل او ممنتبهة عليها لان مااسمع اغاني .. بس كلماتها اخذتني الغير عالم ..
لااراديا گلتله ..
"نسر"
التفت
" احبك "
ابتسم وباس ايدي " اموت عليج يابلاء الله الي واحلى بلوة "
ضحكت بصوت عالي ..
ضحك " هااا تذكرتيها "
هزيت راسي " اي كلما جنت تضوج مني تگولي بلاء الله الي "
وصلنا البيت نزلنا وخلص هالحلم بسرعه ..
دخلت تلگتني دنو حضنتني ..
بقيت ابوس بيها واشم ..
من دخلت الوجوه اغلبها مگلوبه..
سلمت وصعدت ابدل لان وكت غدا ..
نزلت بسرعه .. شفت نسر يم خاله بالغرفه ..
اشرتلي عذورة ورحنا للاستقبال ..
سألتني " هااا شلونه شهر العسل "
اتنهدت " وج يخبل احلى يومين عشتهن بحياتي "
حجيتلها كلشي سواه الي بس ماتعمقت بذنيج الشغلات وتجنبت ذكرهن اصلا ..
وعذورة سارحة بعالمها " وج شوكت اعيش شهر العسل اليوم اخبص الدنيا عليه والله "
ابتسمت " ان شاء الله يعمري "

جاي نسولف .. واشرتلي عذراء .. كامت بسرعه فتحت الباب صارت هديل بوجهنا ..
ارتبكت وحجت بسرعه " وين ختلتن دا انصب غدا تعالن ساعدنا "
ردت عذورة " هي تمن ومرگ قابل وليمة وكلنا نصبها "
هزت ايدها وراحت ..
همست الها " بس لاسمعتنا "
ردت " خلي تسمع احسن بلكي تحس وتولي "
طلعنا تغدينا وكملنا ..
غسلت الماعين وصعدت ..
بس نسر مو يمي راح نايم يمها اكيد خاله گلتله لان شفتها ضايجة وحتى من سلمت عليها ردت بثگل "
اخذت دنو نومتها بحضني واشم بيها ريحة ابوها ..
اشتاقيت الحضنه .. مااتوقعت يوم راح احب رجال بهذا الشكل ..
خلال اشهر غير حياتي كلها ..
بقيت انتظر اليوم الي يجي ينام يمي بي بشغف ..
استمرت معالجتي وحسيت بنفسي يوم عن يوم احسن
هديل ساكته ابد وماتختلط بيه ..
الصراحة هدوئها ماطمني .. وخفت ليكون الهدوء ماقبل العاصفة ..

رجعت من الدكتورة بيوم فرحانة انه بدت تتحسن بقى بس كيس كالتلها الا عملية نسويله ..
مابقى الا شهر للدوام .. ودنو صارت بالثالث ..
متعودة ادرسها قبل الدوام ..
كاعدين بالغرفه وسمعت هوسة..
طلعت شفت اسراء تنقل بغراضها ..
اشرت العذراء اجت ..
" شكو " سألتها
ردت " شمدريني الخانم فجاة گالت اريد اني فوگ وخلي بيداء تنزل.. جوة . لان اني عندي دراسة واوراق والحاسبه مالتي وذولي يلعبون بغراضي ويخربون شغلي .."
رديت " بس شتصير الغرفه هنا وولدها وبيداء وولدها"
ردت عذراء " الغرفه جبيرة الجوة . ومهيمن ينام بالاستقبال تفرشله .. شنسوي لعد .. المشكله ماما كلتلي ابقي يمها بالغرفه راح نرجع للايام الخوالي "
ضحكت " عادي من نسر ماهو باتي يمي . "
اتنهدت " ومن هو هنا شلون .. حتى مااگدر اخابر بعد براحتي "
بيداء هم تعبت من الصعدة والنازله اصلا فرحت من نزلت جوة .. غرفه خاله جبيرة حيل مو مثل غرفه هديل صغيرة ..
مهيمن صاير ينام بالاستقبال ..
مرات من انزل بالليل اسمعه يخابر .. معناها الهيج الكيه فوگ قبل لو بالسطح .. جان يتختل حتى يخابر ..
بيداء اصلا ناوية تبيع بيتها وتشتري يم اهلها حتى لو صغير المهم تستقر .
قبل كان مهيمن صغير ونسر ماقبل تگعد وحدها هسا عمرة بالعشرين وكبر .. كمل سادس بعد معاناة كم سنة رسوب ويادوب حصل تربية ..
السنة كليه وبيداء فرحانة بي وطايرة .. رغم معناتها وياه بسبب عمة .. بعدة يتواصل وياه ومااعرف شنو سر هالارتباط القوي بي .. بحيث حتى مايقبل احد يحجي عليه ..
استقرت اسراء فوگ .. وصارت عبالك حارس عليه
حسرة ماطلعت بسرعه طلعت تباوع مااعرف ليش هيج تتصرف تصرفاتها غريبة ..
حتى صرت اكمل شغلي واصعد . مرات بوجود نسر يمي نخلص النهار كله بالغرفه..
نايمة بحضنة ودنو بالكاع .
همس " حبيبتي.. جوعان "
رفعت راسي " شسويلك "
رد " جوعان عليج "
ابتسمت " دنو هستوها نامت اشششش "
اتنهد " ماخلتيها يم امي "
رديت " ماتشوف صايرة ملحمة. يمها "
ضحك " شنسوي اوامر القاضية هاي .. يله هانت بس الگي بيت قريب البيداء يخف البيت شوية "
رديت " ان شاء الله ولو تعودت عليها وع الجهال ماادري شلون اذا راحت جانت شايلة عني هواي وحبابه وتحبني "
ابتسم " هي حنينة صدگ تعودنا عليها "
رديت بحزن " ااااوه لاتبجيني مااتحمل وداع بعد وخاصه اذا اتعلق بشخص واحبه .. "
باس راسي " اروح فدوة للحساس دنزلي جيبللنا فاكهة شي جعت من صدگ "
لبست ونزلت ..
فتحت ضوة المطبخ فزيت شفت عذراء " شبيج عذورة ليش گاعدة هنا "
ردت بحزن " معتز من الصبح لسا جهازة مغلق ومااحصله اتصلت على هنودة تگلي بايت يم صديقه ماادري بي .. بحياته مابايت عند احد واصلا خاله مستحيل يخليه اشو مااعرف شبيه احساس مخوفني خاف صاير عليه شي "
رديت " اسم الله يمعودة گولي ياالله ماكو شي باجر يخابرج خاف شحن ماكو .. روحي نامي ولاتفكرين "
ردت " مااگدر صار كم يوم مو على بعضه واسأله يگلي شغل وتعبان وسالفه ببالي مدوختني ادعيلي تصير وتنحل كل مشاكلنا "
رديت " شفتي اكيد ضايج من شغله وماحب يضوجج يله حبي گومي نامي ولاتفكرين "
طلعت واني وراها اخذت فواكه وطلعت صار بوجهي مهيمن .
اجيت اشرب مي .. خالي فوگ لو جوة ..
رديت " فوگ ليش ؟"
رد " لا بس اريد اخابر وخاف جوة ويسمعني "
ابتسمت " لا اخذ راحتك فوك اليوم "
طلعت شفت هديل مفتوح بابها ..
صعدت " بالفواكه .. اكل وكمل .. ماشبعت اذا مو لفه شي ..
رديت " هااا شتفقنا مو گلنا تخفف وزن وترجع رشيق وحلو مثل قبل "
رد " ليش مو حلو اني صرنا مانعجب "
ابتسمت " تخبل بس اريدك مثل قبل "
ضحك " اويلي يابة يمكن متت وانت راضي عليه الهيج الله انطاني حورية "
حضنته وضحكت .
همس " شوكت دوام دنو "
رديت " ماادري يمكن نهاية 🔚 التاسع "
رد " زين نلحگ نسافر .. هالمرة مابيها مجال بعد "
ابتسمت " ان شاء الله "
رد " هااا صدگ اريدج تحضرين ملابسي انتي دور وتكويهن بيدج .. كويج حلو ومرتب "
رديت " صار "
بعد يومين يلتحق .. كويت ملابسه كله بيدي ..
ورتبتهن . حضرت الجنطة من وكت ..
وطفيت الضوة ونمت تعودت انام بضوة خافت .

هاي توصيات الدكتورة.. وفعلا هالشي خلاني اسيطر على خوفي ..
صح علاجها بطئ بس جاب نتيجة.. مرات اخاف وخوفي الاكبر انه اطلع مو بنيه .. هالخوف صار اكبر من خوفي من الماضي والي صار وياي ..
اخذت دنو الحضني ونمت من التعب ماحسيت بروحي
حسيت بحركة بالغرفه ..
شفت باب الكنتور مفتوح .. بين نايمة وبين گاعدة وعيوني مغوشة ..
حجيت " نسر هذا انت ؟"
ماحسيت الا ايد تخلت على حلگي وايد ثانية تخنگني شهگت وردت اصرخ بس ماگدرت ..


يتبع……

عيني هو دانزلكم بارحه واليوم تعويض بارتات..

يي صح ..هو اصعب شي من تربين الحيوان وتتعلقين بي وفجأة يموت😢💔 شعور يضوج
ولو احنا اهواي قبل ربينا بلابل ودجاجات
بس هاي جانت كلش عزيزة🥺

#ملوكه

قبل فترة سووة حملات للتشجير وطبعا روجوا بكل مكان حتى اللي يعجبه يتطوع ونشروا نصائح وروابط

فاللي تحب هالشي هاي رابط كروب بكربلا والثاني ببغداد وبالصورة يوزرهم

https://t.me/joinchat/mpeDhBf6Tl1lZTAy

https://t.me/joinchat/DUeZ6zOACUcyMmIy

https://instagram.com/tree_planting_campaign1?utm_medium=copy_link

#تطوير_الذات
شلون تصيرين اجتماعية🤔❣….

بعض الطرق رح تساعدج تكونين اجتماعية اكثر يعني قدرتج على التفاعل مع اللي حولج لما تنحطين بموقف اجتماعي 🤍

📌١- ابدئي بخطوات بسيطة
اهم نقطة هي إنو تبدئين بخطوات بسيطة وصغيرة ..حبه حبه وشوي شوي
هالشيء يساعدج بشكل كبير إنو تمشين خطوة خطوة بهذه المرحلة لأن لو بدأتي بالتفاعل مع الناس بشكل مفاجئ وبشكل كبير مره وحدة ( يعني مع عدد كبير من الناس، او تشوفين الناس ايام كثيرة ورا بعض بعد فترة انقطاع )
هنا ممكن يصير عندج حالة من النفور الكبير .. اللي يخليج تتمنين ترجعين لنفسج وتنطوين على ذاتج من جديد ❌

لذلك امشي خطوة خطوة ..
ابدئي بأنج تقابلين أحد من معارفج مره بالشهر، بعدها مره كل ٣ أسابيع، بعدها مره كل اسبوعين .. وهكذا شوي شوي زيدي

📌٢- اختاري الناس الصحيحة
مرات كثيرة الخلل ما يكون بيج انتي، لكن يكون باختيارج للناس اللي حولج ..
لو جانت الناس حولج مو زينين، غير متسامحين، سلبيين، يدققون على كل شيء او حتى أفكارهم ما تتفق مع أفكارك .. ممكن يكون الخلل منهم
لأن الناس اللي حولج غير مناسبين، وهيج رح تعلقين بين حالة إنج تغيرين من ذاتج وأفكارج حتى تنسجمين وياهم او انج تكونين وياهم مثل ما انت وتتعرضين للانتقاد بشدة
لذلك البيئة اللي حولج والناس اللي تختارين إنج تتفاعلين وياهم تأثر عليج بشكل كبير

📌٣- اختاري الأحاديث العابرة!
شايفين هاي اللحظات لما تكونين بالمصعد ويصير حديث عابر بينج وبين وحدة؟ ولما تشترين قطعة ملابس وتسولفين ويه اللي تحاسب؟
الأحاديث العابرة هذه لطيفة جداً لأنها تساعدج بزيادة خبراتج بالحياة، والأهم إنها تنطيج الثقة إنو تكملين الحديث مع الناس اللي انتي فعلا حابه تتعمقين بعلاقتج بيهم ..
من أبسط الطرق اللي تفتحين فيها أي حديث عابر إنو وانت بالطابور تنتظرين دورج تطلبين القهوة تسألين اللي واقفة بصفج "كم الساعة؟" 😅
وهنا بعد ما تجاوبج ممكن تنتقلون لأحاديث كثيرة ..
ممكن تقولين "اوو ما حسيت بالوقت!" او الوقت يمر بسرعة!" ممكن الحديث ينتهي على هذه الجملة .. وممكن يزيد على حديث مستمر ! 😌

ممكن ايضاً توكفين يم وحدة كاعده تبيع وتسألينها "وين المكان الفلاني؟" وبعدها تفتحين حديث !
تعرفين انه مجرد قدرتج على إنج تروحين للشخص وتسألينه هذه لوحدها تحتاج جرأة ..

📌٤- زيدي ثقتك بنفسك!
ثقتج بنفسج جداً مهمة، وهي الأساس لكل تفاعلاتج الاجتماعية .. ماكو شيء يساعدج بالتفاعل الاجتماعي بكل انسيابية مثل زيادة ثقتج بنفسج🤍

#اعـاده_توجيـــہ_لتنسون
#ملوكه
@stylegrils

مكياج صيفي بألوان فريش🤗💞وصيفيه حلوو ع اغلب انواع العيون

طبعا الرموش المتفرقه دايما تحلي العين اذا عليها الوان غريبه وتخلين هج رموش فيطلع اللوك بعد احلى💫


#اعـاده_توجيـــہ_لتنسون
#ملوكه
@stylegrils

مكياج سموكي🌚🌺للعيون المبطنه والغائره

بالبداية بدت بخطوات الميك اب الاساسية للبشرة وهالنوب بلشت بالعين ولو مسوية فلر كلش اوفر😑 للشفة بس لوجان طبيعي جان ارتب

#اعـاده_توجيـــہ_لتنسون
#ملوكه
@stylegrils