///// #البارت السادس والاربعــــون /////


ارجوك ..
لاتتركني وحيدة بدنيا ظالمة لاترحم ..
أرجوك عد لي وكن بقربي ... وسأكون بقربگ دائمآ ..

جنت بالمطبخ اني وبيداء ..
سمعت صوت عمتي وعياطها .. تركت كلشي من ايدي وركضت مااعرف ليش گلبي نغزني ساعتها..

خفت وگمت اسحب برجلي .. اخاف اتقدم واسمع خبر يصدمني ..
اتصل بيها عمو محي بس شگالها ماعرفنا ..
بس تلطم وتصيح نسر .. البنات كلهن مثل حالي مصدومات وخايفات ..

سألنها :
" ماما احجي نسر شبي ؟"

بقت تلطم وتبجي وتصيح " نسري يمة نسري ولجن اخوجن وسندجن طاگة عليهم مفخخة وبالمستشفى"

من سمعت احس رجلي ارتخت وردت اوگع لزمت بسرعه بسور الدرج واتكيت عليه ..

طلعت هديل من الحمام مرعوبة وتبجي " شبيجن منو المات بس لانسر ؟"

عاطت بيها بيداء " اسم الله اسكتي "

خالة تخربطت .. حرنا بيها ودموعنا تجري مانعرف شنسوي ووين نروح ..

هنا خابرت القصي .. مايرد ..
خالة بالكوة تاخذ النفس خفنا عليها .. لبست عباتها بيداء وراحت المشتاق .. لبسنا خاله جواريبها وعباتها ودخل ساعد بيداء هو وامه اجت هم ..
اخذوها ..

والمرة تمشي وتدعي " لاتاخفن ان شاء الله مابي شي "

البيت انگلب عزااااا ..
كنت ساكته بس دموعي ينزلن وحدهن ..
گاعدة على باية الدرج ..
وتذكرت الحلم ..
مااجة وصاني بالحقيقة.. اجاني بحلمي قبل ليروح ..
بقت وصيته ببالي وشلون سحب شعري ونام عليه

" حبيني لو ليوم واحد .. خليني اعيش حبج يوم واحد بس وريحيني " ..

بقيت الوم روحي .. حسيت اني على وشك خسارة اعظم واحسن رجل بحياتي ..
ااااه ياربي .. خليه يرجع سالم .. واحاول حتى لو اضغط على نفسي وارضيه ..
لاتخليه يروحي ويتركني ماعندي غيره .. لااهل لاسند ولا احد ..

هسا اكتشفت وادري اكتشافي متأخر .. انه شذر لو مانسر ماالها وجود ..

اللوم بنفسي راح يموتني اكثر من وجع گلبي ..
البيت انگلب بساعة ..
اجت ام قصي .. وبيت ابو مهند اخو ام قصي ..
بيت خالهم عباس ومرته وحسام ..
من غير الجيران بعد ما سمعوا.

النسوان بالصاله والرجال بالاستقبال ..
لسا ماعرفنا خبر اكيد ..
عمو ابو قصي وقصي راحوا يتأكدون .. ولسا ماكو جواب ..

عفتهم وبقيت بالمطبخ ..
اباوع للباب اتخيل هسا يدخل وينور البيت بطولة الحلو وملابسه العسكرية..
يباوعلي ويبتسم ..
گمت اتخيل عطره وصوته بالبيت ..

اجت دنو خايفه وتبجي ..
" ماما بابا مايرجع "

حضنتها " اششش حبيبتي لاتگولين هيج .. بابا راح يرجع وكلشي مابي "

ردت بحزن " بس خالة هديل… ." وسكتت

مسحت دموعها وسألتها " شبيها خاله هديل شگالتلج "

اتنهدت " ماكو شي ماما هيج .. "

بوستها حبيبتي گولي لاتخافين .. خاله هديل تأذيج ؟؟

ردت وهزت راسها " لا متأذيني "

حاولت وياها ماردت .. مااعرف ليش حسيت هديل مسويتلها شي ودنو تخاف تحجي ..
ماردت اضغط عليها واتعب نفسيتها ..

صحت فروحة يمها تلعب .. ونزلت ..
شفت جايبين خالة .. رحت للغرفه ..
نايمة وتون وتبجي .. وام قصي وام مريم يمها ..

اشرتلي بيداء .. رحت يمها ..
سألتها ع خالة ..
" شلونها شگالوا شبيها ؟"
ردت " ضغطها مرتفع وسكرها اثنينهن .. المهم حبيبه اعتمد عليج مااگدر اعوف ماما .. اريدج تسوين عشا ووياج عذورة .. حتى لو اشوي دجاج .. احنة وينه وين الاكل بس هاي الناس عيب شنطيها "

هزيت راسي وطلعت ..
طلعت الدجاجات .. غسلتهن وتبلتهن وخليتهن بالفرن ..

بقيت كاعدة بالمطبخ ويمي عذورة تخابر بمعتز وتبجي وخالها كل شويه يخابر يسأل ..

تذكرت من اخذني الاهلي شلون يدافعلي .. وشلون هجم على ابوي ويگلي تعاي اخذي حقج ..

اااااه ياالهي .. ليش مانحس بقيمة الانسان الا لمن نخسره ..

اجت هديل جانت تحجي وي امها " اي ماما تعالوا باجر اريد اموت… "

هزت ايديها عذراء .. " تريد تموت .. الگرطة الاول موتته بشهر .. ونسر صوبته بشهرين الله اليستر "

همست " كافي لاتفاولين اسم الله "

اجت هنا تركض ..
عمو خابر .. ركضنا للغرفه خاله تحجي وياه ..
" يعني عايش ؟؟ شلونه .. امانة عليك بوسة الي وطمني "

سدت التلفون وباوعتلنا .. " خلن سجاداتجن كلجن .. اخوجن لسا بالعمليه… جروح بجسمه هواي وشضايا… ادعلة يطلع منه .. "
باوعتلي " شذر يمة انتي يتيمة وبلكي دعائج مستجاب هذا رجلج ومالج غيرة ادعيله من گلبج "

نزلت دموعي " اي والله خاله مالي غيره "
حجت هديل " كلما مالنا غير ولانسوه بلياه . يمة ابو بيتنا وسندنا ربي اريدة. منك ترجعليا سالم… ..

عفتهن وطلعت…
شفت الدجاجات بعدهن ..
وطيت النار .. وصعدت .. خليت سجادتي وگعدت اناجي ربي وابجي.
الى ان اذن المغرب .. صليت ونزلت ..
الكل بعده موجود ..
گمنا اني والبنات سوينا عشا وخليناه ..
لگيت بيداء تخبز .. وگفت يمها .. ردت انهزم من البيت كله احس روحي مخنوگة بلياه ..
وگلبي يريده .. بحياتي مامارة عليه هيج مشاعر .. ماحسيت بهذا الفراغ الا لمن ماتت عمة بس ..

نفس الفراغ والوحدة والغربة الي حسيت بيها ..
حجت بيداء " تدرين جان يحبج حيل "
باوعتلها وعيوني دمعت . هزيت راسي

كملت " شهدنا حبه المريم .. بس حبه الج مختلف .. من تمرين وكانه روحه تطير وراج بس ما يبين.. مايوم التحق اذا مااجاني بالليل وگالي " شذر امانتي الج بعدي ديري بالج عليها هي ودنو .. وخاصة اخر يوم "

رديت بشهگة " حتى اني وصاني بنفسي ودنو عبالك حس راح يصير شي .. هسا حسيت بوحدتي بعده .. هسا عرفت اني مااكدر بلياه .. "

بقيت احجي وياها وهي تسمعلي وتبجي كلشي بداخلي حجيته ..
سألتني بعتب " اذا هيج تحبيه ليش كسرتي گلبه وقبلتي يتزوج غيرج "

رديت " ماقبلت . خاله خلتني امام الامر الواقع .. وماردت احرمه من الاطفال واكون انانية .. وافقت الخاطرة وخاطر سعادته "

ردت " بس سعادته انتي مو الاطفال . والله گال الامي " دنو كافي عندي مااريد جهال بس من حس بيج راضيه سكت ورضا بالامر الواقع "

مايفيد بعد لوم .. خليه يرجع بالسلامة .. وبعدها شيريد يصير .. يريدها يريدني ابد ما اعترض.. المهم هو بخير"

سويت صينية اخذتها للبنات بعد ماراحوا كلهم ماقبلن ياكلن .. سونها عزا ..
مااتحملت اشوفهن يبجن بدل مايدعن .
عطت لااراديا " كافي كومن .. اخوجن .. بخير بدل ماتبجن گومن تعشن وادعله .. لاتنصبنها عزا اسم الله "

ردت هديل " اذا جوعانة اكلي معليج بينا .. لان هو مايهمج طبعا ماتهتمين "

ردت خاله " حجي شذر صح گومن اتعشن مايصلح على اخوجن .. وين اسراء ماشفتها "

باوعنا صدگ اسراء ماهي ..
طفرت بيداء " بس لا شو شصار بيها . "
عاطت خاله " خاف يصير بيها مثل ماصار من استشهد ابوجن "
تطافرنا ندور عليها بكل البيت…
صعدنا الغرفه بيداء مقفولة .. كسرانها ..
" اسراء وينج اطلعي "
ردت " شتردن روحن منا لاتخافن ماانتحر "

اشرتلنا بيداء نخليها على راحتها .. بقت هي يمها تحاول تتدخللها ..

نزلنا كلنا.. تكسرت الباب .. طلع مهيمن صاح " منو ؟"

سمعنا صوت غيداء تبجي " اني افتحن "

فتحنا جانت لابسة اسود وتلطم گعدت بالگاع..

شلناها گوة لجوة.. " يمة اخوي .. سودة عليه ولجن راح وهو زعلان مني .. عساني اني متت ولا هو .. ولجن هذا ابني مو اخوي .. راح ومابست ايده وراسة وخليته يسامحني "

عاطت بيها هنا " كافي لاتبجين ولاتولفين اله .. لابسة مصخم وجايه تصيحين .. نسر عايش شبيج "

مسحت دموعها وباوعتلنا ..
شافتنا كلنا لابسين الوان ارتاحت ..
سجدت بالگاع وتبجي ..
حسيتها صدگ محروگ كلبها عليه ..

بقينا كلنا سهرانين يم خاله ومنتظرين عمهم يخابر
دگ الموبايل تطافرنا ..
جاوبت بيداء ..
گامت تضحك وعيونها يبجن .. واحنة نبجي وياها ..

سدته وضحكت " طلع طلع من العمليات وحالته مستقره . " عاد شوية گدرنا نتنفس ونرتاح ..

راحت عذورة تبشر اسراء ماقبلت تنزل يمنا ..
شوية ودگ موبايل هديل .. اخذتة وراحت الغرفتها

من سمعنا الاخبار الحلوة .. كدرنا شوية نرتاح كلمن گامت الغرفتها ..
اخذت دنو وصعدت ..
خابرت خاله .. حجيتلها عن نسر تخبلت وصارت تدعيله لان هي تعزه كلش وتحترمه ..
ضاجت حيل عليه ..

اندگت الباب سديته بسرعه وفتحته ..
عذورة " راح انام يمج .. البيت هوسة ..

فرشتلها ونامت يمي .. غفيت بسرعه من البجي والتعب حلمت بعمة وصار هواي ماحالمة. بيها .. جانت ضايجة وتوصيني بنسر ..

خفت حيل وگعدت مرعوبة.. ياربي اجعله خير ان شاء الله.

صليت الفجر ورجعت نمت ..
للصبح اجو اهل هديل .. وابوها وياهم اول مرة اشوفه

سلمت عليهم .. شافني صفن عليه مااعرف ليش ..بس جان رجال حباب ومتدين مبين ..

البنات بالدوام .. هنا داومت لان خلصت اجازتها وعذورة عندها امتحان ماگدرت اتأجله ..
دزينا الجهال كلهم للمدرسة .. والتهينا بالبيت والخطار
اجت هديل ..
" شسويتوا غدا اهلي هنا "
ردت بيداء جانت تعجن " خلي ايدج وي شذر اني راح اخبز تبقى وحدها شتصير للبيت للطبخ "

ردت " غير اهلي جايين خطار شلون اعوفهم وخاله مريضه ونايمة "

ردت عليها " قابل اهلج غربة هم من اهل البيت .. "

اتنهدت وراحت ..
اجو البنات الاء وسما هم وازواجهن بس اولادهن باقين هناك لان دوامات ..

ركبت الغدا وحدي اجو البنات شافوني ساعدوني ..
رادوا جاي اخذت جاي وماي ورحت ..

سلمت عليهم وقدمت لهم..
رد ابو هديل " رحمة الله والديج بوية الله يجبر خاطرج ان شاء الله "

باوع الهديل " بوية كومي ساعدي اخيتج وحدها "
باوعتلي وردت " ماعندها شي بوية .. مكملين كلشي "

بقيت صافنه عليها.
عفتها وطلعت . اخذت امها ودخلت الغرفتها ..
كملنا وغديناهم .. راح زوج الاء للسوگ اشكال تسوگ وجاب . ترس المطبخ ترس ..
وخالهم وحسام هم ماقصروا جابوا مسواك ولحم ..

يعني الكل ما تركنا.. بس مكانه غير ومختلف ..
گعدت خاله بالصاله .. سويتلها غدا لان ماتغدت ويانا
باوعتلي وحجت " تعبتي امي الله ينطيج العافية "

رديت " غير هذا بيتي خاله يعني ماكو تعب "

استحت ام هديل وحجت " والله هدولة هم تشتغل وي البنات وتخربطت لااكل ولاشرب على نسر سودة عليه بس تبجي .. تگول شهرين ونص وياه مدللني دلال ومخلاني اضوج بيوم "

ردت خاله " هو گلبه حنين سودة عليه .. الله يرجعة سالم البيتة والنسوانه ان شاء الله "

بقينا على هاي الحالة عشرة ايام .. خطار وناس رايحة راجعة .. جماعته هواي والتجار كلها تعرفه من غير الي وياه بالجيش يروحون للمستشفى يشوفوه ..

خابر ابو قصي وگال راح نطلعه بس يرادله عناية وممرض ينظف جروحة ويعقمها ..
حضرن اله جرباية بالاستقبال ..

سدته خاله وباوعتلنا " حضرن جرباية بالاستقبال "

ردت هديل " ليش خاله غرفته جوة ويرتاح بيها واني اداريه "

ردت هنا " واليجي وين ندخله الغرفته بوسط البيت "
ايدتها بيداء " اي صح جماعته هواي خو ماندخلهم بوسط البيت والغرفه النوم . بقوه بالاستقبال الى ان يطيب "

من كالوا راح يجي حسيت الدنيا فتحتلي ابوابها من جديد ..
صعدت بسرعه للغرفه .. طلعت من الفرشات الي مطرزتهم بيدي وظامتهم ..
نزلتهم ..
شلنا الجرباية للاستقبال.. وفرشتها تخبل صارت ..
ضحكت بيداء " عيني عيني هاي سبشل الحبيب الگلب"

ابتسمت .. " طرزتهم بيدي ذولي "
ردت هديل " موديلهم قديم عندي فرشات يخبلن "

حجن البنات " بالعكس يخبلن ونزاكة .. "

رتبنا الاستقبال وبخرناه ..
حضرنا الغدا المفروض قبل الظهر يوصلون بقينا كاعدين على نار حتى محد داوم بيومها ..

كنت ناذرة اطش جكليت عليه لو دخل من باب البيت .
نطيت فلوس المهيمن يجيب جكليت من الراقي گلتله
وخاله جابت ذبيحة السلامته ..

كل شوية خاله تخابر القصي ويكلها بعدنا ..
الى ان اخر مرة گالها دخلنا شارعكم ..

ركضنا كلنا للباب .
دخلوا السيارة لجوة..
نزل يمشي على تك رجل وسانده قصي ووجهة كله ضماد وجروح ..
ذبح القصاب الذبيحة جوة رجله…
البنات محاوطيه ويبوسون بي .. عينة جانت تدور بينهن .. خالة والبنات كلهم واكفين .. وهديل وياهم..

حسيت عيونة تدورني .. اتقربت فتحت جيس الجكليت شافني ابتسم .. طشيت الجكليت عليه ..
وحجيت " نورت البيت كله .. الحمد لله على سلامتك "

ابتسم " هذا نورج يالغاليه "
دنگت . صاح قصي " كافي غزل رحمة لهلكم جتفي راح خلونا ندخل ..

دخله للاستقبال ..
نام ع الجرباية.. حجت خاله " يرادلة كرسي ..
رد قصي " اجيبله العصر واني يمة هنا ابقى . يمون ابو صگر ..

ضحك نسر بس مبين متوجع ويكابر .
اخواته محاوطاته كلهن .. وفرحانات بي ..

اجت غيداء من بيتها تبجي .. طاحت عليه وبوست ايده وراسة وتوسلت يسامحها .
ماحجة شي بس مسد على راسها ..

دنو مافارگته ابد مگابلته وگاعدة ..
صاحت خاله " يله اطلعن كافي خلي يرتاح . وسوله غدا بسرعه "
بس اسراء ماتركته ابد حاضنته وگاعدة..
لان هي بالاصل متعلقه بي وهسا خافت خسارته . حتى دوام ماداومت ابد رغم عندها محاضرات هواي

سويت الغدا وخليتله سوب لحم زين اله..
اخذت الصينية .. اجت هديل سحبتها مني
" انتي مشغولة ماتلحگين اخذها اني "

اخذتها وراحت بقيت صافنه . محد انتبه بس عذورة
غمتني " لج فاهية دشوفيها شلون نادرة اخذتها ع الجاهز وراحت حتى بحجة اني سويتلك "

جابت جنطته طلعت ملابسه غسلتهن ونشرتهن ..
بعدها جابتله ملابس جدد ..
خلينا نبدلك تراك جديد لايجي احد ..

رفعه قصي وهي ساعدته . لبسته ملابسه ..
جانت ماتنطيني مجال اي شي اسوي ..

ناس رايحة وراجعة لليل ..
صاح شذر .. ردت اروح سبقتني .. " هاي عيني محتاج شي "

رد " هاااا اي اريد موبايلي مااعرف وين "
ردت " اي لكيته بالجنطة ومطفي جان خليته ع الشحن"

مااتحملت سوالفها . كملت شغلي وصعدت الغرفتي متت تعب وقصي نايم يمه ..

نمت دنو شفت خاله متصلة هواي ..
خابرتها ..
" هاااا امي شلونه نسر مو گلتلج اذا اجه خابريني "

رديت " اي والله خاله ماشفنا دربنا طول النهار خطار وكلها اجت من اقاربهم والجيران وغدا وعشا .
احنة كلنا واكفين بالمطبخ ومانلحگ .."

سألت " ونسر شفتيه زين ؟"
اتنهدت " اي زين بس ماشفته هواي "
ردت " ليش امي شلون تتركيه لابد يحتاج شي .. شلون ابقى اعلمج . وين دموعج عليه وتكولين بس خلي يجي وشيريد اسويله "

اتنهدت " اي خاله بس هديل متنطيني مجال مسيطرة عليه وتدرين بيه بعدني استحي مااگدر ابدله او احضنة واكومة "

عاطت بيه " تتعودين كافي دلال .. شوفيها شتسوي تسوي اتعلمي ..خليه يحس بوجودج ترى اذا لغت وجودج ماتحصلين كلشي "

بقت تحجي عليه وتعلمني ..
كملت منها سديته شفت رساله .. " المن مشغول ؟"
دزيتله " خاله خابرت تسأل عليك "
رد " تعاي ماشفتج مشتاقلج "

حسيت گلبي رجف من قريتها وابتسمت ..
دزيتله " وقصي عيب "
رد " نايم بسابع نومة "

گمت بسرعه باوعت النفسي دشداشتي مليانة مي من المواعين والشغل ..
بدلتها وعدلت شعري خليت الشال ونزلت على اطراف اصابعي خاف تشوفني هديل ..
عبالك تسوي سباق وياي ..

فتحت باب الاستقبال . باوعت القصي يشوخر تعبان ..
شافني ابتسم ..
اشرلي اسد الباب .
اتقربت منه ..

زاح نفسه شوية .. ومد ايديه الي ..
ترددت انطيه ايدي بس قاومت . تذكرت وصايا خاله
من تگلي " بس اول مرة تحسين بخوف وتتوترين وبعدها تتعودين "

نطيته ايدي .. عصرهن وگعدني يمه .. احس ايدي جمدوا ويرجفون بين اديه ..
همس " لاتخافين . بوسط الموت واحلم الزم ايديج واحضنها بين اديه ..

اخذها بين اديه وينفخ بيها بأنفاسه الحارة يدفيها ..
غمضمت عيني واحس روحي بادت وذابت . حسيت بخوف بس قاومت ..
ماخليت ذاك الاحساس يسيطر عليه .

همس " افتحي عينج وخليني اشبع منهن "
فتحتها بثگل سألني" شحسيتي ؟"

ابتسمت " مااعرف "
سأل " خفتي ؟"
رديت " شويه "

ضحك " رحمتك ربي لو ادري متصاوب من زمان حتى تگعدين هيج گعده يمي "

رديت " اسم الله شلون تحجي هيج "
سألني " خفتي عليه ؟"
رديت " مايعلم بحالي الا الله .. شكد تاركه اهلي بس ماحسيت بخسارتهم ولا حسيت بيتم الا لمن سمعت بيك "

ابتسم " تحجين صدگ شذر هيج اني مهم بحياتج "
رديت " انت كل حياتي والله "

راد يكوم مايكدر " وج شسوي هسا اني احس روحي مقيد اريد اصرخ بعلو صوتي . بس لا اني بحلم "

ضحكت عليه وعلى تصرفاتة وهو يشيل ايده للسما ويكله رحمتك ربي .. عسا ان تكرهوا شيئا وهو خيرا لكم ..
لو ادري الموت هيج يقربج مني جان رحتله برجليه..

جنت احجي بعفوية والي بداخلي اگوله بلا تردد احس گلبي والساني اتحرروا ..

اباوع لعيونه يلمعن من الفرح .. رغم مايگدر يكوم ويتوجع بس يكابر من الالم ويضحكلي ..

ردت اگوم شفته تعب .. همس " ابقي يمي هنا "
اشرتله على قصي " عيب لايگعد "

اتنهد .. وطلب ايدي مرة ثانية .. نطيته ايدي سحبها وخلاها على شفافه وباسها ..

رجع احساس غريب سيطر عليه ..
سحبتها بسرعه وطلعت ببرودة الجو جسمي صار نار ووجهي حار ..
طلعت ابتسم واتلمس وجهي ومرتبكة ..
صارت گبالي هديل واكفه ..
شفتها انصدمت. بسرعه صعدت لفوگ بس بقت واگفه وحسيتها ضايجة حيل ..

دخلت للغرفه .. بمشاعر مختلطة .. خوف وتوتر ومشاعر حلوة اول مرة احس بيها ..

تذكرت عذورة من تحجيلي عن حبها .. معناها هو هذا الحب . داخلي كله يرجف . واتوتر ..

معقولة اني هيج احبه .. لدرجة تغلبت على خوفي بسببه .

فتحت شعري ونمت .. وصرت اتخيل كل همساته وحركاته ..

كعدت الصبح مثل الفراشة الي تتنقل من زهرة الزهرة
كعدت دنو بدلتلها ومشطتلها ونزلنا ..

صارت خاله گبالي صبحت عليها ردت
" هلا امي .. صباح النور .. نسر گعد سويله ريوگ حتى ياخذ علاجة .."

دخلت للمطبخ شفت هديل تسوي ريوگ استغربت مو عوايدها تكعد من الصبح ..

حجت " لاتسوين النسر اني سويتله .." ابتسمت وراحت معناها ماضاجت مني .

طلعت دنو .. ودخلت صاح شذر ..
اجيت عبالي قصي يمه . طلع رايح للدوام لان خلصت اجازته وگال بعد الظهر يجيب مرته ويجي يبقون هنا ..

دخلت اجت وراي هديل " ها عيني محتاج شي "
رد " لا مشكورة تعبتج هاي شذر اجت "

تقدمت اله " تعبك راحة حبيبي گول شتريد "
رد .. اريد اگوم للحمام .

ردت " اي اني اسندك گوم… "
حضنته بأثنين اديها ورادت تگومة بس ماگدرت ..
اجيت بسرعه ساعدتها ..
من نزلت راسي نزل شعري على وجهة ..
استنشقه وهمس.. افيشش ..
هي انتبهت خزرتني بس ماحجت ابد ..

گومناه ع الكرسي جابله قصي البارحة .. واخذتة مني دفعته للحمام ودخلت وياه ..

ماضجت ابد لان هاي الخطوة مستحيل اگدر اسويها وادخل وياه ..

عدلت فراشه بين مارجعوا ..
ماقبل وحدة منا تسنده .. صاح بيداء اجت سندته ونام ..

يمكن ماراد يحرجني .. حس بيه توترت ..
بقينا اني وهديل نفس الحالة .. بالنهار ماتخليني اتقرب منه واغلس عنها لان هي زوجته مثل مااني ويمكن هي فارغه اكثر مني ..

بس بالليل مايتحمل .. يدز رساله وينزلني ..ولان مريض مااگدر ارفضله طلب ..
ابقى يمة شويه واصعد رغم مايتعدى حدوده وياي مجرد يتغزل ويلمس ايدي لااكثر ..

خلال هالفترة حسيت نفسي اول مرة اعرفه .. اخجل وافرح بكلمة منه ..
حتى هو حسيته تغير يكابر ويقاوم حتى يتعالج ..
رغم رجله تعبانه وتأذيه ..

بعد اسبوع كلها راحت .. البيت فرغ .. رجعنا النفس الهدوء ..
اعتمد على نفسه ويكوم ويگعد ..
بس من يريد يكعد يحتاج احد يسندة ..

هديل جانت دايما تتسابق وياي حتى تسنده ..
بس هالمرة ماهي بالحمام ..
سويتله فواكه واخذتهن ..
ابتسم من شافني " عاش من شافج ليش تختفين الا اصيحج "

رديت " شسوي اكو من ماخذ مكاني وميخليني "
ضحك " محد ياخذ مكانك يحلو . صح اني اعزها واحترمها بس مكانتج انتي غير بگلبي "

ابتسمت واتقربت منه .. گال اسنديني ..
دنگت عليه حضني باثنين اديه وراد يكوم بس احسه قيدني حيل . اتقرب وجهة من وجهي حيل ..

همس " احبج بگد رحمة الله "
غمضت " نسر لايجي احد "
رد " محتاج اگوم اريد اصعد الغرفتنا تعبت "
كعد زين . وسحبني يمة .. خله عيني بعينه دنگت . رفع وجهي وقرب وجهة ..
ارتبكت .. ونقذتني خاله على اخر لحظة ..
دخلت علينا خجلت وهي هم خجلت .. بسرعه طلعت

شافتني بيداء ضحكت " عيني عصافير الحب اهدوا لاتصيبكم عين "

استحيت " هااا شمسوين "
ردت " لا ابد بس لقائتكم السرية بالليل .. الله يسعدكم اي اريدج هيج شذورة اخوي تعبان . انغدر وانظلم سعادته وياج لاتبخلين عليه "

ابتسمتلها وهزيت راسي ..
كلما اخابر خاله واحجيلها عن مشاعري وخوفي بنفس الوقت ..
تشجعنـي وتكلي حاولي حتى لو فشلتي حاولي بس لاتيأسين .

وفعلا كنت احاول مرات اسيطر على نفسي ومرات اتهرب منه .. مازال اكو خوف بداخلي ومااعرف شلون راح اتخلص منه ..

هنا :
داومت بعد الاجازة.. كنت ضايجة على الي صار بنسر
ومانعرف شنو مصيرة ..
قررت اتجنب المدير ومااوصل يمه ابد .
هو هم مادز عليه بعد .. بس يبعث شغله اخلصه وادزه بيد العامل. .

بيوم صاحني ترددت اروح… بس العيون كلها عليه وخاف يشكون ..

رحت اول مادخلت عاط بيه وشمر الاوراق بوجهي " شنو هاي شغلج اذا ماتكدرين ليش تشتغليهن .. صايرة مهملة وكثرت اجازاتج "

خليته يحجي الى ان سكت .. رديت عليه " استاذ انت شتريد مني ادري بيك تتعمد لان ماصرت وسخة مثل الي تعرفهم "

عاط اكثر وطردني " اطلعي برة قليله ادب عبالج الناس كلها مثلج منحطة .. هو ماوسخ المجتمع غيرجن انتن "

مااتحملت عياطة طلعت بسرعه والدمعة حاصرتني .. احس الكل يباوعلي .. مااعرف سمعوا لو لا بس عرفته يريد يشوه سمعتي حتى اطاوعه بس مستحيل اخليه يشوه سمعتي لو اعرف ابطل من وظيفتي واگعد بالبيت

يوم عن يوم اختنگت .. مر اسبوعين وهو محاربني..
اتشجعت ورحت اله للمكتب .
شافني دنگ " هااا شگلتي ؟"
رديت " اريد انقل منا .. "
باوعلي " معناها تتهربين مني "
رديت " اذا مانقلتني منا مستعدة ابطل ولاابقى هنا "

ضحك ضحكة طويله وكال " اهدي كافي .. لاتنقلين ولاتبطلين .. احسبي الي صار ما يتكرر "

رديت " صار ولا ماصار اني بعد مااريد ابقى هنا "
رد " واني مااريدج ترحين منا .. هناء اعذريني بس الي صار غصب عني .. ماعبالي انتي مختلفه .. السبب مو بيه بهواي بنات سلمني نفسهن بحجايه وحدة "

رديت بعصبيه " وانت كمدير محترم المفروض جاي هنا تشتغل مو تدور علاقات .. لا تبرر النفسك وتخلي السبب بالبنات .. بعد الي سويته وياي متأكدة انه انت الي جبرتهن والله اعلم بشنو هددتهن .. منا وجاي مااريد ابدا تدز عليه المكتبك الى ان انقل "
تركته وطلعت .. خلص الدوام اخذت جنطتي وطلعت
لكيت ليث گبالي . استغربت .
" شعندك هنا "
رد " اصعدي بسرعه لاتخليني اطلع عن طوري "
رديت " ماكو شي بينا يخليني اصعد وياك روح هسا يجي مشتاق ياخذني "
عاط " اصعدي لج ترى مايصير خير "

اجة استاذ هذال المدير .. " ست هناء منو هذا ويباوعلي بمكر "
رديت بعصبيه " هذا ابن عمي وطليقي استاذ شكرا لتخاف "
صعدت وياه حتى اخلص من هذال ..
باوعلي منو هذا بس لا حبيبج الجديد !!


يتبع .. .

///// #البارت السابع والاربعــــون /////


تحركت السيارة شوية ..
عطت بي " نزلني هنا كافي .."
باوعلي " منو هذا حبيبج الجديد "
رديت " وانت شعليك منو انت وتسألني "
رد بعصبية " السانج لج… ماشاء الله اخبارج توصلني"
ضحكت " لازم شجن مامالية عينك .. الهيج تركض ورى اخباري "
رد " لاتلوفين الحجي .. اذا تحبين اوصل الاخوج سوالفج وهو يتصرف .. لو بس يعرف يحجي بالغيرة واخته ماشية على حل شعرها "
عطت بي " احترم نفسك اني عرضك يا .… .. ولو شتوقع من واحد مثلك .. انت روح راقب مرتك مو تراقبني لان احتمال التخون صديقتها كلشي تسوي "
وهسا نزلني لاافضحك ..
وگف السيارة " ولي روحي بس هالمرة سكتت مو معناها مااراقبج المرة الثانية صوت وصورة ادزهن الاخوج سالفه الطلعات والمطاعم كلها… "
بقيت مصدومة .. " يامطاعم عزا معقولة شافني وي استاذ هذال من اخذني .. بس لو شافني مايسكت جان اجة اكيد احد موصله "
خابرت مشتاق اجة اخذني… رجعت للبيت ..
جان نسر متحسن بس رجله بعدهي .. الدكتور يگول ع الاقل شهر او اكثر يله يمشي عليها ولازم علاج طبيعي بعدها..
شافني ابتسم .. " هااا هنوة مختفيه مانشوفج "
رديت بأبتسامة .. " ابدل واجيك حبيبي "
بدلت وسويت غدا الي وجبت الصينية گعدت يمه بالاستقبال ..
" ليش وحدك وين البنات "
رد " راحوا الغرفهم خليني هيج صاير مثل خط النهاية يتسابقن ياهي التجي قبل حتى بطلت اصيح او اريد شغله مااريد اشوفهن يتسابقن لو اكو شي بينهن "
ابتسمت " هاي وين لگيتها نسر .. وين شايفلك اثنين ضراير متفاهمات لابد يصير هيج شي بعدين بدون زعل انتن الي خليت نفسك بهيج موقف.. انت گلبك معروف المن يدگ .. ليش ورطت نفسك "
اتنهد " بالبداية صح ردت اورط روحي السبب . بس بعدين هالشي انفرض عليه وشفتي الي صار وهي بنية مكسورة مااريد اظلمها لو اكسر بختها "
رديت " بس مشاعرك مو الها ليش تظلمها وياك .. مادام ببداية الطريق انهي كلشي احسن مما تتطور الامور "
رد مستغرب " ترديني اطلگها وابوها شأگله تتسمى بنت خالتي .. صح هالجهة مااحبها .. بس عمي ابو هديل ترباته غير وانتي تعرفيه رجال من اهل الله وحباب شيصير بي لو بنته رجعتله مرتين "
اتنهدت " بعد بكيفك هاي حياتك .. بس دير بالك لاتظلم شذر .. شذر يتيمة وانت الي مارضيته الي رضيته الها "
رد " مستحيل اظلمها شذر امانه الله عندي شذر مرات احسها بنتي مو مرتي اخاف عليها من الهوى "
ابتسمت " الله يحفظكم .. صدگ اريد احجي وياك بشغله "
سأل " شنو ؟"
رديت " اريد تشوفيلي احد ينقلني من هذا القسم .. "
رد بأستغراب " ليش احد مضوجج صاير شي ؟"
رديت " لا بس كله رجال واتقيد .. يعني اريد قسم بي بنات احجي اخذ راحتي . اختنگت واني بنصهم رغم كلهم محترمين وماعندهم شي وياي "

هز راسه " الله كريم اشوفلج حل .. "
دخلت شذر تبتسم بيدها ماعون فواكه ..
اخذت صينتي وگمت " وهاي اجت حبيبة الگلب اروح احضن اولادي وانام "
شذر :
نزلت من الدرج سمعته يحجي وي هنا ..
ويگلها " مستحيل اظلمها شذر امانه الله عندي شذر مرات احسها بنتي مو مرتي اخاف عليها من الهوى "
فرحت بكلامه .. رحت قطعت ماعون فواكه وجبته الهم
بس هنا گامت وتركتنا وحدنا استحيت ..
باوعلي " توقعتج نايمة "
رديت " لا جان عندي خياط كملته ونزلت .. جبتلك فواكه لان مااكلت بالغدا زين خاف جوعان "
رد " جوعان عليج . ااااه شذر شوكت تحنين عليه "
ابتسمت " انت شگلت مو اخليج على راحتج "
اتنهد " اي گلت بس المشكله اخاف ابقى العمر كله اتحسر "
رديت " مو تگول وجودج يمي يكفيني .. اشو غيرت "
رد " ابد والله اصلا ضحكتج الي كلش كافي عمي وين جنا ووين صرنا .. ع الاقل هواي اشياء تطورت بينا "
رديت " خاله كل يوم تخابر عليك .. تتمنى تجي تشوفك بس تخاف تجي لهنا "
رد " لا وين تجي اصلا بس يشوفنها يگولن هاي امج نفس العيون وشلون عيون هن "
ابتسمت " هسا انت تتغزل بخالتي لو بيه "
ضحك " طبعا بيج .. شسوي بخالتج اني ادور كتاكيت"
نطيتة الفواكه وگمت . مااتحمل كلامه .. مرات ينسى نفسه ويتعمق بالحجي ..
طلعت صار مهيمن گبالي ..
سأل " باجي خالي نايم لو گاعد "
رديت " گاعد روحله .. اكل وياه فواكه وسويله واهس"
ضحك " تدللين اصلا اكلهن كلهن وزين اذا حصل "
ابتسمت من يومه مهيمن يحب الاكل ..
صارت عيني على بابها مفتوح شوية وواگفه تباوع مطلعة بس عينه.. فزيت خفت منها ..
هاي عود ليش هيج واگفه .. معقولة تتنصت ؟؟
رجعت صعدت بسرعه عذورة تنام يم بيداء . دخلت يم البنات نايمات ..
عفتهن ورحت الدنو گعدتها حتى ندرس ومااخليها تنام هواي علمود تنام بالليل من وكت ..
من گعدتها فزت مرعوبة.. والله مااگول مااگول ..
حضنتها.. شبيج امي شبيج ..
حضنتني وتبجي ..
خبلتني .. لزمت وجهة بأثنين ادية وابوس بخدودها ودموعها ترسن شفافي تبجي بشهكة ..
" شبيج ماما شنو حلمانه .. شحلمتي . احجيلي مو احنة متعودين كلشي تسولفيلي شبيج "

جانت تشهگ وتحجي " ماما مااريد اروح الذيج ماما اريد ابقى يمج "
سألتها " ومنو گالج ترحين انت هنا يمي "
ردت " خاله هديل .. گالت "
استغربت " شكالت "
تخوفني " تگلي اهلج راح يودوج لهناك لان يردون يسون طفل بعد مايردوج .. صدگ انتو راح تسوون طفل "
صفنت " شنو هالحجي ماما ابد اموت ولا اخليهن ياخذوج انتي بنتي .. حضنتها واهدي بيها "
سألتها " وليش ماكلتيلي "
ردت بخوف " تضربني اخاف .. وتخوفني تكلي اذا حجيتي السعلوه تجي تخنگج بالليل هاي تجي للاطفال الي يفتنون "

بقيت مصدومة لو مااثق بدنو ماتكذب جان ماصدگت معقولة هديل مخليه عقلها وي طفله وتخوفها وهيج تحجي وياها.. شنو غايتها ؟؟
هدأتها .. جبتلها عصير وحلويات خليته يمها . طلعت دفاترها .. رسمتلها وخططت الها ..
" يلة حبيبتي من تكملين اكل .. ابدي اكتبي وهسا اجيج مااتأخر "
باوعتلي " مو تعوفيني لو خلي فرح يمي تجي تدرس "
هزيت راسي " صار تتدللين "
نزلت واحس عيوني ماتشوف من الغضب .. اول مرة اتعصب واضوج من احد .. او مرة اتنرفز هيج من توصل الدنو كلشي انسى ..
دگيت باب غرفتها ودخلت..
جانت واگفه تتمكيج ع المراية .
شافتني استغربت " شعندج هنا "
رديت " شوفي من اجيتي لسا .. ساكته عنج وعن سوالفج وتفاهاتج… وكلت حقها هم يعتبر بيتها وهذا زوجها ..
بس من توصل الدنو .. مااسكت فاهمة ..
ردت " شنو دنو شبيج مشتهية المشاكل انتي ؟"
رديت " لاتغشمين نفسج .. الافكار الي مخليتها براس دنو بطليها والا… ."
ردت " والا شنو .. تطرديني مثلا .. وهو انتي منو اصلا .. انتي هنا مجرد لقيطة لا اهل ولا اصل ولا فصل خدامة عندهم… والدليل صارلج اربع سنوات واكثر مزهرية مخليج حتى مايتقربلج .. تحاولين تغريه لان متي قهر شلون يتقربلي وتاركج .. ديري بالج تخلين راسج براسي شذر .. "
ضحكت " تهديداتج ماتخوفني .. لو مااني راضية ماجان اجيتي لهذا البيت .. اذا تردين تحاربيني بدنو غلطانه . عندي الدنيا كلها بكفة وهي بكفة.. "
ضحكت بأستهزاء " مسكينه انتي .."
باوعتلها " ماكو مسكينه الا انتي مريضه وتفكيرج مريض . الي تحارب طفله معناها انسانه مريضه"
تركتها وطلعت .. مااتوقعت هديل هيج تخوف.. كل ذيج الفترة تتمسكن حتى تكسب الكل .. وخاصه نسر متعاطف حيل وياها .. بس طلع وجهها الثاني مختلف
من طلعت صارت بوجهي خاله طلعت من غرفتها
شافتني استغربت ..
" خير خو ماكو شي "
اتنهدت " ماكو شي خاله .."
عفتها وصعدت لفوگ .. احس نار تغلي بيه .
دخلت الغرفه البنات .. عذورة تنام يم بيداء فوگ ..
جانت نايمة وتعبانه من الدوام ..
كعدت يمها .." عذورة كومي "
ردت " امممممم اريد انام روحي "
رديت " وج معتز صار ساعه يتصل خطية گومي "
فزت من نومها وكفشتها شكبرها تدور على موبايلها ..
وينه وينه ..
صدك ضحكتني رغم ضايجة..
باوعت للموبايل ماكو اتصال .. رجعت باوعتلي " تجذبين عليه "
رديت " شسوي اذا ماتگعدين ومحتاجة احد احجي وياه .. "
رجعت نامت وبعده النعاس بعيونها وردت " شبيج ليش ضايجة لازم نسر ضوجج "
رديت " لا هديل "
بسرعه فتحت عيونها وكامت " شسوتلج احجي خلي اسحلها مشتهية اسحلها من زمان "

ضحكت " لاتخافين سحلتها اني بالحجي "
ردت " الحجي شنو . وج سحله معدلة يرادلها "
من شافتني جدية سألت " احجي شكو ؟"
حجيتلها كلشي تخبلت..
بسرعه لمت شعرها وگامت .. حتى اولاد بيداء فزوا على صوتها عبالهم نتعارك ..
لزمتها " اوگفي خبله وين رايحة "
ردت " اسحلها "
رديت " مو هسا .. اخوج مريض ماناقصه مانريد مشاكل "
ردت " وج جا شيصبرني عنها مااتحمل اموت انجلط "
رديت " حجيت وياها وانطيتها المقسوم "
ضحكت " اي عاد شلونج انتي .. تلگيج كلتيلها " عفيه هديل لاتحجين وي دنو خطية تخاف "
ضربتها " وج تضحكين عليه .. لا والله اول مرة اتعصب هيج من سمعت تخبلت حتى اني ممصدگة بنفسي "
ردت " هسا شلون مااسحلها حرامات "
رديت " عوفيها هسا بس اذا تكررت… .
قاطعتني " ع الاقل خليني احجي وياها ماارتاح والله "
رديت " بس مو تسوين مشاكل.. وج خاف تگول راحت وصلت وتكرهني"
غمتني " عاد هي تحبج حتى تكرهج اصلا لو بيدها شمرتج من زمان وستولت ع الساحة شبيج انتي شوكت تبطلين فهاوة "
وصدگ ماااتحملت الا نزلت وحجت وياها .. بس هديل نكرت وكالتلها شذر تجذب وتتبلى عليه . وكايمة تبجي
وكايله العذراء " كلجن ماتحبني وصافات وياها عليه ماتردني كولن الم ملابسي وارجع "
وعذورة گايلتلها " علواه والله ع الاقل حياتنا هادية جانت قبلج "
عذراء من النوع الصريحة مااسكت ابد والسانها اطول منها بس هي گلبها نظيف كلش وتحب الكل حتى الي يأذيها بسرعة تنسى وتسامح ..
ماقبلت على عذراء من حجت .. لان بعدين انگلبت السالفه علينا ..
راحت هديل تبجي الخالة ..
وكايلتلها .. اني ملفقة حجي عليها وتعاركت وياها وعذراء اجت غلطت عليه بسبب شذر وطردتني من البيت .
صاحتنا خالة للغرفه ..
" شبيجن وي هديل "
رديت عذراء " شبينا .. ماسألتيها شسوت .. تهدد بدنو ومخوفة البنت "

ردت عليها خاله " وانتي شمدريج دنو گالتلج ؟"
رد ت " لا شذر "
باوعتلي " واذا صدگ گايلتج دنو ليش مااجيتي وحجيتي وياي واني اتصرف شلون ترحين تتعاركين وي البنية وبعدها تحيلين عذراء وهاي الخبلة طاردة البنية .. "
ردت عذراء " وانتي صدگتي بيها اصلا هي حية من جوة تبن تكرص وتضم راسها "
عاطت بيها " احترمي مرت اخوج .. مثل ماتتعاملين وي شذر اتعاملي وياها.. اني راح احجي وياها بشغله دنو وافتهم منها وانتن سدن السالفه .. نسر مريض وماناقصه مشاكل "
طلعنا من الغرفه وعذراء تفور نار .. هنا عرفت طينة هديل شنو .. وشنو ممكن تسوي وتبرأ نفسها ..
تذكرت كلام خالة من گالت .. هسا تسوي المستحيل وتاخذه منج وانتي ابقي صافنه ..
مادام بدايتها تريد تبعد دنو عن البيت .. معناها تعرف انه وجودي مرتبط بيها .. ولهذا هيج تتصرف ..

صرت احاول اتجنبها ومااختلط بيها ..
التهيت بنسر ودنو وبس . ذولي الوحيدين الي يهموني بالبيت .
البنات كل وحدة وحياتها مافارغات الي والهمومي ..
بعد شهر صار نسر احسن بس گام يمشي ع العكاز مايگدر وحدة ..
ضايج ومل من گعدة البيت ..
حتى قبل اكو خطار يجوه ويلتهي وياهم .. اما هسا قليل يجي احد .. حتى بيت عمة او قصي يجون ساعه ويرحون ..
سويتلة كهوة وجبتها اعرفه يحبها من ايدي .. رغم ماكنت اعرف اسويها بس علموني البنات ..
شافها ضحك " تعرفين نقطة ضعفي "
ابتسمت " هسا تغير مزاجي كله "
رد بهمس " مايتغير مزاجي الا ببيت عمتي "
ابتسمت " طيب ونروح هناك نسوي سمج بالحديقة نشوي وخاصه هسا الجو حلو ودافي .."
همس " ليش ماهسا نروح "
رديت " وين نروح وانت بهاي الحالة "
ابتسم " مشتاق موجود ماكو شي صعب "
رديت " بس بشرط دنو ويانا ناخذها "
اتنهد " اي طبعا حراسة الج خاف اسوي شي "
ضحكت " لا وربي بس مااگدر اعوفها هنا وحدها وهم نخابر خاله تريد تشوفك خطية "
رد " زين دروحي بدلي وجيبيلي ملابسي "
صعدت بدلت الي والدنو .. خابرت خالة گالت من توصلون خابريني اشوفكم وارجع مااكدر اتأخر"
كملت ونزلت ملابس اله وياي .
حان يخابر بمشتاق " جيبلي وياك سمجتين كبار وخبز حار وطرشي "
شافني ابتسم " كملت المهمة . يلة ساعديني ابدل "
صفنت عليه .. ضحك " اعرفج ماتسويها .. روحي يابة اني ابدل الوحدي "
بدل وكمل صاحني .. اجت خالة شافتنا مبدلين " وين تردون ؟"
رد " اني اريد اروح عندي علاج .. "
ردت " هاي الطفله شعندكم ماخذيها "
رد " اريد اشتريلها ملابس للصيف "
ردت " توازيتوا ماعندها ملابس اشو شذر مخيطتلها اشكال من غير التشتريه "
رديت " خاله للمدرسة مو للبيت "
ردت " هي المدارس وراح تخلص بعد شكو "
عاد بالگوة نسر قنعها ..
شافتنا هديل حجت " نسر عندي مراجعة للدكتورة لو كايلي اروح وياكم "
سألها " شوكت مراجعتج "
ردت " قبل كم يوم وماحجيت بسبب وضعك "
رد " وليش ماحجيتي هالشغله مابيها تأجيل.. باجر لو العصر اخذي امي وروحي .." طلع من جيبه فلوس وانطاها واي شي تحتاجيه گولي ..
سكتت ماردت بس بقت تباوعلي ..
سمعنا هورن سيارة مشتاق طلعنا ..
دنو ركضت قبلنا ..
ونسر يمشي بالعكاز ع كيفه ..
صعد بالسيارة اخذت مشتاق العكاز خلاهم بالسيارة وصعدنا ..
سأل " وين ابو صكر "
رد " للكاظمية بس هااا مااريد احد يعرف "
رد " شتدري بيه بير غميق اني "
ضحك نسر " اعرفك انت ترباتنا "
مشتاق من هو عمرة صغير يشتغل بتكسي .. يتيم وعندة اخوات اكبر منه يدرسن .. بطل من المدرسة وبقى على سيارة ابوه يشتغل المنطقه كلها تأجره ع المخابرة قبل ..
بعدين من صارت سيارات عندهم .. قليل الي ياجروه بس احنة من يوم الوعيت واجيت البيتهم هم مايكدرون يستغنون عنهم ..
انسان مؤدب وكتوم ابد مالة دخل بأحد متخذ قانون لاارى لااسمع لااتكلم ..
نسر يثق بيه اكثر من نفسه ومأمن على اخواته وياه وين مايرحن .. حاليا هو ياخذ عذورة وهنا للدوام ويرجعهن ..
بس الاولاد مأجريلهم ابو طالبه وياهم يرحون ويرجعون وياها هم جيرانه ..

وصلنا البيت عمة نزلت الغراض الي اشتراهم مشتاق ..
حاسبه نسر ع الغراض وكالة تجينا من نخابرك ..
اخذت المفتاح فتحت الباب ..ودخلت الغراض ..
باوعت باب المطبخ مفتوح ..
استغربت ..
نسر يريد يدخل .. صحت " نسر باوع "
انتبه بسرعة گال " اوكفي هنا لاتدخلن "
طلع مسدسة .. ودخل بعكازة وحدة .. بالگوة يمشي خطية وگلبي يمة ..
همست " نسر لاتدخل اوكف خلي نخابر الشرطة "
رد " لاتخافين شبيج "
دخل . حجيت وي دنو " ابقي هنا لاتدخلين"
دخلت وراها .. البيت اغلب غراضة ماكو ..
غرفه عمة مفلشة .. غراضها كلهن قديمات وراقيات ..
لسا اتذكر من تگول كلهن جابهن الي ابو وليد من الكويت والدول .. من جان يسافر ..
نزلت دموعي وگعدت ع حيلي بالگاع .. كلشي بهذا البيت يذكرني بعمة .. غراضها كلها عزيزة عندها وهسا نصهن راحن ..
يعني انت دورت الغرفه ومالكيت بيها فلوس وذهب فلشتها ليش ؟؟
صرت ابجي بلا وعي وكأنه عمة هسا ماتت مو قبل سنين ..
دور نسر البيت كله ماكو ..

اجة شافني " لاتبجين انعل ابو الغراض اجيبلج احسن منهن "
رديت " شسوي بالاحسن منهن اني اريدهن هن .. ذني غراض عمة وريحتها من راحن عبالك هي راحت .. ماتعرف هالبيت شنو بالنسبة الي "
اتنهد " اعرف والله اعرف بس البيت لان متروك استغلوا غيابنا وباگوه وداعتج هسا اخبر وبس يلكوهم اطلعهن من عيونهم .."
خابر عمة وقصي اجو ..
شافوا البيت ضاجو مثلي .
سأل قصي " البيت متروك المفروض ينباع والغراض تنباع مو يبقى هيج مسدود "
رد نسر " البيت والغراض من ريحة عمتي شلون هيج تفكر "
استغربت من عرفت مايعرفون البيت مسجل بأسمي ..
اشرلي نسر " گومي روحي البيت رسمية انتي ودنو .. لان خبرنا وراح يطلع كشف وراح ياخذون البصمات .."
كمت بالكوة دموعي ماوگفن من البجي . هاي امانة عمة الي نطته الي لان تدري بيه راح احافظ عليه وتالي ماحافظت عليه ..
خابرتني خاله بالطريق ..
نسيت اخابرها " الو خاله "
ردت " وين صرتوا لسا ماوصلتوا مو كلتلج خابريني من توصلون "
رديت " خالة بيت عمة اجينا لگيناه مبيوگ "
شهگت " سودة عليه .. يله بالغراض ولابيكم .. لاتقهرين روحج "
رديت " شلون مااقهر روحي ماتعرفين هالبيت شنو بالنسبة الي "
بقت تواسيني وتهديني الى ان وصلت البيت خاله رسميه..
دكيت الباب تفاجأت جانت ساعه 11 ونص الصبح يعني مو عوايدي اجي بهيج وكت ..
دخلتني جنتها للبيت من شافتني تفاجأت " شذروة هلا يمة شعجب ذكرتي خالتج.. شبيج ليش تبجين اكو شي صاير شسوولج احجي "
حجيتلها تخبلت وضاجت مثلي .. بس اني وياها نعرف هالبيت شنو بالنسبة للخالة…
بقيت يمها للظهر.. صبت غدا وجابتلنا مسويه مطبگ سمك .. تذكرت السمك الي بقى بالطارمة ..
حجت " اكلي خاله لاتقهرين روحج "
رديت " مااشتهي خاله اريد اموت من القهر "
ردت " ع الاقل اكلي الخاطر الطفلة "
باوعت الدنو " اكلي ماما .." ماقبلت كمت الف لفات وانطيها اكلت شوية وبطلت ..
خابرني نسر ..
رديت " ها شسويتوا "
رد " بعدنا خابرت مشتاق راح يجي ياخذجن للبيت تعالوا لهنا "
ردت اطلع ماخلتني خالة اروح وحدي طلعت وياي
وصلت شفت سيارة شرطة بالباب..
دكيت النسر طلعلي ..
اجت خاله شافته وتحمدت السلامته ماجانت تعرف بي
سألته " شسويتوا "
رد " اخذو بصمات وبلكي يعرفون شي .. اخذي دنو وروحي وبعدين اجي وراجن "
اجة مشتاق اشرلي اصعد ..
همست " دير بالك ع نفسك "
ابتسم وهز راسه " لتخافين حبيبتي "
ابتسمت لحجايته ورحت للبيت .
وصلنا لهناك البنات يتغدون . يوم جمعة والكل بالبيت
شافوني سألوا " وين صرتوا مو ع اساس للدكتور رحتوا..
رديت " هاااا اي ومرينا مناك البيت عمة يشوفه نسر وطلع مبيوگ "
شهگت خاله " يمة وهسا .. اوووف ام وليد روحها ببيت وغراضها جانت . طبعا البيت فارغ الهيج انباگ لو مأجريه احسن ."
سكتت مارديت ..
الكل ضاج . ع البيت . الكل وحدة بيهم ذكريات هناك صاروا يسولفون ويذكرون ايامهم ببيت عمة الله يرحمها..
سألت هديل " شبسرعه كملتوا السوگ والعلاج ورحتوا لهناك ؟"
رديت " مارحنا للسوگ لان متأخرين طلعنا "
اتنهدت وجن ماصدگت بكلامي ..
ساعه ورجع نسر تعبان وضايج وياه عمة وقصي وصلوه ودخلوا .. تلكته خاله بالاسئلة ..
گعدوا بالاستقبال ..
رد ابو قصي " الغراض راحن بعد فدوة الروحها الطيبة بقى البيت ما لازم هيج يبقى .. خلونا نأجره لو نبيعه "
رد نسر " عوفوه هيج عمتي لو موجودة ماتقبل غريب يگعد ببيتها .."
ردت امه " اي كلام عمك معقول ع الاقل اجروه وفلوسه انطوهن الفقير هم ينحسب ثواب الها "
رد نسر " البيت مو العمتي حتى نتصرف بي "
باوعوا مستغربين ؟؟
" المن لعد شبيك نسر "
رد " عمتي تنازلت عنه الشذر قبل لتموت "
شهگوا كلهم من الصدمة " شنو الشذر ؟؟"


يتبع .…

///// #البارت الثامن والاربعــــون /////


من عرفوا البيت بأسمي تخبلوا .. الي جان يضحك بوجهي صار هسا ينظر لي بحقد ..
صاح عمهم " نسر هاي لعبه لو شنو ؟ اعرف هالبيت شنو بالنسبة الخديجة مستحيل تنطيه الاحد . بعدين هي انجلطت وتمرضت وبعدها توفت شوكت لحگت تدوره ؟"
رد نسر " اي دارته بأسمي لمن اخذها للعلاج الطبيعي ووصيتها گالت اذا متت .. تدوره بأسم شذر وماصار هواي من داورته الها "
ردت خاله " وليش درته ليش ماخليته بأسمك .. يعني من هيج كل اليوم والثاني ماخذتك اله "
باوعلها " يمة كافي عمي شنو سالفتكم انتو اول وتالي البيت مايهمكم وصارلة سنين مركون ماسألتوا عليه هسا من سمعتوا بأسم شذر صار عزيز "
رد عمهم " البنية تتسمى غريبه عنا .. شلون خديجة تنطيها حلالها .. وحصتها بالمحلات والعمارة بس لا هم سجلتهن بأسمها "؟
رد نسر " سجلتهن بأسمي "
من سمع عمهم هالحجي تنرفز .. واتهم نسر ان هو ضاحك على عمة وهي مريضه ومخليها تسجل كلشي بأسمه .. بيومها تعاركوا وطلع عمهم زعلان ..
بعد ماطلعوا.. اشرلي " السمج جبته ع الكاونتر نظفيه وضميه "
اعرف غايته مو السمج بس حتى يطلعني من الاستقبال
بس صوت خاله العالي خلاني اسمع كلشي..
الي يسمعها يكول مسجل بيتها بأسمي ..
مااتحملت الي سمعته ونظراتهم الي .. وخاصه بعد كلام اسراء الي وكدام هديل :
" هسا عرفت سر بقائج عند عمتي طلعتي راسمه ع البيت تاخذيه قشمرتيها وخلتيها تسجله بأسمج . ابد نظرتي بالبشر ماتخطأ .. قبلج هواي شفت نماذج مثلج"
صعد للغرفه بسرعه .. فتحت الكنتور طلعت الجنطة مالتي .. نفسها الي نهزمت بيها من بيتنا. .
كل الي احصله من شغلي اضمه بيها .. صار سنين واني اشتغل وحتى اصرف على نفسي مني مايوم طلبت شي منهم وحافظة كرامتي.
اما اليوم طلعت اني بنظرهم حرامية واستغلالية ..
نزلت الفلوس خليتهن گدام نسر ..
رفع راسه " شنو هاي ؟؟
رديت " هاي فلوس البيت ادري مايكفن بس كلما اشتغل راح انطيك وهيج اسدد ثمنه .."
باوعلي بعصبية " شيلي فلوس البيت عمتي سجلته برضاتها الج مو من حق احد ياخذ فلس منج "
وحتى الحصة الي انطتها الي .. بفلوسهن انطي البيوت الكافلتهم .. يعني هم مو الي مثل مامتوقع عمي ..
منا وسدي السالفه كافي ..
سالتني اسراء " منيلج هاي الفلوس ؟"
رد نسر " شغلها نسيتن صارلها سنين تخيط وتبيع للمحلات "
كدر بكلامه يسكتهن بس نظراتهن شلون راح يسكتها
صعدت خليت الجنطة بالكنتور .. اصلا اني مااحتاجهم بس مخليتهم للزمن كلشي يصير حتى البيت ضجت منه بسببهم ..

اجت دنو " ماما بابا يريدج "
نزلت بسرعه .
صارت كبالي هديل .. درت وجهي عنها..
دخلت للاستقبال ..
رفع راسه " سويلنا غدا "
رحت للمطبخ دااسوي غدا .. اجت هديل ..
" طلعتي مو هينة.. هسا عرفت تمسك نسر بيج "
درت وجهي " شنو هالحجي .. قصدج علمود البيت ؟؟ ليش هو مو جان بأسمه لو يريد ماينطيه الي وياخذه "
ابتسمت " اكثر وحدة تعرف نسر اني .. عشت طفولتي كلها هنا واعرفه انسان حقاني من صغره وماياخذ شي مو اله .. مادام عمته وصته اكيد التزم بوصيتها . "
رديت " حجيج متناقض شنو تكولين علمود البيت وبعدين تكولين حقاني " قصص وروايات عراقية كرار صلاح
ردت " بمعنى مايخليج ترحين وانتي عندج بيت عمته لهذا رغم ماكو شي يربطكم وهو متمسك بيج "
استغربت من كلامها " شنو قصدج ماكو شي يربطكم "
ردت '" اقصد ماكو طفل يربطكم "
رديت " جيبيله انتي الطفل شمنتظره "
صبيت الاكل واخذت الصينية ورحت للاستقبال..
لگيته متمدد ع الجرباية…
شافني " شبيج بعدج ضايجة "
هزيت راسي " عليمن اضوج.. حقهم يحجون البيت مو من حقي لاتنسى اني مايربطني بيها شي "
خزرني " اششششش لاتعيديها بعد .. واشرلي ع البيت"
سكتت ..
رجع كمل " خلي اليحجي يحجي اسمعي وغلسي ماماخذه بيت احد والمفروض من البداية يعرفون حتى مايتفاجأون ..
مارديت بعد ماعندي شي احجيه ..
اجت دنو صحتها " تعاي تغدي ماما "
كعدت يمنا ..
باوعلي " وانتي ماتتغدين"
تنهدت " مااشتهي "
خلط تمن ومرگ وشال بالخاشوكة وقربها الحلگي ..
" هاي من ايدي لاترديني "
اكلت منه ..
رجع خلط ويأكلني ودنو تضحك..
اشرتله " كافي اني اكل " استحيت منها .. او يمكن لان اول مرة تشوفنا هيج مامتعودة..
كملت غدا ..
اتنهد " مايصير اصعد الغرفتنا .. اوووف الله ياخذ الي باگ البيت وضيع مخططي كله "
ابتسمت " يمكن الله رحمني الله يعلم شناوي "
رد " هو انتي تخليني خلصتيها عليه رمضان ومصومتني "
كملت الماعين وصعدت .. بعد ماشفته مغمض ..
رحت نمت تعبانه .. وهم مااريد احتك بأحد وخاصه خاله حسيتها شايله عليه ..
نمت وهالمرة مانزلت لليل ..
حسيت نفسي محتاجة ارتاح تعبت من التفكير بكلشي وبالكل ..
درست دنو وكملنا.. گعدنا ع التلفزيون نتفرج ..
الى ان صعدت عذورة ..
فتحت الباب " هاي گاعدات .. نسر كل شوية يسأل عليج وموبايلج مغلق يكول "
باوعتله مابي شحن خليته ع الشحن ..

رجعت سألت " مو عوايدج ماتنزلين شبيج ضايجة "
اتنهدت " لا اصلا مو من حقي اضوج .. ليش اني منو واضوج .. كثر خيركم متحمليني وطلعت داخله على طمع "
ردت " ليش تاخذين على كلامهم .. كلنا نعرف انتي شنو ؟"
رديت " الي يقهرني لسا محد يعرفني سنين واني يمكم وماعرفتوني لج عندي فلوس واشتغل مامحتاجة ولليوم ماطلبت من احد غير الاكل مامكلفتكم شي يخصني كله اني اشتري حتى دنو اني متكفله بيها .. وكل هذا وطلعت طماعه .. اسألوا نسر اصلا رفضت وهو اصر يداور البيت "

ردت " كافي لتحرگين روحج .. الي يحجي خليه يحجي اگعدي بغرفتج وطنشي ..خليهم يعرفون قيمتج"
سكتت..
ضحكت " لج لو شايفتهن يتلاطمن شنسوي عشا وشنسوي . بيداء تخبز .. وماما من شافتج مانزلتي گالت الهديل تسوي عشا .. وهاي بقت تلطش اخر شي طلعت بتيتة وطماطمة سوتهن ..
خليهم يشوفون شذر واكلاتها تترس السفرة "
ضحكت " خوش تحرضين "
ردت " لا والله صيري هيج احسن .. محد يستاهل غير هم اهلي مايستاهلون سمعتيها لو اعلي صوتي "
اتنهدت " والله احبهم مثل اهلي . وفضلهم ماانساه لو ماهمة اني بالشارع .. بس تعبت واني ارد الجميل الى متى ؟؟"
حضنتني " اااااه شذر تعبانه وربي .. اصلا لو ماانتي بالبيت كان متت "
رديت " اسم الله شنو هالحجي "
ردت " راح اكمل واتخرج .. ولسا مااعرف مصيري معتز مصر نطلع ومااعرف ردة فعل نسر . احس روحي هالفترة ضايعه .. مابقى شي على تخرجي "
رديت " فكري واخذي قرارج وين تحسين نفسج مرتاحة روحي .. صعب تلكين احد يحبج بهاي الدنيا ..
منو تحسين بالراحة يمه كوني يمه "
ردت " راحتي يمه .. معتز فتحت عيني عليه مستحيل راح احب شخص مثله ولا احس نفسي وي غيره .. احس الدنيا بلياه تخنگ واريد اموت ومن اسمع صوته احيا "
ابتسمت وذكرت نفسي من غاب نسر وتصوب اختنگت وحسيت روحي تطلع .. معناها هو هذا الحب ..
سرحت بخيالي يم كلامه وحركاته .. وخليت عذراء توصف حبها وشوقها المعتز ..
لليل مااتحمل نسر .. رجع دز عذراء
اجت " يمعودة گومي اريد انام خبصني انزلي شوفيه "
رديت " ليش شيريد ؟"
ردت " ماادري .. وهديل مگابلته تريده يروح وياها للغرفه يمكن يريد انقاذ "
رديت " عليمن انقاذ غير هي مرته لعد المن اتزوجها اذا يتهرب منها "
نزلت .. " رايد شي "
بوعلي بأستغراب " ادري ضايجة عليهم اني شنو تحرميني منج ؟"
رديت " ماضايجة من احد بس نعسانه .. "
سأل " وماتتعشين "
رديت " سوتلنا عذورة لفات اني ودنو "
رد " اليوم مسوين طماطة وبتيتة ومااكلت ماتشويلي تكة "
باوعت للساعه بالوحدة .. تكة وبالوحدة؟؟
رد " شبيها ؟"
رديت " مابيها بس لحم تاكل وتنام صعب ينهظم وانت نايم صارلك شهر وزنك زايد لازم تخفف !
رد " وين زايد بس لاتخلين عينج عليه ودور ملونة الله يستر "
فتحت عيوني " شتقصد يعني اني احسد ؟"
ضحك " بالقران يخوفن لاتفتحيهن "
رديت " هسا صرت احسد .. شعليه راح اسويلك وانام "
رد " اذا ماتاكلين مااكل "
رديت " بس مااكل لحم بالليل "
رد " زين عمي سويلنا جاي وجيبي جبن ناكل .. لو ماكل طماطمة وبتيتة احسن .. "
ابتسمت ورحت سويت جاي وجبن وخليت زيتون .. تذكرت وليد الله يرحمة ماياكل جبن الا زيتون وياه

اخذت الصينية ورحت .
اتنهدت " نسر انت وعدتنا تاخذنا نزور عمة ووليد ومارحنا بسبب اصابتك .. صايرين هواي يجون على بالي "
رد " اي ان شاء الله بس اتحسن شوية اخذكم حتى لو وي مشتاق بس اني وانتي وامي لان البنات دوام "
فرحت من سمعت . اكلنا وشلت الصينية..
اجت هديل شافتنا..
" ها نسر تجي لو بطلت "
باوعلي رديت " يلة انت نام اروح اصعد دنو وحدها لاتگعد "
عفتهم وصعدت .. مااتحملت طلعت باوعت رجعت للغرفه وحدها .. ابتسمت .. بس ليش ضجت معقولة غرت ؟؟
مرت الايام ونسر بدأ العلاج الطبيعي ..
اني صرت حد شغلي بالبيت واصعد مااگعد يمهن ..
بس بالليل ننجمع بغرفه بيداء ويانا عذورة ومرات هنا ..يشترلينا مهيمن حب وكرزات وجبس ونسهر ..
وخاصه بأيام العطل .. صارت گعداتنا كلها فوگ حتى خاله صارت تشكي وحدتها .
لان هديل بغرفتها واسراء ماتختلط اسمها كاعدة الابتوب مالتها او بالدوام.
بدأ يتحسن ويمشي بس يعرج .. الدكتور منعه يصعد درج او يمشي مسافه بعيد او يسوي شي بي جهد وتعب ..
من الدكتور منعه عن الدرج ضاج .. وطلب ننزل يمة جوة ..
صار يوم ينام يمها . ويوم احنة ننزل يمة بالاستقبال
اول يوم فرشنا بالكاع ..
طلب من دنو تنام يم امه .. حسيت وراه شي
باوعتله ضحك " ماكو شي شبيج .. ماسمعتي الدكتور كال ماكو جهد "
رديت " اي سمعت يعني شنو ؟؟ "
ضحك بصوت عالي فضحنا…
اشرتله " اششش فضحتنا "
رد " لا يربي شنو انتي معقوله عمرج 24 سنه وماتعرفين شي "
رديت " لاصدگ شنو يعني.. "
سحبني وحاوطني بذراعة.. توترت بسرعه .
ردت اسحب نفسي منه " نسر مو هيج شگلنا "
ابتعد " خلص ابتعدت بس ع الاقل نامي على ايدي خليني احس بوجودج يمي . "
جبرت نفسي ونمت على اديه .
" ديري وجهج الي "
درت وجهي .. صار وجهة قريب عليه حيل وعيونة تباوع العيني .

همس " بس اطيب مااضمنلج وعدي .. اريد اسويلج ليلة زواج وماتمنعيني "
سكتت .
ها شكلتي
مااعرف
تتعودين هسا انتي بحضني خفتي ؟
شوية
يوم عن يوم يروح الخوف
ان شاء الله
يعني انتي تتمنين قربي
ابتسمت ودنكت
رفع راسي بيدة مرر اصابعة على شفافي والشامة الي بخدي ..
قرب وجهة حيل بس لاحت انفاسه وجهي ابتعدت ..
اتنهد .. بس ماحجة عرفته ضاج ..
حجيت " خلينا ننام نعست "
رد " بس ابقي بحضني لاترحين .. "
بالاول حاولت انام ماگدرت الى ان غفيت وحدي "
گعدت الصبح شفت نفسي حاضنته ودافنه وجهي بصدرة وهو لاف ايده على ظهري وحاضني ..
رفعت راسي باوعتله شلون نايم .. ابتسمت ..حسيت نفسي مثل طفل بحضن امها . اكو راحة وحنان مو طبيعي بحضنة اول مرة انام هيج بعمق ومااحس بالاذان واول مرة تفوتني صلاة الفجر ..

ردت اكوم سحبني الصدرة " خليني اشبع الليل كله مامصدك نايمة بحضني .. كل شوية افز عبالي حلم "
ابتسمت .. " اني هم ممصدكة حالي "
بالكوة كمت منه .. طلعت بسرعه الدنو صعدت كعدتها عندها امتحان .. راجعتلها وبدلتلها…
واجه السايق اخذهم ..
مر اليوم بين البيت وغزل نسر وسوالفه .. صرت اتمنى قربه واخاف .. خاصه من اشوف هديل تلبس ثوب نوم
وترتب نفسها .
خابرت خاله وحجيتلها عن نسر وطلبه مني ..
سألت " يعني مادام كالج اريد اسويلج ليلة عرس معناها يريد حقه ولازم ماتمنعيه "
اتنهدت " شلون خاله واني اذا راد بوسة ارجف واخاف"
ضحكت " والله ماعرفتج صايرة تحجين.. وهذا يعتبر تطور بحالتج .. باعي شتكولين اخذج الطبيب نفسي
رديت " مال مخابيل "
ضحكت " وج يامخابيل .. والله انتي الراح تخبليني وتوديني للشماعيه "
رديت " جا شنو غير هو للمخابيل "
ردت " لا يفهيمة . دكتور يعالج الحالات النفسية يعني الي مثلج .. "
سالتها " وشلون يعالجني ينطيني علاج "
ردت " يحجي وياج تحجيله حياتج واذا تحتاجين علاج واصلا انتي بديتي تتحسنين يعني زينة "
اتنهدت " شلون احجيله استحي ماكو دكتورة "
ردت " اووووف ياشذر راح تجلطيني اي اكو .. خلي نسر يسألج ويحجزلج "
رديت " مااا استحي اكله شيكول عليه خبله وتريد تتعالج "
اتنهدت " عمي اني اكله وافهمة بس من يحجي وياج مو ماتقبلين وتستحين روحي واخلصي من هذا الكابوس "
اتنهدت " امنيتي خاله هيج وماعاد اتذكر ولااحلم ولاضوج "
ردت " ان شاء الله " يلة روحي خلي اخابره ..
سديته منها ونزلت .. سمعت موبايله دك ..
شافه رفضه ورجع خابر هو متعود من تخابره خاله يرفضه ويرجع يخابرها ..
بقى يحجي ويهز راسه .. اخر شي گالها امنيتي ولو طالبه من زمان اخذها بس هي الي جانت قافله ..
اتنهدت " شكد عيب "
حسيتها صعبه .. كمل المكالمة وماصاحني ولااخذ رأي استغربت ..
لليل بدت تجهيزات هديل ..
يمكن لان متزوجة قبل يعني عندها خبرة وتعرف شلون تتصرف ..
حسيت بداخلي غيرة .. معقولة يحجي وياها مثل مايحجي وياي او من يلمسها هم يكلها مثلي..
اول مرة هيج احس احساس ..
بعد يومين من اجه من العلاج الطبيعي ..
صاحني .. " سدي الباب وتعاي "
سديته واجيت يمه .. " خابرتج خالتج مووو ؟"
سويت نفسي مافاهمة شيقصد "
رديت " عن شنو ؟"
رد " علمود الدكتور شنو نسيتي "
رديت " هاااا اي "
سأل " اذا ماتردين ترحين كولي "
رديت " لا اروح "
رد " زين يابه اني دورت وشفت دكتورة زينة اخذت رقم الحجز اذا تردين احجزلج ونروح "
هزيت راسي . طلع موبايله وحجز بس الحجز البعد يومين لان عندها جلسات ..
ارتاحيت شويه احس روحي مترددة وخايفه..

صار يوم الحجز ولازم اروح مايفيد الخوف والتأجيل
بيومها هديل وخاله بدلن ويردن يطلعن عندها مراجعه
شافتنا انصدمت ..
" وين تردون يمة "
رد نسر " شذر عندها مراجعة "
ردت هديل " اني كل شهر عندي مراجعه ماشفتك يوم گلتلي اخذج.. اذا ماتريدني المن تزوجتني "
اتنهد " مو هيج بس انتي من البداية اخذتج امي وتكفلت بيج وشذر هاي اول مراجعه الها .."
ردت خاله " يمة لو انت تاخذهن اثنينهن لو اني مايصير تفرق "
استغفر ربه " هاهي يمة .. روحن ويانا .. حتى انتي تبقين وي هديل بالعيادة واني اخذ شذر الدكتورها "
ردت " وليش مااثنينهن النفس الدكتورة "
رد " هي مو دكتورة نسائيه .. معدتها توجعها لأبو الباطنية نروح "
ابتسمت هديل " هااا مو اگول هديل ماتراجع نسائية "
باوعتلها ومااعرف شنو قصدها ؟"
اخذنا مشتاق وصلنا خاله وهديل للعيادة ورحنا مناك
للدكتورة النفسيه .
نزلت وبالكوة امشي..
رجلي ماتشيلني ..
لزم ايدي وعصرها " الخاطري صيري قوية "
ابتسمت وهزيت راسي ..
بقينا شوية كاعدين وصاحو اسمي..
دخلت جانت دكتورة متوسطة بالعمر وحلوة .. مبينه مرحة تدخل للگلب بسرعه ..
جنت خايفه بس اول ماگعدت عرفتني عن نفسها وتعرفت عليه ..
جابتلي مي . وبعدها صارت تفتحلي مواضيع خارج اطار العلاج ..
سألتني اذا متزوجة او لا . كم طفل عندي كم اخت يعني اسئلة عادية ..
بعدها كالت عگب باجر تعاي الجلسة الثانية ..
خلتني ارتاح ماحسيت بخوف ابد ..

لدرجة بالجلسة الثانية من اجيت جنت ماخايفه ودخلت مبتسمة وسلمت عليها عادي وگعدنا.
بس بهذا اليوم تأذيت حيل .. نومتني وطلبت احجيلها عن طفولتي ..
اول مابديت احجي نزلت دموعي ..
طفولتي عادية .. كنت الوحيدة الاهلي .. ماما ماصار عندها وراي الا بعد عشر سنوات ..
خلال هالفترة كنت المدللة .. ابوي كلما يجي من الدوام اتلكاه لازم بيده حاجة الي ..
كنت انام بوسطهم بالليل . اذا اخاف يحضنوني اثنينهم
ضحكت " جيد يعني طفولتج حلوة "
اتنهدت " بس .. بس بعد العشر سنوات وبعد مابرز جسمي صار الحضن الي احتمي بي نقمة الي ..
هنا كحت الدكتورة " اذا تردين ارتاحي "
بس مااعرف شنو الي خلاني اكمل .. اول مرة كنت نايمة بوسطهم.. حسيت بابا حضني فرحت .. اتجهت اله وحضنته . بس بدا يتلمس بيه وصارت لمساته تخوف وتضوج..
بجيت مااتحملت ..
ماما ثاني يوم بعدتني عنهم وخلتني بغرفه صغيرة جانت مخزن الوحدي .. گمت اخاف وحدي مامتعودة وبالليل بابا يجي يمي لمن ابجي لان ماما حامل وتعبانه
وبابا صار…… .
بعد مااتحملت شهكت وتخربطت .. صحتني ونطتني ماي وهداتني ..
كالت " نكتفي اليوم بهيج قدر .. اخذي هذا العلاج بس بالليل منه . وعلى موعدنا بعد يومين ارجعي "

صح كنت اتأذه واطلع ابجي النسر . بس ارتاح احس جاي احجي وي نفسي وهي تستمعلي بس .. صرت اني انتظر شوكت يجي الموعد حتى اروح ..
بس بامتحانات دنو اخر السنة تخلفت ومارحت ..
من كملت رجعت كملت .
من شافتني ضاجت لان قطعت ..
وسألتني " شتحسين هسا اذا تقرب منج زوجج ؟"
رديت " هو لسا ممتقربلي .. بس لمساته وباقي الاشياء عادي استقبلها .."
ابتسمت " جيد . "
بس لازم تحاولين وتخليه يتقربلج حتى نشوف العلاج دا يمشي او انتي تتحسنين او لا ..
سألتها " دكتورة استحي شأگله مااگدر واخاف "
ردت " ابد لاتكولين اخاف انسي .. انتي تحبيه ؟"
هزيت راسي " اي "
ردت ' " لعد خلي تفكيرج وياه . انه انتي تحبيه مانكدرين تعيشين بلاه .. باوعيله بشغف بحب مو بخوف "
كنت استمع الها وساكته ..
من كملت اشرتلي " صيحي زوجج اريد احجي وياه اذا موجود هنا "
طلعت صحتله " الدكتورة تريدك "
استغرب ودخل وحدة بقيت منتضرته برة ..
بعد ماطلع كان مبتسم .. ابتسمتله " شكالتلك "
ضحك " كالت صار لازم ترحون شهر عسل "
خجلت " وانت ماصدگت "
رد " امنيتي هاي "
صح كنت متجاوبة وياها واحجي بس بعد اكو توتر بداخلي ..
خابرت خاله وحجيتلها صارت تشجعنـي وتقويني ..
بعد ماخلصت الدوامات ..
نجحوا الاولاد كلهم .. وعذورة طلعت معدل عالي ..
سوينالها حفله بالبيت عزمنا المقربين وصديقاتها وبس
واخيرا تخرجت وصارت دكتورة تحليل ..
نسر فرحان بيها حيل .. جابلها كلادة ذهب حافر اسمها بي ..
بعد ماتعالج واتحسن صار لازم يلتحق . ضجت حيل لان تعودت على وجوده يمنا ..
اول اسبوع يلتحق بي وهيج اشتاقله ..
كنا نتراسل بالنهار مثل العشاق.. وبالليل يخابرني بعد ساعة 12 عندة مجاني ..
بس جان يتغازل ودايما يذكر شيسوي بليلة زواجنا ويتعمد يحجي بيها حتى يشوف ردة فعلي..
قبل مايجي اجازة .. خابرني وگال عندي مفاجأة الج
اريدج تحضرين جنطة ملابس صغيرة ..
سألت " شسوي بيها ؟"
رد " نروح بسفرة اني وياج وبس "
رديت " ودنو ؟"
رد " هالمرة ماكو دنو… اعتبريه شهر عسل "
خبرت عذورة فرحت وكالت ان شاء الله تكون هالسفرة بيها نونو صغير نحرگ گلب هديل بي ..
بيوم اجازته اتأخر يلة اجانه للعصر ..
استغربت .. تأخره وخاله خافت ..اتصلت بي گالها عندي شغل اكمله واجيكم ..
للعصر دخل .. ارتاحينا شوية ..
صعد للغرفه .. صعدت وراها .. حضني وبوسني
مستاقلج .. ابتسمت حسيت بأحساس حلو يجذبني اله
سألني " حضرتي الجنطة "
هزيت راسي ..
رد " زين يابة بدلي وجهزي نفسج بس اسبح ونروح "
استغربت " وين هسا وكت عصر خليها للصبح "
رد " لا هسا حلاتها سفرة الليل تخبل ماشايفتها "
جهزت نفسي ووصيت عذورة على دنو .. ونزلنا
شافتنا هديل صفنت. .
خاله سألت " وين رايحين .. وشنو هالجنطة "
رد نسر " معزوم وراح اخذ شذر وياي بغير محافظة "
ردت عليه " وليش مو هديل وحد مو مرتك "
رد " يمة الجماعه نفسهم الي عزمونا قبل عزمونا هسا بعدين لاتسوين حزازيات بينهن .. ان شاء الله اعوضها بزيارة الاسبوع الجاي "
بالگوة قنع خاله وطلعنا رغم اعرفها ضاجت بس سكتت علمود هديل خاف تضوج..
صعدنا بالسيارة وهاي اول مرة يسوق نسر بعد الحادث
توقعت نطلع خارج بغداد .. بس تفاجأت اخذنا البيت عمة ..
باوعتله " هنا السفرة ؟؟
ضحك .. " عليج الصافي انتي بس سلميلي نفسج وامشي وياي مغمضه "
ابتسمت " ماشي امشي مغمضه ونشوف شيصير ؟"
دخلت تفاجأت .. البيت مصبوغ كله ومرتب .. الاستقبال بي قنفات جدد ملكي بدل الي راحن..
ومخلي تلفزيون وستلايت ..
كنت مامتوقعة هيج يطلع البيت حلو .. باوعتله واضحك " هاي شوكت سويته "
سحبني من ايدي .. الغرفه عمة ..
فتحها جانت غرفه جديده تخبل لونها صاجي بس صخمة ..
مرتبه والجرباية عليها فرشة منفوشة مال عرايس ..
باوعتله ابتسم ..

اريدج اليوم احلى عروسه الي .
استعانيت بصديق واشترالي غراض الج بالكنتور مااعرف اذا يعجبوج ..
فتحت الكنتور.. كله ملابس نوم وملابس داخليه وتراكات اشياء بحياتي ملابستهن عرفت سوالف خالة ..
غمضت عيني " نسر ترى اخجل "
رد " لاتخجلين يماي عيني اني حلالج وانتي حلالي .. جهزي نفسج واروح اجيب عشا وحبشكلات واجي..

يتبع .…

///// #البارت التاسع والاربعــــون /////


أيتها الفاتنة الممتنعة .. استسلمي لي
وإنتظري إفتراسي
فأنا في العشق لا أرحم
إنني في الهوى
لا أعرف إلا الإحتراق
أنقض عليكِ
كما ينقض النحل على الزهور ليرتشق الشهد
وأغوص في أعماق جسدكِ كـ قرشٍ جائع
يا لؤلؤة البحر
ومرجان المحيط
ها هو موجي قادمُ إليكِ
فأستسلمي لي ..
واتركي يداي تنساب في جدول شعركِ
استسلمي ..
وأسمحي لي برسم خارطة حبي على جسدك اليافع ..

بقيت اباوع للكنتور شنو هاي الملابس فضيحة شلون البسها .
خابرت خاله ردت بسرعه " هااا شذورة "
رديت " خاله هاي انتي مشترية الملابس ومرتبتهن وي نسر ؟"
ضحكت " عجبوج ؟"
رديت " شعجبوني خاله ذولي فضيحة شلون البسهم "
عاطت " عاد كافي شذر موتيني .. وج زين من الولد وصابر عليج .. لازم تقاومين نفسج اعتبري نفسج بتحدي لاتخلين خوفج يسيطر عليج .. البسي ورتبي نفسج واهدي اهم شي تكونين هادية .. مااوصيج امي لازم تستمر الحياة ومن حقج تعيشين ويصير عندج اولاد وتكونين عائلة.. "
اتنهدت " اوووف خاله والله اتمنى .. بس مو بيدي "
ردت " بطلي هالحجايه ويالله روحي اسبحي وبدلي وتحظري الزوجج"
طلعت واحد طويل لونه اسود صح بي فتحات بس احسن من ذولاك قصيرات ولونهم فاتح يبين كلشي..
دخلت سبحت ومشطت شعري على طولة .. نازل جوة خصري ..
لبست الثوب حلو بس والله فضيحة شلون البسه ..
اخذت روب خليته عليه .
اي هيج ماتبين ايدي ..
فتحت عطر زيتي على ايدي ومسحته بيدي اثنينهن ومررته على شعري ورگبتي ..
خاله ونسر مجهزين الغرفه من كلشي وعبالك غرفه عروس فعلا .
حتى مكياج جايبه صح مو هواي كم قطعه واصلا اني مااخلي مكياج يمكن بس من عقدنا وبالمناسبات ..
خليت كحل بعيني بس وحمرة خفيفه ..
اندگت الباب توترت .. بقيت اضم بجسمي ..
دگ الباب بقيت حايرة اروح وارجع اباوع الروحي بالمراية…
عزااا شلون اطلع .. طلعت بالگوة ..
صحت منو بباب المطبخ اشوفه واكف بجسمه الضخم وطوله . واني استغبيت من التوتر .
صاح " اني حبيبتي شبيج ؟"
فتحته وايدي ترجف وركضت للغرفه ..
دخل وضحك ضحكة عاليه ..
سمعته يخلي بالغراض بالمطبخ ويحجي بصوت عالي
" وين ترحين اول وتالي اشوفج "
رديت " لا عفيه نسر شنو هاي الملابس والله استحي "
اتقدم سديت الباب .
صار يحجي من ورى الباب ..
لاتستحين يعمري حلالج اني .. انطيني ملابسي والمنشفة بين مااسبح رتبيلنا الاكل بالاستقبال على الطاولة ..

طلعتله ملابس اخذهن وراح ..
من دخل للحمام طلعت ..
باوعت حاير شجايب ..
خليت الاكل ملفوف بالسليفون حتى مايبرد .. طلعت الفواكه غسلتهن وخليتهن بالماعين..
سمعته يريد يطلع رجعت للغرفه ركض ..
بقيت كاعدة واهز برجلي من التوتر ..
اتنصت ماله حس . وين راح .. بس لازعل ورجع لأهله
يااا شبية اني شنو يزعل شنو يرجع .. اشو حتى بالحجي گمت اخربط ..
دگ الموبايل .. عذراء ..
رديت .. سألتني " شبي صوتج يرجف "
رديت " وج اخوج مااعرف شناوي "
ضحكت " يامسكينه بس لااخذج المكان مقطوع وراح يستفرد بيج ويستغل برائتج ويعتدي عليه . فاهية شبيج غير مرته . وج مو خضرمتي على گلبي المثلج عندها عشر جهال هسا وانتي ليلة الدخلة صارلج اربع مدري خمس سنوات مامكمليها لعد لو قررتوا تسوون طفل كم سنه تبقون .. "
رديت " اضحكي عليه اضحكي اشوفج من تتزوجين شلون "
ردت " ياليت الله يسمع منج هو دخلي تفض واتزوح افتحلج كاميرا بليلة العرس وربي "
عطت بيها " ولي صايرة ماتستحين معتز مسقط يعلمج سوالف "
ضحكت " صيري حبابه وكيدي الاعداء .. اصلا هسا تريد تموت وج تخبلت وكل شوية تختل وتشكي لو الامي لو الاسراء .. "
اندگت الباب همست " يلة روحي اجه "
سديته ..
" هااا حبيبتي ادخل لو تطلعين "
كمت " اي اجيت "
فتحت الباب على كيف ومدنگة ولافه نفسي بالروب
صوفر من شافني .. هاي بالروب هيج لو بلاه شلون .
حجيت بخجل " نسر حباب لاتحجي هيج مو من اولها"
رد بضحك " يابة اعتذر بس مااتحمل والله .. كل هذا الحسن الله ناطينياه واتحسر "
مد ايده الي .. خليت ايدي بيده .. عصرها حيل ورفعها باسها ..
سحبني للاستقبال . تفاجأت شلون مرتب الاكل ..
ومخلي شموع ع الطاولة ..
ابتسم " هااا شلوني يابة طلعت رومانسي وماادري .. شفت بفلم هيج يسوون وجربتها "
ابتسمت " حلوات .. بس شنو حناكل هسا ؟"
رد " اليوم كله النا ناكل وكلشي نسوي "
اگعدي هنا هسا اجي ..
راح ورجع جايب كيكه وعليها شمعه ..
ضحكت " عيد ميلاد منو ؟"
رد " عيد ميلادنا.. اليوم ليلتنا الاولى "
من يحجي هيج ويذكرني تمغصني بطني مااعرف ليش ..
شعل الشمعه وگال " اتمني "
غمضت عيني وتمنيت .. اتمنيت اعيش بسعادة واتغلب على خوفي ..
طفيتها اخذ السجينه وگال خلي ايدج .. مااعرف ليش هيج يسوي بس سايرته ..
قطع قطعه الي وقطعه اله ..
اكلنا واحنة ساكتين لا هو يعرف شنو يحجي ولا اني ..
اتقرب مني .. وهمس " شذر احبج ..

جنت اتوقع حبيت قبل بس جنت غلطان .. احس اول حب بحياتي انت "

بعده ماكمل كلامه .. اذن الاذان ..
استغفر ربه. " كومي حبيبي خلينا نصلي بلكي الله يفتحها بوجهنا . "
كمنا للغرفه .. خلينا السجادة .. ماعندي ملف صلاة لبست عباتي الاسلامية وشالي وصليت ..
كملت وهو بعده ..
نزعت العبايه ورتبت نفسي وبقيت گاعدة ع الجرباية .
كمل .. لف السجادة باوعلي ضحك ..
دنكت .. طفا الضوة وشغل ضوة خافت ..
گعد يمي وهمس. . جنت جوعان بس من شفتج جعت اكثر ..
طفيت الضوة علمودج انزعي الروب نزعته .. ومستحيه
احاول اقاوم واتحدى .. اباوع الملامحة الي مبينة قليل
واگول بداخلي .
" شذر هذا الي فتحتي عينج عليه هذا الي نقذج وحبج هذا سندج مستحيل يأذيج . "
كنت احاول بكل الطرق اتجاوب وياه .. كلشي صار بلحظة .. مشاعر ممزوجة بخوف وتجربة جديدة ..
هو كان ساكت بس صوت انفاسه بأذني .
صرت اتنفس بسرعه بين الحلم والواقع اتخبط مااعرف اني وين وشسوي ..
لحد ماحجة بثگل ..
" شذر انتي تحبيني مووو؟"
هزيت راسي بتنهيدات مسموعه ..
رد " مادام تحبيني لاترجفين مستحيل اجبرج واذيج خلي هالشي ببالج "
احاول اقنع نفسي انه اي اگدر وماكو خوف يمنعني ..
بس تذكرت كلام عذورة .. عن الزواج ..
بس لا اطلع مو بنية شلون راح يكون موقفي .. مااتذكر شصار بطفولتي .. اخاف صدگ مو بنية وشراح يكون موقف نسر .. اكيد يكرهني وعباله جذبت عليه ويظلمني ..
بين هالخوف حاولت اتذكر اذا بيوم ابوي لمسني او سوالي شي اكبر من الي يسويه ..
رجعت بأفكاري للماضي ومنها رجعت النقطه الصفر
بدل مااتشجع واقاوم زادت مخاوفي اكثر ..
مااتحملت گمت ابجي واريد ابعدة ..
" نسر… "
من سمع شهگاتي ودموعي .. صار يتلمس وجهي
" اششش لاتبجين حبيبي اعرف هالشي مو سهل ويمكن اني استعجلت ماانطيتج مجال .. اهدي اهدي ولتخافين .. "
اخذني الحضنه ويهدي بيه ويمسح دموعي.. صار يمسد على راسي الى ان غفيت بحضنة..
گعدت مااعرف بيش الساعه الغرفه نورها خافت وباردة
انتبهت النفسي استحيت .
گمت بدلت .. وشعلت الضوة .. باوعتله نايم وشعرة مبعثر ..
استحيت من منظره .. شفته تحرك طلعت بسرعه
حميت الاكل وحضرته ..
رتبته ع الطاوله وردت اروح اگعده .. التفتت شفته وراي مبتسم ..
ابتسمت اله " جوعان ؟"
هز راسه " ميت جوع "
غسل واجه ياكل .. خليتله بالماعون گدامه وبدأ ياكل
كان يتهرب من نظراتي ..
ردت اشوفه زعلان او ماخذ على خاطرة ..
اتنهدت " ضايج مني مووو؟"
باوعلي " ابد والله .. هالشي مو مهم عندي .. اصلا حضن منج يكفيني عن هاي الاشياء .. الي صار شي طبيعي والدكتورة هم گالت .. احتمال مرة مرتين ثلاثة بس بالاخير راح تتجاوبين .. المهم عندي من تنامين بحضني لا تفكرين زايد وكوني دائمة هادية لان حضني امانج لاتنسين هالشي "

ابتسمت اله ولزمت ايده.. سحبها باسها ..
اصلا كل هالتطورات بعلاقتنا مفرحتني احنة عبرنا مرحلة طويلة بأشهر والباقي سهل ان شاء الله
كملنا اكل ..
كمت اغسل الماعين..
اجه حضني حسيت بدفو.
همس " يلة حبيبي بعدني نعسان خلي ننام "
رديت " عود سويتلك جاي ادري بيك ماتعرف الا جاي بعد الاكل "
راح للطباخ طفاه " اليوم استثناء "
سحبني من ايدي ورحنا للغرفه .. طلب يشوفني بلا روب بس ..
رديت " طفي الضوة "
رد " لا هيج خليه مفتوح "
بالكوة اتجرأت .. شهگ " اشتعلوا اهلج .. لج هالحسن كله مضموم عني سنين مو حرام عليج ياظالمة "
ابتسمت وتخبيت بحضنه حتى ميشوفني اكثر ..
حضني حيل وشمني ..
افيييييش اي اريد من تخجلين وتخافين تحتمين بحضني مو تنهزمين مني ..
نمنا بعد ماشغل الضوة الخافت .. رغم مااحب الظلمة بس خجلي غلب خوفي ..
جانت ليلة حلوة وجديدة بالنسبة لدرجة اني مستغربة حالي وومصدگة وصلت الهاي النقطه ..
للصبح خابرت خاله ..
رديت عاطت بيه " لج متت صار ساعه اني بالباب وين انتو "
.. الجرس طبعا محترگ
والغرفه لجوة حيل مانسمع الباب ..
رديت " اجيت خاله دقيقه "
بسرعه لبست گلبيه ولفيت شعري وطلعت الها ..
فتحت الباب خطية صايرة حمرة من الشمس ..
دخلت بوستها ..
كالت " اكول مبروك ؟"
اتنهدت " لا "
اتنهدت " يله عادي ان شاء الله المرة الثانية .. واني جبتلكم گيمر عرب وكاهي .. كلت لازم اهل العروس يجيبون ريوگ للعرسان "
دمعت عيني من كلامها وحضنتها " صدگ انتي اهلي ماعندي احد غيرج .. عندي اهل وعمام بس اني يتيمة "
مسحت عيوني " لاتبجين مايلوگلج البجي افرحي الدنيا ماتسوه.. اصلا اني احسج متغيرة الضحكة متفاركج ومرتاحة "
هزيت راسي" اي والله اني مااعرف نفسي ساعات اگول مستحيل هاي اني .. يمكن السبب بنسر .. هو الي خلاني احبه واتغلب على كلشي صار وياي وان شاء الله اتغلب نهائيا وارتاح "
ابتسمت " ان شاء الله.. وين هو بعده نايم يمعودين ساعه عشرة "
شهگت " صدگ والله ولا ندري "
سمعت صوته يكح .. عدلت عباتها خاله ..
اجه سلم عليها وباوعلي " صباح الخير "
ابتسمت ورديتله الصباح ..
كامت خاله " يلة اني اروح "