كملت ورجعت لبيتي كان وحش بدوندهم كانو منورين
البيت .. عزلت البيت وكعدت على التلفزيون اباوع افلام كارتون ابتسمت على حالي وتذكرت اطفالي لو موجودين
كانو صرعوا الدنيا بل سوالف والضحك

كان يوم يمشي ببطء وملل كبير .. باجر اسافر للامارات
نمت من ساعه ٨ من اليل صليت ونمت حتى ما تعشيت

كعدت من ساعة اربعه الفجر جهزت نفسي
وتريكت وكعدت انتضر خالو يجي عليه

اجا وانطلقنا .. سافرت للامارات وباشرت بعملي هناك
وكل يوم اتصل بميس اطمن على اطفالي واحجي وياهم
واسده منها .. كانت هذي السفره طويله ومتعبه بالنسبه الي

بقيت ٣ اشهر هناك مره هم اضطريت ابقى ٥ اشهر
وطكت روحي على اطفالي لحد ما رجعت

كملت شغلي ورجعت للشقه خالو كان طالع وما رجع
اني تعبانه ما بيه اطلع اني بل عادة من اجي لهنا اخلصها شغل وونسه ما اخلي مكان يعتب عليه بس هل مره تعبانه

كعدت بل شقه وخابرت على ميس
"الو هلو ميس شلونج شلون اسر ولجين .."
ردت "هلو شام حبيبي الحمد لله بخير تعرفين اهلج بل عراق .."
احس صار بيه خفقان رديت وصوتي رجف "لا ما اعرف شوكت رجعوا .."
ردت .." صارلهم اسبوع هنا .."
رديت "همممم يله باي اروح .."
ميس "وووو شنو ضجتي شو حتى على اطفالج ما تسالين صارلج اسبوعين مقطوعه اخبارج صاير شي وياج .."
رديت "لا مو صاير شي بس هل ايام تعبانه كلش .."
ردت "بس لا مريضه ولج .."
رديت بقلة صبر "ما بيه اله كل خير يله اودعناكم ديري بالج على اسر ولجين حبيبي.."
ردت "بعيوني .."

سديته واحس قلبي يعصرني من هل خبر
صار شكد ما شايفتهم ولا مسولفه وياهم اووووه مرت
فترة طويله واني مقاطعة الكل .. اكذب اذا اكول ما مشتاقه الهم يبقون اهلي مهما كان

حسيت نفسي صرت خامله وتمرضت حتى شغل ما بيه
اشتغل .. كملت كل شغلي هنا وصار موعد الرجوع للعراق

رجعت لبغداد .. ونفس كل مره كبل للشقه مال استاذ محمد
نمت بيها وخالي كذلك نام من التعب

كعدني ثاني يوم ساعه عشره الصبح ..
عثمان "يله خالو كومي اخذج تشوفين اهلج .."
كمت غسلت وجهي بدون كلام

وهو كان يجهز الريوك.. خدر الجاي
وكعدت ويا اكل .. سكتت ما رديت عليه بس ما ببالي اروح

عثمان .."شام خالو ليش ما تحجين .."
تنهدت "خالو فدوه تعفيني ما اروح لهناك ولا اريد اشوف احد لا تكول اهلج .. اهلي اول الناس الي وكفوا ضدي وما ساندوني .. لا تطلب مني احن الهم او اسامح .. من ذاك اليوم ولحد الان محد بيهم كلف نفسه واتصل عليه او سال عني تركوني وتخلوا عني واني بامس الحاجة الهم .. اني غلطت واعترف غلطي كان كبير بس اني مو نبي ولا معصومه عن الخطا كلنا نغلط وكلنا نزل بس مو هيج يقاطعوني سنين ويتركوني مثل الجلب حتى من ولدت محد كلف نفسه واجا عليه تذكر حالي تتذكر شصار بيه تتذكر رجلي الي انشلت
تتذكر شكد عانيت ولوحدي .. الله عاقبني وغفرلي انتو منو حتى ما تغفرون وتنسون .. اني استحق الغفران .. لاني ما اذيت احد اذيت نفسي .. ابوي ذب كل اللوم براسي ويكول هي سبب خرابي وي اهلي واخوتي .. دامني هيج بنظرهم خليني بعيده خليني مرتاحة .. تعذرني خالي هل مره ما اسمع كلامك اني احبك واحترمك بس ابد لا تطلب مني هل شي .."

كلت كل الكلام الي بداخلي .. وكمت عن الاكل احس
تسممت من الصبح بذكرهم

خالو سكت حسيته انقهر عليه .. وصار يتوسل ارجع
اكل بس حتى اكل ما اشتهي من تذكرت الماضي

كنت احجي وصوتي يرجف واحس العبره خانكتني
برطمت ردت ابجي بس سيطرت على حالي

خالو اخذ نفس وتركني .. راح لبس وعدل نفسه
واخذ الهدايا الهم وراح .. انتظرت رجوع اطفالي بفارغ الصبر شتاقيت الهم .. ردت اطلع اشتريلهم اكل من برى بس السيارة اخذها خالي .. كعدت انضف بل شقه ولو هي نضيفه

بس ردت اقضي وقتي .. صارت ساعه ١٢ ونص وخالو
ماكو. انتظرت انتظرت ماكو ردت اخابر بس ترددت

صارت ساعه ٢ سمعت الباب يندك .. استغربت
لان خالو ما يدك الباب .. عنده نسخه من المفتاح ..

اخذت شال وخليته على راسي وطلعت صحت منو
اجاني صوت رجولي .."اني فتحي الباب .." ما عرفت الصوت المن بس استغربت منو هذا

فتحت الباب بتردد .. كان شاب يطلع عمره ٢٠سنه
اكثر اقل ما اعرف بس كانو شايفته مو غريبه ملامحه عليه

هو هم صفن عليه وبعدها انتبهت وسام واكف ورا
ابتسمت وعرفت هذا منو .. دخل جوه للبيت وصرنا نتبادل السلام دخلتهم للصاله
احمد "شام ما عرفتيني .."
ابتسمت "شلون ما اعرفك يا روح اختك .. بس والله استغربتك بل اول لو ما شايفه صورك كان ما عرفتك صاير صاك ولك وكبران فدوه لهل طول الحلو .."
رد بابتسامه "ما جنت اعرف عندي اخت لسانها عسل .."

رديت وتغيرت ملامحي .."طبعا ما تعرف اذا انتو محد بيكم كلف نفسه وشال تلفون واتصل او سال .. بس وسام يسال ويخابر عبالك مكطوعه من شجره .."

حسيته انحرج وسكت
وسام "عيني شامه على كيفج وي الولد اكلتي وشربتي
تعالي كعدي يمي اريد احجي وياج بموضوع .."

عرفت عليمن يريد يحجي
حاولت اتهرب وغيرت الموضوع "خليني اجيب ماي .."

رحت للثلاجه فارغه وما بيها اي شي
بس الماي .. خليت القوري على النار واخذت ماي ودخلت للصاله قصص وروايات عراقية كرار صلاح
وسام اخذ الماي من ايدي وكعدني بصفه .."شام انتي تعرفين كلش زين ليش اجيت لهنا وعليمن جاي .."
هزيت راسي بايجاب ...

رد "كلش زين .. شوفي عيني .. لهنا وبس خلينا نبدي صفحه جديده ونسامح ونعفي .. كافي بعد وواحد شايل على الثاني الحياة يراد الها تنازل .. تجاوزي كل الي صار وبادري انتي والله من تبادرين هما راح يندمون على الي صار ويعرفون قيمتج .."

رديت "ما ابادر ولا اريد احد يعرف قمتي ولا اريد شي من احد اني ما عتبت على احد ولا اريد شي منكم بس عوفوني بحالي .. هما ما يردوني ولا متقبليني .. حتى من كنت تلح اسافر لامريكا وتكول ابوي يريدج كان كذب واعرف كلش زين هذا كلامك انت مو كلام ابوي .. وسام كلبي ما يريدهم لا تجبرني ولا تلح ما اريد اجرح بل كلام خليني ساكته .."

اخذ نفس ورد "الح وما اسمع اي رفض منج .. كومي لبسي وامشي بوسي راسهم واعتذري منهم .."

رديت بعصبيه "ما اروح ولا اعتذر لاحد صح غلطت بس هما رجعولي الصاع صاعين وصدموني بحقيقتهم وتخلوا عني ما اسامح ولا كلبي يبرد منهم وما اعتذر لاحد مااااشي .. "

رد وسام بصياح وهذي اول مره يصيح بوجهي "كااااافييي شاااام هواااي تحملللت عناااادددج .. لججج اهللللج اهلج هذووول تناااازلييي وصيررري احسسسن منهم مووو تقرررين قررران مووو تصللييين .. ربج مو ربط رضا الله برضاء الوالديييين مو قاررررن العبادة ببر الوالدين ..
هذول اهلللج يااا شااام مو مهند ولا عمج حرام عللليج والله
.."

رديت بهدوء .." حرام عليهم هما .."
فتح عيونه بكل وسعهم وصار عصبي .."وحق الله اذا ما اجيتي وياي و سويتي الي اريده بعد يا شام تخسريني اني هم .."

رديت .." روح الله وياك .."
احمد .."شنو السالفة شام كولي يا الله يله كومي حبيبتي
لا تعاندين احنا لمصلحتج نسوي هيج .. وسام على كيفك وياها مو هيج .. يله شام ننتظرج برى .."

وسام صار عصبي بس سكت حسيته تفاجا من كلتله
الله وياك .. كمت لخاطرهم ..

سبحت ولبست احلى لبس عندي ومكيجت .. وعطرت
شتلتهم ساعه ونص .. بس حظرت نفسي على اخر حبايه

اخذت جطتي و تلفوني وطلعنا سويه لبيت جدو
كان قلبي يعصرني وما مستعدة لهل لقاء ابد ما مهيئه وضعي

بس اضطريت بعد .. كنت اتوقع راح اخذ
اطفالي وارجع للبصره بس وسام جبرني وخلاني امام الامر الواقع

وصلنا لو احس كلبي انمرد مرد .. دخلنا للحديقه
و رضا تلكانه كان يرش بل حديقه بهل ضهريه ولو هي شتا

دخلنا للبيت وهو يسلم ويسال
اول ما فتت كانت مياسين تغسل الطارمه اجت عليه

مياسين .."ياااا هلااا والله عااااش من شافج بذاته بعد ما سالتي على اخيتج مع الاسف عليج .."

سلمت عليها ودخلت جوه
كانت اصواتهم واضحه ملتمين بل صاله مثل جمعات قبل

غمضت عيوني واني متردده ادخل واشوفهم
ندسني وسام .."يله شام دخلي .."

اول ما دخلت باوعت على الكل .." السلام عليكم .."
كانوا اهلي موجودين وبيت عمي ابو مهند وعمي ابو رضا وجدو وخالو وميس ايضا موجوده بس اطفالي ماكو دورت بعيوني ماكو بل صاله استغربت لان حتى عمتي هنا

اول وحده عمتي ام مهند كامت عليه وسلمت .. اوووف شكد حنينه هل مره ماكو مثلها ابد .. بعدها اخواتي اجوا سلموا عليه كانو كبرانين ومتغيرين حيل زين من ميزتهم

رحت لعمو ابو مهند بست راسه وكمت .. بابا كان كاعد بصفه وداير وجه مني وامي كاعده كباله وهم ما تباوع بوجهي حسيت اني ما مرحب بيه هنا ابد .. بس وسام جبرني

اخذت نفس وجريت ايد بابا بستها .. وبست راسه بس هو ولا كانو عمو ابو مهند صار يحجي عليه وما قبل لان هيج سوه ومتجاهلني اني العبره خنكتني بس ما بينت عفته ورحت لماما .. امي اول ما شافتني بجت وكامت اخذتني لحضنها

بعد ما شفت ابوي هيج عبالك احساسي تجمد وما عدت
مثل اول ما حسيت بشي تجاههم ولا اي شعور كانو ناس غرب عني بس الم بصدري قوي ومخنوكه وصفصفت من الي صار ما استوعبت ابوي الي كان يفتحلي اديه بكل وقت كان ما يحب يشوفني زعلانه ولا يحب احد يزعلني كنت المفضلة عند بابا او المفضله عند الجميع اما هسه اختلف كلشي تبدلت النفوس ما عادت راضية عن بعض ما عادت اكو محنه بقلوبهم معقوله بعد كل هل سنين والبعد والفراق من شافني ما حن الي معقوله شوفتي ما اثرت بي صح ما كنت اريد اشوفهم بس كنت متوقعه لقائهم الي مو هل شكل ما كنت متوقعه هيج ابد

ابتعدت عن ماما وجدو يكلي تعالي كعدي يمي
عفتها ورحت لجدو كعدت على القنفات

رجعوا يسولفون وما مهتمين الي ابد وسام يباوعلي
حسيته انقهر عليه .. وبل فعل موقفي بقهر ويفشل

موقفي كان ابد مو حلو .. سيطرت على حالي
ورجعت اتزنت سالت عمتي .." عمه وين اسر ولجين شو ماكو من طبيت ولسا ما شفتهم .."

الكل التفت الي من حجيت وبعدها كملوا كلامهم
وي خالو

ردت "اخذهم مهند للاسواق يشتريلهم .."
سكتت ولزمت تلفوني ردت التهي بي وما اباوع بوجه احد

كان وجودي ما مرحب بي ابد .. حسيت جيتي لهنا كانت غلط .. كان غلط مني تنازلت وسمعت لوسام .. بس كلت لنفسي اني حق العليه سويته حتى كدام ربي ما اتحاسب

شبكه ماكو صرت اطب برنامج واطلع من الثاني
واصلا كل بالي مو يم الفون

اجت نور كعدت يمي وتسال عن حالي وعن الامارات
نور "شام امنيتي ازور الامارات .."
رديت "احووووي واني امنيتي ازور امريكا .."
ردت "تعالي عندنا فتره والله لونسج احلى ونسه .."

رديت بضحك "لا عيني ما اريد اني ما مرحب بيه بيناتكم ابد خليني بمكاني افضل الي والكم .. ما احب افشل نفسي واحرجكم بوجودي الغلط بينكم .."

بابا كان قريب من عندنا واني صوتي عليته لحتى يسمعني
حسيته انتبه الي بس غلس

"السلام عليكم .."
رفعت راسي كان مهند واطفالي .. حسيته انصدم بوجودي وما كان عنده علم اني هنا بس بلعها اني رديت السلام وباوعت لاسر ولجين

اسر ولجين .." هيييي ماااماااا اجتتت مااامااا .."

اجو عليه يركضون .. ردت روحي بشوفتهم
فتحت اديه وابتسمت .. اخذتهم بحضني واشم بيهم

شام "يمااااييي افيييييش ولكم شتاقيت لكتاكيتي الحلوووين .." قصص وروايات عراقية كرار صلاح
اسر وخر من حضني وباوع عليه وبرطم شفايفه
ردت ابجي ويا
باوعتله بقهر "شبيك ماما حبيبي .."
بجه بصوت خليته على كلبي وامسد براسه .. اسر مستحيل ارجع من السفر وما يكابلني ويبجي .. يبقى يباوع على وجهي ويبجي اتمنى اعرف شنو بداخله شيحس وليش هيج ينظرلي

ولجين تباوع علينه حسيتها غارت لان عفتها وشبكت اخوها
ابتسمت بوجها نور اخذتها وتسولف وياها وتباوع عليه

اصلا البيت كله صافن عليه وعلى اسر حتى مهند بعده واكف بمكانه بل باب

اسر يحجي ويناشغ "ماما اني احبج بعد لا تعوفيني وترحين ماما .."

انقهرت عليه .." حبيب امك غير شغل .. شو باوعلي لا تبجي يا بطل .." احجي وامسح بدموعه

سكت وضحك "صايره حلوه .."
ضحكت "يمااا فدوه لحلكك .. خجلتني وانت هم صاير حلو حبيبي اشتاقيت الك .."

راد يبجي "هششش كافي حبيبي .."
ابو مهند .."اكعد مهند ليش واكف .."

بعد ما سكت اسر كلها رجعت تسولف واني التهيت باسر اسولف ويا وهو يسالني شجبتيلي ويريد اطلعه متعودين كل ما اجي من السفر اخذهم واطلعهم وافرفرهم ببغداد ..

لجين عافت خالتها واجت عليه "ماما اليدج اني هم .."
ابتسمت .." تعالي .."

خبلوني كل شوي واحد كاعد بحضني ويباوع بوجهي ويسولفون دوخوني حيل واني منتظره هل يوم يخلص واروح منا بفارغ الصبر .. انتبهت لمهند يشرب بل جاي ويباوع عليه ما اهتميت اله ابد ودرت وجهي عنه

اجت مياسين كعدت يم امي وعمتي ام مهند
كانوا النسوان مسويلهم لمه يم الباب ومنزويات ويسولفن
والزلم سويه .. مياسين لان خالو موجود ما كدرت تجي لعندي اشرتلي اروح يمها .. ترددت بس كمت وكعدت يمها بل كاع وتربعت

مياسين "ولج والله طاك كلبي عليج .."
ابتسمت وما رديت

رجعت حجت "شبيج شام شو احسج مو مثل قبل وياي شنو نسيتي اني منو .."
اخذت نفس "لا ما نسيت انتي مياسين الورده الطاهر النقيه انتي مياسين اخت شام .. بس الي تغير هسه هو ما عدت شام القديمه .. صرت شام جديده وهذا الشي يطلب ابعد عن الكل ما اريد ارجع الكم وارجع لعلاقاتي وياكم .. احبج وما انسى وكفاتج وياي ابد بس .."

سكتت وهي حسيتها انغثت مني وبعد ما حجت
ضجت من نفسي ما كان لازم احاجيها بهل شكل
بس تعودت اكون فضه مع الكل واتعامل بحديه وياهم

امي ساكته وتباوعلي بحسره بس كنت ابعد نضري عنها
كانت للصاله ضجه وكلها تحجي وتسولف دخت اني من ارجع من السفر اخلصها نعسانه وتعبانه اريد بس انام وارتاح بس اليوم طلعتلي سالفه صفح انتضر احد يكوم وسام خالو لحتى ارجع للشقه

كاعده وصافنه محد حجه وياي حتى عمتي ملتهيه تسولف وي ماما والبنات .. اني اي حديث ما شاركت بي

شفت خالو كام كيفت وكمت ويا عمو وبابا يطلبون منه يبقى على العشى بس هو ما قبل كال الهم تعبان وباجر ورا طريق

باوعلي "شام خالو تجين .."
اخذت جنطتي وتلفوني "ايي خالو يله .."

بابا خزرني ما اعرف ليش بس سكت وما علق
عمو وجدو يلحون عليه ابقى
عمو ابو مهند "ابقي اليوم بابا .." ابتسمت على كلمه بابا
ورديت "لا عمو تسلم والله تعبانه وبس اريد انام .."
رد عليه جدو "ايي ابقي هنا باتي شوفي اهلج اخياتج.."
رديت "شفتهم جدو واصلا عندي شغل وباجر من الصبح نرجع للبصره .."
ردت ماما "اخذي اجازه هل ايام وابقي يمنه قابل احنا شكد نبقى هنا .."
تضايقت من هل الحاح
ورديت "لا ما اخذ اجازه عندي شغل كومه وبس اخذ اجازه يتراكم عليه .."
رد خالو "شام ابقي اني احجي وي استاذ محمد .."
باوعت لخالو رافعه حاجبي "شكرا خالو بس اني اريد ارجع .."

احمد "شهل عنااااد يااااابه ولج علعلتيناااا والله .."
رد وسام " روح خالو شام تبقى والبليل اني اجيبها الك .."

تضايقت بس ما كدرت اجادل اكثر طلع خالو وهما ورا
انعصر كلبي ورجعت كعدت بمكاني شكد ضجت من وراهم بقيت هنا هسه على اساس مقلديلي ..

اجت نور يمي كعدت .. "ولج شبيها مياسين شو ما تدنى عليج .."

رديت "زعلت مني .."
اباوع على مياسين دايره وجها مني وما تباوع عليه

باوعت على ايدها بعدها بيها تشوه من الحرك
انمرد كلبي من شفتها كمت كعدت بصفها واعتذرت منها وهي بسرعه رجعت طبيعيه خجلت من نفسي لان هي مو مثلي وما حقدت عليه ..صارت ساعه ٥ العصر والجو كان شتا وبارد اليل بدا يطل علينا .. وهنا بدت العائلات تتجمع ببيت جدو لان سمعوا بوجودي

اجن بنات عمي كلهن والجناين ونسوان العم
التموا والسلام والاسئلة ما تخلص احس راسي صار هلكبره دخت عليمن اركز والمن اسمع .. صار وقت الصلاة والكل كام يحضر للصلاة وناس تحضر الاكل لان تجمعوا هنا

نص الاكل كان من برى ونص بل بيت .. اني كمت
صليت بغرفة مياسين واسر ولجين كاعدين كبالي ما فارقوني من اجيت ولسا .. كملت الصلاة وعدلت نفسي كدام المرايا وطلعت ردت ادخل للمطبخ بس ترددت

ابتسمت بسخرية صرت غريبه عن اهلي
واستحي ادخل واطلع بكيفي صرت احس نفسي خطار هنا وهو كذلك

كعدت بل صاله الزغيره والنسوان كاعدات ويسولفن يماااي ولا تعبن كرررركرررركررركرر

انسطرت سطر منهم نوب ما ينطن مجال ما يجرن نفس
قدموا السفره وكعدت صرت انقش ما اشتهي اكلهم ابد حتى نفسي ما تريده اريد بس اخلص واطلع منا صافنه بل اكل وافكر واكول لنفسي.." يا ترى شلون يشوفوني هسه يمكن صدك يضحكن بوجهي ويجاملني بس بداخلهم يكولون هذي شام بيوم كذا باكت فلوس واتهددت بصورها وانضربت وانهانت وزوجها تهمها بشرفها .. صارت عار على زوجها وابو اولادها .."

صفنت على كلمه عار واكول لنفسي "يا خوفج يا شام لا يكبرون اطفالج ويعيروهم بامهم ويكولون باكت .."

حصرتني العبره من هذي الفكرة تزقنبت وكمت غسلت وكعدت واسر ولجين يمي يسولفون وياي وبالي مو يمهم ابد

خلصن الاكل ويشيلن بل صحون اني ما شاركت بشي
ابد بقيت كاعده .. كامن النسوان بل صاله اني ما ردت اروح لان مهند موجود وبابا هم ما اريد احتك بيهم ولا باي شكل من الاشكال

بس اضطريت لان كلها راحت هناك وماما صاحتني
كعدت بل كاع وراسي يفترررر من الدوخه والنعاس صرت اتثاوب وتعبانه كلش .. باوعت لوسام ملتهي يسولف وي بابًا وعمو

اخذت تلفوني ودزيت مسج "وسام تعبانه ونعساااانه كلش يله اريد اروح والله بعد ما بيه حيل .."

وصل المسج هو فتحه ويحجي وي بابا
نوب باوعلي بعد ما قرا واشرلي بمعنى اصبري

سكتت عنه .. شوي ودخلت هنا .. هذي اكثر. انسانه
ما اريد اشوفها تنرفززززت كلش من شوفتها

اجت عليه وسلمت كان سلامي بااارد وبسرعه ابتعدت
عنها هي حست بيه ووخرت وكعدت

نوب دخل مهيمن ما اعرف وين كان من شافني ابتسم
"ياااا هلااا بشام والله شلونج خويه .."
رديت "هلاو بيك الحمد لله بالف خير انت شلونك اخبارك .."

رد "اخباري كلها تمام .. وانتي يا بذاته لا تسالين لا تخليني اشوفج شارده مني.. انتي حيل تغيرتي علينا ولج .."

رديت بضحك "ياخي الفلوس تغير النفوس واني بعد ما صار عندي فلوس تغيرت الوحدي بدون اي سببب مو صح .."

وسام "يله شام كومي .."قصص وروايات عراقية كرار صلاح
كمت لحيلي واخذت تلفوني والجنطه عبالك اجاني الفرج

امي "ولج دضل اليوم مو كلبي طاك عليج .."
ابتسمت بسخريه "هياني يمج ما شفت منج شي من الضهر ولسا واني هنا .. "

كلها سكتت وتباوعلي
التفتت لاطفالي "يله ماما .."
حجت عمتي "وين ماخذتهم يا امي حتى ما محضرين غراضهم .."

رديت بعدم اهتمام "خليهم بعدين ما طايرات .."
جدو خبص الدنيا ابقي ولا ترحين ويحلفني بروح بيبي

صعدت الحراره براسي من عندهم اشرت لوسام يحجي شي لان طلعت روحي منهم ومن الملحه الزايده

وسام طبك وياهم ابقي واخذي اجازه
اني ماكو عاندت وردت ارجع

اخر شي عاط بيه بابا "ابقققققيييي هناااا وكاااافييي .."

بعد ما زمخ بيه بابا سكتت وبعدها حجيت
"غراضي كلهم بل شقه .."
رد وسام "هسه اروح اجيبهم الج .."
رديت "اروح وياك لان ما تعرفهم .."

كلت اروح هناك وما ارجع بعد ..
كمت ولزمت اطفالي حجه بابا
"تعالي جدو لجين .."
عافتني وراحت بحضن بابا خلاها بحضنه ويبوس بيها

انتظرت تجي بس بابا كان قصده حتى ما اروح
فهم اني اريد اكذب عليهم وارجع للبصره

استسلمت واخذت اسر وياي ووسام اخذني
للشقة

يتبع.............

قصه جريئة لفتاة تتعرض للتحرش و.............


#البارت 38


اخذني وسام للشقة كلتله
"ارجع وسام للبيت باجر تعال عليه .."

تنهد"شلج بهل حجي خويه .. جيبي جنطتج وتعالي خالي يطلع من الفجر شلون تبقين لوحدج ما اخليج يله كدامي .."

تحسرت "ويللللييي يا وسام طلعت روحي من هل ملحه
ليش هيج تجبروني وانت توقعت توكف وياي تالي طبكت وياهم .. وسام انت اكثر واحد تعرف اني اجيت مجبورا فليش هيج تسوي .. شفت شلون تعامل وياي بابا شفته شسوا وشلون فشلني شفت مو كلتلك ما حاجه تشوفوني .."
من حجيت هيج برطمت شفافي والدموع ترست عيوني
احس العبره راح تطلع من عيوني...

رد "كافي شام كافي لخاطر الله
عوفي هل كلام وبعدين ابوي لو ما رايدج ما كان كال ابقي هنا ترى هو الي رادج تبقين مو غيره .. يله حبيبت كلبي جيبي ملابسج وتعالي شوفي امج خواتج هو احنا ما باقين هواي فلا تعوفينا وترجعين للبصره وحق ربج شوي شوي الكلوب تتصافى ما تبقى هيج .."

رديت "باجر اجي والله وسام كافي لا تلح قابل طايره ولجين ديروا بالكم عليها .."

اقتنع وسكت اني نزلت ودخلت للشقه
كان خالو نايمه خطيه تعبان اني بدلت ونمت كبل

واسر وياي ما خليته يرجع وي خاله
ثاني يوم كعدت من ساعه سبعه الصبح على صوت الباب

غسلت وفتحته كان وسام دخل للشقه وسد الباب
"صباح الخير .."
رديت "صباح النور .."
رد "يله خويه جيبي ابنج ونطلع .."
ضيقت عيوني "وين وشكو من الصباحيات جاي عليه .."
رد "ما تبقين هنا لوحدج اخاف عليج .."
باوعت صفح "ما اني عايشة لوحدي شنو الي تغير هسه .."

"شكددد تحجييين يللله لبسي اي شي وتعالي
خلينا نتريك بل بيت سويه ما دام العائلة كلها موجودة كلتلهم ينتظروج لحتى نتجمع .."

"هففففف هسه عليمن هل هوسه هاي خلوني براحتي والله طلعتوا روحي .."قصص وروايات عراقية كرار صلاح
رحت لبست وانطيته غراضي وشلت اسر
ما ردت اكعده انقهرت عليه اخذته من الدفوا لبرى البيت

لفيته وطلعته واني شايلته
صعدت بل صدر واباوع لوسام يخلي بل جنط
بل صندوق.. صفنت بملامح اسر .. شكد بريء ونقي شكد احب اباوعلهم وهما نايمين

حتى وهو نايم ينحب كزكزت عليه
صرت ابوس بي واحاول اكعده صعد وسام
"عوفي نايم خطيه .."
رديت "وين لجين نامت البارحه .."
رد "يم ابوي .. هاي الفصعونه ما ينخاف عليها .."
رديت "طبعا بعد بنت شام مو حي الله بنت .."

ابتسم "بس ما تجي بعناد شام .."
سكتت والنعاس بعيني كعدني من عز نومي علمود
الريوك وعلمود نتجمع والله يا الله شلون تفكير هسه هو عاد شلون تجمع .. كلها تستلطفني هناك

وصلنا للبيت دخل السيارة بل كراج ونزلنا
قبل لا ادخل للبيت صار بوجهي مهند وهو يطلع للدوام

ما حجه شي بس كال صباح الخير وراح
وسام رد عليه اني غلست
دخلت للبيت كانوا كاعدين ويحضرون بل ريوك
وووو نفس خبصتهم ما متغيرين ابد شكد كنت احب هل صبح خصوصا اذا شتا ونتجمع ونتريك اويييليي يا دفوا العائلة الي صرت افتقد اله .. افتقدت هيج اجواء هواي
"صباح الخير .."
الكل رد عليه

كعدت وخليت اسر بل كاع
حجه بابا "شيلي منا خلي بغرفتي بارده عليه .."
كان يحاجيني من ورا خشمه ..ما حجيت اخذته ودخلته لغرفتهم .. اباوع لـ لجين هم نايمه
على الجربايه خليت اخوها يمها وبست راسهم وابتسمت

شكد حلوين .. احس نفسي عندي شي خاص بيه
احسهم مالتي مو مال احد شكد احبهم واحب وجودهم بحياتي هما لونولي دنيتي وردوا عني الغربه الي كنت اشعر بيها

لولاهم ما كنت اعرف شنو صاير بيه حاليا
طلعت من الغرفه ووسام مخلي الجنط بل صاله وكاعد يم ابوي

كعدت واني ساكته كانت الصالة فارغه بس بابا وجدوا ووسام كاعدين .. حسيت نفسي بمدرسة ساكته

وهما هم سكتوا ويباوعون عليه حتى بابا الي البارحه كان ما يطيق يباوع بوجهي اليوم يباوعلي وحسيته يحاول يتقبلني او ما يجرحني .. اختنكت من الحجاب ونزعته وفتحت شعري

بعد ما قصيته صرت اعوفه مفتوح على طول ما احب
اربطه بابا من شاف طوله حسيته انصدم بس ما حجه

من لما كنت صغيره وهو يحذرني ما العب بشعري وما اكصه كان يحب يشوفه طويل وما يخلي امي تكص منه شبر واحد وبعدها مهند هم استلمني لا تكصي ولا تلعبين بي وهسه بعد ما ابتعدت عن الكل كصيته ونعلت ابووو الخلفه

كعدت شمرت القراصه على التخم واخذت تلفوني "وسام تعرف الرمز .."

رد الرمز الي وكعدت اتصفح
صار ٤ ايام ما فاتحه نت بجهازي

الانستا مو هواي ادخل اله بس من انشر او اتفرغ
اني على طول المده الي فاتت ما داخله اله ابد

من فتحته كانت اكو رسالة من حساب مجهول "مرحبا شام ممكن احجي وياج كلش ضروري والله محتاجه الج .."

استغربت منو ورديت "تفضل .."
وصلت الرساله بس ما كان موجود تركته وشفت اكو رسائل من استاذ محمد يسألني بيهم عن شغل وكذا هم رديت عليه

مياسين دخلت الصوبة وراحت جابت السفره تفرشها
اخذها وسام وفرشها .. التمينا على الاكل

بعدني ما كايله بسم الله
دخلت لجين واسر بعدها وهما يفركون بعيونهم ويمشون كانو سكرانين .. ابتسمت وكمت عليهم

غسلت الهم وكعدتهم ياكلون .. التهيت اوكل بيهم
بابا انتبه الي ما اكلت صاح على لجين هي راحت اله وكعد يوكل بيها .. اني ما حسيت بشي من سوا هيج عادي ما تاثرت لان البارحه صدمني حيل

كملنا الاكل وماما صاحت بنور تساعد مياسين لان بس هي اشتغلت ونور كاعده .. اني لسا احس روحي خطار هنا

ما شاركت ولا بحاجه .. كعدت بل صاله وامي يمي
وكل شوي تسال عن حاجه وعن حياتي بل بصره واني ارد بصورة عامة ما اريد اتعامل بشكل خاص وياها ثكلت وجهي عليها ما بيه حيلهم

جدو "شام ليش ما ترجعين هنا يمي احسن مما باقيه لوحدج وانتي بنيه شابه .."

كلت بكلبي هسه شالتهم الغيره عليه .." لا جدو تسلم مرتاحة هيج .." قصص وروايات عراقية كرار صلاح
كان الجو مشحون وبابا تنرفز من طريقة كلامي
اني هنا سكتت بعد وما ارد على كلشي سويت نفسي ملتهيه بل تلفون .. كعد احمد يفرك بعيونه وصبح عليهم
احمد "شاااام ام راس اليابس هنااا .. شعجب تنازلتي واجيتي .."

رديت بابتسامة .." مجبورين ياخويه مجبورين .."
ضحك "ما تنكدرين ام لسانين .."

رديت .."هو وين اكو افقر مني .. ترى والله مو احمد بنفسي بس اني فقيره انتو ماخذين نظره مو زينه عليه .."

ردت ماما وهي تفر بحلكها
"يمةةة منج يا فقيرررره .. هو صدك لو كالوا خوفك من الفقير .. انتي لسانج وعنادك لبارحه يشهد على فقاريتج .."

ما رديت عليها
وسام .." يابه ما دام كلنا موجودين اريد احجي وبوجود جدي بموضوع .."
رد بابا "كول يابه .."
رد وسام .." اني قررت ازوج .."
فرحت لوسام من كل قلبي
رد عليه جدي .." بيها الخير بس اشر وكول .."
ردت ماما .." اني اخطبلك وحده على ذوقي لو عندك وحده .."

رد وسام .." اكيد عندي وحده .."
ضحكنا عليه وبعدها حجه بابا
"منين هاي قريبه غريبه .."
رد .." سارة بنت عمي ابو رضا .."

محد عارض بل عكس كلها فرحت
كان رضا ما موجود من اجيت ولسا ماكو الضاهر بل دوام

بابا كال اليوم افاتح عمامك بل موضوع ونشوف رآيي البنيه
ردت نور .." بابا بدون ما تسالها هي تكيف .. وربي تجلب بديها وسنونها لا تخاف اني اضمنها الك .."

ضحكنا عليها .. معناها اكيد اكو شي بيناتهم
هل نور متأكده هيج ان ما راح ترفض ولو صدك تجلب بوسام وين تلكي احسن من هيج .. مياسين من سمعت بل خبر حسيتها ما متفاجئة لا عادي .. بس باركت لوسام

هنا تاكدت هو عنده علاقه بيها .. بس استغربت
وسام ما عنده هل سوالف .. واصلا هي مو بعمره
كل عمره ١٩ سنه .. بعدها ببداية عمرها والوحيدة هي الي تركت الدراسة من سادس حتى ما امتحنت هذا الي عرفته عنها

عفتهم يسولفون ويخططون قبل لا اطلع
بابا حجه "وين .."
رديت واني امشي .." اريد انام تعبانه .."

دخلت لغرفة بابا نمت بل كاع .. وييين يله كعدت
غسلت وجهي وخليت شال على راسي

كانت الصالة مليانه وكلها متجمعين
دخلت وسلمت وكعدت ..
حجت ماما "شنووو مكبسللله نمتي هل نومه .. نكعد نريد ماكو .. شنو يمه دخلتي غيبوبه .."

بعدني دايخة من النوم وما مستوعبه
"هاااا !.."

ضحكت نور .." وجعاااا بس لا بعدج نعسانه .. شوف وجهك شلون مورم من النوم .."

ما رديت صرت ادور بعيوني على اسر ولجين
صدت عيني عليهم كاعدين بحضن ابوهم وما منتبهين الي

باوعت الساعه كانت ٧ المغرب
عااااا من ١٢ ونص واني نايمه

اجا اسر عليه باس خدي وكعد بحضني وهو يسولف
دوخ راسي واني بعدني باثار النوم .. مدري ليش من اكعد الغروب هيج ادوخ وابقى فتره يله استوعب الوجود

اسر مادام كاعد بحضني يباوع بوجهي
ومخلي ايده على خدي ويحجي وياي واني بس ايي ماما وما ادري شيحجي..

خلوا الاكل واكلت وكمت ردت اصعد فوك واخذ الجهال
بس عمو ابو مهند صاح عليه
"تعالي بابا كعدي ويانا عليش حابسه روحج .."
كعدت يمهم وهما يسولفون فتحوا موضوع وسام وساره

كلها فرحت بهل شي ابوها كال اسالها ويصير خير
هي كانت موجودة بس من انحجه بل موضوع كامت

من كامت كلها ضحكت عليمن ما ادري
مهند .." يابه واني هم اريد ازوج .."

كلها انصدمت وسكتت حسيته كان يحاول يغيضني لا اكثر
بابا رد "ايي صحيح ليش لسا ما مزوج .."

بابا يريد يحسسهم ان ما عنده اي اشكال بهل وضع
يمكن عباله علمود ابويه ساكتين وما مزوجين مهند

عمو ما حجه سكت ومبين متفاجئ مهند رجع عاد السالفة
وعمو كال تريد وحده كول

رد مهند .." بلي يابه طالبه عندي بل جامعة .."
عمو كال يصير خير .. اني ما ابديت اي رد فعل بل عكس اسمعهم بعدم اهتمام .. احس حركته رخيصة للغاية

تغير مجرى الحديث بس الكل كان مصدوم من القنبله الي فجرها مهند .. باوعت لمهند يباوعلي ابتسم بوجهي بسخرية وبعد نظره عني ضحكت عليه يمكن يتصور غرت او انقهرت

جابوا الدومنه ويلعبون كل مجموعة سويه والنسوان يسولفن وصايره كض اخوك لا يطيح

احتارين وين اباوع المن انتبه المن اسمع .. يوووه دخت
هناك ماكو هيج ابد صار شكد ما شايفه هيج جمعه مال عائلة تعودت هناك بس اني وأطفالي حتى من اروح بيت الشيخ يفصلون النسوان عن الزلم مو مثلنا مختلطة

اجت مياسين وهي تنشف بايدها وتنطيني جهازي
"شام هذا واحد اسمه شيخ محمد من المغرب ولسا وهو يتصل .." قصص وروايات عراقية كرار صلاح
اخذته منها باوعت ١٦ مكالمة فائتة .. خفت لا يكون صاير شي بعدني ما متصلة رن بيدي رديت بسرعة
"الووو مرحبا استاذ محمد .."
رد عليه "اهلا وسهلا ست شام الحمد لله على السلامة.."
شوي اطمئن قلبي .." الله يسلمك استاذي.."
رد "شنو يابه شكد اتصلت عليج وماكو .."
رديت .." ها جنت جنت نايمه .."
كلت بكلبي هسه عباله اجذب
رد .." اممم صح النوم يابه .. شنو سمعت من خالج تاخذين اجازه .. الاهل موجودين .."
رديت "ايي استاذ بس اسبوع واحد مو اكثر .."
رد "اخذي راحتج شكد ما تردين انطيج اجازه بس ياريت تحاولين ترجعين باسرع وقت ممكن لان عندنا شغل مو مال تتاخرين.."
رديت "خير صاير شي .."
رد .." لا ما صاير شي .. شلونكم عسا زينين .."
رديت "الحمد لله بالف خير .."
رد "اسر ولجين وين .. اشتاقينالهم .."
رديت .."هذول موجودين .. باوعت لاسر ولجين .. " تعالوا ماما هذا عمو محمد يريدكم .."

كانوا عمامي وبابا ومهند يباوعون عليه
لا اصلا مو بس هذول الصاله كلها سكتت وتباوع عليه

اجت لجين .." هلاووو .."
فتحت المايك .." ضحك ورد .." هلوات فدوه لهل حلك ولج فصعونه مكانج خالي .."
ضحكت .." ايي عيني طبعا بعد لجين مو حي الله.."
رد الشيخ "والنعم يابه .. وين اسر شو ما اله صوت .."
رديت .." هذا يسمعك .."
اسر "ها .."
كلتله سلم على عمو .." هلو عمو .."
رد محمد "هلو بابا حبيبي .. "
حجت لجين .." عمووو عفوشي مات.."
ضحك محمد .." اجيبلج عشره مو واحد .."
محمد كان جايب لبيتهم بلبل ولجين من شافته كلتله اريده فـهو خطيه انطا الها ما حجه .. صارله فتره ببيتي ومن قررت اسافر انطيته الها من راحت لبيت جدها .. بس ميت بل طريق
سلمت عليه لان انحرجت بيهم كلهم يباوعون وساكتين

سديته من محمد وهما بعدهم يباوعون حسيت باحراج بس ما كدرت احجي برى نوب عبالهم عندي شي ويا

حجه بابا .." منو هذا .."
رديت .." استاذ محمد مدير الشركة الي اشتغل بيها .."
سكت بابا
حجه جدو .." شيريد خابر عليج .."
رديت .." علمود الاجازه وطلب مني كم شغله بخصوص العمل .."
عمو ابو مهند .." جا شو يسال على اطفالج منين يعرفهم .."
استغربت سؤال عمو مدري غشيمين مدري يغشمون نفسهم ورديت .." غير اني ساكنه ببيت اخو وهما صفه وي بيتي شنو ما تعرفون .." كان هل مشتمل مال بيت اخو محمد بس سافر ومحمد اجرلي المشتمل
سكت عمو عني بس حسيته ضاج ما اعرف ليش
اني اشرت لميس .. اجت يمي
"اكلج انتي ما مسولفه الهم عن هل موضوع .."
ردت "لا يعرفون انتي ساكنه ببيت اقاربي بس ما يعرفون هو نفسه صاحب الشركه الي تشتغلين بيها .."

رديت "زين شبي هيج استغرب وضاج .."
ردت ميس" يمكن لان شاف اكو ميانه بيناتكم ويسأل عن اطفالج .. ترى عمو ابو مهند بعده يحاول وي مهند لحتى يرجعج .."
سكتت بعد ما رديت عليها
فتحت انستغرام واصلتني رسالتين
"شام اني شمس اريد احجي وياج شبيج تشوفين الرسايل وما تردين .."
عكدت حواجبي واستغربت شعندها وياي اني بيوم الي شفت نص وجها من كنت بل كوفي صح فتحت الرسالة بس ما رديت راحت عن بالي نهائيًا
دزيت .." شتردين شمس .."
ماكو ما ردت .. يوووه لعبت نفسي من الوضع

بقيت كاعده والتلفون بحضني كل شوي افتحه
اشوفها دزت او لا لان اني غالقه اشعارات الانستقرام

انتبهت مهند كل باله يمي ويباوع عليه ضجت حيل شكو
يباوع اذا يريد يخطب وحيشوف حياته وي غيري بعد اني صرت محرمة عليه .. كمت من مكاني كبل صعدت فوك

كانت نور والبنات ماخذات الغرفه الفوك كعدت بيها
واني لازمه تلفوني فتحته وفعلا اكو رسالة من نفس الحساب

"شام ليش هيج تسوين وياي اني شسويت الج حتى هيج كارهتني وما تردين تحاجيني ومن اتصل تحظريني سحلت كرامتي الج وانتي ما تقبلين تتواصلين وياي اريد اعرف شنو الي بدر مني كليلي وريحيني .. لحتى ابتعد .. يعني بعد ما عرفتي ان شجن ورا الموضوع عاقبتينا كلنا وابتعدتي عنا ترى احنا صديقاتج وما اذيناج لا تنسين هل شي ابد يا شام احنا شنو ذنبنا هيج تسوين كليلي .. وتمنعين ميس تنطينا رقمج او نتواصل وياج عود ليش فهميني .."

رديت .." انتو ما الكم اي ذنب واني ما محمله المسؤولية على احد .. اني فقط اريد ابتعد عن الكل .. تعذروني ووصلي اعتذاري وسلامي لاسيل وهجران .. بس ما اريد ارجع علاقتي باي وحده خليني بعيده عنكم ..افضل انو الوضع يبقى على ما هو عليه .."

ردت .." واحنا نريد علاقتنا ترجع وننجمع مره ثانيه اعرف انتي حاليا ببغداد واعرف كل اخبارج من ميس وما نتركج يا شام ابد وهجران ترى اكثر وحده زعلانه ومحملة عليج تكول هي طلكها زوجها احنا شعلينه شو لا من ذول ولا من ذول .. .."

سكتت ما عرفت شارد
دزت مره ثانيه .." باجر اذا عندج وقت نلتقي بمول .......
راح أسال البنات بس هجران يمكن ما تقبل خلينا نسويها الها مفاجاة فدوه شام لا تعترضين وتعالي .. معقولة بسرعه نسيتي صحبتنا وعلاقتنا الحلوه .. "

سديته منها وكعدت افكر .. صح كلامهم هنه شعليهن بلي صار يمكن غلطت بحقهن بس كنت اريد اعيش مرتاحه

ثاني يوم طلبت السيارة من رضا لحتى اروح بيها
للمكان الي اتفقنا نلتقي بي .. اتفقت وي شمس انو بعد الدوام نلتقي كلنا بمول ...... على الغدى

تعطلت بل بيت شويه علمود اسر ولجين لبستهم ووكلتهم واخذت اذن من وسام لان بابا ما يحجي وياي

طلعت من البيت ساعه ٢الضهر .. وصلت للمكان
خابرت على شمس وصفتلي وين هما

دخلت للمطعم اتلفت وادور عليهم .. صدت عيني بعين اسيل من شافتني ابتسمت .. رحت باتجاهم
"السلام عليكم .."
اباوع هجران التفتت الي بسرعه من شافتني رادت تكوم
لزمت ايدها

"لا ترحين هجران خلينا نتفاهم .."
هجران.."ماكو شي بيناتنا لحتى نتفاهم لاجل انتي اختاريتي البعد هذا هو ابقي بعيده احنا هم ما نريدج .."

شمس واسيل يهدون بيها ويقنعونها تسكت

هجران بل كوه قنعناها تكعد كانت ضايجه مني ومحملة عليه لان مره خابرتني من عرفت هجران سديته بوجها لان كنت ستوني مصدومه بشجن ما اعرف ليش كرهت المجموعة كلها

اعتذرت منها وسولفتلها على موقفي يله شوي فكت
بس على طول الكعده احس وجها ثقيل عليه

بس اكيد ما راح تبقى هيج .. ولو اني ما مطوله هنا
شام .." هجران يعني تبقين هيج اني اجيت علمودج اكثر شي لا تسوين هيج نفس اهلي وتخليني اتندم لان التقيت بيكم واني ما مطوله هنا هواي ولا راح اكدر اتواصل وياكم بشكل دائم .."

ردت .." اعرف ما مطوله بس مو بيدي انتي جنتي حقيره ويانا وبعدتي روحج عنا .. وبعدين شبيهم اهلج ليش تندمتي لان التقيتي بيهم .."

كنا ناكل ونسولف .. سولفتلها عن حياتي شلون مرت
وشنو سويت وشلون عشت وعلى اهلي وبعدهم عني

شمس .." الله يعينج عليهم .. لو منج والله ولا اشوفهم وجهي بعد وحتى لا تخابرين عليهم ما دام بعدهم هيج وياج اذن لا تهتمين الهم .."

ابتسمت .." بربج ما تسكتين انتي .. تتذكرين من اقترحتي انزل الطفل شصار بيه سدي حلكج رجاءً .. انتي مدري شلونها نظرتج للحياة .."قصص وروايات عراقية كرار صلاح
البنات سالوا عن المشكلة وعن موضوع انو انزل طفلي سولفتلهم وهجران تلوم بيه وتكلي ما تعرفين تتصرفين خربتي حياتج بيدج .."

رديت "اووو هجران ما اريد احد يلوم الي بيه مكفيني .. يله بنات تاخرنا هواي هنا اني اروح مناك اسر ولجين خطيه .."

طلعنا سويه اسيل وهجران بسيارتهم واني وشمس بسيارة رضا
وصلت شمس للشقة مالتها سالتها .." شنو اخبارج ما تزوجتي بعدج عايشه لوحدج .."
ردت .." ايي والله بعدني خليني هيج احسن الي انعل ابو الزواج اريد اهاجر ما ابقى هنا بعد لو مدري شيصير العراق العيشه بي صعبه وشهاتي تستحق اكثر من هيج محد مقدرني هنا افكر اسافر واكمل دراسات عليا بالمانيا افضل .. الي واريد اتواصل وي اخوج علمود هل موضوع واستفسر منه .."
رديت .."والله افضل شي تسوي بحياتج تسافرين اني لولا وجود اطفالي كان تركت كلشي وسافرت .."

ردت .."بربج ما تسكتين انتي .. اشو السفر طالع من عينج والونسه فوووول وعندج شغل ونسبه بالشركة وانعرفتي وعندج ضهر ساندج بعد على شنو تهاجرين وانتي هنا صرتي معروفه .. ابقي بمكانج افضل .. واذا على السفر فـ انتي ما خليتي دوله تعتب عليج .."

ضحكت .."عزااا كلشي تعرفين عني .."
ردت وهي رافعه حواجبها .."اخبارج كلها توصلني .. اني شموووسه مو حي الله .."
رديت .."والنعم من شموسه المحروسه .. شنو عيني ما ناويه تتحجبين .."
ردت .."اووووه اختنككك اختنكككك حتى سيرة الحجاب تخنكني .. مدري شلون متحملات انتو يابه اني ادور حريه ما اريد اخنك روحي واتقيد.."
رديت عليها .."ترى الحشمة بيها حرية ما تعرفينها گ متبرجة ووين التقيد بل حجاب بل عكس الحجاب ستر وعفه واخماد للفتن ومافي دين يعز المراة مثل الاسلام ففرض الحجاب مو تقييد بل حفاظ عليها من الفتن ...."

بعدني ما مكمله كلامي .."هووووب هووووب هووووب لا تنفتحين عليه .. رجاءً اني ما كفرت بس هل شي ما يعجبني وخلصصص رجاءً لا تتحمسين زيادة وكافي تنصحين اني هجران كافي عليه .. يله باي .."

نزلت شمس هزيت ايدي البنيه مو صاحية مدري شلون تفكر اني رجعت للبيت دخلت السيارة للكراج ودخلت لبيت جدو

من شافني عمو ابو مهند استغرب .." وين جنتي بابا .."
رديت .." طلعت وي صديقاتي .."

عفته وطلعت من الصاله .. كلش ضجت هنا بس
يسالون عبالك تحقيق ومن اجيت لهنا ولسا هما ما رايحين البيتهم بس وقت النوم

صعدت للغرفه بدلت وكعدت اسولف وي خواتي الصغار
اريد اتعرف عليهم .. هنه يستحن مني عبالك غريبه عليهن

اخر شي عفتهن ونزلت جوه كعدت يم مياسين
وساعدتها بل طبخ

مرت الايام واني ببيت اهلي
الوضع نفس ما هو يوميه يتجمعون هنا واذا مو الكل فبيت عمو ابو مهند يجون هنا يخلصون اليل كله اني صرت ابتعد عنهم قدر المستطاع بس من يتجمعون يبقون يسالون وكل شوي يجي احد يكلي تعالي يردونج مرات اغلس مرات يلحون واضطر اكعد يمهم .. اعتقد كل قصدهم يقربونا اني ومهند او هيج شي .. لان تخبلوا من عرفوا يريد يخطب

اني ما اهتميت ابد كان همي اخلص هل اسبوع وارجع
بس الي عطلني هو وسام علمود الخطوبة بقيت هنا

مهند اخذ اسر ولجين اشترالهم ملابس للخطوبة واني اصلا من كنت بل امارات اخذت ملابس هواي مناك .. فضلت يكون لبسي محتشم ما اريد البس فستان ولبس فاضح

اختاريت بنطرون قماش وبدي ابيض
وفوكاهم سترة والرباط البناتي بل بدي كان لبسي راقي بس مو مثلهن كلهن اشترن فساتين ولعبن لعب وصالون وكذا عبالك هنه العرايس

اني شعري بس سشورته وسويت مكياج حلو ومرتب
وهذا هو .. اهم شي عندي النضافة ويكون منظري مرتب

تمت الخطوبه والنسوان تركص وتهلهل وكلبن الدنيا
بل دي جي .. اني بقيت كاعده وساكته يمكن لو قبل كان كنت اركص وياهن بس حتى صرت احس روحي على كد ما تغيرت هذا الشي مو من مستواي انو اركص واهوس صرت ثكيله مو مثل قبل كلشي ماخذته بخفه وضحك كلها منتبه الي صاروا يشوفوني فد شي لان لابسه الوضع وما بينا اي كلام

اكتشفت الناس تحب وتحترم الشخص الي يتكبر عليهم ويتجاهلهم شفت فرق بين البارحه واليوم فرق كبير

بخطوبة وسام اجت عمتي وبناتها كانت سوزان متشمته بي وتباوعلي بابتسامه خبيثه حاولت تتقرب مني بس كنت اصدها اعرف تريد تقهرني وتذب سمها عليه

هي تزوجت وصاير عندها طفل بس بعده حقدها بكلبها عليه
بعد ما تمت كل مراسم الخطبة وخلصن ركص

ووزعوا الاكل .. اني رحت للبيت اجهز بل جنطه وخليت عمتي تجيب ملابس اطفالي الي .. كملت كل شي وخليت شال على راسي ونزلت الجنط جوه الدرج خليتهم

بعد ما كفت العالم البنات بقن ببيت عمي ابو رضا والزلم والنسوان اجوا هنا ببيت جدو وخالو عثمان كان موجود

دخلت سلمت عليه وكعدت بصفه كانوا يسولفون وملتهين اني شاورت خالو واساله عن كم شغله وعن الوضع بل شركة طمني وكال ترجعين وياي مو

جاوبته .." اي خالو ارجع وياك .."
هز راسه واسترسل بل حديث مع بابا
دخل مهند واسر ولجين بيده اجوا عليه يركضون
كعدوا بحضني .. خالو كام يريد يروح للشقه حتى نطلع من الصبح

اني هم كمت .." اوكف خالو الف حجابي واجيك .. يله ماما لجين لبسي حذائج.."

سال وسام .." شنو خويه وين .."
رديت .."خلصت اجازتي بعد ارجع للبصرة.."
رد عمو .. " دبقي يا بابا .."
رديت .." لا عمو اصلا من يومين لازم اكون هناك بس علمود وسام بقيت .."

عفتهم ورحت لغرفة مياسين اعدل بشالي
والحسرة والدموع ماليه عيوني بسبب بابا وجفائه وياي

كملت وطلعت سلمت على نسوان عمي وامي واحمد
اخذ الجنط خلاهم بسيارة خالو عثمان وطلعت برى كانوا الزلم واكفين بل باب ويسولفون وي خالو ومنتظرين اطلع

بست عمو ابو مهند وجدو واخواني واخر واحد بابا
ترددت اتقرب اله بس ما طاوعني كلبي اتركه واروح بدون سلام .. هو باوعلي شلون متردده اتقدم اله فتحلي اديه رحت عليه شبكته بدون اي كلام .. وابتعدت كلبي وجعني حيل بس مابيدي حيله ...

ركبت بل سياره بعد ما سلمت على ولد عمي بصوره عامه وكان من بينهم مهند واكف هم .. اجوا اطفالي هم صعدوا ابوهم باسهم وخله بيدهم فلوس وطلعنا للشقه

ثاني يوم رجعت للبصرة .. بيت الشيخ رحبوا بيه وهم عزموني على العشا ببيتهم .. تعودت على هل حاله كل ما ارجع بعد غياب يعزموني.

رجع الوضع طبيعي وحياتي رجعت مثل ما هي
وما بيها اي شي جديد

المشروع الي ببغداد بلشوا بل تنفيذ
وخالو اشرف عليها .. هنا اني الشغل تركب براسي صار خالو ملتهي بالمشروع وما اجا بقى ببغداد ويروح ويرجع والشيخ صار هو الي يسافر واني ابقى هنا .. صرت ما احك راسي على كد ما اشتغل اكو هواي وياي وهاي بس الاستاذ حيل مأمن بيه ومنطيني كامل الصلاحيات صارت مسؤولية كبيرة عليه

اخر شي ما كدرت اكثر من هيج دزيت لجين واسر لبيت جدهم لان الاستاذ كلش طول بسفرته واني ملتهيه عنهم ومرت الشيخ مبتليه بيهم

اهلي سافروا صارلهم هواي وعلى اساس بل عطله الصيفية يرجعون ويكملون الزواج

مرت الايام والوضع على ما هو عليه ماكو اي تغيير غير بس انو الاستاذ رجع شوي خف الحمل عني

بوقتها ارتاحيت وتنفست شوي .. اجت العطله الصيفية
واهلي ديجهزون لحتى يرجعون للعراق علمود عرس وسام

اني علاقتي بيهم شوي تحسنت يعني عادي صار كم اتصال بيناتنا بس مو مثل قبل .. واسيل وشمس وهجران تحسنت علاقتي بيهم نوعًا ما .. يعني ماكو شي جديد بهل فترة ماكو اكشن .. مرت الايام واهلي رجعوا للعراق اني ما رحت لهناك بس كلها تلح وتتصل لحتى اجي وابات يمهم
واقضي وقتي هناك .. عمو ابو مهند وعمتي ابوي واخواني وجدو وماما ونور كلهم يخابرون ويلحون صرت ما ارد على اتصالاتهم كلها لان اعرف شنو يردون وما الي خلك اعيد هذاك الاسبوع الي قضيتها عندهم على اعصابي

اخر شي من اجا خالو للبصرة وامي وابوي ويا اجوا ايضا زيارة لبيت خوالي بقت يمي ويرحون ويرجعون على بيت خوالي ويلحون عليه اجي وياهم لبغداد بس رفضت واستاذ محمد هم ما قبل لان عندنا شغل وكال ما اكدر انطيج اجازه
حاليا .. اني فرحت من كل قلبي بهل رفض ابوي وامي رجعوا لبغداد وخالو وياهم

لمن قرب الموعد وراح يجي العيد اخلي اجا للبصرة وجبرني ارجع ويا لبغداد هو حاليا يبقى اسبوع ويرجع لشغله اني هنا انجبرت اروح ويا طلبت اجازه واصلا هناك راح اشتغل وي خالو افضل لان الضاهر مطوله هناك .. بس اريد احاول قدر المستطاع ارجع بسرعه ..

ابتسمت على وضعي بسخرية هسه صرت عزيزه عندهم
كانو ما يطيقون يسمعون اسمي .. ما اعرف من وين نزلت هل حنيه عليهم

حظرت الي احتاجهم .. اباوع عليهم واكول لنفسي .." شوكت تستقرين يا شام يومين ماخذتهم ورايحة يا ريت ما رجعت علاقتي بيهم كانت حياتي مرتبه هسه مضطرة اخربطها مثل ما يردون .."

اسر ولجين من سمعوا كيفوا ويردون بيت جدهم
يحبون يرحون هناك لان هواي اطفال وياهم ولعب ودلال وبيبيتهم ما مقصره عنهم بحاجة ف يحبون الروحه الهم

من اخذت اجازه من الاستاذ انحرجت كلش لان طوختها ويا والاجازه الي طلبتها ما كان وقتها اضافة انها راح تكون طويله اني نفسي ما اعرف مدتها

اخذني خالو ويا .. اني اقترحت عليه ابقى ويا بل شقه وما اروح لهناك لان مهند ابد ما يفارق بيت جدو يطب ويطلع يخبلني وما اخذ راحتي .. واصلا مو بس هو حتى ولد عمي البقيه هيج هناك لازم اتجودر واكعد لازم على طول مستعده ولابسه ومتسترين .. خالو كيف لان هم يحتاج تنضيف للشقه

هنا خالو اقترح اشتغل هل فترة ويا .. اخذت سيارة و
اجيت لبغداد وي خالو .. كعدنا بل شقه اول اسبوع ما رحت لهناك ابد بس كل يوم اطلع وي البنات وشمس دائما تجي عندي وتروح

امي خابرت اجي ليمهم علمود نجهز وياهم
ثاني يوم من الصبح لبست اسر ولجين ورحت لهناك

من فتت اتلاكيت مع سيارة مهند .. لا هو اهتم الي ولا اني كلمن مشى بطريقة.. دخلت للكراج ونزلت

كانت ساعة ٨ الصبح اول ما دخلت كلها كامت عليه تسلم
لان كانوا يتريكون خلصت اليوم كله يمهم

نوب البليل نور كالت اريد اطلع من اجيت لهنا ولسا ما طالعين .. اقترحت اطلعها هي واخواتي البقيه

عمو ابو مهند ضاج كلش واحتقن وجه شلون بنات ونطلع
بهل ليل عبالك راح ياكلونه .. فـ اني حاجيت احمد

"حمودي تعال ويانا .."
ما عارض كبل اجا .. اخذتهم للمولات وفريتهم
هناك واطفالي كانو يم عمتي ما قبلت اخذهم ما بيه اسحل بيهم ومن يدخلون هنا بعد يفقدون .. البنات اشتروا مكياج وملابس عبالك شبع شكد عندهم بس هم اخذوا واحمد بس يمشي ويانا ما اشترى شي .. اخذتهم اكلنا بيتزا واخذت للعائلة كلها واهم شي اطفالي .. ورجعت للبيت

نزلوا كلهم كانت ساعه ١٢ من وصلنا اني خابرت على
عمتي اطلع اسر ولجين لحتى اخذهم ونرجع للشقه

كان احمد كاعد وياي بل سيارة والبنات نزلوا يجيبون
اطفالي .. طلع عمو ابو مهند من بيت جدو وعيونه بكصته

حجه وياي .." وين ماخذه الجهال بهل ليل ورايحه لوحدج شنو عمي شو انتي صايره فرييي كللللش .. عمي احنا بل عراق مو بتركيا حتى تفرفرين لوحدج واطلعين .. انتي مره مطلقة وحركاتج لازم تكون بالف حساب ليش تخليني اقسم انزلي وباتي هنا ما اطلعين وحدج .."

نزلت وامري لله لان كان عمو عصبي حيل ونوب استلم احمد زرايل ويكله احنا مو بامريكا وهيج ساعه يله ترجعون وانت وياك بنيات ما تخاف عليهم

عفتهم ودخلت كان وجهي محتقن وحواجبي مطبوكه
من الي صار ما اتحمل احد يتحكم بيه وهيج يحاجيني

جريت اسر ولجين .. من الصاله لجين ما قبلت تجي
ولازكه بشمس بنت مياسين .. اني كانت روحي شايطه وهاي تتنغوص براسي قصص وروايات عراقية كرار صلاح
عطت بيها "كاااافيييي دلااااللل يللله امشييي اريييد انطمررر باجررر وراي كعددده .."

اني ما اصرخ بوجههم ابد ولا اضربهم بس هل مره
ما اعرف شجاني بل عادة هادية وياهم

الصاله كلها تصيح عليه وتحجي ومهند يخزر بيه ولجين
تبرطم وتريد تبجي لان صحت بوجها اني الحرارة تطلع من راسي .. عفتها هي واسر وصعدت لفوك

مدري شبيه كنت مختنكه اريد هوى .. طلعت للسطح
وكعدت بل كاع فتحت حجابي وكعدت

كنت ضايجه وروحي طالعه .. بعد ساعه سمعت خطوات قريبة على الدرج .. باوعت زين وطل عليه وسام

اجا يمي وهو يبتسم .." شبيج ليش كاعده هنا .."
رديت بخنكه .." اريد ارجع للبصرة .."
رد "شنو لان عمو حجه عليج .. كال روح صيحها الي يمكن خذت بخاطرها مني .."

ما رديت
كعد بصفي وانتجه على الحايط وصافن بل سمًا ورأسه مرفوع .. اني ساكته وهو كذلك

بعد صمت طال لمدة ربع ساعه
وسام ".. شام بعد ما ازوج انتي ما تبقين هنا .."
باوعت عليه باستغراب.." لعد وين اروح .."
رد "تسافرين ويانا لامريكا.. خلص شام سقطت وركتج وما عاد الج مكان بينهم .."
رديت .." لا تتوقع انو اني هنا علمود مهند .. ابد لا تتوقعون اني متأمله انو ارجع ويا .. بس حياتي بنيتها هنا ورسمتها مثل ما اريد ما مستعدة اهدم كل شي وارجع وياكم لامريكا اصلا لا تفكرون ولا تفتحون الموضوع مره ثانيه .."

تنهد .." الله كريم بعد وقت على هل كلام .. يله كومي خلينا ننزل .."
رديت .." حتصير ١ بليل شعجب لساهم هنا .."
رد .." وانتي شعليج بيهم .."

ما جاوبته عفته و غسلت وجهي من المكياج
ونزلت جوه .. عمو من شافني ابتسم واشرلي اكعد يمه

رحت يمه كعدت
ابو مهند .." شنو بوية اخذني بخاطرج مني جا اني غير احجي لاجل مصلحتج قابل اكرهج بس هذا الشي غلط واني نبهتج واعتقد الي حق عليج مو صح او لا .."

رديت بعدم اهتمام .." اي صح .."
بقيت كاعده شويه وسحبت حالي واخذت اسر وياي

لجين كاعده بحضن ابوها وتباوعلي مخنزره
ضحكت عليها وكمت .. اشرتلها رادت تكوم مهند ما خلاها عفتها وصعدت فوك .. احتاريت شلبس ما عندي شي اخر شي اخذت من نور ثوب قصير ونمت بي

ثاني يوم كعدت متاخره لان نمت ساعه ٢
كمت مخترعه على تلفوني .. خالو متصل عليه ٣ مرات
خابرت علي واني اغم بنفسي .. اصلا ساعه صارت ١٢ يعني فات الوقت .. ونور ما مكعدتني اني كل مره ما اتاخر كله من الصبح اكعد .. انتكلت على نفسي وما وصيت احد يكعدني .. خالو من رد كان ضايج بس كال خليها على باجر اعتذرت وسديته منه

نزلت جوه بثوبي لان كلها هسه بل شغل وحتى رضا مو هنا هيج وقت فـ عادي نزلت هيج

دخلت للمطبخ كانت لجين كاعده يم بنت مياسين
من شافتني دارت وجها بزعل مني

رحت عليها اخذتها لحضني وهي ضحكت بسرعه
وسكتت .. سالتها متريكه

جاوبت مياسين .." ما قبلت تكول اريد مع اسر وماما .. اقنع اريد ماكو .."

رحت سويت ريوك الي والهم وياي
هيج وقت كلمن بعمله ملتهي ويكون البيت فارغ

كنت واكفه على الطباخ سمعت حمحمة التفتت كان
مهند ووسام .. وسام فاتح عيونه بكل وسعهم اشرلي اطلع

اني عفت الي بايدي وصعدت للغرفه اضرب بوجهي
والوم بنفسي .. وسام احسه يريد ياكلني .. كنت كاعده وبعد ما نزلت ابد .. شوي ودخل عليه وسام

يباوعلي بغضب وعاكد حواجبه. .." شلووووون تلببببسسييين هيييج وتفترررييين بل ببببييييت .. شاممم انتي مو صغيره وااااعللللمجج انتبببهييي لنفسسسسج .. مو ابيييتج انتييي .."

حجه هل كلام وطلع وركع الباب ورا صرت افرك
بايدي ومتندمة .. اخر شي اجت لجين ولهتني عن الي صار

بعدها سمعت صوت زلم جوه وهوسه واجت نور والبنات للغرفه .. الي عرفته جابوا غرفه الاخشاب لوسام علمود العرس استغربت هما ما يبقون هنا اول ما يزوجون يسافرون
سالت وين يخلون الاثاث .. جاوبت نور .." بغرفة بابا وماما .."

رديت .." والآثاث وين .."
كالت راح ينطوا لواحد محتاج هزيت راسي وسكتت

وين يله خلصوا وطلعوا .. اني بسرعه بدلت ونزلت
رحت ردت اروح للشقه .. وسام عباله زعلان لان عيط بوجهي جاوبته .." لا اصلا ما ببالي كلامك بس خالو هم خطيه الوحدة ومنتظرني اليوم علمود الشغل .. ومنا لا اني عندي ملابس ولا لجين واسر انتلفت ملابسهم .."

هز راسه وسكت
اني اخذت سيارتي ورجعت للشقه
مر هل اسبوع على خير واني اروح لبيت اهلي نصف ساعه وارجع .. مرات اشتغل وي خالو ومرات اطلع اني والبنات وهيج

خابروني اهلي علمود اروح لعندهم
لان مسوين عزيمه لان باجر اول يوم من عيد ضحية ومسوين ذبايح على روح بيبي وعازمين ناس


يتبع...........

قصه جريئة لفتاة تتعرض للتحرش و.............



#البارت 39


شام :
صارلي اسبوع ونص ببغداد وباجر العيد .. حضرت نفسي من اليل وسويت شيره لان حيجي العرس بعد

واني قبل يوم كنت بل صالون سويت شعري ووجهي
وعنايه للبشره وهل سوالف

اباوع للجين كاعده يمي وتريد شيره انطيتها شوي
وتسوي بيها .. ضحكتني بس تندمت انطيها تلفت ملابسها

ثاني يوم رحت الصبح ساعه ١١ وخالو اجا وياي لان هم عزموا .. اول ما دخلت عايدت الكل .. جانت هنا موجوده هم عايدتها من ورا خشمي وابتعدت

دخلت للصاله كانت اكو مره وبنيه شابه وياها
استغربتهم لان بس هما غربه بسرعه طلعت البنيه لمحتني بس الام لا ما شافتني كانت ملتهيه بعمتي ام مهند

لزمت هديل .." اكلج هذي منو المره الي جوه .."
ردت بارتباك .." ها هاي هاي .."
باوعتلها مستغربه .." شبيج احجي .."
ردت .." ما تعرفينها شعجب .."
هزيت ايدي وهي وخرت مني
كانت نور واكفه بصفي هم التفتت سالتها .." شبيها هديل ومنو هدي المره .."

ردت .." ام خطيبة مهند .."
من صدك انصعقت من هل خبر ما اعرف ليش كلبي رجف
عبالك هسه يله استوعبت خسارتي .. ماعرف ليش حتى وقت الي كال اخطب ما تأثرت بس هسه لا والله من صدك
اتفاجات قصص وروايات عراقية كرار صلاح
رديت .. واني ابلع ريكي واحاول استوعب واخفي
اثر الصاعقة الي حلت على راسي .." شوكت شو ما ادري صار سبوعين هنا محد فتح الموضوع .."

ردت .." بعد خطوبة وسام خطب و بابا وصانا ما نحجيلج لحتى ما تضوجين واصلا كلها مو راضيه بل بنيه لان يعتبروها اجت عليج واخذت مكانج فـما يحجون بيها .."

الدمعه وكفت بعيني اني اول اسبوع صح ما زرتهم
بس صار اسبوع كامل اتردد عليهم واروح وارجع
ما انتبهت ابد ولا تفطنت شلون ما شفت الحلقة بيد مهند .. بقيت ساكته واحاول اوزن حالي كلبي يدك بسرعه ونفسي يضيق بيه

كعدت بل مطبخ يم البنات واسولف واحاول اسوي
نفسي ما مهتمه.. صار وقت الصلاة والناس بدت تطلب المصليات والترب واحنا بل مطبخ مخبوصين نجهز

اني ما مديت ايدي على حاجه ابد ما بيه حيل بقيت بس
كاعده واسولف .. عمتي ام مهند ما شفتها ولا عايدتها
لان كانت كاعده يم المره فـ ما كدرت ادخل ما اعرف
ليش متردده

جريت نفس عميق واصبر بروحي .. دخل مهند
للمطبخ وانطاني اسر .." اخذي هذا تلف نفسه يلعب بل طين .."

كانوا اجاني الفرج من شفت اسر سويتها حجه واخذته
وصعدت فوك .. اجت نور وهي تسولف وياي واني
كل بالي بلي سمعته منها .. انقهرت كلش

عرفت ليش وسام يكلي بعد ماكو خط رجعه انتي ومهند
ويريدني اسافر ويا .. اجا اتصال من شمس كعدت احجي وياها واحاول الهي حالي وما افكر بس مو بيدي من كلتلي

واني بعدني ساكته ومثل المصدومة ما كنت اتوقع
نفسي هيج احترك من جوه ما كنت متوقعه الامر راح
يهمني الى هذا الحد .. نزلت جوه صابين الاكل ومكملين
كل شي وديعزلون بل اكل الي رجع من الزلم والنسوان
بل صاله ملتمات .. اني دخلت يم مياسين اعزل بل صحون
واخدر الجاي .. كنت مدنكه اصب بل جاي سمعت صوت عمتي ام مهند. رفعت راسي وابتسمت بوجها عفت الي بايدي ورحت اعايدها .. وبعدها اني صرت اغسل
وهديل تشطف الماعين غسلنا المطبخ ودخلت للصاله
يم النسوان .. دنكت على المره والبنيه وسلمت عليهم

البنيه الضاهر ما تجهل منو اني بس امها سالت
منو هذي لان من الصبح هما هنا واني ما دخلت

جاوبتها عمتي واني كعدت يم البنات صارت ساعه ٣
الضهر خالو دزلي رساله .." راح ارجع للشقه خالي
ومناك اروح اعايد ولد صديقي انتي ضلي والبليل
اني او شوف منو ياخذج للشقه اخاف عليج لوحدج .."

رديت عليه .." خالو فدووووه اروحلك اخذني وياك
فدوه لا تعارض .. ما اريد ابقى هنا لحضه وحده وانت كول ل ابويه محتاج شام وياي فدوه خالو دبرني وطلعني منا .."

دز رسالة .." شبيج خالي منو وياج .."
رديت .." بعدين اسولفلك .."

بعد نص ساعه اجا احمد وكف بباب الصاله وكال
خالي يريدج .. سويت نفسي ما اعرف ان خالو
راح ياخذني وصرت اسال وعلى اساس اريد
ابقى بعد .. نور تباوعلي وتهز بايدها الضاهر فهمتني

ما عولت اخذ اسر ولجين واطلع منا
هم زين كان بس خالو وبابا بل باب واكفين

طلعت بسرعه للسيارة وانطلقنا
خالو الطريق كله يسالني شكو وشبيج خبصتي
الدنيا .." خالو خطيبة مهند موجوده وبعد لا تفتح السالفه.."

من سمع هيج سكت بعد وما حجه ابد
كلت بكلبي هما اهلي ليش ما حجولي تهي بهي

شلون خلوني بموقف محرج .. رجعنا للشقه وخالو طلع
اني بقيت افتر وافكر اخر شي طكت روحي ونمت من القهر

عرس وسام على اساس بعد اسبوع بس تاجل بعد
اسبوع ثاني .. وخالو كال راح ارجع للبصرة لان ما شايف اهله وزوجته صارله هواي .. اني رحت ويا بحجة وسام وتاجل عرسه وعندي شغل .. قررت ما احضر عرس وسام

بس كلت يزعل وشعليه بمهند وخطيبته .. طز
بيهم .. بس ما صارت فرصه اروح لبغداد مره ثانيه
لان خالو رجع بعد ٣ ايام

قبل العرس بيومين اجا عليه مهيمن واخذني لبغداد
هل مره كعدت ببيت اهلي لان خالو اخذ زوجته للشقه لان تبهذل بل روحه والرجعه وكاعد لوحده هنا

كان الجو هنا هوووسه اكثر من قبل وناس تحضر وناس تسولف دخت وتعبت من هل وضع وتبهذلت كلش

يومين رايحه راجعه لبغداد والبصرة واسحول باطفالي
وبنفسي مرات اصفن واكول شتسوالي هسه الي صار
لو بذاك الوقت متصرفه بعقل ما كان هيج وضعي

خسارتي كبيره ماكو شي يعوضني .. بس من اصفن وافكر اكول اني قويه كدرت اتخطى كل العقبات .. ووصلت مرحلة نجاح على الرغم من كلشي صارلي كدرت ادرس واتخرج وصرت مهندسه واني بركبتي ثنين اطفال .. ما انكر فضل خالو ومحمد عليه هما الي ساندوني وشجعوني كنت هواي اتعب وافقد الامل من حالي بس هما ما تركوني وصاروا يذبون الشغل براسي لحتى اتعلم ودخلوني بمشاريع كبيره مو اي شخص يكدر يدخل بيها بس جازفوا ودخلوني وصار الي اسمي .. اني من شفتهم هيج وياي وشلون واثقين بيه صرت اشتغل على حالي اكثر وابحث واتعلم حد ما فعلا كدرت اثبت حالي لنفسي قبل الكل .. اني رفعت نفسي وانتشلتها من الضياع ربيت اطفالي بدم كلبي واني وحيده ما انكر ان نسمه هم ساعدتني بتربيتهم لكني الي تعبت وسهرت ليالي عليهم وعلى شغلي وتدربت بشكل مكثف ومتعب حياتي ما كانت سهله بل كانت بيها صعوبات وعقبات كدرت اجتازها
ما راح اوكف عند مهند وزواجه ابد ما انقهر لازم اتوازن وابقى بقوتي المعهودة ما ادمر حالي اني اكبر من انو افكر بشخص خذلني اني استحق الاحسن منه واستحق مكانه اعلى من الزواج راح ابقى هيج افضل الي واحقق نجاحات اكبر

صرت اقوي حالي واحجي وي نفسي بس قلبي يمردني ودموعي تريد توكع .. صرت اذكر نفسي باذيتهم الي وشلون الكل تخلى عني .. تذكرت موقف صار وياي من سنه وبوقتها حقدت على كل اهلي اضعاف وكرهتهم

كان شتا واني من اسبح بسرعه اتمرض اذا ما انشف نفسي زين وادفيها .. بوقتها كنت مستعجلة سبحت وطلعت بسرعه
بس من ضربني الهوى حسيت تمرضت وما كدرت اكمل الدوام طلبت من استاذ محمد اجازه.. رجعت للبيت بسيارتي من كد ما دايخه اجيت اسوي حادث لولا ستر ربي ..
اخذت اطفالي ونمت ما كعدت اله ساعه ١٠ بليل واسر ولجين كاعدين يمي ومنتضرين اكعد اوكلهم بوقتها
الصخونه دكتني دك روحي ما كدرت اشيلها بس بيها ما بيه كمت لحيلي وسويت الهم بيضه واكلتهم .. اني ما اكلت رجعت نمت حتى ما دريت بيهم ناموا او لا

ثاني يوم هم نفس الحالة للساعه ١٢ واني ما كاعده والدنيا تفتر بيه كعدني اسر يكلي جوعان هزيت راسي ردت اكوم
وما كدرت بقيت بمكاني والتعب يقرا الف .. واسر ولجين من الصبح كاعدين وبدون ريوك ويلعبون وكل شوي يجون عليه يكلولي جوعانين ياااا الله ما يدرون شسوت بيه كلماتهم
كمت ابجي بمكاني على حالي ووحدتي وانقهر عليهم شذنبهم هيج صار بيهم .. بس ما تحملت اكثر ابقى هيج خابرت على نسمة خطيه هي الي اكلتهم واجا محمد عليه اخذوني للطبيب قصص وروايات عراقية كرار صلاح
بس هذا اليوم لسا عالك ببالي وما انسى للموت يمكن موقف بسيط بس علمني ان ماكو احد يدوم لاحد لازم اسند نفسي واطفالي اني انسانه ما عندي احد غير ربي محد عندي
لا ام لا اخت لا عائلة وحدانيه بهل دنيا .. بس اهلي
كرهتهم حد الموت بوقتها وما انسى الي صارلي
حتى مهند كرهته بوقتها .....

اجا يوم الحنه سويناها ببيت جدو
والعرس بقاعه .. اني لبست فستان ورحت صالون
وكذا تعديلات ونور هم وياي .. بس خواتي الاثنين
بل بيت مكيجتهم مياسين .. الحنه عاديه مثل اي حنه
دك وركص وهوسه ولعبان نفس والي لعب نفسي
هو وجود خطيبة مهند ياااويللي احس روحي افور
منها من صدك هل مره جربت شعور الغيره شلون يكون قبل حتى لو اغار مأمنه ان هو الي مو لغيري وكنت اعرف ما يباوع لغيري بس هسه عرفت ربي شلون من صدك تندمت على خسارتي .. هسه حسيت باغلاطي وغبائي .. البنيه ابد ما سمعتني كلام او اذتني بس بعيده عني ما تقربت الي

من خلصت الحنه بدينا نعزل البيت لحد ما هلكنا
نمت ساعه ١
ثاني يوم كان هدوء وشوي بترتيب مو مثل هوسة الحنه
العروس من الصبح بل صالون والعريس هم راح للحمام ونوب للحلاق .. وهاي ترتيبات العرس

اني اول ما صارت ساعه ١٢ صليت وسبحت
اسر ولجين وبدلتلهم لبست اسر قاط ولجين بدلة بيضه منفوشه باوعت عليها كانوا عروسة تخبل وتفتر بل بدله
وفرحانه بيها اني بدلت ومكيجت وعدلت حالي .. والبقيه هم مخبوصين بل ترتيب والتبديل .. وطلعنا بسيارات

اني اخذت سيارتي وصعدت وياي خواتي
ومياسين واطفالي يم ابوهم ما قبلوا يجون يمي

وصلنا للقاعه كانت قاعه راقيه كلش وناس اشكال
الوان ما اعرفهم اقارب واصدقاء وكثير موجودين

اخذت طاولة وكعدت عليها اني و اخواتي ومياسين
نوب انضمت النا هنا اني من شفتها تنرفزت ردت اكوم بس ما اعرف وين اروح .. وهي مثل الي تلاحقني او تريد تحجي وياي بس كنت اتجاهلها واصدها قدر المستطاع

العرسان دخلوا وفارشيلهم البساط الاحمر
واغنية هادئة رومانسية .. طبعا هذي ترتيبات وسام وافكاره

المصور يمشي كدامهم ويصور بيهم .. لحد ما كعدوا
وبعدها بدت مراسيم العرس والرقص والهوسة

وكام وسام هو والعروسة يركصون سلو والاغاني معلوكه
يربي شكلهم يجنن شكد حلوين اباوع الوسام الضحكه ماليه وجهه ومبين عليه الفرح

بعدها كعدوا وبدا التصوير لجين راحت يمهم
تاخذ صور بدون عزيمه .. وسام اشرلي علمود الصوره
غلست ودرت وجهي اجا عليه بابا كومني وكوم خواتي

هم اخذنا صور سويه .. ورجعت لمكاني
خالو ما كان موجود استغربت وين صار هو على اساس يجي

صدت عيني على خالو وابتسمت كان كاعد هو وزوجته
على الطاوله اتجهت عليهم

انتبهت استاذ محمد موجود من شفته ابتسمت وتبادلنا
السلام تفاجات بوجوده ما كنت اعرف هو بين الحضور
ولا اعرف معزوم من الاساس

كعدت يمهم شويه واجا اسر ولجين ومهند يباوع
عليه ورافع حاجبه .. غلست عليه

هو تلكاهم ويبوس بيهم ولا كانو هذا الي الكل
تهيبه شكد متواضع وخصوصا على اطفالي يحبهم من من الصغر رابين عندهم حتى لو مو كل الوقت بس متعود عليهم ويحب اكثر شي لجين لان لسانها عسل وي الكل

شفت بابا اشرتله وعرفته على استاذي وكعد يمه
والي عرفته ان وسام هو الي عازمه لان وسام اله معرفه بي

بعد ما صار اليل وخلصت الحفله صار وقت الزفه
للفندق .. اني اخذت سيارتي والبنات و هل مره احمد هو الي يسوق هرج الدنيا بل هورن والركص والاغاني باعلى صوت

وصلناهم للفندق ورجعنا حتى ما نزلنا مع الاسف
اجينا وتعبنا انفسنا .. وبعدها رجعنا للبيت

وييي رجعنا هلكانييين بس نريد نلوح الفراش
كلها نامت من وقت .. وثاني يوم كعدنا متأخرين

وسام بقى بل فندق يوم ثاني .. وبعدها اجوا
نفس كل عرسان نتلكاهم ونذبح على رجلهم فداء وعزمنا ناس هواي ونفس اللغوه

صار العصر واني اسر ولجين ما شايفتهم
لان اشتغل وي البنات والهوسه لهتني عنهم

دخل مهند عصبي ويجر بـ لجين
"بنتج ما تعررررفييين تستررريهاااا .."
ما رديت بس استغربت شبي هذا عافها وطلع سالت احمد
كال كاعده بنص الزم وما لابسه لباس .. يوووه عبالي اكو شي

صحت لنور تاخذها تلبسها .. حتى ما ادري بيها وين ذابه لباسها بنت الاوادم بيها حراره كل شوي شامرته

اخذتها نور وراحت فوك .. لبستها ورجعت
اني بعدني ملتهيه واغسل بل مطبخ

منا لمن كفوا الناس طاح حظ حظي
كمت امشي صفح .. احس ضهري انقسم نصين

ومنا اسر ولجين ما شفتهم كل شوي اذبهم لو على عمتي او على نور .. ولجين وكحه موتتهم ما تكعد راحه

عبالك شاده برجليها محرك .. ولا تثبت افتر تفتررر
جيت اكتلها من اجت لهنا تخبلت عليه وما سيطرت عليها

.. البيت جان ضجه وصوت عمامي بل صاله يسولفون .. ومياسين خطيه اسوي جاي وعصاير هم مبتليه حتى اطفالها ما مداريتهم ولو هي سباعية

عدلت نفسي زين ودخلت للصاله.. باوعت على عمتي
.."عمه وين اسر ولجين .."
اشرتلي على اسر .. كان كاعد بحضن ابو
سالتها .."لعد وين لجين شو ماكو .."
ردت عليه .."والله ما ادري شلعت كلبي .. تالي اخذتها شمس بنت مياسين .. شوفيها وين تلعب .."
ردت اطلع صاح عليه بابا وعمو
.."وين شام كعدي ما شفناج اليوم .."
رديت .."تعبت من الصبح ولسا .. "
وسام .."اذا الي ما تتعبين المن اريدج .."
ابتسمت واحس كلبي يعصرني .."تستاهل كل التعب حبيب قلبي .."قصص وروايات عراقية كرار صلاح
ابو مهند .."كعدي يا عمو ليش واكفه .."
رديت .."لا بالي يم لجين ماكو .."
رد .."شعليها تلعب وي الجهال عوفيها واكعدي .."

ما رديت عليه .."اشوفها واجي .."
عفتهم وطلعت .. دورت البيت كله ماكو تالي سالت مياسين كالت تلعب وي شمس بغرفتي رحت لغرفتها ما كانت مموجوده حاجيت شمس .."شموووسه وين لجين حبيبتي .."
كالت ما ادري جيت اكتلها .."ولللج شنو ما ادري غير جانت تلعب وياااج .."
ردت عليه بنت ابن عمي الجبير هم بعمرهن .."عمه تعاركت هي ولجين وزعلت لجين وصعدت فوك شفتها .."

خزرت شمس وطلعت بعصبيه صعدت فوك بسرعه
متحلفه بيها ما تكعد راحه بس تفتر موتتني .. نوب فوك محد موجود شعندها صاعده .. واني على الدرج امشي وادردم

رحت للغرفه الباب كان مفتوح على النص .. دخلت للغرفه
اباوع الكاع كلها دم صدت عيني على لجين ممدده والدم منها نايمه كانها اميرة .. ووسط الدم ..

تقدمت وعيوني مفتوحه بكل وسعهم احاول اصدك الي شفته ما استوعب .. اريد صوتي يطلع ما اكدر .. كعدت بل كاع
اتلمس بوجها اميرتي هيج صاير بيها كنت اشوفها اميرتي مو بنتي كانت صديقه وبنت كنت افكر شلون تكون حياتي اذا كبرت شنو اجيبلها وشسوي الها وافكر بمستقبلها

لزمتها وخليتها بحضني وايدي ترجف .. اريد اسوي رد فعل ماكو حجيت يم اذنها بهدوء وصوتي يرجف ..
"ماما لجين حبيبي كعدي يله ماما تسمعيني.. لا تعوفيني بعد امج انتي كومي لجين لا تسوين بيه هيج .. ماما لجين تسمعيني
يله حبيبي خلينا نرجع لبيتنا .. ماما تسمعيني فدوه اروح لطولج كومي لا تحرميني من ريحتج يله كومي لا تعوفين امج منو الي بعدج هااا منو .."

اتلمس ببنتي وبوجها واشم عطرها احجي وياها
اريدها تكعد ماكو ما تسمعني .. ما متصوره يجي هيج يوم عليه ابد ما متخيله اخسرها هاي حبيبت امها المدللة ما تتركني وتروح هيج بسهولة ولا كانو بيوم كانت

عليت صوتي واني ارجف .." لجييين امييي كعدددديي يلللله كعدددي مااا تعوووفينييي فهمتتتي ما تعوفيني يله كومي خلينااا نروح لاسر يم بابا يللله حبيبتي .."
شلتها على كلبي وحاضنتها بكل قوتي ممصدكه الي تشوفه
عيوني ..

اسمع نور تحجي ووياها مياسين دخلن للغرفه على صوتي من شافتني صارت تصرخ وتبجي التم البيت كله عليه واني على حالي حاضنة بنتي

وسام يبعد بيه يريد ياخذها مني ما انطيته مجال
"عووووفهاااا عووووفهااا الييي يتتتقرررب اذبببحه وخررررو من بنننتي هسسه تكعددد اني اعرررفهااا تسمععع الكلام.
باوعت للجين واحجي .." مووو ماما مووو حبيبت كلب امج يله كووومييي سمعي كلامي لااا تسووويننن هييج بامج يله ماما لا تحركين دميي كوميي يللله .."

البيت كله يصرخ ويبجي واني مجلبه بلجين
واصرخ واحجي ما قبلت احد ياخذها مني ابد ما انطيتها
لزمت بيها بكل قوتي .. انجنيت بمنظرها الي يقطع القلب

اتمنى هذا حلم واصحوا منه اتمنى اكعد والكاها هي واخوها يمي ويبوسون بيه من الصبح ولجين تبعد اخوها وتحجي عليه لان ياخذ مكانها

اتمنى ارجع بيهم للبصرة وما اجي لهنا ابد
اتمنى ما رجعت علاقتي بهاي الناس اتمنى ما دخلت بغداد
بعد ما طلعت منها واتمنى واتمنى واتمنى بس تبقى امنيات صعب تتحقق صعب نرجع للزمن ونغير الي صار صعب

كل هذا مو مهم المهم بنتي حبيبت كلبي عافتني وراحت
غابت روحها وبعد ماكو لجين بحياة شام بعد ماكو بنت لشام
ماكو الي ينور حياتي ودنيتي .. راحت بنتي صديقتي اختي كلشي بل دنيا كانت بالنسبة الي وخسرتها كانت روحي من الدنيا هي لجين .. ضحكاتها وكلماتها العفوية لساها ترن باذني وتقطع نياط قلبي بعدها كلماتها ببالي من تكول عفوش لو احبش لو من تكول مامي .. لو من كانت تحن عليه من تشوفني تعبانه ونايمه تسكت اخوها رغم هي نفس العمر ويا بس احسها تفهم اكثر منه اوووف يلبنات ويا حنيتهن كانت من اوكلها هي هم تسويلي لكمه وياها وتكوم لحيلها تخليها بحلكي وتبتسم بوجهي وهي تكول ."هههمممم .."
شكد نقيه راحت لربها بعد صارت عند الجليل
بس بعدني ما اريد اصدك اتمنى يكون حلم واكعد منه

كنت راصتها بكل قوتي واحجي واصرخ وما اخلي
احد يمد ايده ابد اخر شي لزمني وسام ومهند واحمد

اخذوها مني ونزلوا بيها .. طلعت وراهم اركض واني ناسيه روحي بدون حجاب وصلت لحد باب الشارع واصرخ عليهم لحتى يرجعونها لحضني

كعدت بل باب على ركبي واني ابجي
منظرها ما يروح عن بالي ابد منظر يقشعر له البدن

والدم لسا بيدي

بس نور حملت نفسها المسؤولية وتبجي وتكول اني السبب اني لان اني وصيتها عليها اكثر من مره هي وعمتي ام مهند
قصص وروايات عراقية كرار صلاح
عمتي ام مهند كلبت الدنيا بل عياط والصريخ
اني اخذني رضا للغرفه وكال لمياسين تبقى يمي

اني بعدني ما مستوعبه صرت احجي وي مياسين وصوتي يرجف وابرطم بشفافي .."اريد بنتي اريدها يمي مياسين شلون كليلي شلون تعوفني مساع جانت يمي تلعب مثل الورد
شلون هيج بلمح البصر راحت روحها للسما مياسه اكو هنا ناااار نااااار تسعرررر بيييه ناااار. تحرررركنننني
وللللج ماماااا شلوووون تعوووفييينييي شلوووون فهميييينيييي يعنييي حتى انتييي تردييين تعوووفينيي
ولللج شبسرعه مااا شبببعت منننج بعدددنيي

اللهيييي ليييش تحرررك كلبييي لييش تحركني
كل يوووم ربييي كلللشييي تحمللللت اله بنيتييي كلللشي قبلللت اله هااااي قطعت كلللببيي اللللهــي اطططلللبهااا منككك اقسم عللليككك بعزك وجلالللك ترجعلللي بنتي
اقسم عليييك بمحمددد رسولك وخاتم الانبياااء
ربييي نخيييتتتتك تردلييي بنيييتييي نخيييتك وطلبتتتك
لا تررردنييي ربييي لااا تررردنييي فدوه اررروح الللك ربييي للليييش هيييج للليييش هيييج

يصير بيييه هااا للليييش تلللجم كلببببي بيهااا
زييين للليش ما اخذذذتنييي بدالها ربي بعدهااا صغيره
بعدها والله صغيررره .."

كنت احجي ولامه نفسي وصوتي يطلع من نص
كلبي انمررردت مرد ما اتحمل هيج

اعرف بعد هذا هو ماتت بنتييي اعرف بعد ما اشوفها
بعد صارت تحت التراب اعرف كل هذا بس من حلات
روحي طلبتها من الجليل ردت يرجعها الي دعيته بكلب ملجوم وروح محروكه .. الغصه ماليه كلبي على بنيتي حبيبت كلبي ...........

يتبع..........

قصه جريئة لفتاة تتعرض للتحرش و.............



#تكملة بارت 39

شام :
لجين كانت صاعدة على المعرض لان من واكعه هيي ووياها لعابه كانت مخليها فوك .. فـ من واكعه انضربت بحافة الجربايه كانت حديد هل جربايه .. وهي مضروبة براسها وصاير عندها نزيف .. تخبلت شصعدها لان كنت
احذرها ما تصعد لهناك ولا تلعب بس هي ما تنرد ابد وكحه
مخليه طبله وصاعده فوك المعرض يمكن من رايده تجر اللعابه ما متوازنه وواكعه فـ وكعتها صايره بحافة الجربايه
تخبلت ليش محد سمع صوت او محد صعد وشافها كمت الوم بيهم واعيط عليهم كلهم .. كمت املخ بنفسي
منضر الدم ما يروح من بالي وعيونها كانت مفتوحه ما مصدكه الي شفته ابد اريد استوعب ماكو

ما هديت ولا سكتت ابد كلها حاولت تسكتني وتهديني
بس اني فقدت بعد ما سيطرت على نفسي
قصص وروايات عراقية كرار صلاح
للصبح البجي والصايح ما سكت ولا هداء
من رادوا ياخذوها يدفنوها هنا اني ملخت نفسي
واصرخ بكل قوتي وابجي واتوسل ياخذوني وياهم

بل كوه اقتنع بابا اني خلصت الطريق كله ابجي وما مصدكه الي صار بلمح البصر انكلبت حياتي وانوخذت وردتي
بسرعه راااحت عني بسرعه فارقتني ما شبعت منها

دخلوها للمغيسل طلبت اني اغسل الها
كنت اغسل واحجي بهدوء وياها .." روحي يمه بل سلامه يا روح شام روحي لربج ولا تخافين ما اتركج لوحدج هم اجي يمج والله ما اتركج .. اني اعرف تخافين من الظلمة بس هسه راح ترحين للرحمان وما يتركج واني هم ما اتركج اجيج وابقى عندج حبيبتي انتي .. ولو زعلانه عليج لان عفتيني بس كلبي ما يطاوعني اعوفج لوحدج .."
بست راسها وكلبي يتكطع وحق رب الكعبه احس
يتكطع احس داخلي مثل الخراب ووجع وصراخ واهات وعبرات
"نامي ييمه عسى نوم الهنا نامي يا بعد كلب شام .."

اباوع الها
يماااي يا روحي الي احسها تطلع مني بشوفتها

كانت زهرة متفتحه وهيج بسرعه ذبلت ووكعت
بدون سابق انذار بسرعه بسرعه

كفنوا بنتي ودخلوها للقبر واني كاعده بل كاع
اباوع شلون انهال التراب عليها وبقت جوه التراب

اكول لنفسي شلون اعوفها هنا لوحدها ما اكدر
كلبي ما يطاوعني اتركها بهل وحشه والظلام
شلون راح تبقى وحده بنتي ترفه وما شايفه
بس الراحه شلون بيها اصلا اني الي شلون
بيه شلون راح انام بدون ما احضنها شلون
انام بدوان ما اسمع كلمة احبش مامي
شلون تمشي حياتي بعدها .. ومن ارجع
شكول لاسر اذا سال عنها شجاوبه عفت اختك
جوه التراب لوحدها وظلمة شللللوووون وشلوووون

اندفنت بنت شام وكلها تبجي وتجر بيه
اني بس كاعده بل كاع وعيوني تكت دمع بدون صوت
تعبت من الصريخ تعبت من فكره انو راح اعوف بنتي هنا

بقوا نص ساعه ويردوني اكوم ما قبلت ولا اقتنعت
وكلها تحجي عليه وتكوم بيه وتكلي هذا اعتراض على قدر الله

ثرت عليهم واصرخ باعلى صوتي وما اقبل
اكوم من بنتي

شكد بقوا يمي واني على هل حاله وما اقبل اكوم منها
اخر شي مهيمن ووسام واحمد ورضا وليث وعمو وبابا
كلهم يجرون بيه ويحاولون يبعدوني بس ما اعرف هل قوه منين اجتني صرت ادفع واحاول اخليهم يتركوني ما سيطروا عليه واني بس صريخ وبجي واكلهم عوفوني ما اروح منا ما اتركها والله ما اتركها عوفوني وروحي

وسام كللهم ارجعوا اني ابقى يمها وارجعها بابا ما يقبل ويريد ياخذني يكله لا تموت كمت اصرخ بصوت
"ياااا ررررب مووووتتتننني ااااخذذذ عمررري انت
مو اخذذذت بنتتتييي اخذذذنييي وياااهااا موووو طلبتهاااا
منككك وما رجعتهااااا الييي اخذذذنييي وارررحم بحااالييي
.."

صرت اضرب بنفسي بكل قوتي وابجي
اريد اموت اريد اروح لبنتي شلون اعوفها ما اكدر

بقوا يمي اخر شي وسام ومهيمن كالوا روحوا وعوفوها
وفعلا راحوا وبقيت اني ووسام ومهند هم بقى ما قبل يرجع
بقيت على هل حاله فترة كلش طويله
الشمس بعيني ووسام ومهند كاعدين بعيد عليه
ما اهتميت لحرارة الشمس ولا لاي شي

اريد بنتي بقيت كاعده واسولف وياها مره ابجي
مره اسكت مره اصرخ بحركه ولوعة كلب

طلعنا من الخمسه الصبح ودفناها
واني لسا مكابلتهها وكاعده

وسام كل شوي يجي عليه .." خويه شام لا يصير بيج شي كومي منا خليني اخذج للامام علي ع
يله خويه واسر هسه يدورج ويبجي عليج خطيه يله كومي حبيبتي. ."

ما اسمع اله اريد بنتي ما اريد اتركها لوحدها
صار الغروب واني على هل حاله وكاعده كبالها
ووسام كل شوي يجي يتوسل اكوم وما اسمعله ابد

ما نايمه من البارحه ولا شفت النوم وتعبانه من الصريخ
البجي واللطم

اخر شي اتذكره صار اليل وضلمت واني بعدني مكابله قبر بنيتي ما اعرف نمت او فقدت الوعي

بس كعدت واني بمستشفى والمغذي بايدي
ووسام كاعد كبالي وغافي .. استوعبت الي حواليه
وتذكرت لجين بجيت واني اخلي ايدي على وجهي

اجا وسام يهدي بيه ويحجي وياي ..
"وسام احلفك بروح بيبي بغلاتي عندك اخذني الها .."
رد "ماكو ما ارجعج ما رايدينج حتى نوديج مره ثانيه .."
"وسام اخذني الها ما اعوفها لوحدها اذا ما تاخذني اكتل روحي ..
برطمت شفايفي .." وسام لا تعذبني خليني اروح يمها فدوه عليك بروح لجين اخذني .."
من كلت هيج زدت ببجيتي واتوسل اله
وسام .." اخذج بس بل اول تاكلين يله نروح .."
رديت .." ما اريد .. اخذني للجين .."
ما رد عليه راح جاب اكل واجا

يجبرني اكل ما اتقبل الاكل ابد احسه مر
بحلكي .. هو تعب من الملحه عاد كومني
اخذني ازور الامام علي عليه السلام .." يا علي بنتي بامانتك .. بنتي اليله يمك عفتها يا علي بامانتك .." احجي واناشغ قصص وروايات عراقية كرار صلاح
شكد بجيت وشكيت ودعيت جيت اتخربط مره ثانيه

من ارتاحيت شويه طلعت وسام ومهند كانوا منتظريني
صعدت بل سياره من غير كلام واحس راسي يدور بيه

من فتنا من المقبرة "اوكففف وساااام اريييد اودددعهااا لا تحرمنننيي فدوه وساام .."
وسام ما قبل ومشى بل سياره اني من كد ما تخبلت
السياره وهي تمشي فتحت الباب

بسرعه وكفها وسام ويحجي عليه لان ردنا نسوي حادث
من وكفت السياره نزلت بسرعه واريد اركض باتجاه المقبره اصلا ما اندل بس هنا ريحت بنتي صارت منهم بعد

وسام ركض وراي وكام يحجي عليه
ونوب اني كعدت بل كاع كلتله اله توديني للجين يله اطلع وسام والله بس اشوفها واطمن عليييهااا فدوه والله كلبي يحركني عليها

تنهد واخذني الها
كعدت يمها بل نص ساعه ما اكدر ابعد عنها ابد
ولا لحضه

وسام بعد ما تحمل اخذني غصبا عني والسيارة كبل
لبغداد اني الطريق كله صافنه
عود اني ما نايمه بس النوم ما يجي بعيوني ابد

وصلنا للبيت المغرب تلكوني يبجون ويشبكن
بيه واني منا روحي رايحه .. عمو ابو مهند من شافهن
عاط بيهن واشر لنور تاخذني منهن

اخذتني لغرفة مياسين وهي تبجي وياي
اني عفتها وصعدت للغرفه الفوك

كعدت بل مكان الي ماتت بيه ودموعي تجري
تمددت بمكانها واكول ياريت لو كنت محلها ياريت لو
انوجعت كبل وجعها ياريت

لحد ما غمضت عيني ونمت بمكاني

من صدك انطفيت من بعد خسارتي اللجين كلها
تحاول وياي بس ما استجاب كنت على طول صافنه وشاردة بغير عالم اي كلمه ما احجي وفضلت البقاء وحدي وحتى اسر ما عدت اريد اشوفه حبست روحي فوك

ويوميه اشعل شمعه بمكانها الي ماتت بي واصفن
لو ابجي لو احجي وياها وكانوا كدامي .. انكسرت بعد الي صار الحياة صارت اكثر صعوبة

كنت ادخل للحمام اشبع بجي واطلع بابا يوميه يجي
يمي يكعد ويتوسل انزل يمهم واكل بس ما كنت ارد عليه
وبس ساكته كل يوم الغروب احس بوحدة وحاجة الها ما اعرف ليش هيج يجيني حنين الها بهيج وقت اتذكر لجين
واشبع بجي عليها يوميه البيت كله يلتم ويبجي على صوت صراخي وكلامي احس روحي يوميه تطلع مني وترجعلي
بعد للاربعين اسبوع واحد

نفس كل يوم كنت نايمه بل كاع وصافنه بل حايط
دخلت نور .." شام استاذ محمد جوه يريد يسلم عليج .."

ما رديت
نور .." شام عيب من الرجال هاي ثاني مره يجي ويسأل عنج وما تنزلين كومي حبيبتي .."

ما رديت عليها
بس لبست حجابي ونزلت جوه .. كانت زوجته هم موجوده
من شافتني اجت عليه شبكتني وتبجي

بعدها الشيخ سلم عليه وكال البقية بحياتج
بقيت كاعده شويه وكمت .. من طلعت صدت عيني
على اسر .. هو من شافني بقى يباوعلي وعيونه
مليانه دموع .. انكسر كلبي بشوفته نوب هو نسخة من لجين يا الله يا عيونه مثلها مليانه برائه مثل نظرتها من ازعلها

احترك كلبي .. عفته وصعدت فوك واحس جمرة بصدري
صار اليل واني على صفنتي ونفس حالتي ومن شفت
اسر تذكرتها كانو لجين كدامي

اخذت تلفوني وكمت طلعت بل سطح .. على طول
هاي المده اطلع بل سطح من ساعه ٢لحد ما يطر
الفجر يله أدخل للبيت .. اشبع بجي واتذكر لجين

كعدت بل كاع بنفس مكاني
صافنه بل سما وعيوني مرفوعة لفوك والدموع تنزل
وحده بعد الثانية وبسرعة عبرتي مخنوكه بصدري
مشغله قصيده لباسم الكربلائي اسمها شلون اصبر على الآه

كنت يوميه اسمع هذي القصيدة واشبع بجي
ونحيب لسا ما مصدكه بنتي راحت وتركتني كل
يوم اتذكر منظرها والدم الي مليانه منه المصيبة
الي بداخلي محد يعرف حجمها محد يعرف شديصير
بيه من الداخل خسارتي كبيرة وماكو شي يعوضها ماكو

كنت اسمع واناشغ بصوت مسموع ولامه نفسي
وحاضنتها احس حضني فارغ بدونها كانت دموعي
تجري وروحي تحترك حرگ

سمعت صوت طبه مال رجلين رفعت راسي
كان مهند .. اباوعله طفر على السطح مالتنا

دموعي بعيني واباوعله شعنده اجا وشيريد مني
بقيت اباوعله .. اجا عليه كعد كبالي وهو ساكت

مد ايده بتردد لوجهي ومسح دمعتي .. بعدت وجهي
منه وردت اكوم .. اول ما وكفت صار بوجهي ولمني
لحضنه كمت ارجف ما اعرف ليش وهو اسمع بجيه

يا الله ما اعرف شصار بيه اول مره اسمعه يبجي
بصوت مسموع هذي اول مره اسمع مهند يبجي
بهل شكل .. اجذب اذا اكول ما انكسر كلبي