صه نملك الي نحبه
لازم نقاتل علمودة مهما كان
.....مابيه حيل اقاتل
علمود احد
....لعد راح تخسرين والي راح تخسري هوايه
وابتسم بوجهي
كتله
....اني اشكرك لانك دائما متواجد بحياتي وساعدني ومن تحجي ويايه تريحني بكلامك
....واني موجود دائما
....اتمنى اشوفك مزوج ومرتاح
...هههه
نزل راسه وكلي
....بعد فات الوكت
.....لا بعدك شاب صدك تحجي
.....الشباب شباب القلب
....اي وكلبك شاب
....لا وضحك يله دخلي جوه وهاي الجوة
خبليها
انت ست الكل هنا لتخليها تشوفج مهزوزة
هاي الحرب خوضيها موعلمود كميل علمودج
انتي حتى لادائما تحسين الدنيا تجي عليج وظلمج
هالمرة انتي ظلمي وتعاي على الدنيا
ابتسمت
وكلامه انطاني فد طاقه عجيبه فعلا دائما اخلي
الداير مدايري يفرحون بكسرتي ويضحكون على وجعي
واني كلما زاد حملي اركض وانهزم واضم راسي
رديت وباوعته لان جان بعده يباوعلي
كتله
.....كلامك صحيح
....مو
....اي
....تعال نتريك
.....يله نتريك
دخلت جوه ومحمد بصفي يمشي
وهاي المسلوعه واكفه باب غرفتها
ماباوعت عليها ودخلنا للمطبخ ومحمد كعد على الميز
وكام يلعب بتلفونه واني صحت ام ياسين وحضرنا الاكل
وكعدنا نتريك اني ويوسف ومحمد وام ياسين وفيصل هم اجى
والمسلوعه تفتر منا ومنا مثل المنبوذة
محد يعبرها
ويهتم الها
وبعدها كملنا ريوك وكل واحد راح لشغله
واني صعدت لغرفتي وبدلت ملابسي وخليت مكياج
ونزلت كعدت بالصاله وفتحت التلفزيون
وحطيت رجل على رجل وابني
يلعب كدامي والمسلوعه بغرفتها
للظهر
اجى كميل للبيت ودخل
وشافني هيج كاعدة واكلب بالتلفزيون
ومااهتميت من اجى
ولاباوعتله بس باوعت المسلوعه فتحت الباب مالتها وكامت تراقب
كلي
...ها مارحتي
..تريدني اروح
.....لا
...اي زين
وباوعت على التلفزيون
وهو بقى يباوعلي وطلع من الصاله وراح للغرفه مالته
واجى محمد كعد بالصاله ويايه وطلعت فلم
مصري قديم وكعدنا نتفرج اني ومحمد
واجى كميل كعد يمنا
وضايج جان
وصاح شيرين
اجتي
....ها حبيبي
.....تعاي كعدي هنا
.....اي حبيبي تدلل
اجتي كعدت واني كل شويه احجي ويا محمد
وراها كمت كلت
.....جعت كلش اروح اكل
وطلعت من الصاله
ورحت يم ام ياسين
ومن بعيد صحت محمد كتله
...محمد تتغده
....اي اتغدة
ورديت صحت
.....يوسف ماما تعال دناكل عمعم
ام ياسين كالتلي
....هاي تريدين تخبليهم مو
..اي
....عفيه عليج هههههه هاي السلبوحه تستاهل شكد مكروها
....هههههه
....اي بالله اليوم دكل جيبيلي مي
...كتلها مجيبين مي لنفسج عد راحت كالت لكميل كاللها اي صدك مجيبين مي لنفسج
.....اي زين
تغدينا وهو مااكل وهي هم
بس العصر صاح على فيصل وام ياسين هم
كاللهم يوسف سوله الغرفه الصغيرة الفوك اله
...كتله ليش يوسف ينام يمي
....مترهم ينام يمج بعد
....ها
....اي
وضحك بااستهزاء
وكله لفيصل
.....فيصل باجر ترتب الغرفه
...اي تدلل
رديت كتله
....كميل اني مراح ابقى هنا كم يوم واروح فلتعب نفسك وتصرف فلوس على الفارغ
....لاحول ولاقوة الابالله
اجتي هاي شيرين جان دكله
.....هي تريد تروح علويش مبقيها هنا
التاف عليها
وكاللها
....شكلتي
...كلت انت على شنو مبقيها هنا
....وانتي منو اخذ رأيج وليش تحجين اصلا روحي لغرفتج
....انت ليش هيج تحجي ويايه كدام الي يشتغلون يمك
....هذوله الي يشتغلون يمي هذوله اشوفهم اهلي
احجي بااحترام ولتحجين بشي بعد يله روحي
منا
ضحكت وكيفت بيها تستاهل حقيرة
خوش ترزلت
وهو كال لاام ياسين وفيصل
....دكدرون تروحون هسه
ولمن راحو
كمشني من يدي
وكلي تعاي
وجرني قوي
..... كتله شبيك
....مشتاقلج
....والله
....اي
.....اني اريد انام
....كمتي تلعبين ويايه
...لا ماالعب وياك بس اني لازم اصير وحدي مرتك ومحد يشاركني بيك
ابدا
ضحك
....وانتي
....اني شنو
...وحدج
قبل ميكمل
....اني كعدت هنا لان مجبوره و لان اخاف من الي محاوطيني بسبب شغلك ولان اخاف من
احد يأذيني ويأذي ويوسف علمود هيج راح ابقى
....شنو الي مسويته الج ها كلشي سويته الج
....انت تحبني
...اني ماكلتلج بس قدمتلج كلشي
انتي لو جنتي الي رايح اعيش بيها بنعيم
لو انتي موتي بكد ماانتي بسيطه شكد مجان دربج صعب
.....كلي احبج ماسمعتها منك ابد
...شنو
....كلي احبج
مجاوبني وراح من يمي وراح دخل للغرفه
و المسلوعه طلعت من الغرفه وراحت كعدت بالمطبخ اظاهر كاللها طلعي
بقيت كم يوم اني اتصرف بهاي الطريقه واني بداخلي شي ثاني
وابتعد عن كميل بالساني وبكلامي النوبات يصير جارح
والمسلوعه اغلب الاوقات من كميل بالغرفه هي بره الغرفه
وتمشي وذب حجي بالبيت
واني مااهتم الها
وجان قربي منه نفس بعده
هو موجود وماموجود
اني اذا اصارح نفسي راح اكتشف انو اني داتنازل وداضحي
باايامي علمود كميل المفروض ماابقى يمه
بعد مازوج بس مداكدر ابتعد
احساسي اله ديجذبني كلما احاول اهرب منه
برغم انو اني خايفه من باجر واني وياة
سمعت الباب تنفتح ودخل كميل وجان مبين عليه التعب
اجى كعد وكلي
....وين يو

سف
....بغرفته شبيك كميل
...مابيه شي
وصعد على الجربايه ونام وكمشني من يدي ونومني على يدة وشويه وكام يتنفس قوي عرفت بي نام
غطيته وبقيت كاعدة واباوع عليه
لحد الفجر
سمعت الاذان كمت ااتوضيت وصليت وحسيت براحه
كلش جبيرة
واني على السجادة واجى كميل كعد كدامي
وخله يده على راسي
وباوعلي
...كتله شبيك اليوم
....مادري ضايج
...تعال هنا نام على رجلي
تقرب مني وخله راسه على حضني
....شنو مضوجك
...كلشي
...مثل شنو
...انتي اهلي شغلي هاي البومه الي جوه
كلشي
كمت العب بشعره على كيفي
كلي
... اكره شعوري من اني يمج واحس نفسي طفل
احس روحي صغير
....ياريت لو نرجع جهال
...ياريت
...كميل اني موقصدي أذيك بس انت تأذيني
....لتحجين شي خليني نايم هيج مرتاح لان موكل مرة اكدر انام هاي النومه
......بان اني بعد ماعندي شي ضامه عليج خليها بالج
.جر يدي وباسها
وسحب نفسه وكام من حضني كتله
.... وين تروح
.....انام على المخدة مالتج
ضحكت
وباوعته راح نام على المخده مالتي كمت رحت يمه وحضنته وهو مندار وبقى كامش يدي
وحسيت الصبح
والدنيا مشلوشه بالبيت
نزلت جوه ركض
كتله لمحمد شكو
.....كميل ماكو
...وينه
...ماادري
....شنو متدري
...تلفونه مغلق وسيارته موجودة بالكراج
...يعني شنو
.....يعني مادري
....وين راح لعد
...هو كال
..........

ارجوك ياعاشقي
لاتحجز تذكرة
ذهاب بلاعودة
عد الى ميناء قلبي
فأنا رضيت بكل سيئاتك
لكي ترضى انت ياعمري
...............
يتبع ....
#الكاتبه #روجمان

......البارت الثامن عشررررررر ......

شنو متدري شنو يعني
...تلفونه مغلق وسيارته موجودة بالكراج
...يعني شنو
.....يعني مادري
....وين راح لعد
...هو كال الج شي كال راح اروح لمكان
.......لا هو جان يمي بالغرفه بس من كعدت مالكيته
سكت محمد وبقى مايحجي
وراح كعد على الكرسي
....راح تكعد انت روح شوفه وينه وين راح فدوة
....وين اشوفه وهو محد شافه ومحد دخل للبيت
وهو طالع بدون سيارة وتلفونه مغلق وين اشوفه
كوليلي
.....مااعرف دور عليه اكلب عليه العراق كله لحد ماتلكي
سكت وماحجى شي وكال
.....هسه اروح
....شتعرف محمد
....مااعرف شي
....ماتعرف وين راح كميل
....لو اعرف اكعد هاي الكعده يمج
....اني خايفه عليه محمد الله يخليك رجعه الي
غمض عينه وفتحها كلي
....يرجع ان شاءالله
...اريدك ترجعه من صدك
وكف بعصبيه وكام طلع
للحديقه وسمعت صوته ديعيط طلعت شفته ديصيح على الحرس ويكللهم
شلون كميل طلع من البيت وانتو ماشفتووو
وهما يكولوله جنا كاعدين بس ماشفنا
من طلع
وصعد سيارته ومشى ورا جان فيصل بالسيارة
مالته
يمشي
وراحو مااعرف وين
دخلت جوة وكعدت وخليت يدي على راسي
والخوف امتلكني
وجان تجي شيرين
وكالت لاام ياسين
...اريد ريوك
باوعت عليها وكتلها
....انتي كميل متعرفين بي وين وكاعدة دورين ريوك واحنا هم فوكاها نخدمج خدمي نفسج بنفسج
....وانتي شنو دخلج
....روحي منا احسلج لااطلع ضيم كلبي بيج
.....ههههه حاولي
....اي زين لعد اذا ماكتلتج كتله وخليتج مكسرة وكاعدة
الااطلع اني موبدريه
....بدريه منو
....اني ليش متعرفين
....كميل حبيبي كلي اسمج بان وكتله عوع شلون اسم
....وشكلج كميل
...ضحك
...متأكدة
سكتت
......موعرفت هاي مواخلاق كميل
ولعبت بشعرها ودارت وجهها وراحت
بقيت انتظر محمد وبقيت انتظر خبر
وعبالك عندي فاتحه بلا ميت
وصار الظهر ومحمد ماكو وصار العصر وماجاب خبر عن
كميل
وحسيت النفسك ضاق بيه واحس عطر كميل
بالبيت ويلحكني
وصارت ساعه ب11بالليل
وسمعت صوت سيارات رحت ركض عبالي اشوف كميل
بس ماشفت كميل جان هذا محمد وفيصل
رحت ركض
....وين كميل
.....مابي شي موجود
...الله عليك وين كميل خوما بي شي
....والله زين بس عنده شغل كال كم يوم واجي
....خلي احجي وياه خابره
..هو عود يخابرج
....باع يعني بي شي ودتكذب عليه معناته
....اوف اليوم مراح تفتحين ياخه مني الا تحجين وياه
طلع تلفونه
من جيبه وخابر وشويه وكال
....الووو هلو كميل هاي بان تريد تحجي وياك
اكلت راسي
هيانها
اخذت التلفون ويدي ترجف
.....الوووو كميل
...ها كلبي
دك كلبي بسرعه
...يسلملي كلبك
....وينك عيوني انت اليوم متت الف مره
....عندي شغل كم يوم وارجع
كمت اتمشى ورحت وكفت بعيد
......وين رحت تعال ارجع
....اشتاقيتيلي
....هوايه وكلبي صاير دم عليك
.....لديرين بال ارجع
....خايفه عليك
....وكميل هم ينخاف عليه
....اي اني اخاف عليك من الهوى
....اي هيج اريدج عسل
...شوكت ترجع
...مااعرف بالضبط بس ماتأخر
...كميل احبك
.....اني مشتاق بس ارجع واشبع منج حضنات وبوسات
.... بس تعال ارجع
..... كون للموت تبقين بحضني
.....فدوة لاجيب طاري الموت ترة اتخبل بالله
اني ماعندي غيرك اموت بدونك
.... عمرج طويل وتبقين كل هذا العمر ويايه
لحد مانعجز
..... ياريت اني صعب اصبر لحظه بغيابك فدوة
....دربالج على نفسج ودربالج على يوسف ومحمد يمج اي شي تحتاجي كوليله والي يكوله سوي
وشيرين لتهتمين الها اني ارجع واشوف شسوي وياها
....كميل عيوني خوبن تريد تسوي شي
....اني اريد اسوي هوايه اشياء بس علمودج مداكدر اسوي شي
.....اوف ياكميل شوكت راح توكف هاي الدنيا الي دتفتر بيك وماخذها بس قوه
غير الموضوع وكلي
...... بان
.... هاكمبل
.....احب احساسي وياج ومو بكيفي عنج اغيب
لان فراكج صعب وجودج برغم وجعه بس اهون هوايه
من دنيا مابيها انفاسج
.....ياالله ياكميل فدوة ارجع لتعذب كلبي
....ان شاءالله روحي نامي هسه وارتاحي وحلمي بكميل
تصبحين على خير
....تصبح على خير
كميل
...ها
....قبل ماتسد التلفون لتسوي شي يأذيك ولتخلي احد يأذيك
...انتي مو دكولين كميل جبل
....بس الدنيا مابقى بيها جبل
...لتخافين يله مع السلامه
...الله وياك ويحفظك الرحمان
سديت التلفون وبقيت واكفه وبرغم حجيت ويا كميل بس بعدني خايفه عليه
اعرف الدنيا غداره
التافيت شفت محمد كاعد على الكرسي ويباوع عليه
ابتسمت
ورحت تمشيت وكعدت على الكرسي وانطيته التلفون مالته
وكتله
...اشكرك اطمنت على كميل جنت كلش قلقه ولو بعدني بيه قلق
جان حاط اصبعه على خده
وساكت ويباوعلي
بعدين كلي
....الحمدلله اني هم مابقيت مكان مافريته لحد ماخابرني كميل
دائما يخليني هيج بقلق
وافتر ورا من مكان لمكان
......اني كل مرة اسئلك سبب حبك لكميل واستغرب ليش هيج هلكد تحبه وشيسوي تسكت
....ههههه اني هم استغرب شلون اسكتله ههههً
بس كميل جان موبس ابن عمتي اخويه
وصديقي وضلعي الي اذا وجعني ينكسرن كل ضلوعي
كميل هوا

يه سوالي اشياء
.....كميل غريب هههه
..... اي صدك ليش اضحكين كميل كلش غريب وكل تصرفاته مختلفه حتى شغله مختلف عقله مختلف يحسب كلشي قبل ميسوي حتى الكلام من يحجي يكون قاصده
ومايعتذر عنه واذا سئلي ودكوليله ليش هيج تحجي
يكلج لان هاي الحقيقه
......شنو الي راح يصير هسه
.....بشنووو
...اني مداكدر اوصل لكميل يوميه يبعد عني
بقى ساكت وكلي
.....انتي متاكدة تريدين تبقين هنا يم كميل
....انت كلتلي
....اني كتلج لضعفين بس اختاري الشي الصحيح
شوفي شنو الي يريحج
....اني احب كميل هوايه
....لزعلين مني بس قبل جنتي دكولين احب سعد هوايه
....صح بس الفرق بين حبي لكميل وحبي لسعد فرق
شاسع
كميل يلعب بااعصابي يلعب بكلبي كميل
مثل النار الي مااكدر ادفى بيها
بس سعد جان هاملني وتاركني
وعمره ماحسسني بلي احسه وياكميل
كميل يحسسني
بالغيرة بالاهتمام بالخوف بالامان برغم كلشي وبرغ الخوف الي داير مدايري بس احس بلامان طول مااني ويا كميل محد يلمسني لااني ولاابني
وحبي اله مختلف احسه شريان وينبض بيه
اني ماجنت احب من حبيت كميل عرفت شنو معنى الحب الحقيقي
ومستحيل بعده راح احب
.....نياله على هيج حب
.....تعرف محاجيه ويا هيج ابد وماكايلتله هيج كلام
...لعد ليش كلتيلي
....انت الوحيد الي تربطني بي علاقه اخويه واحترام
واني اقدرك كلش لهذا السببب من احجي وياك
كلش ارتاح واحجي براحتي
ولان اعرف كميل يثق بيك الدليل انت ويانه بالبيت
وكلشي تعرف

سكت وبقى يباوع على تلفونه وبعدها رفع عينه
،....واني لخاطرج كلشي راح اسوي
ولخاطر يوسف ولخاطر كميل اتمنى اشوفكم مرتاحين وسعيدين
...واني هم اتمنى اشوفك مستقر
....مااعتقد
....ليش
.....اكو هوايه اشياء تمنع راح ادخل انام مدخلين انتي
....هسه شويه وادخل روح ارتاح اليوم هوايه تعبت انت
...اي تصبحين على خير بان
.....وانت من اهل الخير
شفت محمد دخل واني بقيت كاعدة جان الهوى طيب
وبقى يحرك شعري وغمضت عيني
وبقيت اشتم الهوىً
واذكرت كميل من كلي هاكلبي
ضحكت
وبقيت صافنه وشويه
وسمعت صوت سيارات طبكن بالباب والحرس
كامو يعيطون
واني دخلت بسرعه جوه وسديت الباب
ومحمد اجى جان لابس بس البجامه
والتشيرات بيده
جان ديريد يلبسه
سحب السلاح جان على الميز الي بالمدخل
وطلع بلا مايلبس شي برجله
صحته
....محمد لتطلع
بس هو
فتح الباب وطلع بره واجى فيصل مناك اني بقيت
واكفه بالباب اباوع شفت سيارات واكفات بالباب
ونزلو كم واحد شايلين بيدهم اسلحه
واحد كام يصيح
كميل كميل
بصوت عالي
ويعيط ويحجي ويامحمد
ومحمد يكله ماموجود كميل مو بالعراق
تقدمت شويه
وبقيت ادعي الله واكله ياربي احمينا

خفت لايفوتون علينا للبيت ويقتلونه كلنا
صاح محمد
....سروان روح منا وهذا الكلب الي وياك بالسيارة
الجبان الا اكطعه واسوي وصل
....كميل وين كلي شنو نهزم
.....تعرف كميل مينهزم وكميل لوهنا جان كتلك
....لعد وينه
...مسافر
....باجر كميل اريده يمي لو لليل اسوي هذا البيت انقاض
....والله ياسروان ادفنك بيدي اذا لمست احد من اهل هذا البيت
..مشكلتي مو وياك مشكلتي وياكميل
...روح منا سروان احسلك
باوع على البيت وجان يشوفني وجان يرفع يده
ومحمد بسرعه باوعلي
وكلي
....دخلي جوه
دخلت بسرعه
وباوعت من الشباك وشفتهم صعدو بالسيارات و راحووو وبقى محمد واكف
واجى فيصل وكف يمه وجان ديكله شي
اجى دخل للبيت محمد
وجان دينهد وبيده المسدس
وطلعت مناك هاي شيرين
وجان دكلي
....كله من ورا وجهج الشر دروحي منا
باوع عليها محمد بعصبيه ولاعرفته عبالك مومحمد
وكاللها
.....فتحي حلكج مرة ثانيه حتى اترسه بارود
هي باعت بخوف وراحت لغرفتها وسدت الباب
بسرعه
وبعد ماطلعت
كتله
....تعال اكعدً
كعد ورحت جبتله كلاص مي
واخذه وشربه وبقى ساكت وراها كال
....اريد تلفوني
....وينه
...بلازحمه عليج جيبي بالغرفه لان داحس رجلي ثكلت
كلش
...اي هسه
صعدت لغرفته ودورت على التلفون
ولكيته على الميز اخذته ونزلت بسرعه
وانطيته التلفون اخذه من يدي
وخابر
وكال
....الووووو وينك كميل هذا سروان اجى ها
وسكت وكال
....لا ماسوى شي بس هدد منا لباجر بالليل اذا مااجيت
يسوي البيت انقاض
سكت لان جان صوت كميل ديحجي واصل لحد عندي
وكله محمد
...شراح انسوي هسه
راح تجي هسه يله انتظرك
وسد التلفون كتله لمحمد
...راح يجي كميل
...اي راح يجي
...خاف يشوفو بالطريق
...لا عنده حرس
بس صراحه انقهرت على محمد لان جسمه كام يرجف وكمش راسه
بس عجبني سَبْع مثل كميل بس سعد جان
جبان وجان مطلع عضلاته عليه كم مره ضربه كميل ماشال يده
وضربه وحتى محمد ضربه ماردله الضربه
بقيت كامشه كلبي وكاعدة
وين يله اجى كميل
اجى والحرس ركضو و فتحو الباب ودخل بسيارة
جديده ونزل يمشي على كيفه ولاخايف
ولامهزوز
جنت داباعه من الشباك ومن وصل يم الباب
ركضت عليه
وفتحت الباب
واول مافتحتها حضنته
وهو هم كمشني قوي وباسني من راسي
كلي
...باعيني بيج شي
رفعت راسي
....لا مابيه شي
...خفتي

...متت من الخوف
...اني موكتلج لتخافين من كميل موجود
... بس انت ماجنت موجود
سكت ودخل جوه وراح على محمد وشافه كاعد
كله
...محمد بيك شي
...لامابيه شي بس خفت لايدخلون للبيت
...سروان ميسوي شي بس حجي
... كافي لخاطر الله عوفه خلي يولي لو الا تموت واحد من عدنه يله ترتاح
.....مااعوفه
....لو داخل للبيت وقاتلنا كلنا
سكت كميل ونزع سترته وشمرها
كال كميل
.....سروان راح انهيك
.....كميل كافي كافي كافي شلون وياك
.....روح نام مبين تعبان
كتله
...خطيه هبط
باوعني ورد باوع على محمد
....روح ارتاح والصبح نحجي
كام محمد بدون مايحجي شي وصعد فوك
وكميل
كلي
..اريدج تسويلي جاي
....اي بعيوني
ابتسم الي
وراح للمطبخ كدامي وكعد وسويتله جاي
وكعدت بصفه جرني وباسني من كصتي
وجان يبتسم بس بي حزن جبير او خوف بي شي عكس الي ديبينا
وسمعت صوت باب نفتحت وشويه وجان تجي المسلوعه
لابسه روب كصير ابيض وفاتحه شعرها
وكالتله
....حبيبي اجيت اليوم متت من الخوف وبالي يمك
....لا مبين عليج وهاي شلابسه
....ملابس مال نوم
...ليش متعرفين احنا هنا محمد موجود ويانه
وفيصل وحرس ها لو دتستعرضين نفسج
....حبيبي لتغار
....منو كلج داغار بس الخجل لله
.....اكيد هاي بدريه كاعدةتعلمك عليه هواني شفت من زواجي
....ولا راح تشوفين شي روحي لغرفتج هسه
وباجر الصبح فيصل يوديج لااهلج ابقى هناك يمهم
....اريد ابقى يمك بعدني مشبعانه منك
.....ليش اني اكل حتى مشبعانه مني
....اي انت حلوياتي
باوعها وعوج حلكه ودار وجه وبدون ميباوعها اشرلها
بيده روحي
وهي كامت تتنعوص
....كميل حبيبي
....كتلج روحي مالي خلكج
كامت دردم وراحت للغرفه وسدت الباب حيل
وهو باوع بوجهي وضحك
وكلي
....اي شونج
...اني هسه زينه من شفتك انت زين وكاعد كدامي
اهمشي انت تتنفس حتى اني هم اتنفس
...هاي شنو هاي الرومانسيه اليوم يعني لازم اخليج قلقه عليه يله يصير لسانج هيج
....متعرف شكد خايفه عليك واعصابي تعبانه من كل الي ديصير
.....والله والله طول مااني عايش واتنفس مااخلى غير هوى ربج يطخج واحميج من نفسي انتي مرت كميل
ومرت كميل لازم تكون بغيابه بميت رجال
اريدج بظهري رجال وبوجودي احلى انثى
احلى مرة احلى حبيبه احلى زوجة
بس اريدج قويه ومحد يكسرج زين
...بس ميصير هيج نعيش
...وعديني دائما تكونين قويه
...اوعدكً
.....لتروح اليوم
...مااروح هاي الليله اكضيها يمج وبحضنج وباجر نسافر
...وين نروح لااربيل
....وهذا سراون
...راح يجي يبوس رجلي حتى اسامحه
وضحك بغرور ورفع حواجبه
وكلي يله
وصعدت وياه فوك وراد يدخل يسبح بس جانت ملابسه جوه
نزلت على هاي المسلوعه
ودكيت الباب
فتحت الباب وصعدت حواجبها الشيطانيه
وكالتلي
...شكو
....اريد ملابس لكميل
....ليش
....سبح
....خلي هو يجي ياخذهن
،...مو هو عصبي هسه اذا اروح اكله يجي يطيح حظج
وخرت من يم الباب وكالتلي
هاي الخانه مالته اخذي الي تريدي وطلعي
فتحت الكنتور واخذت ملابسه
وطلعت
ورديت صعدتله فوك شفته
واكف يمشط شعره على المرايه
ومن شافني دخلت باوعني بالمرايه '
وكلي
....اريد افتهم انتي ليش كلما دتكبرين دصيرين احلى اني ترة داخاف عليج من دصيرين حلوه اكثر
....هههه
..شو ضحكين انتي جمالج مديقل
وترك المشط من يدة
واجى وكف يمي واخذ الملابس مالته من يدي
وخلاها على الجربايه
وكمشني من خصري
وباوع بوجهي
وكلي
.....الكيلي حل
..لشنو
....لشوقي الج
.....انت صدك كميل لو انت غيره
....هههههه
....لاوالله صدك انت كميل شو مداعرفك
.....الصدمه مأثره عليك
اشرتله بيدي يعني شارب
.....هههههه ترة راح اكلب عليج
....لا فدوة لتكلب هاي اللحظات وياك ماتتكرر
....هههههه
....ياربي دائما اشوفك فرحان
....انتي وبس
...شنو اني وبس
...انتي وبس بحياتي انتي وحدج
ضحكت وخجلت من كلامه
كتله
...ماقلقان خاف هذا يرجع مامهتم اشووو
...خلي يرجع
...لاعفيه متت خوف
....لتخافين ميرجع واذا رجع اني موجود
.....اريد احضنك قوي كلش
...حضنيني
حضنته قوي
....هههههه هاي كل قوتج
...اي
.....تعاي اشوفج حضني
وشالني وحضني بكل قوته
وبعدها بدأ يذوبني بلمساته بدفو صوته
وكلت الي عدها مثل كميل هم تفكر تحب بعده
ماكذبت من ام ياسين كالت يتمنن يزوجن كميل حتى يلفهن بحضنه وينام
بقيت هاي الليله انام واكعد ماردت هم اكعد واشوفه ماكو على الاقل اذا راح اشوفه واسلم
عليه بكد ماجان قربه شعور لايوصف
بكد ماجان جان بعدة مر ماينجرع
وشكد طبعه صعب
بس اشكد احس براحه نفسيه من هو يمي
الصبح كعدت قبله ونزلت جوة جان البيت كله
نايم نزلت
سويت ريوك ورحت كعدت كميل
كعد وعبالك كالب عليه
كتله
...صباح الخير
...صباح الخير
...سويتلك ريوك
....يله هسه اغسل وابدل وانزل
...يله انتظرك جوه
نزلت وبقيت اسوي جاي واحمي الصمون وطلعت المسلوعه واجتي
كعدت على الكرسي كدامي
وكأنما دتتحداني
واني جنت فرحانه مااهتميت الها
ونزل كميل ورا محمد
دخل كميل للمطبخ وشاف شيرين كاعده
ماح

جى وياها
ولمن كعد اجتي كعدت بصفه
تخبلت حسيت جسمي يحكني والدم كام يفور بيه بس سكتت
وهو يباوعلي ومحمد جان دايخ وباله مو يمنا
كتله
....محمد
مجاوبني
رديت كتله
...محمد
...ها
...شبيك
...مابيه شي
....شنو مريض
...لا لالا
....كميل كله
.... قابل هاي اول مره نعيش هيج جو ليش كبرتها هلكد
.....صدك تحجي انت
....اي صدك احجي عالعموم احنا راح نسافر لااربيل فد شويه
شيرين كالتله
....واني
...انتي شنو
...اجي وياكم
....لا تروحين لبيت اهلج
....حباب خلي اجي وياكم انت متخاف عليه
سكت ومجاوبها
وباوعلي وكلي
...تعاي تريكي
....نفسي نسدت مااشتهي
وتركتهم ورحت على يوسف كعدته
وغسلتله وبدلتله ولبسته البوتين مالته
وسمعت كميل يصيحني
طلعت شفته باب الغرفه واكف
كتله
...ها
...شبيج ضجتي
....لو اني لو هي كميل
....هسه هذا وقته الحجي
....والله العظيم اذا سافرت وياك اني مااسافر لو تنكلب الدنيا زين خليها بالك
....ههههه
....لداهرني وتضحك شفتها شلون لاطشه بيك
دمي فار
ضحك
...بس هي مرتي مثلج
...لدكول مثلج اذا تريدها اخذها الها وطلكني الي
اني لواصير وحدي لولا
....ها ترة راح اضوج
....ضوج
...ها هيجي يعني متهتمين
بقيت اباع بعيونه وماكدرت اشوف هاي العيون
وهذا الطول وهذا الشعر واشتم هذا العطر الي يذوبني
واكله مااهتم الك
بقيت ساكته
كلي
.....وعيونج مااخذها ويانه مدامج مرايده
ولاازعل هالعيون الحلوة بس منا وجاي طلبي مني الشي بااسلوب لطيف وراح تشوفيني اشيل عيني وانطياها الج
بس من تتحديني لو تموتين مااسويلج الحاجه الي تريديها
زين
...اي زين
...تعاي تريكي
..اي
وصاح على يوسف
وكله
....يوسف تعال
يوسف راحله
واشرلي يله
نزلت وراهم ورحت للمطبخ وجان محمد ماكو وام ياسين كاعدة والمسلوعه بعدها بمكانها
كعد كميل واني هم كعدت
المسلوعه كالت
..ها حبيبي اتحضر
...اي تحضري
باوعتله
...حياتي انت
...وكولي لفيصل خلي يتحضر ديوديج لبيت اهلج
...متاخذني وياك
...لا
...علمودها مو
باوع عليه وابتسم
ونزل راسه وكام ياكل ومجاوبها
وهي رحت للغرفه
ام ياسين باعتلي وضحكت
جنت فرحانه اول مرة احس بلاانصاف وانو اكو شخص ينصفني
ويحبني ‏ميرضى بزعلي
ويخاف عليه
كملنا اكلنا وكمنا نرتب بااغراضنا
وكميل كال اخذو كم حاجه عود نشتري الي نحتاجه مناك
شيرين وداها فيصل ورجع
واني وام ياسين كما نروح منا ومنا ونلم ملابسنا
وبدلنا وانتظرنا شوكت نطلع وطلعنا الظهر
لان كميل راد نسافر بالسيارة
طلعنا اني وكميل ويوسف بسيارة وسيارة بيها فيصل وام ياسين ومحمد
وسيارة ويانه مال الحرس
الطريق جان متعب وطويل ويوسف تنحس
بس جان كلش حلو لان كميل جان يتصرف طبيعي
ويضحك ويسولف ويايه ويشاقه
وبعد ماوصلنا وجنا كلش تعبانين
كلي
كميل
...راح احجز بالفندق هذا القريب اليوم
...ياريت لان كلش تعبانه اريد انام ويوسف هم تعب
وصلنا للفندق وحجزنه
ونمنا للحد ثاني يوم لان احنا وصلنه متأخرين
والصبح كميل كلي بدلي دنطلع اني وياج
ماصدكت نفسي كمت غيرت ملابسي
وتأنقت حتى أليق بكميل الي العيون اتلاحكه وين ميكون
احس كميل اكو جاذبيه بي مختلفه
عندة حضور قوي
رجعت اباع على نفسي بالمرايا
وكلت هسه صرت خوش
كميل جان برة الغرفه
ديحجي بالتلفون
ويوسف يم ام ياسين
فتحت الباب
وصحت كميل
...ها خلصتي
...اي
...يله
طلعت وسديت باب الغرفه
وكمشت يده ونزلنه جوه ولمن وصلنه
للموظف وكميل حجى وياه كمل كميل كلامه
كله الموظف
...هذا الشخص ينتظرك
...منو
نداريت اني وكميل
وبقيت ساكته وكلبي وكف وبعدها دك وكميل وجة تغير
وحسيته تشنج
يتبع....
#الكاتبه #روجمان

....البارت التاااااااااسع عشرررررر....

كميل تشنج ويده الي جانت بيدي كام تضغط عليه
قوي
باوعلي وكلي
...اوكفي هنا لتتحركين
... شسوي فدوه
....اوكفي هنا لتتحركين كتلج
بس اني ماسمعت كلامه مشيت ورا وهو راح
وكف كدامه
كله
....شجابك هنا سروان مستعجل على قتلك
.....اني بين اهلي انت اجايك هنا
....اهلك هنا بالفندق
...اربيل مالتنا
....الكاع كاع الله سروان مختصر الكلام هنا مو وقتها نصفي حسابنا
....لعد وين
....من ارجع لبغداد
...اني هم اكول هيج لان بغداد من راح اقتلك واشمرك
محد راح يدري بيك ولااحد راح يحاسبني
....انت مقتنع بلي دتحجي
وتقرب كميل وجان يجر سروان من سترته
وسحبه وطلعه بره
واني اكمش بقميص كميل واكله
...فدوة عوفه الله يخليك
درت وجهي شفت الي بالفندق كلهم بقو يباوعون
علينا
كتله
...كميل كافي
كله لسروان
....ليش دتجبرني اوصخ يدي بيكم اني مااريد دم ليش دجبروني
وجان يحجي ويصك بسنونه ودمارات ركبته كلها بينت
وعيونه كلبت عبالك وحش
سروان كله
....اني اريد نرجع مثل قبل
....واني كتلك ماارجع
...انت دتحاربني واعرف بيك تريد تسوي سالفه
....معليه بيك وانت متهمني
.....وسعد والي كاله
.....سعد واحد منبوذ من الكل
كله لكميل
.... اني راح الحكك وين متروح لحد مااكتلك وتعرف ليش منتظر لحد هسه وصابر
....اعرف
والتاف عليه كميل وبقى يباوع عليه
وخر يدي من قميصه
وندار وباع على يده
وسد يده قوي وجان يضرب سروان بوكس
رجع سروان ليوره
واجى يريد يضرب كميل وكمشه كميل
من يده وجره حيل
وصاح
....روح منا كافي عد عوفوني
اجوي اثنين يركضون
حجى وياهم سروان كردي ومافتهمت شكال الهم
بس من حجي وياهم وكفو بمكانهم
دورت محمد فيصل كلت بلكي الكيهم ماكوووو
تقربت وكتله لكميل
...فدوة عوفه كافي
بقى سروان واكف وكله
......كتلك تعالي ومااجيت
كميل جان ينهد
وكله
......لهنا يزي انت ناوي على موتك
كتلكم عوفوني كافي كافي
واول مرة اشوف كميل يمر بالحظات مثل هاي مداعرف
اوصفها
حسيت نفسي لازم احمي هو كلي مرت كميل لازم تصير بميت رجال ولازم تصير قويه
رحت وكفت كدام كميل وكتله
لهذا سروان
...... اذا كميل صار بي شي اني اقتلك سمعت
بقى يباوع عليه
وجرني كميل وكلي
....صعدي للغرفه
....مااعوفكً
...صعدي اني خايف عليج وجودج يمي مديخليني اعرف اصرف روحي على محمد
.....لا
سمعت صوت يصيح بان نداريت
شفت محمد
كلي
....تعال
...خابروني من الفندق
جرني الي ودخلني جوه
وكلي روحي هناك
بعدها مااعرف شنو الي صار
لان فيصل اجاني وبقى يمي
بس باًوعت من بعيد الناس واكفين
وكميل
يأشر
ومحمد يعيط وبعدها راحوووووو
ودخل محمد وكميل ماكو
كتله
....وين كميل
....راح وياه
....شنو
وحسيت الدنيا وكعت فوك راسي
كعدت بعد ماكدرت اوكف اجتي وحدة عليه اظاهر انقهرت
كالتلي
...محتاجه شي اي مساعدة
باوعت عليها وعيوني كلها دموع
وهزيت راسي
كالتلي
.....حبيبتي لتبجين
....اخذو رجلي
باوعت على محمد وكالتله
....شلون هنا ميصير هيج شي
كال الها
...محمد هي مشكله بين اثنين ونحلت وهو راح وياهم
....بس يااخي هنا مومثل بغداد
....ماكوشي ونشكرج
وكمشني من يدي وكلي
...كومي لتلمين الناس علينه
....مااكوم
....كومي صعدي للغرفه
....ماااصعد والله وراح اكعد هنا باب الفندق
.....لج بدريه كافي ترة الي بيه كافيني
....مااصعد والله
وتمشيت وطلعت باب الفندق وكعدت على الدرجات مال باب الفندق
وهو راح حجى ويا هذوله الموظفين مال فندق ورجع
وكف ويباوع عليه
وكلي
....كومي لتخزينه
تفتحين علينا العيون كومي همزين مدير الفندق يعرفنه
.....انت عفتهم ياخذون كميل حتى يموت
باوع عليه وصاح بيه
....كافي ترة مليت من الكل شسويلكم اني تعبت
ابقى الملم وراكم ابقي كاعده هنا
ودخل جوه
وبقيت كاعدة والرايح والجاي يباوع عليه
وبقيت هوايه كاعده وبعدها رجع محمد
وكلي
.......هاي هم اجيت اكعد يمج لان مااكدر اعوفج وحدج
....مارجع بعده
...يرجع كله بس نحجي ميسويله شي بلكي تنحل
على الاقل ويا واحد بس
...ليش اكو غير سروان
....اي
كمشت راسي وكلتله
....شنو هاي الحياة ومجان عاجبني ابيع خضرة بالسوك
وابو المطعم الوصخ يباوع عليه
.....ههههههه لو باقية على الخضرة مواحسلج
....اي هوايه احسلي على الاقل اكل خبز وجاي بس راسي بارد
.....والله يابان اني من زمان فقدت راحت البال وكميل هم برغم هاي الفلوس الهوايه بس حياتنا متعبه
وجبنها نركض تعرفين من صار السقوط لحد الان
احنا ممرتاحين ابد
وجر حسرة
اني بقيت افتر بمكاني وكميل بقى يدور عليج
بكلشي
وصار قوي هوايه وجامد
ومرات اخاف منه واخاف عليه من نفسه
الدنيا مابيها هيج ناس قوين لان مابقى قوي
بهذا الشكل
طلقه وحده تنهي
حياتنا وهو ماخذها بحيل صدر وتكبير راس اوف
لو تعرفين شكوووو بكلبي
...... هاي المشكله مندري بكلوب الناس شكو
رجع باوعلي وشاف عيوني منا ومنا ودور بالوجوة
وطالع الناس والسيارات
كلي
..... يرجع لتخافين

ابتسمت و كتله كميل كلي
....اريدج من اني ماموجود اريدج تصير بميت رجال
اريدج بظهري بس من هو من ماموجود اني اخاف من كلشي
بذات هسه احس بالضياع
....بس اني موجود بان
....اعرف واعرف بيك متتخل
عني وعن يوسف واعرف بحبك لكميل
بس انت على يدك وكدام عينك شفت شلون جبتها من مصيبه لمصيبه من قهر لقهر احس كلبي صار ثلاث اضعاف حجمه كام يضخم من القهر والكبد والضيم
لامن جنت فقيرة جنت مرتاحه ولامن ازوجت وعشت بغير دنيا ارتاحيت
ولامن دخلت دنيا اكبر مني هم ارتاحيت
دافتر وافتر
واني بعدني مامسويه شي بس كلبي يتوجع
.....يخلص كلشي الاوكت ينتهي لتشيلين الهم
.......شوكت من يخلص عمري
...سلامت عمرج
باوعته وضحكت
وشفت سيارة وكفت كدام الفندق ونزل منها كميل
مابي شي
وكفت واني اضحك
اجى وكف يمنه وماحجى ويايه شي
وباوع على محمد بنظرة غريبه
ودار وجه ودخل جوة بدون
ولااي كلمه
رحت ورا وصحت كميل
باوعلي بس مجاوبني
....كميل بيك شي
ماحجى شي وصعدنه فوك للغرفه
واول ماوصلنه للغرفه وفتحها
الباب كميل
صاح على كميل محمد
ندار كميل
ودفعني بالغرفه وسد الباب
كلت هذا شبي
وكفت ورا الباب اسمع
وجان صوت كميل يحجي ويعيط ويكله
..انت معليك
ومحمد كله
....شبيك كميل
....شبيه ماتعرف شبيه انت كلي شبيك ليش هيجي صاير
....شنو الي صار حتى دكلي هيج
.... اذا متعرف فلتسئلني ولو اني متاكد انت تعرف وتعرف اني احس بيك واعرف الكلمه الي راح تطلع من حلكك قبل متحجيها
وشفت اليده مال باب كامت تتحرك
رحت بسرعه كعدت وسويت نفسي كأنما ماسمعت شي
اول مادخل كميل
وسد الباب نزع قميصه وشمره بالكاع
واخذ الخاولي
ودخل للحمام وخله راسي جوه المي وغسل وجة
وطلع وهو ينشف بشعره
وكعد على الكرسي ويباوع على الكاع
واني حت كعدت بالكاع كدامه
كتله كميل
رفع عينه وبقى يباوع عليه
...شبيك كميل
...مابيه شي
...سوالك شي
...دشوفين بيه شي
...لعد شصار
...خلص بعد ماكوشي اسمه سروان
....الحمدلله خلصنه
سكت وبعدها كلي
....بان
...عيوني
...انتي تحبيني
....هوايه احبك
....اني راح اسوي اخر شي وياج ومن بعدها اوعدج نعيش حياة طبيعيه كلش ومابيها مشاكل ومابيها كميل الي
كل شويه يتغير
....شنوو
.....موهسه
تعاي كمشني من يدي وكام وكف وكفني
وكف ورايه وحضني وباسني من ركبتي
وكلي
...راح ارتاح شويه وبعدين نطلع اوكي
.....بكيفك كميل
.... اشو مدلعيني
....يعني مثلا قبل وحدة جانت تحبني جانت ادلعني
هوايه
خنزرت عليه وكتله
....صدك
...اي والله
...هاي ليش هيج تحجي ويايه
......ههههه بوسيني من خدي خلي اروح انام
....ماريد
......بكيفج بس ترة راح انام واني مراضي عليج
وحرام على المرة رجلها ينام ومراضي عليها
نداريت عليه وكمشته قوي
وباوعت بعيونه
.....مااكدر اخليك زعلان
.....والله
.....غاليه انتي النفس مالي
....يسلملي هالنفس الله لايحرمني منك
ضحكت
كلي
..... شنو هالضحكه الي تشبه الكمر
.....هههه ههههه
....ضحكي عيني بنونه
....بنونه هاي اول مرة ادكلي بنونه
...صدك مامنتبه
....ديله يكلي مامنتبه شحجي وياك
....من انتي ويايه استغلي اللحظات الحلوة
.....تعرف كل كلمه منك بيها معنى يبقى راسخ بكلبي
ابتسم
وتركني وراح نام
ورحت كعدت يمه شويه وبعدها غطيته
وكمت
رحت لغرفه ام ياسين اشوف يوسف
دكيت الباب
وفتحها فيصل
دخلت وشفت محمد هم كاعد وجان كلش مبين عليه ضايج ويوسف اول مشافني اجاني ركض
بسته وكعدت وكعد يمي وكلي
....شوفي ماما عمو محمد جابلي
جانت سيارة مال شرطه
...اي حبيبي العب بيها
رحت كعدت على الكرسي الي كدام محمد
... شكو شصار بينك وبين كميل
.....سئلي
....كميل ميكول شي. انت كلي شكو
....مااعرف شي هو اجاي متخبل شنو ليش ماادري
....هو كال ماكو شي بعد اسمه سروان بحياتنا
....اي زين
....بس كلي اني راح اسوي شي وبعدها نعيش كلش طبيعي ماادري شيريد او شيقصد
....هو كال هيج
...اي
.....اي شوفي شنو براسه هالمره
.....احجي وياه
....اني راح اسافر للاردن لااحجي وياه ولااحجي
بعد ويااي احد
.....لافدوة لتسافر اني اضوج من انت ماكو وكميل همين واني مااطمن على كميل اذا انت ماموجود
...اني قررت خلص اروح اشتغل هناك احسن شي
ماكدرت بعد اكله واتناقش لان جان عصبي
كلت خلي يبرد شويه واحجي وياه واكول لكميل هم
بلكي يكدر يقنعه
بقيت كاعدة اسولف وياام ياسين ويافيصل وألعب يوسف بالسيارة مالته وكل هذا ومحمد مو يمنه وصافن
وبعدها كمت كلت اروح اشوف كميل كعد لا
كلت ليوسف
....ماما ابقى هنا هسه فد شويه اجيك حتى ابدلك ونطلع نروح للألعاب
.كام يضحك ويكمز
وطلعت من الغرفه ورحت لغرفتي اني وكميل شفته
بعده نايم
وجان نايم على بطنه وكذلته نازله على وجه
ابتسمت من شفته هيج
شكله يسوي عندي اضطراب بدكات القلب
احس كل ذره بجسمي تتغير وكل جهاز بجسمي يتغير عمله
رحت نمت بصفه وبقيت اباع عليه وهو نايم
وكام يتحرك
ودار وجه من الصفحه الثانيه
واني بقيت نايمه يمه على ال

جربايه بس عيوني ماغمضت بقيت ماادري شكداباوع عليه
بعدها اندار على ظهره وخله يده على وجه ورفع شعره وفتح تك عين و باوعني وندار عليه
وكلي
...هاي تباعين عليه اني نايم
.....اي ههههه
غمزلي
شكد بحب يغمز
....تعرف كمونتي
.....هههههه شنو
....كمونتي
.....ههههههه شنو بهارات اني ابقي على كميل احسن
.....هههه تعرف انت من تنزل شعرك هيج شكلك يطلع
كلش كلش حلو
....ضحك مو عيب انزل شعري هههه قابل اني مراهق
.....بس عجبني ولو انت بكل حالاتك حلو مشوف انت شايف نفسك هوايه

ضحك
....انتي تكسرين وجبرين مواكلج لسانج عبالك مسدس
....لا اني
....لاموانتي اني
...والله عد انت لسانك ياساتر منه
...ههههه
وكعد وكال
....ادخل اسبح حتى نطلع
....خلي نودي يوسف للالعاب
....بكيفج اليوم انتي القبطان وتحركين السفينه وين متريدين
...يعني توديني للمكان الي اريده
....اي
وراح دخل للحمام سبح وطلع بدل واني عدلت ملابسي
ومكياجي
وطلعنه رحنا للغرفه على يوسف اخذنا
ومحمد جان ماكو وشفت ام ياسين كاعد
كتلها
...ام ياسين تعاي ويانه
عد كميل كله لفيصل
...تعال انت وام ياسين بالسيارة
...اي تأمر
نزلنا كلنا وطلعنا ورحنا افترينه
وجانت طلعه من العمر
جو عائلي و ماكوشي يضوجنه
اكلنا وسولفنا
وفعلا اول مرة احس بهيج راحه نفسيه والاهم شفت يوسف كلش فرحان وعلاقته بكميل
حلوه وكميل كلش طبيعي وهادئ
وماحجه شي يضوج
جان اليوم مثالي بالنسبه الي
ورجعنا للفندق بالليل بس ميتين من التعب
يوسف بقى ينام يم ام ياسين
ومحمد ماشفته من رجعت
وكميل ماسئل على محمد
وثاني يوم عرفت محمد رايح بس ماادري وين
ولمن ردت احجي وياكميل
عن محمد كلي
....سدي الموضوع
وخفت بعد احجي شي
وياكميل حتى لايتعصب عليه
وبقينا تقريبا اسبوعين بااربيل مابقى مكان ماوداني اله كميل
وماردت شي اذا مكلي اي
حسيت نفسي بالجنه
حلم بمنتهى الروعه ماردت افتح عيني واصحى على غير دنيا
واليوم الصبح كميل خابرو وبعد ماخلصت المكالمه
بقى ساكت
وشويه وكلي
....تحضري دنرجع لبغداد
...اي هسه
بديت الم بغراضي ورحت لميت ملابس يوسف وبدلت
وبدلت ليوسف
وطلعنا بطريقنا
وبقى كميل ساكت ومافتح حلكه وباله مشغول
ولحد ماوصلنا لبغداد اني تفكيري مشغول بلي ديفكر بي كميل واني مااعرفه
نزلنه للبيت واول ماوصلنا كميل كلي
...دخلي اني هسه اروح واجي
....وين تروح كميل موانت تعبان من الطريق
....مابيه شي هسه شويه واجي دخلي
عرفت انو لازم مااجادله
كتله
....براحتك
دخلت جوه وفيصل دخل ويانه
وحط الجنط مالتنه بالكاع ورد طلع بسرعه
وحجه ويا الحرس
وصعد سيارته وطلع والحرس ورا ماطلع
حطو الزنجيل والقفل بالباب ودخلو جوه
صعدت يوسف لغرفته ونومته
وام ياسين صعدت نامت
من طلعت غرفه يوسف شفت باب غرفة محمد مفتوحه
رحت وكفت وفتحت الضوه
جان الكتتور. مفتوح وملابسه معلكه والفراش مخربط
بقيت افتر بيها واباوع
وفتحت المجر الي يم راسه
وجان اكو دفتر صغير
من باب الفضول فتحته وجان كاتب بي مواعيد
وماكو شي موطبيعي
وملابسه مماخذها
كلت خلي ارتب فراشه
ولمن شلت الفرشه طار بالكاع شي احمر
رحت عليه شلته وجان
دشداشه مال نوم صغيره وكصيرة
شلتها وباوعت عليها وبعدها حطيتها
على الكومدي الي يم راسه
ورتبت فراشه وطلعت من الغرفه وسديت الضوه
والباب
ورحت لغرفتي ودخلت للحمام وسبحت
وطلعت لبست بجامه ولبست فوكاها روب
ونزلت جوه انتظر
كميل جنت تعبانه بس مااكدر انام وكميل ماموجود
بقيت انتظر ومليت وبعدها فتحت التلفزيون
وسمعت الباب البره
دتنفتح لان الباب البره من يفتحوها
ينسمع صوتها
كلت اي اجى كميل
مارحت باوعت من الشباك رحت على الباب
فتحت الباب ولمن فتحتها شفت محمد
دخل ورفع حاجبه وباوعني
وكلي
...هلو
وتركني وراح وكف يم الدرج وبعدها صعد الدرج
وشويه ونزل وبيده جنطه
.....كتله محمد وين تروح
...لبيتي
....ليش
....احسن
....بعدك متحجي وياكميل
....لاليش مااحجي ماكوشي بس كلت اجي اخذ هدومي
....لعد ماشفته
...لا ليش وينه
...عبالي اجاك
...لا
وسكت وكال
...صدك بان منو رتب غرفتي
....اني
....ها
وابتسم ابتسامه غريبه
....اسف
....على شنو
...لا ماكو شي
...شبيك
...مابيه اي ماكلتيلي وين راح كميل
...مااعرف هو هناك بااربيل واجى تلفون وكلي يله هسه نرجع لبغداد ورجعنا واول مانزلت من السيارة
طلع وفيصل لحكه
...اي همين سالفه جديدة اظاهر
حط الجنطه بالكاع قوي
وطلع تلفونه وخابر فيصل وطلع بره يحجي وياه
ورجع
كلي
.....اني راح اروح هسه
....وين كميل
....ماكوشي هسه اجاين بالطريق
...اي زين
اخذ الجنطه مالته وطلع
ونمت على التخم واني دانتظر
كميل
من رجع دخل وشفته مدنك
بااصابعه يدغدغ وجهي
فتحت عيني
..كميل جنت دانتظرك واخذتني النومه
...يله كومي
....اي
تمشيت وياه وصعدنا لغرفتنا
والايام الى اجتي
كميل تغير
يفكر هوايه
مرة زين مره كلش عصبي محد يحجي وياه
بس جنت اسمع كلامه ويا فيصل والي افتهم

ته
انو هو راح يسافر
بس مكلي ولااني سئلته
ردت هو يكلي
بس بديت احس نفسي هاي الايام انعس هوايه
ومالي نفس بشي
واكل بس موهلكد
واليوم من دناكل
كلي
....شبيج بان شو وجهج اصفر شنو مريضه
..لا مابيه شي
ام ياسين
كالت
...هاي صار كم يوم هيجي انتي ذبلانه خاف حامل
كميل ابتسم
كلي
...صدك
....مااعرف
...لعد منو يعرف اذا انتي متعرفين
..ماادري
...استغفرالله
وصار عصبي وكام
كالت ام ياسين
...شبي هيج
....ماادري
...روحي للدكتور ة
....يله اليوم نروح اني وياج خلي فيصل يودينه بس وين اكو دكتورة
...فيصل اكيد يعرف
...ان شاءالله
والعصر ودانه فيصل وطلعت حامل كمشت بطني
وضحكت وكلت هسه اكو طفل هنا شكد حلو هذا الشعور
لمن انحس بأنو اكو روح عايشه بداخلنا
تكبر كل يوم بينا
ولمن تطلع هاي الروح
نحبها اكثر من كلشي بحياتنا
ونحميه مهما كان الثمن
ام ياسين
كالتلي
..الله يتمم الحمل على خير ونشوف الضحكه على وجة كميل
صعدنا بالسيارة
واني الضحكه ماليه وجهي
كال فيصل
....هابشروو
ام ياسين كالت
...الحمدلله كل خير بان حامل
....صدك اي الحمدلله ان شاءالله يجيكم طفل
تام الخلقه ودكومين انتي بالسلامه
...الله يسلمك
رجعت للبيت وبس ردت افرح كميل بس جان ماموجود
كعدت اسولف ويا يوسف وكتله راح يصير عندك اخ
او اخت
ايدهم صغيره ورجلهم صغيرونه وعيونهم حلوه
ويلعبون ويشربون حليب كل هذا الكلام
ويوسف صافن عليه ويضحك ويكلي
....والله
....اي والله
وسمعت الباب نفتحت رحت شفت كميل
ضحكت بوجة
كتله
....كميل الله يساعدك
....هلو
....رحت للدكتورة اليوم
....اي وشكالت
...حامل
ضحك
...والله
....اي والله
اجى يمي وكمش يدي وباوع عليه وكلي
....مبروك وباسني من راسي وراح
توقعت راح يفرح اكثر من هيج ويمكن يفرح اكثرمن فرحي بس جانت فرحته
باردة
فرحته متشبه فرحتي
بقيت واكفه وصافنه على ردت فع
ورحت ورا
جان بالمطبخ
كتله
...شنو مافرحت ماتريدة
.....لافرحت واكيد اريدة
...لعد ليش هيج ماهتميت
....يعني شتريدني اسوي اكوم اكمز واعيط مثلا
...لا دكمز ولاتعيط اضحك افرح اسئلني اي شي
.....ضحكت وفرحت وحجيت وياج وماكو سؤال بالي
....ليش هيج تتغير
...ماحفظتي طبعي
....لا ولاداكدر ‏ ‏ احفظه لان اني اريد كميل الي احسه يحبني
مجاوبني وسكت وكلي
....اني راح اسافر بعد كم يوم
...ليش
...شغل
...شغل شنو
.....مولازم تعرفين
....اني مرتك
....اعرف انتي مرتي
....كميل انت ملاحظ هوايه امور بقت على حالها
ماتغيرت واكو اشخاص بعدتهم عنك
....مثل شنو
...مثل محمد صديق عمرك والانسان المخلص الك
والي يحبك والي يحس بوجعك بدون ماتحجي
ودائما واكف وياك
ومثل شيرين الا انت مطلكتها ولاهي رجعت
بس اعرف ددزلك رسايل
وتخابرك ومثل زواجنا الي ماصار رسمي
واني هسه حامل
.....مسأله محمد انتي مالج دخل بيها
وشيرين راح اطلكها بس موهسه واني اصلا مداجاوبها
ولادار على مسجاتها واني راح اثبت زواجنا بالمحكمه
بس موهسه
من ارجع
....لا
....شنو لا
...ثبته بالمحكمه قبل متسافر
سوا اوف
....ميخالف
....ليش مااسافر وياك
...لا
....لشوكت راح اظل عايشه وياك هيج عايشه وكأنما
بلم بنص المي وكل شويه جايتني موجه قويه ودافعتني بعيد
دار وجه ومشى بعيد وكف كدام الشباك
وخله يده بجيبه
وكلي
... اسمعيني زين وافتهمي الي راح احجي
اني كتلج حياتج ويايه مراح تكون اعتياديه
يوم راح تكون هدوء
ويوم عاصفه ويوم فيضان يغرك كلشي
هاي اني مااكدر اوعدج بااكثر من هذا
راح ادكولين مخبل بي حاله نفسيه
راح دكولين تركيبه غريبه كولي الي دكولي هاي اني
ودكدرين اطلبين حريتج مني وراح اتفهم هذا الشي
....هاي هيج وصلت وياك
قصدك اطلكني
....اي
...ليش شسويتلك اني
...ماكتلج اطلكج بس كتلج اذا تريدين حريتج اني راح اتفهم
...بس انت من تغيب عن حياتي دنيتي تصير ظلمه
سكت وكلي
....تعرفين ليش الكل حبوج لانج بسيطه وعندج طيبه
وشفنه قوتج وضعفج وهوايه شفنه دمعج الكل حبوج
وحاولو يساعدوج
بس اني جنت اريدج قبل الكل
بس اني اريدج تفكرين زين هالمرة تشوفين الي حواليجً
منو اكثر واحد ساعدج منو الي يستحق تبقي بحياتج
ومنو الي لازم تبعدي عنج
منو الي يستحق يكون جزء منج
...انت اكيد
...اريدج تفكرين زين
،...ليش دتخلي بينه هيج اشياء صعبه واني مرتك وياك ويمك وبالليل انام بصفك دتبعدني لويش
....حتى اتاكد
ضحكت بااستهزاء
كتله
....قصدك محمد
ندار عليه بعصبيه
كلي
....شنو محمد
...انت دتلمح على محمد ولهذا السبب ابتعدت عنه بس انت مدتكدر لان كضيت عمرك كله ويا محمد
ولان تحبه وتعرف بي يحبك
...اي خوش تفكرين لعد ليش دائما ساكته
....اني موغبيه بس اني اتغابه وياك وابتسمت
.....اي تتغابين ليش
...مواحسن
...تتصورين هيج احسن
.....مرات اي لازم هيج
... روحي بان
...تعتقد محمد يباوع عليه بغير نظرة ويحبني
...سكتي لتحجين
...ليش اسكت هاي الحقيقه انت فد واحد مريض بالشك عبالك العالم كلهم مثلك تفكي

رهم مونظيف
...سكتي احسلج
...لامااسكت وراح احجي انت يوم عن يوم دتثبتلي انت مثل سعد بس بااختلافات بسيطه وبس محمد مختلف عنكم
....ها محمد مختلف عنه
اجى وكف يمي
وكمشني حيل وعصر يده بجسمي
....حجايه ثانيه واسوي شي اندم عليه طول عمري
....شيفيد الندم
كمشني حيل وجان يدفعني قوي
...كتلج كافي روحي والله وسماج لااخليج تندمين روحي
.....انت صدك وسكتت
...اني شنو احجي
تركته ورحت للغرفه وكعدت ابجي وعيوني فاضت
وكل فرحتي راحت
وتبخرت
بقيت كاعدة وامسح مو بدموعي لاامسح بكلشي حلو
حلمت بي
بكلشي جان لازم اعيشه حالي حال اي بنيه
حال اي انسانه
كل دمعه توكع وامسحها
جانت عبارة عن سطر كتبته من حياتي
وهسه مسحته
بقيت كاعدة وسمعت صوت السيارة ركضت على الشباك
جان كميل طلع
باوعت الساعه جانت ساعه ب2بالليل
وين ديروح هيج وكت
ماعرفت شسوي غير انتظر بس شويه وبعد ماقاومت ونمت
وكعدت الصبح
مجان كميل نايم بصفي نزلت بسرعه شفته ماموجود
وسيارته مو بالكراج
طلعت صحت فيصل وسئلته
كال مااعرف وينه
وبقيت انتظره ومااجى بس الظهر
اجاني فيصل
وبيدة جنطه جبيرة
وكلي
...كميل يريد ملابسه واكو اوراق بالقاصه راح اخذها اله
....ليش وين يروح
...راح يسافر
...هيج بدون ميسلمً
...ماادري
سكتت
واخذت الجنطه وصعدت فوك
وفتحت الجنطه وخليت ملابسه
بالجنطه
ونزلتها لنص الدرج وصعد فيصل واخذها مني
ونزلها
بقيت اباع على الجنطه مالته
وكانما اخذ روحي من طلع
وهي طلعه وصارله 18يوم
ماشفته ولاعرفت شبي مابي
واليوم كتله لفيصل
اريد اروح لمحمد
اول شي سكت وبعدها كلي ميخالف
بدلت وطلعت بسرعه
وهالمره يوسف كام يبجي ورايه
صعدت بالسيارة وجنت ساكته طوال الطريق
وبقى فيصل يمشي لحد ماوصلني
لبيت محمد
نزلت وبقيت واكفه اباع على البيت
من بره وبعدها تمشيت
ودكيت الجرس
وسمعت صوت باب نفتحت
ونفتحت الباب الجبيرة البرة
شفت محمد وجان اكو صوت جلب
تقدمت ودخلت للكراج
كتله
....شونك محمد
...هلوبان تعاي دخلي
وصاح بالجلب كله اسكت والجلب رجع ليورة وبقى بمكانه بعد ماتحرك
جان جلب اسود جبير يخوف
خفت اباع عليه
...دخلي
تمشيت ودخلت جوه وجان البيت كلش حلو من جوة
كعدت وشفت وحده طلعت من غرفه جوه
وصاحت
...حمودي
كام راح الها وبعدها رجعلي
كلي
....هاي نور
....واني ماسئلت هاي منو
ضحك بااستهزاء
.... بلا ماتسئلي هاي صديقتي
....اي الله يهنيكم
....ههههه
.....محمد وين كميل
...ماادري
....شنو يعني متدري انت تعرف كلشي عنه وين ممكن يروح
...مااعرف
...كلي الصدك
...كتلج مااعرف
...ليش فجأة كلكم سحبتو نفسكم مني شنو الموضوع
هو راح وانت رحت
...واني شنو يفرق اذا رحت ولابقيت
...ليش هيج صار بينكم
....ماادري
....انت راح تبقى دكلي ماادري ومااعرف شنو يعني متعرف لعد منو يعرف
ديحجي وسمعت صوت هاي البنيه
كالت حمودي
....الشربت
....تعاي
اجتي تتمندل لابسه تنوره كصيرة كلش وبدي كيمونه
وفاتحه شعرها
باعتني
وكالت
....هذا الشربت
اخذته وكتلها
...شكرا
وقدمت لمحمد وضحكتله وراحت دخلت جوه
هو جان ديباوع عليه
وكلي
...اي بان احجي شرايده
...ليش هيج صرت ويايه
...شلون يعني ليش شنوً الي جان مختلف من الاول حتى
هسه تغير
....اظاهر تعشمت زياده بجيتي هنا عبالي بعدك محمد بس صدك ماكو شي يبقى مثل ماهو
وكمت طلعت
ولحكني محمد
...بان
مجاوبته
...بان
...ها
...مودكول ماادري
....شتريدين تعرفين
...كميل ليش بعدك عنه وليش انت رحت وهو قبل كم يوم تعارك ويايه وكلي فكري زين وشوفي منو الي يستحق اكثر يبقى وياج
وهوايه حجي وبعدها تعاركت وياه وهو طلع بالليل
وبعد مارجع وحتى ماخلاني افرح بحملي
صارت نظرت دهشه بعينه وكلي
...ليش انتي حامل
...اي
ماكال شي بس باوع وكلي راح اكلجً شي مااعرف اذا راح يثبت الج شي او الاعلاقه بمشكلتج ويا كميل
....شنو
...لمن جنت بالكليه حبيت وحدة بس ماعترفت الها
جان اخوها ويانه بالكليه صار عيد ميلاده
وعزموني واني جنت وياكميل علاقه قويه
توسلت عليه يجي ويايه وقبل يجي رحنا
وهي شافت كميل تخبلت وبقت تباع عليها وكميل هم نعجب بيها لان جانت حلوة وبت عائله
وصارت بينهم علاقه بقت سنتين
واني جنت اباوعهم واوصل كلام بينهم واراضيهم من يتعاركون
بس بعد هاي السنتين كميل تركها هي حبته كلش
بحيث كامت تجي لبيت اهله تتوسل بعمتي
وهو جان ميقبل يحجي وياها
مولان يريد يأذيها بس هو محبها
هي حبته هو مثل اي ولد حلو وشاب دور علاقه
بس هي دورت حب
وزواج هو مجان باله يزوج
شفتها كام تذبل علموده مثل الوردة الي يوميه ذب ورقه من اوراقها واني جنت احبها
جنت اموت من اشوفها هيج
مرت ايام والبنيه سافرت يم اختها
واني جنت اتعذب وبعدها واحد من اصدقائي الي جان يعرف بيه احبها كله لكميل انو اني جنت احبها
وكميل حس بتأنيب الضمير وبقى فترة بينه فتور ومانحجي هلكد
وعاتبني وكلي ليش ماكلتلي
كتله جنت ناوي من اشوفها بالحفله اكلك اني معجب بهاي البنيه
ومر

ت الايام ونسيت اني هاي البنيه
بس كميل ماكدر ينسى. ‏
وبعدها تعرفت على ناهز وقررت ازوج واجيتي انتي
وكامت الايام تمشي لحد هذا وقتنا
فأاعتقد كميل بعده يحس بأنو هو ياخذ مني اي وحدة احبها
من كتلج كميل ضلعي الي اذا نكسر
تنكسر كل ضلوعي يمكن ماصدكتي
...يعني قصدك
......،،،،،،،،،،،،،.........

الى اين سوف تأخذيني
‏أيها الحياة
ألم تكتفي مني الم تجدي
شخص غيري
ألم تجدي وجع غير وجعي
ألم تذهبي لعاشق
يعشق مثلي
أين انت ياطيري المهاجر
اين غبت عن سمائي
اين تذهب
وانت الان في داخل
أحشائي تتنفس
هوائي وتسرق راحتي
وتأخذ النفس من رئتي
اذهب
بقدر ماتشاء
ولكن سوف تعود
لترى وجهك بي
لتشتم أنفاسك
لترى يد صغيرة ‏
غير يدك تمسك
يدي لتشعر بعاطفتك
وعاطفتي

يتبع
#الكاتبه #روجمان

6تنسيقات لتنانير البينسل🌚❤️

#اعـاده_توجيــہ_لصديقتج
#ملوكه

شايفين الواحد من يضوج وتطلع اعصابه☹️..يطلع حركته بالاكل لو بالتسوق

اني من اضوج شسوي لو انام لو اسبح لو اطلع حركتي 🤣💔بمسح صور الاستديو

#ملوكه

فحبيت انزلكم صور اطفال👼🙈 موجوده قديمات بفوني.... فكلت انزله قبل لاامسح🌚💔

#ملوكه