.
هدايا الشوك يمك ... يابه ردها
وعلية سيوف هجرك ... يا هو بردها ؟
ايا ليلة وداعك ... يا بردها
متت لو ما لحك حضنك علية
.
.
.
.
#شعراء_وذواقين_الشعر_الشعبي
ابوذية للاهواز
#ابو_تراب

.
سنة ما شايفك بس انت موجود
لهسة اشتم عطر من شوفة العام
ما تاجرت بأسمك بس تعاطيت
بيني وبين روحي وهجرك اعدام
شفتك بالحلم فزيت مرعوب
ما لحكت اشوفك مسرع اجدام
نذر لو ملتفتلي جا تحنيت
من اطراف جدمي لشعرة الهام
ملثم من تمر ما اعرفك تريد
اعرفك لو تحط اعلى اسمك ألثام
.
.
.
.
#شعراء_وذاوقين_الشعر_الشعبي
#اياد_عبدالله
#ابو_تراب

.
روح الله وياك جا ضلت عليك
طبعي كلمن راح گلبي يسامحة
بس بلا زحمة ولا امرأ عليك
المغرب المغرب اقرالي الفاتحة
طلب مو كلش صعب تكدر علية
ومن بعد هالطلب روح بفالك
انا مرة بكل سنة ابالك افوت
البوب لا تسدها من اطب ابالك
.
.
.
.
#شعراء_وذاوقين_الشعر_الشعبي
#كامران_العداي
#ابو_تراب

.
اعرفك ما ترد بس ما طبكت الباب
مثل ميت عزيزة يعود ينتظرة
سهل من تبتعد بس صعب تلكى انسان
شايل طيبتي ويهواك على الفطرة
باجر من ترد ما تلكى شي موجود
تلكى الورد ذابل والارض صحرة
تلكاني مدينة مسددة البيبان
بيها الكمر ميت والشمس حمرة
وتمسح ذكرياتك شجرة الصفصاف
خافن من ترد تشتاك للشجرة
.
.
.
.
#شعراء_وذاوقين_الشعر_الشعبي
#جبار_العبادي
#ابو_تراب

.
استغلوا طيبك وگلبك ... ولاذاك
المشوا وياك من تالي ... ولاذوك
كلتلك هذا ما ينفع ... ولا ذاك
نصحتك بس بعد شتفيد هية

مثل جلدي حسبتك ... والامتني
وتكش ان صالحتني ... وان لمتني
جنازة بمتن مختل ... والمتني
خبل ما يدري وين يريد بية
.
.
.
.
#شعراء_وذاوقين_الشعر_الشعبي
#اياد_عبدالله
#ابو_تراب

.
شكد جنت محتاجك ردت بس تسأل
من جنت ادور بالصور صورة حل
راجعلي متأخر بعد وكتك راح
بذاك الوكت لو جاي كتال اقبل
تموتني بيدك مرة وحدة وارتاح
احسن ولا كل يوم اموت واعدل
من كتلي رايح طحت وي دمعي الطاح
مبتسم بس بگلبي جنت اتوسل
ويومية جاي بجرح وانا اتحمل
واربع مواسم وانا وياك اذبل
بجيتني لحد ما طحت من عيني
أذيتني وما عاش الي يأذيني
بس انت كتلك روح انت وربك
وهواي اجوني توسطوا رادوني ارجع حبك
جا هو اعز منك منو ؟ ولخاطرة اغفر ذنبك
.
.
.
.
#شعراء_وذواقين_الشعر_الشعبي
#عصام_كريم
#ابو_تراب

• .
يا صاحبتها يا الوصلتي لدارها
احجيلي عنها شلونها وشخبارها
شدار الكلام ال بينج وما بينهة
شجانت تكلج هية نظرة عينهة
وشكالت وما كالت من اسرارها
يا صاحبتها عيوني ما ينسنها
خليني اشوف عيونج الشافنها
انطيني اديج اللامسن جفينها
ولمساتها الضلت بجفج وينها
محتاجهن بلكن يطفن نارها
شكالت علية شلمحت وشذكرت
ما وصتج ما سلمت معتذرت
هواي ضل من السوالف عدها
روحي الخذتها وياها يمتى تردها
لو خيروني اختار هم اختارها
.
.
.
.
#شعراء_وذواقين_الشعر_الشعبي
#جبار_رشيد
#ابو_تراب

.
ماتت زلم لا اجيت لا كتلي كواك
وانا اعلى فرخ انفاس واكف سنة وياك
.
.
.
.
#شعراء_وذواقين_الشعر_الشعبي
#سليم_الجبوري
#ابو_تراب

.
علامة الصبر ليش اصبر علامة
بحبل الموت حبل الروح مشدود
جسر ويعود لا تكلي بسلامة
اذا كال القدر ميعود ميعود
حر الصيد ينصاد بحمامة
وبركع للممات الشوف مسدود
انا الطب ولكى بروحة غرامة
مكتول وعلى السجين مسنود
واداة القتل مطعون بملامة
وراسم من نزيفة عيون وخدود
كلت بلكي الصدى حافظ كلامة
ما ادور نفي واثبات وشهود
خرسة الكاع وتحذر النعامة
ولسان الصدك بالخوف معكود
من المعدم الى اصحاب الفخامة
ومرورآ بالبطر والعاش مكرود
اسم مخطوط تالينه برخامة
فوك الكاع اسم والطين للدود
.
.
.
.
#شعراء_وذواقين_الشعر_الشعبي
#سمير_صبيح
#ابو_تراب

.
بعدني شما علوا حدري
بعدني شما حجوا ادري
بعدني اكبر .... شما رادوا اطيح عيونهم تعثر
شما رادوا اغيب ابالهم افتر
وبعدني اكبر
بعدني شما خذوا مني افيض بمستحاي اكثر
ول شباطهم جيمت كيض وامان وبخت
ولميتهم مستحى
بخاجيتي حد ما دفوا وجروحهم هودت
وماشيتهم حس ضوة زتيتهم للصبح
حد ما شمسهم صحت
و وجوه صاروا لچن لولاي ما بينوا ولا روسهم شرعبت
يا هي يا طيبتي بشيباتي اطوشن جنت الكط وراهم فشل
من اجباهم وشلت
.
.
.
.
#شعراء_وذاوقين_الشعر_الشعبي
#قاسم_بخيت
#ابو_تراب

.
هاي هية وداعتج لا تستحين
انتي مو اول حبيبة تشكك بسجينها هدوم السنين
انى وين وانتي وين
وليش اوچ واشتكيلج وانى اعرفنج تطفين الحريق بانزين
هو ذنبي لا سكنت ويا اللي جوني
ولا تبعت الراحلين
ولانه خالي و مختلي ومرتاح بالي
ولاني من العاشكين
ومدري ليلي شلون اخلصه
ولا سهرت ويا السهارى
ولاني من النايمين
ولاني عابد و ارتجي الجنة امن اموت
ولاني من الكافرين
اني قصتي وياچ قصة
انكتبت بورقة قديمة وخط حزين
ولو اكوا تأمين ع الحب جان اطالبهم يردولي ولو ربع السنين
.
.
.
.
#شعراء_وذواقين_الشعر_الشعبي
#للكاطع
#ابو_تراب

.
اذا على الفاتحة بالشارع تكون
الجادر من يسد شارع أذية
ماريد الفلوس مفطح تصير
فقرة هواي وزعوهن هدية
ولا اريد العراضة الترمي فوكاي
الرمي العشوائي ياخذ جم خطية
جهلكم هذا اذا ضليتوا وياه
يرجعنا لزمان الجاهلية
عيشوا احرار لا تغركم تقاليد
الحياة ويانا مثل المسرحية
بيش المحتوى الهادف تخلقوا
ورد حطوا بحلگ كل بندقية
.
.
.
.
#شعراء_وذواقين_الشعر_الشعبي
#رسول_محسن
#ابو_تراب

.
تمنيتك حلم وتطول هواي
وتصبح من صدك وكبالي الاكيك
على هالبت تجي معذبتني هالروح
تقنع بأي عذر لمن تحاجيك
الوحشة بغيبتك هدتلي العيون
واذكر كلت ما اريد ابجيك !
هسة امشي ودمعتي تمشي وياي
وتنزل كبل لا يجيبون طاريك
.
.
.
.
#شعراء_وذواقين_الشعر_الشعبي
#هيثم_رشيد
#ابو_تراب

.
من حنيتك شكد نبهتني الناس
بس اخجل اكلهم گلبي ما يفهم
عشت لخاطرك من انطعن ماكول
وبحرة صوابي كبالك اتكتم
واهد جرحي واواسي الشايل السجين
واكله اعذرني اذا سجينك اتألم
.
.
.
.
#شعراء_وذواقين_الشعر_الشعبي
#ايهاب_المالكي
#ابو_تراب

• .
بيني وبينك خطوة وباب
واهلي واهلك ميعرفونه شكد احباب
كلها بهاي الدنيا تجذب
بس العاشك مو جذاب
ما عرفوني ..... ونزلن دمعاتي من عيوني
وصارن فوك العتبة تراب
شلت سنيني بجفي وجيتك !
وماتت روحي بعتبة بيتك
حتى الشارع يدري بشوكي
ويعرف بية شكد حبيتك
وي انفاسي وخطوة بخطوة
وي كل دكة بگلبي لكيتك
صح ما شفتك بس حسيتك
عطرك ريح ويعصف بية
وكلش كافي من اشتميتك
.
.
.
.
#شعراء_وذاوقين_الشعر_الشعبي
#ادهم_عادل
#ابو_تراب

.
.
معقولة ما أيست يا گلبي معقولة ؟؟
تحفر ابير الهوا ١٦ متر برمل
ب هيمه ولوحدك
شيطلعك وما نبع جا خلكك شطولة ؟
الماشي عليهن كبل غيرهن وتنسعد
اترك بعد كل حجي واترك طريق البجي
والضحكة مشمولة
وميصير سيلك نهر مادام مايه مشى بكل كاع مجهولة
واليسألك هاجرت ؟؟ اي ريش جيبه عذر
والدم يبس وانشلع لا كله مكتولة
براسه خيط وجذب فر مغزلك بالهوة
الظاهر الها الخلك يا گلبي مكيولة
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
انا بلياك مدري شبية ما بية
زلف وبلاية ترجية
درب ما بية كل جية
نهر فاض وتبع مية
رجع بس ما لكاله جروف
كون تشوف روحي شخله بيها الخوف
مطلوبة نذر وتخاف ما توصل حضرتك من بعيد تطوف
كون تشوف روحي شخله بيها الخوف
مثل دم العروس الجاية اعلى اجناب
ويصبر عليها وجابها الزافوف
وشوف شخله بية الخوف
مثل حلت مدارس روحي احسها اطفال
حلت وتركتني وباقي بس صفوف
ويا وحشة صفوفي ومن يجيني الليل
ويا لون الوجه بعدك الضل مخطوف
.
.
.
.
#شعراء_وذواقين_الشعر_الشعبي
#جبار_رشيد
#ابو_تراب

.
انا وفاي مغرم بالمواعيد
اذا كتلك اجي معناها جية
واذا اكول انتهت عن رأيي ما احيد
كل واحد بصدرة قضية
جناحي ما تمس ريشة المصاييد
اليجي منها ذليل يلوذ بية
تتعب لا تنديلي العناكيد
انا خيال عنكودي الثريا
تتعب لا تدني السيف للجيد
انا موتي حياة يصير الية
بذرة رازقي وبتراب اجاويد
اذا تذبحني اصيرن مزهرية
حلو بحلگ الشهم سم العرابيد
والخايف يفز من ثوب حية
ابد ما اريد اعاشر ناس بالعيد
يذبحون الفرح كبل الضحية
گلبي بكل وكت ديوان اجاويد
ابد ما صار خيمة كاولية
.
.
.
.
#شعراء_وذواقين_الشعر_الشعبي
#عبدالكريم_القصاب
#ابو_تراب

.
لا تعاتب طير غادر بيتهم وبعيد طار
الي يدوس النار يدري مو ثلج جواه نار
احنا مثل الينتظر يمتى يموت
وتدري صعبة الانتظار
يا هوا بغداد بلة انطيني شمة
ليش غيري يشمك واني اغار
يا هوا بغداد دفيلي ضلوعي
ادري بيك شكثر حار
يا هوا بغداد يمتى ؟
يمتى تصفى من الغبار
يمتى يتكاسر نفس منك بريتي
ويكتل الغربة ال بنت في صدري دار
ليش غيري يشمك واني اغار
.
.
.
.
#شعراء_وذاوقين_الشعر_الشعبي
#خضير_هادي
#ابو_تراب

.
تدري البارحة شكد افتقدناك ؟
من كلنا انجمعنا وما لكيناك
مكانك خالي بس حاضر خيالك
وكمنا بلا وعي نحضنه ابدالك
و رد بارد حضنه وما حضناك
تدري البارحة شكد افتقدناك؟؟
تدري بيك نعرف يمتى موجود
من بالبيت نشتم ريحة ورود
عطر انفاسك نميزة بالانفاس
وفرق بس عطرك نشمه بلا احساس
وكل جرة نفس بيها ذكرناك
تدري البارحة شكد افتقدناك ؟؟
نحس روحك ترفرف يمنا بالبيت
ومن يمي فتت بيك انا حسيت
طبع بينا الحزن يبدي من الغروب
ومن نبجي عليك ندمع گلوب
وما ضل گلب عدنا من بچيناك
تدري البارحة شكد افتقدناك
.
.
.
.
#شعراء_وذواقين_الشعر_الشعبي
#جبار_المياحي
#ابو_تراب