.
هاي هية وداعتج لا تستحين
انتي مو اول حبيبة تشكك بسجينها هدوم السنين
انى وين وانتي وين
وليش اوچ واشتكيلج وانى اعرفنج تطفين الحريق بانزين
هو ذنبي لا سكنت ويا اللي جوني
ولا تبعت الراحلين
ولانه خالي و مختلي ومرتاح بالي
ولاني من العاشكين
ومدري ليلي شلون اخلصه
ولا سهرت ويا السهارى
ولاني من النايمين
ولاني عابد و ارتجي الجنة امن اموت
ولاني من الكافرين
اني قصتي وياچ قصة
انكتبت بورقة قديمة وخط حزين
ولو اكوا تأمين ع الحب جان اطالبهم يردولي ولو ربع السنين
.
.
.
.
#شعراء_وذواقين_الشعر_الشعبي
#للكاطع
#ابو_تراب

.
اذا على الفاتحة بالشارع تكون
الجادر من يسد شارع أذية
ماريد الفلوس مفطح تصير
فقرة هواي وزعوهن هدية
ولا اريد العراضة الترمي فوكاي
الرمي العشوائي ياخذ جم خطية
جهلكم هذا اذا ضليتوا وياه
يرجعنا لزمان الجاهلية
عيشوا احرار لا تغركم تقاليد
الحياة ويانا مثل المسرحية
بيش المحتوى الهادف تخلقوا
ورد حطوا بحلگ كل بندقية
.
.
.
.
#شعراء_وذواقين_الشعر_الشعبي
#رسول_محسن
#ابو_تراب

.
تمنيتك حلم وتطول هواي
وتصبح من صدك وكبالي الاكيك
على هالبت تجي معذبتني هالروح
تقنع بأي عذر لمن تحاجيك
الوحشة بغيبتك هدتلي العيون
واذكر كلت ما اريد ابجيك !
هسة امشي ودمعتي تمشي وياي
وتنزل كبل لا يجيبون طاريك
.
.
.
.
#شعراء_وذواقين_الشعر_الشعبي
#هيثم_رشيد
#ابو_تراب

.
من حنيتك شكد نبهتني الناس
بس اخجل اكلهم گلبي ما يفهم
عشت لخاطرك من انطعن ماكول
وبحرة صوابي كبالك اتكتم
واهد جرحي واواسي الشايل السجين
واكله اعذرني اذا سجينك اتألم
.
.
.
.
#شعراء_وذواقين_الشعر_الشعبي
#ايهاب_المالكي
#ابو_تراب

• .
بيني وبينك خطوة وباب
واهلي واهلك ميعرفونه شكد احباب
كلها بهاي الدنيا تجذب
بس العاشك مو جذاب
ما عرفوني ..... ونزلن دمعاتي من عيوني
وصارن فوك العتبة تراب
شلت سنيني بجفي وجيتك !
وماتت روحي بعتبة بيتك
حتى الشارع يدري بشوكي
ويعرف بية شكد حبيتك
وي انفاسي وخطوة بخطوة
وي كل دكة بگلبي لكيتك
صح ما شفتك بس حسيتك
عطرك ريح ويعصف بية
وكلش كافي من اشتميتك
.
.
.
.
#شعراء_وذاوقين_الشعر_الشعبي
#ادهم_عادل
#ابو_تراب

.
.
معقولة ما أيست يا گلبي معقولة ؟؟
تحفر ابير الهوا ١٦ متر برمل
ب هيمه ولوحدك
شيطلعك وما نبع جا خلكك شطولة ؟
الماشي عليهن كبل غيرهن وتنسعد
اترك بعد كل حجي واترك طريق البجي
والضحكة مشمولة
وميصير سيلك نهر مادام مايه مشى بكل كاع مجهولة
واليسألك هاجرت ؟؟ اي ريش جيبه عذر
والدم يبس وانشلع لا كله مكتولة
براسه خيط وجذب فر مغزلك بالهوة
الظاهر الها الخلك يا گلبي مكيولة
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
انا بلياك مدري شبية ما بية
زلف وبلاية ترجية
درب ما بية كل جية
نهر فاض وتبع مية
رجع بس ما لكاله جروف
كون تشوف روحي شخله بيها الخوف
مطلوبة نذر وتخاف ما توصل حضرتك من بعيد تطوف
كون تشوف روحي شخله بيها الخوف
مثل دم العروس الجاية اعلى اجناب
ويصبر عليها وجابها الزافوف
وشوف شخله بية الخوف
مثل حلت مدارس روحي احسها اطفال
حلت وتركتني وباقي بس صفوف
ويا وحشة صفوفي ومن يجيني الليل
ويا لون الوجه بعدك الضل مخطوف
.
.
.
.
#شعراء_وذواقين_الشعر_الشعبي
#جبار_رشيد
#ابو_تراب

.
انا وفاي مغرم بالمواعيد
اذا كتلك اجي معناها جية
واذا اكول انتهت عن رأيي ما احيد
كل واحد بصدرة قضية
جناحي ما تمس ريشة المصاييد
اليجي منها ذليل يلوذ بية
تتعب لا تنديلي العناكيد
انا خيال عنكودي الثريا
تتعب لا تدني السيف للجيد
انا موتي حياة يصير الية
بذرة رازقي وبتراب اجاويد
اذا تذبحني اصيرن مزهرية
حلو بحلگ الشهم سم العرابيد
والخايف يفز من ثوب حية
ابد ما اريد اعاشر ناس بالعيد
يذبحون الفرح كبل الضحية
گلبي بكل وكت ديوان اجاويد
ابد ما صار خيمة كاولية
.
.
.
.
#شعراء_وذواقين_الشعر_الشعبي
#عبدالكريم_القصاب
#ابو_تراب

.
لا تعاتب طير غادر بيتهم وبعيد طار
الي يدوس النار يدري مو ثلج جواه نار
احنا مثل الينتظر يمتى يموت
وتدري صعبة الانتظار
يا هوا بغداد بلة انطيني شمة
ليش غيري يشمك واني اغار
يا هوا بغداد دفيلي ضلوعي
ادري بيك شكثر حار
يا هوا بغداد يمتى ؟
يمتى تصفى من الغبار
يمتى يتكاسر نفس منك بريتي
ويكتل الغربة ال بنت في صدري دار
ليش غيري يشمك واني اغار
.
.
.
.
#شعراء_وذاوقين_الشعر_الشعبي
#خضير_هادي
#ابو_تراب

.
تدري البارحة شكد افتقدناك ؟
من كلنا انجمعنا وما لكيناك
مكانك خالي بس حاضر خيالك
وكمنا بلا وعي نحضنه ابدالك
و رد بارد حضنه وما حضناك
تدري البارحة شكد افتقدناك؟؟
تدري بيك نعرف يمتى موجود
من بالبيت نشتم ريحة ورود
عطر انفاسك نميزة بالانفاس
وفرق بس عطرك نشمه بلا احساس
وكل جرة نفس بيها ذكرناك
تدري البارحة شكد افتقدناك ؟؟
نحس روحك ترفرف يمنا بالبيت
ومن يمي فتت بيك انا حسيت
طبع بينا الحزن يبدي من الغروب
ومن نبجي عليك ندمع گلوب
وما ضل گلب عدنا من بچيناك
تدري البارحة شكد افتقدناك
.
.
.
.
#شعراء_وذواقين_الشعر_الشعبي
#جبار_المياحي
#ابو_تراب

.
هواي أثار ضلت بس ألم لا
المخطط يسمون الكثرهن
عندي جروح من التفت تلتاف
لان واحد بواحد صرت اشدهن
الجمهن لان بجروحي الك صوت
سمعني الجاب اذنك ما سمعهن
انا من اذكر عشرتك يحمر الشيب
احمه ووادمك كالوا صبغهن
صفت بثمن اصابع قصتي وياك
عض سبابتيني خلصتهن
عليك ومن كثر عضات الانياب
يلوذن بالرحي لو ردت اعضهن
يا بوية من اكضك بس الاخلاق
سواتر حاميات المستغلهن
.
.
.
.
#شعراء_وذاوقين_الشعر_الشعبي
#صباح_الهلالي
#ابو_تراب

نظيف ومو ملعب مثل تربيتك
فطير وكتلي حبني وكبل حبيتك
لو حارك هديتي ولا شمرتك هاي
كلما افوت اشوفن سلعة يم بيتك
وال مسويها سبحة وتفر بيها هواي
هاي كلادتي وكاطعها من جيدك
ازدحام بحظرتك وانا بطلاع الروح
مدافع خلصتها وما لزمت ايدك
جنت تخطي وانا بحجة الشقى اتلكاك
اشد عينك واحط من صيدي يم صيدك
انا السابوح جان اليضحك اعلى الروج
الغرگ بين علية بس كتلي ماريدك
.
.
.
.
#شعراء_وذاوقين_الشعر_الشعبي
#مصطفى_العقابي
#ابو_تراب

.
المن جايني دخيلك ؟
جا ما اجيت امس من جان عندي احساس اغنيلك
جا ما اجيت من جان البرد بظلوعي يوميلك
جنت وياك اشبه خشبة القران
شايل جفي وادعيلك
.
.
.
.
#شعراء_وذاوقين_الشعر_الشعبي
#سيف_زبون
#ابو_تراب

• .
يردوني اكتب ! شكتب وشتغزل ؟
ما تستفزني الدنيا مثل الاول
رد فعلي بارد صار حتى من النار
ميهزني كل شي وكلشي كمت اتحمل
مر كلشي بية وكلشي اصبح مألوف
مألوف حتى الجاي بالمستقبل
بعدين وينه اليسمع وخلكة طويل
ترجيت خلكي وعافني وما طول
المحنة اكبر من كتابة الاشعار
بس اليأس مر والتفائل اجمل
لا بأس اذا حب على الگلب يطرق باب
بلكي الخلايا النايمة ترد تعدل
.
.
.
.
#شعراء_وذاوقين_الشعر_الشعبي
#مرتضى_الميالي
#ابو_تراب

.
احبها وما اعرف مثل اليمثلون
الم سوالفي واوكف واكلها
ولا عندي بخت حتى انتچي علية
ولا اعرف المواقف واستغلها
حب فطرة وعشك وادم فلاليح
النحبها نوسط الوادم ل اهلها
نجي يم بابها نحط عش عصافير
وفوك العش احبج نكتبلها
بس چنة اختلف حب هاي الايام
سوالف باردة وما اعرفلها
سوالف ماي لاجن مو طعم ماي
والف جلمة عطش موش بمحلها
.
.
.
.
#شعراء_وذاوقين_الشعر_الشعبي
#صباح_الطائي
#ابو_تراب

• .
اثنينهن دمعي وضحكتي بلونها
وضايعه الدنيا بخضار عيونها
ابقى حاير بين تعبي وراحتي
روحي يمها تصير ابد مو مالتي
بية اضمها وغيري ميشوفونها
اثنينهن دمعي وضحكتي بلونها
وحدي موجود بكلبها وبالها
الله مدري شحاط فوك خيالها
ترفة تعثر بالضوة وتوكع سهر
النجمة تعرفها ويغازلها الكمر
النسمة بس عشاكها يشمونها
اثنينهن دمعي وضحكتي بلونها
.
.
.
.
#شعراء_وذواقين_الشعر_الشعبي
#علي_رشم
#ابو_تراب

.
لميت كلشي جنح و استغربت من شفت
حضن السما الخالي
تلاكينه و شكد ورد ضل مستحي ابالي
و فزيت و تلفتت بس انا و خيالي
وبردت الدنيا وغصن شابك غصن
والنهر معقولة ما يلتفت للعينها تلالي
معقولة اصبعك بعد ما يفكد هلالي
هو انا صح ما متت بس انت چتالي
يبو عيون الشهل شمضيع وتحسب ؟
تعبني اليحب من يتعب يچلب
( اسحكني ) الترب من تنسحك تنباس
ماصخ شوكها الما تعرك من تحب
واشلع گلبي شلعان الگلب مريود
الشاعر من يضل مرتاح ما يكتب
وكلهم بس انا مدلل بهذا الكون
النهر متروس بس يغار من الحب
ياهو اليوصلك يالجوة ضلعي تبات
انا الليل ونهارة بابكم محرب
.
.
.
.
#شعراء_وذاوقين_الشعر_الشعبي
#احمد_عاشور
#ابو_تراب

.
فضلج جازي من ذاك الوكت لليوم
تعبناج لازم نشكر النعمة
كواج الله يمة شلون ظهرج صار
اشو حملج ثكيل وانتي مبتسمة
يا ام تنور طين تفكدج الجيران
و ولد المنطقة يصيحولج يمة
تغزر بيج ال شلونج من الاطفال
شيكلولج تكولين بالخدمة
تنصحين الخلص حياته عكال
ما تقرين بس سوالفج حكمة
ديرة عاطفة گلبج يدلي الطيف
واليحلف براسج ينترس حشمة
ترى بهذا عمرنا ولسه من تمشين
كلنا نضيع اذا ما جفج نلزمة
عيشتينه عيشة تسوى ولد الخير
من جانت ضروفج تكسر الزلمة
من جانت كبل بفلوس حتى الماي
والحبوب البخيته تشتري الذمة
.
.
.
.
#شعراء_وذاوقين_الشعر_الشعبي
#حسام_الخفاجي
#ابو_تراب

.
كالوا بالعرس طشيتي جكليت
فرحانه وترستي بركصج البيت
المهم بعدج بجينه
انجرحنا وما حجينه
اخاف احجي وتكول الناس مليت
كالوا بالعرس طشيتي جكليت
كالوا بالعرس لبست تراجي
الهي بيا ذنب يومية باجي
احب الما يحبون
عليهم تبجي العيون
اخاف احجي وتكول الناس مليت
كالوا بالعرس طشيتي جكليت
.
.
.
.
#شعراء_وذاوقين_الشعر_الشعبي
#علي_البديري
#ابو_تراب

.
زعلان بس يا زعل لمن ترد للصدك
كبل المنادة اجي وشلون جية اجي
اركض ركض محترك
يالذتك بريتي وين الكى مثلك هوا
لولاك والله اختنك
هي شراكة نفس لو سكت گلبك سكت گلبي
ويدك لو يدك
ولو ما وكتنه صعب ما جان ابد نفترك
كلمن مشى لحالته
واحد سكن بالغرب واحد سكن بالشرك
وكل هالمسافة البعد وسوالفك تنسمع
جن احنه حلگ بحلگ
.
.
.
.
#شعراء_وذاوقين_الشعر_الشعبي
#الكاطع
#ابو_تراب