.
هدايا الشوك يمك ... يابه ردها
وعلية سيوف هجرك ... يا هو بردها ؟
ايا ليلة وداعك ... يا بردها
متت لو ما لحك حضنك علية
.
.
.
.
#شعراء_وذواقين_الشعر_الشعبي
ابوذية للاهواز
#ابو_تراب

.
نست روحي المرار المار على الكيف
وهواك يعيل بيها وعيب تنساه
شيصير اعلى الترف لو ينحسب ضيف
اعلى غفله وعيد وصل الزين محلاه
انا بعازة الموت وحاجبك سيف
اموت بغير هذا السيف ماريد
الك جانت يحلو الطول جيات
شعجب تبخل علينا بجية العيد
احن لمسامرك والكاك شلكاك ؟
شري المعشر حلاوة شوك ما بيك
ويمر صيفك صبر واتنطر شتاك
تبيعك عزتك وبروحي اشريك
تراك وي النفس يا الما تجي اشراك
وبالدم اليدور تدور احس بيك
ابد ما سامرتني الاه لولاك
ولا عمري انطفى بلليل المواعيد
الك جانت يحلو الطول جيات
شعجب تبخل علينا بجية العيد
.
.
.
.
#شعراء_وذواقين_الشعر_الشعبي
#عريان_السيد_خلف
#ابو_تراب

.
كلبوني على الصفاح وعلى البطن وعلى الظهر
كالوا نشبعك قهر
كلت اموت اعلى القهر
كالوا انت وين رايح ؟ ولك والجنة بعيدة !
وانت صارتلك جهنم مستقر
كلت اسافر ... ها تسافر ؟ يا سفر ؟!!
قبل لا انت تسافر جيب السنين العشتهن يا بشر
هاكم سنيني العشتهن قسموهن
قسموهن ما طلع بيهن شهر !
.
.
.
.
#شعراء_وذاوقين_الشعر_الشعبي
#عبدالحسين_الحلفي
#ابو_تراب

.
من كل گلبي احبها وما مجاملها
حبيبتي وانا رجالها وخلها
صح ما نتفق مثل الحجر والجام
بس ما نفترك بالعركة اغازلها
مزلجيين والبيناتنا بكل يوم
يوصل للنهاية وربك يحلها
وضلينا سوة مو لان متصافين
العلاقة التستمر تقوى بمشاكلها
بعد شيفضها اذا مغرور حب مغرور
التحرمها كمت اعناد احللها
واخبصها ( احبج حيل احبج موت )
ومن تطلبها مني اعناد ما اكلها
هي الصحته زينة المرض عنده فراك
وما مهتم ابين من ازعلها
وانا عندي نقص لمن علية تغيب
جن كاتب قصيدة وما مكملها
وهاي الروح مو ياخذها ملك الموت
سبحان الله ترجعلي برسايلها
.
.
.
.
#شعراء_وذاوقين_الشعر_الشعبي
#رائد_ابو_فتيان
#ابو_تراب

.
كافي انتظرته عمر ! هيج انت مساهل ؟
كتلهم ابقى أنتظر مو طعمه بس يختلف
المنتظرة يستاهل
هذا البنص البحر والمي يطب مركبه
تضل روحه بالساحل
ووزع ادواره الزمن
اختاريت دور انكتل ما ادبر الكاتل
وشيبت ما عيدت يفصل بقميصي الزمن
ول هسة ما كامل
وميهمني اذا ما كمل ما دام صارن سوة
اتشائمت متفائل
.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
نباوع على وجوه الجزتنه
وما ندري عن ياهي متنه
ما ضل ولف يفزع بمتنه
اعزاز ونسونه بفاتحتنه
جربها مرة ونام ملچوم
وشوف شثكلها عليك الهدوم
شبعداتكم بس هو الاغرب
ليش الدرب من يمكم اقرب
كون اليرد للبيت لو غاب
جفوف التحبه التفتح الباب
.
.
.
.
#شعراء_وذواقين_الشعر_الشعبي
#مثنى_كامل
#ابو_تراب

.
بوسلي روحك يمين الله عليك
واعتذرلي خاف ما اكدر اجيك
بيني وبينك مسافات وحدود
وانت عندي احلى من كل الوجود
وحلم بالنسبة الي لمسة اديك
بوسلي عيونك وهن مغمضات
ولا تفزز اي دمع بيهن يبات
خاف مني يفز دمع بعيونك
يسيل على الخد ويغير لونك
وما اسامح نفسي لو شي صار بيك
بوسلي روحك يمين الله عليك
.
.
.
.
#شعراء_وذاوقين_الشعر_الشعبي
#جبار_المياحي
#ابو_تراب

من مذكرات شاعر ...الحلقة ( الرابعة )

بعد ان ربطتهم علاقة حب قوية في سوريا ...البنيه طلع قبول طلبهه ( الهجرة ) الى امريكا عن طريق منظمة الهجرة العالمية ال ( un ) ..ولذلك قررت ان تسافر دون ان تفكر على اقل تقدير تودعه
شاعرنه گعد الصبح واتصل بيهه ولكن جهازهه مغلق
ولمن زاد قلقه وراح الى محل سكنهه لگه الابواب ايضا مغلقة.
اتصل بصديقتهه وكانت الصدمة ..بقى فترة طويلة مامستوعب الموضوع لدرجة في احد الايام وبدون وعي راح وگف اگبال اطلال شرفة الشقة الجانت ساكنه بيهه وفي لحظة ضعف نسى او تناسى هي اصبحت بعيدة عنه بمسافات طويلة وطويلة جدا
هاي القصة ساهمت بولادة نص غنائي انكتب عام ( ٢٠٠٨ ) لكنه فعليآ ينتمي الى حقبة الاغاني السبعينية
نص رصين جدا كتبه الشاعر المرحوم علي الفريداوي صاحب قصة اليوم ...

حبيبي انه البارحه اشتاگيتلك
وبلا وعي لحد بابك اتعنيتلك
مدري شجاني انسيت انت مسافر
واگف ابابك واكسر انه الخاطر

مو دمع دم من الجفن هليتلك
حبيبي انه البارحه اشتاگيتلك

اتذكرت يم بابك احلى ايامي
وشلون خلصت بالوعود احلامي
منين اجيبك حتى اشوفك همي
سافرت مني وضل حنينك يمي

مدري شجاني انسيت انت مسافر
واگف ابابك واكسر انه الخاطر
مو دمع دم من الجفن هليتلك
حبيبي انه البارحه اشتاگيتلك

عندي سوالف ضامهن لو اشوفك
تنزل دموعي تبوس حتى جفوفك
وياك راحت سافرتلك روحي
ولن منك انته محتفظ بجروحي

اتذكرت ايامك وحنيتلك
حبيبي انه البارحه اشتاگيتلك

ضليت واگف منكسر يم بابك
معقوله ناسي وماذكرت احبابك
منين اجيبك حتى اشوفك همي
سافرت مني وضل حنينك يمي

مدري شجاني انسيت انته مسافر
واگف ابابك واكسر اني الخاطر
مو دمع دم من الجفن هليتلك
حبيبي انه البارحه اشتاگيتلك
.
.
.
.
#شعراء_وذواقين_الشعر_الشعبي
#علي_الفريداوي
#ابو_تراب

.
صفكوا كالوا غلبنا وانكطع نفس البحر وانكضى الماي
لا ولا هاي الخسارة وما يتيه العده سجة وعنده ضنة وعنده نية وعنده راي
الغابة ما تكضيها سله
وشجرة من تخسر ثمرها اتاني موسم ثاني جاي
شما غفت سدت حلمهم
كلها جدم السيل جاي
الخناجر ما ترد صدر اليهد وسلاحه جرحه البير كلما غمكت جرحه المساحي يزيد ماي
.
.
.
.
#شعراء_وذاوقين_الشعر_الشعبي
#الكاطع
#ابو_تراب

.
المفروض اروحن وانت تلحكني
انا بسنتين اسبكك ليش تسبكني ؟
شلون تروح وتفك الشراكه شلون ؟
سهلة الشغلة عندك من تفاركني
طاحن فوك راسي وخشمي فوك الماي
ومعاند زماني وما يغركني
ما حشمت مرة شكد سحكني البين
ذخرتك عون الية شلون تسحكني
شلون تروح وتفك الشراكه شلون
سهلة الدنيا عندك من تفاركني ؟
فرق شبرين ما بين الدللولين
وكماط اليشبكك جان يشبكني
لعيونك عفت كاروكي وتنحين
يوم سمعت شخصك راح يلحكني
.
.
.
.
#شعراء_وذاوقين_الشعر_الشعبي
#جبار_رشيد
#ابو_تراب

.
اول ما تعارفنا بعيدين
ونتخيل وتشبكنا المكاتيب
بعيدين انتمنى نصير جيران
لان بجناحنا شدة مصاويب
القلق والماكو نوم وموعد بخوف
ونسيان الاهل والشك اليصيب
عشناهن مثل حال المساجين
من واحد لواحد يشكي تعذيب
وتشاوفنا بمكان بطرف العيون
ومن المسحتى بهدومنا نغيب
لوما المستحى ما نرد للبيت
بس الناس ما ترحم مصاويب
وشفنه الحب حلو بشلعان الگلوب
حلاه الصبح لمن بالندى يشيب
بجفوف الزمن خلينا الگلوب
وباجر من يجي شيجيب خي جيب
تعاشرنا وصلنا لحال مو زين
مرضى اثنينا بس نلتقي نطيب
.
.
.
.
#شعراء_وذاوقين_الشعر_الشعبي
#حسام_الحمزاوي
#ابو_تراب

.
يمه ذول اهل القصر ما لعبوني
يمه من شافوني اجيت اتنادسوا واستغربوني
يمه ما سموني بأسمي وكالوا هذا ابن الفقير وشتموني
وكالوا هذا ابن الصريفة وعيروني
يمه جا هو الفقير شسوى من نچلة بعمرهم
يمه جا هي الصريفة شماخذه وخايف قصرهم
يمه كالوا لا تمر منا بعد بالك تشم ريحة وردنه
وكالوا بجدمك الحافي نخاف يترب عكدنه
يمه عدهم كلشي عدهم و احنا بس الماكو عدنه
.
.
.
.
#شعراء_وذاوقين_الشعر_الشعبي
#كاظم_خبط
#ابو_تراب

.
يا ابن الناس غيرك ماكو موضوع
هلبت بالجذب شخصك ذكرنا
نسولف بيك ل أخر لحظة بالليل
وترد من الصبح تشغل فكرنا
ما عنت عليك بساعة غروب ؟
روحك واشتهت تسمع خبرنا !
يا روح الگلب يا عزة الروح
يا دمعاتنا و همنا و سهرنا
يا اول عهد يا تالي الايام
يلعب صبانه يا شيبة كبرنا
شكد كبلك مشوا ما سلوا الروح
ولا بغيابهم كسروا ظهرنا
البعد نيران كبره يبخر الدموع
وبس يزود يتبخر بصرنا
.
.
.
.

.
#شعراء_وذاوقين_الشعر_الشعبي
#جبار_رشيد
#ابو_تراب

.
بضيجك ياهو كلك ... ما نعينك
الدمع لو طاح اشربه ... من عينك
لجن من وصلولي ... مانعينك
هلك منها الوصال احرم علية
.
.
.
.
#شعراء_وذاوقين_الشعر_الشعبي
#اياد_عبدالله
#ابو_تراب

.
صح انت نشفت الدمع
بس لو ذكرتك بالجرح دمع الجفن شيركده ؟
وصح انت صح انت الاصح
لو خيروني ويا الصحيح ويا الصحيح انت ابده
حق انت يا حزام الظهر
عيني القوية وما تشوفك رمده
لوليله يا كاع الوطن شلنا بوطن مابي نجف
وشلنا بنجف مابي علي
وشلنه بعلي الما يحضر بكل شده
وهذا الوطن يا ابو تراب
وانت الجنت داحي الباب
شو سدوا علينا الباب
.
.
.
.
#شعراء_وذاوقين_الشعر_الشعبي
#محسن_الدخيلي
#ابو_تراب

• .
اكبر خطأ سويته بحياتي
خليتج جزء من ذكرياتي
قصة حبي غلطة شاطر وياج
انا المفروض احسبج من خواتي
اعلى كد الخوية شكرا اني ممنون
حالج حال سين بمعجباتي
انتي المعجبة الطخيتلج راس
الدخلتي لبيتي مو بس لحياتي
وانا المفروض اسولف رسمي وياج
واضل محمي بغروري ومفرداتي
احيانا غرورك والله يحميك
تواضعتلها بس خسرتني ذاتي
دنت نفسي لان ما شايف عيون
كلما ترمش تقرب وفاتي
الفرق بينج وبيني ... احلامج فلوس
وجانت شوفتج كل امنياتي
عيشتيني صدمة عمري والله
احمد الله مو منج بناتي
.
.
.
.
#شعراء_وذاوقين_الشعر_الشعبي
#علي_ناظم
#ابو_تراب

.
بس اصبري مرورة الفركة اعلى صدري تطيح نجمة
واعثر بصوتج ضوة واتبدى ظلمة
يوكف بصدري هوا يكفيله دنيا وخلكي نسمة
توها بردت وانتي مريتي رصاصة
خايف تروحين واذبل والعطش يترس مكاني
وخايف اشرب روحتج واخذلي ليل وما اتاني
هاي الية سنين بارد محد بملكاه جواني
شلون ما طكت عشب بية الثواني
ويخلص الليل ويخضر ليل ثاني
بية واهس كافر وربج هداني
الليل شبعني سفر واني بمكاني
.
.
.
.
#شعراء_وذاوقين_الشعر_الشعبي
#علي_رشم
#ابو_تراب

.
هذا صويحبي والعنده مثله يصيح
بس هذا البقى من بين الف صاحب
هذا اليعتذر عن شي الما سواه
هذا الكصته تعرك قبل لا اعاتب
هذا الي يردهم من علية يحجون
اليصون الملح من ينمدح واجب
.
#علاء_عبد

حرز عكدة لسان بصدري اخليك
شكد سكتت وادم من اماشيك
انت الواكف وما غلبتك ناس
الكل تتراكض وما لحكوا بيك
معزة جف جنت بعيون غركان
شما سويتلك ما راح اجازيك
.
#مهيمن_الامين
.
.
.
.
#شعراء_وذاوقين_الشعر_الشعبي
#ابو_تراب

من مذكرات شاعر... الحلقة ( الخامسة )
(( نافذة تسلط الضوء على ظروف كتابة قصيدة .. ما لشاعر.. ما ))
يگولون بألعاب السحر وخفة اليد دائما الساحر يلهي عيونك ويخليك تركز على مكان بينما يعبر عليك الخدعة او الحيلة من مكان اخر
القصيدة الي راح احچيلكم عنهه اليوم تماما ينطبق عليهه المثال الي ذكرته
قصيدة ( موت شاعر ) انكتبت سنة 1994 ...تتحدث عن شاعر يتخيل نفسه مات ويحچيلك بالتفصيل من اول لحظة فارق بيهه الحياة وحتى اخر لحظات الدفن ..طبعا من تسمعهه اول مرة راح تشوفهه قصيدة وجدانية بيهه حزن والم يلامس روحك بشكل غريب ...ولكن بعدين من تقراهه اكثر من مرة وتمعن النظر بيهه راح تلگاهه قصيدة سياسية بأمتياز !!
يعني بخفة قلمه گدر يشغل عيون الرقابة بفكرة الموت ومرر افكاره السياسية بطريقة عجيبة
ما اگدر ان اگول اكثر من ان مثل هذه القصيدة لا يكتبها سوى الشاعر الكبير الشاعر والصحفي جبار الفرطوسي



موت شاعر

ملك الموت اجاني وسأل عن حالي
وعن اخر قصيده چانت ابالي
ذكرت ايام زغري والشباب الراح
واخر مشكلاتي بوضعي الحالي
اخرني دقائق ما اخذ روحي
احترامآ للشعر والگلبي الخالي
وبهاي الدقائق اهلي گالوا مات
واني اسمع واحس بكلشي يجرالي
بدو غسلوا جسمي وحضرولي اقماش
اذكر يسمونه الكفن من چنت اتنفس
لفو جسمي بيه وانه بي مشغول
ابيض لونه يشبه ثوب المعرس
عجيب !!
اشگد روائع اكو بهل موضوع
بس موهسه وكت ادروس واندرس
ومابين الزعيق وضجت اهل المات
صوت بأذني اجاني بكل أدب يهمس
من يموت شاعر تحزن النجمات
والاشجار تبچي تگول شاعر مات
والأزهار والأنهار تمشي ارواحهن وي روحه امشيعات .
حبات الرمل من اجله تچوي الگاع
وصگور الجزيره لموته حزنانات
وطيور المراقد ذني علويات
يدعن كل حمام الكون يلتم ويه روحه يبات
اذا كل هذه يحدث لون شاعر مات
عليك بكل سعاده تودع الحلوات
وبده موكب وداعي وشفت بيه اشكال
اسمعت احله شعر بلسان حلوه انگال
گالت رايح الله وياك جاورهم
عندي احباب غاد اهناك سامرهم
گلهم روحي صلفه وظاله انه هنا
خذو كل الحلو ظل بلگلب مرهم .
ومشه الموكب .
وصلنه لفلكه الداخل
مايسمع السايق لوصحت نازل
تمنيته يفرني الثوره كلهه اليوم
هاذه فراگي الهم مو مؤقت دوم
وبشارع الداخل ابدأ بحردان
اذكره من چنت يمه امر تعبان
احچيله شعر يطرح عليه افكار
وعن اخر مشاريعه اسئله شصار
سوگ الفلكه اودعه
واعرف الأسعار
وأخبار الحصار
ولعبه الدولار
جنت اتمنه ابقه لأخر المشوار
وأشوفن معركة امريكا ويه الروس
وياهو بلنتيجه عله الثاني يدوس
وهم يرجع عراق الذهب والخيرات
ويجي الوكت التفرح الطفل
خمس افلوس
ها جبار !!
ميت والسياسه تلعب براسك ؟
شجاك بسرعه شو ثقيت بلتابوت
شحسبالك خشب ماينقل احساسك
اترك هاذه حچيك غير الموضوع
سولف عن وداعك لأهلك وناسك .
وامشي اهنا حبيب سوادي ساكن جان
اهنا ربع عندي اهنانه عندي اخوان
مدرسة الطفولة ياسلام اهنا
جان اجمل عمر بالفقر كضينا
هنا طالب وحمزه هنا هنا شنشول
مسكين الحصار ابيته ضل يصول
مدرس ثانوي وراتب حكومه اشبيه
والاطفال كثروا والزمن مخبول
وامشي وعندي ذكرى اهنا
واهنا اصدقاء وبين احبه اهنا

اهنا كلبي فز وراد مني ايطير
مدري اشبيه راسي محاصره التفكير
هزني ورجع هزني ولمه آيس صاح گال انزل اخذ من الملاك اجناح
حميد الكعبي بيته اهنا
وهنا ماجد بيوم المزامط طاح
مدري اشلون نزلت دمعه
من عيني
اثاري الناس
هم تبچي بلايه ارواح .
وامشي واه هذا محمد السعدي
رفع ايده يحي جنازة الميت
حقه ماعرفني واني بالتابوت
من خلف الخشب ماينعرف ميت
ومشي واه كلبي .
هاذه سوگ الدور
مونسوان يمشن بيه
ذني بدور
بعده الگلب اخضر يعشگ الحلوات
مايبسه الموت واخذ منه النور .
فجأه طار گلبي طيره العصفور
حلق بلسمه وظل عل سطوح يدور
فر قطاع واحد مانسه ولا دار
مثل طير بسمه ومن الصگر مذعور
گلبي شبيك ? ماجاوبني ظل يدور
وبلهفة امفارگ شفته حط يم بيت
عفيه اعليه ما ناسي ولد صنگور .
اهنا فاضل صباح وناظم الطيبين
اهنانه اطفال بس علطيب متربين
ها نوار وين سوالفك وينك ؟
مشتاك ارد اشوفك رايد احجي وياك
نسيت !!
الخشب حاجز بيني وبينك

كل هاذه التمني وموكب التوديع
يم فلكه الداخل بعده ما طالع
ناس اهواي تتسوك الجوع
وگاطعه الشارع
مشه الموكب عبرنه شارع الفلاح
سوك التايرات امكابل السده
اه ياذكرياتي واه عشك الكاع
ياخلك العليه شطوله وشكده
ومشه موكب وداعي وعل جوادر فات
ناس هواي اشوفنهه تحيي المات
موكلهم عرف بس جني اعرفهم
اصدقائي برحلة الاحزان والاهات
اي ياكلبي هذا ال 39
قطاع الصبه واول عشك للروح
اجمل ذكرياتي اهنا بهل قطاع
و وداعه عليه اليوم مامسموح
.
.
#شعراء_وذاوقين_الشعر_الشعبي
#جبار_الفرطوسي
#ابو_تراب

.
انا الخواف يا دنيا انا الخواف من كلشي
ولو احلم حلم مو زين انا ارجف قبل رمشي
يهزني الليل الف هزة
وافز بالليل الف فزة
وتعز روحي واكل للخوف ضل بالبيت وانا امشي
انا الخواف يا دنيا وحال المبتلي حالي
اعبر على النهر عطشان والمي مو على بالي
من اولها وجفيت وياي شترجاج من تالي
تعز روحي واكل للخوف ضل بالبيت وانا امشي
عيوني وجذبن وياي وين الكى الصدك عدمن ؟!
بس طيور تعبانات يمي بلليل يلتمن
سوالف همي و دنياي بيمن هالگلب أمن !؟
تعز روحي واكل للخوف ضل بالبيت وانا امشي

.
.
.
.
#شعراء_وذاوقين_الشعر_الشعبي
#الكاطع
#ابو_تراب