.
مامش خيط من منديل يندل وجنه الدمعة
مامش عين تشعل بالجرح شمعة
جا يمتى الجرح ينشاف ؟!
كلشي مدخن مدخن لحد الله
وما ضلت دروب نضاف
جم كذلة حرير بلا مشط غبشة
جم عصفور ينطر جدحه الغبشة
جم دكة جرس مخنوكة بالوحشة
جم وردة بلايا شفاف ؟!
كلشي مدخن مدخن لحد الله
.
.
.
.
#شعراء_وذواقين_الشعر_الشعبي
#عبدالكريم_القصاب
#ابو_تراب

.
ادك روحي على العتبة نذر ومخضر اتمناك
اصيرن في للمخضر اصيرن في
واشب كامة خضار و مي
اسيلن غاد ... افيض كل سواجيك اسيلن غاد
ألملم كل عطش روحي واشتله بابكم سدرة
جبيرة وبالعطش توكف سواجي صغار
حزينة وبالربيع تخضرلها عشوش
يا العمرك فرح مرشوش
يا الحزنك خبز يبجي الصبح على الناس
يا العشكك درب مسكون
ون من الصغر بالراس
واقرالك دفاتر ضيم ويضل بس حرف بالراس ما ينكال
يا العشكك هني وجتال
.
.
.
.
#شعراء_وذواقين_الشعر_الشعبي
#علي_الشيباني
#ابو_تراب

.
حبيتها وهم قنعتها تحبني
الجانت كبل ما تقبل تصاحبني
بايگ گلبها المنها كل ساع انباك
وهسة انا ما اشتاگ هي التشتاگ
مفاركها بس ما تكدر تفاركني
تشتكي مني لصاحبتها الحلوة
وتكلها علميني شكله ويهوى
بالليل جانت باردة ب شتانه
بنص الغطى متلفلفه وسهرانه
وتكول لا واحد يجي ويسألني
ياهو المحيرني وشنو مسهرني
وبشوفتي تبرد گلبها العطاب
تانيني هي بحجة ترش الباب
وچي جنت منها هواي كل ساع انذل
شالع گلبها وهسة كل ساع ازعل
ازعل وهي التجي وتصالحني
حبيتها وهم قنعتها تحبني
.
.
.
.
#شعراء_وذواقين_الشعر_الشعبي
#حسين_العتابي
#ابو_تراب

.
تذكر من احط بوسات الك ع الباب
والباب الصبح من تطلع يكلك
وتذكر من اجي لشوفتك جية روج
وعلى حطتك جرف ضليت ما املك
لا انا من البحر خلصان وابقى وياك
ولا جرفك يكضني وتعبت خلك
بصراحة انت جرح وادري من اخيطة يطيب
غلاتك لو صبر مانعني ما اشلك
السما بعينك شبج عوف الاوهام وطير
حط ايدك ب أدي لو اموت ما احلك
بعدك والسهر وحجاية البطران
تولني نهش وتشوف ما اكلك

.
.
.
.
#شعراء_وذاوقين_الشعر_الشعبي
#سمير_صبيح
#ابو_تراب

.
عساها بحضك وكلمن قرأ ابالك
وعساك بسهم ما يخطيك كتالك
واجي شامت لتابوتك قميص ألوان
ومو جناز اجيب ادفوفي وابرالك
وهالمرة من اعارك مو عليك وياك
اعارك شكو جتاف مدنك وشالك
صوجي بجنطة وحدة مسافر انا وياك
كرهت هدومي كلها من العطر مالك
وحفرت الجرف كله ابالك اغرك بي ؟
اطبنلك سبح من صوب شلالك
.
.
.
.
#شعراء_وذاوقين_الشعر_الشعبي
#مصطفى_العقابي
#ابو_تراب

.
الدنيا ضلت للرخص
مو وكت اليحب بحرص
وكت الافعال الجارحة
ويا گلبي بطل لا تحس
ولا تنتظر دورة شمس
باجر شبية البارحة
خسرانه يا روحي العشك ... والصحبة ... بيمن فالحة ؟!!
( امضيت عمري منصفآ ) ما افكر اخذ غيبة
( قد كنت شخصآ طيبآ ) بس ما تفيد الطيبة
واتأمل الناس التجي مو مثل ناس الرايحة
ويا جفني يالدمعك نزف
الميت غريب ومو عرف
ادينه واجبنا وخلاص خلينه نقرأ الفاتحة
.
.
.
.
#شعراء_وذاوقين_الشعر_الشعبي
#مهند_العزاوي
#ابو_تراب

.
بعد شيرجعة انتهى البيناتنه
لا اسفنه يفيد لا دمعاتنه
ما يرجعنا الندم
احنا داخلنا انهدم
ومر قطار الشوك عدا وفاتنه
احنا من خاطر علاقتنا انكسر
ما اتنازلنا ولا بينه أنجبر
صار همنا الغلط من عدمن بدر
طبعآ تسيئ الامور
احنا مالينه الغرور
وكلمة ما نتحمل اثنيناتنه
بعد شيرجعة انتهى البيناتنه
العشك يعني التفاني التضحيات
وما يدوم الا بوفى ونكران ذات
احنا ما قدسنا حتى الذكريات
طبعآ تسيئ الامور
احنا مالينه الغرور
وكلمة ما نتحمل اثنيناتنه
بعد شيرجعة انتهى البيناتنه
.
.
.
.
#شعراء_وذاوقين_الشعر_الشعبي
#رائد_ابو_فتيان
#ابو_تراب

.
انعم الله چي تلوچن زاد ... يرحاي
مثل يوري فلا موجود ... يرحاي
غشيم وبينت للناس ... يرحاي
الجرح جرحي شعليها الخلك بية

عفت الحريجة اباب بيتي وتعنيت
سولفت وي هواي حد ما طفى البيت

الحمدلله خلايا الراس ... ممتان
بكثر ضيم الاجاني غفل ... ممتان
الوج بغير اديتك طفل ... ممتان
غيرك ياهو كضني يملخ بية
.
.
.
.
#شعراء_وذواقين_الشعر_الشعبي
#اياد_عبدالله
#ابو_تراب

.
ترى العفته غرك ب احلامه صبخ عود
نكاط المغذي يخلصن احلامة
اذا متطير دنك لا تضل جوعان
تدفن راسها وتأكل النعامة
اشاقيك وجنت تزعل ٣ ايام
مصاحبلي بشر لو عطوة كوامة
وابزك بالحجي وتنتك المضمومات
مثل ذاك النتك نص كوس الحجامة
ماشيلك يفزاعة زرع ما خوفتلك طير
تنحط للحلاة دراغ غنامة
ما اشيلك لون جمرة بشليلي تطيح
اضل ليمتى ماخذ دور البلامة
انا الفرته الدنيا فرت ابهامات
بجف شايب اعمى ويتذكر ايامة
.
.
.
.
#شعراء_وذواقين_الشعر_الشعبي
#عباس_السلطاني
#ابو_تراب

.
خليك بفرح وجرحي خليني
طبع عاكول ما متعود اعلى الناس تسكيني
وهذاك انت مثل عارف عرب للداي تندل وين تچويني
وتعرف دموعي يمتى تطيح چي حطيتك بعيني
طين كبور حتى بموتي تأذيني
منك بيك بس ما بيك تحييني
ما انطر فرح وادعي
شمع بالليل اكسب وادمي بدمعي
طحت اليوم باجر هم تطيح انت !!
المطر والناس كلمن طيحته بوكته
وما اشكي الجرح للناس طير غريب
تعودت اعلى جرحي يطيب بالسكته
وما ندمان ما ردت الزعل انت الزعل ردته
.
.
.
.
#شعراء_وذواقين_الشعر_الشعبي
#عمار_سالم
#ابو_تراب

.
منو الگلك من محبتك راح امل ؟
انا احبك باجر و هسة و قبل
وك شملك انا مهووس بهواك
الك حب بگلبي ما شاله العقل
تريد سوشل ميديا احجيلك غلاك
انت الترند النسبتك ما تقل
هاك اخذ موبايلي وخلصني هاك
وشوف طول الوكت بيمن متصل
الصادرة انت الم يرد والواردات
تروح على الاستوديو الجو مشتعل
صورتك ما تنترك مثل العلاج
ثابتة وباقي الصور تحديد كل
وغير صوتك محد يعدل المزاج
بحه عندك عندي سوت رد فعل
من اروح لموعدك ما ادري احير
بين احضنك وابجي وبين احتفل
هنا يصير احساسي احساس الغريب
الختموا اوراقة بختم لم الشمل
.
.
.
.
#شعراء_وذواقين_الشعر_الشعبي
#يحيى_العلاق
#ابو_تراب

.
تستاهل تضل وحدك يا الكرهتني بطيبتي
يا الجنت مو من ألتفت كدامي تاخذ غيبتي
مو انا اليرد منكسر منك رجعت بهيبتي
واخر قصيدة اكتبها الك
منا واسد موضوعك
يالشوفتني دمعتي لازم اشوف دموعك
.
.
.
.
#شعراء_وذواقين_الشعر_الشعبي
#احمد_عاشور
#ابو_تراب

.
ساعة انت اعلى بالي والعمر ساعة
وبجة قبطان روحي ورادك شراعة
يسألوني اعلى جرحك بس شجاوبهم
طلع طلعة سهام الحرب من مكفاي ما حسيت بوداعة
وتبچي ذراعي اذا كالوا حبيبك لزموا ذراعة
اسمر تحرك بگلبي والابيض تعشك اطباعة
النار وي الجذع تحرك گلبنه النار
و بيت الكطن من تمشي طماعة
.
.
.
.
#شعراء_وذاوقين_الشعر_الشعبي
#علي_طالب
#ابو_تراب

.
عفوآ قبل شوية شكلتي ؟
ما جنت اسمع قبل شوية
ما جنت بهالكوكب حتى !
جان اللحن مسافر بية
حيث الشاطئ حيث النسمة
حيث القمر الناصع ضية
حيث الافكار الشتتها
من عقلي ضجيج السمتية
حيث الزمن الاتطلعله
زمن البي مرتاحة الناس
زمن الابعاد المفتوحة
زمن اوسع من حجم الكأس
ما اعظم وقع الموسيقى
وشكد في داخلها احساس
.
.
.
.
#شعراء_وذاوقين_الشعر_الشعبي
#مرتضى_الميالي
#ابو_تراب

.
ناشدت كل روجه عنك كل جرف كحلت عينه
وسألت كل الشواطئ بلكت تجيبك سفينه
ولا سفينه .... ولا قطار
وخلصت عمري أنتظار
لا قطار .... ولا سفينه
وانا والليل بأمل جيتك بقينه
طيح يا دمع الندى وكطر ب أدينه
احنا ليلية نتلاكة نسهر انا وياك يا ليل المدينه
انا عيني على المحطة وانت عينك على النهار
وخلصت عمري أنتظار
.
.
.
.
#شعراء_وذاوقين_الشعر_الشعبي
#الكاطع
#ابو_تراب

.
حزنان جفني بلا كحل مامش كحل واشريلة
وما ابيع حزني للنذل لو كطعوني الليلة
بيدك ضفرت كصيبتي بأول عشكنا وشوكنه
نيشان نجمة للصبح سهرانه ضلت فوكنه
والكمرة ترسمنه فرح وخيط الفجر من طوكنه
والجفن شريعة كحل بليل الكحل ناغيلة
وما ابيع حزني للنذل لو كطعوني الليلة
تسبقني روحي اعلى الدرب لهفة وجفوفك دافية
الخوف يلملمني برد چني حمامة ولافية
وعتني من حجل الشمس وانا اعلى صدرك غافية
ياما الحلم ويا الكحل بجفني غفى كل ليلة
.
.
.
.
#شعراء_وذاوقين_الشعر_الشعبي
#كاظم_لالة
#ابو_تراب

.
من أول نظرة حيل تعلقت بيك
عشكتك ما سألتك حاب ما حاب
خصه لبيتكم لمن تعنيت
بديت اصرف شبابي بعتبة الباب
يابو نظرة الغميجة التأخذ الروح
ينكهة دارمي وبحلوك شياب
.
.
.
.
#شعراء_وذاوقين_الشعر_الشعبي
#مالك_السلطاني
#ابو_تراب

.
على يا اساس ما يرضون ينطوك
شنو يعني ابتلينا شهور ربوك
شمدريهم هلك عرفوا يخلفون
حلو وما عرفوا بزغرك يضموك
ما يرضون احبك جا شيدرون
من يومية من يمي يطلعوك
انا المانعك من طلعت البيت
انا الخايف عليك اهلك يشوفوك
انا اللازم سمعتك لزمه الجام
جا فرحولي لو اهلك يحبوك
انا الما انطيك اهلك يغنون
اموت ولا لغيري اهلك يزفوك
.
.
.
.
#شعراء_وذاوقين_الشعر_الشعبي
#حسام_الحمزاوي
#ابو_تراب

.
بده العام الدراسي وبدت الهموم
وبيتي اعلى المدراس بابه صاير
نسيت وداعتك جيت اشتري هدوم
الك ومحضر اقلام ودفاتر
مو تسمع قيام وليش متكوم ؟
مر اسمك ولا من كال حاضر
الشمس طلعت علينا ومو وكت نوم
وهم عدكم صبح يا اهل المكابر
الوالد بالوداع يصير مهموم
وانا اثنينهن والد وشاعر
اهن كاسين بيهن كاس مسموم
اخاف اغلط وبالمسموم اكاسر
فراش الفاتحة لو شفته ملموم
بنص گلوبنا تلكى الجوادر
.
.
.
.
#شعراء_وذاوقين_الشعر_الشعبي
#الكاطع
#ابو_تراب

.
ما رهمت ويانا تكول ما اعيش
بمحكمة القدر طلكنه الافراح
طيور الخير هجن عافن البيت
وغراب الفكر بمچانهن صاح
مسودن بختنه وحضنه مشلول
ومن كثر الحزن منهم على الراح
على الجاهل كبل نتنكب انكاب
هسة يموت ابونه نكول يرتاح
مدام الموت ارحم لليموتون
دمشونا لعد كل احنه نرتاح
الفرج محد يعرفه شجم قفل بي
ابتلى بلوة الصبر من صار مفتاح
.
.
.
.
#شعراء_وذاوقين_الشعر_الشعبي
#جبار_رشيد
#ابو_تراب