لو صابر أنتَ عليّ
صدگني أعوضك عُمر
بَس انتَ هيچي رحت
مافكرت تنتظر
گتلك حياتي إلك
وشيصير مابدلك
والجرح بية بقى
لو بيك ماعفتة
جائز اكون السَبب
وجائز تكون أنتَ
بَس هي رحلة عمر
وكلشي أنتهى بوكتة
صفحه وطواها الزمن
رحلة انتهت وبثمن
وبين چبير الفرق
وين اني وين انتَ!
.
.
#شعراء_وذاوقين_الشعر_الشعبي
#خضير_هادي
#ابو_تراب

.
صاحبته بغلات الزلم صحبة يوم ما قصر
تريك بالگلب وتغدى بالجتفين
وضم مني سهم لليل تجواعه
ومشاني بدرب بس الدرب شبرين
حتى تلوحني ذراعه
.
.
#شعراء_وذواقين_الشعر_الشعبي
#الكاطع
#ابو_تراب

.
وثيقة بكل فخر گلبي ... وثقلاك
جبل ما شفت بأخلاقك ... وثقلاك
الك يرخص دمع عيني ... وثق لك
الگلب لمن يدك يوكع بأدية

حبيبي بيا بخت وياي ... شديت
وعدا هجرك الي شقدمت ... شديت؟
ب اصبعك حتى تذكر خيط ... شديت
نحصر دمك ولا فكرت بية


.
.
#شعراء_وذاوقين_الشعر_الشعبي
#جبار_رشيد
#ابو_تراب

اخاف تعود ما تلكالك مچان
صوجك خلصتها وياي زعلان
انا خدران گلبي وجدمي خدران
مكانك راح اسدة بيش ما كان
.
.
#شعراء_وذواقين_الشعر_الشعبي
#منقول
#ابو_تراب

.
بينك بين كلبي عركت أحباب
و انه ابيناتهم واكف افازع
مثل ام و تفازع بين خوان
ثنين اعزاز كلي المن تدافع ؟؟
.
.
.
.
#شعراء_وذاوقين_الشعر_الشعبي
#غسان_المكصوصي
#ابو_تراب

.
طير شايه كسروا جناحي وعليت
مو مسيطر لچن بعدك وين احط !
والله ما مقهور چي مني خذاك
المشكلة بيناتكم ماكو ربط
حتى بالطيف اسمع الشامت يكول
شكد چبيرة عليك ولفك مرتبط
اشتهيت ابچي منو يدايني عين ؟
كون تنباع بثمن جان اشتريت
من اغربل عيني جم حسرة التطيح
وكع لون خدودي من كد ما بچيت
حسرتي تدفعك وصلت ل هيج حال
هاي سهلة المشكلة بيوم المشيت
صافنه بشفتي الجكارة ومن خذاك
وصلت الجمرة ل لهاتي وما دريت
.
.
#شعراء_وذاوقين_الشعر_الشعبي
#رفعت_الصافي
#ابو_تراب

.
ازاعلنه ورجعت من الزعل مخنوك
ما اذكر شسولفنه وشسويت
ركض صيح بچى شيذكر المحروك ؟
رجعت منك وشايل تعبي فوك الراس
مثل ما ترجع العربيه من السوك
ادور انسان طايح مثلي واشكيلة
بس ها مثلي ما مشبوك !
ادور ماكو وادم طايحين وياي
انا الخصلة الوحيدة الطايحة من الطوك
رجعت اتلمس بصدري وادور وين گلبي دوارة المبيوك
شلون اتلاحك البروح يتكسر
وانا خواف من صغير ما اتلاحك الماعون من يطيح
اغمض عيوني واتكتر
بجيت وفوك ما تصور اصور
ضكت كل الحزن حزن الوداع  الموت
بس الله ولحد حزن المعير
.
.
#شعراء_وذاوقين_الشعر_الشعبي
#سعد_شميل
#ابو_تراب

.
شكد احبك يا اناني شكد احب جرحك الية
لو ب أدية اني اكرهك اني احبك مو ب أدية
من وراك اسهر ليالي اني ميت من وراك
الهوا انت بحياتي ليش خانكني هواك ؟!
شكد اخاف عليك اني وانت ما خايف علية
ماشي بس وكفني حبك بطريق الجابك انت
ما كسرت بيوم گلبك وانت گلبي شكد كسرته
جنت من اشتاك اشوفك روحي تتركني وتجيك
هواي باعوك انت تدري واني بس المشتريك
شكد اخاف عليك اني وانت ما خايف علية
مو تعبت وياك اني صرت محبس بين أديك
انت ما تخاف الله بية تعبي كله يضيع بيك
يا ما زارتني جروحك مو حرام
انت نايم مستريح واني ما اكدر انام
شكد اخاف عليك اني وانت ما خايف علية
.
.
#شعراء_وذاوقين_الشعر_الشعبي
#منقول
#ابو_تراب

.
حرثت لخاطرك بالروح مثل الكاع
بوسات و ورد كل عمري اشتلك
شمعة انت بحياتي و عمري ظلمه ليل
اشعلت روحي وخفت ما اشعلك اشعل لك
خاف سنين عمرك تحترك بالشوك
اضمنلك كمت من عمري اعزلك
.
.
#شعراء_وذواقين_الشعر_الشعبي
#جبار_رشيد
#ابو_تراب

خاف كالولك حجي عوفه ويجيك ؟!
البية سولف ما حچالك بالصحيح
العنده نية سوء اشم ديرة كفاه
يطيح من عيني قبل لا منه اطيح
انا مو ذاك اليچلب بالذيال
اليصير تراب اصير بوجهة ريح
.
.
.
.
#شعراء_وذاوقين_الشعر_الشعبي
#نهاد_الخيكاني
#ابو_تراب

.
شوف اكلك بالله حاجيني تعال
تكدر تفهمني بالسويته
تضحك كبالي الضحك يعني يصير
كبال واحد انت هاجم بيته
على الاقل اخجل اذا تلاكيني
وهاي عينك لا تحطها بعيني
جرحك فتحت الگلب خليته بي
وجرحي شلته وبالملح خليته
.
.

#شعراء_وذاوقين_الشعر_الشعبي
#علي_الفريداوي
#ابو_تراب

.
منهو الكالك ناسيك ؟ هم ينسى الكمر وكته ؟
لو نبض الگلب يتنكر ل دكته
بس عشكك عشك مفضوح
وعشك الناس كلها مساتر وسكته
صرت انت سبت وبركبة يهودي
هم شايف يهودي يجوز من سبته ؟!
.
.
.
.
#شعراء_وذواقين_الشعر_الشعبي
#عباس_چيچان
#ابو_تراب

.
حلو مثل الخميس بين الايام
وترف مثل المطر لو باوس الجام
حساس ودمعتك تترس العين
من ليغاد اشوف بگلبك شضام
هلة يا فرحة الما نام مرتاح
بوكت مابي وفى حسيتك امام
.
.
#شعراء_وذاوقين_الشعر_الشعبي
#رائد_ابو_فتيان
#ابو_تراب

.
انا من گلبي بعدتك تدري ليش ؟
مو لان ناسيك لو قل العشك
گلبي بيتك وانت عايش دوم بي
من بعدتك مو لان حتى افترك
احترك گلبي زين ما جنت انت بي
لان لو بي جنت لازم تحترك
لا تروح بهذا تفكيرك بعيد
لان انت اقرب الية من الهوا
يا ضوا عيوني وبدونك ما اشوف
شلون عيني تشوف اذا ماكو ضوا
باب بيتي اذا ما تدكه بأيدك
گلبي يوكف يا حبيبي وما يدك
.
.
#شعراء_وذواقين_الشعر_الشعبي
#علي_الفريداوي
#ابو_تراب

.
اهز ايدي واكلهن ماكو ربحان
اذا عفته انغلب ويروح مغلوب
ولان عشرة ازرعتها وكاعها الروح
من اول ما بدت لليوم متعوب
ولان ماكو وفاء بهاي الايام
وطبع بية من احب ما اشيل مذبوب
.
.
#شعراء_وذاوقين_الشعر_الشعبي
#سمير_صبيح
#ابو_تراب

مثل كل يوم ارد تعبان
واشمر روحي بفراشي
و يلوليلي التعب واغفه
مثل كل يوم اگول الدنيا ماتسوه
من طفو جگايرهم  على گليبي ضحكتلهم
الدنيا تريد ناس اگبالهه يضحكون
يحوكون الجروح احروف ويغنون
يصبون الحزن بالكاس ويسكرون
اضحك حيل اخر هالطريج اتراب
اخر هالركاض اتراب
يا عابر سبيل اتراب
يبنادم تراك ايام
والدنيا جسر ويعبرن يعبرن
يدنيا احنه بعدنه ازغار بس اهدومنه الكبرن !!
.
.
#شعراء_وذواقين_الشعر_الشعبي
#سعيد_الشريفي
#ابو_تراب

ما نسينه يا حبيبي ما نسينه
حبنه وينه يا حبيبي حبنه وينه
مرت ايام العمر
شفنه لوعات وهجر
ما درينا
يجي يوم
واليالي تدور بينه
خانت الايام بينه
تالي بالغربة صفينه
تعذبينه
تغربينه
ورغم هذا ما نسينه
.
.
#شعراء_وذواقين_الشعر_الشعبي
#منقول
#ابو_تراب

.
سنة ما شايفك بس انت موجود
لهسة اشتم عطر من شوفة العام
ما تاجرت بأسمك بس تعاطيت
بيني وبين روحي وهجرك اعدام
شفتك بالحلم فزيت مرعوب
ما لحكت اشوفك مسرع اجدام
نذر لو ملتفتلي جا تحنيت
من اطراف جدمي لشعرة الهام
ملثم من تمر ما اعرفك تريد
اعرفك لو تحط اعلى اسمك ألثام
.
.
#شعراء_وذاوقين_الشعر_الشعبي
#اياد_عبدالله
#ابو_تراب

.
بيني وبين نفسي شكد افكر بيك ؟!
واكول شمعنى انت الشاغل ضنوني
مو أول عشك خاطر تشل الحال
ولا أول جمال تشوفك عيوني
شجاها الروح يمك ذبت الاسرار
وليش ارجف عليك ومنخطف لوني !
وحتى الناس كامت تعرف بهالحال
ما اعرف شكلهم من يسألوني
يطبون بصفنتي وعنك يدورون
ويلكوني افكر بيك يلكوني
.
.
#شعراء_وذاوقين_الشعر_الشعبي
#جبار_رشيد
#ابو_تراب

.
كالولي انخطف گلبه
وعذر ما كاعد الكالك
صدك من تسمع اغنية ؟
شخص غيري يجي ابالك
.
.
#شعراء_وذاوقين_الشعر_الشعبي
#رائد_ابو_فتيان
#ابو_تراب