لميتلك كل ألقصائد
ليله بيهه ألمايشوف يشوف طولك
غافي بعيون ألكمر
ليله بيهه ألمايعرفك
ضاك من سوالفي العنك نهر
بس عجيب شلون شافوك بصفنتي
وشاوروني حته ماتسمع صفنتي
كالو الدنيا سفر
وكالو هلالين يتلاكن صبح راس الشهر

#عدنان_الربيعي

حزن مكتوب علبيبان
ومرايات صوب الدم تدور بكل وجه مابي درب مبيوك
وعيون علی كلشي تلوك
بس ما تنرسم مرجوحه علحيطان
والضالم توضه بدمك ودمي
ونفض ريشه علی كل من وافق الشيطان
يحرمون السفينه بليل من جفوف كل سفان
ويرد الماي صوب الشط
وتنام الناس فوك المستحه والجبن والحرمان
ويصابحهه بدفو الباطل
نذل باع الشعب من كل كتر لفلان لو لفلان
ليش نصلي أذا ما نستحي من ألله
ياهو الباك ترجيه وذبح بلسهم عبدالله
خلونه بحجي البيبان
تره الوادم تدك طبول أذا سمعت كمر صلی

#عدنان_الربيعي

ولكيت الرازقي بطولك
يمد روحه علی جم نجمه
متوضيه بدفو الجنه
ولكيت شكد بعيده مراية المايندل ضنونه
نسه شجم حلم بعيونه
ونسه شكد بعد يتمنه
لو مديت جفي تخضر الجنه

#عدنان_الربيعي