بعد لعيوني ما تصبح جفن شوك وحلم وردي ؟
تبوك بكل خضار الروح تاخذ حيلي من عندي.

وتستاهل بعد وتمون
ولعينك اصير عيون...
وابدي من الصفر مكسور.
جي رايدني انته ابدي.

لا تهتم ولا ينضاك دمعي ولا بعد يجري
لا تستغرب وتغتاض دم الينزف بصدري.

جنت عمري وفرح دنياي
راحن فرحتي وعمري.

#تقى_صبيح

يبنادم عشكته وعاندت خوفي
يعيوني وضواها وعافية شوفي
يترباتي
ورباك انه
الورد انته ودفاه وعطره و الوانه.

طولي وهيبتي ويم وجهك اتلعثم
وارهمهن ثكال هواي بس خفة رموشي لغير
شخصك جذب ما ترهم
ولا أندم.
أهو الصله العشك بالشوف ما ينذم.
أهو الرايدته ريتي شلون ما ينشم؟

يشوغات الليالي بدون سالفتك
يساكيني انتظار وشوك ما ضكتك.

رد بأول محطاتك...حنين بكلمة ما تبخل.
رد ﻷول صباك وياي....من هالناس لا تهتم. ..من عيوني لا تخجل.
رد داعب شغف هالروح وتغزل.
ولا تزعل
أنه ادريك بهواي تذوب.بس يا حلو المراضاة منك كون اتدلل.

يهنيال الشمس تنكاد وي كل مغرب لظلمة.
يهنيال الكمر ينزار ويطوفه بعشك نجمة

ويهنيالي لون تنكاد ليلة بجفك جفوفي

#تقى_صبيح

حزني ما يبردله حيل ولا يمل ....

حزني صاحي

وفرحي كل عمره ثمل ؛..

#تقى_صبيح

شلتوا عن دروبي الورود القديمة. .
وشوك يمتد
شلتوا فرحي
وصغتوا لجفوفي الحزن تذكار معضد
شلتوا ذاتي وصرت محد .....

#تقى_صبيح

كون اكاسر مستحاتك وي صلفات الليالي.
اكسر الشوك بضحكتك
كون اشوفنك حلالي
.
#تقى_صبيح
.

بعد ما بيه وعيونك
أشد بخيوط صبري وينكطع حيلي.
بعد ما بيه لمعاتب زماني ولا سهر ليلي

وبعد مالي اعله هالوادم
وجه ملكه وثغر باسم

بعد مالي بوداع الروح
أعيشن بس جسد هايم

بعد ما بيه شي ينزار
لا مرقد جمال ولا رمز قوة

لا نظرة اعله وجهي تلوك لا فدوة...

#تقى_صبيح

يمن بعيونك متاع لسفر روحي.
ريض بالعشك
هالشوك جتال
صبرك.
خل ابرد حركة جروحي.

#تقى_صبيح

اضيعك بين اصابيعي
يخطوط الدرب لبراحة جفوفي

والكاك بصدى البيبان
من تنسد صلافة وينده خوفي

الك بيه شكثر؟
رمشات من شوفي ...

#تقى_صبيح

ياورد
شمها وتعطر
عيش مرتاح اعله جفها
ياورد
هنيال لونك
يشبه حرورة نزفها.
ما وصلها أحد يبختك.
كاعد تدغدغ زلفها.

#تقى_صبيح

واذا صرت اعله كل شفه خطية اشعازة ايامك؟

واذا صارت منيتك غاد بس الحسرة كدامك

خذهن
قوتك وي لمعة عيونك.
ضواك وبهجتك يم اليحبونك.

يتطشرن فده ع الكاع وك شيلمهن احلامك؟!!

#تقى_صبيح

ردت اخفي عطش خدي على دمعه تروي كيعانه
.وردت ابقى العلت ناسه اعله ظهره وما رخص شانه .
وتمشيت اعله بال الاه حد ما صرت هذا انه
.يناغيني الحزن وويباهي صحبانه
.وفي وصاحب طويلة وشوكه ما يخلص.
ويزيد بعمره عمري ولا ابد ينقص.
يغليه الفرح والناس يقوه وهم يرد يرخص.
يجيني بلا تعب والله فاتح ليه ذرعانه

#تقى_صبيح

انت اول فرض صليته اعله شوگ
انت اول موعد البيه آمنت❤️

#تقى_صبيح

مشتاگة رغم كل شوگك الضايع
واحبك وانه ادري لحضني ما راجع

واتعنه الفرص والصدف والميصير
خاطر بس ارهم شوفك بشارع

يا عمري النقص يا حيرتي ويا حيف
عد عيون غيري عيونك تباوع

شاريتك بروحي بوكت كلها تراب
بس ذهبك لمع ولگيتك ال بايع.

#تقى_صبيح

طشرني ولا تهتم
انه اعرف بالظلام يعيش فاقد دوره الملثم.

طشرني واخذ كل حيل بيه بشوفك تلملم.

فاركني اعله كد ما جان جفنك بالزلف يحلم.

لا تتريث وتنطر رضا بروحي.
انه استاهد حنينك مات من لجمتني جروحي.

ارحمني بكطعها حبال وصلي وعيش
عيش بلا دمع يتناك
دون مكاود جفوفي.

درحمني ودفض خوفي

يبن كل جف صعد يدعي اعله حزنك كون ما يسلم.

انه ادري شضيعت من شوك
انه ادري شضيعت من بيت
انه ادري البيك ما يرهم.

انه عيونك مواعيدك
آمانك عافية أيدك

انا كلبك يكلبي وخاف نبضك لو رحت يندم..

طشرني ولا تندم.

#تقى_صبيح

اذا حبج بشر هالكون كله ورادو عيونج
هم رموشج تريده

واذا وردتي بملاگاه
روحچ من بعد چم صيف
هم تذبل جزاة ايده.

ما يسگيها وتعرفين
زيدي مكابر وبعناد
ناسج خلچ وحيدة.

#تقى_صبيح

غربتني وذكرياتك شرن جروحي ع شمسي
صار ممشاك اعله غفلة.
ما محسب
من اعيش بيومي صفنة ....البال ينگاد اعله امسي.

غربتها رموشي مرود ما صرت.

عيشتها الحيرة روحي .وما عشت.

متت سكته
ولملمت طشاري سنطه وما گلت.

كلشي حظ ينگال لكن ما عرفت الغربة حظي .
تزعل ودنياي تظلم ترضى وشموس اعله عمري
تطشها لكن ما كلتلك.

مو مثل كل مرة صوتي .يروح بمهاتف وفاك.
مو رفگتك ما ردتني شلون اصيرلك گفاك.؟؟

روح غيب
ولا ترد
ازعل بعيد.
وداعتك ما بيه ارضي.

#تقى_صبيح

انه اشتاگـيت اشم ليلي بـدفا ثيابـك
بعـد مـا بـيه لغيابـك

#تقى_صبيح
.

طاوعتك واجيت بلا مواعيد
گلت هلالك الغايب ورا عيد
وصلت ولا هلا الفزعت ولا ايد
تاليها انتلاگه بخير شتريد؟؟

مچفي الحيل ارد وخالي المتاع
لا ضحكة البقت لا امل ينباع
سفينة وريح هبت مالها شراع.
ما كتلي من الاول هاوي الوداع.

ما كتلي وعرفت شلون اندار.
وانت بلايا حجة وماكو اعذار
جان عيوني شتلت شوفي بسمار
خافنها بصورَك تلگه تذكار.

خايف لا غلاتك توكف وياك.
وانت بكلبي شاتل بذرة هواك
تعرض وانه اقسم كلبي ينساك
وارجع من جديد وجدمي تخطاك.

#تقى_صبيح
.

.
وانه بالملگه اعله عينك انشعل
وارجع باول كلامك انطفي.

خايف بشوگك يضيعني وازِل
خافن الشوف اعله طولك ينجفي .

روحي بمكابرها لا تسهى وتمِل
وانه اعرف غيضي يمك يختفي.

شمسك تلوعني واندار على ظلِ
وارجع لشمسك ادفي بمعطفي.

والله حيرة وصبري لو طوّل يكل.
كون اشمك وبوجودك احتفي.

يالوجودك فرحة ومناغة لطفل.
ما نويت امن الموادع تكتفي؟

انه خاين بيك مرضاة الأهل.
بس لاجل عمرك يعمري شكد وفي.

#تقى_صبيح
.
.

يا عازة كلمتك بين الف كلمة
ويسابگني اعله طيفي وسهري ما همه!!

ردتك من تريد الناس ضيها وانته ابو الظلمة.
حلاتك ما طحتلي وغيرك شيندار
فدوة ولا تراوه اعله الكلب رسمه.

#تقى_صبيح
.
.