شلون اتوب
وانت خصرك وحّده مسويني كافر

اعترفلك چنت اضيعن بيك
والواهس يدليني واشبگك

وهسه لا ضليت اندل
وچّدت شامة اعله خصرك

گمت اچلب عيني بيها وما اتيه

ادخيل ربك...
هاكثر شامات مشموره دلايل
فوگ جسمك

ادخيل جسمك
بيك صحو الضيايعين
وذوبت البرحي اعله شفتك

ادخيل شفتك
بيك اذوبن من تذب گدامي لثمك

خايب اترخص من الوردات واتمشى اعله دربي
انا اريد اليوم يمك

رايد بصدري اثر نيشان سهمك

ورايد اتوضه بخدر جسمك
واصليك واشمك

وبيك اشطب وجه حزني
الصاير مراية لجروحي

رايد احفظ رمش عينك
واترك بدايرها روحي

ورايد شويه غنج
وترهدن وكومة وكاحة
تشيل كل دمعات نوحي

اي يبو الوجه الصبوحي
رايد اثيابك اشمها

ورايد الاهات التشهي البشر
بيدي المها

رايدك وحدك اليه
مايشاركني بودادك
وجه المراية وحزنها ♥️

- ازهر كريم .