الليل گاود صَفنتي لكل الوجوه ،
أبالي كلهم ، لكن أني أبالمن ؟

أعيوني تبره لضِلهم لحدما يغيب ،
أمنيتي أعرف أعيونهم تبرالمن ؟

أبالي شايّلهم سمه وحنيتي طيّر ،
وبالهم ماأدري ذَبني وشالمن . .

وجوههم لزمت سِره بعيني وعميت ،
ووجهي صَحره ومدري يتراوالمَن

اليفتهم حَچي النَظر خل يستراح ،
اللسّن چذابات من يجاملن ..

الدنيه سَفره ، وطيبة أبن ادم متاع ،
وتگضي ونشّوف الوكت يصفالمن . .

،،


محمد وجيه -

تهت والمستحة بروحي
أدور وين ما بيه بگايا إرماد
وأتوسد على جروحي
وأفزع چلمة التنگال
توگفلي بوجه نوحي
وأداري الآه
هلبت
من عيون الناس أداريني
وألاگيني وحيدة هم
وأختل بيني وبيني
شنو ذنبي وحرمني الضيم عشريني ؟
شنو ذنبي وحرمني المسچ والحنة وعلى جروحي يتچيني ؟
أعيش إلمن ؟
وأموت بـ ليش !
آنه أصلاً ضمير الناس
موتني
ميحييني
آنه بلا ظفيرة وشوگ يشعل ظلمة سنيني
آنه بلاية غير الـ هم
يگعدلي يواسيني
وتهت ما بيني وبيني
اتوچة اعله طاري الشوگ
من أتعب واسليني
وأشهگني نِفس محتام
مامش رية تشريني
وأتخايل الجنة بعين خنگت كل ضحك بيه
وأتوچه اعله آهي النوب
بلكي تعيني شوية
اتمايز عيون الناس تاخذ مني كل حيلي
اواسي بروحي أگول تهون واتجرع بخت ليلي
واغني الآه
تعثر كل محطاتي بغنه الـ ويلي
واعاتبني اعله كل ونه تواسيني بسواديني
يمن بالروح مطبوعات
ناغَنّي وأغنيني
أنه من طين
موش حجار
متعوب وترف طيني
غَنني اريد ابچي فرح مبيوگ من عيني

وجدان النقيب

كان أحساسي حينَّ سمعتُ صوتكَ لمُدة ساعتين قد جعلتني ارى الحياة بشكلٍ آخر تماماً .. من خلال ساعتين فقط شعرتُ بالدفء والبرد ، الضُعف والقوة .. شعرتُ بأشياءٍ لم تكُن يوماً ، كيف لو أحتضنُك ؟

🍃❤️

.
.
يـ طبع الگاع يـملوحه
حرام اسوالف العميان يم لوحه

زفوج لفهاوة ناس
وانتي امج تنست بيش ؟ خاطر هيج .. مالحتج
يـغيمه وچفي متشلبه الـف عطشان .. ما لحتج
چاسوج .. ودفه بروحي الشته وشفتج
تحجين .. وحرفهم ياكل بشفتج

هذاك انه " وجه " واخذوج يـ مرايه
هذاك انه
نذر معگود ع الزلفين ما دنيته يم رايه
وهذيج انتي ..
{ هذيج انتي " حرف " مزفوف لـ حچايه }

وعيوني لـضريح الگاع .. زتت ماي مشايه

و يـ بنيه
او وحـگ عـفتج ..
لـمن عـفتج ..
لـيـل . وطـش . بالولايه خبر زفتج

ابراهيم الرائدي ..

كــون المـــفارگ حبـيـبه يـرد عليــه
ونــبض گلـبه يسـولــف الصـار بجـفاه

حضــنة العــشاگ مابيــهه حــرام
اليــحب من محــبوبــته يفـصـل غطـاه

وكـلمن يحــب من طــرف ولفــه يجـيه
بــوجهـه يتـرس حيـرتــه وتمـطر سماه

وكـون المـسافـر نفـس ميـشم غـريـب
متــاع للـغربـه اليــحـب ياخـذ هــواه

مـن تـراب ولايـته شيـوصـله خيـر
بـروحـه ينــده كـل صبـح بالـغـربه تـاه

ولا جـفـن سهــران يبـقى يتـاني طيـف
اللـيل مــالح والجـرح وجـهه وگــفاه

اتـمنى كـل يــوم اليــمر والدنــيه عيـــد
وكــل صـبح عيـــد وتـــجي الضحــكه وراه

لـ .. شهيدُها علي رشم
_________________________

بعد الآن
....................عبد الكريم القصاب
بعد الآن
ما أستاحش بعد الآن .
الليله أجمل من كل ليله .
لا ظلمه ولا كسرة خاطر.
لا صوت بنكهة دخان.
بعد الآن.
وحدي بلا ذكرى تسهرني .
يا هو اليسوه أمسامر ليلي ؟
ماراح أصفن وأتذكر شي ,
ممضيع شي .
لا محبوب ولا عنوان .
ممضيع شي .
گٍلبي ونادم عاد لصدري .
جنت آمخليه ماشي بكيفه .
وضيعني بسجة عميان .
الليله أجمل من كل ليله .
من عشيات ألنوم أمسير .
من عشيات أفراشي آمبخر .
كلش خدران ونعسان .
ماحن لشي .
ممضيع شي .
لا محبوب ولا عنوان

كبلك عمري كله ظنون
يا أول صدك سولفتك على الناس

لطيف العامري

ومرني الحزن جسته
بكل صدگ بيه؟
لگيته انت! …

ازهر كريم

~
عفتني هواي...
امغوبر جن كبر متروك
تعال امسح بجفك وجهي خل انشاف !
ضايع وجهي من مكفاك
عفتني هواي...
كلت من عيني كلك طيح
واختاريت اطيحن طيف
حيل اوياي.... بجية كل صبح انداس بالرمشين
واتسولف على الفسروني مية راي !
صوجي بهاي....
[ النده البي خير يبجي الورده يله يطيح ...من يوكع دمع مو ماي ]
عفتني هواي.....
بعدلك سكته وحده وتنكلب تمثال
وشوف الحال
ليل بدون طيفك مرني تابوت
بصبحه بوجهي صح الموت تنكال !
عفتني هواي....
بعيون اعمه ابجي اعليك
دمعته يظنها سوده تسيح
غبار اسود يمرني الريح
المطر بليل كحله يطيح
بعد دمعه واصيرن طين من ابجاي !
عفتني هواي....
تسحكني وتذمني شبيك ؟
هو الطين لين ليش ؟
غير لخاطر الحفاي


حسين علي المطوري

اتصوريني هنه ظلت كطرتين
وبعد ما اوجد دمعتي وياهي عيني ..
اتصوريني اوشاله زيبك حطني وكتي
بظهر مهره اترهرز بماعون صيني ..
اتصوريني بليل والمصعاد جالي
مجلب بكشايه وادري هواي وادم حاسديني ..
اتصوريني نخلة بالبصره تلكح نخلة بديالى
بعيده السالفه البينج وبيني ..

محسن الخياط

•دومـك عـايــش ابـالـي
وخيالك فوگ جفني اندگ
تـعال وخـلـي نـتعاتــب
ولاتجفي من اگول الحگ
چـم مرسال وديتـه
وگبل لاينفتح ينشگ

غني محسن البهادلي

..
..
..
..
..
‏شنهي أطيب من أذيتك !
عندي زهره زغيره كلش
بين شدات الورد ..
ترضى أحطهه بمزهريتك ؟!..
..
..
..
.. #مظفر_النواب
.
.
.#سمره
#مسابقة_شعرية_نثرية
#قناة_برد_الحدايق

شگگوا بيبان الله گبال الله وماكو أحد

وأحترگ نفاش أهلنه گبال أهلنه

لـ نوفل الصافي