شكرًا صديقي واذا تبحث بنفسك بيكون افضل لان مرات الدراسات تكون متحيزة. انا باحث واعرف. الدراسة العلمية الصرفة لا بس الدراسات الي ترتبط بالفلسفة او بتغيير مفهوم ما.

#مهند_الريكاني

السلام عليكم

طبعاً دائماً تجيني هيج اسئلة واحب اكول ماكو فد خطة ستاندر بحيث ياهو الي يمشي عليها يصل. الامر يعتمد على عوامل كثيرة: بيئتك شخصيتك عقليتك وضعك المادي محيطك دراستك وغيرها.

اني اكول لطلابي دائمًا انه الدراسة بالجامعة (عالاقل بجامعاتنا) ما تمنحك كلشي. هي تعطيك شهادة انه انت انسان مؤهل نسبياً لممارسة عمل ما بس ما يعني انه انت صاحب خبرة ومحترف وتعرف كلشي لا بالعكس اذا تخرجت وتعرف المبادئ كلش زين. لهذا لا تعتمد فقط على الجامعة اليوم افضل من الايام السابقة الي جان ماكو نت ولا تعليم مفتوح ولا كورسات ولا دورات ولا فعاليات، اليوم تكدر انت تطور نفسك اضافة الى دراستك بالجامعة. مثلا اذا كان اهتمامك اكاديمي، تكدر لما الاستاذ مثلا يعطيك عن نظرية معينة او تجربة معينة تروح تقرأ عنها بالنت او بمصدر اخر وتشوف حيثياتها وتطلع عليها بالكامل وحتى التجارب والافكار المتعلقة بيها وهيج راح انت تطور اكثر وتصيرلك خبرة حتى. لهذا حتى لا يطول الموضوع خلي اركزها بنقاط:

1- ان تكون مهندس ناجح يعني ان تكون مهندس منضبط جدًا بيده ورقة وقلم.
2- ان تكون مهندس ناجح لازم تتعب على نفسك انه تدخل كورسات الها علاقة باختصاصك حتى لو بفلوس حتى لو بالنت باليوتيوب تتعلم ولخص الي تعلمته على دفتر سمي Logbook.
3- كل مهندس ناجح لازم عنده شيء اسمه Logbook يدون بي كل شغلة يتعلمها او فد ملاحظة او اي شيء يحب يتذكره حتى تكون كمرجع.
4- لا تكتفي بدراسة الجامعة فقط ابدا توسع توسع توسع ودوم اكول لطلابي عدكم فرصة انه انتم بالجامعة تطورون مهاراتكم تسوون تيم اكو حاليا انترنيت يجمعكم وتكدرون تفكرون بمشروع صغير تعملوا ومنه تتوسعون.
5- ان تكون مهندس ناجح يعني ان تكون لغتك الانكليزية جيدة جداً.
6- ان تكون مهندس ناجح لازم يكون عندك معلومات بإدارة الاعمال.
7- وان تكون مهندس ناجح لازم تعرف تخطط لكل ماسبق، ما اكولك تصير مخطط محترف ولكن لازم تعرف لما انت تطالب شتسوي ولما تتخرج شسوي يعني مو كلشي تسوي بنفس الوقت وتضيع عليك.

شارك ايضا بنشاطات بكروبات واستغل العطلة الصيفية انه تقرأ وتعمل تجارب بالامور الي الها علاقة باختصاصك. حتى لو تروح يم شخص خبرة يعلمك او تدخل دورة معينة.

والتعب والاصرار والجهد هو اساس كل عمل دؤوب وناجح.

#مهند_الريكاني

وعليكم السلام شكرًا للكلام الي يعطيني اكثر من حقي.
ج/ انا حاليا رجعت للعراق واسكن في محافظة دهوك.
ج/ حقيقة لما كنت بهذا العمر ما اذكر شكد قريت بالضبط بي كنت اقرأ.

#مهند_الريكاني

وعليكم السلام والرحمة

بخصوص سؤال الاول؛ صياغته بهذه الطريقة غلط انا الكتب ما غيرت مسار حياتي اني الي غيرت مسار حياتي لهذا اذا ردنا نسأل هالسؤال فلازم نكول (شنو الكتب الي ساعدتك بتغيير وانفتاح نظرتك على تغيير مسار حياتك) الي اقصده انه مو الكتب هي كانت عام التأثير الاول. خلي اكوللكم شغلة، رب العالمين يعطي للانسان فد امور ما يكدر انسان اخر يحصلها لو يقرأ كتب الارض كلها. مثلا شون تستنبط حكمة من شغلة صماء بالطبيعة شون تربط احداث وافكار وانت داتقرأ كتب هواي شون ممكن تتعلم وتستفاد من تجاربك وتربطها شون على غفلة تلمع فكرة بدماغك وانت داتشاهد نحلة تروح وتجي. لهذا انا دوم اكول اكو ناس تقرأ هواي بس تبقى بدرجة قارئ واكو ناس مثلي تكتب افكارها ولما تجي تقرأ تشوف اكو كاتب عظيم مدون نفس الافكار الي انت تفكر بيها هنا تحس بقيمتك لانك عالاقل وصلت لافكار وصلها كاتب عظيم قبلك هم. ايضا نوعية الكتب هي الاهم وليس كميتها. ممكن اقرأ قليل وامتلك نظرة تفوق واحد قاري عشرات المجلدات. شوف الكتب مثل مفاتيح تفتحلك ابواب على عوالم لكن كيفية الاستنباط من هاي العوالم ما تمنحك هي الكتب بس وانما امور اخرى تشارك بيها. لهذا مو كل قارئ يصير مفكر وكاتب.

ثانياً حاليا داقرأ
Rise of the robots
مغامرة العقل الاولى
Beginning of infinity
تكوين المفكر


بالنسبة لسؤالك بالاختصاص؛ اكيد اذا تحب تختص بالرياضيات لازم تقرأ كلشي بهالحيثية والمبادئ تضبطها بعدين تجي على فقرة اسمها ال Papers وتشوف العالم وين واصلين اخر شي وبشنو دايحجون ويبحثون ويحلون.

تحياتي وبالتوفيق

#مهند_الريكاني

حقيقة الانكليزي من المواد الي يسموها Self-study تكدر تعلم نفسك بنفسك عن طريق كثير امور منها كتب قواعد ويوتيوب مسلسلات افلام اذاعة حوارات قراءة كتب او حتى الكتابة. وهاي العملية تأخذ وقت مو شهر وشهرين.

حقيقة كل ما اقرأ، اكول هذا الكتاب المفروض الكل تقراه. لهذا معندي كتاب معين
بس اتمنى الكل تقرأ الكتب الي الها صدى عالمي ونقاشات وجدل
مثل كتب دوستويفسكي دويكنز الغزالي روبرت كرين وغيرهم

#مهند_الريكاني

بالنسبة لتأليف الكتب صديقي حقيقة ماكو برنامج او خطة معينة. كل كاتب هو يضع خطة خاصة بي اعتماداً على نوع الكتاب والمصادر والفكرة. اكو كُتّاب من الاول كل معالم الكتاب واضحة عنده فهذا فقط يحتاج يقسم الخطة المالته ويؤطرها باطار زمني. واكو كتاب يكتب بي بعد ممكتشف كل زوايا الكتاب فهذا تشوفه يكتب ويغير ويضيف ووقته مفتوح. اهم شيء بالكتاب هو الالتزام لانك مرات لما تنقطع راح تنقطع عن الفكرة والتناغم والانسجام وهذا يخليك تعيد قراءة ماكتبت مرة اخرى.
حاليا راح زمن الدفتر، اكتب اول مسودة الك بالحاسبة برأيي افضل وسهل التعديل. ومدة الي يستغرقها الكتاب يعتمد على نوع الكتاب وقابلية الكاتب والوقت والانشغال الي هو محكوم بي. اكو كتب تكول اشهر واكو تطول سنوات. والنشر عادة يكون عن طريق دار معينة للنشر وضمن شروط وبالطبع تختلف الكتب العلمية عن الادبية واكو ناس مقيّمين يقيمون (ولو صاير عدنا كلشي ينشر).

حقيقة معندي مؤلفات بدأت بمؤلف الي لكن انشغالي الشديد واجراء عملية جراحية بسيطة قبل ايام وقفني عنه وانا ما يهمني انه الا يصدر الي مؤلف يهمني انه اوثق افكاري فقط البعض ينشغل انه يريد يصل مرحلة يكتب صدر لي ومهما كان المؤلف سيء.. حاليا ببالي ٣ كتب ولكن مشكلتي مع الوقت.

الصفة الايجابية حقيقة اتمنى كل الناس تشوف نفسها مهما كبرت ووصلت انه تتواضع وتقدر العقل والعلم الي تمتلكه والحياة الي تعيشها.
والصفة السلبية الي اكرهها هو التكبر، انا اتعقد من بشر يتكبر مهما بلغ من مكانة لاننا بالنهاية مهما سوينا فنحن نسوي لمحيطنا. مثلا اني من اكتب مو علمود اشوف نفسي اصير احسن كاتب او ناس تصيحلي فهيم او شيء بالعكس اكتب احب اساهم بشيء ارتقي بي بنفسي وبمحيطي لاني اعرف انه تذا محيطي ارتقى انا راح اعيش مرتاح. لهذا مهما كان الشخص الي امامي واصل بس اشعر انه يتكبر ويشوف نفسه انبذه مباشرة.

#مهند_الريكاني

لا اعرف اذا كنت ناجح او لا الى الان صديقي لكني حمدلله حققت 98% من الي انا خططت احصله. وبالنهاية كلنا نعيش ونطمح ونحاول نرتقي اكثر ونتعلم من بعضنا.
شكرا لك

#مهند_الريكاني

وعليكم السلام

طبعاً الهام الكاتب يعتمد على ظروف منها محيط الكاتب نفسيته حالته حتى المكان الي يعيش بيها وغيرها. برأيي كلها امور اساسية وبالتالي برأيي الدافع الاساسي للالهام هو هدفك من الكتابة، كيف؟
مثلاً لو جان هدفك من الكتابة علمود شهرة او لفت انتباه فممكن بعد مدة يخمد هالالهام ويروح الحماس بمجرد انك ما حصلت على الشهرة او ما تطمح اله.
طبعاً القراءة وقود الكاتب وبلا قراءة القلم يذبل بالتدريج.

#مهند_الريكاني

"Dreams feel real while we're in them. It's only when we wake up that we realize something was actually strange."

- Inception 2010.

قال المرواني ذات مرة "نفيت واستوطن الاغراب في بلدي" وعندما كنت اسمعها كنت أنظر الى محيطي وأصدقائي ومحلتي وكل من اعرف واقول لا لم أغرّب؛ لازلت في بلدي.
كنتُ أتخيل الامر على أننا جميعاً كنا نسكن في حي سكني بسيط هادئ غير منفتح على العالم. كانت نوافذه مضاءةٌ تُزيّنُ الحي ، والحياة تسري فيه وتدبُ في ثناياه. ثم ما أن إنفتح هذا الحي على العالم حتى فتح الموت شهيته بشراهة، واخذ يحصد من نحب. وفي كل مرة يموت فيها احد تنطفئ نافذة في الحي.
ماتوا اصحابي احمد، سليم، محمود، وغيرهم وانطفأت نوافذهم.
ماتت اطوار ونمير وسعاد العلي وتارة ...... وانطفأت نوافذهم.
وهكذا بدأ الحي الذي يجمعنا يصبح مظلماً بعد ان انطفأت معظم نوافذه وتعرضت للنسيان ونحن نترقب متى يحين دورنا لتنطفئ نافذتنا .
كل تلك الارواح التي حصدها الموت باتت قناديلاً تضيء سماء الحي الذي نقطنه، الحي الذي اعتدنا أن نسميه الوطن. الوطن الذي بتنا فيه غرباء!
ومن يدري! ربما سنردد ما قاله المرواني "نفيتُ واستوطن الاغراب في بلدي".

تصبحون على خير . .

#مهند_الريكاني

ردود الأفعال على مقتل ( موديل ) عراقية...
ناشط مدني: أعلن براءتي من الإسلام.
ناشطة نسوية: ميليشيات ذكورية حقيرة.
شاب كيوت: صاحبة أطهر قلب.
شاب مو كيوت: تستاهل....كانت كذا وكذا
محلل فيسبوكي: أنهم يستهدفون الجمال !
****
للقتل دوافع متعددة...والقفز إلى ( التطرف) كسبب دون وجود أي دليل...ومع عدم تبني اي جهة للجريمة، أمر يعبر عن نية ( المتحدث ).ورغبته في جر الحدث لمنطقته...
اعتبار الجريمة ذكورية لمجرد ان الضحية أنثى يجعلنا نفكر في الجهة خلف الأعداد الهائلة من الضحايا الذكور...
المبالغة في الحديث عن خفايا نصاعة قلب الضحية ( دون وجود معرفة يها) يعبر عن شغف بالظهور بمظهر مبالغ في اللطف...مكشوفة جدا.
بخصوص( تستاهل) ....لو كانت متورطة فعلا في قضايا مخالفة للقانون فكان يجب أن تحاسب بالقانون...وليس من قبل اي فرد مهما كانت جريمتها...
بخصوص ( استهداف الجمال)...ارحمونا.
رحم الله الضحية.

#العمري

من التجارب التي يمكن الاستفادة منها..
هي النهضة الصينية ..
النهضة الصينية لم تاتي هكذا نتيجة صدفة ..
جاءت بعد انتقادات شديدة من مفكرين ادخلوا السجون ..
هناك مفكر صيني كتب كتاب اسمه "The ugly chinese" .. الصيني البشع!!
اليوم لو كتب احدهم كتاب انتقادي "العربي البشع" او "الكردي البشع" ربما سيقولون هذا مخبول ..
لكن هذا المفكر بو يانغ ذكر انتقادات حقيقة منها ..

1-ان القذارة لا تفارق الصينين.
2- الاهمال:-
للاسف من اوجه الاهمال عندنا اننا دائما ما نجعل اخفاقنا على #القدر..
للاسف من جانب الاهمال انك ترى استاذ جامعي يدرس 40 سنه وليس لديه اي نشاط فكري يذكر..
ليس لديه اي مساهمات..
حين يتكلم يخطأ اكثر مما يصيب ..
3-الضجيج:-
قال الصيني اذا همس لاحد يصيح..والعرب كذلك ..
وبعد انتقادات مماثلة لمفكرين اخرين كانت هناك غربلة ومرونة نسبية في الفكر الصيني ..

النهضة تتطلب كسر الجمود .. كسر الصمت .. مجابهة الخوف ..
تتطلب الصدام مع المؤسسة التقليدية ..ونقد الايدلوجيات التراجيدية ..
قبل كل هذا تتطلب ان نزيل الوهم الذي في انفسنا اننا نظن اننا بخير ونسير الى خير..
ان نزيل ذلك الغرور من فكرنا وشخصيتنا ... لنقف على سلبياتنا واخطائنا ونقول بكل صدق وشجاعة اننا اخطأنا ويجب تصحيح المسار ..

#مهند_الريكاني

من اكثر المشاهد تأثيراً في سلسلة ال Vikings.

يجسد Ragner -اسطورة مقاتلي الفايكنك- هنا واحدة من اللحظات التي سنمر بها كلنا وهو يساق الى حتفهِ. اللحظات التي ستكون ذاكرتنا نشطة تعج بكل تلك الصور التي ستمر امام انظارنا كشريط فيلمٍ سنمائي.
ربما الموت ليس أمرًا سيئًا؛ ولكن ما يؤلمنا هي الذكريات.

#مهند_الريكاني

اجواء الخريف جميلة
أحب الرياح التي تضرب تلك الشجرة المصفرّة
تعرّيها
تنفض عنها تلك الاوراق البالية
وتبقي اخرى مخضرّة!
كذلك المشاعر
لا يثيرني الحديث من خلف ستار
واجهني
وبح لي
لا تحرم نفسك لحظة التجلي هذه
حتى لو واجهت تيارًا باردًا
او تجاوبًا بليدًا
فالاحاسيس التي لا تثور
لا ترتقي
فما فائدة الذين رقدوا
وماتت عواطفهم في صدورهم
ورحلوا عنا دون بوح!

#مهند_الريكاني