#قصة_الصدر...*

مثل البحر ويّ الحوت
قصته الصدر ويّ الموت
يا لابس چفن عندك جواز
ابكل مدينه تفوت
ها ،، يالسافرت
بحر النجف بي ماي
من جوّه البيوت يفوت
من طول السنين
وهودجك رحّال
عندك تذكره للموت
هذاك مسجد الكوفه
وابن ملجم گعد مبهوت
الموعد ساحة العشرين
كوّر بالجفن من فوگ هذا الراس
الظهر ،، صلّت وراك الناس
صلاة الليل ابد متفوت

ياللاّبس چفَن لايگ عليك الموت
للمثلك عراضه ،، وفد عشيره انصير
اول بيرغ ابغداد ،، ثاني بيرغ ابطهران
ثالث بيرغ ابيروت ،،،،،
ودمّك من ندهته بليل
ويّ الخيل ،، يركض ينده اهل الكوت
البحر والحوت
والسكته وصدى الامواج
ريشه اطيح خدرانه
اعله ميل الليل
نسمع صوت
اشعجب كلمن قفل بابه
ويگضون المسه ببيوت
لا وگفه على الشاطي
لا مسواگ للسهره
ما طلعوا سوه
و وگفوا على حانوت

متراضين هالايام مامش صوت
محد ودّه للثاني ،، رساله بيد كاتم صوت
البحر والحوت ،، زعلانين ،، متراضين
محد يعزم الثاني ،، اعله وجبة موت

اشعجب هذا السكوت ؟؟
وقصة البسكوت ؟؟
البحر يتمنه موت الحوت
بس الحوت لو مات البحر
هم مثله راح يموت
من شايف عدو
ويّ عدوه يموت ؟؟

#كاظم_اسماعيل_الگاطع

الموضوع ،،
( جندي متزوج ولديه طفل يذهب الى المعركه ويتم اسرئه ..
يصل الخبر لعائلته شهيد..!!!
بعد مرور اربعة اعوام يعود من الاسر ..
ويجد زوجته متزوجه من اخيه
ولديها طفل منه)..


(( القصيده ))
......

ما زعلان بس حقي امنريد ازعل
أنه لتيه دروبه وما عرف يندل

اجيت برجعتي من اليسر فرحان
وحسيت بهلي ملگاهم اتبدل

لوه رامي عليّ صاحب فضل چا صار
على فكت قيودي الحارس استعجل

الفرح ماي برمل فگدته شفافي وضاع
وخذه مچانه الحزن بالروح وستفحل


حقچ مادريتي اشگد الچ مشتاگ
وبلساني اشكثر صوت اسمچ اترتل

شابگ صورتچ والهاونات اطيح
وماخذني النزف وبوجهچ اتغزل

كون ادري برجعتي الگاکم معرسين
امنلول لهلي اردن بالدمه مبلل

إنتهى دوري وبعد ماظن رجعتي تفيد
الوكت خلاني سيف بچف المشلل

المتت بگلوبهم قصرت من رديت
وبعد ياعله تشفه وياجرح ينشل

#محمدمهاوي ٢٣_نيسان_٢٠١٩

كبل سنتين ...ماتت ضحكة ايامي..

وچفن حسرات لف روحي ولياليهه..

#كاظم_اسماعيل_الگاطع

واذا صــــوت الغــــراب يعير الناي
بعد حكَه الكَصب من يثلم سيوف !

لـ محسن الخياط

هواكم زيبگ وباگه الهوه بساع
وچذابي نهركم ماترس جود

لــ الگاطع

‏تدري نوبات السفن
لو ضاگ خاطرها بجُبن قبطانها
تسافر وحدها !
-مظفّر .

عذبني بيك ارتاح ماشيلن ايدي
مازعلك امنلگاك چاتل عضيدي

#محمدمهاوي

الحزن من طر ضعنهم صارلهواي
وجفه ومايدري احبه صارلي هواي
الهوه لله وهوه الله صارلي هواي
امنعوفه ادري بهوه الله يشح عليه

#محمدمهاوي

ضاع العمر ونوب گلي شيرده
شيرده والمحبوب ماي وتبده

#محمدمهاوي

خشن گلبه النسه ذكراك مولاي..
وبخيل لما بچه عله مصابك دموم

ملاذ لكل بشر ،شباچك اهواه
ياباب المراد لما انسد يوم

نحرك مايهاب سيوف جبروت..!!
لذلك گيدوك ومتت مسموم..

مذنبين، وبعدنه نصيح نهواك..!!
وضلمناك بحچينه..وانته مظلوم

وجرحتك بس احبك (حب مجانين)
بكثر غيظ البصدرك چان مكظوم..

وكثر ماعاشگين لمن غيب
على گبتك تضل ارواحنه تحوم

ندبتك واني مذنب راد غفران
وبقت دعواتي يمك تقبل تسوم؟؟

زغير وضاگ صدري من المعانات
وانه ادري انته التزيح اكبار الهموم

وشعد منهن ذنوبي هواي مولاي..!!
ونخيتك وادري گلبك مني ملچوم

بعيد..وظرفي ماخلاني أمر بيك
لچن دربك ابين عيوني مرسوم

#محمدمهاوي

بعد للفيل بالك لا تحط اجناح!!
حليم، وبذني مايلگط حچي اللواح

وخلهه ابالك من اختاض انزل الغيم
ماني بعازته عنگودك اليلاح..

منريدك لو بسابع كوكب اوصل ليك
وافوجك لو نهر بجروفه ألف تمساح

صگر ماخفگ جنحي وعالفضاله نويت
ووكر عالفريسه التتعب الذباح..!!

انكرت فضلي بعجل و بسرعه بيه اطيت
لچن ضل عالي صيتي بفعلتك ماطاح

الزرع من يكبر وتترس اثماره الكاع
الفضل مو للمساحي لحنية الفلاح

واذا ذموني مو معناها بيه العيب
الزرعهم طلع ذابل ذموا المرواح

صرت حب بمزار شمالك شوازاك؟
سبيل انطيت مايل للاجه وللراح

ومن كثر الطمع ماسالم عله غطاك
ولا مايك ركد لا بالجذب مرتاح..!!

گفاك فراش حضره معلم عله الدوس
وضعيف بموقفك شاهول خر وطاح

ضل كابر عمر لا تتكل عالناس ..
الجرس حصل شني؟ من گضه عمره صياح؟

#محمدمهاوي ١٦كانون الثاني ٢٠٢٠

#زنجيل_ابوذيات


اصيده الصوب الدلال وأنطار
لسابع سمه وسيفي حذاي وانطار
شراييني ايبسن من رحل وانطار
الگلب طرت النيل خلاف فيه

نيل انطر دليلي وفاض يانيل
دمعي ولوه يلفني الموت يانيل
ولفي وباب روحي انفتح ياني
لگبل رحت فراگه طحت بيه

طحنت رحة فراگه وگام ردهه
الرساله وعليّ نفسك بان ردهه
عفتني وصار حالي حال ردهه
وألف علة مريض أصبح بيه

علل بيه آنه كثره وانته مالك
علل،من مثلي رادك؟وانتمالك
وعلي مايوز منك وأن تملك
روحي احلف وگولن ماهي اليه

روحي اتبره منها وانته راحك
يغث بيه فعلها وانته راحك
تعال عداي كثروا وانته راحك
الدهر وبرمحه وحشي اجبل عليه

وحشي اجبل عليه برمح بل فات
رمحه وصوب الدلال بل فات
الدليل،وگلت اعذره الغلط بالفات
عذرتك ليش هسه گطعت بيه؟

عذرتك لچن عفت الحزن يلتام
بروحي وصعب جرح جفاك يلتام
اييتك وسرع من الفهد يلتام
إلي چا ليش درت الضهر ليه

درت الضهر چا ليش؟ عشرتنه شينه
لو شفت واحد طاگ واحواله زينه


#محمدمهاوي شباط٢٠١٨