دنيه موالفه للغير كوه نريدها ويانه

من شفنه القطار يصيح
طير وشاف جنحانه

شال الناس كل الناس وانه وياج خلانه

تعبان شكثر تعبان
وانتي وياي تعبانه

رجعنه امن المحطة بليل
چنّه وجوه دفانه

#كاظم_اسماعيل_الكاطع 🖤

مشه وبعد علي وگطع ورافت
دليلي والنفس مني ورافت
وطحت مختنگ ومجبل ورأفت
ربك رحمت وردتك ليه

#محمدمهاوي

لا مرسال لامن گلبعدكم
ويلمغربين لامن گلبي عدكم
يهالمجفين ريضوا گلبي عدكم
ويطارش هلبت تردونه ليه

#محمدمهاوي

يلسهمت بحياتك تره اسهامك
بمماتي وهذا ياهو الترس هامك
ارشگني وماشلتهن تره اسهامك
ومحمد روسهن زنجرن بيه

#محمدمهاوي

عظم هدهد ولا تتحصل بساع وترف محد يكسرك خاطر ايتام
#ابيات_غزل #الشاعر_محمد_مهاوي

#ابن_بغداد_الحبيب_عباس_السليطي
وكح وتمرجحت وآنه عله حبل الموت...
لا صاير سراب ولا دفعني الريح

ورغم كل الوجع ما طلع مني صباح
مو مثل الجرس ياهو اليجيسه يصيح !!

#محمدمهاوي

الورد صيته نبي وما عير العاگول
اليدور العاليه يگضي العمر عثره

#محمدمهاوي

نشدوني عليك وبسمك تغنيت
وانه بفعال أبوي وطيبته تباهيت
من كد ماتحب تعطف عله الايتام
تحبهم اكثر امنخواني شو حسيت
ياعيد الزغار ولكمة المعتاز
ياعزنه وسترنه ويا أركان البيت
تظل تعشك السانك صفنة الديوان
تشل بالمعصيات وفتك ماخليت
كريم وعلي معلمك ماترد مسكين
مضيف الحسن روحك باب ماسديت
اذكر بشته من هب البرد والعوز
بينه تغطي بويه وبالهم تغطيت
اشكثر سويت زين وماكلت سويت
متواضع عرفتك ما ادور صيت
خمس تنطي عليمن عالبرد -عالجوع
وشني وي العوز تضحك منه مامليت
أمس من نمنه والعوز عله جتفك نام
غفى جا ماندهته الفجر من صليت
مثل سفرة القاسم جبت عمرك هيج
وكريم وماخذت من عدها بس انطيت
جبت عمرك قنوع وي الفلس عدوان
وما مديت جفك تدعي من مديت
يمدرسة الاخلاق اشكثر بيك ادروس
وعلي محضوض أنه وبحضانك تربيت
خذت منك عبر حته بليالي العوز
صبر عشيتنه وبدموعك ترويت
يشيخ العاطفة شماغك غطى البردان
نظيف وطاهر انته بحب علي توضيت
حدر اعكال ابوي الكه الفراش ينام
وقار الشيب وانه بشيبته تحنيت
شيخ وشيختك مو عن وراثه تصير
عن طيب وتواضع شخت وتعليت
يلمدللني حضنك دافي بجويريد
بتعب ربيتني وماضن الك وفيت

#محمد_مهاوي آب٢٠١٨

#ياحلوة_يم_طول_الحلو

#ابيات_غزل #الشاعر_محمد_مهاوي

بلا موادع..
رسموا بروحي انتظار

وردت اعاتب والمن اشكي ؟

وهمه حيل أبعاد عني
والسجن قفل ابوابه وما رحمني

ورغم ماتمشي الثواني،
للفجر ضليت أتاني..

وشكثر ونيت بس محد سمعني

مثل جوع ابطونه
بآخر حصار !!
ومثل حسرة عاشگ
يفوته القطار..

هيج گمت اوصل لحضنك،
واستحي ، وشيباتي تخجل
يمك اوصل واستدار

ولملمت روحي التبدت
گمت احس انفاسي ردت
ثاري طيفك مارني بعز النهار

ومستمر هذا العذاب..
بروحي ماعنده أجازه..!!

وخاف اموت محلف الصحبان باجر
عالاحبهم خل يمرون الجنازه

ولا يهوسون بوراي
وخل ينفذون الوصيه..

فدوه مروا گبال اهلها
وجبلوا اجدامي الرخيه..

المسمعهم غزل من مات أخوي!!
سمعوني ألفاظ صلفه،
وشوفوني الذله كلها لما مشوفهم أذيه

وما اشلعه؟ خنجرك مثلك عزيز ..!
عايفك شتريد سوي وشني يدور بخاطرك
هم سوي بيه..

مروتك..
بس گول( أحبك ) لا تفشلني وي ربعي
وهسه لتعدني حبيبك ،
گول هذا أنسان ماجرحه خطيه

ومن شفت چفه بچفه
وجرحي ضل مستمر نزفه
يومها يله عرفت شنهي المنيه..

#محمدمهاوي شباط ٢٠١٨

#الغابه...*

#عن_دول_الجوار

كلشي ولاتجنون اسلاح
گالوا لتصنعون اسلاح
واحنه بغابه وداير ما دايرنه اذيابه
وداير مادايرنه اذيابه
وهتك اعراض وسفك ارواح
وكل جار ايراوينه انيابه
وكل جار ايسمّن بچلابه
ويحد بخنجر ذبّاح
بوسط الغابه الشرك امكهرب
والغار امسگّف برماح
وطيور بگاع المحترگه
ويا ويله الما عنده اجناح
مناه ظلمه .. ومنا ظلمه
بس عدنه اينوّر مصباح

كلمن بيده احجار وهدّوا نص الليل
ويا ليل اشگد بيك اشباح
واليگصد بغداد بغاره
باسطنبول يرد يرتاح
وبسوريّه الثعلب ماكر
ماكر جداً...
مو حواء الغشّت آدم
هوّه القدمله التفاح
وذاك اللي گاعد يتفرج
هذا اتصوب .. ذاك الطاح
ومن روجات البحر الاحمر
شفنه الدم وشفنه الكاتل
ومعگل چان التمساح ..!!

ويا بستان الما جر حسره
ياعود الما وّن وناح
هضبة. نجد وربع الخالي
خلوا گاع الله الخضره
هيمه ومبزل للأملاح
گطره وطاحت...
شيرد ماي الگصه الطاح؟؟
وشلون ابنادم يرتاح؟؟
منهو يعيش بهاي الدنيا
ومامش جوّه الراس اسلاح؟
شافوا بغداد ابعزتهه يوميه الناس اتزف عاشگ
وحزن الحلوه ايصير افراح
ما فادتهم هاي الفكره
ورادوه ايطيح وما طاح
ما يعجبهم يكبر سنبل
ويصير ابطول الفلاح
شافوا شمس الديره اتعلّي اتعلّي اتعلّي
وبحجارتهم ما تنلاح

گالوا لا تجنون اسلاح
واحنه بغابه
وداير ما دايرنه اذيابه
وهتك اعراض وسفك ارواح

للعملاق #كاظم_اسماعيل_الكاطع

#عرك_معدان

تفز عيني..
وأشوف الليل بيه حتى النجم شمات

وانته بعيد عن الروح
وجروحي ويه عزف الناي تتناغم

دليني
عله عمري الضاع
وشراع السفينه، وصوت المعبرين

وكت ما چان روج الموت يتلاطم

يكسرت خاطر العميان
لماشافوا هلال العيد،ولا شافوا
غصن مكسور

وغربان وبلابل فوگه تتزاحم

(جرح مخزول)
بي فزعه،ونزف ثارات ودروب
وصهيل خيول ومرادم

عشگ
مدري انتفاضة ليل؟
(عرك معدان) ،مدري جروحي تتلاچم؟

عشت عثره
بدرب شمات ميرحمون
ونصيحه،گبال مذنب حلم يتفاهم

منو المسوؤل دليني؟
هجرك لو گلب متروك..
حوآ؟التفاحه لو آدم

أخيرا خلص
واهس فلح وكت الگيض
بين آمال گلبي ونشغته مصادم


#محمدمهاوي تشرين الأول/٢٠١٥

#الحرب_والسلام...*

بالحرب او بالسلام
يا شعبنه برغد نام
للحرب عدنه سلام
وللسلم عدنه حمام
خطوه خطوه اتعد دربنه
ونعرف انحط الاقدام
وگطره گطره انعد بحرنا
والبحر من مر عليه طارينه گام
والبحر من شلنه ادينه
اتبسم ،، ورد السلام
يامحب حب اعله كيفك
وازرع بشاطي الجفن وردة احلام
ما تلوح الشمس وجنات الحبيبه
عاليه اشجار الغرام
يا گمر نام اعله خد شاعر
غمض ليله بحياته
و وندهته بنت الكلام
شوف يا شاعر خوذهم
والسلاح الظل بأثرهم
شوفها بعين القصيده
وشوفنا بعين الالهام
همه عافوا كلشي عدهم
واحنه حته اتراب بدلتنه نجيبه
ومايظل بأرض الحرام
طيح ياسنبل على اچتاف الحبيبه
الغاليه ام عشرين عام
من تلاگيني ويمر كحل بجفنها
تصير دمعات الكحل عالوجنه شام
نامي ليلچ يالحبيبه
ومن تمر نسمات وتجّفل الگصيبه
والله اعت الريح من زيگه بديَّ
وينگطع نفس الانسام

يا ملاعيب الاطفال وما جفلتي
وما يصل يمچ قفلهم
حته لو نبني سگف من العظام
يا "وسام" امشي اعله طولك
والله اخيط ،، جلدي ثوب
ولا يشگ البين دشداشة وسام
جاي من السوگ والسلّه خفيفه
قصّرِت بعت الحمام
لا تهم شيصير باچر
نعرف اضنون الليالي
لن قره اعراقنا چف الايام
يا طياير الورق طيري اعله كيفچ
عاليه اسطوح الحمام
وصيحي:-
يا غيرة شعبنا
اتصير كل غيرتنا مهره
ويصبح مچتف عدونا وگايده
بحبل اللجام

#كاظم_اسماعيل_الكاطع

#على_حب_أمير_الانسانية_وسيد_البلغاء
#علي_بن_ابي_طالب_روحي_له_الفداء

أهي بس لعلي كلمة (أمير) تلوگ
التقي الدر الحكيم العابد الزاهد

علي يحب اليتامه بگد صلاة الليل
ولجلهم عاش ميل بعمره ما گاعد

بايسهم بگد ما بايس القرآن
وحاضنهم بگد ما صايم وعابد

علي بخاتم تصدق وهوه بالمحراب
وعزبهم سويه المحب والحاقد

شعير يطش علي ويتلثم من الطير
عَفي وعاش بنعمته المقر والجاحد

گبل من چان اليعزب تعبده الناس
علي معلم الكرم للزادهم بارد

على متون أبو تراب انتچه اشچم هلال
اشكثر فرح گلوب وچم ضهر ساند

علي من يتعب يوگف الحسن عالباب
خافن عن مضيفه يتيه الناشد

گبل عمر بن ود چان اشجع الفرسان
بس گبال حيدر مارفع ساعد

صبي چان، وقلع خيبر بفرد اذراع
وتنگاها وشطرهه الروس التعاند

علي إعله المو جسر ما سال الفقار
وولا ناحر طريح و لا تبع شارد

علي الأول وقبل النشأ والتكوين
ولي، وبأمر العزيز القاهر الواحد

علي مرجع الشمس، رابع انعده شلون ؟
جدار الكعبه اله لهليوم ضل شاهد

علي ما عاش حاكم،علي عاش إنسان
وهو مفارگ الزهره يصبر الفاگد

#محمدمهاوي

#هكذا_هي_الإنسانية

شارلي شابلن ( يهودي الديانة ) أشهر كوميدي في تاريخ السينما ، عندما كنت صغيراً ذهبت برفقة أبي لمشاهدة عرض في السيرك وقفنا في صف طويل لقطع التذاكر وكان أمامنا عائلة مكونة من ٦ أولاد والأم والأب وكان الفقر بادياً عليهم ملابسهم قديمة لكنها نظيفة وكان الأولاد فرحين جداً وهم يتحدثون عن السيرك وبعد أن جاء دورهم تقدم الأب إلى شباك التذاكر وسأل عن سعر البطاقة فلما أخبره عامل شباك التذاكر عن سعرها تلعثم الأب وأخذ يهمس لزوجته وعلامات الإحراج بادية على وجهه ....
فرأيت أبي قد أخرج من جيبه ٢٠ دولاراً ورماها على الأرض ثم أنحنى والتقطها ووضع يده على كتف الرجل وقال له لقد سقطت نقودك ..نظر الرجل إلى أبي وقال له والدموع في عينيه شكراً يا سيدي!! وبعد أن دخلوا سحبني أبي من يدي وتراجعنا من الطابور لأنه لم يكن يملك غير ٢٠ دولار التي أعطاها للرجل ومنذ ذلك اليوم وأنا فخور بأبي..
((كان ذلك الموقف))أجمل عرض شاهدته في حياتي أجمل بكثير حتى من عرض السيرك الذي لم أشاهده

محتاج افرح واتغاضه الهموم
رغم لحن الحزن ليلية ينشُد

وصبغة الشيب واكشخ للمواعيد
واگول الفات مات، اتفائل بغد

اباوع للدرب وصورك جاي
بكل لهفة وصراع الشوگ يشتد

أمس ذكروك يلما ذاكر الطيب
يمي وحتى جرح جفاك عيد

اذكر بحبك يامه ذليت
وكابر وانكسر والحيل ينهد

ما فاد العتب بالمايحسون
وأكتب والرسايل مالهن رد

وفي،وسامحتك وما ماسك يوم
وقسيت انته وجفيت وجفك انمد

عدهن ويه غيري هواي الأحلام
وانه البيه بس جروح تنعد

وبطيت وذكرياتك صارن كبار
وماتن ونبنى لكل وحده مرقد

اذا شفت بوجهنا،يبين العيد
اطمننك نسيت وگلبي هود

وتغاضيت شكثر وسط المعانات
اصبرت لآخر لقاء وگلبي مهد

انجنيت ورحت للميت احاچيه؟
عليك وردت الاخرس كون يشهد..!

مات الشوگ بيه وماله زاتوت.
ويبس بحر أمنياتي وماأجه المد

وي كلمة (وداعآ) مر ملك موت..
والابهر ويه سدت بابك انسد

غزت روحك ضحكتي،وذبحت النوم
وحكمت عالفرح يُسجن مؤبد

گلت تنتفض روحي بوجه الأيام
وبطت مأسآت عمري، وحكمك امتد..

عمومآ بالنهايه اليغدر يعيش..
وتضحكله الألوان الگلبه اسود!

مافكر بثار ويه اليغدرون
بس ينراد اخلي لفعلتك حد.

#محمدمهاوي تشرين الثاني /٢٠١٧