كرة قدم..

الجزء الأول من القصيده ..


حلوة الفلاح ايمررها ..
وسنبلتين صغار ابجفة
يعبر بيهه ويتحلم بالبيت الدافي
الثابت سگفة
يعبر كيسنجر .. هولاكو .. وملك الزين
ينطيهه لعامل باليسرى
وحلوة العامل عش طيور ومعمل جفة ..
يمشي العامل .. حلوة العامل
سجل گول وصافرة الحكام اتوگفة ..
العامل هذا الراد يگول
شايل مطرقتين ابجفة
انعادت .. حلوة الطالب يعبر سرعة
وينطيهه لبياع الفول
وبياع الفول يوصلهه للكناس
والكناس الرش الشارع
يعرف كل اعضام الفقرة الي تنداس.!!


#كاظم_اسماعيل_الكاطع

سلاما ياوطن يا زعل الأحباب
يا صفگه وغنه وزفه وهلاهل

اطالع بالصحف واقره العناوين
وانه ايدي عله گلبي ودمعي هامل

أخبارك عليها مخيم الموت
وتعداد الضحايا آلاف واصل

الرعب والخوف واصل للبساتين
بعد شضن تغردلك بلابل

ورصاص جنودك امطيحلنه شبان
ولون الدم صبغ حتى المشاتل

صباح الخوف..، انته منيلك خير..؟؟
خيرك فرهدته أحزاب عاهل

هذا اليوم يوم إسقاط الأحزاب
ومو طاهر حليبه لما يناضل

بيه نعزف نشيدك بين الأموات
ونغنيلك حدر صوت القنابل

بس كون انته تسلم باجر نموت
نركض للفشگ ركضة اصايل

بشرط حطنا بظرف موش بتوابيت
لأن عشاك وانحب الرسايل

زلم نفديلك تحلي التوابيت
ونضحيلك شباب بلا مقابل

نشامه وگبل صوت الحيهم نطيح
ولدك واحنه تربات المراجل

'مو مندس' (عراقي)وحقي مسلوب
وما مدفوع "آخذ-حقي-نازل

"سلمي" وما بدر من عندي تخريب
بعلم لفيت روحي وورده شايل

ابقى وياي وسمع موجز الموت
حتى انقلك الأخبار عاجل

الآن :وفاة لكل ضمائر أمن الأحزاب
.....وإنسانية اربعميت قاتل

وحاليآ... قرب قناص مأجور
حزبي، بلا ضمير، إيراني، سافل

قنص اربع شباب بعمر الورود
خريجين جانو...،بل اوائل

ذنبهم "جانو يريدون تعيين "
وحلمهم، جان حلقه وصم هلاهل

وحاليآ... مكافحة الشغب يرمون عالناس
وحالات اختناق من القنابل

وفاة أول طفل بعده بلگماط !!
بسبب قنينه دخلت للمنازل

وگلبي الي احترگ موش المقرات
ومو من القنابل دمعي هامل

لأن شفت ام شهيد تحاچي الوحيد
عدل حسبالها وشافته ذابل

وتگل لصويحبه البصفه مكتول
ولك بشر إبني گله مريته حامل



#الشاعرمحمدمهاوي

#نريدوطن

سلامآ ياوطن بصوت-حسن كريم-

#توازت...

توازت والله يستر من الموازه
كرهت الروح
چن روحي طريق اتكتلت بي ناس
وجنازه وره جنازه
يا صبر اليضم الآخ
وصلت للعظم سچينة العازه
ولاعندك غرض يسوه
گضن سلعه وره سلعه
بسعر مكسور...
بيعة ناس معتازه
بده حيل الحصار
يضك.. يحز.. ويضك
وكشفوا..
ابطونكم شوفوهم احزازه
امس معزوم يم شاعر
بتت ويّاه.. اخذنه الليل
ريگّني جرح بايت
وغدّاني جرح تازه
امس معزوم يم شاعر
تناقشنه على الحاله
سكارى ومو سكارى احنه
وگع بطل الصبر واطشّر اگزازه
وتگلي ليش نتوازه؟؟
يوميه حزن واطفالنه يموتون
وجنازه وره جنازه

رادوا يا جسر من تنگلب بالماي
حايط.. والجروح ابجسمك ادرازه
رادوها ضلام وليل ينزع ليل
ولا گرصة شمس بخدود خبّازه
توازت يسقط العايل
توازت يسقط المايل
مو ذبحوا شعبنه وعلمه وانجازه
وشعرنه وحلمه واعجازه
تعال وشوف بالوگفه شتبيع الناس
مو بس الغراض...
اجساد معروضه اعله الميّازه!!
ثگلت يا ربع مالت لطم عالراس
مو حتى المعوّق ماگدر يجنيله عگّازه
نظل ليا وكت عالميز
قطعة جام.. ارضنه.. وهم ألمازه
امس ولدت قصيده وگطّعتها بسيف
لمن طاحت اجنازه
عريانه القصيده وبيش نسترها؟
اذا راتب شهر مابيه متر.. بازه!!

#كاظم_اسماعيل_الكاطع

(قصيدة سلاما ياوطن )المنشد -حسن كريم -

كلمات الشاعر محمد مهاوي

ضم راسك، طلعتك منها مامحتار
راسه شما طلع مايسلم البسمار

نعم ضكني الدهر ،بس ماكو داعي انخاك
"عله جرفه يشيل حمله النهر مايحتار"

صحيح تراجعت، بس والله مو عن خوف
(يگص روس الخشب من يرجع المنشار)

مو شغلة جناح أفعالك تعليك
السيف اليظل خاتل ياكله الزنجار

وشجاك تغيرت؟؟ (كاتلني طبعك هاذ)
مثل فزاعه صاير تطرد الخطار

بعد مالك نفع صوره بحضن عميان
يرجعت ناهبه بردتك ذله وعار

گلتلك نايك يغثها الطريج بعيد...
تره الهودج يطيح بحنة أم حوار

أحبنه السهم يندل بلايه عيون
گصير، ومن يهد يوصل لسابع ثار !!

تطرب على الظلمه ادگولك خفاش.
نيتك ماهي لله بطبتك للغار

شفت ملگاك ملگه الروجه للغرگان
من رديتلك وچدت بيك غيار .

مو غافل وعرفنك، تره المسحات
تعرف فلاحها لبچفوفه منها آثار

وأنه گتلك گبل "مو كل خشن ينعاب "
'تره اللؤلؤ يحبهه خشونة المحار '

رحاله الخذوك!! بحيلك يلعبون..
(حتى بخنصرك حطو الحلقه أوزار )

كل ساعه بحضن !(هوه أنته چنك ميل )
'عمر لا صفه نيته، ولا عرف يختار'

"مثل سگف الگبر "بابك ولا مفتوح "
ذهب وشما غليت تبيعك التجار


#محمدمهاوي

الشاعر الكبير كاظم اسماعيل الگاطع صاحب المدرسه الصوريه التي انهل منها كثير من الشعراء واغترفوا من نهرها الخالد المتدفق عذوبه وابداع لقد ترك الراحل بصمه واضحه
في تاريخ الأدب الشعبي من خلال نصوصه الشعريه الخالده التي عاشت في وجدان المتلقي ولامست احاسيسه وحركت مشاعره وهو خير من ترجم الحزن والوعه والوداع
وهو القائل (وامي من الصبح صبتلي بالماعون ومن ضگت الحزن شفت الحزن طيب)
لم يكن هناك شاعرا ابلغ منه في الوصف والتوضيف واقتناصا للصوره الشعريه وهو القائل( الليله ضلمه ولا گمر بجروحي لامع الليله اسيرلك ورگ فوگ المدافع) رحمك الله ابا وسام

اجانه الماي شيلن يابوارينه
اجانه الماي ما يحمينه بيت الطين
ذبينه بعيد ابعيد
ذبينه اعله گاع بلا سمه ولا ريح
بويه نخاف
دنيتنه صريفه امن النسيم اطيح-----الراحل الكبير كاظم اسماعيل الگاطع مقطع من قصيده (الجرح الاول)في ديوانه ((العيد ابو هلالين)

منهو بحالنه احنه المساكين؟
احنه المحد النه..المدري امنين؟
ومن يسأل علينه لمن نغيب؟
حتى لو غياب.. يطول اسنين.
خلصنه عمرنه بالمحطات..
سفر.. وبيوتنه.. اسطوح الفراكين.
مرسومه بجلدنه ذيج الانياب..
الجرح لو طاب..هم يترك نياشين.
وين اهلي علي مادكو الباب..؟
تره صحتي عليلة.. وكلبي مو زين
من اهل الله بعدنه.. وناس طيبين،
مكتوبهة بجناسينه..غريبين!!.
خسارتنه چبيرة.. وغشمه عالسوگ..
بعنه اعقولنه.. بسوگ المجانين!!.
من يستاهلچ يا دمعة العين؟
مسكين اليداين دمعة العين.
تمنينه نموت بغير تعذيب..
وعله المذبح.. يطغنه..صارله اسنين!
فض الازدحام وطشت الناس
وما گدامنه بس واحد اثنين.
يوصلنه السره ويتأجل الموت..
يم اركابنه وتعمه السجاجين! ..

#كاظم_اسماعيل_الكاطع

اجانه الماي شيلن يابوارينه
اجانه الماي ما يحمينه بيت الطين
ذبينه بعيد ابعيد
ذبينه اعله گاع بلا سمه ولا ريح
بويه نخاف
دنيتنه صريفه امن النسيم اطيح-----الراحل الكبير #كاظم_اسماعيل_الكاطع 💔

سمير صبيح
تگلي-أكتب ع الغزل عن البنات..

#صفحتان_من_الملف...*

للدكتور حسين سرمگ

-1- تحت المشاهده :
مدري شجاني السنه والعام
مانام طول الليل .. مانام
ثاري السهر مدرسة العيون
وكثرن غياباتچ يالاحلام
مثل الجرح دافي بالفراش
گلبي نهر والسيف بلاّم
تحسدني ليش وتشتكي الناس
امي وابوي اوياي بالبيت
لچن عايش عيشة ايتام
گبل القوافي يسهرن اوياي
چنّهن جواري ... وانه خيّام

مو مثل الاول طبع الاصحاب
تحت الصفر غيرة هالايام
اطلع واجي تراقبني العيون
جاري يتثاوب .. والوكت ليل
نعسان جاري اشعنده مانام
شباچ يندگ .. تركض الناس
اليگطع طريق ...
اليسحب اقسام ..
ما مأذي احد .. ايها الناس
اني بسيط وفد بشر خام
لكن اسد شبّاجي بالليل
وبروحي واحد يكسر .. الجام

-2- كفيل خسّار
اسمع غنه من صوت مبحوح
مديت اديه بحفرة الروح
طلّعت منها گمر تعبان
بصدره حديقه امطلعه اسهام
جبت الگمر وياي للبيت
مطلوب راسه .. بتهمة اعدام
شاف الارض ما توسعه ومات
موتة غريب ابذيچ الايام
الله يرحمه .. وبلّغت بيه
إو ورقة وفاته انترست اختام
جرارتي انترست علامات
وابفايلي ميّة استفهام ؟؟؟؟؟
يوميه جاري يجيب تبليغ
وعالنسختين ابُصم بالابهام
اني .. الكفيل ومني رادوه !!
ومنين اجيب البالگبر نام ؟
ومن خوفي رحت وجبته بالليل
بس .. اشجبتلي .. كومة اعظام ..!!


#كاظم_اسماعيل_الكاطع