#صفحتان_من_الملف...*

للدكتور حسين سرمگ

-1- تحت المشاهده :
مدري شجاني السنه والعام
مانام طول الليل .. مانام
ثاري السهر مدرسة العيون
وكثرن غياباتچ يالاحلام
مثل الجرح دافي بالفراش
گلبي نهر والسيف بلاّم
تحسدني ليش وتشتكي الناس
امي وابوي اوياي بالبيت
لچن عايش عيشة ايتام
گبل القوافي يسهرن اوياي
چنّهن جواري ... وانه خيّام

مو مثل الاول طبع الاصحاب
تحت الصفر غيرة هالايام
اطلع واجي تراقبني العيون
جاري يتثاوب .. والوكت ليل
نعسان جاري اشعنده مانام
شباچ يندگ .. تركض الناس
اليگطع طريق ...
اليسحب اقسام ..
ما مأذي احد .. ايها الناس
اني بسيط وفد بشر خام
لكن اسد شبّاجي بالليل
وبروحي واحد يكسر .. الجام

-2- كفيل خسّار
اسمع غنه من صوت مبحوح
مديت اديه بحفرة الروح
طلّعت منها گمر تعبان
بصدره حديقه امطلعه اسهام
جبت الگمر وياي للبيت
مطلوب راسه .. بتهمة اعدام
شاف الارض ما توسعه ومات
موتة غريب ابذيچ الايام
الله يرحمه .. وبلّغت بيه
إو ورقة وفاته انترست اختام
جرارتي انترست علامات
وابفايلي ميّة استفهام ؟؟؟؟؟
يوميه جاري يجيب تبليغ
وعالنسختين ابُصم بالابهام
اني .. الكفيل ومني رادوه !!
ومنين اجيب البالگبر نام ؟
ومن خوفي رحت وجبته بالليل
بس .. اشجبتلي .. كومة اعظام ..!!


#كاظم_اسماعيل_الكاطع