​#Adliya_hamkorlik

O‘zbekiston va Turkiya adliya vazirliklari o‘rtasida sud ekspertizasi sohasida hamkorlik memorandumi imzolandi

Turkiya Respublikasi Prezidenti Rejep Tayyip Erdo‘g‘anning mamlakatimizga rasmiy tashrifi doirasida joriy yilning 29-mart kuni O‘zbekiston Respublikasi Adliya vazirligi bilan Turkiya Respublikasi Adliya vazirligi o‘rtasida sud ekspertizasi sohasida hamkorlik memorandumi imzolandi.

Mazkur memorandumning maqsadi sud ekspertizasi sohasida ikki tomonlama hamkorlikni mustahkamlashga intilgan holda ushbu sohada zamonaviy usullar va vositalarni qo‘llash orqali jinoyatchilikka qarshi kurashish samaradorligini oshirishdan iborat.

Memorandum doirasida sud ekspertizasi sohasida institusional, huquqiy va metodologik muammolar bo‘yicha tadqiqotlar va izlanishlar olib borish, o‘quv kurslari, konferensiyalar va boshqa tadbirlarni tashkil etish ko‘zlanmoqda.

Hujjat sud ekspertizasi sohasida zamonaviy ilmiy usullar va vositalarni qo‘llagan holda ekspertizaning yangi turlarini amaliyotga tatbiq etish uchun xizmat qiladi.

Adliya vazirligi
Jamoatchilik bilan aloqalar bo‘limi

Foto: daryo.uz

@adliyangiliklari