Avval xabar berganimizdek, hududlarda davlat hisobidan yuridik yordam koʻrsatish tizimi oʻrganilmoqda.

Adliya vaziri topshirigʻiga asosan, Adliya vazirligi ishchi guruhi tomonidan hududlarda davlat hisobidan yuridik yordam koʻrsatish tizimini yoʻlga qoʻyish boʻyicha seminar-treninglar tashkil etilmoqda.

Shuningdek, ishchi guruh tomonidan notarial arxivlarda arxiv ishini tashkil etilganligi holati hamda tuman (shahar)lardagi ayrim notariuslar faoliyati yuzasidan monitoring oʻtkazilmoqda.

Respublikamiz hududlari boʻylab ishchi guruh tomonidan “Yuridik yordam” axborot tizimini yoʻlga qoʻyish holati, bu borada adliya boʻlimlarining huquqni muhofaza qiluvchi organlar bilan hamkorlikdagi faoliyati oʻrganilmoqda.

Xususan, Buxoro, Qashqadaryo va Samarqand viloyatlari adliya boshqarmalarida surishtiruv va tergov organlari xodimlari, sudyalar va advokatlar, shuningdek tuman adliya boʻlimlari masʼullari ishtirokida jismoniy shaxslarni himoya huquqini taʼminlashda “Yuridik yordam” axborot tizimi orqali davlat hisobidan advokatni jalb etish tartibi boʻyicha amaliy seminarlar tashkil etildi.

Bu kabi tadbirlar boshqa hududlarda ham davom etadi.

📌 Kanalga ulanish