#Adliya_xabari

Respublika ishchi guruhi Buxoro viloyatida tadbirkorlar bilan uchrashdi hamda mahallada sayyor qabul oʻtkazdi

Prezident Administratsiyasi va Adliya vazirligi masʼullaridan iborat respublika ishchi guruhi Buxoro viloyatida dastlab Savdo-sanoat palatasi viloyat hududiy boshqarmasi, soliq, qurilish boshqarmasi, kadastr palatasi agentligi va boshqa tegishli idoralar masʼullari ishtirokida davlat xizmatlaridan foydalanishda mavjud tizimli muammolarni aniqlash boʻyicha viloyatdagi tadbirkorlik subyektlari bilan uchrashuv oʻtkazdi.

Muloqotda 100 nafarga yaqin tadbirkorlik subyektlari ishtirok etdi. Tadbirda davlat xizmatlarini koʻrsatilishidagi tizimli muammolarga oid fikr-mulohazalar, ularni bartaraf etishga oid takliflar tinglandi. Shuningdek, tadbirkorlik faoliyatga oid murojaatlari eshitilib, qonunchilik yuzasidan zarur huquqiy tushuntirishlar berildi. Oʻrganish talab qiladigan ayrim murojaatlar koʻrib chiqish uchun nazoratga olindi.

Ishchi guruh kunning ikkinchi yarmida Buxoro viloyatida “Huquqiy mahalla” loyihasi doirasida amalga oshirgan ishlarni oʻrgandi. Xususan, Jondor tumani “Ushot” mahallasida loyiha doirasida amalga oshirilgan ishlar taqdimoti bilan tanishdi. Mahallada mavjud 712 ta xonadon xatlovdan oʻtkazilib, 4 523 ta huquqiy muammolar mavjudligi aniqlandi. Ulardan 4 140 tasi yoki 91,5 foizi hal etilgan.

Jumladan, 348 nafar shaxsga mulk soligʻi boʻyicha imtiyozlar qoʻllanildi; 30 nafardan ortiq fuqaro oʻzini oʻzi band qilinishi taʼminlandi; mahalla binosida “Adliya kutubxonasi” tashkil etildi; uyma-uy yurilgan holda aholiga 250 ta sayyor tartibda davlat xizmatlari koʻrsatildi; “mahalla yettiligi” aʼzolariga yagona huquqni qoʻllash amaliyotini yoʻlga qoʻyish borasida metodik yordam koʻrsatildi; “Huquqiy targʻibot kuni” va “Adliya sayli” tadbirlari oʻtkazildi.

Shuningdek, adliya vaziri oʻrinbosari Sh.Rabiyev “mahalla yettiligi” bilan uchrashib, jinoyatchilik va huquqbuzarliklarni oldini olish, aholi bandligini taʼminlash, ijtimoiy himoyaga muhtoj aholini qoʻllab-quvvatlash orqali ularga huquqiy yordam koʻrsatish boʻyicha tavsiyalar berdi hamda ularning faoliyatida yuzaga kelayotgan muammolar va ularni bartaraf etish yuzasidan takliflari bilan oʻrtoqlashdi.

Ishchi guruhi tomonidan “Ushot” mahallasida sayyor qabul oʻtkazildi.

📌 Kanalga ulanish

#Adliya_xabari

Alisher Karimov: Davlat dasturi qonunchilikni modernizatsiya qilishga, aholi uchun qulay sharoitlar yaratishga va barqaror rivojlanishni ta’minlashga qaratilgan

Bugun Toshkentda “Oʻzbekiston – 2030” strategiyasini “Atrof-muhitni asrash va «yashil iqtisodiyot»” yilida amalga oshirish boʻyicha Davlat dasturi va uni tasdiqlash toʻgʻrisidagi Prezident Farmoni loyihasining xalqaro hamjamiyat bilan jamoatchilik muhokamasi boʻlib oʻtdi. Tadbirda adliya vaziri oʻrinbosari Alisher Karimov 2025-yilda Adliya vazirligi tomonidan amalga oshiriladigan ishlar yuzasidan maʼlumot berdi.

👉Batafsil

📌 Kanalga ulanish

#Adliya_xabari

“Oʻzbekistonda qonun ustuvorligi va inson huquqlarini himoya qilishni mustahkamlash” loyihasi doirasida loyiha kengashining yigʻilishi boʻlib oʻtdi

Adliya vazirligida “Oʻzbekistonda qonun ustuvorligi va inson huquqlarini himoya qilishni mustahkamlash” loyihasi doirasida BMT Taraqqiyot Dasturining Oʻzbekistondagi doimiy vakili, Oliy Majlisning Inson huquqlari boʻyicha vakili (ombudsman) va Finlyandiyaning Markaziy Osiyodagi elchisi ishtirokida loyiha kengashining yigʻilishi boʻlib oʻtdi.

Yigʻilish loyihaning 2024-yildagi asosiy natijalari toʻgʻrisidagi hisobotni muhokama qilish, loyiha tomonidan tashkillashtirilgan Ayollar va qizlarga nisbatan zoʻravonlikka barham berish boʻyicha posterlar, fotosuratlar va qisqa video lavhalar tanlovining natijalarini eʼlon qilish hamda taqdirlash marosimini oʻtkazish, shuningdek, 2025-yil uchun ish rejani muhokama qilish va tasdiqlash maqsadida oʻtkazildi.

Tadbirni adliya vazirining oʻrinbosari, loyihaning milliy koordinatori Muzraf Ikramov ochib berib, 2024-yil davomida «Oʻzbekistonda qonun ustuvorligi va inson huquqlarini himoya qilishni mustahkamlash loyihasi doirasida koʻplab ishlar amalga oshirilganligi va ushbu ishlar bepul yuridik yordam koʻrsatish tizimining samarali yoʻlga qoʻyilishida, ushbu sohasida faoliyat olib boradigan NNTlar faoliyatiga koʻmaklashish orqali aholiga bepul yuridik yordam koʻrsatish mexanizmini ishlab chiqishda muhim ahamiyatga ega ekanligi haqida gapirdi.

Tadbirda BMT TD Oʻzbekistondagi doimiy vakili Akiko Fudzii, Oliy Majlisning Inson huquqlari boʻyicha vakili (ombudsman) Feruza Eshmatova, Finlyandiyaning Markaziy Osiyodagi elchisi Ilkka Rayzanen kirish soʻzlari bilan ishtirok etib, BMT TD va Finlyandiya Tashqi ishlar vazirligi hamkorligida amalga oshirilayotgan ishlar Oʻzbekistonda qonun ustuvorligi va inson huquqlarini himoya qilishni mustahkamlashda ijobiy natija berayotganligi va kelgusida ushbu hamkorlikni davom ettirishdan mamnun ekanliklarini bildirdilar.

Tadbirda loyiha rahbari Azamat Salayev soʻzga chiqib, loyiha doirasida 2024-yilda amalga oshirilgan ishlar haqida maʼlumot berdi. Loyihaning 2025-yilga moʻljallangan ish rejasi tasdiqlandi. Shuningdek, tanlov natijalari eʼlon qilinib, taqdirlash marosimi oʻtkazildi.

📌 Kanalga ulanish