1. Qayd etish kerakki, yangi tahrirdagi “Mas’uliyati cheklangan jamiyatlar to‘g‘risida”gi Qonun mamlakatimizda tadbirkorlik subyektlarini har tomonlama qo‘llab-quvvatlash, shu jumladan qonunchilikka bozor tamoyillariga asoslangan zamonaviy korporativ munosabatlarga oid qoidalarni joriy qilishga qaratilgan.

🔹Shuningdek, Qonunda mas’uliyati cheklangan jamiyatlarning filiali va vakolatxonalarini, sho‘ba va qaram xo‘jaliklarini ochish, kuzatuv kengashining vakolatlari hamda a’zolarini saylash, jamiyat umumiy yig‘ilishi va kuzatuv kengashining qarorlarini sirtdan ovoz berish yo‘li bilan qabul qilish tartib-taomillari, jamiyat boshqaruv organlari rahbarlarining fidutsiar majburiyatlarini, shuningdek, minoritar va majoritar ishtirokchilarining tushunchasini va ularning jamiyat faoliyatidagi ishtiroki hamda jamiyat ishtirokchilarining huquqiy kafolatlariga oid boshqa bir qator qoidalar nazarda tutilmoqda.

🔹Mazkur Qonun qabul qilinishi jamiyat ishtirokchilari huquqlari va qonuniy manfaatlarining kafolatlarini yanada mustahkamlashga, qonunchilikka zamonaviy korporativ munosabatlarni joriy qilishga hamda mamlakatimizning investitsiyaviy muhitini yanada yaxshilashga xizmat qiladi.

2. “O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida”gi Qonun bilan yer, ta’lim, soliq, raqobat, tadbirkorlik va boshqa sohalarni tartibga soluvchi 12 ta qonun hujjatlaridagi nomuvofiqliklar bartaraf etilishi ko‘zda tutilgan.

🔹Xususan, Qonun bilan “O‘rmon to‘g‘risida”gi, “Bola huquqlarining kafolatlari to‘g‘risida”gi, “Qimmatli qog‘ozlar bozori to‘g‘risida”gi, “Dafn etish va dafn ishi to‘g‘risida”gi, “Maktabgacha ta’lim va tarbiya to‘g‘risida”gi, “Aholi bandligi to‘g‘risida”gi, “Davlat boji to‘g‘risida”gi, “Raqobat to‘g‘risida”gi Qonunlar hamda Iqtisodiy protsessual, Ma’muriy sud ishlarini yuritish to‘g‘risidagi, Soliq va Shaharsozlik kodekslariga tegishli o‘zgartirish va qo‘shimchalar kiritilmoqda.

🔹Masalan, “Dafn etish va dafn ishi to‘g‘risida”gi Qonunga mehnat migratsiyasida bo‘lgan davrda vafot etgan O‘zbekiston Respublikasi fuqarolarining jasadlarini olib kelishni tashkil etish xarajatlari Migratsiya jamg‘armasi mablag‘lari hisobidan moliyalashtirilishini nazarda tutuvchi qo‘shimchalar kiritilmoqda.

🔹Ta’kidlash lozimki, mazkur Qonunning qabul qilinishi qonunchilik hujjatlaridagi bo‘shliqlar va nomuvofiqliklar bartaraf etilishiga, huquqni qo‘llash amaliyoti to‘g‘ri yo‘lga qo‘yilishiga hamda jismoniy va yuridik shaxslarning manfaatlari ishonchli tarzda himoyasi ta’minlanishiga xizmat qiladi.