#Adliya_xabari

Adliya vaziri o‘rinbosari Samarqand shahar, Toyloq va Bulung‘ur tumanlarida bo‘ldi

Adliya vaziri o‘rinbosari X.Meliyev Samarqand viloyatiga xizmat safari davomida Samarqand shahar 5-son FHDY bo‘limi, Toyloq tuman adliya bo‘limida bo‘ldi. Xususan, adliya organlari ish faoliyati, jismoniy va yuridik shaxslarga davlat xizmatlari ko‘rsatish jarayoni, sifatini ko‘zdan kechirdi. Mavjud imkoniyatlar hamda muammolarga e'tibor qaratdi.

Jumladan, tizim mas'ul xodimlari bilan fuqarolarning huquqiy muammolari bilan ishlash, qonun hujjatlari, “Ma'muriy islohotlar doirasida adliya organlari va muassasalarining mas'uliyatini yanada oshirish hamda ixcham boshqaruv tizimini shakllantirish to‘g‘risida”gi Prezident Farmonining joylardagi ijrosi, ushbu muhim hujjat doirasida fuqarolarga huquqiy ko‘mak ko‘rsatish sohasida amalga oshirilayotgan ishlar ko‘lami bilan tanishdi.

Toyloq tuman “Baxshitepa” mahalla binosida tashkil etilgan “Adliya kuni” loyihasi doirasidagi sayyor qabulga ulanib ketdi. Qabulda 48 nafar hudud aholisi 20 ga yaqin huquqiy muammolari bilan qatnashib, vazir o‘rinbosariga murojaat qildi. 7 ta murojaat qanoatlantirilib, 3 tasiga huquqiy tushuntirish berildi, 9 tasi o‘rganib chiqish uchun nazoratga olindi.

Adliya vaziri o‘rinbosari X.Meliyev  Samarqand viloyatiga xizmat safarini tadbirkorlar bilan uchrashib, ularning huquqiy muammolarini o‘rganishga qaratdi. Xususan, Toyloq tumanidagi “PureMilky” korxonasida bo‘ldi.

2013-yilda tashkil topgan tabiiy sut va yog‘-moy mahsulotlarini ishlab chiqarishga ixtisoslashgan korxona rahbari Mehroj Akramov adliya vaziri o‘rinbosariga korxona faoliyatini tanishtirar ekan, soliq to‘lovlari, ish faoliyatida duch kelayotgan imtiyozlar bilan bog‘liq masalalar va ularning huquqiy yechimlari haqida ochiq muloqotda bo‘ldi.

@adliyangiliklari

#Adliya_va_yoshlar

Yoshlarning huquqiy savodxonligini oshirish boʻyicha seminar tashkil etildi

“Yosh yuristlar” jamoat birlashmasi tomonidan Adliya vazirligi bilan hamkorlikda “Yoshlar” oromgohida “tengdosh — tengdoshga” tamoyili asosida yoshlar oʻrtasida huquqbuzarliklarga nisbatan murosasizlik munosabatini shakllantirish, ularda qonunlarga hurmat, mamlakat taqdiriga daxldorlik hamda vatanparvarlik hissini kuchaytirish, yoshlarning huquqiy savodxonligini oshirish maqsadida respublikaning barcha hududlaridan saralab olingan 40 nafardan ortiq yoshlar uchun seminar tashkil etildi.

Seminar davomida interaktiv usullardan foydalangan holda yoshlarning huquqiy bilim va koʻnikmalari oshirildi, huquqiy “Zakovat” oʻyini tashkil etildi, “Street Law”, huquqshunoslik kasbining ahamiyati, huquqshunoslar uchun zarur boʻlgan koʻnikmalar yuzasidan TDYU professor oʻqituvchilari tomonidan mahorat darslari oʻtkazildi.

Shuningdek, yoshlar oʻrtasida kichik guruhlarda interfaol usulda jamiyatda yuzaga kelayotgan turli huquqiy muammolarni bartaraf etish boʻyicha amaliy mashgʻulotlar oʻtkazildi.

Eslatib oʻtamiz, Adliya vazirligi tomonidan nodavlat notijorat tashkilotlarini ijtimoiy sheriklik asosida qoʻllab-quvvatlash maqsadida “Yoshlar oʻrtasida huquqbuzarliklarga nisbatan murosasizlik munosabatini shakllantirish” mavzusida nodavlat notijorat tashkilotlari oʻrtasida davlat ijtimoiy buyurtmasini berish yuzasidan eʼlon qilingan tanlovda “Yosh yuristlar” jamoat birlashmasining “Oson huquq Camp” loyihasi gʻolib deb topilgan edi.

@adliyangiliklari

#Adliya_xabari

Adliya vaziri oʻrinbosari Butunjahon Intellektual mulk tashkilotining vakili bilan uchrashdi

Adliya vaziri oʻrinbosari Muzraf Ikramov 2-oktabr kuni Butunjahon intellektual mulk tashkilotining (BIMT) Mualliflik huquqi va ijodiy industriyasi boʻyicha bosh direktori oʻrinbosari Silvie Forbin bilan uchrashdi.

Tomonlar kelgusida hamkorlik aloqalarini yangi bosqichga olib chiqish maqsadida istiqbolli yoʻnalishlar, intellektual mulk obyektlarini himoya qilishda platformalar bilan ishlash, jumladan musiqa sohasidagi ijodkorlarga mualliflik huquqini sodda tilda tushuntirishni hamda oʻz huquqlaridan foydalangan holda daromad olishni nazarda tutuvchi bepul “CLIP” platformasining oʻzbek tiliga tarjima qilish masalalarini muhokama qildi.

S.Forbin arxiv va madaniy meros hujjatlarini raqamlashtirish, ularning huquqiy asoslarini yaratish boʻyicha ishlab chiqilayotgan qoʻllanmaning Oʻzbekistonda ham qoʻllanilishi yuzasidan oʻz takliflarini bildirdi va Oʻzbekistonning ushbu yoʻnalishdagi faol harakatlari natijasi oʻlaroq, ayni vaqtda intellektual mulk sohasidagi yangi platformalarni Oʻzbekistonda ham joriy etilishi boʻyicha hamkorlikni rivojlantirishga tayyorligini bildirdi.

M.Ikramov intellektual mulk sohasi bilan bogʻliq islohotlar oʻz natijasini koʻrsatayotganligini, jumladan soʻnggi yillar davomida fuqarolarning mazkur sohaga boʻlgan qiziqishi va huquqiy ongi sezilarli darajada ortganligi, bu esa, oʻz navbatida, xorijiy ilgʻor tajribalarni qoʻllash va kadrlar salohiyatini oshirish intellektual mulk sohasi uchun yanada manfaatli ekanligini amalda isbotlayotganligini taʼkidladi.

@adliyangiliklari