#Adliya_xabari

Adliya vaziri aholiga va davlat organlariga koʻrsatilayotgan xizmatlar sifatini yanada oshirish borasida qilingan ishlarni oʻrgandi

Surxondaryo viloyatiga amalga oshirgan xizmat safari doirasida adliya vaziri Akbar Toshqulov tizim xodimlari faoliyati bilan tanishib, fuqarolar davlat xizmatlaridan yanada qulay, oson va tez foydalanishlari uchun sharoit va imkoniyatlar yaratish, davlat organlari va tashkilotlariga koʻrsatilayotgan yuridik xizmatlar sifatini yanada oshirish borasida qilingan ishlarni oʻrgandi.

Xususan, Qiziriq tumanida vazir adliya boʻlimi va yuridik xizmat koʻrsatish markazi faoliyatidagi yutuq va kamchiliklarni oʻrganib, xodimlar bilan muloqot qildi. Yuridik xizmat koʻrsatilayotgan tashkilotlar bilan hamkorlik masalalari muhokama etildi.

Taʼkidlangandek, adliya organlarining asosiy vazifalari qatorida qonunchilikni takomillashtirish boʻyicha takliflar ishlab chiqish, aholining huquqiy madaniyati va ongini oshirishdir, bu borada mahallalardagi “yettilik” bilan bevosita hamkorlikni yoʻlga qoʻyish muhim rol oʻynaydi.

Bandixon tuman adliya boʻlimida Akbar Toshqulov fuqarolar uchun yaratilgan shart-sharoitlar, shu jumladan davlat xizmatlaridan foydalanish uchun mavjud imkoniyatlar, xizmatlar sifati, FHDY idoralarida aholiga xizmat koʻrsatish jarayonlarini oʻrgandi. Uchrashuvlar davomida mavjud elektron tizimlardagi funksiyalarni takomillashtirish boʻyicha takliflar muhokama qilindi.

Shuningdek, adliya vaziri “Termiz xalqaro savdo markazi”da tadbirkorlar bilan erkin muloqot olib bordi. Uchrashuv davomida tadbirkorlarning sohani yanada kengaytirish hamda yangi loyihalarni amalga oshirish boʻyicha taklif va rejalari oʻrganildi. Tadbirkorlik faoliyatini yanada takomillashtirish borasida amalga oshirilayotgan islohotlar borasida fikr-mulohazalar bildirilib, zarur tavsiyalar berildi.

@adliyangiliklari

#Adliya_xabari

Adliya vaziri oʻrinbosari Sherzod Rabiyev Navoiy viloyatida aholi murojaatlari, fuqarolarga huquqiy xizmat koʻrsatish sifati va Prezident farmoni ijrosini oʻrganmoqda.

Xususan, vaziri oʻrinbosari Navoiy shahar adliya boʻlimi va faoliyati, davlat xizmatlarini olishda fuqarolarga yaratilgan qulayliklar, viloyat FHDY arxividagi ish jarayoni bilan tanishdi.

Navbatdagi manzil Qiziltepa tumanida boʻldi. Bu yerda tadbirkorlar bilan sayyor qabul tashkil etildi. Bugungi kunda tumanda 3 620 ta tadbirkorlik subyektlari, 5 ming nafarga yaqin yakka tartibdagi tadbirkorlar, 7 mingdan ortiq dehqon xoʻjaliklari faoliyat yuritmoqda.

Qabul davomida yer-joyni ijaraga olish, soliq maʼmurchiligi, kadastr hujjatlaridagi xatoliklar, mahalliy ishlab chiqaruvchilar tomonidan ichki bozorga taklif qilinayotgan mahsulotlarga qoʻshimcha qiymat soligʻini qayta koʻrib chiqish singari muammolar eʼtibor markazida boʻldi. Adliya ish yurituviga 20 taga yaqin murojaatlar qabul qilindi.

Shuningdek, adliya vaziri oʻrinbosari Qiziltepa tumanidagi “Bunyodkor” mahallasi “yettiligi” bilan uchrashib, “Maʼmuriy islohotlar doirasida adliya organlari va muassasalarining masʼuliyatini yanada oshirish hamda ixcham boshqaruv tizimini shakllantirish toʻgʻrisida”gi Prezident Farmoni ijrosi qay darajada tashkil etilganligi bilan tanishdi.

Mahallada 2 405 nafar aholi istiqomat qilmoqda, ulardan 42 nafari ijtimoiy reyestrga kiritilgan. “Mahalla yettiligi” bilan ishlashda mazkur toifadagi hamda “Ayollar daftari”, “Yoshlar daftariga” kiritilganlarning masalalariga alohida urgʻu berilmoqda. Murojaatlar turkumlanib, huquqiy masalalarni ijobiy hal etishda koʻmaklashilmoqda.

Suhbat davomida adliya organlari va mahalla hamkorligini yanada samarali yoʻlga qoʻyish, elektron platformalardan foydalanish mexanizmi batafsil tushuntirib berildi.

@adliyangiliklari