‏يا ناشدٍ عن حالي .. اول وهالحين
‏الحال طيب .. كان تنشد عن الحال
‏اخبرك عن دنيا الشقا .. بالبراهين
‏تجاربٍ .. تغني عن .. القيل والقال
‏فيها درست ايام ، وشهور ، وسنين
‏حتى .. تعلمت التجـارب ، والأمثال
‏شفت الفقير ، يخلص الدين بالدين
‏بين التعب والهم .. مع ضيقة البال
‏وشفت السعيد اللي رصيده ملايين
‏وشلون يصبح .. لاسعادة ولا مال
‏حتى المرض والجوع والظلم البين
‏قـدام عيني .. مرت ايام .. وليال
‏ماشفت شيٍ ، يوجع القلب والعين
‏اكثر .. من الدمعة على خـد رجال
‏الا .. خراب البيت .. بفراق الاثنين
‏والبؤس والحرمان بعيون الاطفال
‏⁧ #عبدالله_الطلحي⁩

‌‎#صباح_الخير
حنيت للماضي ، عليه اظما واجوع
والقلب له مدة .. لا مات .. ولا نجا
ماطبت لين إني يئست من الرجوع
والياس بعض احيان خير من الرجا
#بيت_القصيد
‎#عبدالله_الطلحي

لاتغبط الظالم ليا شفته .. معمر له قصور
دعوة من المظلوم في جنح الظلام تهدها
لوطالت الأعمار ، مابعد القصور الا القبور
كم واحـدٍ عنده مظـالم .. مات قبل يردها
‎#عبدالله_الطلحي

‏اللي في الايام والأحداث ، يتأمل
تكفيه نظرة .. عن اللي للخبر ناقل
والعاقل ، اللي تأمل .. قبل ماكمٌل
الوقت خــداع .. والأخـبار تتناقل
كم من شجيعٍ من اول كان يتجمل
مايوم شفته عن الوقفات ، متثاقل
اليوم ، يصبر على الزلة .. ويتحمل
ويمشٌي علوم ، ماتمشي على عاقل

‎#عبدالله_الطلحي

لا تقارن حالك الا مع مصلي صايم
المظــاهر لاتغرك .. لو تطـول المدة
ماعلى الدنيا نعيم ، ولاعذابٍ دايم
كل حيٍ له نصيب من الرخا والشدة
#بيت_القصيد
‎#عبدالله_الطلحي

واحالي اللي ، مثل غصنٍ بمشراف
‏في موقعٍ من ضاق صدره يروده
‏ومعرضه صفق الهبايب .. للإتلاف
‏لاعاشت اوراقه .. ولامات عوده
‏حت الورق وتكسرت منه الاطراف
‏زوله على المشراف يثبت وجوده
‏اللي يشوفه قال .. ماحوله خـلاف
‏واللي بدا مبـداه .. باحت سدوده
#بيت_القصيد
‏⁧ #عبدالله_الطلحي⁩

لايغرك يوم تخطي .. ولا تلقى عتاب
‏من توقف عن عتابك توقف عن غلاك
#شطر
‏⁧ #عبدالله_الطلحي⁩

‏كل المعارك ، بين نصر وهزيمة
‏الا ، ليامن جات .. بين القرايب
‏تشبه لنارٍ .. ولعت في هشيمة
‏بين البيوت .. وحولتها خرايب
‏الكل منهم .. متهم .. بالجريمة
‏والعاقل اللي يطفي النار غايب
‏⁧ #عبدالله_الطلحي⁩

وكّل اللي يجمع الناس في يوم الحساب
لاتحـاول تقنع الناس .. صعـب اقناعها
عالج جروحك بروحك بصبرٍ واحتساب
كل من يلمس جروحك ، يزيد اوجاعها
#بيت_القصيد
‎#عبدالله_الطلحي

ياصاحبي لايعجبك زخرف القول
‏حتى لو إنه فيه .. فكره جـديدة
‏إن كان ماهو من هل العلم مقبول
‏وموافق الفطـرة وحسن العقيدة
‏الشاعر اللي .. يبدع القاف ويقول
‏اهـم شي .. يقول جملة .. مفيدة
‏وإلا ، يدور له من الشعر .. منقول
‏ماهوب شـرط إنه يسوي قصيدة
‏⁧ #عبدالله_الطلحي⁩

‌‎#صلاة_الفجر ‎#الصلاة_خيرٌ_من_النوم
قرب طلوع الفجر واقفنّ النجوم
ادرك صلاة الفجر .. يامال الغناة
اللي ليا نادى المنادي .. مايقوم
كنه يقول النوم خير من الصلاة
#شطر
‎#عبدالله_الطلحي

‌‎#الجمعة
العبد من نفسه على نفسه شهود
والنفس مرهونة بحسب اعمالها
ان كان لك نية على نفسك تجود
صل الصلاة اللي .. بعشر امثالها
صلاة .. مافيها ركوع ولاسجود
سهلة .. ولاهو شرط تتوضا لها
ﷺ
‎#عبدالله_الطلحي

لاصرت في موقع مميز وحساس
قابل عباد الله .. بطيب ورحـابة
سدد وقارب ثم يسر على الناس
يمكن بعضهم ، دعوته مستجابة
‎#عبدالله_الطلحي

قلنا .. يطيح المطر .. وتحن
‏وتقول طاح الحطب وارتاح
‏واثر الجفا ، طبع ، مدري فن
‏طاح المطر والحطب ماطاح
‏⁧ #عبدالله_الطلحي⁩

عرفت المنازل لو لحق بعضها تغيير
وظليت لين الشمس غابت ، مقابلها
على ذكرياتٍ ، كنها شاشة التصوير
اشاهـد بها .. قصة حياتي من اولها
#عدستي
‎#عبدالله_الطلحي

في هذا العيد وكل عيد:
عاد عيدك .. وعيد اللي توده
وانت وياه في خير وسعادة
واجتمعتم على طيب وموده
بين عذب اللقا ، واجر العبادة
#شطر
‎#عبدالله_الطلحي

اذا عرفت اللي يناسبك سوه
لاتستشير الا .. بشيٍ محيّرك
الناس كلٍ له مزاجه ، وجوه
هذا يحول بك ، وهذا يطيٌرك
#عدستي #شطر
‎#عبدالله_الطلحي

‏لا تنتظر .. فزعات ابو وجهٍ .. وجاه
‏محـدٍ .. وكيل آدم .. على ذريته
‏قوم استعن بالله .. وخلك في رجاه
‏من فاته الغالي .. خسـارة جيته
‏من يطلب الغالي .. تعنى له .. وجاه
‏لو دونه .. اخطـار الزمان ، مبيته
‏الضلع .. نادر من يعدي .. في حجاه
‏واكثـر .. قبـور الميتين .. بفـيته
‏الخوف مايحسب من اسباب النجاة
‏ماتنفـع الخـــايف .. مجـرد نيته
‏حتى السمك يسبح ، بعكس الإتجاه
‏مايتبـع التيـــار ....... غيـر الميتة
#شطر
‏⁧ #عبدالله_الطلحي⁩

‏َيالبيب العقل .. خذ مني زيادة
فوق ماعندك من اخلاق ومبادي
في شريعتنا .. دروسٍ مستفادة
واضحة قبل السواير والقوادي
عندنا حسن الجوار ، من العبادة
لاتقول الحق لي والوضع عادي
صون حق الجار لو طول عناده
التغاضي عنه ، خير من التمادي
شوفني قبلك جعلت الصبر عادة
وان نفد صبري تذكرت المهادي
#شطر #إكسبلور
‎#عبدالله_الطلحي

‏⁧ #صيام_عاشوراء⁩
‏مهما تكون الذنوب الله لطيف
‏تذنب ويمحي ذنوبك بحسنة
‏من رحمة الله بالعبد الضعيف
‏لاصام له يوم .. يغفر له سـنة
#شطر
‏⁧ #عبدالله_الطلحي⁩