.....البارت لاخيرررررررر......

.....أحبج احبج
ابتسمت وكتله
....واني هم احبك
ضحك من كل كلبه
....تعرفين شكد احبج
....لا
ابتسم وكلي
...احبج بجنون واتخبل واموت
ويوكف النفس بصدري من احس ولو للحظه انج مو مالتي
او ممكن يصير شي وتتبتعدين عني واني ماصدكت
كمشت كلبج وخليته بنص كلبي اني احبج بمشاعري الغريبه بتصرفاتي العجيبه
.................
جنت اسمع كلام كميل وعيوني تلمع بحب وفرح
ومن شدت الكلام حتى بعد مداكدر احجي او اكله شي
....اني اختصرت بيج الحياه
....ياالله راح اتخربط
.....هههههه ههههه صدك مومال رومانسيه انتي
.....احبك والله
....احبج حتى من تغيبين عني اتعلق بيج اكثر
مااعرف اذا هذا حب لو خبال
................
نفتحت الباب
...ماما
كتله
......ماما اني موكتلك دك الباب بعد عيب هيج
سكت وبقى يباوع عليه وعلى كميل
ضحك كميل وكله
...تعال
كعده على رجله
كله
....يوسف
....ها
....موكلنه نكول نعم منكول ها
...نعمً
....عفيه عليك اريدك تصير رجال لان بعد فترة راح يصير عندك اخ اريدك انت تصير الرجال بغيابي وتصير سبع
ودير بالك على ماما زين اريدك رجال من صدك
...اي
...زين واحنا موكلنا نتعلم على النظام ولازم ندك الباب يله ندخل
...اي
....زين ليش مادكيت البيت
...نسيت
ضحك كميل وكله
...بعد لتنسه واريدك تصير ذكي ومتخلي شي يفوتك زين
...اي
..... زين هسه شنو تريد
....اكل
باوعني كميل وكلي
...انطي اكل خطيه
...ميخالف
كمشت يد يوسف وكتله
....يله حبيبي يوسف امشي ننزل ناكل
نزت اني ويوسف وبقيت
كاعدة بالمطبخ اوكله
وبعدها صعدت لكميل شفته نايم
ماطلعت صوت عفته نايم
ونزلت جوه وبديت اشتغل
واجى فيصل وكلي
.......ام يوسف وين كميل
.......نايم
شفته وكف وعبالك حاير
.......شكو فيصل
.......هاي شيرين تريد تجي
........شنو تريد تجي
......مو خابرتني وكالتلي تعال اخذني لان ددك على كميل ميجاوبها
....لجيبها لو يريد كميل يحجي وياها جان جاوبها
......موهو البارحه كال جيبها
.....هو كال
......اي
بقيت ساكته كتله
....انتظر خلي كميل يكعد
راح فيصل ورجع
كلي
.....ام يوسف هاي ثبرتني
داحجي ويا فيصل ونزل كميل
كال شكو
فيصل كله
....شيرين تريد تجي خابرتني كالت تعال اخذني
....اي روح جيبها
باوعت على كميل بس ماحجيت شي انتظرت فيصل يروح
وفيصل هز راسه وراح
كتله لكميل
....شنو معناته راح تجيبها ها
.....اي شنو يعني
....شنو يعني انت شنو تلعب ويايه
...لاالعب وياج ولاعندي وقت لهاي الالعاب
....اي زين
تركته ودخلت للمطبخ وكمت الهي نفسي
واسوي اكل
وشويه وصعدت لغرفتي اول شي بقيت كاعدة واصفن على الحياطين
وبعدها سبحت وغيرت ملابسي
ولبست نفنوف نيلي طويل
وردانه ربع ومابي اي نقش بس
جان كلش حلو وخليت مكياج بسيط
ومن داطلع من الغرفه صعد كميل
باوعلي
وكلي
....شنو هاي
...شكوووو
....طالعه هوايه حلوة
.....عيونك الحلوة
وتركته ونزلت وصلت لنص الدرج
وجان يصيحني
....بان
......ها
.....شبيج
...مابيه شي بس تصرفاتك زادت عن حدها واني راح ابدي اكرهك اذا راح تبقى اسوي هيج ويايه
وعفته ونزلت وهو بقى واكف بمكانه
نزلت وبقيت كاعده
وشويه ودخل فيصل وبيده جنطه مال ملابس صغيرة
وتمشي ورا شيرين
باوعت عليه وضحكت بااستهزاء
وراحت لغرفتها
دخلت وجان ترجع تفتح الباب وصاحت
....هاي منو داخل لغرفتي ها
كتلها
.....شبيج انتي ها ليش دتصيحين
.....منو داخل لغرفتي ومفردش غراضي
.....اول شي احجي بااحترام ثاني شي منو بعازت غراضج حتى يدخل يلعب بيهن
....بعازتهن الي مشايفه واجتي من يم الغنم والزرع
لهذا القصر
بقيت ساكته وباوعت عليها بااحتقار
حسيت احد كمشني باوعت جان كميل
تقدم مني وكف كدام شيرين وحجى بصوت ناصي وبهدوء
وكاللها
...كملتي كلامج
.....كميل حبيبي شلونك
....سئلتج كملتي كلامج
....اي كملت
....اي خوش بس احب اذكرج بشي انو ابوج همين يشتغل عامل جان
وجان ينام جوه الدرج وامج تشتغل يم وحدة تنظفلها
البيت يعني خدامه
بقت ساكته ومكدرت بعد اجاوب وبعدها كالت
....بس
سكتها كميل وكال
.... بس ابوج باك ابو المحل الي يشتغل يمه وهيج صارت بي الاحوال
وصار هيج عندة فلوس ورغم هذا اني مداعيرج انو ابوج يشتغل وامج خدامه لان الشغل موعيب واني احترم الانسان الي يشتغل
لان احسه عنده كرامه وعزة نفس.
نفعلت وصارت عصبيه وكامت دكول
....بابا ميبوك بابا هو يشتغل
....صدك خاف بابا من العوائل الراقيه واني ماادري
....انت كلشي دسوي علمودها وحتى تحجي هيج لخاطرها
.....دخلي للغرفه
دخلت وسدت الباب وكلي
....من دبش تصيرين بظهري رجال هي هاي الي متعرف تحجي ماجاوبتيها
....مولان ماكدرت اجاوبها بس اجادل وحده انت جبتها وخليتها بوجهي
وانطيتها هذا الحجم اكبد راح تحجي هيج وراح تحجي الي اكثر مامستبعدةهذا الشي
....يعني صوجي
....اي كميل صوجك
خله يده على شعره وبعدها نزل يده
وخلاها على رقبته ونزل يده وحطها بجيب بنطرونه جانت حركاته ت

قلقني
ومشى شويه وهو يمشي.وكلي
....الله لايحرمني من خبالج
ومشى ودخل للصاله وبقى كاعد هناك وبعد اني هم
مارحت كعدت يمه بقيت احجي ويا ام ياسين
واجى فيصل دخل ومحمد وياه
من شفت محمد كمت وكفت وابتسمت
وكتله
....محمد
..هلوووو بان
....هلو محمد
.....شونج
...انتي بخير اسئل عليك وعن احوالك
....اني الحمدلله زين وكلشي تمام
....ان شاءالله دائما
....يدوم عزج ام يوسف الغاليه
ضحكتله
كلي
...وين كميل
....بالصاله
من مشيت داروح كدام محمد للصاله شفت
كميل واكف يباوع علينا
محمد كلي
....شوفي عيونه راح تطلع ههههه
....ههههههه
وصلنه يم كميل محمد كله لكميل
....شونك كميل
كميل مد يده لمحمد وصافحه
محمد استغرب واني هم
هاي الحركه معناته انت مثل الغريب
كله
...تفضل
دخل محمد وكميل كلي
...كملي الاكل وجهزووو
يعني ميريدني ادخل رجعت للمطبخ وشويه وخلينا الاكل على الميز
ورحت صحتهم حتى ياكلون
اجى محمد وكميل يمشي ورا
ومن وصل يم غرفه شيرين
دك الباب وهي فتحتها. وهو كالها تعاي تعشي
واجى وهي طلعت ورا كعد كميل وكعد محمد وكعدت المسلوعه
واني هم بس ام ياسين ماقبلت تكعد ويانه
واني جنت منتبه على كميل
جان طول الكعده وهو يباوع على كل الموجودين على الميز
مال اكل عبالك ديريد يقيمهم
خلصنه الاكل وكال كميل
.... الجاي نريده بالحديقه
كتله
...اي تدلل
ابتسم ابتسامه بارده
وشيرين كامت طلعت كلشي ماسوت وراحت كعدت يمهم
واني جنت اباوعهم من بعيد لحد ماسويت الجاي
وصبيته وطلعته
ورحت وديته وقدمت لكميل ولمحمد ومن وصلت لشيرين
ماقدمتلها خليت الصينيه كدامها
هي رفعت احواجبها
ومدت يدها واخذت الجاي
شربت منه وكالت
....ايع شكد مطيب شنو متعرفين تسوين جاي
كاللها كميل
....كومي سوي انتي اذا هيج معاجبج ولو هو طيب وعجبني
ومحمد هم كال
....اي والله طيب كلش وبان ماكوشي تسوي مطيب
سكتت وكعدت على الكرسي وبقى الجو الي داير مدايري
بي شرارات كل واحد ديفكر جان بشي مثلا محمد
ديفكر بكميل وشلون راح يحجي وياه
او يمكن ديفكر شلون راح يقنعه
وكميل ديفكر بمحمد ويريد نظراته تكشفه وتبين
شي
وديفكر بيه اذا اني بكلبي احد غيره
وديفكر بشرين وشنو الي يسوي وياها
وشيرين تباع بالوجوه على امل تلكي شي
يوضح الي ديدور دايرها واني افكر بيهم كلهم
هذا الي حسيته من وجوهم ومن كلامهم المبطن
سمعت كميل يكول
...شيرين
شيرين جانت صافنه من صاحها كميل جفلت وخلت يدها على كلبها
وبقت تباوع بوجه كاللها

......راح تاخذين جنطتج وترجعين من وين مااجتي
والي سويته والي راح اسوي وياج درس صغير حتى تتعلمين لتلعبين ويا الي اكبر من عندج
كالتله
...اني مالعبت وياك
...لدكعدين كدامي وتكذبين اني اعرف شنو الي سويتي
وليش سويتي كل هاي السوالف من البدايه
بس حتى لااخجلج كدامهم وتفقدين احترامج فد مره
راح اسكت ومراح احجي ً
بس حسج عينج اسوين ويايه زله وحده
وحقج رح يوصلج ولوماتستحقين بس يله ميخالف
واتمنى تكونين بعدج مافرغتي هدومج
وها اخذي اي حاجه تريدها موجودة بالغرفه
مااريد اذكرج
يله حتى تلحكين تروحين
....لعدليش رجعتني اذا هيج
.....حتى اعرفج الذي مثلج يبقون ناس رخيصين
ومهما حاولنا نعليهم
يبقون هما هما
مايتغيرون
كامت وكفت وكالت
....اني ماااسكت وهسه تشوف شسوي
....واني اخاف احجي لان معناته راح افتح عليج ابواب جهنم وماكو داعي اذكرجً اني منو
داردت وجهها دتروح وجان يكللها
...شيرين سلميلي على بابا رجل الاعمال
كامت تتنفس قوي وحسيتها من الغيض راح اطك
وجهها صار احمر وحتى شعرها تكهرب
بحيث تخبلت كامت تمشي بسرعه
وحسيتها نعوجت
مشت مشت سريع ودخلت جوه
باوعلي كميل وماابتسم ولاحجى شي
ومحمد جان ديبتسم
وكله لكميل
.....هاي شنو عود دجر بوشي ههههه
.....لا على بختك محمد تعرفني اسوي هيج شغلات
اني انفذ بدون مااهدد
.....اي اعرفكً
....اي زين تعرفني
...اني اتمنالك انت وبان الي هي اختي قبل ماتكون مرتك اتمنالكم السعادة
اني دائما جنت واكف بجانب بان واساعدها
لان كتلك اني دائما احس بتأنيب الضمير لان اني كنت سبب بأنو هي عرفت سعد
.....اي
رد كله
.... كميل انت مو بس ابن عمتي انت صديقي واخويه واني ظهرك ولو الدنيا كلها توكف بوجهك اني مااكدر اوكف بوجهك ابدا
بقى كميل ساكت وباوع على محمد لفترة طويله
واني جنت اباوع على كميل واكول الكل يخافون من كميل ليش
حتى محمد داحسه بهاي اللحظه بالذات خايف
بس يصطنع القوه وعدم المبالاه
شفت كميل ابتسم بوجة محمد وابتسامته معناته الرضى
وكله لمحمد
.....شنو جنت ادكلي قبل
ضحك محمد
....جنت اكلك انت ضلعي من ينكسر يعني تتكسر كل ضلوعي
وصدك كم مرة محمد كلي هيج على كميل
كميل كله
....اي حتى تعرف كسرت الضلع شلون تكون
....اعرف كميل
وسكتو وبعدها صار بينهم كلام عادي وحسيت كام الجمود الي بينهم يروح
والجليد يذوب
.........
بقى محمد كاعد واني رحت ليوسف حتى اصعده لغرفته
صعدت يوسف وطلعت من غرفة يوسف ور

حت لغرفتي
وسمعت كميل يصحني
عبالي اكو شي
طلعت من الغرفه ومديت راسي من فوك وباوعته
كتله
..... شكوً
....تعاي اريدج
جريت نفس وكتله
......هسه اجي
نزلت ورحتله وشفته
واكف باب البيت من شافني كلي
تعاي رحت وكفت يمه وجان يمد يده الي
واني هم مديت يدي وكمشت يده
وطلعني للحديقه الجبيرة
ورحنا كعدنا ليوره جانو الحرس ميبنون لان بعيدين عنه
جاب كرسي وكعدني وجر كرسي وحطه كدامي وكعد
كتله
...اكو شي كميل
....لا
....لعد شنو
....بان ماريدج فديوم تاذيني لان كلشي منج بي أذيه معناته
دتتنزعين كلبي مني وتاخذي وتخليني انسان
يعيش بلاقلب
.....شكو ليش
....سمعيني للاخير
....احجي كميل
.....قبل من اجيتي لبيتنا شفت بيج شي غريب اول انتقدت لبسج واسلوبج
وحجيج الفكاهي
بس جذبني شكلج كلش
جنتي حلوة ويمكن حسيت انو اني ماشفت وحدة احلى من عندج برغم لبسج والعبايه مال راس
بس جنتي جذابه كلشً
وبعدها نعجبت بسباعيتج ‏
متعودت اشوف بنيه تكدر تحجي ويايه مثل ماانتي حجيتي ويايه من اول مره
ردت افتح وياج موضوع وبعدها
صرتي انتي حديثنا ‏
وبقيتي يمنه بالبيت ومااخذت وقت هوايه واكتشفت انو اني
مشغول بيج وادورج
وبوقتها تكلمت عنج كدام محمد وسعد
فسعد استغل الفرصه وصلج واني ماكدرت بعد احجي شي
بقيت ساكت لان جنت اشوف بعيونج نظرات مجانت تخصني تخص غير انسان
جان المفروض هاي المشاعر تموت بمجرد ماتصيرين مرت سعد
بس لكيت هاي المشاعر الي بيه كامت تكبر يوم عن يوم
تكبر حتى وانتي بعيده
ومويمي
جانت شوفتج مؤذيه بس جنت لازم اشوفج
جنت أسكن شي بيه وأموت شي
مرات جنت اشوف نفسي مثل مريض السرطان هو
يعرف نفسه ميت بس هو هم ياخذ علاج
وفوك كل هذا يتأذة وهو يدور على خيط من الامل
الدنيا اخذتني هوايه بس ارد وارجعلج
وجان التفكير كل يوم من تصير الدنيا ليل ميخليني انام
اكوم واكعد واطلع للحديقه واطلع لااي مكان حتى لافكر بأنو
هسه انتي بحضنه
وتفكيري بأنج هسه ملكه جان يشل حالي
مااعرف غلط لو صح
بس رغم هذا اني ماسويت شي يخرب حياتج بقيت ظام همج بكلبي وساكت
متوقعت نفسي فديوم احب وحدة مثلج
فقيرة طيبه اكثر من الازمً
عطائها بالحب ماله حدود برغم الي يشوفها اول مرة
يكول هاي مثل البير العميق محد يوصله
بس انتي بيج طيبه
وبيج محنه ماموجودة بااي شخص صادفته
واني نقيضج اني انسان صعب
اشك ومن اصير عصبي ادمر كلشي داير مدايري
ومن افقد الثقه بااحد مستحيل بعد اسامحه
ومن اريد شي امتلكه
واحلامي عمرها مكانت بسيطه مجنت احلم على كدي
دائما احلم بشي اكبر مني
لان جنت احب اتميز عن غيري حتى واني طفل
.............
اني انسان غامض وراح اكلج شي. اني عبارة عن كتله من الاسرار والغموض
ودائما جانت امي دكلي الله يكون بعونها الي تاخذك
راح تعيش وتموت وهي متفهمك
لهذا السبب حتى حبي الج مافهمته. ولاحسيت ليش هيج
يكبر يوم بعد يوم
ماريد احجي هوايه واكلج شنو الي جنت احسه
وشنو العذاب الي جنت اضوكه
ويمكن الي صار والي وصلتله جان بسبب تفكيري بيج
كمت احس نفسي مشوش
وارغب بكلشي حتى انسى شي واحد
من جنت اسمعج دكولين احب سعد احس دمي يصير اسود
وكلبي ينملي
كره وحقد
تعرفين من رجعتي لبيت ابوج
كم مرة اجيت شفتج من بعيد وجنت اطمن عليج
لان انتي الوحيدة الي صرتي ضعف بيه
كميل مايضعف بس بدريه الي تبيع خضرة بالسوك
الانسانه الي احلامها صغيرة كلش الي
حتى اصغر من ان تسمى حلم هاي الانسانه حبها كميل
وبقى يريد قربها

وبعدها كميل سكت وجر نفس طويل
كتله كميل
....كلي ليش لعد تأذيني
...لان احبج
...اكو واحد يحب احد يأذيً
...اي اكو اني من كثر حبي
....انت هوايه سويت اشياء أذيتني
....كلشي سويته لسبب
...فسرلي أسبابك
...صعب
....ليش
....لان مراح تفهمين ليش كرهت سعد وليش ازوجت شيرين وليش كمت ابيع اسلحه مراح تفهمين ليش اخاف أواجة ابويه او بلاحرى موخفت
خجلت
...افهمك
...ههه لا انتي تفهمين بالحب انتي مفهموج واحد يحبج ويدخلج بنص كلبه
مفهومج بالحياة بيت واطفال ورجال محب
...قصدك مااافهم اني شي
....ياريت لو متفهمين وياريت لوتفهمين اكثر مني
جان ماخبلتيني هيجي جان ماخليتيني مثل الروح الي دتنازع
واني يمح
...حتى من تحجي بالحب غامض وكلامك موكله مفهوم
...هههههه
كمش يدي وتقرب مني
وكمش خدي حيل كتله
....اخ ههههه
....هههههه اي والله هاي ال اخ يمي وبيه وضحك
....كميل ☺️☺️☺️
....هههههه بالخدمهً كميل 😉😉😉😉
.....ههههه
كام وكف ومد يده وكمش يدي
وكفني وخله يده على جتفي
وكام يتمشى واني اتمشى وياه
ولمن وصل يم الحرس
كاللهم
....تصبحون على خير
الحراس بهتوووو عبالهم واكع ومضروب على راسه ودخل
وسد الباب مال بيت
وصعدنا اني وياه فوك واول ماصرنه بغرفة النوم
كميل سد الباب وباوعلي
وكلي
....عبالك اول مرة انتي مرتي
...ليش
....لان هوايه جانت شكوك بيه واشياء متشابكه
بعضها هسه تخلصت منها
....كميل
....اي شنو
....بعد ماكو سروان
....لا ماكو سروان
..ولااكو

احد غيره يحاول يأذيك
....ماادري
...يعني اكو
....يمكن بس حاليا ماكووو
... زين شيرين
...ورقه وحتركت
....ومشكلتك ويا محمد
......محمد صديق عمري محمد مثل الدرع بحياتي
مو اضحي بي لا بس هو دائما جان يحاول يحميني
مثل مااني احمي
.....وسعد
....استغفرالله هسه اذا اعوفج واطلع وبعد مااباع بوجهج احد يكلي ليش
....دريحني
....شنو ريحني انتي ليش هيج مهتمه لهيج واحد قذر
...مامهتمه بس اريد اطمن عليك
....لجيبين طاري وهذا هسه مايكدر يسوي شي
...اي زين واهلك
....شبيهم
.....شوكت تروحلهم
....لتدخلين بهذا الموضوع اني اعرف شسوي
....لخاطري روحلهم ترة امك كسرت كلبي كلش مشتاقتلك وخليت نفسي بمكانها يعني اني عندي بس يوسف وربيته وكبرته ونحرمت منه
شنو شعوري واحساسي راح يكون
سكت وترك يدي وطلع من الغرفه وسد الباب
وبقيت انتظر يجي بس مااجاني وتعبت ونمت
وثاني يوم
الصبح نزلت وشفته ماكورو
سئلت ام ياسن كالت طلع من وكت
بقيت انتظره
اجى الظهر ضايج وماحجى ويايه شي
ومااكل وصعد فوك. ولمن صعدت فوك شفته
ديبدل ملابسه
كتله
...وين تروح هسه اجيت
...عندي شغل
....كميل ليش هيج تسوي
ورحت وكفت كدامه وماقبل يباوع بوجهي
وتركني ومشى لحكته وكمشته
....كميل خلي نروح يم اهلك سوي الي يرضي الله
اذا ابوك لو امك صار بيهم شي مراح تسامح نفسك
روح واذا ماحجوو وياك بعد خلص انت اذن سويت الي عليك
بقى ساكت وعبالك اقتنع بكلامي
كلي
.....ابويه واني اعرفه مايرضى
.....هسه كلبهم نار عليك
....واذا ماحجو ويايه شلون
....على الاقل انت شفته وريحت كلبك
سكت وكعد على الجربايه وبعدها كلي
....زين نروح
...شوكت
....هسه
..متاكل
...لا
....زين لعد خلي ابدل ملابسي
...يله
هو كعد بعيد عني وبقى صافن
واني غيرت ملابسي
بسرعه وكتله
...كملت
مجاوبني جان صافن
...كميل .....كميل
....ها
...وين بالك
...وياج يله
نزل قبلي واني اخذت الجنطه مالتي ونزلت
ورا ومن وصلنا يم الباب ام ياسين كالت
....ها وين
كتلها
....هسه شويه ونجي دربالج على يوسف
كتله لكميل
....والله ام ياسين ابتلت بيوسف
مجاوبني مجان بمزاج يجاوب او يحجي شي
طلعنه وصعدنا بالسيارة
وساق كميل وطول الطريق هو ميححي ابد
لحد ماوصلنا لبيت اهله وكف بالباب
وبقى بالسيارة كاعد
كتله
...يله كميل
....يله
نزل واني مشيت كدامه وصلنا لحد الباب الجوه
وجان البيت مابي روح
وكفت كدامه ودكيت الباب الخشب وسمعت صوت خطوات هو بقى جامد بمكانه
شويه ونفتحت الباب وجانت ام كميل
كتلها
....السلام وعليكم
....وعليكم السلام
وجانت
تباوع تريد تشوف منو الورايه
كتلها
....شونج خالتي
....هلو بنتي
....اني اجيتج اني وكميل
،....كميل
وخرت من كدام كميل وباوعت عليها بسرعه دموعها
نزلت وجرته من قميصه وحضنته
وكالتله
...اوفيش اوفيش ليش ياحقير ليش يمه هيج رباتي راحت بيك يمه ماغزر بيك حليبي
ماكلت اشوفها هيج احنا رباتنه راحت بيك
بكل كبرياء كاللها
...شونج يوم
كاللها بشموخ بس حسيت دمعه واكفه بعينه
كالتله
...شوني يمه اشم ريحتك بالبيت
وضحكت وكامت طبطب على خدوده
....اشتاقيتلج امي
...جذاب
...وداعتج مشتاقلج انتي مي عيني
وطكتها بجيه
موقف جان يخلي الحجر يدمع
وردت جرته حيل
وتصيح افيش ياابن بطني
......صارلي كم سنه مشايفتك
جرته وكالتله
...ابوك جوه ادخل راضي
هز براسه
وبقت كامشته ودخلته جوه واني دخلت وراهم
وسديت الباب
وصلنه للهول وجان ابو كاعد نفس الكعدة مال المرة السابقه هم على التخم ومدد رجله
دخل كميل وابو جان ديقرأ بكتاب وبدون ميرفع عينه
كال لمرته
...منو اجى
كالتله
...كميل
سد الكتاب ورفع عينه وباوع على كميل
وكميل حسيته طفل صغير ودينتظر العقاب من ابو
كله
...اطلع برة اجابك
وكام يصيح على مرته ويكللها اني موكتلج هذا ميدخل للبيت طول مااني عايش
مشى كميل وكعد كدام ابو وجر يده وباسها
وكله بصوت يرجف
....شلونك ابو كميل
ابو سوا حركه بحلكه مثل الطفل الي كامشته بجيه
كله
.....انت كسرتني كميل دنكت راسي
....ماعاش الي يكسرك ابو كميل انت ماتنكسر
انت ابويه اني كميل يابه مااكسرك
....شلون سويت هيج هيجي ربيتك هيجي علمتك اني
....سامحني يابه انت جرح
....هيه اذكرت
.....انت شمعتي يابه واني مانسيت حتى اذكر بس جنت خجلان اجيك
....لان غلطان
....منو الي ميغلط كلنه بشر والله يسامح
.... اني مااسامحك
....موخاف بعد متشوفني
...اسكت ولتحجي هيج
وكمشه وحضنه ومن تركه نزع مناظرة
ومسح عينه
وكله
....ماادري ليش شوفتك خلت كلبي يعيش مرة ثانيه من بعد ماجان ميت
وكعد كميل وابو وامه يباوعون عليه
كلت لنفسي
شكد احبه اني بس حبي يمكن ميوصل نقطه بحر حبهم
من الي شفته
كاللهم كمل
....بان حامل
ام كميل
ضحكت كالت
...صدك
كتلها
...اي صدك
...يعني راح اصير بيبيه
كال كميل
....وبعدني وياج على الوعد باقي
....ضحكت قصدك تسمي بنتك على اسمي
...وابني على اسم ابويه
ضحك ابووو وبعدها كعدنا شويه وكمنه رحن

ا للبيت
حسيت كميل صار انسان جديد وجان يضحك وفرحان
مثل الطفل الي مشتريله هدوم بالعيد
فرحته جانت جبيرة
واول مارجعت للبيت وصعدت ابدل ملابسي اجاني
وكمشني وكلي
...احبج
...اني هم احبك
....عمري ماراح اشوف وحدة احلى منج ولاراح احب وحدة غيرج بس لتصيرين ضعفي خليج مثل ماانتي بعيني
.... انت حبيبي وحياتي
ضحك وكمش يدي وباسني وكام يوشم بوساته
على جسمي وانفاسه تعطر روحي وكل حضنه من كميل احس بيها تنطيني حياةجديده
ومرت الايام ومرت وفترت الدنيا هوايه
بينه وهسه وصلت لااخرها
اني حجيت ذكرياتي ونجمعت بقصه
مر 17سنه على بدايه حكايتي
.......
اليوم واني واكفه واباوع من بعيد على كميل جان كاعد على الكرسي ومحمد كاعد يمه
واطفالي الثلاثه يوسف وظافر
وفاطمه بالحديقه كدامي
وجان واكف يوسف ويشمر لطوبه لااخو
هاي الشوفه ذكرتني بكلشي مر
وتذكرت ال
17سنه الي عشتها بمراحل متعدده
17سنه ‏توجت بقصه جبيرة
بدايه قصتي بنت بسيطه صغيرة ماعدها خبره بااي شي
دخلت لدنيا جبيره وبقت هاي الدنيا
تفرها مثل ديلاب الهوى نوبه صعدها ونوبه تنزلها
بنت رادت حب من شخص ميعرف الحب
برغم انو كان اكوً
رجل يدور عن حبها بالخفاء
حلمها البسيط جان عائله
وحلمت وبقت تحلم وجان صعب حلمها
ولكن بنهايه المطاف الله عوضها باانسان محد يفمه
غيرها كميل (((قصه لايفهما غيري))
رجل اجتمعت بي كل الصفات القوة الشجاعه
شعوري بلامان واني وياه
الطيبه برغم القسوة
انسان عايشه وياه مغامرة
ماتنتهي
بداخل قصتي قصه
وعبرة وحكمه وقوة ‏ أراده وشجاعه
قصتي هي جبروت رجل وخضوع امراة
ونفوس مظلمه وصديق وفي
واطفال عبارة عن نعمه واشخاص ماتجمعنا روابط الدم بيهم بس صارو اهل جمعتنه الحياة وقسوته
وبقى القلب ينبض
وحبيت ولكيت بكميل امي وابويه
وصديقي واخويه والدنيا الي ماحصلتها
اما
محمد مازوج وبعدني احس بي شي ميكدر يحجي برغم كل هاي السنين
وبعده محمد الصديق الي فعلا يكون جدير بالثقه

اما حبيبي كميل الي هو اصل حكايتي
بعدة معذبني بس كلما ديكبر وكلما ديزيد الشيب براسه
داحبه اكثر
من رديت وباوعت للي كدامي وشفتهم وسمعت ضحكتهم
اذكرت انو اني ردتهم وزرعتهم من قبل
بس جنت اسكيهم بدمعي
ولكن لمن كمت أفرح كمت اسيكهم بسعادتي لحد ماكبرو
وصارو ورود موجودين بدنيتي و
بعدني بالعراق لان كميل يرفض يسافر
وبعدني احس بالخطر لان دائما كميل مهدد
بس على كولته عوفيها على الله
الحفظني كل هاي السنين اذا يريد هسه هم يحفظني راح يحفظني
اما يوسف ابني الجبير فحبه مختلف
نوبات احسه ابن كميل مو ابن سعد تعلم من كميل الغرور
والشجاعه
قصتي المتواضعه خلصت لهنا بس حياتي بعدها
مستمره بمطرها وبعواصفها
وبحزنها وبفرحها هوايه اشخاص دخلو لحياتي وضافولي هوايه اشياء وبعدها طلعووو من حياتي مثل فيصل ومثل ام ياسين
وحياتي
مستمرة بقوتي وبضعفي
اني ماحلمت بهيج حياه بس هاي الدنيه مكتوبتلي
هيج
....بان
فزيت وسمعت صوت كميل
وكلي
...ها شو واكفه هنا
....داباوعكم
....ههههه ليش مشتاقتلنه
....انتو يمي واني اشتاقلكم وداشوف فرحتي بيكم
...اي شوفي على راحتج
ندار كميل وجان ديريد يدخل جوة
كتله
..كميل
...ها
....بعدك تحبني لو كبرنا
....والقلب شيكبره بعده يحبج

.......
يامن تمرون على حكايتي ‏ ‏
ضعوا بها طيب الكلام. ‏ ‏
فوالله قد كتبت حكايتي
بحبر الآلآم ولقد جمعت ‏
كل احزاني
من شتات ايامي
وضياع احلامي
وصغر فرحتي وكبر دمعتي
وتأخر بسمتي ‏
يامن تمرون ‏بأحرفي
و تقرأون سطور قصتي ‏
اجعلو مرورك كالنسمه ‏ ‏
فأنا القلوب تعشق حلو الكلام
.......
#الكاتبه #روجمان
‏

انتهت القصه 🔚

حبايب نت ضعيف☹️ ..عود من يقوه...عصريه
اجاوب عل اسئلتكم بالبوت❤️

#ملوكه

ههههه..شنو هل كلام😍😍 العسل ياعسل
يبعد عمري❤️..لاحبي عادي مابي اي فضول..هذيج المرة هم سالوني...وهسه هم رح اعرف نفسي للجدد

★اني من كربلا ..مواليد 4/7/97

برجي السرطان..ادرس بجامعه فريحه
تربية فيزيا ..اخير سنه
واحب اكثر شي😋 بيتزا ومعجنات وفنكر .وهالسوالف..وكولشي من فروع شكولالة هم احب

هواياتي ماعندي شي محدد..حسب المزاج😂كل مرة شكل

الوان اللي احبها..الاسود وتدريجات بنفسج 💜والماروني

جان حلمي قبل.. افيد المجتمع وبالخصوص المرأة..اقوي شخصيتها واشجعها من كل نواحي...والحمد لله..سويت هالقناة وجمعتكم وكدرت افيد الاغلبية🥰

شخصيتي بعد هاي يمكم تقيموني😅 فالاكثريه كللولي اجتماعية😍 ومحبوبة

واكو شغلة صغيرونة🙂 بس اساسية..والاكثريه منكم ماتدري بيها..فيجي يوم واكلكم بيها.😂 وبس

#ملوكه

حياتي ألف تريلون مبروووك😍💜💋
وهاليوم جمعه يوم مبارك..فان شاء الله ميصير اله كل الخير

اشكد افرح من اسمع اثنين يحبون ويرتبطون🥰..وان شاء الله حبايب .كلجن تتسهل قسمتجن 🙈💕


عود بشرني حبي بالاحداث🌚عل بوت

#ملوكه

حبي سوي ماسك بياض البيض يومين بالاسبوع وبقيه الايام ماسك الشوفان..رتبي بجدول والتزومي☺️ بي

يعني مثلا الاحد والخميس ماسك بياض البيض
الاثنين الثلاثاء والاربعا والجمعه والسبت ماسك الشوفان
★فعادي حبي ماياثر عل العلاج..يعني سويتي ماسك ورة 2_3 ساعات حطي علاج

وضرورري ترطبين بشرتج👍..بعد ماسك..وبماانو يم الفم ديسمر ويتقشر..فهاي من العلاج☹️ فلا تخلين قريب الفم..لانو اني مجربة كلما نحط كريمات مقشر ..يسمره بالزايد

فهالمنطقة يحتاجله بس ترطيب ورطبي مرتين باليوم..وي استمرارج بالماسكين..رح تشوفين فرق😍

#ملوكه

فمنا ماسك بياض البيض☺️

ومنا ماسك الشوفان🌚👆🏻

حبي فوائده اهواي..منه يرطب البشرة ويصفيها من تصبغات و الهالات خفيفة
واذا اكو كلف خفيف..هم يزيله
وهمين يفيد للشعر...فتكدري تستعملي وحده..او وي خلطات☺️🌸


#ملوكه

حياتي اهم شي استفاديت من العبر💜..ودوم اقري قصص حته تاخذين منه المعلومات زينة وتطبقي بحياتج

ومثل مكلتي..القصص تقوي القلب..لان يصير عبرة..فتستفادين منه
وفدوة لكلبج❤️ ني هم احبكم🙈

#ملوكه

حبي العضلة النائمة. هاي تروح بالرياضة ..عود بعد اشويه رح ادزلج فيديو عل هالشي

وكثرة تساقط الشعر.☹️.شوفي شنو المسبب وعالجي..اذا عندج كريمات لو سيرومات لو تسوين كرياتين ومعالج..هذيني كولهن اتركي

واذا عندج نقص بالزنك والحديد وفيتامين d..فلازم تاخذين حبوب..حته يصعدن💔
وهمين سوي جدول للعنايه بالشعر من خلطات بروتينه حته تقوي شعر...ف رح اسويلج توجيه اله
وتوريد الخدود..والشفايف..ان شاء الله انزللكم فد خلطه عليهن🥰

#ملوكه