الأبراج الهوائية
#الجوزاء #الميزان #الدلو

وجه الثلج الذي يظهره يعكسه جانب من النار بداخلهم سيظهر بالوقت المناسب..
تشعر انهم يتواجدون معك ويعيشون بنفس الوقت بعالم اخر موجود داخل عقولهم فقط حياتهم تصلح كفيلم واقعي كوميدي ذالك لانهم افضل من يجمع بين قمة العقل وقمة الجنون..

الأبراج النارية
#الحمل #الاسد #القوس

نظراتهم هية كتاب مفتوح لما يدور بعقولهم..
تصرفاتهم كطلقات الرصاص مندفعه وعفوية وواضحة ومتى خرجت لا يندمون عليها..
حياتهم تصلح كفيلم عاطفي اكشن ذالك لان خلف تصرفاتهم وشخصياتهم المندفعه والقوية جانب عاطفي كبير قد يعاني كثيرا بصمت..

الأبراج الترابية
#الثور #العذراء #الجدي

يصبرون كثيرا ولكن عندما يردون اعتبارهم سيؤلمك الرد
يجتهدون كثيرا ولذالك لا يليق بهم الفشل!
حياتهم تصلح كفيلم درامي كوميدي يمكنك ان تتعلم منهم وتزداد قوة بوجودك معهم وبنفس الوقت ترى بهم الصديق المرح الوفي..

الأبراج المائية:
#الحوت #السرطان #العقرب
يتحدثون كثيرا بعيونهم بتصرفاتهم لكن مهما فهمتهم يزال هناك جزء غامض يصعب عليك الوصول له.. شخصياتهم كالمحيط تجد راحتك بالوجود معهم لكن لو فكرت بالغدر سيكون مصيرك الغرق حياتهم تصلح كفيلم خيالي استعراض داخلهم عالم اخر يجتمع فيه كل شيء.

#البارت_السادس

1985


خفت اصعد فوك منه ليروح يسوي بيه دكه . ما اعرف جان شعوري قلق جدا من ناحيته .

لحد ما اجه ابو لواء لابويه . اني بهليوم بديت اقره على روحي السلام . صعدت طايره وهو لاكاني فوك ويكلي وينج ليش متصعدين ....

جاسر امي متقبل شكت بيه ...

شكت بيج ؟؟!!! وين اني صاراي كومه مشايفج وين شكت بيج ....

جاسر متقبل والله اصعد ....

شعده ما بده متصعدين ؟؟!!!!

حسيته شك كمت اتملص ....

انت مو وعدتني ما ابجي ؟!!!

اي وعد وكد وعدي ....

لعد اهلي يكلولي اذا قبلتي بي نتبره منج ....

ههههه لج ليلى اني احبببج تعرفين شنو احبج .....
واذا قبلت بيك راح اخسر اهلي ...

ليلللللى اذبحج والله اذا تحجين هلشكل صدكيني ....

يلا لعد تعال اخذني ونفذ وعدك لتخليني ابجي ...

حبيبي الله يخليج حاولي تقنعين اهلج ....

مجاي تقنع ....

اي غير اعرف شنو السبب . يعني لان شغله مذهب ...

لااا من يوم تفتيش التبعيه ولسه اضن ابويه شايل بكلبه من لواء . .....

واني شدخلني بلواء ....

جاسر لعد مو اخوك هذا .....

حياتي صارله هلحجي ٥ سنوات شنو القصه .....

الله يخليك حلها انت بدون ما انكتل اني ....

لا حياتي ما عاش الي يضربج . الله يحلها . بس انتي حاولي .

جاسر اني راح اوعدك اذا سألوني اكلهم موافقه بي بس غيرها كلشي ما اكدر اسوي ....
الله كريم ...ادعيلي حبابه .. صار اني اعرف شلون احلها ....
.
.
.
.

ليلى ......

مرات ترتكب خطأ بدوم متحس بي وخطأ حبي لجاسر ما اكتشفته اله لمن كبرت و وعيت على روحي .

جاسر احبه ولسه احس اكو مشاعر عندي اله . بس خوفي من اهلي او من حجم المصيبه مصيبه الحب الي وكعت روحي بيها هو الي مخليتني ما اكدر اتصرف صح .

ما اتمنى اتزوج غيره . ولا اريد ازوج احد
اغاره عليه وما اتحمل اسمع يزوج غيري .
احب اهلي ما اكدر اخسرهم بسبب تصرفي
احبه واموت عليه بس لازم اتخله عنه .

وهاي جانت الافكار الي تجي ابالي . هواجس هواي اجتي ابالي بلفضيحه وشراح يصير كدام عمامي لو درو اهلي احب واحد بلامن . وبيت جدي من النوع الملتزمين دينيا . بس مرات واحد ميحسب حساب لشي .
تركني جاسر ونزل من السطح مجرد ما كال : اني راح احلها . حسيت جان اكو واحد يمه . ضليت واكفه بمكاني والخوف انرسم على شكل كحله بعيوني . وصرت اتوقعه راح يطب كدام اهلي ويكول لو اخذها لو افضحها بلمنطقه . ما اعرف ليش هيج اجاني هلاحساس ....
.......

جاسر ......

نزلت من السطح ولواء واكف يريد يسمع ردت فعل ليلى . وهز يكلي شنو هلزباله هاي باشاره مني اخليها تزحف هيه وابويه لجوه رجليك ....

لووواء اكلك احبها احبببببها . انت تجي تكلي تزحف جوه رجليك . هاي ليلاي متجي لبيتي اله بصفه اميره ....

هههه والله يا جاسر انت ما خذتك العواطف هواي . هاي نصابه هيه واهلها اسمع مني خيلها ورايه واني اخليهم يزحفون جوه رجليك ....

.
تركت لواء يحجي وحده طلعت لبيت اهلي واني ارجف من الخوف . خوف لا افقد انسانه ما شفتها بيوم غير زوجه اليه وام اولادي الي لطالما جانت حديث فكري وانيسه خلوتي .

رحت بوجهي لابوها .

رحت للمحل ما لكيت غير المصريين . سألت عنه وكالو : المعلم مكاش اليوم ....

رحت لبيتهم دكيت بابهم طلعلي السيد : ها عمي . بوجه مكلوب وميبشر بخير .
عمي ممكن احجي وياك ...

كول عمي ...
(حسيت بي ميريد يطببني )

حجي مو مال شارع ..

غصباً عنه كلي : تغضل ....

طبيت للبيت وهو اجه ورايه للاستقبال وجابلي ماي . كولي عمي رايد شي ....

الله يخليك عمي انتم رفضتوني ليش اكو سبب؟؟؟

لا عمي ماكو سبب كل ما بلامر ابن عمها يريدها
..

زين عمي ممكن اعرف منو هذا ابن عمها ...

اكلك بويه البنيه ما موافقه وهاويه ابن عمها . ..

( عرفته صار نيته يزحلكني وقررت ادخله من باب ثاني ) :لا عمي صلي على محمد . عمي اني بتك من زمان هاويها ورايدها . الله يخليك لتحرمني من نسبكم ....

بويه انت تدري بلوضع مو امان . فرجاءا وليدي . توكل وشوفلك مره احسن من بتي لو تفيدك جان اني كتلك ....
اني مقتنع بيهة حتلو متفيدني ....

صار عصبي بس متمالك اعصابه كوه : بويه بتي بيها صرع على عقلها شي . ما اكدر اطيكياها ....

لعد شلون ابن عمها قابل بيها ....

مقابل بيها اكو واحد ياخذ مخبله ....

مخبله شلون جاي تدرس. ...

حس على روحه جفص من كلي مخبله راد يتلافها بكل وسيله : هيه مو مخبله تجيها نوبات صرع جنون .

استنفذت كل قوتي واني اطبله منا يطلعلي منااا خبلني فقدت اعصابي : عمي لخاطر الله لتكلفرني . البنيه كلشي ما بيها . متقبل ليش انطيني سبب واحد ...

ما انطيكياها . بتي واني حر . بعدين انت دين ديانيه وانطيك بتي . وانت كدامي تصيح لتكفرني . اذا بربك تريد تكفر . وابليس بطغيانه يخاطب الله ويكله فبعزتك . انوب انت واحد صعلوك تريد تاخذ بنتي وكدامي تكفر . جان استحيت على روحك . بطنك متروس حرام اولاد البعث .

لعنت الشيطان وهو واكف كدامي يريد يطردني تكه اله شويه : عمي الله يخليك . شتريد مستعد اسوي . حتذا تريد اغير مذهبي لخاطرها هم اقبل ....
امشي اطلع بره . وما اريد اشوفك كدامي ...
.
.
.
طلعت واني ميت قهر واحساس فضيع ذله على مهانه على قهر . شوي وهذا يقبل ما ادري
بعد ما رجعت لبيت اهلي واني الحياة واكفه بعيني قررت اني اروح اتوسل بأبوها . واني واكف بلباب اريد اطلع وكفني ابويه .

وين رايح يول ....

يابه رايح لابو تحسين ينطينياها اتوسل بي مره ثانيه ....

ههههه تتوسل بي . تتوسل بمنو ولك .
ول ياب اني ابني يتوسل لواحد . عجل خلوني احفر كبرك بيدي كبل لا تروحلو وتذل نفسك ....

اذل نفسي يااابه . وادوس عليها لخاطرها . يابه افهمها والله اذا ما تزوجتها ما ارجع اسلم روحي للايرانين واخليهم يضربون طلقه بكصتي ....

عجل يكون بعلمك اذا رحت لابوها لبيتي مطب .ولو اعرفك تروح مهدور دمك فلا اعترف بيك ..

يا ناس راح تخبلوني كواو غيرها يمعودين . والله ما اعيش بدونها . اني رايدها مروتك يابه ....

اششش بلا حجي زايد . اكتل روحك واغسل عارك دام انك رايح تتوسل باهل مره ....

شوفولي حل لو اخذها لو انهبها من اهلها وكدام الناس كلها واغتصبها واحطها واجيبها بنصنه .

اصبر واني اجيبها حدر صوبك .....
ما اصبر ازوجها قبل لا اروح لخاطر الله بس افهم عليه . اريدهااا ...

هنه يومين بس يومين واني اجيبلكياها ......

ولا ربع يوم هسه اروحله واروح لعمامها واتوسل بيهم ....

ول انت ليش ما تسمع مني وتفهم . الي يتوسل ينذل وما ينطو . اني اعرفهم هيج همه معدنهم انطيني يومين كمل غراضك واخشابك ونعزم اهلك وناسك وهيه تجيك ....

دنكت راسي بحيره ماكو غير هل حل كبالي : بس يابه اني وعدتها متبجي ....

ضحك بصوت عالي وتقهقه وكال : اذا تأذت طبعا تبجي بس بعدين هيه تجيك برجليها ....

اني مثل اللوح كلشي ما فهمت بعدين طخت عندي . وسكتت
سكتت لان معندي غير هل حل . سكتت لان ما عندي صبر بعد كضيت عمر احبها وسنين اخطب بيها وهيه متحرك ساكن . واذا جانت هيه ضعيفه فاني الرجال لازم اقلب الموازين ..... ورحت اشتريت الاخشاب اني وصاحبي وافتريت اني وامي جابو شكو شغله وفرشناها ابيت اهلي شكو شي عايز اشترينها ستارات جديده انارات ديكورات تحفيات ملابس الها غركتها ملابس . ملابس مال نوم . مكياج شسوار اي شي تتمنى اني جبته الها . خلال يومين اني منتظر ابويه يكلي يلا امشي . كل توقعي هو يروح يخطبها ومن يعرفونه هو ومركزه واله ثقله اكيد راح يقبلون . اخر شي اشتريت الشمعه . جان بوكتها الشمعه مال العرسه طويله . اشتريتها كولها متر مال واحد مخبل حته من رجعنه مطلع ايدي من السياره ولازمها من بره . امي تشتغل بكتر وتنظف ومره لواء تساعدعا واسمعهن يكولن هسه ابو لواء صدك راح يسويها يعني ! واذا ما قبلو ينطو . حته الناس عزمهم .
.
.
.
.
.
ليلى ....
...................

في بعض الليالي المضلمه والتوتر السائد بلبيت من جيه جاسر لبيت اهلي . وبدايه شكوكهم حول ما كان عندي علاقه بي ؟؟؟؟؟؟!!!!!!!
واستمرار امي وابويه بسؤالي : هو وين شافج وين عرفج .

وتوتر الاوضاع زاد بعد طرق الباب لعده مرات لخطوبتي . بعد ما تركت المدرسه بسبب اجبارنه على الدوام في يوم الجمعه وارتداء ملابس زيتونيه . لمناصره الجيش والقائد .

هواي من الناس كيفت ع الملابس وحته اكو ناس سووها جودليات هيه جانت يوم واحد بلشهر نطلع مسيره ونلبس ملابس عود احنه مأيدين .

منو ...

افتح البااااب ... صوت نقر قوي ع االباب ....

فتح الباب ابويه وطبو المداهمه عبالك عدنه وكر لخليه ارهابيه ..

اخر واحد طب بيهم ابو لواء . نزل صعد بنصرونه رافع حاجبه بغرور وتكبر مستعد يكيرنه بتوقيع واحد . وحعع السؤال لابويه :
ابنك ليش هارب ....
ابويه : ابو لواء وين هارب ابني بلجيش الشعبي .

بس الاخبار تكول ما لابس . ( قصده تجنيد الزامي )

ابو لواء .

صاح بصوت عالي : اسمي سيدي يول .

حس ابويه من طريقه حجيه هو جاي عليمن . واني بخوفي ورعبي . احساسي بلوقت معدوم كلشي وكف بحياتي واني تخرمش بخدودها وتصيح سواها جاسر النذل يريد ياخذج بلكوه . وادم وتلكم ولج شعنده وياج هيج مجلب بيج شعندددده .

حته جواب ما اعرف شجاوب بس رجليه كمت ما احس بيهن من ااخوف . بس اذاني كمت احسها تريد تلتقط ولو اقل شي بس اريد اسمع .

ابويه يجاوب بقهر : سيدي عفوا سيدي ابني لابس .

ابو لواء : شعندك وي السيد الرئيس ....

شعندي سيدي اصلا اني اموت ع السيد .. .

مو تغلط عليه بلكهاوي ....

لا سيدي صدك تحجي . اصلا السيد الرئيس بعز امي وابوي اكو واحد يحجي عن روحه .
احنه عدنه شهود . صاح ابو لواء : تعال ابو خضر (ضابط ويا )
ابو لواء : ابو خضر سمعته يشتم لو لا ....

ابو لواء : سيدي هذا حته يمول حزب الدعوه اني حته عندي شهود . وابنه يقون بحركه ضد السيد وي ايران انتقاما لقتل الصدر . متضامن وي العدو الايراني .

ابو تحسين : سيدي كول غيرها سيدي .

انت تعرفنه كلش زين عشت يمنه عمرنه كله كلنه للحكومه لا ...

اي طبعا كلتو للحكومه لا ( قصد برفضه لجاسر )

ابو تحسين : سيدي الله يخليك . احنه جوره وعشره عمر . وانت شاهد ...

ابو لواء : ابو تحسين اني شعليه . اني رحاب اطبق قانون . ومقدمين عليكم بلاغ خو ما اعوف الدوله على ابو جوره . وين تاكل هاي .

الله يخليك هو وين هذا الرجال اني حته ما شايفه ...

ابو لواء : اي والله قضيتكم صعبه واحتمال سجت اقل شي ١٠ سنوات الك وابنك احتمال اعدام . اني افضلك تشوفلك نسيب يشد ضهرك من هسه وتتلاحك روحك . لان اذا صعدت بلسياره ( واشر بحلكه ويهز براسه ) ما اضمن الك ترجع

نزل ابويه راسه وهو يرعد بخوف وعيونه شابحه ووجهه اصغر : بخدمتك سيدي .
ضحك ابو لواء ضحكه مرعبه : اي هيج من الاول يا ابو تحسين ليش تشلع كلوبنه . والتفتت لواء وشاوره

طفر لواء استجابه لامر ابو وطلع وره شويه . اجه الشيخ . شيخ مبين *سني* . وجاسر . الي اجه وجهه اصفر وشاحب بين خايف بين يريد يشوفني وعرفته من خلال نظرته مهموم عليه لان هو وعدني ميخليني يوم من الايام ابجي .

ابو لواء : تفضل شيخنه حته ناخذ بنتنه .

ابويه كال اني ما اريد هذا الشيخ يعقد . .

ابو لواء ما عجبه الحجي . تنرفز من حجي ابويه راد يتخبل : وشبنو هذا الشيخ . بنتك وموافقه عليه * بسمار لابويه يوضحله علاقتي بجاسر *
على شنو متقبل . البنيه قابله والزلمه هم قابل شنو تزاكح عليش ....

ابويه راد يموت بكاعه وطب للبيت باوعلي بنظره جنت اتمنى اموت وما اشوفها : ليش هيج بويه ليش تنزلين راسي .

ما عندي حل غير دموووع تنزل على عيوني وما عندي جواب اله : اسفه بابا حبيبي ...

ضرب على رجله بأدين ترعش : بعديش بعديش . يعجبج هاي الدكه السواها بعجبج الي صار . نزلتي راسي وبانت دموعه على عيونه وبدن ينزلن . التفت لامي وهو يوصيها حظرها عمي حظريها راح ياخذوها .
امي : ادك وتلطم . شلون راح تعيشين وياهم ولج . هاي تالي تعبي وياج تكسرين وجهي وجهه ابوج . الله لا يسامحج على هذا موقفه الله لا ينطيج . من صرتي لسا واني دمي بشيشه .

يوم بس سمعيني والله معندي شي ويا ....

لتحلفين بالله . لتحلفين . الله اعلى من انو وحده مثلج تجي تحلف بي وحده دونيه سافله ولج ما فكرتي بشيبات ابوج . وج ما فكرتي بأخوج . وج حته اخوج لسه ولد ما عنده . تردين تعمين عليه وتكطين نسل ابوج . من الله ينتقم منج .

يوم الله يرحم والديج . بس سمعيني ع الاقل بس سمعيني . لو اني فرضا ما حابته وبس هو حابني واجه بتفس الطريقه ؟ تنطو لو لا ؟؟؟؟

هو انتي لو ماسوالف الحب والغرام اجه لفه لا وااله بس انتي عبنج كحيبه ..

يوموالله يخليج . صدكسني مجان عندي شي ويا . بس هو حان يهددني يكلي اذا ما اخذتج اكتلج ..

ااااخ يا بويه اااااااخ يمه عساني ميته ولا شايفتج ولا جايه لبغداد . وج شنكول لعمامج . نهبوج وراحو حته ما انطيناهم خبر . حته ايمن منازل ويشوف اخته شلون تطلع

صعد صوت النحيب وبرز صوت بكائي وقهري الي احسه يطلع من كلبي يفجر كلبي ويطلع .
شويه واندكت الباب .

جاسر : عمي الله يخليك بس اطلع خل احاجيك .

ابويه باوعله بانكسار : كول

شنو الي تريده اني مستعد اسوي بس لتخليها تبجي .

استنتج ابويه من خلال كلامه وعرفه هاويني : اذا تحيها صدك ورايد رضاتي . اعقدو ع المذهب الجعفري .

صار هسه ....

التفتت لواء . لواء هذا ما اريده الشيخ . روح شوفلي مروتك بهذا الجامع شيخ سيد اي شي خل يحي يعقدلي ....

ابو لواء : واحنه حظرت جناب السيد ليش شيخنه ما يفيد . ليكون متوقع زواجاتنه كلها باطل ....

السيد : لا ممتوقع . كل ما بلامر بنتي اريد ازوجها مثل ما هيه تريد ....

ابو لواء : هههههه بنتك تريد جاسر وبس .....

السيد : متوهم ابو لواء . العلويه اشرف من هووواي اولاد حرام .....

شفت الامر شتد بين ابويه والسيد وكلت خل اتلاخك الامر ... رحت للسيد بست راسه . سيد والله راح اخليها بعيوني .... ورحت لابويه بسته : بويه اسكت كافي لخاطر شهر تشرين راح اطركعها عليه .....

.
* لا عندي بخت وازهك واشور بيك ... ولا سيد واكول يسودنك جدي *

يتبع

#البارت_السابع


1985 _ 1986
.
.
..

هدوء سادت ابيتنه بدون اي كلام وابويه ميكدر يحجي بس امي قصص وروايات عراقية كرار صلاح
علامات التزليغ بوجهها كفيل انو يمحي حياتي ويذكرني بخطأ الي ارتكبته معلنه اماهم ندمي على تصرفي في لحظات ضعف .

يحاجيني بنبر صوت ناصيه كانو يتوسل بيه : ليش هيج بويه ليش ما فكرتي بيه من حبيتي هلمهتلف هذا . ولج اشفتي بي بس فهميني اشفتي بي ...

يابه الله يخليك والله معندي شي ويا . بس هو كلي اخطبج واني رايدج .
امي تبجي بدموع حارقه : روحي راح ترحين لجزاة اعمالج .

يوم انتي مو تدرين بي كم مره تعرضلي . .

بس ما ادري بي مواعدج بلعرس وانتي صايره بطولي اخر مره حاجاج الولد لمن جنتي بلاول متوسط ....

يوم والله معندي شي ويا .

ابويه : هسه حتلو معندج شي ويا . ابو مبين من تهديده لنه ياخذج جنه لو يذبنه بلسجن . واني ما عندي سلطه ....

امي : راح اسالج سؤال وجاوبيني الحقيقه ...

اي والله ...

شكد يحبج ؟؟؟

ما اعرف يوم والله اني احس جاسر ميحبني احسه مجنون بيه ....

اي خوش . اني ما اكدر اشوفج بعد . او احتمال ميقبلون . او ما اكدر اوصلج . بس اوصيج استغلي هلشي ....

شلون يعني ....
اني هسه شفته من كله ابوج جيب سيد يعقد الها ما اريد هلشيخ ما اعترض . فلي اريده منج لتستسلمين اله ولتخضعين ابد ضلي ممنوع . وتذكري كلمه كل ممنوع مرغوب .

ميخالف راح اتذكر هذا الشي .
جاوبتها حته بس اطمنها . واني ما اعرف اساسا شلون راح اصير ممنوع حته بدوري راح اكون مرغوب !!!!!

كومي يلا ينتضروج ....

طلعت امشي برجليه الي تخط ورايه وكلبي وعقلي الي يصارخون ورايه لبيت اهلي لمستقبل مجهول ما جنت متمنيته هجي وبهاي الطريقه . اجمل شابه من شابات اقربائنه اتزوج حته بدون سابق انذار ولا حته لحكت اشوف اخويه واسلم عليه . زواج اشبه ما يوصف بلفصليه او الهديه .

طلعت للطارمه وبيدي جنطه بيها كم غرض اليه . وصار بوجهي ابو لواء . وكفت كباله .

وهو كاعد رجل على رجل حذائه البرتقاليه بارزه وحاطها مقابيل وجهه ابويه .

باوعلي مشمئز مني وهو يوصف لحاسر شكلي : دحك الها زين على هلنمش هذا ساحل روحك .

وجاسر يجاوبه : كل كلبي ملكها .

.
اول لقائنه اني وابو لواء جان لقاء فاشل . كرهته وكرهني واني متأكده هلنتيجه مراح ترضي الطرفين . بلنسبه اليه كرهته لان مخلي حذائه بوجهه ابويه . اما هو فكرهني لان اني مو بنسبتهم ولا من مستواهم او ما يقال حزبيه او بعثيه . بس ابويه الي جان مسجل بلبعث هيج تسجيل كلاوات ينطي اشتراك ويجي لان حزب البعث مو بحال انتماء ابويه وانما بحال الفلوس .

.
.

صعد بسياره لاندكروز وصلت لبيت ابو لواء . وطبيت استقبلتني ام لواء .
.
هذا جان اليه اول يوم ابيتهم . وجاسر ما عافني ولا دقيقه كل شويه يسال شلونج وتجاوله عيوني المتروسه دمع .

شبيج.كلبي ....

ما ردت اتزوج هيج ...

يا حياتي خو انتي تدرين ابوج ميخلينه نزوج اله بهاي الحاله * اني حنت كاعده على قنفه وهو نزل قريب عليه وشال ايدي وباسيها * ليلى انتي روحي انتي بدايه امل حب بحياتي ليلى لتبجين الله يخليج . صدكيني وعد بس هليوم راح تبجين . من باجر مستعد اخذج لاهلج ويوميه انتي يمهم وشتردين اني موجود . ليلى لج افهمي حبي الج ....

بس اهلي جاسر احسهم مهضومين ...
باعي حقهم صحيح طريقه زواجنه حانت محلوه . بس شوفي بعدين من يشوفوج مرتاحه صدكيني مراح يمانعون . ليلى مراح ازعلج بيوم ولا راح يجي يوم اكلج ليش تخلفين بس بنات او مراح يجي يوم اكلج ليش ما كويتي ملابس ولا راح اكلج اله تجين اطبخين ولا راح اكلج اخدمي امي لو تخدمين اهلي . صدكيني ليلى هاويج ....

سكتت مجاوبته .. واني اشوفه متلهف لحياتنه المستقبليه وما اعرف اذا جان وعوده صح او خطأ ..

عافني وكام مدري منو صاحله . تأخر يلا اجه . واني هيج مدري ليش كلبي كام يخبط كمت احس الدنيا ادور بيه كل شويه اريد اشرد . اريده يجي شويه من يحجي وياي احس بلامان بس من يعوفني يضلن افكاري يموتني . اجه مره ثانيه يدور عل البردات شافني وسألني :

خو مضايجه ...

عندي حجي وياك هواي ....

والله بس افرغ لان ااناس على جيه .

واني اهم من الناس جاسر . لان عندي حجي وياك ..

صار من عيوني حبيبتي بس اصبريلي خل اكمل كم شغله .

شويه واجه اخويه ايمن وهو يصيح شنوووو هو بوك خو مو بوك . وينك لك .وشراينه منططات بوجهه طلعو كلهم اله اني بس سمعت صوته عرفته . ركضت ما قبلت ام لواء اطلع : تعاي هنا زلم لطلعين ....
وخررري عني ....

تعاي ماما ميصير هيج تصرفين .....

شو هديني هددديني اخويه اريد اشوفه . هديت ايدها وطلعت لكيت ابو لواء يصيح اخذووو .

صحت بصوت عالي : وين تاخذو ويننننن .

شافني جاسر ارتبك : طبي ماكو هيج حجي .

جاسر اريد احجي وي اخويه على كتر .

ابو لواء : عاجبك هلدونيه هااااي من وره راسك هلرديه اطب دارنه ....

ايمن : ماكو غيركم رديه .

احنه اولاد رسول الله نختلف عن السراق والبعثيه .

اسكت ايمن اسكت يمعود ....

ابو لواء : هههههه وشبيهم البعثيه يول . ليكون انت شيوعي وجاي تراوينه مراجلك .

ارجل من عشره مثلك .

التفتت لجاسر وهو يأشر اله بأصبعه : خلال ثانيه تشيلو وتشمرو بره الشارع واذا رجعت ولكيتو موجود محد يلوم نفسو بعد . خلوني عاگل . ما اريد اراويك الرجوله شلون تصير من اخذك واخليك تصارخ مثل الحريم ....
عافنه وراح واني اهدأ بأيمن . اششش اذا تحبني اسكت .
شعندج ويا لج . صدك جنتي تواعدينه ...

ايمن كافي اتروح تسوي طلابه لابويه مالي خلك ...

جاوووووووووووبيني على سؤالي . صدك جنتي تواعدينه ؟؟؟؟؟؟؟؟؟؟.

لاااا انت ششوف بس ذوله ما عدهم رحمه لخاطر الله اطلع لتخلي نقطه تلزم عليه .

ما اكدر اعوفج ....

روح واذا صار شي عليكم دزلي امي سمعت . دير بالك على روحك ...

امشي وياي ما اخليج لو اعرف اموت هسه يلا جيبي عباتج وتعاي ....

جاسر : هذي مرتي واني عاقد عليها وع المذهب الجعفري بعد ليش تريد تاخذها ؟؟؟؟

مرتك شنو لك ساقط سايب ....

رادو يضاربون وايمن يهد واني بنصهم . وعيني على ابو لواء من وره الجام يباوعلنه . وجاسر بس يدافع عن نفسه ما تعده على ايمن وضل استمر يكله : مرتي اختك صارت مرتي . يعني عرضي . انت تحمي اختك من شنوووو . مني فهمني . اني رجلها اذا يصير عليها شي اني مستعد اوكف بوجهه الدنيا على حسابها . قصص وروايات عراقية كرار صلاح
ايمن : لو انت رجال جان اجيت وكتلي اني رايدها . مو اطبون مثل الحراميه .

ابوك ما خلالنه حل صارلنه فوك السنه احنه نخطب يوميه ....

انت متعرف قيمة الاخت ....

ميحتاج اعرف . ليلى عندي اختي ومرتي وصديقتي وحبيبتي . وممستعد اشوف عليها اي مكروه .

ايمن ضل شويه وي جاسر يسولفون وجاسر يحاول يقنعه بكل وسيله . لحد ما حسبت انو ايمن شويه ارتخه . طببه للمطبخ . ما قبل يدخل . توسل بي يضل وكله تعال افرحلي والله راح اخليها تعيش اميره والله هذا وعد مني .

اعتذر ايمن وكال ابويه لازم ارجعله ضعطه مرتفع ...

ليلى : شبي بابا شبي ....

ما بي شي بس لكيته ضغطه شوبه مرتفع . هسه يصير زين سويناله ليمون . دير بالج على روحج .

ايمن تره والله اني ما جان عندي شي وي جاسر ةلا حب ولا غرام ....

ان شاء الله من اليوم يصير بينكم حب وغرام . والله ليراوينه شي مكروه بيج ....
لتروح وتعوفني ....

لا ما اكدر اضل . اعصابي تلفانه. وضعي مخربط امي تعبانه يحتاج كون اروح شويه اهديهم من رحتي لساها تبجي ...

راح اجي وياك ...

ليلى حبيبتي . اكضيلي هليوم بخير وباجر تعاي حته يشوفوج اهلي . نصه صوت وكال : منو يكول هلتحفه يقبل ....

يقبل اكيد يقبل ... جاسر جاسر ... خل اروح اشوف اهلي واجي ....

جاسر : ايمن والله باجر اني اجيبها واجي بأيدي . بس خل يعدي هليوم . ويهدأ شويه والدك حته اجي اني وياكم لو متردوني ....

ايمن : هلا بيك . دير بالك على ليلى ....

ابصط عيني ....

الله وياك ....

الله وياك ...

عافني وراح والتفتت لكيت جاسر ريكه ناشف : شنو هاحجي الي سمعته ..،.
يا حجي !!!!!!

انت تكولين ما احبه لاخوج ....

لعد شنو اروح اكوله احبه ....

وليش لا شكو بيها ....

ههه انت شنو جاسر عقلك شبييييي ....

ليلى تره انتي مو طبيعيه . شو تعاي مو جاي احاجيج ...

شكوووو ...

شنو اني ضحيت بكلشي تالي تكولين ما احبه ...

جاسر اكو بنيه تكول كدام اخوها اي احبه وين صايره .

وشكو بيها ...

انت معندك اخت حته تحجي وتكول شكو بيها ....

يعني شنو الي سويتي خطأ ....

اني مكلت خطأ . بس مجتمعنه ميتقبل هلشي .

مدام مو خطأ شكو بيها ! اني ما عندي مانع ....
انت معندك مانع . اهلي عدهم مانع .....

ليلى انت كمت اشك بيج اصلا انتي متحبيني ....

جاسر تره انت فاهم الحب خطأ . الحب مو هيجي ...

شو بلا كليلي شلون بلا ...

انت طلعت من بيت اهلي مثل الناهبه....

اهااااا بدينه بهلحجي مال المعدان ....

مو معدان وانما حق يقال . الحب شي طاهر ...

وحبي الج طاهر ...

اعرف حبك طاهر ..

بس يكون بأحترام الشخص المقابل

واني هم احترمج ...

هسه غير يصبر بس خل اكمل شبيك يا جاسر . يعني اقصد المفروض انت تكعد تفهم ابويه على كيف مره مرتين تلاثه مو طاب ابوك مداهمه مثل واحد يريد يعتقل واحد .

اجيته وطردني طرد ابوج هو اصلا طابكات عنده ...
لتحجي عن ابويه هجي . ما اقبل . انت من اول يوم متحترمني . بعدين شلون نعيش ....

راح اخليج اميره ....

شبعنه كلاوات .... عفته ورحت . هو اجه ورايه . تعاي متصدكين من اكلج اميره .

هههههه خاف مثل سندريلا بس بلاسم اميره تشبع خدمه .

انت ليش هجي تحجين . اني لو ما احبج مجان اجيتج من دون النسوان بس الدور عليج الي ردتي تعوفيني من البدايه ....

اني ما ردت اعوفك بس خفت من اهلي ....

لتكولين خفت واني وراج .

بس اطلب طلب واحد ...

امريني ....

اهلي ما الكم شغل بيهم .

تره انتي متعرفينه شنو .

احنه ما علينه بهيج شغلات احنه كعائله نفكر بلحب اهم شي ....

اذا صار وسمعت ابوك متعرض لاخويه لو لابويه اشرد من بيتك والله ....قصص وروايات عراقية كرار صلاح
باع التهديد حرام تره اخلي برجليج قفاله مال مساجين ....

لو مو قفاله لو هسه جبل تحطه عليه هم ما اضل وياك اذا صار شي لاهلي ...

تقرب عليه وهو يلزم ايدي : هيج تحبيهم ....

اموت عليهم ....

باعي حبج الهم . اني ادري ومتأكد ربع حبهم انتي متحبيني . واني احبج ضعف حبج الهم .

ليش ما احبك وحد ....

ههههههه وحددد لا مو وحدددد . ما اعرف هيج احسج متحبيني هيج احسج تورطتي بيه ....

حتلو احبك جاسر منظر خذلاني بأبويه ميروح من بالي ...

واني شنو ذنبي . اذا جنتي مو كد الحب ليش تحبين ....

ما اعرف ...

صوجي يعني ؟؟؟؟؟

لا مو صوجك صوجي طبعا . بس بعد روحي ما ....
ما شنو ؟ اححي ليش ساكته ؟ ما شنو . متريدني مو ؟ بعد روحج متريدني ؟

نزلن دموعي علة خدي .

لااا لا لا لا لا . سمعي اني وعدتج عندي متبجين . واذا خلفت وعدي اطلع مو رجال . وراح هلحب استعيده . وهسه شوفي اله اخليج اميره .
ليلى انتي زوجتي بس مراح ادنالج اله لمن تكولين بلسانج تعال ونام وياي ....

هههههههه لعد مراح اكول هلحجايه اصلا اني استحي ...

خوش لعد راح تضلين عمرج كله هيج . واله تكولين احبك واريد . بس مال طلاك ما اطلك لو هسه مو تكولين ما احبك هم لو تكولين احب غيرك هم ما اطلك .

هههه خوش . مدام هيج اكتب طلباتي ...

اي كولي سالفت العجم خانوم ....

هههههه اريد بدله وصالون ....

امممممم صار وبعد ....

واريد كل جمعه اروح لهلي ....
والله اذا اهلج يقبلون ما عندي مانع اوديج الهم لمن التحق ...

اي ليش ميقبلون يكيفون اصلا . حته بالهم ع الاقل يهدأ ....

شيهدأ هو ابوج طلعنه من بيتهم يدعي عليه ...

شتريده يكول يا جاسر مثلا . والله طبت ابوك ما شفتها ...

بس كلي حجايه لسه بعدها ترن بذاني وتخوفني ...

شكلك ...

كلي . وداعه جدي محمد مراح تتهنه بيها ....

ما اعرف جاسر بس بابا حنين . ميحجي من كل كلبه ...

كلي اني قبلت على حساب زواج بنتي ميصير زنا . بس من ناحيتك راح اصير وياك و وي ابوك بيوم القيامه وراح اوكفك كدام جدي محمد على نهب بتي مني ....

كامن دموعيني يجرن ، وديني اله . خل يسامحنه بابا مكسور خاطره الله يخليك .

خاف ميقبل يطببنه .

خل نروحله الله يخليك . جاسر فدوه لعينك خل نروح ...
لا ليلى خاف يجلب بيج ....

لخاطري جاسر اذا تحبني خل انروح بس خل افهمه . واني اقنعه . والله راح اموت عليه . ....

اي ما قنعتي ابيتكم ....

جاسر ودينيييي كرهتني بروحي من وراك . اذا مكدرت والله بوكتها خفت كلش . خاف يضربوني . كلي هسه شسو ياذا ابويه هيج كايلك . سوده بوجي عليك يابه كسرت وجهك وما رحمت بحالك ....

لج شتحجين انتي ليلى شبيج ....

وديني وديني . تحرم تصير عندك ليلى مره ودني جاسر .

روحي اركضي البسي عباتج وتعاي ....

رحت ركضت واجه ويايه لواء الي حسيته خاف على جاسر عباله نضربه لو شو شنو . صعدت بلسياره واني ابالي كلمات ابويه لجاسر مرتعبه منهن .

نزلت من السياره لكيت الباب مفتوح على كيف نزفت وحدي وجاسر ولواء وحدهم بره ضلو
طبيت بوجهي لبت اهلي فاااارغ ما بي لا امي ولا ايمن ولا حته ابويه .
ياابه يمه ايمن وينكم .

رحت لجاسر اهلي وين جاسر ....

شمدريني ....

شنو شمدريني . ابوك شسوالهم . فهمنننني ابوك وين وداهم ...

ابويه شنو شنو انتي تمخرطين مو عفنا بلبيت وطلعنه ...

اييي طبعا تردون ادارون مصيبتكم . دزيتو عليهم ناس يلموهم . اهلي وين . حته مره ايمن ماخذيها يا ضلااااام . بنيه شابه موديها للمعتقلات ...

هيييي شبيج صدك تحجي انتي .

والله لا روح لابوك اليوم اذبحه . طلعت اركض .

وهو يسحل بيه . تعاااااي .

هدددددني والله اكتل روحي جاسر اذا صار شي على اهلي .

تعاي خل نصعد نساله كدامج ....

لا والله وهو النذل يكلك اني سويت ...
تره جاي تجاوزين هووواي ....

باع جاسر . اني هذا مكاني . ما ارجع وياك . اذا ميرجعون اهلي ....

ليلى تره انتي زوديتيها ها .... هسه راح اروح ارجع الج واسأله .

اي رووووح مو هو راح يكلك اني موووو ....

واني كاعد احسب عمري الي بديت كل يوم اعيشه يكبرني همه اليوم بسنه .
يا ربي مثل ما رديت يوسف لابو رجعلي اهلي . يا ربي سامحني لان حبيت بيوم من الايام جاسر .
.
.
*سوف تشتاق لها عندما تدرك ان لا احد مثلها *


يتبع...

#البارت_الثامن
__________

1986

_______

اني كاعده ابيت اهلي واسمع صوت صريخ . شويه وطبت امي تصيح . وايمن يفرفح .

اجيتهم اركض . ها وين جنتو شسولكم ....

امي : شعندج هناااا . ارتاحيتي هسسسه ارتاحيتي من عافنه ابوج وراااح . ارتاحيتي من دكايكج وسوالفج المكسره ...

شنو وين عافيه . يمه شبيج يممممه احجي ....
ولج مااااات ابوج وج ماااااات .. .

ليش منو كتله فهموووووني . كولولي منو كتله ... منو .. ابو لواااء منو فموني حبابين لخاطر الله كولولي ....

ايمن جرني لحظنه : ليالي ابويه انطاج عمره . وصاني بيج . الله شاهد .

خيي كول غيرها . كول دتجذب عليه . كول دتتشاقه وياي . جاي تعاقبوني مو . وين ابويه راح للمحل .
خيي لخاطر الله بس حاجيني ...

ايمن يصيح لمرته ودموعه على خده : محاسن دير بالج عليها ...

وخرو عني محد يكمشني . ايمن تعااال بداعة اخيتك . ابويه وين ..

يا ناس لتخبلوني . كمت اجر بشعري . واشوف امي تملخ بروحها . وتصيح سوده بوجهي عليك رحت مكسور الخاطر مكسور الجناح ... منين جتك هاي الطلابه .

لحظات ما اتمنى لاي انسان يعيشها . صعب تعيش شي براحه وبسعاده في حساب سعادة غيرك وهذا الي صار . صارت سعادتي في تعاسه عائلتي وفقدان اب لطالما عوضني بحبه وحنانه . وما اجه ابالي يجي يوم من الايام راح اخسره . ويسلبني الموت اغلى ما املك . كل الي اذكره منه بس حبه وحنانه واني حته ما اتذكر كتله احبك . حب الابويه ما عشت ويا ما شبعت من حظنه بطيشي وغبائي سلبت روحي مني .
كل الالم الي مريت بي ميجي لحظه للي صار بأيام الفاتحه واني اشوف عيون العالم تباوعلي بنظرة حقد وكأني الفاجره الساقطه الي من وراها ابوها مات . وتجمعن اخواتي وهنه يسمعني الكلام الحاد الجارح ......

واجاوبهن والله متندمه والله متندمه . والله لو يرجع بيه الزمن فلا احجي ويا والله راح اموت من القهر
..

من خلال عاداتنه بلفاتحه نوكف بلتسلسل امي وانوب حميده وزينب اختي انوب اني ومحاسن وعماتي كبل امي . بس سمعت امي تكل لزينب . لتخليها توكف ويانه . خل تروح وي رجلها شكلها ما اريده اشوفه ....

حميده : يمه منا ناس مترهم الناس تتورج علينه .

وامي تزلخ بخدودها وتصيح . راح مني راااح شيفيدني راااح بعد .

يوميه بلليل وره متهدأ النفوس اصعد فوك بلسطح . اخذ سجاتي واصعد واضل ابجي . يابه سامحني . يابه والله غلطت . يابه والله ما جمت متوقعه هجي يصير . يابه الله يخليك ارجعلي . يابه مروتك ما عندي غيرك . لمن اشبع بجي اقراله سوره قرأن واغفه ع السجاده . اخر يوم بلفاتحه . خفت من الناس الي راحت وحسيت راح اضل كدام الاتهام . اخاف من ردة فعلهن عمامي عماتي امي اخواتي فلححي الحقيقي لسه بعده ما طلعو . واني الي بيه مكفيني يمكن الومه الي حاي الوم بيها روحي تكفيني اعيش دهر كامل بحزن .
وبلفعل اول ما بده بلهجوم عمي ابو كرار : انتي شعندج هنا . رجلج هنا . اجانه بلفاتحه مكيف . شويه ويجي ترحين ويا .

مو هسه عمو * سوتي اريد اكمل كلامي واكله وره الاربعين * ....

صاح بصوت عالي : لحظه وحده متضلين هنا بعد . ترحين . ام تحسين يا ام تحسين .

امي مبوشه لان بأعتبار عده : آمرني خويه ....

هاي راضيه تضل عندج ....

كلبي وربي غضبانين عليها ليوم الدين . ومشكوله ذمتكم اذا خليوتها تجي لفاتحتي .

عافتني وراحت .... لا يوووم لا مروتج يممممه ركضت وراها طبكت باب الغرفه بوجهي .

يوووم يمه الله يخليج بس احاجيج . يمه بنيتج اني اهون عليج . يمه فدوووه روحلج فتحي الباب يمممه يووووم حبيبتي بس خل احاجيج ....

سحلتني زينب تعاي وياي .. وخري بس خل احاجيها .

سمعيني ...

زنوبه بس خل احاجيها حبابه انتي حاجيها ...

اسمعينيييي ....
صفنت عليها ودموعي تارسات عيوني ونازلات على خدي واناشغ وهيه تكول : هسه الوضع حرج خلي الايام تمر تعاي واعتذري منها وره الاربعين .

خل اضل هنا . زينب ما اكدر اروح ....

سمعيني زينب روحي . هسه صعبه وحته الناس تضل تسولف بيج وبسالفتج وكل ساع واحد جارحج بحجايه . اسمعي مني ....

اني ما حبيته والله ولا عشكت ولا سويت شي غلط ويا . والله مسويت شي والله ....

روحي وبعدين نحجي ....

فهمتني انو جاسر جاي للفاتحه وطاردينه عمامي ومتفقين ويا اخر يوم الفاتحه يجي . وهو ما حذب خبر اخر يوم الفاتحه اجه . طلعت وره ضهري احس الف طعنه وطعنه . استحيت اطلع كدامهم رافعه راسه . طلعت واني شارده ومقهوره ومجروحه ومنزله راسه . صعدت بلسياره بلوره منزله راسي حته ما سلمت واني ابجي واندب حظي النحس . خابت امالي انو نجي واراوي اهلي جاسر يحبني ومقدرني .

ما عاش حته يشوف هاي اللحظه . واني هم اسأل نفسي يا ترى اني ليش ضامنه جاسر !

.
.
.
في السياره .....
.............
ما حجه وياي وما تنفس . نهائيااااا . ودخلني للبيت . توافدت ام لواء : البقيه بحياتج ماما ...
حياتج الباقيه خاله .....

جاسر : تعاي خل نصعد بغرفتنه . رحت ورا امشي وعيوني مورمات وخشمي مورم . اول ما طبيت شفت الغرفه جديده حلوه . صارت بوجهي المرايه واباوع لروحي ضليت املخ بخدودي . ابويه صار جوه النراب واني فرحانه بلغرفه .

ما حسيت على جاسر شبكني : لج موكافي راح تموتين ....

وخر عني كله من وراك . كله بسببك وبسبب ابوك . والله كلبي حس . والله جان كلبي ناغزني . شفت من كتلك اني نو مال تضحيه . مو كتلك ما عنظي قدره خساره اهلي . وك والله احبهم مو بيدي ....

رفع وجهي بأيده : كافي من يوم الفاتحه لسا واني ماكل كلبي عليج .

ما اريد اشوف ابوك ....

ابويه شله دخل يا بت الناس ....

ابوك اني شفته حاط الحذاء بوجه ابويه . وخر عنييي وخررررر . كله صوجي وخررر ما اريدك بحياتي .

ميخالف اني راح اعوفح . باوعيلي . انزل اعوفج بس لتبجين .
انزل وعوفني مالك دخل بيه .....

عفتها ونزلت واسمع بجيها . وابويه يكلي : ها صار وياها ....

يابه ما اعرف . صوجي اني هو صوجي هيج تزوجتها . لو مخليها اضل اخطب بيها لمن يملون . اكو الف طريقه بس اني تغوبرت ....

انطيها وكت لتلح وياها .....

لا ابد ما الح . عايفها على راحتها ....

رجعت للغرفه ما يقارب ساعتين فتحت الباب واشوفها نايمه ع الجربايه وبصفها خاولي صغيره داحسته جواها . جوه ايدها بي بلال عرفته جانت تبجي وكاتمه صرخاتها . حست بيه اجيت . كعدت .

اكدر احجي وياج ....

لا راسي يوجعني ومالي خلك ...

مو اني السبوع الجاي انزل وانتي تدرين صارلي هواي بحجه رجلي . فدوه لعينج خل احجي وياج حته من ارجع ان شاء الله نكون متغقين .....

سكتت وحسيت من سكوتها تريد تسمعني ....
ليلى الي صار احنه ما النه ذنب بي . هذا امر الله وقضاءه ..

كوله صوجي .....

اسمعيني خل اكمل لتقاطعيني .....

يعني هو الله خلانه سبب ما اعرف شلون . بس اني مستعد بس تهدأ الامور شويه وتمر الايام اخذج من ايدج ونروح نزوره بلمقبره * زاد بجيها وهيه تسكع المقبره *

ونروح اني وياج تزورين الحسين . وارجعج لأهلج واني وياج نعتذر منها . واني احلف الها مجان شي بيناتنه . كل ما بلموضوع اني هددتج اذا ما قبلتي اسجن اهلج . ع الاقل يبرد كلبها منج .

واذا سألتك شنو السبب تسجن اهلها ....

انتي ما عليج بلموضوع . خليها ورايه . ليلى اني بعد يومين انزل لازم اشوفج مرتاحه مو تالي تعبي وحبي الج اجيبج لبيتي واعوفج وادري بيج ميته قهر .

مو بيدي جاسر شي اكبر من عقلي . ما اكدر اكول الله يرحمه . متجي بلساني ما اصدك ابويه مات والله . ما اصدك اني السبب . ما اصدك امي متريدني بحياتها ... جاسر خل نروح هسه وتحاجيهم هيج مثل ما كتلي . ع الاقل احظر اربعين ابويه ....
صدكيني مراح يقبلون وعمامج يدرون بيه احبج لازميني من ايدي الي توجعني . وراح يصيحون واحتمال يجاوزون واني ما اتحمل . واني اساسا ما اهتم بعمامج . اهتم بس بأمج واخوج واخوتج . اريد احجي وياهم وحدنه .

مو هم عمامي لازم يسمعون . خواتي خطيه يفشلوهن من ورايه ....

ميفشلوهن اسمعي مني . وارتاحي ....

بعد يومين من الكأبه الي عاشتها ليلى واني فارش فراشي بلكاع ونايم وهيه ع الجربايه . نزلت لدوامي وصيت امي وابويه ولواء اخويه ليلى بأمانتكم خاف اموت خاف يصير شي لترجعوها لبيت اهلها اله لمن تأمون ميسون الها شي .
وصيت امي : يوم الله يخليج طلعي ليلى ورايه اذا احتاجت شي اخذيها خل تزور .

رحت سلمت عليها وهيه بقلق كالت : دير بالك على نفسك . ما عندي قدره بعد اضل وحدي . بس انت ضليتلي ....

هههههه لا تخافين ابليس ما يخرب عشه . راجعلج ان شاء الله ....

عفتها غاركه بدموعها ما اعرف شنو جان سبب الدموع هل يا ترى هل هو اشتياق ام حزن .....

.
.
.
ليلى ........
........
خروجه من الباب خله قبضه بروحي . وما افكر الا هو الوحيد الي ضل اليه . قد ما يكون اعوض خسارتي باهلي ويا . حسيت بفقدان ابويه اني وحدي محد ويايه حته الناس درت بيه اني ضعيفه . شايفين احساس واحد مكسور اني هيج جان احساسي بفقدان ابويه . وجنت محتاجه جاسر يوكف ويايه احتاجه يلزم ايدي ويكودني لطريق وعر طويل . وبلاخص كدام ابو لواء . الي كمت اشوفه عدوي الاول والوحيد ....

وخلال فتره نزوله الي ما اعرف شنو وشكد وشوكت ينزل . وضاله منتظره بغرفتي حبيسه الغرفه . تجي ام لواء . ماما تعاي نزلي ويايه ....

خاله والله ما اكدر ....

مو انتي هيج حتصيرين ضعيفه ايمان . هذا امر الله وقضاءه يووم ...

ادري خاله بس اني سببه ... كله صوجي ....

حياتي اطلعي من هلعيشه الي مقوقعه روحج بيها . واقريله قران صليله صوميله .. يا بنيتي بدل البجي . البجي ميفيد . صدكيني بس يهلك العيون . وابوج راح يم رب كريم راح وهو ما ضالم احد .

الله يرحمه يا امي انزلي وياي واعتبريني مثل امج . والله احتاج احد يرد الوحشه عليه
هاج شوفه عينج جاسر راح وابو هم ويزن صاير رجال براسي . عنودي . ع الاقل اني وياج بنات نسولف ......

خاله عبر اربعين ابويه وجاسر ما جاي شوكت يجي ....

الوضع مخربط ماما والقوات العراقيه مستنزفه كل طاقاتها وحيلها . فأكيد مو مال اجايز ينطونه ....
وبأستمر الوضع ومحد سأل عليه من اهلي لحد ما صار شهرين كتملات ويوم واحد اجه جاسر .

اول ما اجيه كيفت . صعدلي طاير . شلونج عيوني .

الحمد لله ... انت شلونك ....

مشتاقلج واحس الزمن صار شطووووووله مسافات شكبرها . محتاج اشوفج يوميه . كرهت الحرب وكرهت العراق وصدام وايران وشكو واحد اله يد بلدوله يبعدني عنج .

كمت اركض صبيت الغده وكملت . وهو تغده فرحان . واني كلبي مفرفر منتظرته ياخذني لبيت اهلي وينفذ اتفاقه وياي بس فاجأني برده : مو اليوم والله تعبان خليها على باجر ....

تحطمت امالي بشوفه اهلي . وهليوم راح يصير بطول سنه بس اريده يخلص . وبان على وجهي القهر وهو يكلي : لتضوجين باجر كلبي اخذج والله ...

وبنفس النشاط كعدت ثاني يوم من الجربايه وهو جوه فارش فراشه ونايم .

جاسر جاسر يلا كوم خل نتريك ....

حياتي شبيج والله جسمي كله مكسر مكعدتني بثمانيه مو راح اموت والله من التعب ....
جاسر حباب كوم خل نتريك خل اروح لاهلي ....

اوووف استغفر الله ....

جاسر لتتأفأف الله يخليك اني منتظرتك يوم يوم ...

تره اني هم مشاعر . عاد كولي مشتاقتلك . كولي احبك . شو انتي بس تردين مني . كلشي ماكو ....

صفنت عليه هذا شيحجي . هذا اساسا ما حاس بيه ولا عايش ناري : جاسر تره انت كلشي مسويت خاف عبالك ؟؟؟

لا والله ....

شنو لا والله . ليش ابو منو الي مات ؟ ابوك لو ابويه!! ليش منو الي تفشل اني لو انت!!!!! منو الي نزل راس اهله اني لو انت!!!! منو الي انطرد من بيت اهله اني لو انت!!!!!!!! وكل هذا واني ممسويه شي . زين اذا اريد اشوي شنو شسوي بعد على شنو اسكت ؟

حبيبي انتي صار عندج عالم ثاني يا روحي .

يعني قصدك اسوي مستقبل اليه على حساب اهلي جاسر لتخبلني ....

حياتي صار بيج خير ودللي حظري روحج حته اخذج . بدون ما ادخل وياج بنقاش . ينزل دموعج ....
كمت اركض احظر بروحي وهو كمل لبس وراح وياي . بوجهي دعيت يا رب سهل امري . يا رب خليني ارجع مثل كبل لحياتي .. وفجأه انفتحت على كيف ( عاده امي من يجي غريب تفتح الباب شويه وتكول تفضلو ) : منوووو ؟؟؟

جاسر : اني خاله جاسر ممكن احجي وياج ...

شتريد ؟؟؟

يوم خلينه نفوت الله يخليج الحجي مو مال شارع ...

ماكو رجال بلبيت يوم .....

يوم الله يخليج اني زوج بنتج وبنتج وياي بلسياره راح اتموت الله يسلمج خل تحجي وياج.شويه ...

معندي بنيه . ليلى ماتت من زمان ....

صعد بجي ليلى وبدت تحجي وهيه ع الباب : ليش هيج يوم ليشش .. شسويت هيج تعاقبوني . ليش يوم حبابه . خل احجي وياج ....

استدعاء عاطفه الامومه للعلويه ام تحسين جبرها تسمعها فتحت الباب اكثر : طبو ....

اول ما طبيت شبكتني واني ابجي وهيه تنحب : ليش هيج . راح من وراج . راح لا شافج ولا تهنه بيج . ليش يوم . وج ليشش . ويعله صوتها بلبجي . حاطته شيلتها على حلكها وهيه تبجي واسمع اهاتها الي تغرس بكلبي خنجر .
ضليت ابجي وهيه تبجي . وجاسر واكف بعيد ويسمع حجي امي وهيه تكلي : ما رادج ترحين بيد ناس ما ترحم . لان لو رادو يدوسون عليج جا داسو وما اهتمو ...
عله صوتي بلبجي وجاسر يحلف الها . خاله مدامني اشتم الهوى مراح اخلي واحد يدنه صوبها لو يأذيها بكلمه .

بعيون ذابله ورموش متناثره و الم نفس اكبر من انو اكتشفه : اذا صدك تحبها دير بالك عليها ...

خاله والله اخليها بعيوني .

التفتت اليه ليش ما اجيتي بأربعين ابوج رحنه للمقبره ....

يوم خفت منكم خاف متردوني ....

اااااااه يا امي لو تدرين شبيه من نار جان عذرتيني ...

حقج ماما حقج اسفه على كلشي سويته بيكم ....

*
دامت كعدتنه عد اهلي وامي الي بين بيها الكبر فجأه وضهرت عليها علامات الحزن والشحوب . وهيه توصيني بحياتي دير بالج . فكري زين . اتقي الله . خلي الله سند الج . لتركين صلاتج . التزمي ابيتيج . وراعي رجلج . هاي حياتج وانتي اختاريتيها اتحمليها وعيشي وياهم . وضلت هواي وصايا توصيني ومنها انو ما اترك مذهبي وهذا الي جان مخوف امي تتوقع جاسر من ذوله المتهجدين هو اصلا ميعترف بلدين وما عنده هيج ميول يعني مو مال يحاول يتناقش بلدين .
وعرجت عن موضوع البيت . وكامت تعيش مستقبل كامل اليه : يمه لمي رجلج وطلعو لتضلين وياهم عايشه بنفس البيت يمه . لتضلين وي ابو لواء ..
لتضلين همج الاكل واللبس تره الامام علي يكول بنادم اذا جان همه بطنه قيمه شيطلع منها .

واستمرت علويه شكو وصيه توصيني كأنو بعد متشوفني نهائياااا .

صار يوم بعيني والله شتردين اسويلجيا ....

بهذا اليوم ماسألتني اذا ما جان صاير بيناتنه تقارب جنسي او لا ؟؟!!!
واني هم ما وضحت الها .
.

لكيتها جاي تسوي مطبك باكله اكلت من ايدها اطيب اكل بلعالم . وكتلها : يوم صدكيني لو افر الدنيا كلها ما الكه طعم مثل طبخج شكد طيب ...

هاي سويتها بثواب ابوج جان يحبها سوده عليه ...

.

الله يرحمه بابا . راح وما شبعانه منه . حته ما لحكت اكله شكد احبه راح واني مقصره ويا بكلشي ....

.

ادعيله يمه اذا تحبي ما يريد منح تبجين هسه يريدج تدعين صليله صوميله اقريله قرأن هليطلع من ايدج ....

صدكيني يوم لحظه وحده مراح عن بالي نهائيا ولا راح يروح ...
.
رجعنه بنفس اليوم خلال ٣ ساعات . جاسر ما حجه الي جنه متفقين عليه . لان هيه بأعتبار كلب والده ما اتوقع تنطلع عليها جذبه . فهيه اساسا تعرف الحقيقه بدون كلام . وتقبلت وجودي بخطأي وبأعترافي انو اني غلطت .....

.
.

.
* انا كحيلة سلف مالوك للغمان *

_____________

يتبع..