شذر :
من خابرتني سمر صوتها جان ماعاجبني خفت صايرلهن شي ..
بسرعة خابرت نسر جان بالمحلات اجه اخذني ورحنا
هو ماقبل يدخل ..
گال رايح يم حسام للعيادة على ماتكملين خابريني ..

دخلت البيت جدو شفت الوجوه كلها ماتتفسر..
سلمت ع بيبي وسألت ع البنات ..
ردت بيبي " بالغرفه . هنودة بساعة عصبيه حجتلهن كلشي عن امج وابوج .. وسحر تخبلت ادخلي هديها اذ اجه جدج وسمع تصير مشكله "

دخلت جانت عيونها وارمة ..
تلكتني سمر سلمت وسألتني " هالحجي صدگ.. يعني ماما اخذت بابا من خاله سماهر"

عاطت سحر " اسكتي ولج من كل عقلج تصدكين وهاي اصلا وياهم صافه شي طبيعي تگلج اي صدك "

اتقربت منها ..
" حقج تسدين اذاناتج عن الحقيقه لان انت راسمة صورة حلوة عنهم براسج.. ولان بابا مااذاج مثل مااذانا"

ضحكت" وشسوالجن بله لو لان ماخلاج تتزوجين حبيبيج وانت شسوالج احجي "

رديت بصعوبة وبالگوة انطقها " راح اگلج ليش انهزمنا رغم ماردت اوسخ الصورة البالج . بس بابا من طفولتنا وهو يتحرش بينا وانت جبيرة وتعرفين شنو تحرش ..
انهزمت منه بعد ما حاول يعتدي عليه واجيت لهنا والوحدي اخذوني ناس غربه ومرة جبيرة صارتلي كل اهلي ..
لگيت وراي ثار من عمامي وخوالي والسبب ابوي كان خاطب خاله وعلى وشك زواج.. بس ماما اخذتة وانهزمت .. انت عقليها يعني بنت عم وابن عم حبو بعض ويردون يتزوجون ليش اهلهم يرفضون .. لازم اكو سبب قوي "

ضحكت بصوت عالي " وهاي اخر اختراعاتج .. گولي الثانية صدگتها الاولى منين جبتيها لو تردين تغطين عارج وانت الثانية تغطين شكلج ونقصج .. انتن اثنينجن مريضات .. الله يحاسبجن على كل كلمة گلتنها بحق بابا . عمرة كله ماباوعلي بنظرة موزينه ابد ليش ؟؟ ليش بس انتن ؟؟ هااا احجن "

ردت سمر " لان انت من صغرج وكحة وتاخذين حقج مو مثلي استغل وجهي وضعفي "

ردت " گومن منا لا وحق الله ماتشوفني بعد .. كافي متحملة وكاعدة غصب عني .. خلي خالج ياخذني الامي خليه يحبسني يمها مااريد ابقى هنا "

صارت تبجي .. ردت اخذها الحضني ضربتني ودفعتني
اشرت السمر نطلع..
عرفتها ماتصدك ولا راح تصدك وتشوه الصورة الحلوة الراسمتها بخيالها عن اهلي ..

سألتنا بيبي " هااا بشري شلونها "
رديت " تتعود شوية شوية وتنسى "

بقيت شوية بين مااجة نسر اخذني ..
طلبت نروح الخاله مناك اشوفها ونباركلها ..

رحنا البيتهم وهاي اول مرة اروحلهـم..
شافتني فرحت ..
وعمو مختار هم رحب بينا واصر نتعشا يمهم ..
كانت طايرة من الفرح بسبب حملها وعمو ميخليها تشيل اي شي بسرعة يروح ياخذة منها ..
حتى موصيلها يگول على غساله ماعين حتى ماتتعب
وخاله تضحك :
" تحجي صدگ مختار والله اذا جبتها مااغسل بيها .. اذا مو بيدي اغسلهن واشطفهن مااعرف "

من طلعنا بالسيارة گلتله " شفت شلون يحب خالة ويخاف عليها .. الله عوضها خطية "

سحب ايدي وباسها " دخل يجي ابني وادللج دلال اصلا اشيلج من مكان المكان "

رديت " يعني متدللني لا اذا اجاك ولي العهد لو فرضنا مااجه "

ضحك " طبعا لا انت متربعة هنا اجة او مااجة تبقين اعز وحدة عندي "
بعدها تحولت الضحكة الى تنهيدة ..
"انت ادعي تطيب عذراء وتصير زينة كلشي مااريد بعد من اشوفها تذبل اتدمر .. لو ملوكه كلما تكبر اتدمر واني اراقب حركتها ونطقها . هاي كبرت والسانها ثگيل ورجليها ماتمشي عليهن اريد اخذها للخارج بس تطيب عذراء بلكي عملية شو شنو يسوولها "

رديت " ان شاء الله انت بس خلي ايمانك قوي وربك اليحلها ان شاء الله "

وصلنا البيت ..
سمعنا خاله تحجي بالتلفون ..
" الصوج بيج انت .. زحتي النعمة من گدامج ولج ابني راد يموت بسببج لو ماالله ستر .. شلون ترديني ادخلج بيتي مرة ثانية "
من سمع الكلام نسر عاط " منو هااااي يمة ؟"

يتبع .…

///// #البارت احدى وســـبعون /////

ج2


من سمع الكلام نسر عاط " منو هااااي يمة ؟"

بسرعة طبگت الموبايل " هااا هاي هديل بس ابد ماانطيتها مجال والله "

رد " وليش اصلا تحجين وياها "

ردت " شمدريني بالاول امها حجت وياي ودور اخذتها من امها تبجي وتگول اعيش خدامة بس اربي بنتي وكلشي مااريد "

هز ايده " مافكرت ببنتها قبل .. اصلا وجودها من عدمه نفس الشي .. احذفي رقمهم وبعد ابد لاتردين عليهن اذا خابرن "

دخلت لجوة جانت عذورة گاعدة..
" شلون صرتي ؟"
ردت " شلوني ماادري اشو مااحس بتحسن "
رديت " قابل ترديها بسرعه ماصارلج هواي من بديتي العلاج .."

دخل نسر وراي بعصير الفواكه .. غمضت عينها
" لاحبابين مااريد "

رد " مو بكيفج "

تركتهم وطلعت اشوف البنات ..
جانت دنو تلعب وي ملوكة ..
شافتني ابتسمت " ماما شوفي ملوكة تضحك "

گعدت يمها احجي وياها والعب .. صايره تنتبه وتضحك
اجو بيت عمهم وقصي وياهم ومرت قصي ..
اجو يشوفون عذراء ..

كعدنا البنات وحدنا واجت بيداء هم دايما تجي بعد العشا ..
حتى نسر طلب منها ترجع يمنا وتاخذ الطابق الفوگ كله الها هي وولدها ..

سألت رغد على هديل.
" اگلجن مرت نسر الثانية صدگ طلگها ؟؟"
ردت بيداء " اي صدگ "
ردت " وهاي بنتها خطية شلون تحرموها من امها "
ردت بيداء " ليش شامريها بالشارع غير يمنا ومحد مقصر عنها "
ردت " مااعرف اشو احسها صعبه ام تنحرم من ابنها ..
ماگلتلجن اختي حامل وراح تنطيني الطفل .. گالت ولد بنية هو الج .. لان عندها سته وهذا صار بالغلط "

سألتها عذراء " لعد خطية شلون تاخذيه وتحرميه من امه "

ردت " هاا لا هذا الوضع يختلف . اصلا هي بس تجيبه تنطيه الي وهي گالت اريد اذبه واعقد .. گلتلها جيبي وانطيه الي وعقدي ليش حرام تذبه ع الاقل اني اربيه "

سألتها اسراء " مو ع اساس مرت عمي تريد تزوج قصي"
شهگت " بيش طالباته يمة .. اصلا گلتلهم احرگ روحي اذا فكر يتزوج .. كلتلهم اخذله بنت اخوي عمرها 30 سنة ماقبلوا گالوا خاف بيها حرام وحلال ماندخل بهيج امور .. تحلم ازوجه غريبه وتاخذه مني ماادري شذر شلون قبلت "

سألتها بيداء " يعني اذا زوجتيه بنت اخوج ماراح تاخذة منج وخاصه هي اصغر منج "

ردت " لا ع الاقل هاي بنت اخوي مو غريبه وولدها ولدي يعتبرون مو مثل الغريبه "

ضحكن البنات " والله رغد مانعرف شلون تفكرين هي بعد الضرة مرة سواء قريبه او غريبه "

بسرعة قلبت الحجي عليه اني ونسر وصارت تگلي انت شنو مربية البناته روحي عالجي نفسج وشوفيلج طفل

اشرتلي عذورة .. " شذر مشايفه علاجي وين اريد اخذه"

كمت بسرعة وراها .. واسراء تركتهن بقت بس بيداء يمها صرعت راسها بالسوالف .
ودور تگلها ماتفكرين تتزوجين المن باقيه هيج ..

ردتها بيداء " يااا شبيج دادة يعني من جنت شابه مفكرت اتزوج هسا لمن ابني بطولي وعلى وشك زواج افكر اني بالزواج "

لزمت راسها عذراء " يبوووو الله يساعد قصي عليها "
اجت رساله الموبايلها ..
فتحتها ابتسمت ..
سألتها " شنو سر هالابتسامة "
ردت " تعاي شوفي هذا الرقم كل يوم الصبح يدزلي صباح الخير وبالليل مساء الخير او تصبحين على خير وابد ميحجي غيرهن ورغم ماارد عليه بس مستمر شله خلگ "

رديت " احم احم معجب سري"
ردت " لو يدري بيه على حافه الموت مايتورط "

عطت بيها " اسم الله شنو هالحجي ليش هيج متشائمة"

اتنهدت " لان تعبت "
رديت " وين ذيج عذراء الكلها حيوية.. "
ردت " وج ماتحمل الالم .. يعني بس ما اخذ مسكن اتأذى ساعات احس حتى المسكن مايمشي بجسمي بعد"

رديت " والمسكن هم مو زين هواي "

طلعوا بيت عمهم ..
نومت ملوكة وفرشت الي والنسر بالاستقبال ..
سحبني الحضنه وغفة على صدري..
" اشتاقيتلج واشتاقيت الريحتج والبيتنا وگعداتنا .. من يوم مرض ملوكة واني ماشبعان منج .. "

باوعتله " انت قربك مني وانفاسك من تنام يمي كلش كافي "

ابتسم " بس اني طماع مااكتفي بالقليل كلما تنطيني اگلج هل من مزيد "

ضحكت " وشذر ماتگول لا النسرها "

ضحك " يعني معناها اجاني الضوء الاخضر "
هزيت راسي سحبني الحضنه ..

وصارت اجسادنا تتلوى .. فأبحرتُ مستسلمة للمسـات محبوبي .. فلم اكن قادرة على كبح ذلك البحر الهائج الذي جعلني اغوص بأعماقه ..
واتلذذ به كأنه قطعة سكر تذوب بطرف لسانـي..

عذراء :
بكل مرة اخذ العلاج اتأذى اكثر .. صرت ابجي واعيط
بس حسام ماتركني ابد…
رغم دوامه وعيادته .. لاحظت اهتمام بيه مو طبيعي
وفهمت ليش كان يحاول يبعدني عن معتز سابقا ..

كان دايما يحذرني بطريقة غير مباشرة بس مااسمع منه واصده ..
لان كان حبي اعمى او يمكن حكمت عليه بسبب مريم

قررت ارجع للدوام لان احس البيت يخنكني بس بأيام العلاج اخذ اجازة احسن ..

داومت الكل تحمد السلامتي ..
گاعدة بالمختبر رن موبايلي ..
باوعت هذا حسام ..
رديت " الو "
رد " شلونج اليوم ؟"
رديت " احسن "
رد " لاتبقين بالبيت اطلعي للحديقه الصبح اشتمي هواي تمشي لاتبقين نايمة "

رديت " اي هو هم هيج .. حتى داومت من الضوجة "
رد " داومتي شنو ؟؟ وين انت هنا "

ضحكت " شبيك مستغرب ؟"
رد " ليش داومتي مو اخذتلج اجازة بعدج ببدايه العلاج وتعبانه "
رديت " مو كلتلي جاي نتخطى العلاج بصورة ممتازة واشوفج متحسنه اشو غيرت كلامك بس لاتكذب عليه دكتور ؟؟"

ضحك " غلبتني "
سكت
صحت الو
اتنهد "وياج . يلة شوية واجيج لاتعبين نفسج "

التهيت بالشغل ساعه اكوم وساعه اتعب اكعد البنات ولولد ميخلوني اتعب ..

قبل مينتهي الدوام اجاني ..
" يله كافي انتهى دوامج "
رديت " ليش منو نهاه ؟"
رد " اني "
ضحكت " لازم انت المدير وماادري "
رد " خلينا نطلع "

طلعنا بالطريق لعبت نفسي ..
اشرتله يوگف ..
نزلت بسرعه بطرف الطريق استفرغت ..
اجة وراي بسرعه جاب بطل مي غسل وجهي وحلگي
بقيت صافنه عليه وهو وجهة اصفر ومتوتر .. يغسل بوجهي ويگلي شتحسين شبيج ؟"

قطعت صفنتي بسرعه وابتعدت عنه ..
" مابيه شي يمكن لان جعت "

رد " ليش ماگلتي من سألتج .. امشي اغديج "
رديت " ماكو داعي هسا نروح للبيت "
رد " مااقبل نقاش "
تعصبت " انت ليش تلح حسام .. ترى اهتمامك زاد عن حده "

باوعلي " ليش شسويت ؟؟ غير بنت عمتي قابل غريبه انت "

سكتت عنه ..
رجعني للبيت .. دخلت هو راح ..
شافتني شذر " خير شبيج وجهج تعبان "

رديت " اي شي اكله من الجوع يمكن "
ردت " اي هسا دقايق واصبلج "

دخلت لجوة سمعت ماما تحجي بالموبايل " اي لاتخاف هسا اخليها تتغدا وترتاح "

شافتني " هذا حسام يكول خلي تاكل.. صدك متخربطة اليوم "

رديت " لا مابيه شي "

غسلت وبدلت .. احت شذر شايله صينية بيدها
" يلة تعاي سويتلج دجاج وخضار مشوي وضوگيه يخبل طعمه .. "

باوعتلي " شبيج ضايجة "
رديت " عطت بوجه حسام "
ابتسمت " مو جديدة عليج من يومج تعيطين عليه للمسكين "

اتنهدت " شذر مااريد احد يدخل حياتي .. جربت مرة وتبت بعد مااريد "

سألت " ليش حسام دخل حياتج ؟"
رديت " لا بس تصرفاته واهتمامه واضحات وصرت اخاف من اهتمامه الزايد لايأثر عليه .. "

سألت " ومن شنو خايفه بلكي الله يعوضج "
رديت " ومن يكول راح اعيش .. واصلا مااريد احس بشفقة "

ردت " ليش صاير متناقضه بكلامج .. مو كلتي ببداية دوامي هو مهتم وكل شويه جاي ويسأل .. يعني معناها شاريج من زمان "

رديت " قبل جان هذا رأي بمعتز وشنو الصارر؟"
ردت " يووووه عذراء صايرة كلش .. دتعاي اكلي ولاتفكرين .. حاولي تنطين النفسج فرصه يمكن اذا حبتيه راح تقاومين وتتحدين الخاطر حبج "

سكتت رغم اعرف حتى لو انطيته فرصة راح تكون نهايتنا مجهولة .. اما الموت او الرفض ..
مستحيل نسر يوافق بعد السووه معتز ومريم واخيرا هديل ..

يوم عن يوم تزيد الجرعات وتعبها ..
وبدأ رحلة التحدي ..
بيومها جنت اسبح.. غسلت شعري .. وكملت فتحت عيني شفت الگاع مليانة شعر ..

تخبلت لا بل اتهسترت .. صرت اعيط وابجي ..
اجوا كلهم ..
اسمع صوت نسر يحجي " عذراء شبيج احجي افتحي الباب ليش ماتحجين "

شذر حجت وياه " روح انت منا خاف تستحي تفتح الباب .. "

شذر :
بقينا اني وخاله صحنا عليها " افتحي الباب عذراء "

فتحتها وهي لافه نفسها بالمنشفة وتبجي ..
" باعوا باعوا للگاع .. راح اصير مثلهم مووو . مو گالوا ماتصيرين صلعه اشو وكع شعري .. شعري الكنت اخاف اقص اطرافه ومحافظة عليه تالي وگع وگع "

سحبتها بسرعه وطلعتها للغرفه ..
لبستها ملابسها .. وصرت اهدأ بيها
" اهم شي تطيبين بعدها كلشي يتعوض .. شعرج يرجع بس الصحة شيرجعها .. حجيت وياها هواي وهي ساكته الى ان نامت .. غطيتها وطلعت..

شفت خاله بالصاله تبجي..
رحت للاستقبال جان نسر مدنگ ومخلي ايده ع راسه
تقربت منه گعدت بصفه وحضنته ..
" عادي تصير .. المهم هي تطيب "

رد " ماتتحمل ادري بيها . الاهم عندها شعرها من صغرها وهي تبجي اذا امي گصت شوية منه وليلها ماتنام .. مو دور هسا كبرت وشعرها الجوة خصرها راح يروح كله .. ماشفتيها بالمستشفى تتخبل من تشوف وحدة صلعة "

نزلت دموعي وياه لان اعرف عذورة شعرها عندها اهم من حياتها ..

بديت اخيطلها احجبه بس للراس مثل الكب .. واخلي بيهن شغل لو شذر ..
حتى تلبسهن هنا بالبيت كملتهن وضميتهن الوكتهن ..

بيومها خابر نسر الحسام وحجاله الصار ..
گالة عادي تصير خليها .. تضوج بالبدايه وبعدين تتعود

بس عذورة انتكست وحتى اكل ماقبلت تاكل .. صار عندها وهواس انه بيوم تگعد وتباوع الروحها بالمراية تشوف نفسها صلعة ..

عذراء :
گمت اتجنب حتى المرايا ومااشوفها .. اخاف بيوم اگعد وانصدم بشكلي ..
حواجبي رموشي كلها بدات تخف ..

اجة موعد الجرعة .. الدكتور كان يزود بالجرعات
او يكثف ..

وهم صادفت بداوم نسر . طلب حسام ياخذني وهو يجي ورانا ..
اجة حسام اخذني ..
صعدت سلمت ودرت وجهي ..
سأل " شنو متزاعلين ؟"
رديت " لا ليش ؟"
رد " اليوم ماكو ابتسامة بوجهي "

رديت " مالي خلگ شوية "
سحب وجهي بيده .. وهاي اول مرة يلمسني ..
بقى يباوع الوجهي ويبتسم ..
غمضت عيوني " يلة شفت ارتاحيت كافي "

رد " وجهج صاير يخبل وصافي شنو جنتي متحفين حتى شوارب عندج قبل "

رديت " لا تحاول تضحكني لان ماكو شي يغير الحقيقه "

رد " وربي تخبلين طالعه .. اصلا انت الله متفنن بخلقج وبكل حالاتج حلوة "

رديت " شنو هالمجاملة الغريبه شنو شفتني عيوني خضر مثلا ؟"

رد " ليش منو گلج العيون الخضر حلوة . الله مايخلق الانسان الا بأبهى صورة .. اكو حنطاويين وحلوين بعكس البيض والملامحهم جامدة "

باوعتله " شوكت تمل "
صفن بوجهي " ماامل الاخر عمري .. عذراء انت حاسه بيه مووو "

درت وجهي " خلينا ننروح "
رد " لا مااروح اذا مااحجي هالمرة .. كافي تعبت واني سنين طويلة منتظر.. عرفت بيج انخطبتي المعتز وسكتت وكلت الله ماقاسملي .. بس بعدها الله رجعج الي .. شلون الله قربج مني وترديني ابعدج عني .. حتى لو ماترديني اني راضي اصبر الى ان انول "

رديت " تتعب "
رد " على گلبي مثل العسل "
رديت " اذكرك عود "
ضحك ..

شذر :
التهينا بعذورة ونسينا ملوكة وعلاجها ..
صرنا ناخذها اني وياه .. يسوولها علاج طبيعي ..
الدكتور من شافها كال هواي متحسنه وتنتبه صايرة وتحرك اطرافها بس هي حجي ماتحجي والمشي ماكو..

من رجعنا گال نسر عندي شغل قريب من بيت خالتج ترحين تشوفيها ..

ماگلت لا اصلا فرحت ..
رحت الها .. فتحتلي الباب مروة ..
دخلت شفتها نايمة بالصاله ع التلفزيون .. زينب بالغرفه بس مروة يمها ..

سألتها عن وضعها ..
ردت " زينة الحمد لله بس ظهري ياذيني "
سأآتها " لا تتعبين "
ردت " لا وين خطيه مختار مياخليني حتى عندنا ملابس گال لاتغسليهن من اجي وحلفني .."

گمت خليت ملوكة يم مروة ..
ماقبلت خاله بس اصريت .. غسلت الملابس ورتبت المطبخ والبيت ..

دگيت الباب ودخلت الغرفه البنات ..
شفت زينب گاعدة ترسم ..
باوعت الرسمها يخبل ..
سألتها " هاي انت رسمتيه "
ردت " متشوفيني داارسمها يعني منو ؟"

رديت " عبالك حقيقه . هاي منو ؟"
ردت " ماما "

رديت " حلوة "
ردت " هي ماتشبهها بالضبط بس هيج احاول "

رديت " بالعكس كلش حلوات . بعد شتحبين تسوين "
ردت " احب الحياكة .. المعلمة تعلمنا بالمدرسه الحياكة والتطريز هاي ام الفنية بس مو مثل ماما بسرعه تحيك وحلو شغلها "

رديت " اذا تردين اعلمج اني اعرف "
شالت راسها " صدگ ؟؟ "
هزيت راسي " شنو رأيج نحيك شي للطفل الجاي وخاصه هو يجي بالشتا "

ردت " ياطفل ؟"
رديت " اخوج او اختج "
ردت " لا مااريد "
رديت " والطفل شعليه .. هذا اخوج المفروض تحبيه وتراعيه مثل مروة شنو ذنبه اذا انت ماتردين امه "

ردت " مو مااريدها .. اصلا هي ممسويتلي شي… بس مااحب اخلي احد بمكان ماما .. تروح تزعل عليه "

رديت " وهي ليش تزعل بالعكس هي تتمنى تشوفجن مرتاحات واكو احد يحبجن ويراعيجن .. "

سكتت ماردت ..
طلعت يم خاله ..
سالتها ع وضعها گالت زينة الاسبوع الجاي عندي مراجعة ..

بعدها سألتها ع اخواتي ردت " مااشوفهن هواي بس اخابر واسأل عليهن "

خليت خاله تخابر الهاجر وانطتني سمر ..
حجيت وياها .." هلو حبيبتي شلونج سحر شلونها "
ردت " زينين شوكت تجينا "
رديت " ان شاء الله احاول "

بقيت احجي وياها شوية وسدته بس ماعجبني صوتها
گلت احجي وي نسر واروح فد يوم ..

سمر :
قمر صارت تحبني كلش حتى مرات تنزل تنام يمي ..
هاجر حامل وماتگدر لان بطنها كبرت ومابقالها شي

الصبح اجت قمر گعدتني مثل عادتها ..
اخذتها عن سحر لان تبقى تعيط .. وطلعت بيها بالصاله. بعد محد گاعد ..
خدرت الجاي وسلكتلها بيض الها والبيبي وجدو ..

رجعت يمها فتحت التلفزيون ع طيور الجنه ووطيت صوته ..

اشتميت عطره قبله نزل ..
اتجهت عيوني بسرعه للدرج .. نزل بهدوء مثل عادته وبلبسه الرسمي ..
وبابتسامته المرافقة كلامه وهو يكلي "صباح الخير سمورة "

ابتسمت " صباح النور "

يجي يتقرب من قمر يلاعبها شوية ويكوم ..
" سمورة اكو جاي "

هزيت راسي "اي هسا اصبلك اسويلك ريوك ؟"
رد " لا بس جاي مستعجل "

يشرب الجاي ويروح وقبلها يلتفت :
" محتاجة شي اجيبه وياي "
اهز راسي " لا " ..

بأشهر قليلة وباهتمامة شغل تفكيري..
صرت احس بجيته وبخطواته قبل لااشوفه ..

احساس دخل كلبي شلون وشوكت ماادري ..
استحيت من حالي بس مو بيدي ..
ساعات اقارن نفسي بأمي .. شلون احب شخص متزوج وزوجته حبابه وياي ..

احاول اخفي هالمشاعر بأي طريقة .. بس اهتمامه الزايد يجذبني ..
حتى صرت من يتواجد بينا لو وقت عشا مااباوعله او اشغل نفسي ومااشوفة ..

لكن راح يگدر هالقلب يسيطر على مشاعره الخفيه ومايكشف عنها للعلن ..

شذر :
گاعدين اني وخاله بالحديقه ..
هنا كانت مواعدتنا تجي اليوم هي عوايدها اكثر شي تجي بيوم العطل يعني جمعة وسبت ..
لان هي وزوجها دوام ..

اجت بيومها ضايجة ومقهورة ..
طلعت عذورة يمنا ..
اشرتلها تكعد بالمرجوحة ماقبلت گالت ادوخ ..

سألت هنا " بيج شي اشو وجهج اصفر "

ردت " اسكتن غير اجينا نطلع ونجيكم .. شفنا ورقه ع السيارة مخليها وفوگاه طابوگة ..

كاتبين بيها " اعقل لا نسويلك گرصة اذن "

شهگت خاله " وهسا شسويتوا .. مااشتكى "

ردت " لا وين اصلا اني دمي فاير وهو يضحك "
يگلي" يمعودة تلگيهم زعاطيط قابل الهوى بيدهم "

ردت خاله " ماحجيتي وي اخوج "

ردت " اي اخابرة واحجيله لان هذال اذا ابقى وراه بس يستهزأ ويضحك عليه "

هنا :
بالفترة الاخيرة هذال هواي تجيه تهديدات .. بسبب اراضي توزعت ويردوها الهم وهو ماموافق ..
وع اساس صاير فساد وهو ماساكت عنه .. والمشكلة بكل برود يكلي ذولة الخربت عليهم يخصون ناس كبار بالدولة يعني مسنودين "

صدگ خفت .. خابرت نسر وحجيتله ..
" گال خلي يقدم شكوى ولو مادام ماكو اثبات همة ورى التهديد فماتاكل شكوته "

هنا زاد الخوف عندي .. لدرجة گلتله اترك الشغل خلي يولي .
ضحك " واتركه حتى يحصلون مبتغاهم لا حبيبتي مو هذال اليخاف "

باسني وغمض عيونه ونام ..
بقيت اباوع الملامحة وبشرته الحنطاويه .. بعد ماالله رزقني بيك وعوضني تروح مني .. لا يارب لاتختبرني بي ..
اذا تحملت خيانة ليث ..
فمستحيل اتحمل يصير شي لاانسان الحبني لدرجة صرت اشوفه كلشي بحياتي ..
صار اب الاولادي بوقت الابوهم تاركهم ومامهتم بيهم

شذر :
تعبت من شغلة العلاجات والدكاترة .. كلما اكول بطلت
بس مااگدر ..
احس نسر من حقه يكون عنده ولد ..
بدأ يكبر وطلع الشيب بشعره حبيبي راح يدخل بالاربعين ..
وكلما يكبر يزيد هيبة ووقار ..

بيوم راح نسر وي عذورة للعلاج ..
بقينا بس اني وخاله ..
اندگت الباب من الصبح فتحتها شفت هديل وامها
استغربت ..
سلمن ودخلن ..
رحت للغرفه صحت خاله جانت تنوم بملوكة ..
شافتهن سلمت عادي وگعدن ..

جبتلهن ماي ..
عين هديل عالغرف .. سألتني :
" وين ملوكة ؟"
همست " نايمة "

راد تكوم اشرتلها خاله تگعد :
" عيني ام هديل تدرين بنسر عصبي واذا اجه وشافها مايسكت ومعناها تخليني امام الامر الواقع "

ردت " عيني ام نسر احنة اهل قبل لانصير نسايب .. مهما يكون فهاي بنتها ومن حقها تشوفها وتاخذها يمها مو من حقكم تحرموها من بنتها "

ردت خاله " من افعالها .. اكثر وحدة جنت مساندتها اني وتالي تموت ابني .. ماعرفت تحافظ على بيتها وبنتها قبل ليش هسا اجت "

گامت هديل تبجي " خاله والله ماتسمعولي صوت .. اربي بنتي وبس بس لاتبعدوها عني "

ردت امها " خيه ابوها معذبها .. حتى هسا گلتله اخذها نزور وترجع مايدري جايين لهنا .. وبعدين هي غرفتها هنا وعندها حقوق مايصير هيج "

ردت هديل " مااريد اي شي بس بنتي .. "
باوعتلي " شذر حسي بيه اني ام . انت دنو بس ربتيها تگدرين تستغنين عنها "

رديت " اعرف بس لاتدخليني اني رغم اذيتج الي بس مالي علاقه انت ونسر "

گامت تبوس بية وتتوسل اخر شي دنگت ع رجلي وسحبتها :
" شتسوين ؟"
ردت " ابوس راسج وايديج احجي وياه يرجعني بس البنتي .. وحق الله مالي علاقه بيكم ولا اطالب بشي ولا اوصل يمكم بس خلي يرجعني "

بقيت ساكته ماعرفت شحجي وياها وحتى ماتنطي فرصه احجي ..
گمت للمطبخ بحجة اطبخ وتركتهن يم خاله .. وخاله لاتكدر تطردهن ولاتگدر تحجي .. وهن بقن گاعدات لحد مااجه نسر هو وعذورة من العلاج ..

جانت تعبانه مثل عادتها.. اخذتها ترتاح بالغرفة ..
شافهن گاعدات استغرب ..
" شعندج هنا وبأي عين اجيتي "

گامت ام هديل . اشرلها " لا خاله جيتج على راسي بس بنتج مامرحب بيها هنا . واني سبق وان گلت اذا اجت اكسر رجلها وابوها عاهدني ماتجي هو هذا عهده"

ردت امها " اي والله مايدري لو يدري يموتها هو اصلا مكرهها حياتها رادت تنتحر من وراه .. اكسب بيها اجر ورجعها "

ضحك " تحجين خاله اي ثواب يجيني من وحدة تشتغل بعمل الشيطان .."

گامت تبجي وتتوسل " والله اگعد بغرفتي وماتسمع حس الي بس اربي بنتي .. ادري غلطت بس هاهي توبة والله مااسوي شي .. واصلا مااطالبك بأي شي ومالي علاقه بينك وبين شذر…

عافها ودخل للاستقبال .. راحت وراه تركض ..
" لو ترجعني البنتي ومااطالبك بأي شي .. او تنطيني بنتي اخذها وياي "
اجيت يمهم ومااعرف ليش كسرت خاطري من تبجي .. اشرتله باوعلي ورد ..

زين !!
ترجعين بس محرمة عليه وماارجعج الذمتي يعني مااعقد عليج حتى ماتطالبيني بشي بيوم من الايام .
هااا شگلتي ؟؟

يتبع… ..

///// #البارت الثاني والســـبعون /////
ج2


عافها ودخل للاستقبال .. راحت وراه تركض ..
" لو ترجعني البنتي ومااطالبك بأي شي .. او تنطيني بنتي اخذها وياي "
اجيت يمهم ومااعرف ليش كسرت خاطري من تبجي .. اشرتله باوعلي ورد ..

زين !!
ترجعين بس محرمة عليه وماارجعج الذمتي يعني مااعقد عليج حتى ماتطالبيني بشي بيوم من الايام .
هااا شگلتي ؟؟

انصدمت مااتوقعت هيج يگلها .. صح كسرت خاطري ولان ام .. بس مستحيل انسى السوته بيه او بنسر ..
تهمتني بشرفي وفرقتنا ورادت تموته ..

ردت عليه بسرعة..
" اي موافقة "

سألها بأستغراب " يعني ابوج يقبل تجين تعيشين هنا بدون عقد "

ردت " اني اقنعه "
ردت امها " ابوج لو تموتين مايقبل .. يذبحج ومايخليج ترجعين هيج "

رد نسر " هذا العندي .. مال ترجعين مرة الي مستحيل ارجعج انلدغت مرة منج ومااعيدها بعد "

طلبت تشوف بنتها ..
ملوكة بس شافتها صارت تبجي عرفتها بسرعه رغم هواي مشايفتها .. بالكوة اخذتها خالة وسكتتها ..

اخذت امها وطلعت ..
باوعتله ودرت وجهي ودخلت ..

اجة وراي ..
" شبيج "
ضحكت " شبيه شنو .. اشرتلك حتى ترفض لو حتى ترجعها "

رد " منو گال رجعتها .. اني ذليتها واذا رجعت صدك تتحمل الذلة.. شفتي ملوكة شلون بجت عليها .. ملاك مريضه مو مثل دنو ربتيها انت وتعودت عليج "

رديت " لعد خليها عند امها ليش تاخذها منها "

رد " وعلاجها فهميني .. مستحيل انطيها ملاك .. وبعدين اعرف ابوها مايقبل يعني اني نطيتها شرط تعجيزي فلا تشغلين بالج "

رديت " باوع نسر .. من عمر 16 سنة واني اشوفك سند الي .. شما سويت سامحتك وقابلتك بطيبة گلب سواء انت او اي احد يأذيني ماحقدت يوم على احد .. وماانكر ملاك قاهرتني وحرام تنحرم من امها .. بس مو معناها ترجعها .. كلكم حتى خاله من تحجون تذكرون السحر السوته وبس .. ماتذكرون انه هي طعنتني بشرفي وردت اموت بسببها .. شلون تثقون بعد بوحدة مثلها .. وهي شنو فرقها عن مريم اثنينهن اتفقن عليك ودمرن بيتك شمنتظر لمن يهدمنه كله "

رد بعصبيه " شبيج شذر انت تفهميني لو لا .. ماترجع شبيج واذا صارت معجزة وابوها وافق .. اصلا راح تكون حالها حال اخواتي بالبيت او اخليها يم بيداء علمود ملاك وعلاجها بس والا مستحيل اباوع بوجهة انت عندي كلشي بدنيتي شلون تتوقعين افضل حثالة عليج .. "

رديت " لا تستغل طيبتي نسر .. ولاتختبر حظك مثل كل مرة . اذا دخلت مرة هديل برضاتي .. فهسا مستحيل تدخل الا على جثتي لو طلاگي .. وانت اختار بعد "

ردت خاله " يمة يكلج مايريدها علمود بنته "
ضحكت " انت وحدة من الناس خاله لو بجت الج بسرعة تجين تنگين ع راس نسر ياخذها "

ردت خالة " ادري بيج راح تبقين تلوميني "

رديت " لعد الوم منو گليلي . نگيتي ع الطفل واريد ازوجه وهاي النتيجة ..
استغليتوا سكوتي وطيبتي وياكم ومانصفتوني ..
فوگ تركني انزف وردت اموت ومحد اجه وشافني ..
لو ماخاله تجي جان اني ميته .. وفوكاها بدل ماتسألين عليه .. صرتي تسألين على خالتي ومنين .
اي عندي اهل بس تركتهم كلهم لان اذوني .. اختاريتكم انتو اهلي وحبيتكم . اعتبرتج امي والبنات اخواتي وتالي بكل مرة تصير شغله كلها تدير وجهها عني..
انطيني يوم اذيتكم بشي او حفرت من وراكم .
الوحيدة التعاملت وياي بطيبة گلب هي عمة خديجة رغم عرفت اهلي وكلشي عني بس اعتبرتني بنتها "

قاطعتنـي " يمة كافي موتي نفسج هذا كله ضامته بكلبج علينا شبيج انهديتي "

اتنهدت " لا ابد والله ماضامة بكلبي عليكم بس هاي الحقيقه .. والحقيقه مرة .. تعبت من اتصرف وي المقابل بحسن نية وهو يتصرف وياي بالعكس "

رد نسر " كافي لاتفرفحين الترديه يصير "
رديت " المفروض انت تعرف الاريده بدون مااحجيه "

تركته ودخلت للغرفة ..
باوعتلي عذورة جانت تعبانه ووجهها اصفر…
" زين تسوين اذا رجعت اني هم ماابقى هنا اروح وياج"

اتنهدت وسكتت ماردت ازيد همها ..

گمت سويت غدا ..
دااغسل الخضرة اجة حاوط خصري بذراعه وسحب شعري وشم رگبتي ..

ابتعدت عنه ..
ضحك " هاي شنو الحلو زعلان بعده "
باوعتله " هذا مو زعل الزعل الحقيقي بعدين تشوفة "

رد " وحق الخلقج احبج .. وانت بكفة والدنيا عندي بكفه .. شنو هديل او غيرها مايوصلن الاضفر رجلج "

سكتت عنه ..
ضحك " يابة تخبل الغيرة عليج تموت .. لو ادري مخلي هديل تجي من زمان شو ماجنتي تغارين قبل ؟"

رديت " منو گالك مااغار .. بس جنت بأمر واقع وماشفت شي عليها حتى اخرب حياتها . بس بعد الصار الوضع تغير .. نسر اكثر واحد تعرف اني شگد انظلمت اياك تظلمني بعد "

صار يشاقيني ويسوي حركات ويحضن… ابتسمت بثگل مااتحملت ..

اجت دنو من الدوام هسا هي بالسادس ابتدائي تحب الدراسة كلش حتى دراجتها عالية ..

طلعت ورقة من جنطتها " ماما باجر گلولنا اجتماع الامهات قبل الامتحانات يردون يجتمعون بيكم "

ثاني يوم اخذني نسر ورحنا ..

دخلت المدرستها حجت المديرة عن الطلاب ومستواهم ومابقى شي للامتحان وكذا…… .

سألت ع مرشدتها… دلوني بيها ..
گلتلها اني ام دنيا نسر ..
صفن بوجهي .. بعدها رحبت عادي ..
" اجيت اسأل علـى مستواها "

ردت " تحجين صدگ !! جاية تسألين ع دنيا .. عيني روحي وانت مطمأنه .. بنتج اخلاق وادب وشطارة وترتيب.. دفاترها شكلها كلها نزاكة ونظافة "

جنت اسمع وطايرة من الفرح .. اي هي هاي بنتي .. صح ماولدتها ولاطلگت بيها ..
بس من اجيت وشفتها لأول مرة من كان عمرها سبع اشهر دخلت گلبي .. شفت نفسي بيها واتمنيت الها قدر مختلف عن قدري ..

صارت جزء مني .. ربيتها وكأنه اربي نفسي .. علمتها على كلشي جنت افتقد لتعليمه .. انطيتها الحنان والامومة الانحرمت منها ..
كنت ادللها واعلمها ع الصح والخطأ بنفس الوقت
وهسا بنتي كبرت ..
صارت تفهمني قبل لااحجي .. حلمي اشوفها من المتفوقين .. باحسن الجامعات وافتخر بيها ..

طلعت نسر سأآني " هااا شكالوا "
رديت " بنت شذر يعني شيگولون عنها "

ابتسم " اي والله بنتج .. محد اله فضل بتربيتها غيرج اني جنت دوم مشغول عنها وانت صرتيلها ابو وام بنفس الوقت ربي ينطيج اكثر من نيتج"

خابرتني خالة رديت ..
" الو خاله شلونج "
" هلو امي شلونج "
" تمام انت شخبارج النونو شلونه "
ردت " زين متعبني كلش .. هم رحتي الاخواتج "
رديت " اي رحت قبل كم يوم "
ردت " مو هاجر مرت ارشد يگولون حالتها تعبانه فد مرة "

رديت " خطية ماتستاهل وارشد هم خوش ولد "
ردت " اي والله گالتلها الدكتورة ميصير طفل فوك طفل وهي اصرت الله يگومها بالسلامة "

باوعت النسر " تگدر تاخذني البيت جدو يكولون هاجر مرت ارشد حالتها تعبانه "

هز راسه " زين گومي بسرعه اوصلج بطريقي"

وصلني البيت جدو وراح ..
دخلت البيت جان مخبوص ..
سلمت عليهم وبيبي كاعده مثل عادتها ..
سألت " شلونها هاجر سمعت من خاله هسا "

ردت بيبي " اي امي اي .. لج امي عنيدة اصرت الا تحبل . هي عندها خثرة .. وهسا تكلها الخثرة صاعدة واذا وصلت الرئتها تموت .. "

شهگت " لا اسم الله ان شاء الله تطيب .. وترجع هي وابنها بخير .. مو هم ببنتها صارت عندها خثرة "

ردت مرت عمو علاء " اي صح بس قليلة .. مو مثل هسا هسا صاعدة وخانكتها حتى نفس بالگوة تتنفس وحتى عمليه مايگدر ابو التخدير يگول مااتحمل مسؤوليتها .. عود گلنه خلي يطلعون الطفل يعيش يموت ميخالف المهم صحتها هي "

جانوا البنات كلهم يبجون حتى سمر .. اعرفها حساسة حبيبتي كلش ..

سمر :
اكثر وحدة جانت تحجي وياي هي هاجر رغم بالبداية ماحبتني بس شوية شوية صارت تتقرب مني ..

دوم تصيحني الغرفتها اصعد اذا ارشد بالدوام لو طالع
ارتب وياها الغرفه لو ملابس قمورة ..
وبعدها تحجيلي عنها هي وارشد ..
جنت اتوقع متزوجين عن حب من نظراتها اله ونظراته الها ..

بس صدمتني من گالتلي :
" اني وارشد كنا مثل الاصدقاء او اخوة .. ابد ماتوقعت بيوم اتزوجه .. جان يدرسني هو وبيوم الامتحان يسهر وياي ..
الى ان وصلني للجامعه من كبرت حسيت بمشاعري اتجاهة مو بس مشاعر صداقه او ابن عم واخو .. لا المشاعر كبرت بحيث صرت اغار عليه من يحجي ع بنات الجامعه زميلاته او يتصلن بي ..
اتنرفز واعصب .. واحجي عليه ..
" انت متستحي كل شوية وحدة تتصل عليك ماتگول بنات صغار بالبيت وولد مراهقين " ..
ضحك ورد " وبنيه كاتلتها الغيرة وراح تموت "

تعصبت " اني مستحيل ع شنو اغار انت مثل اخوي "
جان يستفزني بضحكته ويطلع "

بعدها تخرج واني بعدني ادرس ..
من تخرجت قرر جدو يزوجه .. كنا متوقعين الوحدة
من الجامعه .. وبيومها انقهرت ..

تالي اجت ماما حجت وياي " جدج يريد يعقدلج على ابن عمج شتگولين موافقة لو لا ؟"

رديت " هااا ياابن عمي " ردت اتأكد واسمعها باذني
ردت " ارشد يعني منووو "

ابتسمت وحتى ماما شكت .." بكيف جدو اني "
ردت بضحك " اي ع اساس لو مموافقة جان گلتي بكيف جدو"

بيومها طرت من الفرح بس گمت استحي منه .. ابد ماطلعت ولاخليت عيني بعينه اليوم الخطوبة..

المشكلة لان احنة ببيت واحد اثنينا ..
بقيت بغرفه ماما فوگ بدلت ورتبت نفسي خالتي سوتلي شعري ومكياجي ..

نزلت جان گاعد يم بيبي .. التفت باوعلي ابتسم ودنگ ..
عشقتة اكثر واكثر ..
سوينا حفلة بينا وركصنا .. عماتي واحنة وجدو وبيبي
جان يوم مميز ..
تزوجنا بعد اسبوعين من خطوبتنا حتى مالحگنا نتمتع بيها ..
بس عوضني بعد الزواج .. طلعنا وسافرنا وتونسنا وبعدها حملت بقمورة گعدت وسكتت ..
بس هااا كنت اموت غيرة… بحيث اذا خابرته وحدة ع قضية او استفسار .. اضوج وانقهر ..
وهو دوم خطية ياخذني ع گد عقلي ويضحك .. اعرفه وفي وميباوع الغيري بس اغار مو بيدي..
هو احسه كلشي الي .. اخوية وصديقي وحبيبي وزوجي ..
تصوري اول مااجت شذر .. وجانت عيونها ملونه تخبلت صح احنة حلوات بس للامانة ترى شذر احلى منا حتى احلى منجن ..

ومو تزعلين بسبب امج وسوايتها تخوفت وتخبلت بيومها وبقيت الليل كله مااحجي وياه لان وصلها ..

ضحكت ع سوالفها " ومن اجينا هم حاربتينا بس لا هم غرتي"

ردت " اي والله ليش الكذب .. بس ماغرت منج لان مبينه حبابه بس سحر لا تخوف "

حسيت بتأنيب الضمير وهي تحجيلي عن ارشد وحبها وغيرتها واني للحظة رف گلبي عليه ..

مستحيل نگدر نسيطر على گلوبنا بس لازم نتحكم بعقلنا ومانكسر گلب احد ..

المشكلة كلما تحجيلي عليه .. ازيد بحبه .. الحب التحول الى صراع بداخلي واذاني..
من اشوفة صرت اتجنب احجي وياه ..

مرة اجه واني اغسل ماعين .. دخل سلم ..
رديت السلام ..
" جوعان شمسوين غدا "
رديت " تمن ومرگ بامية وتشريب "

رد" زين لعد صبيلي سمورة بين ماابدل واجي "

جان جاي من الدوام.. بدل ونزل ..
اني صبيت بسرعه وخليتله ع الطاوله وردت اطلع
صاح وراي " وين ؟"

رديت " كملت المطبخ اروح انام "

جان البيت كلها بغرفها هيج وكت حتى الماينام يرتاح لان بيت جدو مفتوح دايما للخطاطير هواي معارف تجيهم واصدقاء حتى من المحافظات..

سألني" اني مزعلج ؟ مسمعج حجايه ؟ "
رديت " لا ابد "
سأل " لعد ليش تتهربين مني .. بينما جنت تتلكيني بضحكتج ومن الصبح تريگيني وي بيبي حتى صرت اتفائل من اشوفج الصبح .. احجيلي شكو ؟"

رديت " لا ماكو شي انت تدري بمعزتك عندي انت مثل اخوي "
رد " طبعا اني اخوج الجبير واذا اكو شي مضوجج او احد ضوجج تجين تحجيلي فاهمة "

هزيت راسي ورحت للغرفه .. لزمت گلبي من التوتر .
گلتلة اخوي والساني بالگوة نطقها ..
بس لازم اطلعه من گلبي .. عيب عليه اصلا افكر هيج تفكير ..
مااريد اصير مثل ماما مااريد .. مااريد يكرهوني ويگلولي مثل امج..

مااتحملت صرت ابجي .. مااعرف ليش ابجي بس ردت افرغ همي وارتاح ..

گعدت سحر .. " شكو شبيج اكو واحد ضوجج "
رديت " لا هيج وحدي ضايجة "
ردت " وليش ضايجة مو مقتنعه بوضعج وصايرتلهم خدامة بعد شكو "

سكتت عنها اعرفها تستغل الفرصه وتعايرني دوم ..
ليش تتوقع حبي الجو العائلة العايشته بوسط جدو وبيبي والبنات تعتبره ذلة وخدمة .. من واني عند اهلي احب اشتغل واطبخ "

جنت محتاجة احجي وي شذر بس هي التفهمني ..
بقيت منتظرة هاجر تنزل مانزلت ..
سألت رونق گالت ماكو احد فوك اصعدي حتى ارشد بدل ونزل وي جدو ..

صعدت .. الطابق الفوگ عبارة عن اربع غرف وحمام ..
دكيت الباب على هاجر ردت ..
" منو ادخلي "

كانت نايمة وورمانه خطية من الحمل ..
شافتني گامت ..
" ها سمر تعاي "
" خاف نايمة وكعدتج ردت موبايلج اخابر شذر "
اشرتلي " ذاك ع الشحن اخذيه "

اخذتة خابرت على شذر :
" الو شذر اني سمر "
" هلو سمورة شلونج سحر شلونها "
رديت " اريد اشوفج ماتجينا"
ردت " اشوف نسر واجي ليش صاير شي ؟"
رديت " لا ماكو شي بس اشتاقيتلج"

سديته بسرعه ورجعته ..
شفت الغرفة مخربطة ..
سألتني " اذا ماعندج شي ابقي يمي ضايجة ومابيه انزل متوجعه حيل "
رديت " ليش مارحتي للدكتورة اذا هيج "
ردت " بقمورة هم هيج هو كلما اتقدم بالحمل اثكل واتعب .. شوفي حتى الغرفه مااكدر ارتبها وخطية ارشد حتى ملابسه صار يغسلهن بيده ويكويهن يستحي ينطيهن الاخواتي او عمتي "

رديت " انظفها الج ؟"
ردت " مااريد اتعبج هسا اخلي هنودة تنظفها "
كمت بسرعة ..
"لا اني انظفها ماعندي شي .."
گمت بسرعه هي غرفتهم اصلا صغيرة .. رتبتها ومسحتها ومسحت الاخشاب ..

بقت تتشكر بيه .. كعدت يمها شوية ..
سألتني على قمر ..
" اخذها عمو علاء يشتريلها "
ردت " مو اگول مالها حس "

اتنهدت " تدرين سمر اذا متت بيوم اموت مطمأنه لان متأكدة اولادي مايحسون بغيابي .. انت ماما جدو بابا بيبي وارشد كلكم تربوهم "

رديت " ليش هيج تحجين عمرج طويل ان شاء الله "
ابتسمت " لاتخافين مااموت هم هيج جنت احجي بقمورة تالي هسا تريدج متريدني وتحبج اكثر مني "
ابتسمت الها ..

بقيت شوية يمها الى ان اجت الق گالتلي اجت شذر ..
نزلت شفتها تحجي وي بيبي ..
شافتني ابتسمت سلمت وكعدت يمها ..

طلعت سحر بيدها ملابسها ..
شافتها بيبي " امي مايصير تدخلين هيج وكت للحمام راح يصير المغرب "
ردت " مايصير شي لتخافين "
سلمت عليها شذر " شلونج سحورة "
باوعتلها ودارت وجهها وراحت ..

همست بيبي " هاااي ابد مطالعه عليجن ولاتنرد "
اشرت الشذر ورحنا للغرفه..
سديت الباب سألتني " خوفتيني شكو "
رديت " ماادري شذر شلون احجيلج بس مامرتاحة جاي اسوي شي خطا واريد احجي وارتاح "

ردت " خوفتيني ولج شكو احجي "
رديت " باعي مو تحجين عليه والله الصار غصب عني مااعرف شلون بس اني حبيت ارشد "

شهگت " عزااا شنو ارشد وشلون حبتيه يعني اولا هو اكبر منج ومثل اخوج ومتزوج شنو هالحجي سمر "

رديت وابجي مستحيه " لا يروح بالج لبعيد .. هو اكثر واحد اهتم بيه من اجيت ماادري شلون اتعلقت بي صرت من اشوفه گلبي يدگ حيل .. ومن يحجي وياي اخجل واتوتر .. واذا يوم ماشفته لان هو مو دايما يتواجد بالبيت .. احس بفراغ بيومي مااعرف مااعرف شذر .. ادري غلط الاحس بي . ومستحيل اسوي شي يجيبلي حجايه مو زينه وخاصه هاجر حبابه وياي وتحبني حتى امنتني ع بنتها وواثقه بيه "

اتنهدت وحضنتني " هالشي طبيعي بعمرج هذا .. اهتمامه بيج خلاج تتعلقين بي .. بس تكبرين اكثر هالمشاعر تختفي .. مااكدر امنعج واجبرج تنسين بس حكمي عقلج قبل گلبج..
فكري بحياتنا هسا يلة استقرت .. فكري بكلمة مثل امهن النسمعها منهم .. دايما خلي اخطاء اهلنا گبالج وتعلمي منها ابد لاتنجرفين ورى مشاعرج وتضيعين نفسج مثل ماسوت امي .. فكري بهاجر مريضه وحامل خطية .. خلي هواي اعتبارات بين عيونج "

بقت تحجي وياي وتنصحني .. حسيت براحة شوية ..
دخلت سحر سكتنا ..
ضحكت " الله يكثر اسرارجن .. "

ردت شذر " شنو رايج اخذجن ونتعشا برة وازورجن ونفتر من اجيتن اليوم ماطالعات "

رديت " طلعنا مرة للامام بس سحر ماقبلت تجي ويانا"
باوعت سحر الشذر " شكرا اخذي اختج العزيزة وروحن"

مخلصه كل وقتها ع التلفزيون ابد ماتختلط ..
اخذت شذر اذن من بيبي ..
وطلعتنا وي زوجها كلش حباب وبنتهم هم تخبل ..
رحنا الخالة شفناها وزرنا وتعيشنا برة ورجعنا ..

وصلوني وراحوا ..
بعد كم يوم هاجر زاد وجعها وتخربطت علينا ..
اخذوها للدكتورة كالت التخثر صاعد عندها وواصل للرئة .. حتى اذا سوينالها عمليه مانتحمل ضمان تطلع عايشة ابو التخدير هم تخوف من هاي السالفه ..

بقت بالمستشفى وينطوها ابر تخثر .. البيت كله انخبص وندعيلها ..
اجت شذر هم سمعانه من خاله ..
حالتنا حالة لااكل ولا شرب .. بالليل قمورة بس تبجي مااعرف شبيها هي متعودة تنام يمي لو يم مرت عمو علاء متعودة علينا..
بليلتها ابد ماسكتت ..

خليتها بحضني انومها .. لان سحر گامت تعيط عليه تريد تنام..
سمعت صوت عياط بالبيت وبجي ..

گمت بسرعة ورجلي متشيلني من الخوف ..
طلعت شفت هنودة تبجي وتعيط… مرت عمو عامر ومرت عمو علاء وياها بالمستشفى بقوا بس احنة بالبيت وبيبي وجدو ..
اسمع بيبي تعيط من غرفتها " شكو شكو "
طلع جدو عاط بيها " احجي هاجر بيها شي "

گعدت هنودة بالگاع تلطم وتبجي .. ماتت جدو ماتت ماتت ..

جدو بسرعه وگع… نزلوا عمو علاء وعمو عامر .. شافوا جدو ركضوا عليه ..
بيبي تخربطت من الخوف من غير ماتعرف شكو ..

مو ليلة كانت .. وانما مصيبة كبيرة ..
عمامي يبجون .. وحايرين بجدو .. غسلوله انتبه ..
اشرلنا .. بيبيتكم لاتحجولها ابد ..

شغل احمد السيارة .. اخذو بيبي .. وبس جدو بقى بالكوة يحجي احنة مكابليه ونبجي ملخنا نفسنا ..
حتى سحر طلعت تبجي ع المنظر والموقف ..

لسا اتذكر من نزلها ارشد ساندها… جانت تضحك وتگول راح ارجعلكم وياي ولي العهد ..
من ودعتها وصتني بقمر .. ديري بالج عليها وبالليل تفزفز هواي الا تخليها بحضنج يلة تنام ..

وصتني وكانه تعرف راح تروح ما ترجع..
بقينا للصبح گاعدين ..
اجن مرت عمو علاء ومرت عمو عامر .. يعيطن ويبجن بيبي اخذوها البيت عمة نرجس ماجابوها لان فاتحة ..

امها الهاجر تخبلت ماخلت شعرايه براسها ووجهها احمر من الدم ..
تبجي وتگول " والله صغيرة بعدهي صغيرة ع التابوت يربي .. هاي بنتها صغيرونة بعدهي شبسرعة اخذتها مني مافرحت بيها وبأبنها بعدني "

كلامها جان يبجي الصخر .. بدلت وراحت وياهم للدفنة
هي وعمة بتول ..
بدت النسوان تجي .. خاله بس سمعت مخابرة شذر واجن .. شذر جابتلنا ملابس اسود مشترية ..

قمورة من الخوف العياط بس تبجي ..
خالة سماهر تعبت دخلناها للغرفة ترتاح ..

اخواتها بس يبجن شحالهن ..
مرت عمو علاء گالت " ماعندي احد غيرجن امي .. بس جايات وماي .. الطبخ ع الطباخ "

گمت اني وشذر للمطبخ .. اشتغل وابجي .. جنت احجي الشذر عنها .. شلون منتظرة ابنها حتى هو تركها قبل ماتترك الدنيا ..
شلون ماعرفوا الطفل مات قبل ماتموت.. شلون ماسوو شي ونقذوها .. شلون وشبسرعه ماتت ..

جانت شذر تهديني وتگلي " هذا حد يومها وحكم الله "

ماانصدمت ولابجيت على ابويه بكثر مااتأثرت وبجيت عليها ..

للظهر اجو بعد مادفنوها .. دخلت امها تبجي وبالكوة تمشي ..
تلكنها النسوان وصارت تعيط وصوتها بالگوة يطلع
" راحت راحت بنيتي راحت .. ولجن شحلات نومتها وطولها .. لو شعرها نشمر عليه الماي يسرسح وي الماي شحلاته .. اغسل بيها واشم بيها فتشت عيني راحت مني بساع بساع "

تحجي وتصفگ بديها . بجتنا كلش ..
بقينا بالمطبخ ..
دخل ارشد عيونه حمر وشحاله .. سلمنا عليه بس يهز براسة..
اشر " سوولي طريق اريد ادخل "

سويناله طريق وصعد لفوگ ..
نزل لابس اسود ولاف غترة ع راسه .. نفسهن الملابس اليلبسهن بعاشور بموكبهم ..

اجه للمطبخ اشرلي " سمر جيبيلي قمر "
رحت جبتها نايمة بالغرفة .. شفت خالة تحجي وياها وهي ساكته ومخليه قمر بحضنها تنومها ..

شافتني اشرتلي " تعاي اخذيها فزت من الصوت تبجي"

اخذتها وطلعت ..
شافها اخذها الحضنه وبوسها نزلت دمعته .. انطاها الي " ديري بالج عليها "

مرن ايام الفاتحة بصعوبة..
وحتى من انتهن عبالك البيت خالي مابي صوت مالنا شهية للاكل والشرب ..
بيبي عرفت بهاجر ومدخليها مستشفى.. ارشد اصلا مايجي للبيت بس وكت النوم ..
ضاعت لمة البيت الجانت ..

جدو مگابل بيبي بالمستشفى رغم هو يكره المستشفيات بس يفقد عليها كلش ويحبها…

حتى سحر تغيرت وصارت تگوم وياي تساعدني وتگعد يمنا لان البنات عندهم امتحانات وهم حزينات ..

شذر :
موت هاجر اثر بيه كلش .. بحيث من خابرت خاله وبلغتني .. بجيت .. عندها طفله وحامل بعدهي صغيرة. ماشافت شي من الدنيا ..

حجيت وي نسر .. گال " بدلي نروحلهم عيب لازم اوكف وياهم وانت هم "

بدلت شافتني خاله حجت ..
" ليش لابسه اسود ياساتر منو المات "
رديت " بنت عمي توفت . "
صفنت عليه " ياساتر بنت عمج شنووو .. منين طلعوا ذوله "

اجة نسر " من گرايبهم يمة "
سكتت ماردت بس حسيتها ما اقتنعت..
طلعنا سألته " ليش كذبتني "
رد " ماتعرفين امي تبقى تنگ .. اتركي الامور مثل ماهي احسن "
رديت " زين لعد خلي اشتري للبنات ملابس اسود من اي محل "

بسرعه اشتريتلهن ورحنا ..
شفنا خاله وصلت ويانا هي وعمو مختار ..
وصلنا وكال " راح نلحكهم للدفنه وياهم "

بقيت وياهم للعصر .
مرت ايام الفاتحة هيج .. وخاله كل يوم تسألني منين طلعوا هالكرايب مو ع اساس بس خالتج ..
جانت هنا وبيداء موجودات ..
سألني عنهم وعزني .. ماگدرت اكذب عليهن هم ..
حجيتلهن كلشي وعذورة يمنا جانت تسمع ..
تخبلن من سمعن ..
" وج شذر وهم تسميهم اهل لج حرام اكول ذولي اهلي
والله لج ابقي گولي يتيمة احسن مماتكولين عندي اهل .. واخواتج وين وبس لا هم مأذيهن .. سكتت مارديت .. "

ردت بيداء " والله لو غيرج حاجيلي هيج قصة مااصدگ واجذبها .. واني اگول على نفسي الدنيا ملطشتني ومتعبتني .. لعد انت شتگولين .. الله يعينج شلون متحملة وصابرة .. اصلا انت اقوى انسانة عرفتها .. ماكو وحدة يصير بيها هيج وتتحدى وتصبر وتوصل للوصلتيلة .. شذر وربي كبرت اكثر بعيني .. اتمنى تطلع فرح تشبهج مثل مادنو تشبهج "

اتنهدت " لا لاتكولين هيج .. ابد مااريد احد يشبهني ولا يشوف الشفته خليهن هيج وسعيدات طول عمرهن ولا يصير بيهن ذرة للصارلي "

وصيتهن يبقى الحجيناه بينا لاخالتي ولااسراء ولا غيرهم يعرفون ..
عذورة جانت بعالم ثاني ساعه تسمعنا وساعه تنام ..

عذراء :
مازلت مستمر بكورس العلاج .. المرض ماكان مؤلم بالنسبة الي لانه خبيث صامت .. لكن العلاج والجرعات هي الالم الحقيقي .. ورغم الالم الي كنت اتخلص من بالمسكنات والحبوب الي ينطوها الي ..

الا ان الاكثر ايلاما بالنسبة لي ..
هو شعري .. حتى صرت اكره اسبح واكره اوكف ع المرايا ..
جنت من اسبح اخلي الشامبو على راسي واستمتع بالوغف اليصير .. ومن امشطه اتعب لان طويل ..
كل يوم اباوع الطوله ..

تركت المرايا من اول يوم صار يتساقط شعري..
وما اطلع يم اهلي الا البس حجاب .. حتى راسي مااتلمسة اخاف ..

مرة وحدة نسيت وطلعت وابن هنا جود ضحك عليه وكلي " خاله تشبيهن سيد الخواتم "

انقهرت حيل .. هنا عاقبته وماقبلت بس هو حجاها بصورة عفوية ..
من يومها وبعد مااترك الحجاب .. شذر مخيطتلي كبات حلوة مثل التوربان حاليا ..
البسة بالبيت دايما حتى اخواتي عجبهم .. وطلبوا شذر تسويلهم.. كانو يلبسوه بالبيت وياي من البس مو لان حلو وبس ..

اعرفهم بتصرفهم يساندوني .. نسر يكلي صايرة احل من قبل ..
ومن اطلع الف شال ع راسي يله البس شال ثاني حتى مايبين راسي فارغ ويضيع جمال الحجاب براسي ..

حسام من كان يباوعلي ادنگ استحي اباوع بوجهة واني لا حواجب ولا رموش ..

بس هو اعرفه مايهمة شكلي .. صرت اميز كلش زين الشخص اليحبني من اليشفق عليه ..
بس لمصلحته جنت اسوي نفسي مااعرف مااريد اظلمه وياي اذا بيوم متت ..

كان بالايام الاداوم بيهن مايتركني ابد.. ياخذني ويرجعني وياه ..
بيوم طلعنا من وكت من الدوام ..
اصر نتغدا ..
وافقت وگلتله " بشرط "
رد " اشرطي كلشي مسموح "
رديت " مااريد مسلوق ومدري شنو اريد احس بطعم الاكل "
رد " شمشتهية "
رديت " شاورما "

رد " بس اللحوم الحمراء مو زينه شنو رأيج نستبدلها بشاورما سمك "
ضحكت " وين لگيتها شاورما سمك .. "

ابتسم " ابقي هيج اضحكي اكثر وحدة تلوكلها الضخكة انت .. شايفه من تضحكين وتبين ذني الغمازات .. گلبي… ..

قاطعته " ادري بيك طبيب بس هالمرة لبي طلب مريضه مشتهية شغله وبنفسها جايز اموت ومشتهيتها اخليك توزعها الي بثوابي وتخسر اخسر لفه وحدة احسن الك "

ضاج " شنو هالحجي .. ابد مااريد تحجين هيج .. عسا عمري على عمرج "

اختنگت مااتحملت " كافي حسام "

رد " لا مو كافي راح احجي وشيصير خلي يصير شوكت تحسين بيه ماادري "

رديت " حسام… .."
قاطعني " الله ياخذ حسام كافي لاتسوين بيه هيج .. ارحمي حالج وحالي "

رديت " ماافيدك اني انت تستاهل احسن مني "
رد " بس اني اريدج انت من صغرج واني اريدج وذاك الحيوان يعرف واستغل هالشي واخذج مني .. اخذج وردة مفتحة وذبلج .. سكتت وصبرت كلت الله يسعدج بس والله اعرفه اناني ويحب نفسه ومصلحته .. من صغرنا وهو يتمنى يطلع للخارج ويستقر .. شگد نبهتج وانت جنتي عاميه عينج ع الحقيقه.. "

اتنهدت " مايحتاج تهيجلي مواجعي اعرفهن كلش زين"

همس " انطيني فرصه وخليني امسح هاي المواجع بحبي الج "
رديت " ماانكر وكفتك وياي واهتمامك بس مستحيل اكون انانية وياك وانطيك وعد مااگدر اوفيه "

رد " انت بس گولي اي ومعليج اني راضي بقسمتي وياج ومتأكد راح تكون احلى قسمة "

اتنهدت " ماادري ماادري احس كلشي مخربط بحياتي احس نفسي ناقصة لاشعر لاملامح لا شكل شلون الگدر اعيش حياتي عادي"

رد " من حبيتج حبيت روحج مو شكلج .. كل هذا شي وقتي بس تطيبين يرجع احلى من قبل "

سألت " واذا ماطبت "
رد " لا تطيبين اني واثق .. وراح تحبيني وتموتين عليه بعد وتتحدين المرض علمودي "

ضحكت " طلعت علاج كيميائي وماادري "
ضحك " لا اني مرهم يسكن الالم بعد كل جرعة ووجع"
اتنهدت " خايفه !! "
رد " لاتخافين وانت بگلبي .. "

ابتسمت " لعد جيبلي شاورما حتى اصدگ "
ضحك " لزمتيني من ايدي التوجعني مو تتدللين "

وهاي المرة الثانية الي يدگ گلبي بيها .. بس ياترى راح يگدر هالحب ياخذني البر الامان .. او تروح كل احلامي هباءً منثورا …

يتبع…… .

///// #البارت الثالث والســـبعون /////
ج2


‏لا سلطة لنا على قلوبنا .. هي تنبض لمن أرادت ..

فالقلب عبارة عن عضلة في جسم الانسان نحاول جاهدين ان لا نجعل لها القدره على التحكم بناَ كثيراً ..

ولكن بعض الأشياء تدفن فى اعماق القلب ونردم عليها بتراب إدعاء النسيان لكنها تظل حية عالقة فى الوجدان تظهر فجأه لا نستطيع التحكم فيها ....

سمر :
بعد وفاة هاجر .. البيت ماعاد مثل الاول .. حياتنا تغيرت ماعاد حتى تجمعنا مثل قبل ..
مرت عمو عامر تمرضت وشحالها بغياب هاجر .. عمو عامر حتى مايجي بعد للبيت الا بالليل او مايجي اصلا

بيبي وجدو تعبانين حيل .. ومن رجعت من المستشفى سكنت غرفتها ماطلعت بعد ..

جنت اسويلهم الريوگ او الغدا واخذه للغرفه .. وين جانت قبل تجمعنا كلنا يمها بالصاله..

اما ارشد فمثل عادته يطلع الصبح يجي بالليل ياخذ قمورة يمة ينومها ومرات تنزلي بالليل تنام يمي ..

من اشوفه بهيج حالة اتأذى .. بس مابيدي شي اسويه حتى مااگدر احجي وياه لان هو ع گد السلام ويصعد

ملابسه امه تغسلهن .. بس مرات تگلي انظف غرفتهم لان البنات امتحانات ..

صعدت للغرفه فتحت الباب .
جانت مرتبة بس ملابس ع الكرسي اكو .. تذكرت هاجر من تگول ارشد ارتب مني .. اني من اريد حاجه اگلبها للغرفة گلاب ..
وهو يجي وراي يرتب . نظفتها وشلت الملابس اشوفهن نظيفات لو لا ..

فتحت القميص جذبتني ريحته .. قربته على خشمي اشتمه .. اشتميت ريحته وغمضت عيني ..
سرحت وياه الاحلامي .. تخيلت بيوم هالريحة راح اشتمها عن قرب .. بيوم راح يتغير كلشي ويصير هذا مكاني وقمورة بينا..

الريحة خلتني انسى نفسي لدرجة انفتحت الباب واني
ماادري ..
" وين صرتي لسا "

بسرعة انتبهت شمرته ..
ضحكت " طلعتي مو هينة.. بله من شوكت "

رديت " سحر مو لگيتيلج فرصه تحجين بيها "

طبگت الباب ودخلت صارت تگلب بالقميص " اوووع شتشتمين بي بله .. انتي مو صاحيه طبعا "

رديت بعصبية واني اجمع بالملابس " يلة كافي سدي الموضوع اني اطلع احسن الي "

اخذت الملابس وردت اطلع ..
" وج شعاجبج بهذا هم شايف نفسه وهم اكبر منج وعندة بنيه هو هذا ذوقج ..هسا لو من ذولاك الاثنين عاد اهون "

تركتها وطلعت مااتحملت استهزائها بيه كعادتها .. بس خفت لاتفضحني لان اعرف تصرفاتها بعد ماتنحزر تغيرت كلش ..

شغلت الغسالة وبديت اغسل ملابس شكو ملابس موجودة غسلتها بدون استثناء بس اريد انهزم من نضراتها .. صارت كلما تشوفني تبتسم وتلمح وكأنه لگتلها شغله تتونس بيها ..

حتى الغرفه لليل يله دخلتها وياي قمورة ..
شافتنا ابتسمت .. " شكد حياله واني اكول شألها خلگ متحملة طفله وتعبها تالي طلعتي راسمه على ابوها .. بس ياترى هاجر جانت تدري لو لا "

سكتت عنها ..
دا انوم بقمورة .. اندگت الباب توقعت وحدة من البنات .. سحر نايمة ومخليه رجل على رجل ..

انفتحت الباب فزت من مكانها وعاطت ..
" شبيك متستحي تدخل هيج ماتگول اكو بنات بالغرفة"

رد ارشد بعصبية " صوتج لج وربي اكصه للسانج مو دكيت الباب شبيج متسمعين مو هاي اختج وياج "

ردت " وانت اصلا شعندك جاي عندك شي دز البنات لو ماكو ذوق بهذا البيت "

رد " استغفر الله . لاتخليني ابتلي بيج بهالليل مخلي الذوق الج .. اخر من يحجي بالذوق انت لاعندج احترام لجبير ولا لصغير "

اشرلي " سمورة انطيني قمر خليني اروح "

شلتها بهدوء نطيتها اله .. اخذها وطلع ..
حجيت وياها " انت شلون هيج تحجين مو دگ الباب اشو ماتحترمين احد "

ردت " اي طبعا لا تدافعين مو هذا الحبيب الخفي شي طبيعي متنطين بي .. بعدين مخليه الاحترام الج .. طفي الضوة خلي ننام يله "

سديت الضوة ونمت .
فعلا ماتستحي صايرة .. ماكفاها المشاكل وي هنودة اجت هسا تكملها ..

ثاني يوم اني انظف المطبخ وهي تغسل بالطارمة من الصبح .. لان احنة بثمانية نگعد تصير هوسة الصبح بين البنات للدوام وهم كلهم شغل ودوامات..

رفعت دشداشتها وتغسل بالطارمة ..
شفتها طلعت " سحر نزلي دشداشتج الولد بعدهم بالبيت لايطلع احد يشوفج "

ردت " اليطلع يكح يسوي اي شي مالي دخل .. "

ضجت حيل منها ذيج المرة سوتها وهنودة تعاركت وياها لان احمد دخل وگلتلها متعمدة حتى تغريه

بس هالمرة لا .. بعدني ممكمله طلع ارشد للكراج علمود سيارته ..
مر من يمي وسلم " صباح الخير سمر "
رف گلبي رديت " صباح النور '

شافها دنگ بسرعه وراح للگراج .. وهي ولا عبالك ..

سحبت الصوندة منها " بعد متغسليها اني اغسلها ادخلي يلة وبعدين ماجنتي تگعدين من الصبح شگعدج ؟"

ابتسمت " ليش لازم غرتي لان حبيب الگلب شافني .. اعترفي غرتي لان اني احلى منج وعندي انوثة وجاذبية اكثر .. لدرجة انت وهنودة تغارن مني "

هزيت ايدي " انت مريضه مستحيل تكونين صاحية "

تركتها ودخلت .. وقررت اتجنبها لان اعرفها راح تستفزني بكل دقيقة ابتعدت عنها بلكي تنسى وتصرفاتها تغيرها…

عذراء :
اعلان حب حسام كان بمثابة هدف للعبة كرة قدم بالوقت بدل الضائع ..

اهتمامه وخوفه كانو واضحين وضوح الشمس .. رغم اني قررت اغلق ابواب هالگلب لاخر انفاسي .. بس كلامه وتوسلاته جدد شعور بداخلي ..

مااگدر اگول حب او عشق .. لان مو بالسهولة گلبي يرجع يدگ ويثق بهيج سرعة ..

رجعت للبيت بعد مااصريت اكل شاورما .. اول ماكملت انطاني علاج وكأنه حاسب حسابه ..

وصلنا وگف السيارة والتفتلي " تدرين مامصدگ ؟"
ابتسمت " ليش ؟"
رد " انت جددتي الامل بحياتي .. انطيتيني شي مستحيل جنت اتوقع يصير ؟"

اتنهدت " بس اني داخلي ممرتاح رغم راغبة هالشي "

رد بتعجب " يعني ماتثقين بيه ؟"
رديت " مو هيج حسام بس مااريد اكرر الصار "
سألني " بعد عندج مشاعر اتجاهة "
رديت بسرعة " لا ابد اذا حتى مشاعر كره ماباقية عندي صدگني .. خوفي مو من گلبي خوفي من الخذلان "

قرب حاله الي وهمس.. " اذا بيوم هالگلب خذلج ماانتظر انت تحكمين عليه اني الاحاسبه .. اطماني يادنيتي كلها هالگلب ربى على حبج وكبر وهو يردد اسمج .. صبر وماخله احد ياخذ مكانج الحد مافاز بيج واسترجعج ..
تحجين صدگ عذراء .. بعد ماانتظرت كل هالسنين وصبرت اضيع هالفرصة مني ..

ابتسمت " خلي انزل صار الرايح والجاي يباوعلنا "
رد " عادي اخابرج مووو؟"
هزيت راسي وابتسمت ..

نزلت مبتسمة لحد مادخلت.. كالعادة صارت بوجهي ام دنو ..
" خير اليوم اكو ابتسامة ماليه الوجه .. اكيد حسام اتشجع وفجر القنبلة "

ضحكت " شمدريج انت ؟"
ابتسمت " مبينه .. اصلا اتأخر هواي گلت من زمان راح ينطق ابو الهول ويحجي.. "

رديت " هو اصلا قبل يلمح .. ومن جنت اتخربط بالجرعة واتقيأ .. ينخطف لونه وينسى نفسي ويگلي هااا حبيبتي شلون صرتي .. بس اغلس عنه .. بس اذا نسير موجود مايحجي "

ردت " تستاهلون اثنينكم.. حسام فاق كل توقعاتنا .. فعلا مالازم نحكم على عائلة من نفر واحد "

رديت " اني انطيته الموافقة بس احس بداخلي شي مخوفني "

ردت " بطلي مخاوف وانسي عيشي حياتج.. وهسا روحي ارتاحي وبدلي حتى اسويلج غدا "

ابتسمت " مااريد غداني هو "
ردت " عيني عيني لعد روحي ارتاحي "

دخلت للغرفه تعبانه… ماما نايمة جانت..
بدلت ورحت لفراشي نمت . اجتني رسالة ..
" مساء الخير اشتاقيتلج "

ابتسمت " معقولة هذا الرقم مامل كل يوم يدز .. بس لا حسام .. المشكله الرقم غريب مااعتقد اثير او اسيا .. "

دزيت رساله الحسام " عندك خط ثاني ؟؟ "
رد " لا ليش ؟"
رديت " لا هيج "

لعد هذا منووو ؟؟

بعد كم يوم اجت شذر واني نايمة گعدتني ..
" گومي بسرعة "

فزيت " خير يا ساتر شكو ؟"

ردت " حسام وخالج هنا "

استغربت " حسام اشو ماگالي .. "

بدلت ورتبت نفسي .. لفيت شالي . خطيت حواجبي بالقلم .. وطلعت ..

سلمت على خالو . وحسام بسرعه گام من شافني وابتسم لابس بنطرون جينز وقميص وسترة ..

بس ماما گاعدة يمهم ..
اشرتلي " وين شذر خلي تخابر نسر يجي خالج يريد يحجي وياه بموضوع "

باوعت الحسام ابتسم ..
رحت الشذر جاي تحجي وي نسر .
سدته وهمست " الشغله بيها ريحة خطبة "

رديت " لا مااعتقد لو اكو هيج شي جان حجة وياي "

رحت للغرفة دزيتله رساله " صاير شي ؟"
رد " هلو حبيبي مفاجأة "

توترت معناها كلام شذر صحيح وراح يسويها .. زين ليش مااخذ رأي بوضعي هذا وحالتي شلون يخليني امام الامر الواقع ..

اجه نسر سلم عليهم وكعد ..
فتح الموضوع خالو :
" احنه اجينا على شغله وماادري اذا تردونا لو لا .. بس بالاول كلكم تعرفون حسام واخلاقه .. واسألوا عنه بالمستشفى وبكل مكان ..
اني لو ماواثق بي مااجي واعتب الباب واعرف انه الماضي البينا راح يكون حاجز ..

رد نسر " خير ان شاء الله "
كح خالو وكمل " ان شاء الله خير .. تدرون حسام وحيدي صح بس ماربيته اني هو ربى نفسه بنفسه واعتمد على حاله .. وهسا جاي اخطبله عذراء واتمنى ماتطلعوني فشلان منا "

هو حجة هيج الكل انصدم ابد ماجانو متوقعين ..
حجت ماما " لعد ام مريم وين .. اشو مااجت وياكم "

رد " ام مريم مريضه واني اجيت لان مااريد تصير رسميه ومثل الغربه احنه اهل مهما صار بينا والبنية بنيتي .. "

رد نسر " خالي جيتك على راسي .. وراح احجي هسا حجي ماله علاقه بمريم ولا احكم على حسام بمريم

بس عذراء حاله خاصه بالنسبة الي .. وخاصه بهذا وضعها .. اقدر اهتمام ووگفة حسام ويانا بهيج ظرف .. بس مامستعد اخسرها .. ماصارلها هواي من طلعت من تجربة معتز ودگته الناقصه بيها .. ومن ساعتها اني حلفت ماانطي اخواتي القريب .. لان اني انطعنت منهم مرتين . وهنا انطعنت .. وعذراء ..
حسام خوش ولد بس المحيطين بي مايريحون .. والدليل امه ماقابله ومااجت واكد راح تحاربها والا وين اكو ام ماتجي خطبة ابنها حتى لو كانت مريضة ..؟"

رد خالي " ماانكر هالحجي بس مصيرها توافق منو عندها غير حسام "

رد نسر " عوف امه .. ومريم !! راح تسكن ماتأذيها وتعرف هي شلون حاقدة شلون تريدني خالي اشمر اختي بنار "

رد حسام " اذا على امي ومريم لاتهتم .. اني أاجر مشتمل او شقه قريب ع المستشفى ونعيش وحدنا ومحد يگدر يمس شعرايه منها "

سأله نسر " وراح تضمن مريم ماتأذيها .. نسيت شلون حاربتني وحاربت اهلي بوكاحة عين رغم هي الغلطانه ولازم تطم عارها بس بصلافه تطلع بوجهي كل مرة "

رد حسام " والله اذا تجرأت ساعتها معناها جنت على نفسها.. هي اصلا تتجنبني ومالها علاقه بيه من زمان يعني مااعتقد تسوي شي "

نسر كان رافض الفكرة من الاساس رغم يناقش بهدوء لان مايريد يجرح حسام بعد كل السواه وياي ..

اخر شي گالهم مااوعدكم بس الله كريم . احجي وياها ونشوف ..

من طلعوا صار نسر يحجي وي امي ويكلها.
" ماردت اكسر بالولد لان احترمه والا خابري اخوج وگليله يحلم انطيهم عذراء.. شنو بايعها اني . حتى لو هي مقتنعه ولو مااضن بس هم ماانطيها "

رحت للغرفه دزيتله رساله " من توصل خابرني "

من وصل اتصل " هاا حبيبي "
رديت " ليش استعجلت ماصار كم يوم شلون تتوقع اوافق بسرعة "
رد " مااتحملت تعبت من الانتظار اريدج تصيرين حلالي .. تدرين من يصيرلج شي بودي احضنج واخفف عنج واذكر حرام واتراجع بس اتاذى حيل ومااتحمل ..
خلي حبنا يكبر بالحلال .. والله ماتتندمين بس طاوعيني "

سكتت عنه لان اصلا مامقتنعه بفكرة الزواج ..
باوعت النفسي بالمراية..
شلون تريدني اتزوج واني بهيج حاله شلون ؟؟
مستحيل طبعا..
من حقي اتزوج مثل البنات البس بدلة واسوي تسريحة كبيرة ..
جنت اتخيل بذاك شعري التسريحة التصير شلون ؟؟

ماقبلت اتزوج واني بهيج حاله ولا اصلا عرفته زين حتى اجازف ..

وهو هم ماضغط عليه .. بس بين فترة وفترة يگلي شوكت تصيرين حلالي واشبع منج ..

يلمح دايما واقابله بأبتسامة " مو وكتها هسا "
جان يضوج بس مايبين متفهم .. اذا اني حتى كلمة حبيبي اخاف انطقها لان نطقتها قبل وتندمت ..

اتصل عليه الرقم نفسه القبل يراسلني .. من شفته استغربت هالمرة مو رساله شعجب .
رديت اشوف منوو..
اجاني صوت هز كياني كله .. وترني وعصبني بنفس الوقت ..
" انت شتريد ومنين عرفت موبايلي والمن جنت تراسلني "

رد " سمعت مريضه .. تأذيت حيل. عذراء اني لسا احبج واريدج انطيني فرصه.. من سمعت مريضه تخبلت والله وقررت اجيج للعراق بس ماگدرت… "

ضحكت " والله واثق من حالك . تدخل عليه بهيج طريقه واصدگك .. معتز بعد لاتخابر وانساني مثل مانسيتك "

رد بعصبيه " لا انت مانسيتيني ادري بيج بعدج تحبيني حب معتز محفور بگلبج ماتگدرين تمحيه .. بس گولي هالكلب جاي يقرأ براسج ويريد ياخذج مني .. عرفت خطبج ورفضتيه .. عرفت ساعتها انت تحبيني ومستحيل تحبين واحد غيري "

ضحكت من صدگ وداخلي ينزف :
" منو الگالك رفضت .. الوصلك مانقلك الاخبار الصحيحة .. اني نسيتك لدرجة دخل حسام الگلبي ومو بأقواله بأفعاله .. بوقت الانت مشغول بونستك بالخارج هو جان واگف وياي خطوة بخطوة.. ماتركني ابد ..
رغم مريضه ويمكن اعيش او لا بس حبني وتمسك بيه وخلاني انسى كلشي يخصك حتى المك .. گدر يسترجعني بعد ماانت اخذتني منه بحجة الحب رغم تدري بي يحبني "

عاط " جذاب هذا والله جذاب يضحك عليج .. عندة غايه يريد ينتقم منج المريم هو وياها متفقين صدگيني "

انصدمت من كلامه بس مانطيته فرصه " كلٌ يرى الناس بعين طبعه .. عبالك الناس كلها مثلك "

غلقت الموبايل بوجهة وحضرته ..
اتهسترت ساعتها من سمعت صوته وكلامة وخاصه اخر كلام حجاه زرع الخوف بداخلي صرت مااثق بأحد ..

تخربطت وبس ابجي ..
حجيت الشذر كلشي.. تخبلت " هذا هواي سكتناله مو كافي السواه بيج . مالازم تسكتين .. احجي النسر "

رديت " ونسر شيسويله "
ردت " كلشي يسويله مو شايف نفسه هناك محد يوصله ويخابر يأذيج "

حجت هي النسر واجاني يستفسر ..
حجيتله كلشي تخبل حتى ع الذهب مالتي حسيته انجن من گلتله .. خابر الخالو علي بتركيا وحجة وياها ..
وگاله " شوف خالي اذا سكتنا على غدره الها فهسا مااسكت .. ولا يكول بألمانيا ومحد يوصلني عندي جماعه هناك يمه… والله اخليهم بأي طريقه يلفقون تهمة عليه ويخلوه ينطرد واخرب مستقبله كله ..
لايختبر صبري ابد .. وخلي يبتعد عن عذراء.. فوگ ماخذلها وباگ ذهبها وهسا جاي يحجي بوكاحة عين ..

خالو تعجب من سمع بشغله الذهب وگال ماادري هسا سمعت .. مريت بأتعس ظروف ماساعدني مامعقولة يضم عليه ..

رد نسر " لا معقولة ليش اليغدر بخطيبته صعب عليه يبوكها لو يضم عليك .. الظاهر ياخالي انت وخالي عباس ماعرفتوا تربون .. لا مريم ولا معتز اثنينهم نفس الصنف "

ضاج خالو من حجايتة وزعل .. وماما هم گالتله خالك مايجوز هيج تحجي وياه… بس نسر مااهتم وطلع كل قهره بيهم ..

بيومها سواها عناد بيهم وسألني " انت قانعه بحسام ؟"
ارتبكت من سؤاله وماعرفت شجاوب " هااا ماادري "

رد " يعني اذا خطبج توافقين ؟"
" بالنسبة الي حسام انسان عاقل ومثقف واكيد ماالكي احسن منه رغم المحيط العايش بي "

رد " المحيط اني اعرف شلون احميج منه "

رغم كل يوم حسام يخابر بنسر ويريد يعرف موافقته بس نسر مصر على رأيه ..
واستغرب من خابره نسر وكاله اريد احجي وياك ..

خابرني بسرعه " اگلج عذورة خابرني نسر يگلي اريدك بس لايرفض نهائي "

رديت " لتخاف مايرفض "
ضحك " ياالله يعني واخيرا بس شغيره "
رديت " بعدين احجيلك "

اجه حسام وجان متوتر ..
رغم مامقتنعه بشغله الخطوبة .. بس قررت اطلب منه نبقى بفترة خطوبة الى ان ينتهي علاجي احسن الي واله ..

سلم عليه نسر وبدأ يحجي .. جانو بيداء وماما گاعدين ومهيمن جان موجود ..
" شوف خوية .. اني من وافقت عليك لان واثق انت غير عن اي احد .. ولسا ماشفنا منك الا كل خير .. اهتمامك بعذراء جان واضح وفهمت هالشي بس گلت احتمال يريد يكفر عن الماضي ويفتح صفحة جديدة
بس يوم عن يوم تثبتلي حسن نيتك.. في حال انخطبتوا وتزوجتوا عندي شروط ..
اختك ماتحظر ولاتوصل لا هنا ولا بزواجك ولاحتى البيتك ..
تحط بيت بعيد عن اهلك لان اكيد تلگيلها حجة بيوم وتأذيها ..
اذا صار اي شي ولو تأذت شعره منها انت محاسب امامي مو غيرك ..

ابتسم " كل الكلت عليه يصير والبيت شفت مشتمل قريب على المستشفى راح اخذها تشوفه ونأجره .. اما مريم فأني اصلا معتبرها ميته شلون تحظر زواجي بعد اني ماعندي اخت ومتبري منها يعني اطمأن عذراء بحمايتي "

اتنهد نسر " وهذا الاتمناه .. حدد موعد المهر مشيه وهالسوالف مااريدها لان انت مو غريب عنا .. بقت الشغلات الباقية بين امي وامك الماعرفنا لسا رأيها ولو هو مبين "

حسيته خجل من كلام نسر… وتعذر نيابة عنها ..
اجة مهيمن يرگص بوسط البيت ويهلهل ع كيفه
ضحكنا عليه اني وشذر ..
ولايكبر ابد ..

من طلع خابرني فرحان :
" عذورتي مااصدگ واخيرا راح البسج الحلقة وتصيرين حلالي .. "

ابتسمت " بقت شغله اريد احجي وياك بيها يله ارتاح "
رد " شنو احجي "
رديت " مو وكتها باجر من اداوم احجي وياك "

ثاني يوم لگيته منتظرني من الصبح ..
سلمت عليه ابتسم " صباح الانوار .. طالعه حلوة "
ابتسمت " شنو هالمجامله متشوف ذبلانة ياحلاه "
رد " وربي عبالك مليكانه صايرة صح خدودج قبل حلوات والغمازة بيهن تبين اكثر من تضحكين بس هسا جسمج يخبل "

رديت " احم احم ترى احنة بالمستشفى وبعدنا ممخطوبين ترى "

ابتسم " مو بيدي اعذريني.. صدك شنو الحجي "
رديت " مو وكته هسا دوام ومراجعين خليها من نطلع"
ضحك " وترديني اصبر للظهر غير حتى مراجعين مااستقبل من التفكير "

اخذني الغرفه رحنا قبل ليبدي الدوام وتصير هوسة ..
گعدني يمه…
" تشربين قهوة ؟"
هزيت راسي " لا مااريد مااشتهي اي شي "

گعد گبالي وسألني " احجي شنو المخوفج ليش احسج مافرحانه مثلي "

رديت " مو هيج الحجي حسام .. ماتعرف شلون عانيت بسبب تجربتي ذيج .. ومااريد اكرر الغلط. . قبل يومين خابرني معتز ؟"

فتح عينه وتعصب " خابرج؟؟ منين وشلون ؟"
رديت " من رقم دولي من زمان يراسل وتوقعت انت الصراحة وحتى ماارد كنت اكتفي بالقراءة . بس الظاهر اكو من يوصله اخباري .. يعرف عن مرضي وطلب يرجعلي .. وبعدها طلع يعرف بيك تريدني اتعصب وكالي تريد تنتقم مني انت ومريم مو حبا بيه خطبتني "

حسيت دمارات وجهة بينن من كثر ماتعصب..
" وانت صدگتيه مووو ؟"
رديت " ماادري الصراحة ومااكذب عليك ماعدت اثق بأحد "

رد بعصبيه " لعد ليش وافقتي عليه ليش ؟ ليش مارفضتي اذا عندج هيج شكوك .. تصدگين بانسان باعج علمود مصلحته وتشكين بيه "

رديت " حسام منو گلك صدگت .. اخر واحد اصدگ بي هو .. بس ماانكر دخل الشك بكلبي "

باوعلي بعتب " ليش من صارت سالفه مريم لسا.. اذيتكم بشي .. صرت وياها ضدكم ؟ مو شهدت عليها بالحكمة وحكمت الصالحكم .. كل هذا وتشكين .. "

فتح دگم قميصه .. فتحت عيوني. .
" شتسوي انت " صرت اباوع للباب خاف واحد يدخل

" باعي هاج باعي شلون حافر اسمج بگلبي من زمان "

باوعت جان واشم اسمي على صدره ..
رجع كمل " من وشمت هالوشم جان هو وياي للعلم "
واذا هالشي مايخليج تصدگين هم .. اخذج الاي مكان احلفلج ..

رديت " خلص لاتتعصب ماكو داعي بس ترى حقي قدر موقفي "

فرگ وجه وگام.. فتح ثلاجة صغيرة بغرفته طلع منها بطلين مي .. انطاني واحد والثاني شربه كله "

ابتسمت " عاد كون انطفت النار "

باوعلي وصفن عليه لمدة دقايق بنظرات تفسيرها مبهم .. عتب .. حزن .. لو حب وعشق ..

نظرات اول مرة اشوفها بعيون شخص يباوعلي ..
رد " نار حبي مستحيل تنطفي .. بس القاهرني اريدج تثقين بيه .. تحسين بيه وتحبيني مثل مااحبج "

رديت " منو گال مااحبك .. والا شلون اوافق ارتبط بيك بس اعذر وضعي انت بالنسبة الي .. بصيص ضوء بوسط عتمة حياتي .. لهذا اگلك انطيني فرصه خلينا هسا بس خطوبة .. وبعدين كلشي يجي وحدة من غير مانخططله "

هز راسه " اذا يريحج هيج خلص حاليا بس خطوبة ولو مااريدج تبتعدين عني.. حتى مشتمل منتظر تشوفيه واجره . لان رتب وحلو وقريب ع المستشفى مايتفوت بصراحة "

رديت " شنسوي يمكن مامقسوم النا "
رد " لا ماافوته احتمال اجره من هسا وشويه شويه ااثثه الى ان الله يهديج عليه "

ابتسمت " گول ان شاء الله "
رد " ان شاء الله "

رحت الشغلي والتهيت بي رغم مايخلوني اتعب ابد ..
من كمل دوامنا اصر حسام نروح نشوف المشتمل "

كان قريب كلش ..

رغم صغره بس حديقته كلش حلوة .. ترتيبه حلو ومرتب .. المطبخ مفتوح ع الصاله
وبي غرفه وحمام ومخزن مساحته زينه . قررت اسويه مطبخ حار لان مااحب ريحة الاكل بالبيت ويبقى ذاك مجرد ديكور ..

وصار حسام يخطط يسويلي فتحه تهويه بالمخزن ويخليلي بي مفرغة هواء ..
وهنا هيج يجيب .. وهنا هيج .. اندمجت وياه بتخطيطاتنا لدرجة تخيلت نفسي متزوجين.. احساس كان كلش حلو ..
وخاصه من كلي بس نعقد نطلع نشتري ونجهز للبيت وكلما نشوف حاجه حلوة نجيبها ونرتبها ..

فرحت وتحمست…
وفعلا اجر البيت بسرعه ونطاه عربون .. قسم المفتاح وانطاني واحد الي وواحد اله من هسا ..

طبعا اجت امه بس مبينه مجبورة مااعرف ليش .. يمكن بعده الماضي بداخلها رغم احنة المفروض ماننسى

ماحجت شي ابد .. بس نطتنا الفلوس وحددت المهر وراحت .

اتنهدت هنا " يمعودة هاي من هسا گالبه وجهها همزين ماتگعدون وياهم "

مااهتميت الاي شخص بس للانسان الگدر يدخل البسمة الحياتي رغم وجعي والمي ..

للسوك ماگدرت انزل لان اعرف نفسي اتعب .. اكتفيت بذوق شذر ونسر وماما هم الراحوا اشتروا الذهب ..
شذر جايبتلي فستان وردي فاتح كلش .. بس يخبل موديله وخاصه اني ضعيفه راح يطلع عليه كلش حلو ..

اما شعري الي كان الم بالنسبة الي كلما اشوفه ..
خيطتلي اله توربان بنفس لون الفستان .. يخبل وبي شغل من جهة وحدة ..

وجهي رتبته هنا وبالمكياج خطتلي حاجبي ..
ورسمتلي عيني وظهرت ملامحي الي اخفاه المرض اللعين ..

طلعت كلش حلوة من اشوف الكل فرحان ويرتب ويبدل .. نزلن دموعي مااتحملت المنظر..

ماعزمنا احد .. احتراما الشذر خطية علمود بنت عمها
بس اجت ام حسام واخواتها ..

اخواتها الكبار من شافني صلن ع النبي ..
بس اختها الجانت عايشة عندها مريم .. صارت تحجي وكأنها متعمدة ..

" صدك جذب ام مريم مالگيتوا الا هاي هم عليله وع ساعه تموت وهم صلعه بله شنو شاف منها "

خاله تأيدها بحركة بيدها بمعنى " شعليه اني "

انقهرت حيل لدرجة حسيت گلبي راح يوگف ..
صاحوني ودخلت اعقد .. خلت شذر ع راسي مثل الشال كبير ابيض ..

عقد السيد بالاول اله .. للحظة ردت اغير رأي وابطل صدك مالي حق اظلمه ..
بس من اشوف ابتسامته وفرحته وهو يردد بعد السيد الكلام .. اتراجع ..
عقدولنا وكملنا.. طلع السيد ..
وبقينا الوحدنا .. رفع الغطوة عني وابتسم .. باس راسي
" طالعه تخبلين "
همست " مامتندم ؟"
اتقرب وباسني يم اذني وهمس " جان ندمت لو ماخطيت هالخطوة .. "

لبسني الذهب والحلقات .. اكلني كيك وعصير…
بقينا گاعدين بس نظراته امه وخالته اكلتني ..

احس روحي اختنگت وانگطع الهوى عني .. حسسني بعدم الثقه رغم من شفت روحي بالمراية طالعه حلوة فرحت .. بس كلامهن صحيح… لو تزوجنا هو هسا صار حلالي شلون راح انزع الحجاب يمه وشراح يكون شكلي بنظره .. نظراتهن. زعزعت الثقه البداخلي وخلن مني انسانه ضعيفه .. لدرجة نسيت الفرحة العايشتها وبقى بالي يمهن ..

دخت حيل ومااتحملت بعد ..
همس " بيج شي حبيبتي شو وجهج تغير "
رديت " اريد اگوم مدري شبيه "

بعدني ماگمت وگعت وتخربطت .. فتحت عيني كلها داير مدايري . بس احس الساني ثگل مااعرف شبيه

حسام مگابلني ويمسح بوجهي ..
بقى يتلمس خاف مسخنه .. وصل الراسي صارت بيه رهبه سحبت ايده بساع ..

نسر واخواتي وامي كلهم خايفين عليه .. گمت " مابيه شي دخت بس يمكن لان تعبت .. "

اشر نسر يطلعن وخلونا وحدنا اني وياه ..
حضني وباس راسي " خفت عليج والله "
باوعتله " شلون راح تگدر تتعايش وي شكلي "
رد " بكل حالاتج احبج والله ليش عبالج يهمني الشكل وهسا شناقصج انت .. ابد لاتخلين هالفكرة براسج .. لو اني بمكانج وانت تحبيني راح تگولين هيج بي ومااريدة
هزيت راسي " لا طبعا "
حضني حيل وخلاني ارتاح واحس بالامان .. هذا الحب الي جنت ادور عليه .. رغم شگد تأذيت من معتز بس فرحت هسا لان الله نقذني منه وخلاني بالمكان الصحيح… عسا ان تكرهوا شيئا وهو خيرا لكم ..

شذر :
الصار العذراء رعبنا .. صارت مثل الخشبة .. رغم جانت فرحانة وطالعه تخبل .. مابطلت اقرأ ايات عليها من عين خالته الحسام الي مانزلتها عنها ابد ..

من اطمأنينا عليها طلب نسر نخليهم وحدهم .. وطلع يجيب عشا ..
بدلنا ونظفنا البيت وعصافير الحب بعدهم بالغرفه ..
اخر شي طلع حسام ..
" عذراء تريد تبدل واني راح انتظرها بالاستقبال "
ردت خاله " نسر يگول خلي يبقى يمنا ع العشا .. الولد هنا كلهم وهذال هم راح يجي .. "

بقى حسام ورحت العذورة جانت تبدل.. لبست كلبيه وغسلت وجهها .. لفت شالها ..
صارت تحجيلي عن خالته وامه .. هديتها وكلتلها مادام الگمر وياج شلج بالنجوم ..

ضحكت " صايرة تنطين امثال .. "
ابتسمت " اي شعبالج ديله عيني لاتقهرين نفسج دشوفيه شلون خايف عليج وتخبل من وكعتي شالج ويفتر بيج .. حتى امه حجت عاط بيها وسكتها "

اتنهدت " همزين بيتنا وحدنا بس هم اخاف يتدخلن بحياتنا "

رديت " لاتخافين حسام شخصيته قويه مبينه ومايخلي احد يأذيج "

كملت وطلعت شافها ابتسم بسرعه نظراته الها وحدها تفسر الحب البداخله الها ..

سوينا عشا هنا البنات كلهن وازواجهن… وباتوا كلهم عندها ومن الصبح كلها راحت .

عذورة مامداومة نايمة..
بديت بحملة تنظيف .. نزلت اسراء مبدله وانيقه والغريب مخليه كحل ومكياج خفيف ..

صرت اباوع زين خاف اني مااشوف . انتبهتلي ضحكت " هااا حلوة ؟"
رديت " اي حلوة "
ردت " هيج تغير بسيط حبيت اغير "

رادت تخفي تغيرها بس هالشي واضح اكيد اكو حب بحياتها والا مستحيل هيج تتغير بيوم وليلة ..
فرحتلها لان هالشي خلاها تتغير للاحسن ..

خاله تطبخ واني بلشت بالبيت .. دنو طبعا وياي كملت امتحانات البكلوريا ..
ملوكة نايمة يم نسر ..

رن موبايل خاله ماتسمعه اخذته الها ..
لااراديا باوعت .. مكتوب ام هيام ..
بسرعة انقبض گلبي ..

نطيته الها شافته وباوعتلي " شتريد ؟؟ بس لاتسأل على ملوكة "

ردت عليها وصارت تحجي " لا والله دادة مااجت ولا شفناها . وابوها شلون خلاها… يستار شبيها هالبنية تخبلت .. شلون هيج تنزل راس ابوها ونسر اصلا مايريدها وين تروح يعني ؟"

سدته واني عيني على حلكها اريدها تنطق ..
سألتها ومااتحملت " هديل شبيها ووين راحت ؟"

ردت بتوتر " امها تگول كسرت كلام ابوها ولمت غراضها واجت لهنا .. وابوها متخربط وحالف ماترجع بعد ومتبري منها .. "

حسيت الخبر مثل الصاعقة اجاني ..
ركضت گعدت نسر وهو نايم ..
فز " شكو ؟"
رديت واني معصبه " وحق الله لو اجت واستقبلتها ماتشوف خيالي بعد هالمرة تخسرني نسر فهمت تخسرني "
رد " هي منو شبيج ؟"


يتبع……